᥈ ᤛᤠᤵᤔᤢ᤺ᤴᤎᤢᤶ 8 - LIFOTNT

ᤛᤥᤗᤥᤔᤏᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤏᤢ ᤛᤥᤗᤥᤔᤏᤖᤧ ᤀᤠᤵᤑᤣᤰ ᤁᤢᤜᤠᤱᤜᤡᤶᤔᤡᤴ ᤆᤥ᤺ᤰᤔᤠ ᤏᤡᤒᤥᤱ ᤋᤱᤒᤣ ᤌᤖᤢ॥

² ᤜᤧᤖᤠᤔᤖᤧ ᤂᤢᤏᤧ᤹ ᤐᤡᤖᤢᤒᤠ ᤕᤧᤰᤕᤰᤜᤠ᤹ ᤛᤥᤗᤥᤔᤏᤖᤧ ᤕᤠᤶᤔᤥ ᤆᤥᤃᤢᤀᤠᤱ ᤂᤧᤱᤜᤠ᤹ᤀᤥ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤕᤢᤰᤂᤢᤛᤡ॥

³ ᤂᤧᤒᤩᤠᤱ ᤛᤥᤗᤥᤔᤏᤧᤴ ᤜᤔᤠᤋ-ᤛᤥᤒᤠ ᤐᤣᤀᤠᤱ ᤂᤧᤴ ᤜᤢᤰᤁᤠᤵ ᤆᤥᤃᤢ॥

⁴ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤋᤍᤔᤥᤖ ᤕᤧᤰᤕᤰᤁᤡᤴ ᤆᤥᤃᤢ॥ ᤜᤧᤰᤁᤩᤠᤱ ᤜᤔᤠᤋ ᤋᤧᤱᤃᤵᤐᤥ ᤆᤠᤎᤠ᤺ᤱ ᤕᤢᤱᤔᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤆᤥᤃᤢ॥

⁵ ᤂᤢᤏᤧ᤹ ᤌᤥᤛᤔᤠ ᤏᤢ ᤕᤥᤛᤔᤠ ᤒᤣᤌ-ᤜᤥᤖᤥᤏᤀᤥ ᤁᤒᤪᤡᤱ ᤗᤢᤱᤎᤠᤰ ᤛᤧᤳᤋᤢ. ᤜᤧᤰᤁᤩᤠᤱ ᤁᤢᤀᤧᤵᤔᤠ ᤁᤧᤒᤵᤐᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤆᤥᤃᤢᤀᤠᤱ ᤛᤧ᤺ᤵᤛᤡᤱᤔᤠᤍᤧᤴ ᤕᤧᤰᤕᤰᤜᤠ᤹ ᤆᤥᤃᤢ॥

⁶ ᤂᤢᤏᤧ᤹ ᤒᤠᤗᤠᤋ ᤏᤢ ᤂᤧᤵᤔᤥᤒᤠ ᤆᤠᤎᤠ᤺ᤱ ᤕᤢᤱᤔᤠ ᤁᤧᤖᤧᤰ ᤕᤧᤰᤕᤰᤜᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤴᤗᤠᤎᤠᤜᤠ᤹ ᤏᤢ ᤀᤴᤜᤠ᤹ᤖᤧ ᤁᤧᤖᤧᤰ ᤐᤠᤱᤈᤢᤶᤜᤠ᤹ ᤆᤥᤃᤢ॥ ᤕᤖᤢᤛᤗᤧᤔᤀᤥ. ᤗᤧᤒᤏᤠᤏᤀᤥ ᤏᤢ ᤂᤢᤏᤧ᤹ ᤕᤢᤰ ᤆᤥᤃᤢᤒᤠ ᤁᤧᤖᤧᤰ ᤁᤢᤗᤠᤈᤣ᤹ ᤁᤢᤗᤧ᤺ᤶ ᤂᤢᤏᤧ᤹ ᤏᤡᤱᤘᤠ᤹ ᤆᤥᤃᤢᤒᤠ ᤁᤢᤀᤡᤛᤡᤰ ᤕᤧᤰᤕᤰᤜᤠ᤹ ᤆᤥᤃᤢ॥

⁷ ᤗᤠᤈᤣ᤹ᤀᤥ ᤀᤠᤸᤗᤛᤠᤱ ᤀᤡᤛᤪᤠᤀᤡᤗ ᤔᤣ᤺ᤶᤒᤠ ᤔᤏᤠᤜᤠ᤹ ᤔᤧᤕᤢᤅᤧ. ᤂᤧᤱᤜᤠ᤹ᤃ ᤜᤡᤳᤋᤡ. ᤀᤣᤔᤥᤖᤡ. ᤐᤖᤡᤈ᤻ᤈᤡ. ᤜᤡᤒ᤻ᤒᤡ ᤏᤢ ᤕᤒᤢᤛᤡᤜᤠ᤹ ᤔᤧᤘᤕᤧ॥

