᥈ ᤁᤥᤖᤴᤌᤡ 9 - LIFOTNT

ᤕᤖᤢᤛᤗᤧᤔᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ᤕᤠᤱ

¹ ᤕᤖᤢᤛᤗᤧᤔᤛᤔᤠ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤗᤠᤃᤡ ᤁᤢᤓᤠ᤹ ᤕᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤡᤏᤡ᤹ ᤛᤠᤵᤔᤠᤖ ᤏᤧᤔᤠ ᤀᤡᤱᤃᤠ᤹ ᤆᤠᤜᤠᤒᤠ ᤔᤧᤈᤥᤰᤏᤧᤴᤗᤥ॥

² ᤌᤣᤀᤠᤱᤓᤧᤸᤗᤧ ᤁᤢᤓᤠ᤹ ᤐᤡᤖᤢᤶᤛᤡᤶ ᤁᤧᤗ᤹ᤒᤠ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤏᤡᤛᤢᤱ. ᤜᤧᤰᤁᤩᤠᤱ ᤂᤡᤏᤡ᤹ ᤀᤰᤂᤤᤕᤠ ᤌᤢᤶᤔᤥ ᤁᤧᤘᤠ᤹ᤒᤠᤜᤠ᤹ ᤁᤢᤓᤠ᤹ ᤐᤡᤔᤠ ᤕᤠ᤺ᤶᤒᤰᤁᤥ ᤔᤡ᤺ᤳᤗᤡᤱᤅᤠᤱᤎᤥᤀᤣ ᤕᤠᤖᤡᤵ ᤁᤧᤘᤕᤡᤒᤠᤸᤗᤧ ᤀᤡᤱᤃᤠ᤹ ᤀᤠᤏᤧᤒᤥ ᤐᤥᤖᤧᤀᤠᤱ ᤘᤠ᤹ᤒᤠ ᤐᤠ᤺ᤴᤏᤡᤴ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤔᤏᤠᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤢᤓᤠ ᤐᤡᤔᤠ ᤕᤠᤖᤡᤵ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤀᤥ ᤕᤖᤡᤰᤗᤧ ᤁᤢᤓᤠ ᤐᤡᤔᤠ ᤕᤠᤶᤈᤠᤱᤘᤠ ᤔᤧᤄᤥᤛᤢᤀᤠᤱ ᤔᤧᤘᤠ᤹ᤖᤥ॥

³ ᤜᤧᤰᤁᤩᤠᤱ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤀᤠᤏᤧᤒᤥ ᤐᤥᤖᤧᤒᤠ ᤐᤠ᤺ᤴᤏᤡᤴ ᤜᤏᤧ ᤔᤧᤒᤥᤱᤅᤡᤴᤗ ᤁᤖ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤕᤠᤖᤡᤵ ᤁᤧᤒᤥ᤺ᤰᤂᤡᤀᤠᤱ ᤁᤧᤕᤢᤅᤡᤖ ᤑᤠ᤹ᤀᤠᤱ ᤋᤃᤡᤀᤣ ᤁᤵᤔᤥᤗᤠᤶ ᤑᤢ᤹ᤏᤢᤛᤠ᤹ᤜᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤗ ᤐᤳᤋᤠᤖᤥ॥

⁴ ᤁᤢᤓᤠ ᤔᤧᤛᤣᤍᤥᤏᤡᤕᤠᤒᤠ ᤔᤏᤠᤜᤠ᤹ ᤀᤡᤱᤃᤠ᤹ᤏᤢ ᤂᤧᤵᤔᤥ ᤔᤧᤍᤠ᤺ᤸᤗᤧ ᤀᤡᤱᤃᤠ᤹ ᤔᤧᤳᤋᤢᤱᤛᤡᤱᤒᤠ ᤁᤢᤀᤡᤛᤡᤰ ᤂᤧᤴ ᤕᤠ᤺ᤶᤒᤰᤁᤥ ᤕᤠᤖᤡᤵ ᤔᤧᤶᤒᤥᤱᤅᤣ ᤁᤧᤘᤕᤡᤒᤠ ᤁᤧᤶᤍᤢᤔᤡᤏᤧ ᤑᤠ᤹ᤃᤪ ᤀᤠᤏᤡᤃᤧᤖᤰ ᤔᤣ᤺ᤴ. ᤁᤖ ᤂᤡᤏᤡ᤹ᤀᤠᤱ ᤛᤠ᤹ᤖᤡᤰ ᤛᤡᤖᤡᤱᤔᤔᤥ ᤁᤧᤎᤩᤧ᤹ᤀᤡᤖᤥ॥

