᥈ ᤁᤥᤖᤴᤌᤡ 2 - LIFOTNT

¹ ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤐᤠᤴ ᤔᤧᤳᤇᤧ ᤀᤡᤱᤃᤠ᤹ ᤕᤠᤶᤔᤥ ᤂᤡᤏᤡ᤹ᤀᤥ ᤔᤧᤴᤍᤠᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥

² ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤏᤠᤔᤠᤰᤔᤥ ᤌᤠᤏᤡᤱᤏᤧ ᤑᤠ᤹ᤃᤪ ᤏᤠᤔᤠᤰᤔᤥ ᤌᤠᤛᤢᤱᤛᤡᤱᤒᤠᤜᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤗᤧ ᤀᤡᤱᤃᤠ᤹ ᤛ᤺ᤳᤋᤠᤖ ᤕᤠ᤺ᤶᤔᤠ ᤛᤢᤰᤁᤠᤒᤣ᥅

³ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤛ᤺ᤵᤔᤠ ᤁᤧᤒᤠᤱᤒᤠᤸᤗᤧᤀᤣ ᤀᤠᤏᤡᤱᤘᤠ᤹ ᤔᤧᤍᤢᤰᤂᤢᤴᤗ ᤑᤠ᤹ᤀᤠᤱ ᤋᤃᤡᤒᤠ ᤛᤰᤀᤡᤱᤄᤱᤅᤥ ᤜᤧᤰᤋᤱᤒᤠ ᤁᤧᤛᤠᤰᤐᤠ ᤐᤠᤴ ᤛᤠᤵᤋᤢᤱᤒᤠᤖᤥ॥ ᤀᤡᤱᤃᤠ᤹ ᤛ᤺ᤳᤋᤠᤸᤗᤧ ᤂᤡᤏᤡ᤹ᤀᤠᤱ ᤁᤧᤛ᤺ᤳᤋᤡ᤹ ᤁᤧᤗ᤹ᤒᤠ ᤛᤧᤰᤂᤠᤀᤣ ᤏᤡᤛᤢᤱᤗᤥ॥

⁴ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤋᤢᤰᤗ ᤑᤠ᤹ᤀᤠᤱ ᤔᤣ᤺ᤴ. ᤁᤖ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗ ᤑᤠ᤹ᤀᤠᤱᤅᤣ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤛᤠ᤹ᤖᤡᤰ ᤀᤠᤕᤥᤶ ᤐᤢ᤹ᤖᤧ ᤜᤧᤰᤁᤩᤠᤱ ᤀᤠᤔᤡᤰᤘᤠ ᤌᤠᤛᤢᤱᤗ ᤂᤧᤴ ᤛᤰᤀᤡᤱᤄᤱᤅᤡᤴ ᤀᤡᤱᤃᤠ᤹ ᤜᤠᤰᤏᤡᤱᤅᤠᤱ ᤘᤕᤠᤱᤗᤥ॥

ᤐᤠ᤺ᤴᤃᤧᤓᤣ᤺ᤶᤒᤠᤜᤠ᤹ ᤗᤧᤵᤔᤡ ᤐᤡᤔᤠᤛᤡ

⁵ ᤀᤡᤱᤃᤠ᤹ ᤂᤡᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤍᤢᤰᤐᤠ ᤐᤠᤴ ᤐᤠ᤺ᤵᤔᤠ ᤀᤠᤏᤡᤱᤘᤠ᤹ ᤜᤥᤵᤗᤥ. ᤁᤖ ᤀᤡᤱᤃᤠ᤹ ᤕᤠᤵᤔᤡ ᤋᤢᤰᤂᤣ ᤁᤧᤈᤠ᤺ᤵᤐᤠᤸᤗᤧ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤠᤱᤒᤠᤏᤢ᤺ᤸᤗᤧᤀᤠᤱ ᤔᤠᤱᤓᤠ ᤕᤖᤡᤰ ᤂᤧᤸᤗᤧ ᤂᤡᤏᤡ᤹ ᤋᤢᤰᤂᤣ ᤁᤧᤈᤠ᤺ᤳᤋᤡᤀᤠᤱ ᤘᤠ᤹ᤖᤥ॥

