᥈ ᤛᤠᤵᤔᤢ᤺ᤴᤎᤢᤶ 6 - LIFOTNTᤛᤥᤗᤥᤔᤏᤖᤧ ᤁᤢᤀᤢᤘᤠ ( ᥇ ᤜᤠᤱ ᥎:᥇᥈-᥈᥇ ) 1 ᤂᤧᤒᤩᤠᤱ ᤛᤥᤗᤥᤔᤏᤖᤧ ᤐᤠ᤺ᤳᤋᤢ. “ᤔᤠᤰᤛ᤻ᤍᤡ᤺ᤱᤃᤩᤠ᤺ᤵᤐᤠ ᤂᤠ᤹ᤔᤡ᤺ᤵᤐᤥ ᤀᤠᤱᤃᤠ᤹ ᤕᤠᤱᤎᤥ᤺ᤰᤁᤠ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹॥ 2 ᤀᤠᤍᤠᤱᤒᤠ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤕᤠᤱᤎᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤵᤔᤥ ᤀᤠᤍᤠᤱᤒᤠᤖᤧ ᤁᤧᤗᤠᤃᤡ ᤗᤳᤇᤠ ᤁᤧᤕᤠᤱᤎᤥ᤺ᤰᤔᤠᤍᤧᤴ ᤗᤳᤇᤠ ᤔᤠᤱᤜᤡᤶ ᤌᤡᤰ ᤆᤥᤃᤢᤱᤅᤠᤱ ᤕᤢᤱ॥” 3 ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥᤒᤠ ᤔᤏᤠᤜᤠ᤹ ᤔᤧᤕᤧᤒᤧ ᤔᤧᤃᤖᤧᤸᤗᤧ ᤛᤥᤗᤥᤔᤏ ᤜᤠᤱᤅᤡᤴ ᤂᤧᤱᤜᤠ᤹ ᤗᤧᤵᤔᤠᤱ ᤜᤡᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡ॥ 4 ᤂᤧᤒᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ— “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤍᤠᤀᤢᤍᤧᤴᤏᤢ ᤂᤢᤏᤧ᤹ ᤀᤠᤵᤑᤣᤰ ᤁᤢᤶᤒᤪᤠ᤺ᤸᤗᤧ ᤐᤠ᤺ᤳᤋᤢᤒᤠ ᤔᤠᤱᤜᤢᤵᤐᤡᤴ ᤀᤠᤵᤑᤣᤰ ᤁᤢᤜᤢᤰᤁᤡᤸᤗᤧ ᤁᤧᤳᤋᤢᤀᤠᤱ ᤘᤠ᤹ᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢ. 5 ‘ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤒᤠ ᤕᤧᤴᤏᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤗᤳᤇᤠ ᤜᤡᤶᤔᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤀᤠᤳᤋᤡᤴ ᤕᤧᤰᤕᤰᤁᤥᤀᤠᤱ ᤀᤠᤱᤃᤠ᤹ ᤀᤠᤔᤡᤱ ᤐᤥᤱᤔᤠᤖᤧ ᤗᤠᤃᤡ ᤔᤠᤱᤜᤡᤶ ᤌᤡᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤛᤣᤃᤢᤱᤒᤠ ᤜᤥᤵ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤶᤗᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤁᤢᤓᤠ ᤔᤏᤠ ᤀᤠᤳᤋᤡᤴᤏᤠᤱ ᤛᤣ᤺ᤴᤍᤢᤱᤒᤠ ᤜᤥᤵ॥ 6 ᤁᤖ ᤂᤧᤵᤔᤥ ᤀᤠᤱᤃᤠ᤹ ᤀᤠᤔᤡᤱ ᤘᤠ᤹ᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤸᤗ ᤕᤖᤢᤛᤗᤧ᤺ᤶᤔᤡᤴᤏᤣ ᤛᤣᤃᤢᤱᤅᤠᤱ ᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤍᤠᤀᤢᤍᤧᤴᤏᤣ ᤛᤣᤃᤢᤱᤅᤠᤱ ᤘᤠ᤹॥’ 7 “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤔᤠᤱᤜᤡᤶ ᤌᤡᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤛᤡᤰᤗᤢᤱᤔᤥ ᤘᤕᤧ॥ 