᥈ ᤁᤥᤖᤴᤌᤡ 7 - LIFOTNT

¹ ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤀᤠᤏᤡ᤹ᤃ ᤁᤴ ᤔᤠᤱᤜᤧᤰᤜᤠ᤹ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰ ᤏᤢ ᤕᤠᤶᤛᤠᤶ ᤁᤧᤈᤡ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶ ᤛᤣᤛᤣ ᤆᤥ᤺ᤰᤁᤠᤛᤡᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤖ ᤑᤠ᤹ᤀᤠᤱ ᤀᤠᤏᤡ᤹ ᤛᤣᤛᤣ ᤐᤥ᤺ᤰᤂᤡᤖ ᤐᤡᤃᤡᤖᤥ॥

ᤐᤠᤘᤗᤧᤴ ᤛ᤺ᤳ

² ᤀᤠᤏᤡᤃᤣ ᤗᤠᤃᤡ ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤕᤶᤒᤠ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤣ ᤂᤡᤏᤡ᤹ ᤜᤠ᤺ᤳᤋᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤶᤔᤧᤳᤋᤣ ᤘᤕᤡᤃᤧ. ᤂᤡᤏᤡ᤹ ᤜᤠ᤺ᤳᤋᤠᤱ ᤑᤧᤳᤔᤧᤸᤗᤠ᤺ᤴᤏᤣ ᤘᤕᤡᤃᤧ. ᤜᤧᤰᤁᤩᤠᤱ ᤌᤧᤔᤠᤀᤡ ᤂᤥᤔᤠ ᤑᤠ᤹ᤀᤠᤱ ᤂᤡᤏᤡ᤹ ᤜᤠ᤺ᤳᤋᤠᤱ ᤀᤡᤱᤔᤧᤸᤗᤧᤰᤁᤣ ᤘᤕᤡᤃᤧᤖᤥ॥

³ ᤀᤡᤱᤃᤠ᤹ᤃ ᤂᤡᤏᤡ᤹ ᤀᤠᤵᤋᤡᤰ ᤁᤢ᤺ᤳᤏᤡᤱ ᤑᤠ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤱᤒᤠ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤂᤡᤏᤡ᤹ᤏᤢ ᤜᤡᤅᤡᤃᤧᤛᤠᤱ ᤛᤩᤧ᤹ᤀᤡᤃᤧᤛᤠᤱ ᤀᤠᤏᤡᤃᤣ ᤛᤡᤰᤗᤢᤱᤔᤥ ᤁᤧᤘᤕᤡ᤹ ᤑᤠ᤹ᤀᤠᤱ ᤋᤃᤡᤀᤣ ᤐᤠ᤺ᤳᤋᤢᤱᤅᤠᤱ ᤘᤠ᤹ᤀᤠᤖᤥ॥

⁴ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤔᤧᤱᤃᤡᤀᤣ ᤐᤠ᤺ᤵᤔᤠ ᤛᤢᤰᤋᤢᤱ. ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤀᤠᤏᤧᤒᤥ ᤐᤥᤖᤧᤀᤠᤱ ᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤜᤠᤱᤜᤠᤱ ᤗ᤹ᤖᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤀᤠᤏᤡᤃᤣ ᤁᤧᤖᤧᤰ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤀᤡᤱᤃᤠ᤹ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥

⁵ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤔᤧᤛᤣᤍᤥᤏᤡᤕᤠ ᤌᤢᤶᤔᤥ ᤋᤩᤧ᤹ᤀᤡᤃᤧᤸᤗᤧ ᤁᤴ ᤀᤠᤏᤡᤃᤣ ᤏᤠᤛᤡᤱᤃᤧᤴ ᤌᤰᤁᤡᤸᤗᤧ ᤏᤠ᤺ᤶᤛᤡᤱᤔᤠ ᤕᤧᤶ ᤔᤧᤄᤥᤛᤢᤴ॥ ᤀᤠᤏᤡᤃᤧᤃ ᤁᤠᤰ ᤐᤡᤛᤠᤱᤗᤠᤶᤒᤠ ᤕᤧᤳᤋᤢᤰᤂᤣ᤺ᤸᤗᤧ ᤁᤒᤡᤃᤧᤖᤥ. ᤗᤠ᤺ᤰᤁᤠᤳᤋᤥ ᤐᤠ᤺ᤴᤎᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤛᤡᤃᤠᤱᤒᤠ ᤁᤡᤔᤠ ᤛᤡᤔᤧᤴ ᤘᤕᤧᤖᤥ॥

