᥈ ᤁᤥᤖᤴᤌᤡ 12 - LIFOTNT

ᤐᤠᤘᤗᤖᤧ ᤏᤡᤛᤢᤒᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤛᤢᤑᤥ

¹ ᤀᤡᤱᤃᤠ᤹ ᤆᤶᤛᤡᤱᤅᤠᤸᤗᤧ ᤌᤣᤀᤠᤱ ᤔᤧᤈᤰᤁᤠᤴᤇᤠᤱ ᤀᤡᤱᤃᤠ᤹ ᤍᤠᤱᤒᤠᤗᤠᤶᤒᤠ ᤂᤥᤛᤢᤱᤒᤠ ᤛᤢᤑᤥᤜᤠ᤹ ᤏᤢ ᤀᤥᤛᤣ᤺ᤴᤍᤠᤱᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤆᤶᤛᤡᤱᤅᤠᤖᤀᤣ ᤐᤥᤱᤗᤥ॥

² ᤀᤡᤱᤃᤠ᤹ ᤌᤡᤰ-ᤗᤡ (᥇᥊) ᤋᤱᤒᤣ ᤋᤃᤡ ᤛᤢᤶᤛᤡᤃᤣᤰᤐᤠ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤋᤣ᤹ᤖᤧᤀᤠᤱ ᤘᤕᤧᤒᤠ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤔᤏᤠᤎᤡᤰ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤂᤧᤴ ᤔᤏᤠᤴ ᤏᤠᤛᤡᤱᤃᤧᤴ ᤌᤰᤁᤥᤒᤡ ᤔᤣ᤺ᤶᤒᤡ ᤀᤡᤱᤃᤠ᤹ ᤔᤧᤏᤡᤀᤠᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤛᤢ᤹ᤖᤥ॥

^3-4 ᤀᤡᤱᤃᤠ᤹ ᤁᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤔᤧᤍᤧᤶᤛᤢᤀᤠᤱ ᤔᤧᤍᤣ᤹ᤖᤢᤒᤠ ᤔᤏᤠᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ (ᤕᤠᤶᤔᤥᤀᤠᤱ ᤐᤠ᤺ᤳᤋᤢᤱ—ᤂᤧᤴ ᤔᤏᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤌᤥ ᤐᤣ᤺ᤸᤗᤧ ᤏᤠᤛᤡᤱᤃᤧᤴ ᤌᤰᤁᤥ ᤐᤣᤒᤡ ᤀᤡ ᤛᤢᤑᤥᤖᤰ ᤏᤡᤛᤢᤱᤒᤡ ᤀᤡᤱᤃᤠ᤹ ᤔᤧᤏᤡᤀᤠᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤛᤢ᤹ᤖᤥ)॥ ᤂᤧᤸᤗᤧ ᤔᤏᤠᤖᤧ ᤐᤠ᤺ᤵᤔᤠ ᤔᤧᤸᤗᤠ᤹ᤔᤏᤠᤒᤠ ᤛᤠ᤹ᤖᤡᤰ ᤛᤣᤛᤣᤒᤠ ᤐᤠ᤺ᤴᤜᤠ᤹ ᤂᤧᤵᤛᤢᤖᤥ॥

⁵ ᤀᤡᤱᤃᤠ᤹ᤃ ᤀᤰᤋᤱᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤏᤧ ᤆᤶᤛᤡᤱᤅᤠᤖᤥ. ᤁᤖ ᤀᤡᤱᤃᤠ᤹ ᤁᤧᤎᤢᤶᤒᤠ ᤔᤧᤈᤥᤰᤁᤠᤴ ᤗ᤹ᤖᤡᤰ ᤀᤥᤛᤣ᤺ᤴᤍᤠᤱ ᤁᤧᤈᤥ᤺ᤰᤐᤠ ᤐᤠ᤺ᤴᤏᤢ᤺ᤸᤗᤧ ᤘᤣ᤹ ᤀᤠᤒᤠᤅᤣ ᤀᤠᤕᤠ᤺ᤶᤒᤣᤀᤥ ᤔᤧᤈᤶᤛᤡᤱᤅᤠᤴᤗᤥ॥

