᥈ ᤁᤥᤖᤴᤌᤡ 8 - LIFOTNTᤏᤡᤱᤘᤠ᤹ ᤜᤶᤔᤠᤀᤠᤱ ᤐᤡᤔᤠ 1 ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤛᤣᤛᤣᤜᤢᤵᤗᤰᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤂᤥᤛᤧᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥ 2 ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤕᤧᤳᤋᤢᤰᤂᤣ ᤔᤧᤍᤢᤔᤢᤛᤠᤱ ᤔᤧᤛ᤺ᤳᤋᤧ. ᤜᤧᤰᤁᤩᤠᤱ ᤕᤠᤱᤔᤧᤛᤠ᤹ᤖᤧᤛᤠᤱ ᤀᤠᤳᤋᤠᤳᤋᤠᤴᤏᤣ ᤂᤢᤏᤡ᤹ ᤏᤡᤱᤘᤠ᤹ ᤔᤧᤜᤴᤍᤢᤀᤠᤱ ᤀᤠᤳᤋᤠᤳᤋᤠᤴᤏᤣ ᤁᤢᤓᤠ᤹ ᤔᤧᤒᤡᤖᤢᤖᤥ॥ 3 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤢᤰᤛᤢᤰᤗᤰ ᤔᤣ᤺ᤴ. ᤁᤖ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤒᤠᤅᤣ ᤂᤢᤏᤡ᤹ ᤏᤡᤱᤘᤠ᤹ ᤔᤧᤜᤴᤍᤢᤀᤠᤱ ᤔᤧᤒᤡᤖᤢᤒᤠᤴ ᤛᤧᤰᤂᤠᤀᤣ ᤐᤠ᤺ᤳᤋᤢᤱᤗᤥ॥ 4 ᤂᤧᤱᤜᤠ᤹ᤖᤧ ᤕᤖᤢᤛᤗᤧᤔᤛᤔᤠ ᤏᤛᤠᤏᤡᤒᤠᤜᤠ᤹ ᤀᤠᤏᤡᤃᤧᤀᤠᤱ ᤁᤢᤓᤠ᤹ ᤐᤡᤔᤠ ᤛᤢᤕᤧᤶ ᤀᤠᤒᤡᤖᤧᤶᤔᤧ᤹ ᤗ᤹ᤖᤡᤰ ᤀᤠᤏᤡᤃᤣ ᤀᤧᤳᤗᤧᤱ ᤐᤣᤗᤡ ᤔᤧᤓᤠᤰᤋᤡᤃᤧᤖᤥ॥ 5 ᤀᤠᤸᤗ ᤂᤧᤱᤜᤠ᤹ᤖᤧᤃ ᤀᤠᤏᤡᤃᤣ ᤏᤡᤱᤛᤠᤱ ᤆᤥ᤺ᤰᤔᤏᤠᤒᤠ ᤜᤧᤰᤁᤣᤖᤰ ᤔᤧᤴᤈᤥᤃᤢᤴᤗᤥ. ᤁᤖ ᤍᤠᤱᤒᤠᤀᤥ ᤋᤃᤡ ᤔᤧᤒᤡᤛᤡᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤀᤠᤏᤡᤃᤣ ᤁᤠᤰ ᤐᤠ᤺ᤴᤜᤠ᤹ ᤔᤧᤄᤧᤵᤛᤢ॥ 6 ᤜᤧᤰᤁᤣ᤺ᤸᤗᤧ ᤋᤡᤋᤛᤖᤧᤀᤣ ᤂᤡᤏᤡ᤹ᤀᤥ ᤋᤃᤡ ᤜᤧᤰᤁᤣ ᤆᤥ᤺ᤰᤔᤠ ᤛᤢᤈᤠ ᤁᤧᤒᤡᤖᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤢᤒᤠ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤛᤢᤵᤔᤠᤖᤧ ᤗᤠᤃᤡ ᤁᤢᤓᤠ᤹ ᤁᤧᤒᤡᤖᤡᤖ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤑᤠᤰᤋᤢᤶᤒᤧᤖᤥ॥ 7 ᤂᤡᤏᤡ᤹ᤃ ᤁᤠᤰ ᤐᤠ᤺ᤴᤜᤠ᤹ ᤛᤠ᤹ᤖᤡᤰ ᤏᤢᤖᤡᤰ ᤁᤧᤈᤥᤃᤢᤶᤗᤥ—ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤍᤡ᤹. ᤏᤢ᤺ᤖᤡᤰᤁᤠᤱ ᤁᤧᤒᤠᤖᤡ᤹. ᤆᤠ᤺ᤵᤐᤠ ᤁᤧᤈᤥᤃᤡ᤹. ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤁᤢᤓᤠ᤹ ᤐᤡᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤃᤳᤋᤢᤶ ᤜᤧᤰᤁᤩᤠᤱ ᤏᤢᤖᤡᤰᤁᤠᤱ ᤗᤢᤱᤔᤠ᤹ ᤕᤠᤵᤔᤡ ᤁᤧᤍᤢᤰᤋᤡ᤹॥ ᤜᤧᤰᤁᤣᤗ᤹ᤖᤡᤰᤁᤣ ᤁᤴ ᤐᤡᤔᤠ ᤏᤢᤒᤠ ᤕᤠ᤺ᤶᤒᤰᤁᤥᤀᤠᤱ ᤀᤠᤳᤋᤠᤳᤋᤠᤴᤏᤣ ᤂᤡᤏᤡ᤹ ᤏᤡᤱᤘᤠ᤹ ᤜᤴᤍᤧᤶᤔᤧ᤹ᤀᤠᤱ ᤐᤡᤖᤧᤶᤔᤧ᤹ᤀᤥ॥ 