⁶ ᤁᤖ ᤏᤡᤱᤘᤠ᤹ ᤋᤢᤰᤔᤥ ᤁᤧᤎᤠᤒᤠᤜᤠ᤹ ᤜᤠᤱᤜᤠᤱ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤡᤋᤛᤖᤧ ᤁᤢᤍᤠᤔᤠᤀᤥᤗᤠᤶᤒᤠ ᤜᤠᤱᤜᤠᤱ ᤔᤧᤳᤋᤡᤃᤧᤖᤥ॥

⁷ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤠᤔᤠᤸᤗᤧᤖᤰ ᤔᤣ᤺ᤴ. ᤁᤖ ᤂᤡᤏᤡ᤹ ᤁᤧᤒᤡᤖᤢᤶᤒᤠ ᤜᤠᤱᤜᤠᤱ ᤗ᤹ᤔᤠ ᤀᤡᤱᤄᤱᤅᤡᤸᤗᤧᤀᤠᤱ ᤜᤠᤱᤜᤠᤱ ᤔᤧᤳᤋᤡᤃᤧᤖᤥ॥ ᤂᤧᤸᤗᤧᤃ ᤀᤠᤰᤂᤧᤴ ᤛᤠ᤹ᤖᤡᤰ ᤂᤡᤏᤡ᤹ ᤀᤡᤱᤃᤠ᤹ ᤕᤠᤵᤔᤡ ᤋᤢᤶᤔᤠ ᤏᤡᤱᤘᤠ᤹ ᤁᤧᤃᤳᤋᤢᤶ. ᤜᤧᤰᤁᤩᤠᤱ ᤋᤃᤡ ᤐᤣ᤺ᤴᤍᤧᤒᤠ ᤐᤠ᤺ᤴᤏᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤡᤰ ᤋᤢᤃᤧᤒᤠ ᤐᤠ᤺ᤴᤏᤡᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤰᤂᤧᤴ ᤛᤠ᤹ᤖᤡᤰ ᤁᤶᤒᤪᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤆᤧᤰᤋᤡᤃᤧᤖᤥ. ᤜᤧᤰᤁᤣ᤺ᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ ᤛᤠ᤹ᤖᤡᤰ ᤛ᤺ᤳᤋᤠᤱ॥

⁸ ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤛᤰᤀᤡᤱᤄᤱᤅᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤗᤥᤏᤧᤴᤗᤥ॥ ᤀᤠᤏᤡᤱᤘᤠ᤹ ᤗᤥᤛᤠᤱ ᤀᤡᤱᤃᤠ᤹ ᤛᤠᤵᤋᤢᤱᤒᤠ ᤛᤰᤀᤡᤱᤄᤱᤅᤡᤸᤗᤧ ᤛᤵᤑᤠᤖᤰ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥

⁹ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧ ᤑᤠ᤹ᤀᤠᤱ ᤀᤡᤱᤃᤠ᤹ ᤛ᤺ᤳᤋᤠᤱᤒᤠ ᤔᤣ᤺ᤴ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤋᤢᤃᤧᤒᤠᤸᤗᤧ ᤆᤥᤃᤢᤸᤗᤧ ᤗᤠᤕᤥᤗᤠᤶ ᤁᤧᤜᤡᤴᤍᤡ ᤑᤠ᤹ᤀᤠᤱᤏᤧ ᤀᤡᤱᤃᤠ᤹ ᤛ᤺ᤳᤋᤠᤱᤒᤠᤖᤥ॥ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤔᤠᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤘᤕᤧᤖᤥ. ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤧᤗᤠᤶᤒᤠ ᤂᤡᤏᤡ᤹ ᤀᤡᤶᤔᤥᤰ ᤌᤣᤀᤠᤱ ᤔᤧᤒᤥ᤺ᤰᤂᤧᤴᤗᤥ॥