⁶ ᤂᤡᤏᤡ᤹ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤁᤧᤒᤡᤖᤢᤶᤒᤠ ᤂᤢᤶᤍᤡᤱᤅᤡᤴ ᤂᤢᤏᤧ᤹ ᤁᤢᤗᤠᤃᤡ ᤁᤧᤖᤧᤀᤠᤱ ᤘᤠ᤹ᤖᤥ॥

⁷ ᤜᤧᤰᤁᤣ᤺ᤸᤗᤧ ᤀᤠᤸᤗ ᤂᤧᤴ ᤗᤧᤵᤔᤡ ᤁᤧᤒᤡᤖᤢᤶᤗ ᤐᤥᤱ. ᤀᤠ᤺ᤴᤇᤡᤱᤔᤠ ᤁᤧᤒᤡᤖᤢᤶᤗ ᤐᤥᤱ. ᤔᤣ᤺ᤴᤏᤣ ᤑᤠ᤹ᤃᤪ ᤂᤧᤱᤃ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤰᤁᤠᤱ ᤏᤡᤱᤛᤠᤶᤔᤥ ᤌᤠᤖᤥ॥

⁸ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤂᤧᤴ ᤔᤏᤠᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥

⁹ ᤌᤣᤀᤠᤱ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤛᤰᤀᤡᤱᤄᤱ ᤜᤠᤰᤏᤡᤱᤒᤠ ᤑᤧᤸᤗᤧ ᤁᤠᤰ ᤀᤠᤀᤡᤱᤈᤠᤱᤜᤠ᤹ ᤁᤧᤏᤠ᤺ᤳᤋᤢᤶ ᤁᤧᤀᤡ᤺ᤳᤋᤢᤶᤗ ᤁᤧᤘᤕᤡ᤹ᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤢᤱᤒᤠᤖᤥ॥

¹⁰ ᤂᤡᤏᤡ᤹ ᤗᤧᤵᤔᤡ ᤁᤧᤒᤡᤖᤢᤶᤒᤠ ᤔᤏᤠᤴ ᤀᤡᤱᤃᤠ᤹ᤀᤠᤱ ᤗᤧᤵᤔᤡ ᤐᤡᤖᤢᤱᤗᤥ॥ ᤗᤧᤵᤔᤡ ᤐᤡᤔᤠ ᤁᤧᤒᤥᤱᤒᤠ ᤐᤠᤴ ᤘᤠ᤹ᤏᤧ ᤑᤠ᤹ᤃᤪ. ᤂᤧᤴ ᤗᤧᤵᤔᤡ ᤐᤡᤖᤢᤱᤅᤡᤸᤗᤧ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤂᤡᤏᤡ᤹ ᤗᤠᤃᤡᤀᤣ ᤜᤧᤰᤁᤣ ᤆᤥᤃᤢᤱᤗᤥ॥

¹¹ ᤔᤠᤑᤧᤴᤛᤠᤶᤔᤡᤸᤗᤧ ᤀᤠᤏᤡ᤹ ᤀᤡᤱᤀᤠᤴᤗᤧᤰᤏᤧᤸᤗ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤱᤒᤠᤖᤥ. ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤁᤣ ᤁᤢᤕᤠ᤺ᤶᤒᤰᤁᤡᤴ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤔᤠᤱ ᤘᤠ᤹ᤖᤥ॥

ᤐᤠᤘᤗᤧᤴ ᤋᤪᤥᤀᤠᤛ ᤕᤧᤰᤕᤰᤁᤥ ᤐᤣᤰ

¹² ᤀᤠᤸᤗ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱ ᤀᤡᤱᤓᤥᤛᤧ ᤋᤪᤥᤀᤠᤛ ᤐᤣᤃᤠᤱᤅᤡᤸᤗᤧ ᤂᤧᤵᤔᤥ ᤍᤠᤱᤒᤠᤸᤗᤧ ᤀᤡᤱᤓᤥᤔᤠ ᤛᤢᤕᤧᤶᤎᤡᤰ ᤐᤡᤖᤠᤱᤗᤥ॥

