᥈ ᤁᤥᤖᤴᤌᤡ 10 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹

^1-2 ᤀᤡᤱᤃᤠ᤹ ᤐᤠᤘᤗᤧᤴ ᤂᤡᤏᤡ᤹ᤏᤢ ᤘᤠ᤹ᤀᤠᤸᤗᤧ ᤏ᤺ᤶᤏ᤺ᤶ ᤗ᤹ᤀᤠᤔᤢ. ᤁᤖ ᤔᤠ᤺ᤱᤄᤠ ᤘᤠ᤹ᤀᤠᤸᤗᤧ ᤁᤧᤀᤠ᤺ᤶᤒᤠ ᤆᤥ᤺ᤰᤁᤠᤔᤢ ᤗ᤹ᤖᤡᤰ ᤂᤡᤏᤡ᤹ ᤗᤢᤶᤔᤥ ᤁᤢᤓᤠᤖᤧ ᤁᤧᤒᤠ᤺ᤳᤋᤢᤶᤔᤢ॥ ᤀᤠᤸᤗ ᤁᤧᤏᤢ᤹ᤒᤠ ᤏᤢ ᤗᤢᤶᤗᤢᤶᤒᤠ ᤂᤪᤡᤛ᤻ᤋᤖᤧ ᤁᤢᤕᤢᤰᤁᤥᤗᤠᤶ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤋᤠᤀᤠᤸᤗᤧ ᤁᤧᤀᤠ᤺ᤶᤒᤠ ᤐᤠᤴ ᤐᤠ᤺ᤵᤔᤠ ᤕᤠᤵᤔᤡ ᤔᤧᤒᤠᤱᤄᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱ. ᤌᤣᤀᤠᤱᤓᤧᤸᤗᤧ ᤛᤧᤰᤂᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤜᤧᤰᤋᤱᤒᤠ ᤁᤧᤈᤥᤃᤡ᤹ ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤜᤠ᤹ᤏᤢ ᤀᤡᤱᤃᤠ᤹ ᤁᤧᤀᤠ᤺ᤶᤒᤠᤀᤣ ᤐᤥᤱᤔᤠ ᤛᤢᤰᤁᤠᤖᤥ॥

³ ᤀᤠᤏᤡ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤘᤠ᤹ᤛᤠᤱ ᤀᤡᤰᤛᤠᤒᤠ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡᤰ ᤌᤱ ᤀᤠᤴᤈᤥᤃᤢᤶᤔᤡᤴᤗᤥ॥

⁴ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤌᤱᤅᤥ ᤕᤠᤱᤔᤏᤠᤒᤠ ᤑᤧᤈᤢᤶ ᤑᤧᤕᤠᤜᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤣ᤺ᤴ. ᤁᤖ ᤀᤠᤏᤡ᤹ ᤑᤧᤈᤢᤶ ᤑᤧᤕᤠᤜᤠ᤹ᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤢᤰᤛᤠᤶ ᤏᤠ᤺ᤶᤔᤠ ᤁᤧᤛᤢᤰᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴᤗᤥ॥

⁵ ᤀᤠᤏᤡ᤹ ᤁᤴ ᤑᤧᤈᤢᤶ ᤑᤧᤕᤠᤜᤠ᤹ᤗᤠᤶ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤗᤧᤰᤁᤣ ᤐᤠ᤺ᤴᤎᤱᤜᤠ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗ ᤑᤠ᤹ᤀᤠᤱ ᤁᤧᤒᤥ᤺ᤰᤐᤠ ᤀᤠᤄᤄᤒᤠ ᤐᤠ᤺ᤴᤜᤠ᤹ ᤀᤠᤏᤠ᤺ᤴᤍᤢᤶᤗᤥ॥ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤀᤡ᤺ᤳᤋᤢᤒᤠ ᤑᤧᤴ ᤏᤡᤱᤘᤠ᤹ᤜᤠ᤹ ᤐᤢᤱᤗᤠᤎᤠᤒᤠᤴ ᤋᤧᤶᤏᤠ ᤋᤠ᤺ᤵᤔᤏᤠᤒᤠ ᤁᤢᤀᤡᤛᤡᤰ ᤂᤪᤡᤛ᤻ᤋᤖᤧ ᤁᤢᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤧᤒᤥᤱᤗ ᤑᤠ᤹ᤀᤠᤱ ᤕᤢᤰᤁᤥ ᤀᤠᤍᤠᤖᤢᤶᤗᤥ॥

⁶ ᤜᤧᤰᤁᤩᤠᤱ ᤂᤡᤏᤡ᤹ ᤀᤡᤱᤈᤠᤱᤃᤧᤶᤒᤠ ᤁᤧᤒᤥ᤺ᤰᤂᤡ ᤁᤧᤈᤢᤖᤡᤀᤠᤱ ᤘᤣ᤹ ᤁᤧᤖᤧᤰ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤕᤠᤖᤡᤵ ᤐᤥ᤺ᤰᤂᤡᤃᤧᤖᤥ॥