⁶ ᤀᤡᤱᤃᤠ᤹ᤃ ᤆᤶᤛᤡᤱᤔᤠᤀᤣ ᤐᤥᤱᤛᤠᤱ ᤀᤍᤱ ᤔᤧᤒᤥᤱᤅᤠᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤛᤧᤰᤂᤠᤀᤣ ᤐᤠ᤺ᤳᤋᤠᤖ ᤘᤠ᤹ᤀᤠᤖᤥ॥ ᤁᤖ ᤀᤡᤱᤃᤠ᤹ ᤔᤧᤈᤶᤛᤡᤱᤅᤠᤴᤗᤥ. ᤜᤧᤰᤁᤣᤗ᤹ᤖᤡᤰ ᤆᤥᤃᤢᤱ ᤐᤠ᤺ᤳᤋᤢᤱᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤳᤋᤡᤸᤗᤧᤀᤠᤱ ᤔᤧᤀᤡ᤺ᤳᤋᤠᤴᤗᤖᤥ॥

ᤏᤠᤛᤡᤱᤃᤧᤴ ᤌᤰᤁᤥ ᤀᤠᤄᤄᤒᤠ ᤋᤡᤱᤅᤡᤴ

⁷ ᤁᤴ ᤐᤕᤶ ᤕᤶᤒᤠ ᤀᤥᤛᤣ᤺ᤴᤍᤠᤱᤜᤠ᤹ ᤂᤥᤛᤢᤱᤒᤠᤸᤗᤧ ᤀᤠᤱᤍᤡᤱ ᤔᤧᤗ᤹ᤀᤠᤴᤗ ᤑᤠ᤹ᤀᤠᤱ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤋᤡᤱ ᤁᤢᤀᤡᤛᤡᤰ ᤀᤠᤄᤄᤒᤠ ᤐᤠ᤺ᤴᤎᤡᤰ ᤂᤥᤛᤢᤱᤅᤠᤱ ᤘᤠ᤹ᤀᤠᤖᤥ॥ ᤂᤧᤱᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤱᤛᤠᤒᤠᤖᤥ. ᤂᤧᤸᤗᤧ ᤀᤡᤱᤃᤠ᤹ ᤋᤢᤰᤂᤣ ᤆᤠ᤺ᤳᤋᤠᤖ ᤘᤠ᤹ᤖᤥ॥

⁸ ᤁᤴ ᤀᤡᤱᤃᤠ᤹ᤀᤥᤏᤢ ᤂᤧᤳᤋᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤛᤢᤶᤗᤧᤱ ᤌᤠᤖᤡᤰ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱ॥

⁹ ᤁᤖ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ᤀᤥ ᤀᤡᤱᤃᤠ᤹ ᤀᤠᤗᤢᤱᤃᤢᤶᤔᤡᤴ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤛᤠ᤹ᤀᤡᤔᤧᤴᤕᤠᤰᤔᤏᤠᤒᤠ ᤐᤠ᤺ᤴᤜᤠ᤹ᤀᤥ ᤀᤠᤔᤢᤰᤛᤠᤶᤔᤡᤴ ᤁᤢᤗᤡᤱᤍᤥ ᤁᤧᤳᤗᤥ॥” ᤂᤧᤸᤗᤧᤆᤥᤃᤢᤸᤗᤧ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤴ ᤀᤡᤱᤃᤠ᤹ᤀᤥ ᤘᤠ᤹ᤖ ᤑᤠ᤹ᤀᤠᤱ ᤔᤧᤴᤎᤢᤶᤔᤏᤠ ᤀᤠᤒᤠ᤺ᤴᤜᤠ᤹ᤀᤥᤏᤧ ᤛ᤺ᤳᤋᤠᤖ ᤆᤶᤛᤡᤱᤅᤠᤖᤥ॥

¹⁰ ᤀᤡᤱᤃᤠ᤹ᤃ ᤂᤪᤡᤛ᤻ᤋᤖᤧ ᤁᤢᤗᤠᤃᤡ ᤛᤠ᤹ᤀᤡᤔᤧᤴᤕᤠᤰᤔᤏᤠ ᤐᤠ᤺ᤴᤜᤠ᤹ᤀᤥ. ᤏᤠᤎᤠᤔᤠᤀᤥ. ᤕᤧᤳᤋᤢᤰᤂᤣᤀᤥ. ᤏᤡᤱᤄᤢᤶᤔᤥ ᤏᤢ ᤁᤧᤛᤠᤰᤐᤠ ᤐᤠ᤺ᤴᤜᤠ᤹ᤀᤥ ᤌᤠᤀᤠᤸᤗᤧᤀᤣ ᤛ᤺ᤳᤋᤠᤖᤥ॥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤠ᤹ᤀᤡ ᤔᤧᤕᤠᤰᤏᤧᤴᤏᤡᤸᤗᤧ ᤂᤪᤡᤛ᤻ᤋᤖᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤧᤎᤢᤶᤒᤠ ᤐᤥᤱᤅᤠᤖᤥ॥

