᥈ ᤁᤥᤖᤴᤌᤡ 3 - LIFOTNT

ᤁᤢᤛᤱ ᤛᤣᤛᤣᤔᤠᤱᤜᤢᤵᤐᤡᤸᤗᤧᤴ ᤛᤧᤘᤠᤖᤥᤒᤠᤜᤠ᤹

¹ ᤀᤠᤸᤗ ᤀᤠᤏᤡᤃᤣ ᤀᤠᤒᤠᤅᤣ ᤆᤶᤛᤡᤱᤔᤠ ᤜᤣ᤺ᤰᤋᤡᤃᤧᤒᤠᤒᤡ᥅ ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ ᤁᤢᤀᤡᤛᤡᤰ ᤀᤠᤏᤡᤃᤧᤀᤠᤱ ᤂᤡᤏᤡ᤹ ᤗᤠᤃᤡ ᤀᤡᤃᤪ ᤂᤡᤏᤡ᤹ᤗᤠᤶᤒᤠ ᤁᤴ ᤔᤏᤠᤜᤠ᤹ ᤏᤢᤖᤡᤰᤁᤠᤱ ᤗᤠᤱᤍᤠ᤺ᤰᤋᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤛᤰᤀᤡᤱᤄᤱ ᤆᤠᤜᤠᤒᤠ ᤔᤧᤈᤥᤃᤡᤃᤧᤴᤗᤥ॥

² ᤂᤡᤏᤡ᤹ ᤜᤡᤱᤔᤴᤏᤡᤱᤃ ᤁᤠᤰ ᤔᤏᤠᤜᤠ᤹ᤖᤧ ᤏᤡ᤺ᤵᤔᤠ ᤔᤧᤛᤢᤰᤋᤢᤒᤠ ᤏᤢ ᤁᤢᤛᤡᤱ ᤔᤧᤏᤡ᤺ᤳᤋᤢᤒᤠ ᤔᤧᤴᤇᤠᤶ ᤛᤡᤰᤗᤢᤱᤔᤥ ᤛᤠᤵᤔᤏᤠᤒᤠ ᤛᤰᤀᤡᤱᤄᤱᤗᤥ॥

³ ᤛᤧᤰᤂᤠᤀᤣ ᤂᤡᤏᤡ᤹ᤃ ᤂᤪᤡᤛ᤻ᤋᤖᤧ ᤛᤠᤵᤋᤢᤀᤠᤱ ᤀᤠᤏᤡᤃᤧᤗᤠᤶᤒᤠ ᤜᤠᤅᤢᤒᤠ ᤛᤰᤀᤡᤱᤄᤱᤏᤡᤱᤗᤥ॥ ᤂᤧᤱᤃ ᤏᤠᤰᤆᤠ ᤏᤢ ᤛᤠᤵᤘᤠᤖᤧ ᤔᤣ᤺ᤴ. ᤁᤖ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤛᤣᤛᤣᤔᤠᤱᤅᤡᤸᤗᤧ ᤛᤠᤵᤋᤢᤒᤠᤖᤥ. ᤛᤠᤵᤗᤢᤱᤅᤥ ᤛᤠᤵᤋᤢᤒᤠ ᤔᤣ᤺ᤴ. ᤁᤖ ᤔᤧᤴᤇᤠᤶ ᤛᤡᤰᤗᤢᤱᤔᤥ ᤂᤪᤡᤛ᤻ᤋᤖᤧ ᤛᤠᤵᤋᤢᤒᤠ ᤛᤰᤀᤡᤱᤄᤱᤏᤡᤱᤗᤥ॥

⁴ ᤂᤪᤡᤛ᤻ᤋᤖᤧ ᤂᤧᤴ ᤐᤠ᤺ᤴᤏᤡᤴ ᤛᤧᤰᤂᤠ ᤆᤥᤰ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥᤀᤣ ᤏᤡ᤺ᤴᤎᤥ ᤆᤥᤃᤡᤃᤧᤖᤥ॥

⁵ ᤀᤠᤏᤡᤃᤣ ᤀᤠᤒᤠᤅᤣ ᤌᤣᤛᤠᤱ ᤆᤥ᤺ᤰᤔᤠ ᤛᤢᤰᤋᤢᤶᤒᤧ᤹ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤶᤒᤧᤴᤗᤥ. ᤁᤖ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤖᤥ॥

