᥈ ᤁᤥᤖᤴᤌᤡ 13 - LIFOTNT

ᤁᤢᤏᤢᤵᤔᤠ ᤛᤠᤶᤍᤡᤱ

¹ ᤁᤱᤃ ᤂᤡᤏᤡ᤹ᤀᤥ ᤋᤠᤀᤠᤒᤠ ᤛᤢᤶᤛᤡᤃᤣᤰᤐᤠ ᤕᤧᤶ ᤐᤥᤱᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤏᤧᤵᤇᤡ ᤀᤡᤃᤪ ᤛᤢᤶᤛᤡᤖᤧ ᤋᤥ᤺ᤴᤍᤡ ᤔᤧᤒᤡᤖᤢᤀᤠᤱᤗᤰ ᤁᤠᤰ ᤐᤠ᤺ᤴᤜᤠ᤹ ᤁᤢᤈᤧᤰ ᤐᤥᤱᤗᤥ॥”

² ᤀᤡᤱᤃᤠ᤹ᤃ ᤏᤡᤛᤡᤃᤣᤰᤐᤠ ᤕᤧᤶᤔᤥ ᤂᤡᤏᤡ᤹ᤏᤢ ᤘᤕᤠᤱᤅᤡᤸᤗᤧᤀᤣ ᤂᤧᤴ ᤋᤃᤡ ᤗᤠᤕᤥ ᤆᤥ᤺ᤰᤏᤢ ᤁᤧᤘᤠ᤹ᤒᤠᤜᤠ᤹ ᤛᤠᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤘᤕᤧ॥ ᤀᤠᤸᤗ ᤕᤠᤶᤔᤥ ᤂᤡᤏᤡ᤹ᤏᤢ ᤜᤥ᤺ᤵᤐᤠᤛᤠᤱ ᤛᤠᤶᤍᤡᤱ ᤐᤡᤏᤡᤱᤗᤥ—ᤀᤡᤱᤃᤠ᤹ ᤂᤡᤏᤡ᤹ᤀᤥ ᤏᤢ᤺ᤱᤅᤠ ᤋᤠᤀᤠᤸᤗᤧ ᤂᤧᤴ ᤋᤃᤡ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤘᤣ᤹ ᤗᤠᤕᤥ ᤆᤥ᤺ᤰᤏᤢ ᤁᤧᤘᤠ᤹ᤒᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤍᤠᤱᤄᤢᤱᤛᤡᤱᤅᤡᤴᤗᤥ॥

³ ᤀᤡᤱᤃᤠ᤹ᤗᤠᤶᤒᤠ ᤂᤪᤡᤛ᤻ᤋᤧᤴ ᤐᤠ᤺ᤵᤐᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤐᤷᤔᤠᤱᤃᤡᤴ ᤁᤧᤄᤥᤛᤢᤶᤔᤣᤖᤥ॥ ᤂᤢᤏᤧ᤹ ᤂᤡᤏᤡ᤹ᤏᤢ ᤔᤧᤴᤎᤢᤶᤔᤏᤠᤒᤠ ᤔᤧᤈᤥᤰᤏᤧᤴ. ᤁᤖ ᤂᤢᤏᤧ᤹ ᤂᤡᤏᤡ᤹ ᤗᤢᤶᤔᤥ ᤔᤢᤰᤛᤠᤶᤍᤠᤱᤒᤠ ᤆᤥᤰᤗᤥ॥

⁴ ᤂᤪᤡᤛ᤻ᤋᤧᤱᤃ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤴᤎᤢᤶᤔᤏᤠᤒᤠ ᤁᤢᤀᤡᤛᤡᤰ ᤔᤧᤓᤥᤴᤍᤢ. ᤁᤖᤛᤠᤱ ᤂᤢᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤁᤢᤜᤡᤱᤘᤧᤳ ᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡᤃᤧᤀᤠᤱ ᤂᤢᤏᤧ᤹ ᤁᤢᤀᤡᤛᤡᤰ ᤔᤧᤴᤎᤢᤶᤔᤏᤠᤒᤠ ᤆᤥᤃᤡᤃᤧ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤂᤡᤏᤡ᤹ ᤗᤢᤶᤔᤥ ᤕᤠ᤺ᤶᤒᤰ ᤆᤥ᤺ᤰᤛᤧ ᤂᤢᤏᤧ᤹ᤏᤢᤀᤣ ᤜᤡᤅᤡᤃᤧ᤹ᤖᤥ॥

⁵ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤛᤧᤰᤂᤠᤒᤠ ᤆᤥ᤺ᤰᤐᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤀᤠᤒᤠᤅᤣ ᤛᤠ᤹ᤖᤧᤶᤔᤧ᤹ᤀᤥ॥ ᤕᤧᤛᤢ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤘᤠ᤹ ᤑᤠ᤹ᤀᤠᤱ ᤁᤧᤴᤏᤡᤛᤢᤶᤔᤡᤶᤒᤡ᥅ ᤂᤪᤡᤛ᤻ᤋᤧᤴ ᤂᤡᤏᤡ᤹ᤀᤥ ᤜᤥ᤺ᤵᤏᤧ ᤑᤠ᤹ᤃᤪ ᤛᤧᤰᤂᤠᤀᤣ ᤁᤢᤛᤠᤱ ᤁᤧᤴᤗᤛ᤻ᤛᤢᤶᤔᤡᤴᤗᤥ॥

⁶ ᤜᤧᤰᤁᤩᤠᤱ ᤀᤠᤏᤡᤃᤧᤃ ᤁᤢᤛᤠᤱ ᤔᤧᤴᤗ᤺ᤶᤏᤠᤒᤠ ᤔᤧᤶᤒᤥᤱᤅᤣ ᤘᤕᤡᤃᤧ ᤁᤧᤗ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ ᤑᤠ᤹ᤀᤠᤱ ᤏᤡᤱᤛᤠᤱ ᤆᤥᤃᤢᤱᤗᤥ॥