ᤛᤣ᤺ᤰᤕᤢᤰᤔᤡᤒᤠ ᤔᤡᤰᤛᤣᤴ

¹¹ ᤀᤡᤱᤃᤠ᤹ᤃ ᤀᤍᤱ ᤁᤢᤀᤡᤛᤡᤰ ᤐᤥ᤺ᤰᤂᤠᤱᤗᤥ. ᤁᤖ ᤂᤡᤏᤡ᤹ᤀᤣ ᤀᤡᤱᤃᤠ᤹ ᤜᤧᤰᤁᤣ ᤆᤥ᤺ᤰᤔᤠ ᤕᤠᤵᤔᤡ ᤁᤧᤒᤠᤱᤄᤡᤖᤥ॥ ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤏᤢᤒᤠ ᤐᤠᤴ ᤐᤠ᤺ᤵᤔᤠ ᤁᤧᤒᤥᤱᤒᤠ ᤘᤕᤧ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤌᤣᤀᤠᤱ ᤔᤧ᤺ᤴᤏᤠ᤹ᤛᤠᤱ ᤕᤶᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤛᤡᤒᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤏᤢ᤺ᤸᤗᤧ ᤆᤢᤰᤛᤠ ᤔᤧᤈᤥ᤺ᤰᤁᤠᤴᤗᤥ॥

¹² ᤛᤧᤰᤂᤠ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤏᤠᤛᤡ ᤌ᤺ᤳᤋᤢᤱᤗ ᤔᤡᤰᤛᤣ᤺ᤴᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤗᤥ॥ ᤒᤠ ᤁᤴ ᤐᤠ᤺ᤴᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢ᤹ᤖᤥ॥

¹³ ᤂᤡᤏᤡ᤹ ᤀᤠᤳᤋᤡᤴ ᤐᤠ᤺ᤴᤏᤥ ᤘᤣ᤹ᤛᤔᤠ ᤛᤣᤛᤣᤜᤢᤵᤗᤰᤜᤠ᤹ᤏᤢ᤺ᤸᤗᤧ ᤁᤧᤛᤢ᤺ᤴᤍᤡᤒᤣ᥅ ᤁᤶᤔᤩᤠᤰᤗᤰᤗᤥ—ᤀᤡᤱᤃᤠ᤹ ᤂᤡᤏᤡ᤹ ᤁᤢᤓᤠ᤹ᤕᤠᤱ ᤔᤧᤏᤠ᤺ᤰᤏᤡᤱᤅᤡᤴᤗᤥ᥄ ᤀᤰᤂᤣᤗ᤹ᤖᤡᤰ ᤋᤢᤰᤂᤣ ᤆᤠᤳᤏᤡᤱᤒᤠᤀᤥ ᤗᤧᤵᤔᤡ ᤀᤠᤒᤡᤖᤧᤶᤔᤧ᤹ᤀᤥ᥄

¹⁴ ᤀᤠᤸᤗ ᤛᤢᤶᤗᤧᤱᤅᤥ ᤂᤡᤏᤡ᤹ ᤛᤠ᤹ᤛᤧ ᤋᤠᤔᤠ ᤕᤠᤖᤡᤵ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤴ ᤔᤣ᤺ᤴ. ᤁᤖ ᤂᤡᤏᤡ᤹ᤏᤧ ᤆᤠᤜᤠᤒᤠ ᤆᤥ᤺ᤰᤁᤠᤖᤥ॥ ᤌᤣᤀᤠᤱᤓᤧᤸᤗᤧ ᤛᤠᤜᤠ᤹ᤖᤧ ᤔᤠ-ᤒᤠᤜᤠ᤹ᤖᤧᤗᤠᤃᤡ ᤔᤣ᤺ᤴ. ᤁᤖ ᤔᤠ-ᤒᤠᤜᤠ᤹ᤖᤧᤏᤧ ᤛᤠᤜᤠ᤹ᤖᤧ ᤗᤠᤃᤡ ᤕᤠᤱᤛᤠᤁᤢᤴᤎᤣ ᤕᤠᤱᤄᤥ᤺ᤵᤔᤠ ᤐᤥᤱᤗᤥ॥

