᥈ ᤛᤠᤵᤔᤢ᤺ᤴᤎᤢᤶ 36 - LIFOTNT

ᤕᤜᤢᤍᤠᤒᤠ ᤜᤠᤱ ᤕᤜᤥᤀᤠᤜᤠᤈ

¹ ᤂᤧᤴ ᤀᤣᤃᤠᤱ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤕᤥᤛᤡᤕᤠᤜ᤺ᤸᤗᤧ ᤁᤢᤛ᤻ᤛᤠ ᤕᤜᤥᤀᤠᤜᤠᤈᤧᤴ ᤔᤧᤍᤣ᤹ᤖᤢᤀᤠᤱ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤗᤧᤰᤘᤠᤀᤥ ᤜᤠᤱ ᤔᤧᤈᤥᤃᤢᤖᤥ॥

² ᤕᤜᤥᤀᤠᤜᤠᤈᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤛᤢᤶᤛᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤗᤠ ᤛᤢᤶᤛᤡ ᤜᤠᤱᤕᤢᤰ ᤆᤥᤃᤢ॥

³ ᤂᤶᤓᤩᤠᤱ ᤔᤡᤛᤪ ᤗᤠᤈᤣ᤹ᤒᤠ ᤜᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤜᤠᤱᤕᤢᤰᤏᤠᤀᤥᤗᤠᤶ ᤗ᤺ᤳᤋᤢᤍᤣᤛᤢᤀᤠᤱ ᤕᤜᤢᤍᤠᤀᤥ ᥇᥆᥆ ᤋᤥᤖᤠ ᤕᤢᤵᤐᤠ ᤏᤢ ᤋᤥᤖᤠ ᤌᤡᤰ ᤛᤠᤶᤔᤩᤠᤱ ᤀᤣ᤺ᤱ ᤁᤢ᤺ᤳᤋᤢ॥

⁴ ᤔᤡᤛᤪ ᤗᤠᤈᤣ᤹ᤒᤠ ᤜᤠᤱᤅᤡᤸᤗᤧ ᤕᤜᤥᤀᤠᤜᤠᤈᤖᤧ ᤁᤢᤴᤛᤠ᤹ ᤀᤣᤗᤩᤠᤁᤡᤔᤧᤴ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥ ᤜᤠᤱ ᤆᤥᤃᤢᤀᤠᤱ ᤀᤣᤗᤩᤠᤁᤡᤔᤗᤠᤶ ᤕᤜᤥᤕᤠᤁᤡᤔ ᤁᤢᤔᤡᤱ ᤗᤧᤰᤂᤢ ᤐᤡᤖᤢ॥ ᤁᤖ ᤏᤣᤁᤥᤸᤗᤧ ᤂᤢᤏᤧ᤹ ᤁᤢᤶᤓᤢ᤹ ᤕᤜᤥᤀᤠᤜᤠᤈᤧᤴ ᤔᤡᤛᤪ ᤗᤠᤈᤣ᤹ᤀᤥ ᤋᤣ᤹ᤖᤢᤀᤠᤱ ᤐᤣᤖᤥ॥

ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤔ

⁵ ᤕᤜᤥᤕᤠᤁᤡᤔᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤏᤡᤒᤥᤱᤅᤠᤱ ᤅᤠᤛᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤧᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤢᤏᤧ᤹ ᤀᤠᤶᤓᤠ ᤂᤠᤴᤏᤧ ᤆᤥᤃᤢ॥

⁶ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤕᤜᤢᤍᤠᤴ ᤌᤱᤅᤥ ᤑᤳᤋᤢ ᤜᤧᤰᤁᤩᤠᤱ ᤕᤜᤥᤕᤠᤁᤡᤔᤧᤴ ᤁᤠᤛᤠ ᤌᤰᤁᤪᤱᤅᤧᤸᤗᤧ ᤂᤣ᤺ᤰᤂᤢᤀᤠᤱ ᤒᤣᤒᤡᤗᤥᤏ ᤋᤣ᤹ᤖᤢ॥

⁷ ᤏᤒᤢᤁᤍᤏᤣᤛᤖᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤁᤢᤓᤠ ᤂᤵᤐᤩᤠ ᤛᤠᤔᤠᤜᤠ᤹ ᤋᤣ᤹ᤖᤢᤀᤠᤱ ᤒᤣᤒᤡᤗᤥᤏᤀᤥ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤠᤱᤜᤡᤶᤔᤥ ᤕᤢᤰᤂᤢ॥

⁸ ᤕᤜᤥᤕᤠᤁᤡᤔᤧᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤆᤥᤃᤢᤒᤠ ᤜᤡᤴᤍᤥᤰᤜᤠ᤹ ᤏᤢ ᤀᤠᤵᤋᤡᤰ ᤁᤧᤎᤠᤒᤠ ᤂᤢᤏᤧ᤹ ᤁᤧᤖᤧᤰ ᤁᤢᤕᤠ᤺ᤶᤒᤰᤜᤠ᤹ ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤕᤜᤥᤕᤠᤁᤡᤏᤧᤴ ᤜᤠᤱ ᤐᤥ᤺ᤰᤂᤧᤖᤥ॥

ᤕᤜᤢᤍᤠᤒᤠ ᤜᤠᤱ ᤕᤜᤥᤕᤠᤁᤡᤏ

⁹ ᤕᤜᤥᤕᤠᤁᤡᤏᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤌᤡᤒᤥᤱᤅᤠᤱ ᤕᤧᤳᤇᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤗᤠ ᤛᤢᤶᤛᤡᤀᤠᤱ ᤌᤡᤒᤥᤱ ᤕᤧᤴ ᤜᤠᤱᤕᤢᤰ ᤆᤥᤃᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤧᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤢᤏᤧ᤹ ᤀᤠᤶᤓᤠ ᤂᤧᤴ ᤆᤥᤃᤢ॥