¹⁰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤐᤠ ᤏᤡᤱᤘᤠ᤹ ᤋᤢᤰᤔᤠᤸᤗᤧᤃ ᤗᤠᤕᤥᤗᤠᤶ ᤔᤏᤠᤜᤠ᤹ ᤔᤧᤜᤡᤴ. ᤜᤧᤰᤁᤩᤠᤱ ᤂᤧᤴ ᤜᤡᤶᤔᤠᤸᤗᤧ ᤛᤧᤴᤗᤵᤐᤥ ᤗᤠᤶᤗᤥᤛᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤗᤥᤔᤠ ᤔᤧᤒᤥᤱᤏᤧᤸᤗᤥ॥ ᤁᤖ ᤔᤧᤴᤇᤠᤶ ᤕᤠᤵᤔᤡ ᤏᤡᤱᤘᤠ᤹ ᤁᤢᤀᤡᤛᤡ᤺ᤰᤐᤠ ᤏᤡᤱᤘᤠ᤹ ᤋᤢᤰᤔᤠᤸᤗᤧᤃ ᤛᤡᤔᤧᤴ ᤋᤠᤖᤢ᤹ᤖᤥ॥

¹¹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡ᤺ᤰᤐᤠ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤔᤠᤸᤗᤧ ᤂᤡᤏᤡ᤹ᤀᤥ ᤌᤧᤔᤠ ᤆᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤂᤧᤸᤗᤧ ᤁᤢᤛᤡᤰᤁᤧᤛᤶᤒᤠ ᤁᤧᤈᤥᤃᤡ᤹ᤀᤠᤱ ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤀᤥᤛᤣ᤺ᤴᤃᤧᤎᤠᤰᤛᤡᤱᤒᤠ ᤁᤧᤈᤥᤃᤡ᤹ᤖᤥ॥ ᤂᤧᤸᤗᤧ ᤂᤡᤏᤡ᤹ ᤗᤢᤶᤔᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ᤏᤢ ᤁᤢᤛᤠᤰᤁᤧᤴ ᤁᤧᤒᤥ᤺ᤰᤐᤠ ᤁᤧᤈᤥᤃᤡ᤹ᤖᤥ॥ ᤂᤧᤸᤗᤧ ᤗᤠᤕᤥᤸᤗᤧ ᤋᤠᤖᤢᤒᤠ ᤂᤢᤶᤍᤡᤱᤅᤡᤴᤏᤢ ᤁᤧᤃᤡᤒᤠ ᤁᤧᤛᤡᤒᤠ ᤁᤧᤈᤥᤃᤡᤖᤥ॥ ᤂᤧᤸᤗᤧᤃ ᤀᤡᤱᤃᤠ᤹ᤏᤢ ᤋᤢᤶᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤁᤧᤈᤥᤃᤡ᤹ᤖᤥ॥ ᤂᤧᤸᤗᤧ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤠᤛᤡ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤁᤧᤈᤥᤃᤡ᤹ᤖᤥ॥ ᤂᤡᤏᤡ᤹ᤃ ᤁᤠᤰ ᤐᤠ᤺ᤴᤏᤥ ᤛᤧᤰᤂᤠᤀᤣ ᤑᤥᤋᤩᤠ ᤔᤣ᤺ᤴᤏᤣᤒᤠ ᤐᤥᤱᤔᤠ ᤀᤥᤛᤣ᤺ᤴᤃᤧᤎᤠᤰᤁᤠᤛᤡᤖᤥ॥

¹² ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤐᤠᤴ ᤁᤧᤓᤣ᤺ᤶᤒᤠ ᤏᤢ ᤂᤧᤴ ᤐᤠ᤺ᤴᤗᤠᤶ ᤏᤡᤱᤘᤠ᤹ ᤋᤢᤰᤔᤠᤀᤥ ᤁᤧᤎᤠᤒᤠᤜᤠ᤹ᤖᤧ ᤗᤠᤃᤡ ᤂᤧᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤒᤠ ᤔᤣ᤺ᤴᤗᤥ॥ ᤁᤖ ᤂᤡᤏᤡ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤏᤡᤃᤣ ᤗᤧᤵᤔᤠᤱ ᤀᤠᤰᤂᤧᤴ ᤏᤢᤒᤠ ᤏᤡᤱᤘᤠ᤹ ᤁᤧᤃᤳᤋᤢᤶ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤛᤠᤵᤋᤢᤱᤒᤠᤖᤥ॥