¹⁵ ᤂᤡᤏᤡ᤹ ᤏᤢ᤹ᤔᤠ ᤋᤠᤔᤠᤖᤧ ᤗᤠᤃᤡ ᤀᤡᤱᤃᤠ᤹ ᤁᤳᤋᤢᤱᤒᤠ ᤁᤠᤰ ᤕᤠᤱᤅᤡᤴ ᤛᤠ᤹ᤖᤡᤰ ᤀᤠᤛᤡᤖᤠ᤹ ᤐᤎᤠᤱᤎᤠᤱᤗ ᤋᤣᤛᤢᤱᤗᤥ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤐᤡᤛᤡᤱᤅᤠᤖᤥ॥ ᤀᤡᤱᤃᤠ᤹ ᤂᤡᤏᤡ᤹ ᤕᤖᤡᤰ ᤗᤢᤱᤔᤠ᤹ ᤋᤢᤰᤏᤡᤱᤅᤡᤸᤗᤧ ᤌᤣᤀᤠᤱ ᤂᤡᤏᤡ᤹ ᤆᤩ᤹ᤖᤰ ᤗᤢᤱᤔᤠ᤹ ᤕᤠᤵᤔᤡ ᤁᤧᤍᤢᤰᤋᤡᤒᤠᤒᤣ᥅

¹⁶ ᤕᤠᤱ ᤏᤠ᤺ᤰᤏᤡᤱᤅᤠᤱ ᤋᤢᤰᤂᤣ ᤔᤧᤈᤠ᤺ᤳᤏᤡᤱᤅᤡᤴᤒᤠ ᤐᤠ᤺ᤴᤏᤡᤴ ᤁᤧᤏᤡᤛᤢᤶᤗᤥ. ᤁᤖ ᤀᤡᤱᤃᤠ᤹ ᤀᤡᤱᤗᤧᤰᤏᤡᤱᤅᤠᤱ ᤂᤡᤏᤡ᤹ ᤀᤡᤈᤥᤀᤥ ᤌᤠᤏᤡᤱ ᤑᤠ᤹ᤀᤠᤱ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶᤗᤥ॥

¹⁷ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤐᤠᤱᤄᤢᤱᤛᤡᤱᤒᤠ ᤔᤏᤠᤜᤠ᤹ᤗᤠᤶ ᤌᤣᤀᤡ ᤂᤥᤛᤢᤱᤗ ᤑᤠ᤹ᤀᤠᤱ ᤀᤡᤱᤗᤧᤰᤏᤡᤱᤒᤡ᥅

¹⁸ ᤀᤡᤱᤃᤠ᤹ ᤋᤡᤋᤛᤧᤴ ᤂᤡᤏᤡ᤹ᤀᤥ ᤐᤠᤱᤔᤠ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤅᤠᤱ ᤘᤣ᤹ᤛᤔᤠ ᤏᤢᤛᤠ᤹ᤀᤡᤴᤏᤠᤱ ᤂᤢᤏᤧ᤹ᤏᤢᤀᤣ ᤐᤠᤱᤄᤢᤱᤗᤥ॥ ᤋᤡᤋᤛᤖᤧ ᤂᤡᤏᤡ᤹ᤗᤠᤶᤒᤠ ᤌᤣᤀᤡ ᤂᤥᤛᤢᤱᤗ ᤑᤠ᤹ᤀᤠᤱ ᤀᤡᤱᤃᤧᤗᤧᤰᤋᤡᤒᤡ᥅ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤴᤇᤡᤃᤣᤃ ᤌᤡᤰ ᤛᤣᤛᤣᤔᤠᤱᤅᤡᤴ ᤁᤳᤇᤢᤃᤧ ᤜᤧᤰᤁᤩᤠᤱ ᤌᤡᤰ ᤗᤠᤶᤔᤥ ᤗᤠᤱᤄᤣᤃᤧᤳᤇᤡᤃᤧᤖᤥ॥