⁸ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤶᤔᤧᤱᤛᤡᤱᤅᤣ ᤔᤧᤘᤕᤧ. ᤛᤥᤗᤥᤔᤏᤖᤧ ᤂᤧᤱᤜᤠ᤹ ᤕᤥᤃ᤻ᤒᤠ ᤕᤠ᤺ᤶᤒᤰᤁᤥ ᤑᤳᤇᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰ ᤜᤧᤰᤋᤱᤒᤠᤀᤣ ᤔᤧᤘᤠ᤹॥

⁹ ᤁᤖ ᤛᤥᤗᤥᤔᤏᤖᤧ ᤀᤠᤳᤋᤡᤴ ᤀᤡᤛᤪᤠᤀᤡᤗᤡᤜᤠ᤹ᤀᤠᤱ ᤂᤢᤏᤧ᤹ ᤁᤢᤜᤠᤱ ᤕᤠ᤺ᤶᤒᤰᤁᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡᤴ॥ ᤂᤧᤱᤜᤠ᤹ ᤌᤰᤛᤢᤒᤠ ᤏᤢ ᤂᤢᤏᤧ᤹ ᤁᤢᤎᤰᤐᤧᤒᤠᤜᤠ᤹ᤀᤥ ᤌᤰᤔᤥᤒᤠ ᤜᤧᤰᤁᤩᤠᤱ ᤀᤴᤗᤠᤎᤠ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤔᤧᤘᤕᤧ॥

¹⁰ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤛᤥᤗᤥᤔᤏ ᤜᤠᤱᤅᤡᤸᤗᤧ ᥈᥋᥆ ᤔᤏᤠᤜᤠ᤹ ᤔᤏᤠ ᤀᤥᤃᤧᤔᤧᤵᤐᤠ ᤕᤢᤰᤋᤡᤱ ᤆᤥᤃᤢᤛᤡ॥

¹¹ ᤛᤥᤗᤥᤔᤏᤖᤧ ᤑᤠᤖᤥᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥᤗᤠᤶ ᤂᤧᤸᤗᤧ ᤁᤢᤗᤠᤃᤡ ᤔᤧᤈᤥᤃᤢᤒᤠ ᤜᤡᤶᤔᤥ ᤋᤠᤖᤢ॥ ᤛᤥᤗᤥᤔᤏᤖᤧ ᤐᤠ᤺ᤳᤋᤢ. “ᤀᤡᤛᤪᤠᤀᤡᤗᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤡᤶᤔᤥ ᤀᤠᤱᤃᤠ᤹ ᤀᤠᤜᤡᤶᤛᤠᤔᤧᤴ ᤔᤧᤕᤢᤱᤏᤧᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰ ᤁᤧᤗᤠ᤺ᤵᤐᤠ ᤋᤧᤴᤜᤠ᤹ ᤛᤣᤛᤣᤒᤠ ᤆᤥᤰ॥”

¹² ᤛᤥᤗᤥᤔᤏᤖᤧ ᤔᤠᤱᤜᤡᤶᤔᤥᤒᤠ ᤀᤠ᤺ᤶᤓᤥ᤹ ᤋᤃᤠᤱ ᤗᤧᤵᤔᤠᤱ ᤂᤢᤏᤧ᤹ ᤆᤥᤃᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤕᤠ᤺ᤶᤒᤰ ᤆᤥᤃᤢ॥

¹³ ᤔᤥᤛᤠ᤺ᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤛᤒᤠᤌ. ᤗᤠᤍᤢᤵ ᤏᤢ ᤋᤱᤒᤣ ᤌᤰᤔᤠ ᤛᤢᤶᤗᤧᤱ ᤛᤡᤍᤢᤱᤈᤓᤠ ᤋᤥᤔᤠ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹. ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶ. ᤕᤧᤳᤏᤠᤶᤒᤠ ᤋᤱᤏᤠᤶ ᤏᤢ ᤛᤠ᤺ᤱᤃᤠᤜᤡᤶᤔᤥᤒᤠ ᤋᤱᤏᤠᤶᤔᤥ ᤌᤡᤰᤕᤠ᤺ᤴᤎᤰ ᤋᤥ᤺ᤶᤔᤠ ᤁᤧᤒᤥᤱᤒᤠ ᤁᤢᤀᤡᤛᤡᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤂᤢᤏᤧ᤹ ᤋᤥ᤺ᤴᤍᤢ॥