8 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤶᤒᤠ ᤍᤠᤀᤢᤍᤧᤴ ᤔᤧᤳᤋᤢ. ‘ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡ ᤔᤠᤱᤜᤡᤶ ᤌᤡᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥ ᤁᤧᤀᤡ᤺ᤳᤋᤢᤒᤠᤴ ᤏᤢᤒᤠᤀᤣ ᤆᤥᤰ॥ 9 ᤜᤧᤰᤁᤣᤛᤠᤱ ᤁᤴ ᤔᤠᤱᤜᤡᤶᤔᤡᤴ ᤂᤧᤏᤧ᤹ ᤁᤧᤴᤈᤥᤃᤢᤴ᤹. ᤁᤖ ᤂᤧᤏᤧ᤹ᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠ ᤂᤧᤏᤧ᤹ ᤁᤧᤛ᤻ᤛᤠ᤺ᤸᤗᤧᤀᤣ ᤀᤠᤱᤃᤠ᤹ ᤀᤠᤔᤡᤱᤗᤧ ᤗᤠᤃᤡ ᤂᤧᤴ ᤔᤠᤱᤜᤡᤶᤔᤡᤴ ᤆᤥᤃᤢ᤹॥’ 10 “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤸᤗ ᤂᤧᤴ ᤔᤠᤱᤜᤢᤵᤐᤡᤴ ᤁᤧᤳᤋᤢᤀᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤔᤠᤱᤜᤢᤵ ᤆᤥᤃᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤠᤶᤒᤠ ᤍᤠᤀᤢᤍᤖᤧ ᤁᤢᤗᤧᤰᤘᤠᤀᤥ ᤀᤠᤱᤃᤠ᤹ ᤜᤠᤱ ᤐᤥ᤺ᤰᤂᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤀᤠᤱᤃᤠ᤹ ᤕᤢᤱᤅᤠᤃᤴᤏᤠ॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤁᤴ ᤔᤠᤱᤜᤡᤶᤔᤡᤴ ᤆᤥᤃᤢᤱᤅᤠᤱ ᤕᤢᤱ॥ 11 ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤆᤥᤃᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤀᤠᤱᤃᤠ᤹ ᤂᤧᤵᤔᤥ ᤕᤢᤰᤂᤢᤱᤅᤠᤱ ᤕᤢᤱᤗᤥ॥” ᤛᤥᤗᤥᤔᤏᤖᤧ ᤁᤢᤒᤣᤗᤡ ( ᥇ ᤜᤠᤱ ᥎:᥈᥈-᥋᥉ ) 12 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤃᤡ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤕᤜᤘᤣ ᤍᤠᤱᤒᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤋᤃᤡ ᤕᤧᤶᤛᤡᤱᤅᤠᤱ ᤛᤥᤗᤥᤔᤏᤖᤧ ᤁᤢᤜᤢᤰᤜᤠ᤹ ᤌᤠ᤺ᤱ ᤑᤥ᤺ᤰᤂᤢ॥ 13 ᤂᤢᤏᤧ᤹ ᤜᤢᤰᤛᤡᤰ ᤅᤠᤛᤡ ᤁᤢᤗᤠᤶᤋᤡ ᤁᤣ᤺ᤶᤒᤠ. ᤜᤢᤰᤛᤡᤰ ᤅᤠᤛᤡ ᤁᤢᤓᤧᤖᤧ ᤏᤢ ᤜᤢᤰᤛᤡᤰ ᤛᤢᤶᤛᤡ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤁᤠᤛᤠ᤺ᤸᤗᤧᤴ ᤆᤴᤈᤶᤒᤠᤍᤧᤴ ᤌᤡᤰ ᤆᤥᤃᤢ ᤜᤧᤰᤁᤩᤠᤱ ᤕᤶᤒᤠ ᤗᤰᤂᤢᤶᤔᤡᤸᤗᤧ ᤁᤢᤗᤢᤶᤔᤥ ᤂᤧᤴ ᤕᤧᤵᤛᤢᤀᤠᤱ ᤕᤧᤒᤧ॥ ᤂᤢᤏᤧ᤹ ᤂᤧᤸᤗᤧ ᤁᤢᤛᤶᤎᤠᤱ ᤌᤥ᤺ᤰᤛᤡᤱᤅᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤛᤱᤈᤢᤶᤓᤥ ᤔᤧᤘᤕᤧᤒᤠᤍᤧᤴᤏᤥ ᤌᤢᤱᤒᤥ ᤆ᤺ᤳᤗᤠᤱ ᤕᤢᤱᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤢᤰᤜᤠ᤹ ᤌᤠ᤺ᤱ ᤑᤥ᤺ᤰᤂᤢ॥ 14 ᤂᤧᤒᤩᤠᤱ ᤂᤢᤏᤧ᤹ ᤀᤰᤂᤣ ᤐᤠ᤺ᤳᤋᤢᤖᤥ— “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤢᤴᤇᤡ᤹ ᤁᤧᤖᤧᤰ ᤏᤡᤱᤘᤠ᤺ᤸᤗᤧ ᤀᤠᤍᤠᤱᤒᤠᤖᤧ ᤁᤧᤗᤠᤶᤔᤥ ᤆᤰᤔᤧᤸᤗ᤹ᤀᤣ ᤁᤧᤘᤠ᤹ᤒᤠ ᤛᤧᤘᤠᤖᤥᤒᤠᤜᤠ᤹ᤏᤢ ᤁᤧᤔᤡ᤺ᤶᤈᤡᤀᤥ ᤔᤠᤱᤜᤢᤵ ᤁᤧᤈᤥ᤺ᤰᤐᤠ ᤀᤠᤍᤠᤱᤒᤠ ᤜᤧᤰᤋᤱᤒᤠ ᤘᤣ᤹ ᤏᤡᤱᤘᤠ᤹ᤑᤢᤔᤠᤱ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠ᤺ᤳᤋᤠᤱ ᤜᤥᤵ॥ 15 ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤍᤠᤀᤢᤍᤧᤴᤏᤢ ᤁᤧᤈᤥᤃᤢᤒᤠ ᤁᤧᤔᤠᤱᤜᤢᤵᤐᤡᤴ ᤁᤧᤃᤧᤳᤋᤢᤀᤠᤱ ᤘᤠ᤹॥ ᤀᤠᤀᤡᤴ ᤐᤥ᤺ᤰᤂᤧᤀᤠᤱ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤵᤑᤣᤰ ᤁᤧᤶᤒᤪᤠ᤺ᤸᤗᤧ ᤀᤠᤍᤠᤱᤒᤠᤖᤧ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤀᤠᤵᤑᤣᤰ ᤁᤧᤜᤢᤰᤁᤡᤸᤗᤧ ᤂᤧᤴ ᤁᤧᤃᤧᤳᤋᤢᤒᤠᤖᤥ॥” 16 “ᤀᤠᤸᤗ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠ ᤁᤧᤛᤧᤘᤠᤖᤥᤒᤠ ᤍᤠᤀᤢᤍᤧᤴᤏᤢ ᤁᤧᤈᤥᤃᤢᤒᤠ ᤁᤴ ᤔᤠᤱᤜᤢᤵᤐᤡᤴ ᤁᤧᤳᤋᤧ᤹ᤀᤥ. ᤀᤠᤍᤠᤱᤒᤠᤖᤧ ᤀᤰᤂᤣ ᤁᤧᤒᤠ᤺ᤳᤋᤢ. ‘ᤂᤧᤏᤧ᤹ ᤗᤠᤱᤃᤧᤄᤣ᤺ᤰᤐᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤂᤢᤴᤇᤡ᤹ ᤗᤠᤶᤜᤠ᤹ᤀᤥ ᤛᤡᤱᤛᤡᤱ ᤕᤧᤰᤕᤧᤰ ᤗᤠᤱᤔᤧᤄᤣ᤺ᤰᤁᤠᤱ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤏᤧᤓᤃᤪᤖᤰ. ᤀᤡᤛᤪᤠᤀᤡᤗᤒᤠ ᤜᤠᤱᤕᤢᤰᤏᤠᤀᤥ ᤕᤢᤱᤔᤠᤖᤧ ᤗᤠᤃᤡ ᤀᤠᤓᤧᤸᤗᤧᤀᤠᤱ ᤔᤏᤠ ᤁᤧᤜᤥᤵᤐᤠ ᤔᤧᤒᤥᤱᤏᤧᤴ॥’ 17 ᤜᤧᤰᤁᤩᤠᤱ ᤀᤠᤸᤗ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤍᤠᤀᤢᤍᤧᤴᤏᤢ ᤁᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤳᤋᤧ᤹ᤀᤥ॥” 18 “ᤁᤖ ᤌᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤏᤠᤜᤠ᤹ᤏᤢ ᤕᤢᤱᤅᤠᤱᤒᤡ᥅ ᤛᤠᤱᤃᤪᤠᤶᤐᤣᤍᤠᤱᤜᤠ᤹. ᤛᤠᤱᤃᤪᤠᤶᤐᤣᤍᤠᤱᤏᤢ᤺ᤸᤗᤧᤀᤠᤱ ᤌᤠ᤺ᤱᤎᤠᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤀᤠᤍᤠᤱᤒᤠ ᤁᤧᤴᤜᤳᤏᤧᤴᤏᤧᤓᤃᤪ. ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶᤔᤥᤃ ᤇᤧᤴᤏᤠ ᤀᤠᤰᤂᤣᤗ᤹ᤖᤡᤰ ᤁᤧᤜᤵᤐᤣ᥅ 19 ᤜᤧᤰᤁᤣᤛᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤛᤧᤘᤠᤖᤥᤒᤧᤸᤗᤧ ᤁᤢᤍᤢᤘᤠ ᤏᤢ ᤗᤢᤱᤔᤠ᤹ ᤋᤢᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤆᤥᤃᤢᤒᤠ ᤋᤢᤘᤠᤀᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥ ᤁᤧᤛᤧᤘᤠᤖᤥᤒᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤍᤃᤡ ᤆᤥᤃᤢᤒᤠ ᤐᤣᤗᤡᤴ ᤏᤢ ᤋᤢᤘᤠᤴ ᤂᤧᤵᤛᤧ᤹ᤀᤥ॥ 20 ᤀᤠᤍᤠᤱᤒᤠᤖᤧ ᤁᤧᤔᤡᤰᤁᤡᤴ ᤁᤴ ᤔᤠᤱᤜᤡᤶᤔᤥ ᤛᤧᤴᤍᤡᤰ ᤗᤧᤴᤍᤡᤰ ᤆᤢᤰᤁᤠᤱ ᤐᤳᤗᤖᤥ. ᤁᤴ ᤋᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤍᤠᤱᤒᤠᤖᤧ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤘᤕᤧ. ‘ᤁ᤹ᤕᤥ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤀᤠᤓᤧᤸᤗᤧᤛᤠᤱ ᤘᤠ᤹ᤖᤥ॥’ ᤁᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤧᤸᤗᤧ ᤁᤴ ᤋᤧᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤆᤥᤃᤢᤒᤠ ᤐᤣᤗᤡᤴ ᤀᤠᤍᤠᤱᤒᤠᤖᤧ ᤂᤧᤵᤛᤧ᤹ᤀᤥ॥ 21 ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤏᤢ ᤀᤠᤍᤠᤱᤒᤠᤖᤧ ᤀᤡᤛᤪᤠᤀᤡᤗᤒᤠ ᤁᤧᤔᤏᤠᤜᤠ᤹ᤖᤧ ᤁᤴ ᤋᤧᤴ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤋᤢᤘᤠ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤣᤗᤡᤴ ᤂᤧᤵᤛᤧ᤹ᤀᤥ॥ ᤁᤧᤕᤢᤰᤏᤠᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤀᤠᤸᤗ ᤀᤠᤍᤠᤱᤒᤠᤖᤧ ᤁᤧᤄᤧᤵᤛᤢᤸᤗᤧ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥ 22 “ᤁᤢᤓᤠ ᤔᤏᤠ᤺ᤸᤗᤧ ᤁᤢᤜᤡᤶᤒᤣᤛᤠᤱᤒᤧᤴ ᤔᤧᤴᤘᤠ᤹ᤔᤏᤠ ᤔᤧᤳᤋᤢᤀᤠᤱ ᤔᤠᤱᤜᤧᤰᤛᤡᤱᤔᤠ ᤐᤠᤱᤄᤢᤏᤧᤓᤃᤪ. ᤜᤧᤰᤁᤩᤠᤱ ᤁᤴ ᤔᤠᤱᤜᤡᤶ ᤛᤡᤃᤠᤱ ᤀᤠᤍᤠᤱᤒᤠᤖᤧ᤹ᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤔᤠᤱᤜᤧᤰᤛᤡᤱᤏᤧᤓᤃᤪ. 23 ᤀᤠᤍᤠᤱᤒᤠᤖᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤠᤱ ᤕᤠ᤺ᤶᤒᤰ ᤆᤥᤃᤧ᤹॥ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤠᤛᤧᤴ ᤆᤥᤃᤧ᤹॥ ᤀᤠᤵᤋᤡᤰᤛᤠᤒᤧᤴ ᤀᤠᤵᤋᤡᤰᤛᤠᤒᤠ ᤗᤣ᤺ᤳᤋᤧ᤹. ᤜᤧᤰᤁᤩᤠᤱ ᤂᤧᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤐᤡᤖᤧ᤹॥ ᤁᤢᤍᤥ᤺ᤵᤔᤠᤴ ᤁᤢᤍᤥ᤺ᤵᤔᤠᤀᤣ ᤗᤣ᤺ᤳᤋᤧ᤹ᤀᤥ. ᤂᤶᤓᤩᤠᤱ ᤂᤧᤴ ᤁᤢᤍᤥ᤺ᤵᤔᤠ ᤁᤢᤕᤠ᤺ᤶᤒᤰᤁᤥᤀᤣ ᤌᤎᤵ ᤔᤧᤸᤗ᤹ᤀᤣ ᤁᤧᤘᤠ᤹ᤒᤠ ᤆᤥᤃᤧ᤹ᤀᤥ॥ 24 “ᤀᤠᤸᤗ ᤀᤠᤍᤠᤱᤒᤠᤖᤧ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤗᤠᤶ ᤜᤠᤖᤡᤔᤧᤍᤠᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤡᤴ ᤔᤧᤒᤠ᤺ᤳᤋᤢᤖ ᤁᤴ ᤔᤠᤱᤜᤡᤶᤔᤥ ᤋᤢᤘᤠ ᤏᤢ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤣᤗᤡ ᤁᤧᤶᤓᤠᤰᤗ ᤀᤠᤍᤠᤱᤒᤠ ᤗᤧᤵᤔᤠᤱ ᤔᤧᤏᤢ᤺ᤱᤏᤧᤓᤃᤪ. 25 ᤂᤶᤓᤩᤠᤱ ᤀᤠᤍᤠᤱᤒᤠᤖᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤧ᤹ᤀᤠᤱ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤏᤢ᤺ᤰᤋᤧ ᤋᤠᤖᤧᤛᤧ᤹ᤀᤥ॥ 26 “ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤋᤠᤱᤛᤠᤱᤒᤧᤴ ᤛᤢᤵᤛᤡᤱᤅᤠᤱ ᤘᤜᤡᤳ ᤔᤧᤴᤎᤠᤀᤣ ᤘᤠ᤹. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤋᤢᤰᤂᤣ ᤁᤧᤈᤠ᤺ᤳᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤡᤴ ᤐᤠ᤺ᤵᤔᤠ ᤔᤧᤍᤧᤴ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤕᤥᤗᤠᤶ ᤔᤧᤏᤢ᤺ᤱ ᤔᤧᤍᤠᤀᤠᤱ ᤁᤴ ᤋᤧᤴᤏᤥ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤁᤡᤸᤗᤧ. 27 ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤴ ᤂᤧᤵᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ. ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥ ᤂᤧᤱᤜᤠ᤹ ᤗᤠᤱᤄᤣ᤺ᤰᤔᤠ ᤁᤧᤒᤥᤱᤒᤠ ᤏᤢᤒᤠ ᤕᤧᤵᤗᤧᤰᤁᤡᤴ ᤂᤧᤏᤧ᤹ ᤜᤢ᤹ᤖᤧᤛᤧ᤹ᤀᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤏᤠᤜᤠ᤹ ᤂᤢᤴᤇᤡ᤹ ᤗᤰᤂᤥᤔᤠᤖᤧ ᤗᤠᤃᤡ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤘᤜᤡᤳ ᤌᤠᤛᤢᤖ ᤕᤠ᤺ᤴᤍᤧ ᤐᤡᤖᤧᤛᤧ᤹ᤀᤥ॥ 28 “ᤀᤠᤸᤗ ᤗᤠᤈᤣ᤹ᤀᤥ ᤛᤠᤰ ᤐᤥᤰ ᤀᤡᤃᤪ ᤋᤢᤰᤂᤣ ᤗᤠᤰᤂᤣ ᤋᤠ᤺ᤸᤗᤧ. ᤁᤡᤃᤪ ᤛᤡᤱᤛᤣ᤹ᤜᤠ᤹ ᤜᤣᤛᤡ ᤀᤡᤃᤪ ᤂᤢᤰᤘᤠᤔᤣ᤺ᤳ ᤁᤧᤎᤠᤒᤠ ᤕᤧᤶ ᤁᤡᤃᤪ ᤏᤡ᤺ᤱᤄᤢᤰᤘᤠ ᤏᤢ ᤑᤣ᤹ᤒᤠ᤺ᤳᤜᤠ᤹ ᤋᤠᤔᤠ ᤕᤧᤶ ᤋᤠ᤺ᤸᤗᤧ. ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤠ ᤕᤧᤰᤕᤰᤁᤡᤴ ᤏᤡᤱᤔᤡᤜᤠ᤹ᤖᤧ ᤔᤧᤃᤒᤢ᤹. ᤀᤠᤰᤋᤱᤒᤠ ᤋᤢᤰᤔᤠ ᤗᤠ᤺ᤰᤔᤠ ᤀᤡᤃᤪ ᤔᤧᤰᤔᤠᤛᤡᤔᤠ ᤋᤠᤛᤠᤱ 29 ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤣ ᤗᤠᤰᤂᤣ᤺ᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤀᤠᤱ ᤁᤴ ᤔᤠᤱᤜᤡᤶᤔᤡᤴ ᤗᤧᤵᤔᤠᤱ ᤂᤢᤴᤇᤡ᤹ ᤜᤢᤰᤁᤡᤴ ᤌᤠ᤺ᤱ ᤔᤧᤓᤥ᤺ᤰᤂᤢ᤹ ᤜᤧᤰᤁᤩᤠᤱ ᤋᤢᤘᤠ ᤁᤧᤶᤈᤠᤰ ᤀᤡᤃᤪ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤐᤣᤗᤡ ᤁᤧᤶᤓᤠᤰᤁᤡᤸᤗᤧ ᤀᤠᤍᤠᤱᤒᤠᤖᤧ ᤁᤧᤕᤢᤰᤏᤠᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤠᤱ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥ 30 ᤀᤠᤍᤠᤱᤒᤠᤖᤧ ᤔᤏᤠᤀᤣ ᤌᤰᤔᤠ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤏᤡᤛᤢ᤹॥ ᤁᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤠᤱ ᤂᤢᤴᤇᤡ᤹ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤐᤡᤖᤧᤛᤧ᤹॥ (ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧᤖᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤏᤡᤛᤢ᤹). 31 ᤜᤧᤰᤁᤣᤗ᤹ᤖᤡᤰ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤕᤧᤶᤔᤥ ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠ ᤁᤧᤶᤃᤡᤳᤗ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤗᤠᤶᤔᤥ ᤗᤠᤱᤔᤧᤄᤣ᤺ᤰᤗᤖᤥ॥ 32 “ᤀᤠᤍᤠᤱᤒᤠᤖᤧ ᤁᤧᤔᤏᤠ ᤀᤡᤛᤪᤠᤀᤡᤗᤡ ᤔᤣ᤺ᤶᤒᤠ ᤁᤢᤓᤠ ᤘᤣ᤹ ᤗᤠᤈᤣ᤹ᤒᤠᤸᤗᤧ ᤀᤠᤍᤠᤱᤒᤠᤖᤧ ᤐᤕᤶ ᤕᤶᤒᤠ ᤁᤧᤔᤡᤱᤅᤡᤴ ᤏᤢ ᤐᤕᤶ ᤕᤶᤒᤠ ᤔᤢᤰᤛᤠᤶᤛᤠᤒᤠ ᤁᤧᤜᤢᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢ᤹ ᤜᤧᤰᤁᤩᤠᤱ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤠᤀᤠᤱ ᤁᤴ ᤔᤠᤱᤜᤡᤶ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤂᤧᤸᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤏᤧᤓᤃᤪ. 33 ᤀᤠᤍᤠᤱᤒᤠᤖᤧ ᤁᤧᤕᤢᤰᤏᤠᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤠᤱ ᤂᤧᤴ ᤘᤣ᤹ ᤗᤠᤈᤣ᤹ᤒᤠᤸᤗᤧ ᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤐᤡᤖᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤀᤠᤍᤠᤱᤒᤠᤖᤧ ᤁᤧᤔᤏᤠ ᤀᤡᤛᤪᤠᤀᤡᤗᤖᤧ ᤜᤧᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠ ᤁᤧᤶᤃᤡᤳᤋᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤜᤡᤶᤔᤥ ᤀᤠᤍᤠᤱᤒᤠᤖᤧᤀᤣ ᤁᤧᤔᤡᤱ ᤕᤢᤱᤔᤏᤠᤀᤠᤱ ᤘᤠ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤖᤖᤥ॥ 