⁶ ᤂᤢᤏᤧ᤹ᤀᤣ ᤁᤢᤛᤱ ᤛᤣᤛᤣᤔᤠᤱᤜᤢᤵᤐᤡᤸᤗᤧᤴ ᤔᤠᤱᤛᤧᤘᤠ ᤆᤥ᤺ᤰᤔᤠ ᤁᤧᤛᤢᤰᤐᤠ ᤆᤥᤃᤡᤃᤧᤀᤠᤱ ᤘᤠ᤹ᤖᤥ॥ ᤁᤱᤃ ᤛᤠᤵᤔᤏᤠᤒᤠ ᤛᤠᤶᤕᤥᤌᤡᤶᤗᤠᤶᤒᤠ ᤔᤣ᤺ᤴ. ᤁᤖ ᤛᤣᤛᤣᤔᤠᤱᤗᤠᤶᤒᤠᤖᤥ. ᤌᤣᤀᤠᤱᤓᤧᤸᤗᤧ ᤛᤠᤵᤔᤏᤠᤒᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤛᤧᤳ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤀᤠᤜᤡᤱᤗᤥ॥

ᤁᤢᤛᤱ ᤔᤠᤱᤜᤢᤵᤗᤧᤴ ᤔᤡᤔᤡᤍᤡᤱᤅᤡᤴ

⁷ ᤛᤡᤔᤧᤴ ᤁᤧᤍᤠ᤺ᤵᤐᤠ ᤛᤠᤶᤕᤥᤌᤡᤶᤔᤡᤴ ᤔᤥᤛᤠᤖᤧ ᤗᤢᤱᤛᤠᤵᤐᤥ ᤛᤠᤵᤋᤢᤀᤠᤱ ᤔᤡᤔᤡᤍᤡᤱᤅᤡᤴᤏᤢ ᤋᤩᤧ॥ ᤜᤧᤰᤁᤣ᤺ᤸᤗᤧ ᤔᤥᤛᤠᤖᤧ ᤁᤢᤏᤠᤖᤠ᤺ᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤧᤖᤧᤶ ᤗ᤹ᤖᤧᤒᤣᤖ ᤐᤳᤇᤧᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤢᤏᤠᤖᤠᤴ ᤀᤥᤔᤧᤵᤔᤠ ᤔᤧᤴᤇᤢᤰᤋᤢᤴᤗᤥ॥

⁸ ᤜᤧᤰᤁᤣ᤺ᤸᤗᤧ ᤛᤡᤔᤧᤴ ᤁᤧᤍᤠ᤺ᤵᤐᤠ ᤛᤠᤶᤕᤥᤌᤡᤶᤔᤡᤴ ᤔᤡᤔᤡᤍᤡᤱᤅᤡᤴᤏᤢ ᤋᤩᤧ᤺ᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤋᤠᤖᤢᤒᤠ ᤀᤡᤱᤈᤠᤱᤅᤡᤱᤃ ᤂᤧᤴᤏᤢ᤺ᤸᤗᤧ ᤕᤖᤡᤰ ᤔᤡᤔᤡᤍᤡᤱᤒᤠ ᤔᤧᤈᤥ᤺ᤰᤏᤧᤴᤒᤡ᥅

⁹ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤠᤴ ᤁᤧᤎᤡᤰᤐᤠ ᤔᤠᤱᤛᤧᤘᤠᤴ ᤔᤡᤔᤡᤍᤡᤱᤒᤠ ᤐᤥ᤺ᤰᤂᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤀᤥ ᤛᤠᤶᤕᤥᤏᤡᤔᤠ ᤁᤧᤍᤠ᤺ᤵᤐᤠ ᤔᤠᤱᤛᤧᤘᤠᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤡᤔᤡᤍᤡᤱᤒᤠ ᤆᤥᤰᤗᤥ᥄

¹⁰ ᤛᤧᤰᤂᤠ᤺ᤸᤗᤧ ᤁᤢᤛᤱ ᤛᤣᤛᤣᤔᤠᤱᤜᤢᤵᤐᤡᤸᤗᤧᤴ ᤛᤧᤴᤍᤠᤱᤃᤧᤴ ᤔᤡᤔᤡᤍᤡᤱᤅᤡᤴᤏᤢ ᤋᤱᤔᤠᤸᤗᤧ ᤂᤧᤴ ᤋᤃᤡᤒᤠ ᤔᤡᤔᤡᤍᤡᤱᤅᤡᤱᤃ ᤌᤣᤀᤠᤱ ᤔᤣ᤺ᤴᤗᤥ॥

