᥈ ᤁᤥᤖᤴᤌᤡ 6 - LIFOTNT

¹ ᤜᤧᤰᤁᤩᤠᤱ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤥᤖᤡᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤐᤥ᤺ᤰᤂᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤛᤢᤏᤠᤀᤡᤱᤅᤡᤸᤗᤧ ᤐᤠ᤺ᤴᤏᤡᤴ ᤂᤡᤏᤡ᤹ ᤜᤡᤱᤔᤴᤏᤥ ᤜᤏᤧ ᤐᤥᤱᤔᤠ ᤔᤧᤒᤠᤱᤄᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥

² ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤗᤠᤶ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. “ᤂᤧᤏᤧ᤹ ᤁᤧᤈᤥᤃᤢᤒᤠ ᤋᤢᤘᤠᤴ ᤛᤢᤕᤧᤶᤔᤥ ᤂᤧᤵᤛᤢᤱ. ᤜᤧᤰᤁᤩᤠᤱ ᤛᤧᤴᤗᤵᤐᤡᤸᤗᤧ ᤕᤧᤴᤏᤥ ᤂᤧᤏᤧ᤹ ᤁᤢᤓᤠ᤹ ᤐᤡᤏᤧᤖᤥ॥” ᤀᤡᤱᤃᤠ᤹ ᤛᤧᤰᤂᤠ ᤔᤧᤳᤏᤡᤱ. ᤀᤠᤸᤗᤥ ᤂᤧᤴ “ᤛᤢᤕᤧᤶᤔᤡᤴ” ᤋᤩᤧᤀᤠᤱ ᤘᤠ᤹॥ ᤛᤧᤴᤗᤵᤐᤡᤸᤗᤧᤴ ᤕᤧᤴᤏᤡᤴ ᤀᤠᤀᤡᤴᤏᤣᤖᤥ॥

ᤐᤠᤘᤗᤖᤧ ᤁᤢᤍᤢᤰᤂᤣ᤺ᤴ

³ ᤀᤠᤏᤡᤃᤣ ᤔᤠᤱᤛᤧᤘᤠᤀᤥ ᤀᤠᤵᤋᤡᤰ ᤔᤧᤍᤠᤏᤧᤴᤗ ᤑᤠ᤹ᤀᤠᤱ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤗᤠᤶᤔᤡᤴᤏᤠᤱ ᤔᤧᤜᤶᤛᤢᤶᤒᤧᤴᤗᤥ॥

⁴ ᤁᤖ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤀᤣᤒᤠ ᤁᤢᤛᤧᤘᤠᤖᤥᤒᤠᤛᤡᤃᤧ ᤑᤠ᤹ᤀᤠᤱ ᤁᤠᤰ ᤐᤖᤡᤰᤗᤧ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤰᤁᤠᤛᤡᤃᤧᤖᤥ॥ ᤀᤠᤏᤡᤃᤣ ᤁᤠᤰ ᤋᤢᤰᤂᤣ ᤆᤩᤧ᤹ᤀᤡᤃᤧᤸᤗᤧ. ᤁᤧᤛᤠᤰᤐᤠ ᤐᤠᤴ ᤋᤢᤔᤢᤶᤒᤧᤸᤗᤧ ᤜᤧᤰᤁᤩᤠᤱ ᤏᤡᤱᤘᤠ᤹ ᤐᤱᤛᤡᤱᤅᤡᤸᤗᤧ ᤛᤠ᤹ᤖᤡᤰ ᤏᤠᤛᤡ ᤌ᤺ᤳᤋᤢᤶᤒᤧᤖᤥ॥

⁵ ᤀᤠᤏᤡᤃᤣ ᤋᤧ᤺ᤶᤓᤢᤰ ᤆᤩᤧ᤹ᤀᤡᤃᤧ. ᤐᤢᤱᤗᤠᤜᤡᤶᤔᤥ ᤌᤩᤧ᤹ᤀᤡᤃᤧᤀᤠᤱ ᤘᤕᤡᤃᤧ. ᤀᤠᤏᤡᤃᤣ ᤋᤰᤗᤧᤱᤘᤠᤀᤥ ᤕᤖᤡᤰ ᤔᤧᤒᤥᤃᤧᤀᤠᤱ ᤔᤧᤘᤠ᤹ᤖᤥ॥ ᤛᤠ᤹ᤖᤡᤰ ᤕᤠ᤺ᤶᤒᤰ ᤆᤥᤃᤢᤶᤒᤧ ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤡᤶᤔᤠ ᤏᤢ ᤆᤠᤔᤠᤀᤠᤱ ᤔᤧᤱᤄᤥᤀᤣ ᤘᤕᤡᤃᤧᤖᤥ॥