34 “ᤀᤠᤍᤠᤱᤒᤠᤖᤧ ᤀᤠᤳᤋᤡᤛᤠᤱ ᤁᤧᤒᤠᤱᤄᤢᤛᤡᤒᤠ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤏᤢ ᤌᤰᤛᤧ ᤔᤧᤒᤣ᤺ᤰᤁᤡᤸᤗᤧ ᤀᤠᤍᤠᤱᤒᤠᤖᤧ ᤁᤧᤛᤣᤃᤢᤒᤠ ᤁᤴ ᤕᤧᤰᤕᤰᤁᤡᤴ ᤏᤢ ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤔᤡᤱᤗᤧ ᤗᤠᤃᤡ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤀᤠᤸᤗ ᤂᤧᤱᤜᤠ᤹ᤖᤧ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥ᤺ᤰᤁᤡᤸᤗᤧ. 35 ᤀᤠᤍᤠᤱᤒᤠᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤘᤠᤴ ᤏᤢ ᤐᤣᤗᤡᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤵᤛᤧ᤹ᤀᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤧᤵᤔᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤧ ᤐᤡᤖᤧᤛᤧ᤹ᤀᤥ॥ 36 “ᤀᤠᤸᤗ ᤂᤧᤱᤜᤠ᤹ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤔᤧᤈᤥᤰ. ᤌᤣᤀᤠᤱᤓᤧᤸᤗᤧ ᤗᤠᤕᤥ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠ ᤜᤠ᤺ᤳᤋᤠᤱ ᤜᤥᤵ. ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤛᤠᤰᤁᤧᤴ ᤐᤥ᤺ᤰᤔᤥ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤂᤧᤱᤜᤠ᤹ ᤁᤧᤎᤠᤛᤢᤛᤡᤀᤠᤱ ᤂᤧᤸᤗᤧ ᤂᤧᤱᤜᤠ᤹ ᤔᤠ᤺ᤱᤄᤠ ᤀᤡᤃᤪ ᤏᤡ᤺ᤳᤋᤠᤱᤒᤠ ᤗᤠᤈᤣ᤹ᤀᤥ ᤋᤧᤶᤛᤢ ᤋᤣ᤹ᤖᤢᤛᤡ᤹. 37 ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤧᤶᤛᤢ ᤋᤣ᤹ᤖᤢᤛᤡᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤧᤏᤢ᤺ᤰᤋᤢ᤹ ᤂᤶᤓᤩᤠᤱ ᤗᤠᤕᤥᤗᤠᤶ ᤔᤧᤜᤡᤴᤏᤠᤱ ‘ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧ. ᤜᤧᤰᤁᤩᤠᤱ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤐᤥ᤺ᤰᤂᤡᤃᤧᤀᤠᤱ ᤀᤠᤏᤡᤃᤣ ᤑᤧᤴᤕᤠ᤺ᤶᤒᤰ ᤆᤥᤃᤢᤶᤒᤧ’ ᤔᤧᤗ᤹ᤀᤠᤱ ᤂᤧᤴ ᤗᤠᤈᤣ᤹ᤀᤥ ᤀᤠᤍᤠᤱᤒᤠ ᤀᤰᤋᤱᤒᤠ ᤐᤣᤗᤡ ᤁᤧᤶᤓᤠᤰ. 