᥈ ᤁᤥᤖᤴᤌᤡ 5 - LIFOTNT

¹ ᤀᤠᤸᤗ ᤀᤠᤏᤡ᤹ ᤀᤠᤘᤠ᤹ᤒᤠ ᤁᤴ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤒᤠ ᤁᤴ ᤀᤡᤰᤛᤠᤀᤥᤒᤠ ᤛᤠ᤺ᤱᤃᤠᤜᤡᤶ ᤁᤢᤀᤡᤛᤡᤰ ᤆᤥᤰᤗᤥ॥ ᤁᤴ ᤛᤠ᤺ᤱᤃᤠᤜᤡᤶᤔᤡᤴ ᤕ᤺ᤸᤗᤧ ᤔᤏᤠ ᤜᤢᤰᤁᤡᤸᤗᤧ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢ ᤀᤠᤒᤡᤖᤧᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤶᤔᤡᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤘᤠ᤹ᤖᤥ॥

² ᤁᤖ ᤂᤧᤴ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤜᤡᤶᤔᤡᤴ ᤂᤥᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤠᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤀᤠᤸᤗᤥ ᤏᤡᤱᤘᤠ᤹ ᤀᤡᤃᤣ᤺ᤰ ᤗ᤹ᤖᤥ.

³ ᤌᤣᤀᤠᤱᤓᤧᤸᤗᤧ ᤆᤠᤱᤅᤡᤸᤗᤧ ᤌᤰᤁᤡᤴ ᤋᤧᤵᤋᤢᤒᤠ ᤜᤧᤰᤁᤣ ᤂᤧᤴ ᤜᤡᤶᤔᤡᤸᤗᤧ ᤀᤠᤍᤧᤵᤐᤠᤱ ᤀᤠᤏᤡ᤹ ᤗᤧᤰᤆᤠᤒᤧᤎᤡ᤺ᤰ ᤀᤠᤶᤒᤥᤱᤏᤧᤴᤗᤥ॥

⁴ ᤌᤣᤀᤠᤱᤓᤧᤸᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤡᤸᤗᤧᤴ ᤛᤠ᤺ᤱᤃᤠᤜᤡᤶᤔᤥ ᤀᤠᤘᤠ᤹ᤖ ᤌᤠᤖᤡᤰ ᤋᤢᤰᤂᤣ᤺ᤸᤗᤧ ᤛᤰᤔᤠ ᤐᤢ᤹ᤀᤠᤱ ᤀᤠᤏᤠᤖᤥ॥ ᤀᤠᤏᤡ᤹ ᤗᤧᤰᤆᤠᤒᤧᤎᤡ᤺ᤰ ᤀᤠᤒᤥᤱᤗ ᤑᤠ᤹ᤀᤠᤱ ᤔᤣ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤜᤡᤶᤔᤡᤴ ᤀᤠᤸᤗᤛᤠᤱ ᤕᤖᤡᤰ ᤀᤠᤈᤠᤰᤛᤡᤱᤗ ᤑᤠ᤹ᤀᤠᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤛᤡᤒᤠᤀᤠᤱ ᤁᤧᤒᤣ᤺ᤰᤐᤠ ᤌᤰᤁᤡᤴ ᤔᤧᤴᤇᤡ᤺ᤶᤏᤠᤒᤠ ᤌᤰᤁᤥ ᤗᤧᤱᤛᤡᤱᤗᤥ॥

⁵ ᤀᤠᤸᤗ ᤒᤠ ᤁᤴ ᤐᤠ᤺ᤴᤏᤡᤸᤗᤧ ᤗᤠᤃᤡᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤴ ᤁᤢᤛᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤛᤧᤰᤂᤠᤀᤣ ᤀᤠᤄᤥᤛᤢᤶ ᤁᤧᤗ᤹ᤒᤠᤴ ᤀᤥᤛᤣ᤺ᤴᤎᤠᤰᤛᤧ ᤋᤧᤴᤕᤠᤱ ᤁᤢᤀᤡᤛᤡᤰ ᤛᤣᤛᤣᤔᤠᤱᤅᤡᤴ ᤀᤠᤒᤡᤖᤧᤀᤠᤱ ᤀᤠᤘᤠ᤹ᤖᤥ॥