^6-7 ᤀᤠᤏᤡᤃᤣ ᤛᤣᤛᤣ ᤜᤡᤱᤔᤴᤗᤠᤶ. ᤂᤠᤛᤡᤱᤏᤡ᤺ᤵᤔᤠᤗᤠᤶ. ᤏᤠᤛᤡ ᤌ᤺ᤵᤔᤠᤗᤠᤶ. ᤏᤢᤖᤡᤰᤁᤠᤱ ᤗᤢᤱᤔᤠ᤹ ᤋᤢᤰᤔᤠᤗᤠᤶ. ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ. ᤁᤢᤍᤥ᤺ᤵᤔᤠ ᤔᤡ᤺ᤶᤈᤡᤗᤠᤶ. ᤛᤧᤰᤂᤠᤒᤠ ᤛᤢᤏᤠᤀᤡᤱᤄᤱᤗᤠᤶ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤛᤡᤃᤧ ᤑᤠ᤹ᤀᤠᤱ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤰᤁᤠᤛᤡᤃᤧᤖᤥ॥ ᤀᤠᤰᤋᤱᤒᤠ ᤕᤧᤶᤔᤥᤛᤠᤱ ᤀᤠᤏᤡᤃᤣ ᤑᤧᤈᤢᤶ ᤑᤧᤕᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤀᤠᤏᤡᤃᤣ ᤛᤠᤶᤕᤥᤒᤠ ᤜᤡᤱᤔᤴᤏᤣᤖᤥ॥

⁸ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤡᤃᤧᤛᤠᤱ ᤔᤧᤶᤒᤡᤖᤡᤃᤧᤴᤇᤠᤱ. ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤔᤧᤔᤧᤳᤋᤡᤃᤧᤛᤠᤱ. ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤆᤥᤃᤢᤶᤒᤧ᤹ᤖᤥ॥ ᤀᤠᤏᤡᤃᤣ ᤁᤢᤍᤥ᤺ᤵᤔᤠ ᤆᤥᤃᤡᤃᤧ᤹ ᤁᤖ ᤀᤡᤱᤗᤧᤰᤁᤣ ᤔᤧᤔᤧᤳᤋᤡᤃᤧᤖᤥ॥

⁹ ᤀᤠᤏᤡᤃᤣ ᤏᤢᤖᤡᤰᤁᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤡᤃᤧᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠ ᤔᤧᤗᤧᤱᤛᤡᤱᤗᤥ॥ ᤛᤡᤔᤠᤗᤡᤱᤎᤥ ᤁᤧᤖᤡᤃᤧᤛᤠᤱ ᤁᤢᤜᤡᤱᤘᤧᤳ ᤘᤕᤡᤃᤧᤖᤥ॥ ᤋᤧ᤺ᤶᤓᤢᤰ ᤔᤧᤕᤠ᤺ᤰᤋᤡᤃᤧᤛᤠᤱ ᤔᤧᤴᤇᤡᤀᤣ ᤘᤕᤡᤃᤧᤖᤥ॥

¹⁰ ᤔᤧᤖᤡᤱᤅᤥ ᤌᤩᤧ᤹ᤀᤡᤃᤧᤛᤠᤱ ᤛᤍᤠᤍᤡᤱ ᤛ᤺ᤳᤋᤡᤃᤧᤖᤥ॥ ᤕᤠᤱᤃᤧᤛᤠ᤹ᤒᤠ ᤆᤥᤃᤡᤃᤧᤛᤠᤱ ᤕᤖᤡᤰ ᤔᤏᤠᤜᤠ᤹ ᤏᤛᤠ᤺ᤴᤏᤥ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥᤃᤢᤶᤛᤡᤶᤒᤧᤖᤥ॥ ᤌᤣᤀᤠᤱ ᤔᤧᤃᤳᤋᤢᤶᤒᤧᤴᤇᤠᤱ ᤁᤠᤰ ᤐᤠᤴ ᤁᤧᤃᤵᤐᤠ ᤁᤢᤀᤡᤛᤡᤰ ᤆᤥᤃᤡᤃᤧᤖᤥ॥

¹¹ ᤁᤥᤖᤴᤌᤡᤒᤠ ᤆᤢᤶᤛᤣ. ᤂᤡᤏᤡ᤹ ᤀᤠᤏᤡᤃᤣ ᤏᤡᤱᤘᤠ᤹ᤒᤠ ᤐᤠ᤺ᤴᤏᤡᤴ ᤔᤧᤳᤋᤠᤛᤡᤃᤧᤀᤠᤱ ᤘᤕᤡᤃᤧ. ᤂᤡᤏᤡ᤹ᤏᤢᤃ ᤀᤠᤏᤡᤃᤣ ᤏᤡᤱᤘᤠ᤹ᤀᤡᤴ ᤜᤖᤧᤀᤠᤱ ᤘᤠ᤹॥