¹¹ ᤌᤣᤀᤠᤱᤓᤧᤸᤗᤧ ᤋᤃᤡᤒᤠᤴ ᤛᤧᤖᤧᤶ ᤗ᤹ᤖᤧ ᤐᤣᤛᤠᤱ ᤔᤡᤔᤡᤍᤡᤱᤒᤠ ᤆᤥᤃᤧᤸᤗᤧ. ᤛᤍᤠᤍᤡᤱ ᤁᤧᤘᤠ᤹ᤒᤠᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤡᤔᤡᤍᤡᤱᤒᤠ ᤆᤥᤰᤗᤥ॥

¹² ᤀᤠᤏᤡ᤹ᤃ ᤀᤰᤋᤱᤒᤠ ᤏᤡᤱᤛᤠᤱ ᤀᤠᤃᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤛᤧᤰᤂᤠᤴ ᤀᤡᤱᤓᤥᤔᤠ ᤀᤠᤱᤃᤡᤏᤧᤴ॥

¹³ ᤀᤠᤏᤡ᤹ᤃ ᤔᤥᤛᤠᤴ ᤁᤢᤀᤡᤛᤡ᤺ᤰᤛᤡ ᤔᤣ᤺ᤴᤗᤥ॥ ᤂᤧᤸᤗᤧᤃ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤖᤧᤶ ᤗ᤹ᤖᤧᤒᤣᤖ ᤐᤳᤇᤧᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤔᤧᤴᤏᤡᤛᤢᤴᤗ ᤑᤠ᤹ᤀᤠᤱ ᤁᤢᤏᤠ᤺ᤴ ᤋᤧᤵᤋᤢ ᤑᤳᤇᤢᤖᤥ॥

¹⁴ ᤁᤖ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤠᤴ ᤁᤧᤛᤠᤰᤐᤠ ᤐᤥ᤺ᤰᤂᤧᤀᤠᤱ ᤀᤠᤸᤗ ᤌᤠᤖᤡᤰᤛᤠᤱ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤴ ᤔᤧᤏᤡᤖᤢᤸᤗᤧ ᤛᤧᤰᤂᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗ ᤑᤠ᤹ᤀᤠᤱ ᤂᤧᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢ᤹ᤖᤥ॥ ᤁᤴ ᤏᤠᤍᤧᤵᤔᤠᤱᤃ ᤂᤪᤡᤛ᤻ᤋᤧᤴ ᤆᤥ᤺ᤰᤔᤏᤠᤒᤠ ᤏᤛᤠ᤺ᤴᤏᤡᤸᤗᤧᤖᤰ ᤜᤴᤍᤢ᤹ᤖᤥ॥

¹⁵ ᤀᤠᤀᤡᤴ ᤌᤠᤖᤡᤰᤛᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤔᤧᤏᤡᤖᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤂᤧᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢ᤹ᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

¹⁶ ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤍᤠᤱᤒᤠᤴ ᤏᤛᤠᤴ ᤆᤥᤃᤢ᤹. ᤂᤧᤸᤗᤧ ᤁᤢᤏᤠᤍᤧᤵᤔᤠᤴ ᤜᤴᤗᤥ॥

¹⁷ ᤀᤠᤸᤗ ᤍᤠᤱᤒᤠᤱᤃ ᤕᤠᤶᤛᤠᤶᤗᤥ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤕᤠᤛᤠᤶᤔᤡᤴ ᤀᤠᤳᤋᤥ ᤘᤠ᤹. ᤂᤧᤵᤔᤥ ᤆᤥ᤺ᤰᤕᤢᤶᤓᤥ ᤘᤠ᤹ᤖᤥ॥

¹⁸ ᤀᤠᤏᤡ᤹ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤀᤠᤎᤠᤰᤗ ᤑᤠ᤹ᤀᤠᤱ ᤀᤠᤏᤡ᤹ ᤏᤠᤍᤧᤵᤔᤠᤴ ᤜᤖᤧᤀᤠᤱ ᤘᤠ᤹ᤖᤥ॥ ᤍᤠᤱᤒᤠᤴ ᤛᤣᤛᤣᤔᤠᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠ ᤁᤧᤍᤠᤒᤠ ᤁᤢᤔᤡᤔᤡᤍᤡᤱᤅᤡᤸᤗᤧ ᤂᤢᤏᤧ᤹ ᤁᤢᤀᤡᤛᤡᤰ ᤀᤠᤗᤧᤱᤛᤡᤱᤗ ᤀᤠᤒᤣᤰ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤕᤖᤡᤰ ᤔᤡᤔᤡᤱᤍᤡᤱᤒᤠ ᤀᤠᤒᤥᤱᤗ ᤀᤠᤒᤣ᤺ᤰᤗᤥ॥