⁶ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤥᤒᤠ ᤜᤡᤱᤔᤴᤏᤥ ᤀᤠᤘᤠ᤹ᤖ ᤌᤠᤖᤡᤰ ᤍᤠᤱᤒᤠᤴᤏᤢ ᤔᤠ᤺ᤱᤄᤠᤀᤣ ᤀᤠᤘᤠ᤹ ᤁᤧᤗ᤹ᤒᤠ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤛᤠᤱ ᤀᤠᤏᤡ᤹ᤃ ᤛᤍᤠᤍᤡᤱ ᤜᤠᤱᤜᤠᤱ ᤀᤠᤗ᤹ᤖᤥ॥

⁷ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤏᤡᤔᤏᤠᤒᤠᤗᤠᤶᤒᤠ ᤔᤣ᤺ᤴ. ᤁᤖ ᤏᤛᤠ᤺ᤴᤗᤠᤶᤒᤠᤏᤧ ᤀᤠᤜᤡᤱᤗᤥ॥

⁸ ᤀᤠᤏᤡ᤹ᤃ ᤜᤠᤱᤜᤠᤱ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ ᤑᤠ᤹ᤀᤠᤱ ᤀᤡᤱᤃᤠ᤹ ᤛᤧᤰᤂᤠᤀᤣ ᤐᤠ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤜᤡᤱᤔᤠᤏᤢ᤺ᤸᤗᤧᤀᤠᤱ ᤍᤠᤱᤒᤠᤴᤏᤢ ᤛᤥᤖᤡᤰ ᤜᤡᤱᤔᤠ ᤀᤠᤏᤡ᤹ ᤛᤡᤖᤠ᤹ᤌᤠᤱᤗᤥ॥

⁹ ᤜᤧᤰᤁᤣ᤺ᤸᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤀᤠᤘᤠ᤹ᤛᤠᤱ. ᤍᤠᤱᤒᤠᤴᤏᤢ ᤀᤠᤜᤡᤱᤛᤠᤱ. ᤀᤠᤏᤡ᤹ ᤏᤡᤱᤛᤣ᤺ᤰᤁᤡᤱᤃ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠᤖᤥ॥

¹⁰ ᤌᤣᤀᤠᤱᤓᤧᤸᤗᤧ ᤂᤠᤛᤧᤴᤗᤧ ᤗᤠᤃᤡ ᤀᤠᤏᤡ᤹ ᤁᤧᤖᤧᤰ ᤂᤪᤡᤛ᤻ᤋᤖᤧ ᤁᤢᤄᤠᤛᤧᤴᤏᤥ ᤕᤧᤵᤔᤠᤀᤣ ᤐᤥᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤁᤧᤖᤧᤰᤗᤧ ᤁᤴ ᤏᤠᤛᤡᤱᤃᤧᤴ ᤌᤰᤁᤥ ᤀᤠᤘᤠ᤹ᤀᤡᤸᤗᤧ ᤀᤠᤈᤥᤃᤢᤶᤒᤠ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤂᤠᤛᤧᤴᤏᤡᤴ ᤀᤠᤄᤥᤛᤢᤶᤗᤥ॥

ᤋᤱᤈᤢᤶᤗᤧᤴ ᤕᤠ᤺ᤶᤒᤰ

¹¹ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤧᤃ ᤍᤠᤱᤒᤠᤸᤗᤧ ᤁᤢᤔᤡᤱᤛᤥ ᤀᤡᤱᤎᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤔᤧᤏᤢ᤺ᤱᤗ ᤑᤠ᤹ᤀᤠᤱ ᤜᤠᤱᤜᤠᤱ ᤔᤧᤳᤋᤢᤶᤛᤡᤶᤒᤧ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤀᤠᤰᤋᤱᤒᤠ ᤆᤥᤃᤡᤃᤧ᤹ ᤁᤧᤗ᤹ᤒᤠᤴ ᤏᤢ᤺ᤖᤡᤰᤁᤠᤱ ᤏᤡᤛᤢ᤹ᤖᤥ. ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤂᤧᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶ ᤁᤧᤗ᤹ᤒᤠᤴ ᤏᤡᤱᤛᤠᤱ ᤆᤥᤃᤢᤶᤒᤧ᤹ᤖᤥ॥