38 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤗᤠᤈᤣ᤹ᤀᤥ ᤕᤠᤶᤔᤥ ᤂᤢᤴᤇᤡ᤹ ᤁᤧᤖᤧᤰ ᤛᤡᤰᤗᤢᤱᤔᤠ᤹ ᤏᤢ ᤛᤰᤔᤠ ᤛᤠᤶᤔᤡᤸᤗᤧ ᤀᤠᤍᤠᤱᤒᤠ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤀᤠᤍᤠᤱᤒᤠᤖᤧ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹ ᤗᤧᤵᤔᤠᤱ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤛᤣᤃᤢᤒᤠ ᤕᤧᤰᤕᤰ ᤏᤢ ᤀᤠᤍᤠᤱᤒᤠᤖᤧ ᤁᤧᤔᤡᤱᤅᤡᤸᤗᤧ ᤗᤠᤃᤡ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤔᤠᤱᤜᤡᤶ ᤗᤧᤵᤔᤠᤱ ᤔᤧᤜᤡᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤀᤠᤍᤠᤱᤒᤠ ᤐᤣᤗᤡ ᤁᤧᤶᤓᤠᤰᤁᤡᤸᤗᤧ. 39 ᤁᤧᤕᤢᤰᤏᤠᤍᤧᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤘᤠᤴ ᤏᤢ ᤐᤣᤗᤡᤴ ᤂᤧᤵᤛᤧ᤹ᤀᤠᤱ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤧ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠ ᤀᤠᤍᤠᤱᤒᤠᤖᤧ ᤁᤧᤔᤏᤠᤜᤠ᤹ ᤗᤧᤵᤔᤡ ᤐᤡᤖᤧᤛᤧ᤹ᤀᤥ॥ 40 “ᤀᤠᤸᤗ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤁᤧᤔᤡᤰᤜᤠ᤹ ᤜᤴᤗᤖᤥ. ᤜᤧᤰᤁᤩᤠᤱ ᤁᤴ ᤋᤧᤴᤏᤥ ᤋᤥ᤺ᤶᤔᤏᤠᤒᤠ ᤐᤣᤗᤡᤜᤠ᤹ᤀᤥ ᤁᤧᤏᤧᤰᤂᤥ᤹ᤒᤠᤴ ᤆᤠᤱᤈᤠᤱ ᤔᤧᤳᤋᤧ᤹ᤀᤥ॥ 41 ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤸᤗ ᤐᤥᤃᤧ᤹ᤀᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠ ᤏᤢ ᤀᤠᤍᤠᤱᤒᤠᤖᤧ ᤔᤢᤰᤛᤠᤶᤒᤠ ᤁᤧᤛᤴᤍᤥᤰ ᤁᤧᤏᤠ᤺ᤶᤛᤡᤱᤔᤠᤍᤧᤴᤏᤥ ᤋᤩᤧ᤹ᤀᤥ॥ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤁᤧᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤧᤴᤗᤵ ᤆᤠᤱ ᤔᤧᤈᤠᤰᤋᤢᤛᤡᤖᤖᤥ. ᤜᤧᤰᤁᤩᤠᤱ ᤀᤠᤍᤠᤱᤒᤠ ᤁᤧᤏᤢ᤹ᤒᤠ ᤁᤧᤈᤥ᤺ᤰᤐᤠᤀᤥ ᤀᤠᤍᤠᤱᤒᤠᤖᤧ ᤁᤧᤛᤣᤛᤣ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤖᤖᤥ॥ 42 ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤍᤠᤱᤒᤠᤖᤧ ᤔᤠᤱᤌᤥ᤺ᤰᤏᤠ ᤁᤧᤒᤥᤱᤒᤠ ᤁᤧᤔᤏᤠᤴ ᤔᤧᤏᤠ᤹ᤖᤧᤴᤏᤧ᤹ᤀᤥ॥ ᤁᤧᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤋᤢᤒᤠ ᤔᤠᤱᤜᤢᤵᤐᤡᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.