¹⁹ ᤀᤠᤏᤡᤃᤣ ᤀᤠᤸᤗ ᤌᤠᤖᤡᤰ ᤂᤡᤏᤡ᤹ᤗᤠᤶᤒᤠ ᤀᤠᤒᤠᤅᤣ ᤛᤧ᤺ᤵᤐᤠᤛᤡᤃᤧᤖ ᤘᤕᤡᤃᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ॥ ᤀᤠᤏᤡᤃᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤂᤪᤡᤛ᤻ᤋᤖᤧ ᤁᤢᤛᤧᤘᤠᤖᤥᤒᤠ ᤁᤢᤀᤡᤛᤡᤰ ᤐᤠᤖᤡᤃᤧᤖ ᤘᤕᤡᤃᤧᤖᤥ॥ ᤀᤠᤏᤡᤃᤣ ᤔᤡ᤺ᤶ ᤆᤢᤶᤛᤣ. ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤖ ᤑᤠ᤹ᤀᤠᤱ ᤆᤥᤃᤢᤶᤒᤧᤒᤠᤖᤥ॥

²⁰ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤀᤡᤱᤃᤠ᤹ ᤏᤡᤱᤛᤠᤱ ᤆᤥᤃᤢᤱᤒᤠ ᤁᤢᤀᤡᤛᤡᤰ ᤔᤧᤄᤥᤏᤡᤱᤅᤡᤴ. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤛᤠᤱ ᤁᤧᤈᤥᤃᤢᤶᤒᤠ ᤁᤢᤀᤡᤛᤡᤰ ᤕᤠᤵᤔᤡ ᤁᤧᤱᤄᤥᤛᤡᤴᤒᤡ ᤑᤠ᤹ᤀᤠᤱ ᤁᤡᤀᤠᤖᤥ॥ ᤀᤡᤱᤃᤠ᤹ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤂᤣᤔᤠ. ᤏᤠᤜᤧᤶᤔᤠ. ᤛᤡᤰᤐᤥ᤺ᤰᤔᤠ. ᤛᤧᤔᤠ. ᤆᤧ᤹ᤕᤠ ᤐᤱᤔᤠ. ᤔᤏᤠ ᤆᤧᤱᤔᤠ. ᤀᤠᤱᤍᤡᤱ ᤗ᤹ᤔᤠ ᤏᤢ ᤕᤧᤔᤧᤴᤍᤱ ᤕᤧᤵᤗᤧᤰᤜᤠ᤹ᤀᤥ ᤁᤧᤕᤠᤃᤡᤒᤠ ᤋᤢᤶᤏᤡᤱᤒᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤁᤡᤀᤠᤖᤥ॥

²¹ ᤂᤡᤏᤡ᤹ ᤋᤢᤶᤛᤧ ᤕᤠᤶᤔᤥ ᤋᤠᤀᤠᤸᤗᤧ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤋᤃᤡ ᤏ᤺ᤶᤏ᤺ᤶ ᤆᤥ᤺ᤰᤁᤠ ᤑᤠ᤹ᤀᤠᤱ ᤁᤡᤀᤠᤖᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤋᤃᤡ ᤗᤠᤕᤥ ᤁᤧᤈᤥ᤺ᤰᤐᤠᤀᤠᤱ ᤂᤧᤴ ᤀᤠᤛᤢᤳᤌᤥᤗᤠᤶ. ᤆᤠᤖᤠᤶᤔᤠ ᤕᤠ᤺ᤶᤒᤰᤗᤠᤶ. ᤏᤢ ᤏᤡᤱᤘᤠ᤹ ᤐᤠ᤺ᤵᤐᤠ᤺ᤳ ᤆᤥ᤺ᤰᤔᤠᤗᤠᤶ ᤕᤖᤡᤰ ᤔᤧᤴᤜᤡᤶᤔᤏᤠᤒᤠ ᤔᤧᤴᤏᤢ᤺ᤱᤔᤏᤠᤒᤠᤜᤠ᤹ᤖᤧ ᤗᤠᤃᤡ ᤀᤡᤱᤃᤠ᤹ ᤔᤧᤖᤡᤱ ᤌᤰᤔᤠ ᤐᤥᤱᤒᤡᤗᤠᤖᤥ᥄