¹³ ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤛᤏᤠᤖᤢᤱ ᤜᤥ᤺ᤵᤋᤧᤖᤥ ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤂᤡᤏᤡ᤹ ᤕᤠ᤺ᤶᤒᤣᤀᤥ ᤀᤡᤱᤄᤱ ᤁᤧᤍᤠ᤺ᤵᤐᤠ ᤀᤠᤴᤛᤠ᤹ ᤋᤡᤋᤛᤧᤴ ᤔᤧᤴᤍᤢᤶᤒᤠᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤛᤧᤶᤔᤢ᤹ᤀᤡ ᤏᤠ᤺ᤰᤋᤢᤱᤛᤡᤱᤅᤠᤱ ᤔᤧᤛᤣᤍᤥᤏᤡᤕᤠ ᤋᤧᤱᤃᤵ ᤗᤧᤵᤔᤠᤱ ᤐᤣᤃᤠᤱᤗᤥ॥

ᤂᤪᤡᤛ᤻ᤋᤗᤠᤶᤒᤠ ᤏᤠ᤺ᤶᤔᤠ ᤂᤥᤍᤧᤳ

¹⁴ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤍᤠᤍᤡᤱ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤌᤱᤏᤠ᤺ᤶᤒᤠ ᤛᤛ᤺ᤳᤛᤖᤠᤱᤅᤥ ᤗᤠᤶᤀᤠᤗᤥᤖᤥ॥ ᤜᤧᤰᤁᤩᤠᤱ ᤁᤢᤏᤠᤶᤃᤧᤏᤢ᤹ᤒᤠ ᤑᤢᤱᤏᤠᤶᤔᤡᤴ ᤛᤧᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤏᤧᤜᤡᤏᤡᤱᤘᤠ᤹ᤀᤡᤴ ᤀᤠᤏᤡ᤹ᤗᤠᤶᤒᤠ ᤁᤧᤖᤧᤰ ᤐᤡᤛᤠᤱ ᤛᤧᤛᤢᤖᤥ.

¹⁵ ᤌᤣᤀᤠᤱᤓᤧᤸᤗᤧ ᤛᤧᤴᤗᤵ ᤁᤧᤄᤥᤒᤠᤖ ᤁᤧᤒᤵᤐᤠ ᤜᤧᤰᤁᤩᤠᤱ ᤁᤧᤔᤧᤰᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤀᤠᤏᤡ᤹ ᤜᤡᤱᤔᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤥ ᤂᤪᤡᤛ᤻ᤋᤖᤧ ᤋᤥ᤺ᤴᤍᤢᤒᤠ ᤑᤢᤱᤏᤠᤶ ᤁᤢᤀᤡᤛᤡᤰ ᤆᤥᤰᤗᤥ॥

¹⁶ ᤁᤧᤔᤧᤰᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤗᤠᤃᤡ ᤁᤱᤃ ᤛᤡᤔᤧᤸᤗᤧ ᤁᤢᤏᤠᤶ ᤁᤢᤀᤡᤛᤡᤰ ᤐᤥᤱ. ᤁᤖ ᤛᤧᤴᤗᤵ ᤁᤧᤄᤥᤒᤠᤖ ᤁᤧᤒᤵᤐᤠᤜᤠ᤹ᤖᤧ ᤗᤠᤃᤡ ᤁᤴ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤑᤢᤱᤏᤠᤶ ᤁᤢᤀᤡᤛᤡᤰ ᤐᤥᤱᤗᤥ॥ ᤀᤰᤋᤱᤒᤠ ᤕᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤜᤠᤳ ᤗᤠ᤹ᤖᤢᤒᤣ᥅

¹⁷ ᤀᤠᤏᤡᤃᤧᤃ ᤘᤣ᤹ᤜᤠ᤹ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤗᤧᤱᤜᤱ ᤁᤧᤈᤥ᤺ᤰᤐᤠᤛᤡᤃᤧᤃ ᤔᤣ᤺ᤴᤗᤥ॥ ᤂᤧᤸᤗᤧ ᤁᤢᤗᤧᤰᤘᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤛᤡᤒᤠ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤡᤸᤗᤧ ᤐᤠᤖᤡᤃᤧ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤔᤳᤋᤡᤃᤧᤖ ᤘᤠ᤹ ᤁᤧᤗ᤹ᤒᤠᤴ ᤏᤡᤛᤢᤶᤒᤧᤖᤥ॥