ᤐᤠᤘᤗᤖᤧ ᤁᤢᤕᤢᤰᤁᤡᤴ

⁷ ᤂᤡᤏᤡ᤹ᤃ ᤗᤠ᤺ᤰᤁᤠᤳ ᤁᤧᤎᤠ᤺ᤵᤐᤠ ᤐᤠ᤺ᤴᤜᤠ᤹ᤖᤰ ᤀᤥᤃᤧᤔᤧᤳᤋᤢᤶ. ᤁᤖ ᤂᤡᤏᤡ᤹ᤀᤥ ᤁᤢᤓᤠᤎᤡᤰᤗᤧ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤔᤏᤠᤀᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡᤋᤢᤏᤧ ᤑᤠ᤹ᤃᤪ ᤂᤧᤸᤗᤧ ᤂᤢᤏᤧ᤹ ᤁᤢᤀᤡᤛᤡᤰ ᤀᤠᤏᤡᤃᤧᤀᤠᤱ ᤂᤪᤡᤛ᤻ᤋᤖᤧ ᤁᤢᤔᤏᤠᤛᤡᤃᤧ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤵᤔᤠ ᤐᤥᤱᤗᤥ॥

⁸ ᤍᤠᤱᤒᤠᤸᤗᤧ ᤐᤡᤖᤡᤃᤧᤒᤠ ᤕᤢᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥᤃ ᤕᤖᤡᤰ ᤕᤶᤒᤠ ᤁᤧᤗᤧᤱᤛᤡᤱᤒᤠ ᤁᤢᤀᤡᤛᤡᤰ ᤌᤠ᤺ᤵᤐᤠᤛᤠᤱ ᤁᤴ ᤐᤠ᤺ᤴᤏᤥ ᤀᤡᤱᤃᤠ᤹ ᤛᤡᤖᤡᤱ ᤔᤧᤔᤀᤠᤴ. ᤌᤣᤀᤠᤱᤓᤧᤸᤗᤧ ᤁᤴ ᤕᤢᤰᤁᤡᤱᤃ ᤂᤡᤏᤡ᤹ ᤑᤧᤳᤗᤠ᤺ᤶᤔᤠ ᤔᤣ᤺ᤴ. ᤁᤖ ᤂᤡᤏᤡ᤹ ᤌᤥᤒᤥ ᤆᤥ᤺ᤰᤔᤠᤖᤧ ᤗᤠᤃᤡᤖᤥ॥

⁹ ᤀᤡᤱᤃᤠ᤹ᤃ ᤛᤰᤀᤡᤱᤗᤠᤶᤒᤠ ᤂᤡᤏᤡ᤹ ᤕᤱᤔᤠᤛᤧᤵᤔᤠ ᤁᤥ᤺ᤳᤏᤡᤱᤒᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ.

¹⁰ ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤛᤠᤵᤋᤢᤒᤠ ᤛᤰᤀᤡᤱᤄᤱᤜᤠ᤹ ᤁᤢᤈᤠ᤹ᤀᤡ ᤏᤢ ᤁᤧᤀᤠ᤺ᤶᤒᤠ ᤆᤥᤰ. ᤁᤖ ᤂᤧᤴ ᤔᤏᤠᤴ ᤀᤠᤏᤡ᤹ᤏᤢ ᤘᤠ᤹ᤀᤡᤸᤗᤧ ᤕᤥ᤺ᤴᤈᤥᤈᤥᤒᤠ ᤆᤥᤰ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤠ᤺ᤴᤜᤠ᤹ᤃ ᤌᤣᤀᤠᤱ ᤔᤣ᤺ᤴᤗᤥ॥”

¹¹ ᤀᤰᤋᤱᤒᤠ ᤔᤏᤠᤜᤠ᤹ᤖᤧ ᤀᤠᤏᤡᤃᤣ ᤛᤰᤀᤡᤱᤄᤱᤜᤠ᤹ᤀᤥ ᤐᤠ᤺ᤳᤋᤢᤶᤒᤧᤒᤠ ᤁᤢᤀᤡᤛᤡᤰ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧᤀᤠᤱ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤕᤠ᤺ᤶᤒᤰ ᤆᤥᤃᤢᤶᤒᤧ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤵᤔᤠ ᤐᤥᤱᤗᤥ॥

¹² ᤀᤠᤒᤠᤅᤣ ᤀᤡᤱᤃᤠ᤹ ᤀᤣ᤺ᤰ ᤁᤧᤗ᤹ᤒᤠᤜᤠ᤹ᤏᤢ ᤀᤠᤏᤡᤃᤣ ᤋᤱᤛᤡᤱᤔᤠ ᤔᤧᤀᤠ᤺ᤴᤏᤠᤛᤡᤃᤧᤴᤗᤥ॥ ᤂᤧᤱᤜᤠ᤹ ᤀᤠᤒᤠᤅᤣ ᤁᤧᤍᤶᤒᤠ ᤔᤧᤗᤧᤱᤛᤡᤱᤅᤠᤱ ᤔᤧᤜᤧᤴᤇᤡᤱᤗᤥ. ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤂᤠᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ᥄