8 ᤁᤱᤃ ᤀᤡᤱᤃᤠ᤹ ᤂᤡᤏᤡ᤹ ᤁᤧᤈᤥᤃᤢᤶᤗᤀᤣ ᤐᤥᤱ ᤁᤧᤗ᤹ᤒᤠ ᤀᤡᤱᤈᤠᤱ ᤐᤡᤏᤡᤱᤒᤠ ᤔᤣ᤺ᤴᤗᤥ. ᤁᤖ ᤘᤣ᤹ᤜᤠ᤹ᤖᤧ ᤛᤡᤰᤗᤢᤱᤔᤥᤗᤠᤶᤒᤠᤀᤣ ᤁᤢᤓᤠ᤹ ᤐᤡᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤃᤳᤋᤢᤒᤠᤴᤏᤢ ᤋᤱᤄᤢᤱᤗ ᤂᤡᤏᤡ᤹ ᤘᤣ᤹ᤜᤠ᤹ ᤛᤧᤰᤂᤠᤀᤣ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤛᤠ᤹ᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠᤖᤥ॥ 9 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ ᤂᤢᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥᤃᤧᤛᤠᤱ. ᤁᤢᤕᤠᤱᤛᤠ᤹ᤔᤠᤴᤗᤠᤶᤒᤠ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤂᤡᤏᤡ᤹ ᤗᤠᤃᤡ ᤂᤢᤏᤧ᤹ ᤕᤠᤱᤃᤧᤛᤠ᤹ᤒᤠ ᤐᤥ᤺ᤰᤂᤧᤖᤥ॥ 10 ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤥᤃ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤛᤢᤈᤠ ᤐᤡᤏᤡᤱᤗᤥ—ᤔᤡ᤺ᤳᤗᤡᤱ ᤂᤡᤏᤡ᤹ ᤁᤧᤜᤣ᤺ᤰᤋᤢᤶᤒᤠ ᤐᤡᤔᤠ ᤕᤠ᤺ᤶᤒᤰᤁᤡᤴ ᤀᤠᤸᤗ ᤁᤧᤛᤢᤖᤢᤶᤔᤡᤸᤗᤧ ᤏᤢᤒᤠ ᤐᤥᤱᤗᤥ॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤐᤡᤔᤥᤖᤰ ᤔᤣ᤺ᤴ. ᤁᤖ ᤜᤧᤰᤋᤱᤒᤠ ᤁᤢᤓᤠ᤹ ᤐᤡᤔᤠ ᤏᤡᤱᤘᤠ᤹ ᤆᤥ᤺ᤰᤔᤠᤀᤥᤀᤠᤱ ᤁᤠᤰᤏᤢ ᤋᤃᤡ ᤁᤧᤘᤕᤡᤖᤥ॥ 11 ᤀᤠᤸᤗ ᤂᤧᤴ ᤕᤠ᤺ᤶᤒᤰᤁᤡᤴ ᤛᤢᤖᤧᤶᤔᤧ᤹ᤀᤥ॥ ᤜᤧᤰᤁᤣ᤺ᤸᤗᤧ ᤐᤡᤔᤠ ᤏᤡᤱᤘᤠ᤹ ᤆᤥ᤺ᤰᤔᤠᤀᤥ ᤕᤠᤖᤡᤵ ᤁᤧᤘᤕᤡᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤁᤧᤃᤳᤋᤢᤶᤒᤠᤀᤥᤗᤠᤶᤔᤣ ᤂᤧᤴ ᤕᤠ᤺ᤶᤒᤰᤁᤡᤴ ᤆᤢ᤺ᤳᤗᤖᤥ॥ 12 ᤂᤡᤏᤡ᤹ ᤐᤡᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶᤏᤧ ᤑᤠ᤹ᤃᤪ ᤆᤩᤠ ᤁᤧᤃᤳᤋᤢᤶ ᤒᤠ ᤂᤧᤴᤗᤠᤶᤒᤠ ᤁᤧᤒᤡᤖᤢᤶᤒᤠᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤠ᤺ᤰᤋᤢ᤹ᤖᤥ. ᤁᤖ ᤁᤧᤱᤃᤳᤋᤢᤶᤔᤡᤴᤒᤠᤴ ᤔᤧᤃᤥ᤺ᤳᤋᤢᤴᤗᤥ॥ 13 ᤂᤡᤏᤡ᤹ ᤘᤣ᤹ᤜᤠ᤹ ᤕᤠᤱᤕᤠᤱ ᤔᤧᤒᤥᤱᤗ ᤑᤠ᤹ᤀᤠᤱ ᤕᤖᤡᤰ ᤁᤧᤒᤡᤖᤢᤶᤛᤡᤶᤒᤠᤸᤗᤧ ᤋᤢᤰᤂᤣ ᤁᤧᤈᤩᤧ᤹ᤀᤡᤖ ᤁᤧᤗ᤹ᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤃ ᤜᤥᤵᤗᤥ. ᤁᤖ ᤁᤧᤖᤧᤰᤁᤥ ᤁᤢᤍᤱᤒᤠ ᤐᤥᤱᤗᤖᤥ॥ 