¹⁴ ᤐᤠᤏᤢᤍᤡᤱ ᤁᤢᤶᤒᤠ ᤍᤠᤀᤢᤍᤖᤧ ᤁᤢᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤐᤳᤇᤧᤀᤠᤱ ᤌᤡᤰᤕᤠ᤺ᤴᤎᤰ ᤆᤠᤜᤠᤃᤧᤈᤥ᤺ᤰᤐᤠ ᤕᤠ᤺ᤶᤒᤰ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤢᤶᤜᤠ᤹ ᤔᤠᤱᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤗᤧ ᤗᤠᤃᤡ ᤜᤧᤰᤁᤩᤠᤱ ᤗᤧᤒᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤔᤠ ᤛᤠᤶᤗᤥ ᤛᤠᤶᤔᤧᤵᤔᤠ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤥ ᤑᤠ᤹ᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤕᤢᤰᤋᤡᤱ ᤆᤥᤃᤢᤛᤡ॥ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤂᤢᤴᤇᤡ᤹ ᤛᤢᤶᤛᤢᤶ ᤁᤢᤀᤡᤛᤡᤰ ᤁᤧᤖᤧᤰ ᤕᤶᤒᤠ ᤗᤠᤶᤎᤣ᤺ᤳᤋᤥ ᤕᤧᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤕᤢᤰᤋᤡᤱ ᤆᤥᤃᤢᤛᤡ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤍᤠᤀᤢᤍᤖᤧ ᤆᤥᤃᤢᤒᤠ ᤀᤡᤱᤈᤠᤱᤅᤡᤴ ᤀᤰᤋᤱᤒᤠᤀᤣ ᤘᤕᤧ॥

¹⁵ ᤜᤧᤰᤁᤩᤠᤱ ᤜᤠᤱ ᤕᤠᤱᤛᤢᤶᤔᤡᤴ ᤘᤣ᤹ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤍᤠᤀᤢᤍᤖᤧ ᤐᤡᤖᤢᤛᤡᤒᤠ ᤀᤡᤱᤈᤠᤱᤅᤡᤴ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤶᤓᤣ᤺ᤳᤇᤢᤴ॥

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤁᤢᤒᤢᤱ ᤔᤧᤕᤢᤰᤂᤢᤀᤠᤱᤎᤥ ᤂᤧᤴ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤛᤥᤗᤥᤔᤏᤖᤧ ᤁᤧᤖᤧᤰ ᤁᤢᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢᤖ ᤔᤧᤒᤳᤇᤧ॥ ᤁᤶᤓᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤔᤧᤈᤥᤃᤢᤀᤠᤱ ᤘᤕᤧ॥

¹⁷ ᤂᤧᤴ ᤀᤣᤃᤠᤱ ᤛᤥᤗᤥᤔᤏᤧᤴ ᤀᤣᤍᤥᤔᤖᤧ ᤁᤢᤕᤠᤀᤥᤒᤠ ᤁᤧᤏᤧᤒᤠ ᤀᤣᤛᤩᤥᤏ-ᤃᤣᤒᤣᤖ ᤏᤢ ᤀᤣᤗᤠᤋᤀᤥ ᤐᤣ॥

¹⁸ ᤜᤧᤰᤁᤩᤠᤱ ᤜᤧᤖᤠᤔᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤁᤧᤘᤠ᤹ᤒᤠ ᤘᤠᤗᤠᤎᤠᤜᤠ᤹ ᤏᤢ ᤁᤧᤗᤧᤒᤠ ᤘᤠᤈᤠ᤺ᤰᤐᤠᤜᤠ᤹ ᤐᤠᤱᤄᤢ ᤋᤠᤛᤢᤛᤡ॥ ᤂᤶᤓᤩᤠᤱ ᤁᤴᤜᤠ᤹ ᤛᤥᤗᤥᤔᤏᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤏᤢ ᤛᤥᤖᤡᤰ ᤀᤥᤐᤡᤖᤀᤥ ᤔᤧᤒᤣᤀᤠᤱ ᥇᥋᥆ ᤋᤣᤗᤣᤴᤋ ᤛᤠᤶᤔᤩᤠᤱ ᤔᤧᤍᤠᤖᤢᤀᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤔᤧᤒᤡᤖᤢᤖᤥ॥