⁵ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤔᤠᤱᤜᤧᤰ ᤁᤧᤈᤥᤃᤢᤶᤒᤠ ᤁᤢᤀᤡᤛᤡᤰ ᤁᤢᤓᤠ᤹ ᤕᤠᤱᤅᤡᤴ ᤕᤠᤖᤡᤵ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤧᤴ ᤑᤢ᤹ᤏᤢᤛᤠ᤹ᤜᤠ᤹ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤀᤥ ᤐᤠᤱᤔᤠᤛᤡ ᤏᤢᤒᤠ ᤐᤥᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤜᤧᤰᤁᤣ᤺ᤸᤗᤧ ᤂᤧᤴ ᤁᤢᤓᤠ᤹ ᤕᤠᤱᤅᤡᤱᤃ ᤏᤡᤱᤘᤠ᤹ ᤋᤢᤰᤗ ᤔᤣ᤺ᤴ. ᤁᤖ ᤏᤡᤱᤘᤠ᤹ ᤜᤶᤔᤠᤀᤠᤱ ᤐᤡᤔᤠ ᤐᤥᤱᤗᤥ॥

⁶ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧ ᤆᤩ᤹ᤖᤰ ᤕᤠ᤹ᤖᤡ᤺ᤶᤒᤧᤴ ᤜᤣ᤹ᤖᤢ. ᤂᤧᤸᤗᤧ ᤆᤩ᤹ᤖᤰ ᤆᤠ ᤛᤢᤵᤛᤢ᤹ᤖᤥ॥ ᤀᤠᤳᤋᤡᤸᤗᤧ ᤕᤖᤡᤰ ᤕᤠ᤹ᤖᤡ᤺ᤶᤒᤠ ᤜᤣ᤹ᤖᤢ. ᤂᤧᤸᤗᤧ ᤕᤖᤡᤰᤁᤣ ᤆᤠ ᤛᤢᤵᤛᤢ᤹ᤖᤥ॥

⁷ ᤁᤧᤖᤧᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤴᤍᤧᤴᤏᤣ ᤔᤣ᤺ᤴ. ᤁᤖ ᤁᤶᤔᤩᤠᤰ ᤐᤡᤔᤠ ᤛᤢᤰᤋᤢᤶᤒᤧ᤹ ᤗ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ᤀᤥ ᤏᤡ᤺ᤴᤎᤥ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤔᤧᤒᤡᤖᤢᤖᤖᤥ॥ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤛᤡᤖᤠ᤹ ᤌᤠᤱᤗ ᤐᤡᤖᤢ᤹. ᤂᤧᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤋᤢᤰᤋᤢ᤹ᤖᤥ॥

⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥᤃᤡᤒᤠᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤧᤒᤡᤖᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠ ᤐᤠ᤺ᤴᤜᤠ᤹ ᤛᤍᤠᤍᤡᤱ ᤁᤧᤃᤳᤋᤢᤶᤔᤠᤱ ᤁᤠᤰ ᤏᤢᤒᤠ ᤕᤠ᤺ᤶᤒᤰᤁᤥ ᤕᤖᤡᤰ ᤐᤡᤔᤠ ᤁᤧᤛᤢᤰᤋᤢᤶᤗᤥ॥

⁹ ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤏᤡᤱᤘᤠ᤹ ᤁᤧᤜᤶᤒᤠᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤁᤧᤒᤡᤒᤠᤜᤠ᤹ᤖᤧ ᤂᤢᤏᤡ᤹ ᤏᤢᤒᤠ ᤕᤠ᤺ᤶᤒᤰᤁᤡᤴ ᤛᤍᤠᤍᤡᤱ ᤛᤍᤠᤍᤡᤱ ᤘᤠ᤹ᤖᤥ॥”