¹² ᤕᤠᤶᤔᤥ. ᤀᤠᤏᤡᤃᤧᤃ ᤂᤡᤏᤡ᤹ ᤋᤃᤡ ᤆᤶᤔᤠᤛᤡᤃᤧᤒᤠ ᤔᤣ᤺ᤴᤗᤥ᥄ ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤕᤠ᤺ᤶᤒᤰᤁᤥ ᤂᤡᤏᤡ᤹ ᤏᤧᤒᤥ ᤐᤥᤔᤠ ᤛᤢᤕᤧᤶ ᤐᤡᤀᤠᤛᤡᤃᤧᤒᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤡᤰᤗᤢᤱᤔᤥᤒᤠ ᤐᤠ᤺ᤴᤜᤠ᤹ᤃ ᤔᤣ᤺ᤴ. ᤁᤖ ᤏᤡᤔᤏᤠᤒᤠ ᤐᤠ᤺ᤴᤜᤠ᤹ᤀᤥᤖᤰ ᤀᤠᤱᤍᤡᤱ ᤁᤧᤗ᤹ᤒᤠᤜᤠ᤹ ᤏᤥᤃᤵ ᤐᤡᤔᤠ ᤁᤧᤛᤢᤰᤋᤢᤶᤛᤡᤶᤗᤖᤥ॥

¹³ ᤀᤠᤏᤡᤃᤣ ᤏᤡᤱᤘᤠ᤹ ᤔᤧᤴᤍᤰᤔᤏᤠᤒᤠ ᤜᤧᤰᤁᤣ ᤗ᤹ᤖᤡᤃᤧᤏᤧ ᤑᤠ᤹ᤃᤪ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤆᤥᤃᤢᤶᤒᤧᤒᤠᤸᤗᤧ ᤆᤥᤃᤢᤸᤗᤧᤖᤥ. ᤜᤧᤰᤁᤩᤠᤱ ᤀᤠᤏᤡᤃᤣ ᤏᤡᤱᤘᤠ᤹ ᤁᤢᤍᤥ᤺ᤵᤔᤠ ᤁᤧᤃᤵᤐᤠ ᤜᤧᤰᤁᤣ ᤗ᤹ᤖᤡᤃᤧᤏᤧ ᤑᤠ᤹ᤃᤪ ᤁᤴ ᤒᤠ ᤂᤡᤏᤡ᤹ ᤗᤠᤃᤡᤀᤣᤖᤥ॥

¹⁴ ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤐᤠ᤺ᤴᤜᤠ᤹ᤃ ᤂᤪᤡᤛ᤻ᤋᤖᤧ ᤗᤢᤱᤔᤠ᤹ ᤋᤢᤰᤋᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤆᤥᤃᤢᤶᤒᤧᤒᤠᤖᤥ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤛᤩᤧ. ᤂᤧᤸᤗᤧᤆᤥᤃᤢᤸᤗᤧ ᤁᤠᤰ ᤀᤠᤛᤩᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ॥

¹⁵ ᤍᤠᤱᤒᤠᤴ ᤁᤧᤖᤧᤰᤗᤧ ᤗᤠᤃᤡ ᤛᤩᤧᤖᤥ. ᤂᤧᤸᤗᤧᤆᤥᤃᤢᤸᤗᤧ ᤁᤧᤜᤡᤱᤒᤠᤜᤠ᤹ ᤀᤠᤸᤗᤀᤠᤱᤎᤥ ᤀᤠᤒᤠᤅᤣ ᤗᤠᤃᤡ ᤔᤣ᤺ᤴ. ᤁᤖ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤔᤧᤜᤡᤱᤗᤖᤥ॥

¹⁶ ᤂᤧᤸᤗᤧᤆᤥᤃᤢᤸᤗᤧ. ᤀᤠᤸᤗᤀᤠᤱᤎᤥ ᤀᤠᤏᤡᤃᤣ ᤔᤧᤴᤇᤠᤶ ᤕᤠᤵᤔᤡ ᤏᤡᤔᤥᤗᤠᤶ ᤀᤠᤳᤋᤡᤴᤏᤠᤱ ᤀᤥᤔᤧᤔᤧᤳᤋᤢᤶᤒᤧᤴᤗᤥ॥ ᤋᤃᤡ ᤜᤧᤰᤁᤣᤗ᤹ᤖᤡᤰᤁᤣ ᤂᤪᤡᤛ᤻ᤋᤧᤴ ᤀᤥᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧᤛᤠᤱ ᤀᤠᤸᤗ ᤀᤠᤏᤡᤃᤣ ᤜᤧᤰᤁᤣ ᤔᤧᤈᤥᤃᤢᤶᤒᤧᤴᤗᤥ॥

¹⁷ ᤀᤠᤳᤋᤡᤸᤗᤧ ᤂᤪᤡᤛ᤻ᤋᤧᤴ ᤏᤛᤠᤴ ᤆᤥᤃᤢ᤹. ᤂᤧᤴ ᤁᤢᤛᤱ ᤔᤏᤠ ᤐᤥᤱ॥ ᤜᤧᤰᤁᤩᤠᤱ ᤋᤃᤡᤛᤔᤠ ᤐᤠ᤺ᤴᤜᤠ᤹ᤃ ᤗᤧᤰᤋᤧᤒᤣᤀᤠᤱ ᤁᤠᤰ ᤁᤢᤛᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ᥄

¹⁸ ᤁᤴ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤐᤥ᤺ᤰᤂᤧᤒᤠᤖᤥ॥ ᤂᤢᤏᤧ᤹ᤀᤣ ᤂᤪᤡᤛ᤻ᤋᤗᤠᤶ ᤀᤠᤒᤠᤅᤣ ᤂᤢᤏᤧ᤹ᤀᤥ ᤀᤠᤏᤡ᤹ ᤀᤠᤍᤠᤖᤧᤒᤠᤖᤥ. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤂᤢᤏᤧ᤹ᤀᤥ ᤋᤠ᤺ᤵᤔᤠᤛᤡ ᤔᤠᤱᤛᤧᤘᤠᤴ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥

¹⁹ ᤂᤧᤴ ᤑᤠ᤹ᤀᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤠᤰ ᤔᤏᤠᤜᤠ᤹ ᤂᤪᤡᤛ᤻ᤋᤗᤠᤶ ᤂᤢᤏᤧ᤹ᤀᤥ ᤋᤠᤖᤢᤛᤡ᤹॥ ᤔᤏᤠᤜᤠ᤹ ᤂᤢᤏᤡ᤹ ᤗᤠᤕᤥᤸᤗᤧᤴ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤴᤇᤡᤴᤗᤥ. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤂᤢᤏᤧ᤹ᤀᤥ ᤋᤠ᤺ᤵᤔᤠᤛᤡ ᤛᤢᤏᤠᤀᤡᤱ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥

²⁰ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤧᤃ ᤂᤪᤡᤛ᤻ᤋᤖᤧ ᤁᤢᤜᤠᤱᤗᤠᤀᤡᤱᤒᤠᤛᤡᤃᤧᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧᤗᤠᤶᤒᤠ ᤐᤣᤗᤡ ᤑᤠᤰᤗ ᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤂᤪᤡᤛ᤻ᤋ ᤗᤧᤵᤔᤠᤱᤗᤠᤶ ᤀᤠᤏᤡᤃᤣ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥

²¹ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤂᤪᤡᤛ᤻ᤋᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤛᤠᤶᤕᤥᤒᤠ ᤀᤠᤒᤥᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠᤴ ᤀᤠᤏᤡ᤹ ᤗᤠᤃᤡ ᤗᤠᤕᤥ ᤁᤢ᤺ᤳᤋᤢᤖᤥ॥