¹³ ᤀᤠᤏᤡᤃᤧᤃ ᤁᤴᤗᤠᤶᤒᤠ ᤜᤠᤱᤜᤠᤱ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥ ᤂᤧᤴᤏᤢ᤺ᤸᤗᤧᤀᤠᤱ ᤁᤢᤳᤆᤡᤀᤥ ᤋᤡᤋᤛᤧᤴ ᤂᤡᤏᤡ᤹ ᤁᤧᤖᤧᤰᤗᤧ ᤜᤠᤱᤜᤠᤱ ᤁᤧᤔᤧᤳᤋᤢᤶᤔᤠᤱ ᤁᤢᤏᤡᤱᤘᤠ᤹ ᤁᤧᤍᤠᤛᤢᤶᤒᤠᤀᤥ ᤀᤠᤏᤡᤃᤣ ᤛᤠ᤹ᤖᤡᤰᤁᤣ ᤛ᤺ᤳᤋᤡᤃᤧᤀᤠᤱ ᤘᤕᤡᤃᤧᤖᤥ॥

¹⁴ ᤂᤡᤏᤡ᤹ ᤀᤠᤏᤧᤒᤥ ᤁᤧᤓᤥᤛᤢᤶᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤆᤧᤰᤋᤢᤱᤅᤠᤱ ᤘᤕᤠᤱ. ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤎᤠᤔᤥ ᤕᤠᤵᤔᤡ ᤁᤧᤴᤎᤠᤛᤡᤴᤗᤥ॥ ᤛᤍᤠᤍᤡᤱ ᤀᤠᤏᤡᤃᤧᤃ ᤂᤡᤏᤡ᤹ ᤛᤧᤰᤂᤠ ᤐᤠᤴ ᤔᤧᤳᤋᤠᤛᤡᤃᤧᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤀᤠᤏᤡᤃᤣ ᤏᤧᤒᤥ ᤁᤧᤓᤥᤛᤢᤶᤒᤠ ᤐᤠ᤺ᤴᤏᤡᤴ ᤋᤡᤋᤛᤧᤴ ᤆᤧᤰᤋᤢᤶᤒᤧᤒᤠ ᤜᤧᤰᤁᤣᤀᤣ ᤛᤧᤰᤂᤠ ᤁᤧᤖᤧᤒᤠᤴ ᤂᤢᤏᤧ᤹ ᤏᤡᤛᤢᤀᤠᤱ ᤘᤠ᤹ᤖᤥ॥

¹⁵ ᤜᤧᤰᤁᤩᤠᤱ ᤂᤡᤏᤡ᤹ ᤀᤡᤱᤈᤠᤱᤃᤧᤶᤒᤠ ᤁᤧᤒᤥ᤺ᤰᤂᤡᤀᤠᤱ ᤔᤡᤱᤛᤥ ᤀᤡᤱᤎᤠᤱᤏᤢ ᤁᤡᤔᤠ ᤕᤱᤔᤠᤀᤥ ᤗᤠᤱᤃᤧᤍᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡᤋᤢᤖ ᤂᤡᤏᤡ᤹ ᤗᤧᤵᤔᤠᤱ ᤂᤢᤏᤧ᤹ ᤁᤢᤔᤡ᤺ᤶᤈᤡᤴ ᤐᤥᤖ ᤐᤳᤗᤥ॥

¹⁶ ᤀᤡᤱᤃᤠ᤹ᤃ ᤂᤡᤏᤡ᤹ᤀᤥ ᤛᤧᤰᤂᤠᤀᤣ ᤋᤠ᤺ᤰᤐᤥ ᤆᤥ᤺ᤰᤔᤠ ᤛᤢᤰᤋᤢᤱ ᤑᤠ᤹ᤀᤠᤱ ᤛ᤺ᤳᤋᤠᤖᤥ॥