¹⁰ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠ᤺ᤴᤁᤧᤔᤒᤠᤜᤠ᤹ ᤕᤠ᤹ᤖᤡ᤺ᤶᤒᤠ ᤐᤡᤖᤢᤛᤡ ᤜᤧᤰᤁᤩᤠᤱ ᤆᤠᤔᤠ ᤁᤢᤈᤠ ᤐᤡᤖᤢᤛᤡ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ᤀᤣ ᤂᤡᤏᤡ᤹ ᤁᤧᤃᤳᤋᤢᤶᤒᤠᤴᤏᤠᤱ ᤑᤥᤛᤢ᤹ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤢᤒᤠ ᤕᤠ᤺ᤶᤒᤰᤁᤡᤴ ᤑᤥᤛᤢ᤹ ᤁᤧᤒᤡᤖᤡ᤹ᤖᤥ॥

¹¹ ᤂᤡᤏᤡ᤹ᤃ ᤏᤡᤱᤘᤠ᤹ ᤜᤶᤔᤠᤀᤠᤱ ᤐᤡᤔᤠ ᤁᤧᤛᤢᤰᤐᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤐᤖᤡᤰᤗᤧ ᤔᤢ᤹ᤀᤡᤛᤠᤒᤠ ᤁᤧᤈᤥᤃᤡ᤹ᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤂᤡᤏᤡ᤹ ᤁᤧᤛᤢᤵᤛᤢᤶᤒᤠ ᤁᤢᤓᤠ᤹ ᤕᤠᤱᤅᤡᤴ ᤆᤠᤜᤠᤒᤥ ᤁᤧᤘᤠ᤹ᤒᤠᤜᤠ᤹ ᤐᤡᤖᤢᤶᤛᤡᤶᤒᤧᤸᤗᤧ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢ᤹ᤖᤥ॥

¹² ᤂᤡᤏᤡ᤹ ᤁᤧᤛᤢᤵᤛᤢᤶᤒᤠ ᤁᤢᤓᤠ᤹ ᤕᤠᤱᤅᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤆᤠᤜᤠᤒᤠ ᤔᤧᤈᤥᤃᤧᤀᤠᤱ ᤔᤧᤘᤕᤧᤒᤠᤀᤥ ᤁᤢᤓᤠ᤹ᤖᤰ ᤔᤧᤒᤥ᤺ᤰᤂᤧᤴ ᤁᤖ ᤁᤴ ᤕᤠ᤺ᤶᤒᤰᤁᤡᤸᤗᤧᤃ ᤕᤖᤡᤰ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤔᤧᤒᤡᤖᤢᤖᤥ॥

¹³ ᤁᤴ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥᤗᤠᤶ ᤂᤡᤏᤡ᤹ ᤀᤠᤰᤋᤱᤒᤠ ᤁᤧᤈᤥᤃᤡ᤹ ᤁᤧᤗ᤹ᤒᤠᤴ ᤘᤣ᤹ᤜᤠ᤹ ᤀᤥᤛᤣ᤺ᤴᤃᤧᤎᤠᤰᤋᤢᤶᤛᤡᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤏᤛᤠᤴ ᤁᤧᤈᤥᤃᤢᤶᤔᤠᤱ ᤀᤡᤱᤈᤠᤱᤃᤧᤶᤒᤠ ᤁᤧᤒᤥ᤺ᤰᤂᤡᤒᤠᤴ. ᤜᤧᤰᤁᤩᤠᤱ ᤁᤧᤃᤳᤋᤢᤶᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ ᤏᤡᤱᤘᤠ᤹ ᤁᤧᤜᤴᤍᤢᤶᤔᤠᤱ ᤁᤧᤖᤧᤰ ᤁᤧᤜᤠ᤺ᤳᤋᤢᤶᤛᤡᤶᤒᤠᤴ ᤔᤧᤏᤡᤛᤢᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢ᤹ᤖᤥ॥

¹⁴ ᤜᤧᤰᤁᤩᤠᤱ ᤂᤡᤏᤡ᤹ᤀᤥᤗᤠᤶ ᤁᤧᤍᤠᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧᤃ ᤛᤡᤰᤗᤢᤱᤔᤥᤗᤠᤶ ᤂᤡᤏᤡ᤹ ᤗᤠᤃᤡ ᤋᤢᤘᤠ ᤔᤧᤈᤥᤃᤢ᤹ᤖᤥ॥

¹⁵ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤁᤢᤒᤷᤎᤠᤶᤔᤡᤸᤗᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ᥄