¹³ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤡᤃᤧᤒᤠ ᤕᤢᤰᤁᤥᤖᤰ ᤀᤠᤏᤡᤃᤣ ᤕᤠ᤺ᤶᤒᤣᤀᤥ ᤕᤶᤒᤠ ᤐᤠᤴ ᤐᤠ᤺ᤳᤋᤢᤶᤒᤧᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤡᤃᤧᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤡᤴᤏᤢ᤺ᤸᤗᤧ ᤘᤣ᤹ ᤐᤠ᤺ᤴᤏᤥ ᤕᤶᤒᤠ ᤐᤠᤴ ᤔᤧᤒᤠ᤺ᤳᤋᤢᤶᤒᤧᤴᤗᤥ. ᤜᤧᤰᤁᤩᤠᤱ ᤂᤡᤏᤡ᤹ᤀᤥᤀᤠᤱ ᤂᤧᤴ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤀᤠᤱ ᤘᤠ᤹ᤖᤥ॥

¹⁴ ᤂᤡᤏᤡ᤹ ᤀᤠᤏᤡᤃᤣ ᤕᤢᤰᤁᤥ ᤁᤧᤘᤕᤡ᤹ ᤗ᤹ᤖᤡᤰ ᤐᤠ᤺ᤳᤋᤢᤶᤒᤧᤸᤗᤧ ᤕᤶᤒᤠ ᤗᤧᤱᤅᤠᤛᤡᤃᤧᤒᤠ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤁᤠᤰᤏᤢ᤺ᤸᤗᤧ ᤋᤃᤡ ᤂᤡᤏᤡ᤹ᤀᤥ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱ ᤁᤧᤍᤠ᤺ᤵᤐᤠᤃ ᤀᤠᤏᤡᤃᤧᤀᤣ ᤘᤕᤡᤃᤧᤖᤥ॥

¹⁵ ᤘᤣ᤹ᤜᤠ᤹ᤖᤧ ᤔᤠᤱᤛᤧᤘᤠ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤥ ᤔᤣ᤺ᤴ. ᤁᤖ ᤀᤠᤏᤡᤃᤣ ᤆᤥᤃᤢᤶᤒᤧᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥᤖᤰ ᤕᤶᤒᤠ ᤐᤠᤴ ᤐᤠ᤺ᤳᤋᤢᤶᤒᤧᤖᤥ॥ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤆᤰᤔᤧᤸᤗ᤹ᤀᤣ ᤐᤥ᤺ᤸᤗᤧ ᤂᤡᤏᤡ᤹ ᤗᤢᤶᤔᤥ ᤀᤠᤏᤡᤃᤣ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤡᤴᤏᤠᤱ ᤐᤥᤖ ᤁᤧᤗ᤹ᤒᤠ ᤏᤡᤱᤛᤠᤱ ᤁᤳᤋᤢᤶᤒᤧᤖᤥ॥

¹⁶ ᤜᤧᤰᤁᤣ᤺ᤸᤗᤧ ᤀᤠᤏᤡᤃᤣ ᤂᤡᤏᤡ᤹ ᤁᤧᤘᤕᤡᤒᤠ ᤋᤧᤴᤏᤡᤴᤏᤢ᤺ᤸᤗᤧᤀᤠᤱ ᤔᤠ᤺ᤱᤄᤠ ᤔᤠ᤺ᤱᤄᤠ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤛᤢᤰᤋᤢᤶᤒᤧᤖᤥ॥ ᤌᤣᤀᤠᤱᤓᤧᤸᤗᤧ ᤘᤣ᤹ᤜᤠ᤹ᤖᤧ ᤔᤧᤈᤥᤃᤢ ᤔᤧᤛᤢᤖᤢᤒᤠ ᤔᤠᤱᤛᤧᤘᤠᤀᤥ ᤀᤠᤏᤡᤃᤣ ᤕᤶᤒᤠ ᤐᤠᤴ ᤐᤠ᤺ᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢᤶᤒᤧᤴᤗᤥ॥

¹⁷ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤠᤳᤋᤡᤸᤗᤧ ᤕᤶᤒᤠ ᤐᤠᤴ ᤐᤠ᤺ᤳᤋᤢ᤹. ᤂᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤥᤖᤰ ᤕᤶᤒᤠ ᤐᤠᤴ ᤐᤠ᤺ᤳᤋᤢᤖᤖᤥ॥”

¹⁸ ᤌᤣᤀᤠᤱᤓᤧᤸᤗᤧ ᤏᤢᤒᤠ ᤆᤥ᤺ᤰᤁᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤔᤧᤍᤠᤛᤢᤴ. ᤁᤖ ᤍᤠᤱᤒᤠᤸᤗᤧ ᤏᤢᤒᤠ ᤆᤥᤰ ᤔᤧᤳᤋᤢᤒᤠ ᤔᤏᤠ᤺ᤸᤗᤧᤀᤣ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤛᤢ᤹ᤖᤥ॥