14 ᤁᤖ ᤁᤴ ᤕᤧᤶᤔᤥ ᤂᤡᤏᤡ᤹ ᤕᤖᤡᤰ ᤁᤧᤃᤳᤋᤢᤶᤒᤠᤗᤠᤶ ᤁᤧᤛᤠᤰᤐᤥ ᤁᤧᤘᤠ᤹ᤒᤠᤜᤠ᤹ ᤁᤢᤓᤠ᤹ ᤐᤡᤔᤠ ᤁᤧᤛᤢᤰᤋᤢᤶᤛᤡᤶ. ᤜᤧᤰᤁᤣᤗ᤹ᤖᤡᤰ ᤋᤠ᤺ᤴᤍᤡ ᤂᤡᤏᤡ᤹ ᤁᤧᤛᤠᤰᤐᤥ ᤁᤧᤘᤕᤡᤸᤗᤧ ᤂᤧᤱᤜᤠ᤹ᤖᤧ ᤕᤖᤡᤰ ᤔᤧᤃᤳᤋᤢᤒᤠᤗᤠᤶᤒᤠ ᤁᤢᤓᤠ᤹ ᤐᤡᤔᤠ ᤁᤧᤶᤛᤢᤰᤋᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰᤁᤥ ᤁᤢᤍᤱᤒᤠ ᤐᤥᤱᤗᤥ॥ 15 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤠᤳᤋᤡᤸᤗᤧ ᤕᤖᤡᤰ ᤛᤢᤵᤛᤢ. ᤂᤧᤸᤗᤧᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤧᤒᤥ᤺ᤰᤂᤧᤴ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤆᤩ᤹ᤖᤰ ᤛᤢᤵᤛᤢ. ᤂᤧᤸᤗᤧᤴᤏᤠᤱ ᤛᤠ᤹ᤖᤡᤰ ᤛᤢ᤺ᤸᤗᤡᤰ ᤔᤧᤒᤥ᤺ᤰᤂᤧᤴᤗᤥ॥” ᤋᤡᤋᤛᤧᤴ ᤁᤥᤖᤴᤌᤡ ᤕᤧᤰᤕᤰᤁᤥ ᤔᤧᤒᤠᤱᤄᤢ᤹ 16 ᤀᤡᤱᤃᤠ᤹ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤁᤢᤀᤡᤛᤡᤰ ᤋᤡᤋᤛᤧᤴᤏᤠᤱ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤵᤔᤠ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤱᤗᤥ॥ 17 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤡᤏᤡ᤹ ᤋᤢᤶᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤐᤣᤗᤡᤴ ᤋᤧᤴᤍᤡᤱᤖᤰ ᤔᤧᤈᤥᤃᤢᤴ. ᤁᤖ ᤂᤢᤏᤧ᤹ ᤀᤠᤒᤠᤅᤣ ᤂᤡᤏᤡ᤹ ᤋᤢᤶᤛᤧ ᤋᤠᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹ᤖᤥ॥ 18 ᤜᤧᤰᤁᤩᤠᤱ ᤀᤠᤏᤡᤃᤣ ᤂᤢᤏᤧ᤹ᤏᤢᤀᤣ ᤁᤠᤰ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤥ ᤁᤧᤀᤡᤱᤒᤠ ᤘᤣ᤹ ᤏᤢᤛᤠ᤹ᤎᤡᤰ ᤐᤠᤱᤄᤢᤶᤒᤧᤖ ᤐᤳᤇᤡᤃᤧᤖᤥ॥ 19 ᤂᤧᤶᤔᤩᤠᤰᤗᤰ ᤔᤣ᤺ᤴ. ᤁᤖ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤂᤧᤴ ᤏᤢᤛᤠ᤹ᤀᤡᤱᤃ ᤁᤢᤓᤠ᤹ ᤕᤠᤱᤅᤡᤴ ᤕᤖᤢᤛᤗᤧᤶᤔᤥ ᤋᤣ᤹ᤔᤠᤖᤧ ᤗᤠᤃᤡ ᤀᤠᤏᤡᤃᤧᤏᤢ ᤐᤣ᤺ᤰᤗ ᤑᤠ᤹ᤀᤠᤱ ᤔᤧᤛᤣᤃᤢᤀᤠᤱ ᤘᤕᤧᤖᤥ॥ ᤁᤴ ᤔᤠᤱᤛᤣᤘᤠ᤺ᤱᤃ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥᤔᤠ ᤑᤠ᤹ᤀᤠᤱ ᤜᤧᤰᤁᤩᤠᤱ ᤀᤠᤏᤡᤃᤣ ᤘᤣ᤹ᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤏᤡᤱᤘᤠ᤹ ᤁᤳᤋᤢᤶᤒᤧ ᤁᤧᤗ᤹ᤒᤠ ᤀᤥᤛᤣ᤺ᤴᤍᤠᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤆᤥᤃᤢᤶᤒᤧᤖᤥ॥ 