¹² ᤀᤠᤏᤡᤃᤣ ᤗᤢᤱᤔᤠ᤹ ᤔᤧᤍᤢᤰᤁᤠᤛᤡᤃᤧᤶᤒᤠ ᤔᤣ᤺ᤴᤗᤥ. ᤁᤖ ᤂᤡᤏᤡ᤹ᤏᤧ ᤕᤠᤵᤔᤡ ᤗᤢᤱᤔᤠ᤹ ᤋᤢᤰᤔᤠ ᤁᤧᤗᤖᤢᤶᤗ ᤁᤧᤒᤣᤃᤡᤀᤠᤱ ᤁᤧᤘᤕᤡ᤹ᤖᤥ॥

¹³ ᤀᤡᤱᤃᤠ᤹ᤃ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤵᤔᤏᤠᤒᤠ ᤜᤧᤰᤁᤣ ᤂᤡᤏᤡ᤹ ᤔᤧᤳᤏᤡᤱᤗᤥ—ᤀᤠᤏᤡᤃᤣ ᤏᤡᤱᤘᤠ᤹ᤀᤡᤴ ᤂᤡᤏᤡ᤹ᤏᤢ ᤕᤶᤒᤠ ᤆᤥ᤺ᤰᤐᤠ ᤁᤢᤀᤡᤛᤡᤰ ᤂᤡᤏᤡ᤹ ᤏᤡᤱᤘᤠ᤹ᤀᤡᤴᤏᤠᤱ ᤆᤢᤰᤐᤠ ᤔᤣ᤺ᤴ. ᤕᤶᤒᤠ ᤆᤥᤃᤧᤶᤔᤧ᤹ᤀᤥ॥

ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤔᤠ

¹⁴ ᤂᤪᤡᤛ᤻ᤋᤧᤴ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤄᤧ᤺ᤵᤐᤠᤛᤡᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤒᤠ ᤏᤢ ᤗᤠᤕᤥᤒᤠ ᤐᤠ᤺ᤴᤜᤠ᤹ ᤔᤧᤍᤱᤏᤧᤴᤗᤥ᥄ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤏᤢ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤴ ᤔᤧᤍᤱᤏᤧᤴᤗᤥ॥

¹⁵ ᤂᤪᤡᤛ᤻ᤋᤧᤴ ᤏᤢ ᤔᤠᤑᤧᤴᤛᤠᤶᤔᤡᤴ ᤀᤠᤰᤂᤣᤗ᤹ᤖᤡᤰ ᤋᤱᤔᤠ ᤛᤢᤰᤛᤡ᤹ᤒᤣ᥅ ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴᤏᤠᤱ ᤀᤠᤰᤂᤣᤗ᤹ᤖᤡᤰ ᤋᤱᤒᤣ᥅

¹⁶ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤏᤢ ᤏᤠᤘᤠᤀᤡᤳᤗᤠᤴ ᤀᤠᤰᤂᤣᤗ᤹ᤖᤡᤰ ᤋᤱᤔᤠ ᤛᤢᤰᤐᤣ᥅ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤡᤶᤛᤡᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. “ᤀᤡᤱᤃᤠ᤹ᤃ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤘᤠ᤹ᤀᤠᤀᤠᤱ ᤗᤠᤱᤄᤣ᤺ᤰᤁᤠᤖᤥ॥ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤔᤏᤠ ᤔᤧᤒᤥᤱᤗᤥ॥”

¹⁷ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. “ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤀᤥᤗᤠᤶᤒᤠ ᤗ᤺ᤴᤍᤧᤶᤔᤧ᤹ᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤔᤧᤘᤕᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤠᤈᤡ᤺ᤴᤈᤡ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤛᤢᤛᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ ᤋᤠ᤺ᤰᤏᤡᤱᤗᤥ॥

¹⁸ ᤀᤡᤱᤃᤠ᤹ᤃ ᤂᤡᤏᤡ᤹ ᤐᤠᤏᤢᤍᤡᤱ ᤐᤠ ᤐᤥᤱᤅᤠ. ᤜᤧᤰᤁᤩᤠᤱ ᤂᤡᤏᤡ᤹ᤃ ᤀᤡᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ ᤁᤧᤒᤥ᤺ᤰᤂᤡ᤹ᤖᤥ ᤗ᤹ᤖᤡᤰ ᤔᤢᤰᤛᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥”