᥈ ᤁᤥᤖᤴᤌᤡ 4 - LIFOTNT

ᤛᤢᤏᤠᤀᤡᤱ ᤛᤧᤔᤠ

¹ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶ ᤁᤴ ᤔᤠᤱᤛᤧᤘᤠᤴ ᤂᤥᤛᤢᤶᤒᤧᤀᤠᤱ ᤘᤕᤡᤃᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤏᤡᤱᤛᤠᤱ ᤔᤧᤒᤢᤰᤏᤧᤴᤗᤥ॥

² ᤂᤧᤸᤗᤧ ᤁᤢᤗᤧᤰᤘᤠ ᤀᤠᤏᤡᤃᤧᤃ ᤔᤏᤠᤖᤧ ᤔᤧᤴᤏᤡᤀᤣ ᤆᤥ᤺ᤰᤔᤏᤠᤒᤠ ᤛᤡᤖᤡᤱᤔᤔᤠ ᤕᤠ᤺ᤶᤒᤰᤜᤠ᤹ ᤏᤠ᤹ᤖᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤀᤠᤏᤡᤃᤣ ᤀᤡᤱᤗᤧᤰ ᤔᤧᤈᤥᤃᤢᤶᤒᤧᤴᤗᤥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤕᤥᤎᤥ ᤔᤧᤈᤥᤃᤢᤶᤒᤧᤴᤗᤥ॥ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤳᤋᤡᤃᤧᤖ ᤘᤠ᤹ ᤑᤠ᤹ᤀᤠᤱ ᤏᤡᤛᤢᤶᤒᤧᤀᤠᤱ ᤔᤏᤠᤜᤠ᤹ ᤛᤧᤰᤂᤠ ᤐᤠ᤺ᤴᤗᤰ ᤔᤧᤳᤋᤢᤶᤛᤡᤶᤒᤧ᤹. ᤜᤧᤰᤁᤩᤠᤱ ᤁᤠᤰ ᤏᤛᤠ᤺ᤴᤛᤠᤒᤠᤜᤠ᤹ᤖᤧ ᤂᤧᤴ ᤁᤢᤛᤡᤱ ᤔᤧᤏᤡ᤺ᤳᤋᤢ᤹ᤖᤥ॥

³ ᤀᤠᤏᤡᤃᤣ ᤛᤧᤛᤢᤶᤒᤧᤒᤠ ᤛᤢᤏᤠᤀᤡᤱᤅᤡᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢᤀᤠᤱ ᤐᤳᤏᤧ ᤑᤠ᤹ᤃᤪ ᤂᤧᤱᤃ ᤁᤧᤔᤧᤰᤐᤠᤖ ᤁᤧᤒᤣ᤺ᤰᤐᤠᤜᤠ᤹ᤖᤧ ᤗᤠᤃᤡᤖᤰ ᤋᤧᤵᤋᤢ᤹ᤖᤥ॥

⁴ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤠᤱ ᤔᤠᤑᤧᤴᤛᤠᤶᤔᤡᤸᤗᤧᤀᤣ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤑᤧᤳᤗᤠ᤺ᤴᤍᤢ ᤐᤡᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤪᤡᤛ᤻ᤋᤖᤧ ᤁᤢᤔᤡᤔᤡᤍᤡᤱᤃᤧᤴ ᤛᤢᤏᤠᤀᤡᤱᤅᤡᤸᤗᤧᤴ ᤀᤥ᤺ᤳᤋᤡ᤺ᤴ ᤏᤡᤔᤠ ᤔᤧᤴᤇᤢᤰᤋᤢᤴ॥ ᤂᤪᤡᤛ᤻ᤋᤧᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡ᤺ᤳᤗᤥ॥

⁵ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤀᤠᤒᤠᤅᤣ ᤕᤠ᤺ᤶᤒᤣᤀᤥ ᤀᤡᤱᤓᤴ ᤔᤧᤈᤥᤃᤢᤶᤒᤧᤴ. ᤁᤖ ᤀᤠᤏᤡᤃᤧᤃ ᤕᤧᤛᤢᤖᤧ ᤁᤢᤗᤠᤃᤡ ᤂᤡᤏᤡ᤹ ᤛᤧᤘᤠᤖᤥᤒᤠ ᤐᤥ᤺ᤰᤂᤡᤃᤧᤒᤠ ᤐᤠ᤺ᤴᤏᤡᤴ ᤏᤢ ᤕᤧᤛᤢ ᤂᤪᤡᤛ᤻ᤋᤧᤴᤏᤣ ᤍᤠᤱᤒᤠᤖᤥ ᤑᤠ᤹ᤀᤠᤱ ᤀᤡᤱᤓᤥᤛᤢᤶᤒᤧᤖᤥ॥

⁶ ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤥ ᤀᤥ᤺ᤳᤋᤡ᤺ᤴ ᤀᤥ᤺ᤳᤗ ᤑᤠ᤹ᤀᤠᤱ ᤁᤧᤒᤠ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤏᤠᤖᤠᤀᤥ ᤁᤧᤀᤥ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤗᤧᤴ ᤏᤧᤜᤡᤏᤡᤱᤘᤠ᤹ᤀᤡᤴ ᤁᤢᤛᤡᤱ ᤏᤡ᤺ᤵᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤀᤠᤏᤡᤃᤣ ᤛᤡᤰᤗᤢᤱᤔᤥ ᤂᤢᤏᤧ᤹ ᤁᤢᤀᤥ᤺ᤳᤋᤡᤴ ᤀᤥ᤺ᤵᤐᤠᤱᤄᤢᤀᤠᤱ ᤘᤠ᤹ᤖᤥ॥

ᤑᤢᤈᤡᤰᤁᤥ ᤕᤠᤰᤔᤏᤠᤒᤠ ᤕᤠᤶᤛᤠᤶᤃᤧᤴ ᤕᤠᤱᤓᤢ

⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥ᤺ᤵᤐᤠᤱᤄᤢᤒᤠ ᤁᤴ ᤛᤢᤏᤠᤀᤡᤱᤗᤧᤴ ᤀᤥ᤺ᤳᤋᤡ᤺ᤴ ᤀᤠᤏᤡ᤹ᤀᤥ ᤘᤠ᤹. ᤁᤖ ᤁᤴ ᤐᤕᤶ ᤕᤶᤒᤠ ᤔᤢᤰᤛᤠᤶᤔᤡᤱᤃ ᤀᤠᤏᤡ᤹ᤗᤠᤶᤒᤠ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤀᤣ ᤋᤠ ᤁᤧᤗ᤹ᤒᤠᤴ ᤁᤧᤖᤧᤰᤗᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤀᤠᤏᤡ᤹ᤃ ᤁᤴ ᤕᤠᤱᤓᤢ ᤕᤠᤰᤔᤏᤠᤒᤠ ᤑᤢᤈᤡᤰ ᤁᤢᤀᤡᤛᤡ᤺ᤰᤗᤰ ᤀᤠᤈᤥ᤺ᤰᤗᤥ॥

⁸ ᤀᤠᤏᤡᤃᤧᤃ ᤁᤠᤰ ᤐᤡᤛᤠᤱᤗᤠᤶ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤕᤢᤰᤋᤡᤃᤧᤀᤠᤱ ᤘᤕᤡᤃᤧᤛᤠᤱ ᤀᤠᤏᤡᤃᤧᤃ ᤔᤧᤴᤕᤢ᤺ᤳᤋᤣ ᤘᤕᤡᤃᤧᤖᤥ॥ ᤀᤠᤏᤡᤃᤧᤃ ᤜ᤺ᤴᤍᤠ ᤗᤧᤰᤋᤡᤃᤧᤀᤠᤱ ᤘᤕᤡᤃᤧᤛᤠᤱ ᤜᤠᤖᤡ ᤔᤧᤴᤍᤠᤀᤣ ᤘᤕᤡᤃᤧᤖᤥ॥

⁹ ᤀᤠᤏᤡᤃᤧᤃ ᤋᤢᤰᤂᤣ ᤔᤧᤈᤠ᤺ᤳᤋᤡᤃᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤧᤏᤢ ᤘᤠ᤹ᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤔᤧᤛᤥ᤺ᤴᤍᤡᤃᤧᤛᤠᤱ ᤕᤠᤶᤔᤥ ᤐᤥᤃᤡᤃᤧ᤹ᤖᤥ॥

¹⁰ ᤕᤧᤛᤢᤖᤧ ᤁᤢᤜᤡᤱᤔᤴᤏᤡᤴ ᤀᤠᤏᤡᤃᤣ ᤏᤠᤛᤡᤱᤃᤧᤴ ᤌᤰᤁᤥ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤂᤢᤏᤧ᤹ ᤋᤢᤰᤂᤣ ᤆᤩᤧᤀᤠᤱ ᤛᤩᤧᤒᤠ ᤁᤢᤀᤡᤛᤡᤰ ᤌᤡᤰᤕᤠ᤺ᤴᤎᤰ ᤀᤠᤏᤡᤃᤣ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤂᤣ ᤆᤩᤧ᤹ᤀᤡᤃᤧᤖᤥ॥

¹¹ ᤀᤠᤏᤡᤃᤣ ᤁᤧᤛᤡᤒᤠᤀᤠᤱ ᤁᤧᤒᤣ᤺ᤰᤐᤠ ᤏᤠᤛᤡᤱᤃᤧᤴ ᤌᤰᤁᤥ ᤕᤧᤛᤢᤖᤧ ᤁᤢᤜᤡᤱᤔᤴᤏᤡᤴ ᤏᤡᤎᤠ᤺ᤵᤗ ᤑᤠ᤹ᤀᤠᤱ ᤕᤧᤛᤢᤖᤧ ᤁᤢᤗᤠᤃᤡ ᤌᤡᤰᤕᤠ᤺ᤴᤎᤰ ᤛᤡᤔᤠᤗᤡᤱᤎᤥᤀᤥ ᤁᤧᤖᤡᤃᤧᤖᤥ॥

¹² ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤁᤡ ᤛᤡᤔᤠᤗᤡᤱᤎᤥᤀᤥ ᤁᤧᤖᤡᤃᤧᤸᤗᤧ ᤂᤡᤏᤡ᤹ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤄᤥᤛᤢᤶᤗᤥ॥

¹³ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤡᤱᤃᤠ᤹ ᤏᤛᤠᤴ ᤆᤥᤃᤢᤱ. ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤐᤠᤖᤠᤱᤗᤥ॥” ᤒᤠᤜᤧᤰᤋᤱᤒᤠ ᤏᤛᤠ᤺ᤴᤗᤠᤶᤒᤠᤀᤣ ᤀᤠᤏᤡᤃᤧᤀᤠᤱ ᤏᤛᤠᤴ ᤆᤥᤃᤢᤶᤒᤧ᤹. ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠᤖᤡᤃᤧ᤹ᤖᤥ॥

¹⁴ ᤍᤠᤱᤒᤠ ᤕᤧᤛᤢᤴ ᤛᤡᤔᤧᤴᤗᤠᤶᤒᤠ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠᤸᤗᤧ ᤀᤠᤏᤡ᤹ᤀᤠᤱ ᤕᤧᤛᤢᤴ ᤏᤢ ᤛᤥᤖᤡᤰ ᤁᤢᤜᤡᤱᤘᤧᤳ ᤀᤠᤈᤥ᤺ᤰᤁᤠᤱ ᤀᤠᤏᤡ᤹ ᤁᤧᤖᤧᤰ ᤂᤢᤏᤧ᤹ᤀᤥ ᤀᤠᤍᤠ᤺ᤳᤗᤥ ᤁᤧᤗ᤹ᤒᤠᤴ ᤏᤡᤛᤢᤶᤒᤧᤖᤥ॥

¹⁵ ᤀᤠᤏᤡᤃᤣ ᤋᤢᤰᤂᤣ ᤆᤩᤧ᤹ᤀᤡᤃᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤃ ᤂᤡᤏᤡ᤹ ᤗᤠᤃᤡᤀᤣ ᤐᤥ᤺ᤰᤂᤧᤒᤠᤖᤥ. ᤜᤧᤰᤁᤣ᤺ᤸᤗᤧ ᤔᤏᤠᤜᤠ᤹ᤖᤧ ᤀᤠᤰᤂᤧᤶᤔᤩᤠᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤔᤧᤄᤥᤛᤢ᤹. ᤂᤧᤶᤔᤩᤠᤰ ᤕᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤛᤥ ᤀᤡᤱᤎᤠᤱᤅᤡᤴ ᤐᤥᤱᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤥᤃᤧᤴᤏᤡᤴ ᤔᤧᤓᤥᤛᤢ᤹ᤖᤥ॥

ᤏᤛᤠ᤺ᤴᤗᤠᤶᤒᤠ ᤜᤡᤱᤔᤠ

¹⁶ ᤂᤧᤸᤗᤧᤆᤥᤃᤢᤸᤗᤧ ᤀᤠᤵᤑᤠᤸᤗᤧᤀᤠᤱ ᤀᤠᤏᤡ᤹ ᤏᤡᤱᤛᤠᤱ ᤔᤧᤒᤢᤰᤏᤧᤴᤗᤥ॥ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤡᤒᤣ᤺ᤰᤛᤠᤱ ᤀᤠᤏᤡ᤹ ᤕᤠᤶᤛᤠᤶᤔᤡᤱᤃ ᤌᤡᤰᤕᤠ᤺ᤴᤎᤰ ᤁᤢᤛᤱ ᤐᤥᤱᤗ ᤐᤣ᤺ᤰᤗᤥ॥

¹⁷ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤀᤠᤍᤢᤔᤢᤶᤒᤠ ᤆᤢᤰᤛᤠ ᤏᤢ ᤛᤵᤑᤠᤎᤡᤰᤐᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤖᤧᤃ ᤔᤧᤴᤏᤢᤵᤔᤏᤠᤒᤠ ᤔᤡᤔᤡᤍᤡᤱ ᤁᤧᤄᤥᤒᤠ ᤀᤠᤈᤥ᤺ᤰᤗᤥ॥ ᤜᤧᤰᤁᤩᤠᤱ ᤔᤡᤔᤡᤍᤡᤱᤅᤡᤴᤏᤢ ᤋᤱᤔᤠᤸᤗᤧ ᤂᤧᤱᤃ ᤌᤣᤀᤠᤱ ᤔᤣ᤺ᤴᤗᤥ॥

¹⁸ ᤀᤠᤸᤗᤥ ᤀᤠᤏᤡᤛᤢᤶᤒᤠ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤃ ᤀᤥᤀᤠᤶᤔᤧᤳᤋᤢᤶᤔᤡᤴᤗᤥ. ᤁᤖ ᤏᤡᤔᤧᤴᤍᤧᤵᤔᤏᤠ ᤐᤠ᤺ᤴᤏᤥ ᤀᤥᤀᤠᤔᤧᤳᤋᤢᤶᤗᤥ॥ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤀᤠᤏᤡᤛᤢᤶᤒᤠ ᤐᤠ᤺ᤴᤜᤠ᤹ ᤛᤵᤑᤠᤎᤡᤰᤐᤠᤖᤥ. ᤁᤖ ᤏᤡᤔᤧᤴᤍᤧᤳᤔᤏᤠᤒᤠ ᤐᤠ᤺ᤴᤜᤠ᤹ᤃ ᤀᤠᤵᤑᤠᤸᤗᤧᤛᤠᤱ ᤘᤠ᤹ᤖᤥ॥