20 ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ ᤔᤧᤜᤴᤍᤢᤀᤠᤱ ᤔᤧᤒᤡᤖᤢᤒᤠ ᤁᤴ ᤕᤖᤡᤰ ᤁᤢᤓᤠ᤹ ᤕᤠᤱᤅᤡᤴ ᤋᤣ᤹ᤖᤢᤶᤒᤧᤀᤠᤱ ᤔᤏᤠᤜᤠ᤹ ᤜᤠ᤺ᤳᤋᤢᤶᤛᤡᤶᤒᤧᤸᤗᤧ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤆᤧ᤹ᤕᤠ ᤀᤡᤱᤍᤥ ᤐᤠ᤺ᤵᤔᤠ ᤔᤧᤱᤄᤥᤛᤢᤴᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥ 21 ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤍᤠᤱᤒᤠᤸᤗᤧ ᤁᤢᤏᤡᤔᤠᤀᤥᤖᤰ ᤔᤣ᤺ᤴ. ᤁᤖ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤸᤗᤧᤀᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤡᤃᤧᤖᤥ॥ 22 ᤜᤧᤰᤁᤩᤠᤱ ᤂᤢᤴᤇᤡ᤹ᤏᤢ ᤘᤣ᤹ ᤏᤢᤛᤠ᤹ᤎᤡᤰᤁᤠᤱ ᤐᤠᤱᤄᤢᤶᤒᤧᤖ ᤐᤳᤇᤡᤃᤧᤖᤥ॥ ᤂᤢᤏᤧ᤹ᤃ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥ ᤕᤠᤶᤈᤠᤱᤘᤠ ᤁᤢᤎᤡᤶ ᤆᤥᤰ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤕᤖᤡᤰ ᤐᤖᤡᤰᤗᤧ ᤕᤠᤵᤔᤡ ᤀᤥᤛᤣ᤺ᤴᤎᤠᤰᤋᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤶᤍᤠᤱ ᤐᤕᤶ ᤋᤠ᤺ᤰᤐᤥ ᤕᤢᤰᤂᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤕᤠᤶᤈᤠᤱᤘᤠ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 23 ᤋᤡᤋᤛᤧᤱᤃ. ᤀᤡᤱᤃᤠ᤹ᤏᤢ ᤛᤥᤖᤡᤰᤁᤣ ᤂᤡᤏᤡ᤹ ᤁᤢᤓᤠ᤹ ᤐᤡᤔᤠᤀᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤴᤈᤢᤶᤗᤥ॥ ᤜᤧᤰᤁᤩᤠᤱ ᤂᤧᤴ ᤏᤢᤛᤠ᤹ᤜᤠ᤹ᤃ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤀᤡᤱᤛᤠᤒᤠᤛᤡ ᤏᤢ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱ ᤁᤧᤈᤥ᤺ᤰᤐᤠᤛᤡᤖᤥ॥ 24 ᤂᤧᤸᤗᤧᤆᤥᤃᤢᤸᤗᤧ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤂᤡᤏᤡ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤶᤛᤡᤶᤒᤠᤴ ᤏᤢ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤀᤠᤏᤡᤃᤣ ᤏᤧᤒᤥ ᤐᤥᤖᤧᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ᤀᤥ ᤁᤧᤍᤠᤒᤠᤜᤠ᤹ ᤀᤥᤛᤣ᤺ᤴᤎᤠᤰᤋᤧᤶᤛᤡᤶᤔᤧ᤹ᤀᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.