⁷ ᤂᤡᤏᤡ᤹ᤃ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤌᤣᤀᤠᤱ ᤁᤧᤴᤈᤥᤃᤢᤶᤔᤡᤴᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤢᤘᤠ ᤆᤥᤃᤢᤶᤒᤧ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤗᤢᤶᤔᤥ ᤀᤠᤏᤡᤃᤣ ᤔᤠᤱᤛᤧᤘᤠᤴ ᤁᤢᤛᤠᤱ ᤗᤛ᤻ᤛᤢ ᤑᤠ᤹ᤀᤠᤱ ᤌᤠ᤺ᤶᤔᤠᤛᤡᤃᤧᤒᤠ ᤔᤣ᤺ᤴ. ᤁᤖ ᤀᤠᤏᤡᤃᤣ ᤁᤢᤛᤠᤱ ᤔᤧᤗᤛ᤻ᤛᤢᤶᤒᤧᤶᤒᤠ ᤁᤢᤀᤡᤛᤡᤰ ᤗ᤹ᤛᤠᤱ ᤂᤡᤏᤡ᤹ ᤏᤢᤒᤠ ᤁᤧᤈᤥᤃᤢᤶᤗ ᤁᤧᤗ᤹ᤒᤠ ᤀᤠᤏᤡᤃᤣ ᤏᤡᤱᤘᤠ᤹ ᤘᤠ᤹ᤖᤥ॥

⁸ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤧᤃ ᤛᤧᤰᤂᤠ᤺ᤸᤗᤧ ᤁᤢᤍᤰᤗᤧᤱᤅᤥ ᤌᤣᤀᤠᤱ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤧᤴᤗᤥ. ᤁᤖ ᤛᤧᤰᤂᤠ᤺ᤸᤗᤧ ᤗᤠᤃᤡᤖᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤖᤥ॥

⁹ ᤀᤠᤏᤡᤃᤣ ᤔᤧᤴᤎᤢᤶᤔᤏᤠ ᤐᤥ᤺ᤰᤂᤡᤃᤧᤀᤠᤱ ᤂᤡᤏᤡ᤹ ᤛᤧᤰᤂᤠᤀᤣ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤸᤗᤧ ᤛ᤺ᤳᤋᤡᤃᤧᤖᤥ॥ ᤀᤠᤏᤡᤃᤧᤃ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤢᤗᤡᤱᤍᤥ ᤁᤧᤃᤧᤖᤡᤖ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤶᤒᤧ᤹ᤖᤥ॥

¹⁰ ᤒᤠ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤐᤠ᤺ᤴᤜᤠ᤹ᤃ ᤂᤡᤏᤡ᤹ᤀᤥ ᤋᤠᤔᤠᤏᤢ᤺ᤸᤗᤧ ᤋᤃᤡ ᤛᤠᤵᤋᤢᤱᤗ ᤐᤳᤋᤠᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤀᤠᤕᤢᤰᤁᤡᤴ ᤛᤠᤰᤗ ᤀᤥᤃᤵ ᤆᤥ᤺ᤰᤔᤠ ᤔᤧᤒᤥᤱᤏᤧᤴᤗ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤱᤗᤥ॥ ᤍᤠᤱᤒᤠᤸᤗᤧ ᤀᤡᤱᤃᤠ᤹ ᤁᤴ ᤕᤢᤰᤁᤡᤱᤃ ᤂᤡᤏᤡ᤹ ᤑᤧᤳᤗᤠ᤺ᤴᤇᤧ ᤔᤣ᤺ᤴ. ᤁᤖ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤌᤥᤒᤥ ᤆᤥ᤺ᤰᤔᤠ ᤑᤠ᤹ᤀᤠᤱ ᤐᤡᤖᤠᤱᤒᤠᤖᤥ॥

ᤁᤢᤏᤢᤵᤔᤠ ᤛᤧᤶᤔᤢ᤹ᤀᤡ

¹¹ ᤀᤠᤸᤗ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤢᤏᤢᤵᤔᤥ ᤛᤧᤶᤔᤢ᤹ᤀᤡ ᤛᤧᤘᤠᤖᤥ॥ ᤁᤢᤗᤡᤱᤍᤥ ᤁᤧᤵᤔᤠ ᤏᤡᤱᤘᤠ᤹ ᤆᤥᤃᤧᤶᤔᤧ᤹. ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹. ᤏᤡᤱᤘᤠ᤹ᤀᤥ ᤌᤡᤰᤜᤢᤵ ᤐᤥ᤺ᤰᤂᤧᤶᤔᤧ᤹. ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤔᤡ᤺ᤶᤈᤡ ᤏᤢ ᤛᤏᤠᤖᤢᤱ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ᤏᤢ ᤘᤠ᤹ᤖᤥ॥

¹² ᤂᤡᤏᤡ᤹ᤃ ᤏᤛᤠᤏᤡᤒᤠ ᤔᤡ᤺ᤶᤈᤡ᤺ᤸᤗᤧ ᤛᤧᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥

¹³ ᤁᤵᤔᤥᤒᤠ ᤁᤧᤖᤧᤰ ᤏᤛᤠᤏᤡᤒᤠᤜᤠ᤹ᤖᤧ ᤂᤡᤏᤡ᤹ ᤛᤧᤘᤠ ᤁᤧᤶᤜᤠᤰᤋᤡ᤹ᤖᤥ॥

¹⁴ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡ᤺ᤶᤈᤡᤴ ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤛᤣᤛᤣ ᤋᤱᤈᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