¹⁰ ᤜᤠᤱᤘᤠᤔᤠ ᤕᤧᤶᤔᤥ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤕᤜᤥᤕᤠᤁᤡᤏᤧᤴ ᤋᤧᤶᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢ ᤑᤧᤴᤇᤢᤛᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤏᤢᤒᤠ ᤏᤢᤒᤠ ᤂᤵᤐᤩᤠ ᤛᤠᤔᤠᤜᤠ᤹ᤀᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤒᤣᤒᤡᤗᤥᤏᤀᤥ ᤋᤣ᤹ᤖᤢ. ᤜᤧᤰᤁᤩᤠᤱ ᤕᤜᤥᤕᤠᤁᤡᤏᤧᤸᤗᤧ ᤁᤢᤶᤒᤠᤖᤧ ᤁᤢᤴᤛᤠ᤹ ᤛᤡᤍᤁᤡᤕᤠᤜ᤺ᤴ ᤕᤜᤢᤍᤠ ᤏᤢ ᤕᤖᤢᤛᤗᤧ᤺ᤶᤔᤥᤒᤠ ᤜᤠᤱ ᤆᤥᤃᤢᤖᤥ॥

ᤕᤜᤢᤍᤠᤒᤠ ᤜᤠᤱ ᤛᤡᤍᤁᤡᤕᤠᤜ

¹¹ ᤛᤡᤍᤁᤡᤕᤠᤜ᤺ᤴ ᤜᤠᤱ ᤐᤥ᤺ᤰᤂᤧᤸᤗᤧ ᤏᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤌᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥

¹² ᤂᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤧᤸᤗᤧ ᤁᤢᤏᤡᤔᤠᤀᤥ ᤀᤠᤳᤋᤡᤴ ᤐᤠ᤺ᤴᤏᤧᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤀᤠᤶᤓᤠ ᤂᤠᤴ ᤆᤥᤃᤢ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤈᤠᤰ ᤁᤧᤒᤠ᤺ᤵᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤁᤢᤍᤃᤡ ᤂᤧᤴ ᤏ᤺ᤶᤏ᤺ᤶᤒᤠ ᤔᤧᤈᤥ᤺ᤰᤛᤡᤱᤅᤧᤴ॥

¹³ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤂᤢᤏᤧ᤹ ᤔᤠᤱᤜᤧᤰ ᤆᤥ᤺ᤰᤔᤠ ᤁᤧᤒᤠᤱᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧ॥ ᤂᤢᤏᤧ᤹ ᤐᤠ᤺ᤴᤔᤧᤱᤄᤧᤶᤔᤏᤠᤒᤠ ᤏᤢ ᤜᤠᤍᤡᤱ ᤁᤧᤎᤰᤐᤠ ᤐᤥ᤺ᤰᤂᤧᤀᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤥᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤏᤢ᤺ᤱᤔᤠ ᤋᤠᤔᤠ ᤂᤢᤏᤧ᤹ ᤔᤧᤍᤧᤴᤍᤧᤴ॥

¹⁴ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱᤒᤠ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤂᤢᤴᤇᤡ᤹ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢ॥ ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤒᤠᤅᤣ ᤛᤣᤛᤣ ᤆᤥᤃᤢᤒᤠ ᤁᤢᤜᤡᤶᤔᤡᤴ ᤂᤧᤱᤜᤠ᤹ᤖᤧ ᤀᤠᤛᤢᤳᤌᤥ ᤔᤧᤈᤥᤃᤢᤖᤥ॥

ᤕᤖᤢᤛᤗᤧ᤺ᤶᤔᤡᤴ ᤌᤩ᤺ᤱ ᤐᤥᤱ᤹

¹⁵ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤢᤰᤏᤠᤍᤧᤴᤏᤡᤴ ᤏᤢ ᤁᤢᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤳᤗᤧᤱ ᤕᤧᤳᤗᤧᤱ ᤂᤢᤴᤇᤡ᤹ᤀᤥ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢ ᤋᤠᤛᤢᤛᤡ॥

¹⁶ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤔᤧᤴᤎᤠᤀᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤀᤡᤱᤛᤠᤒᤠᤜᤠ᤹ ᤕᤣ᤺ᤵᤔᤠᤛᤡ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠᤛᤡ. ᤂᤢᤏᤧ᤹ ᤁᤢᤒᤠ᤺ᤴᤈᤠᤰᤜᤠ᤹ᤀᤥ ᤆᤧ᤹ᤕᤠ ᤀᤡᤱᤍᤥ ᤐᤠ᤺ᤵᤔᤠ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤂᤢᤏᤧ᤹ ᤁᤢᤔᤏᤠᤜᤠ᤹ ᤁᤣ᤹ᤔᤠᤛᤡ ᤔᤧᤸᤗᤧᤖᤢᤴ ᤜᤧᤰᤁᤩᤠᤱ ᤂᤧᤵᤔᤥ ᤋᤠᤱᤔᤠᤗᤠᤶ ᤔᤧᤒᤥ᤺ᤰᤂᤧᤴ॥

¹⁷ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤑᤧᤳᤋᤢ. ᤂᤧᤸᤗᤧ ᤛᤣᤛᤣᤍᤧᤴᤏᤥᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠᤱᤒᤧᤴ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤆᤩᤧᤵᤋᤢ ᤛᤩᤧᤖᤢᤛᤡ. ᤜᤧᤰᤁᤩᤠᤱ ᤏᤠᤗᤡᤃᤧᤴ ᤌᤠᤱᤒᤧᤴ. ᤛᤡᤛᤠᤃᤧᤴ ᤔᤧᤴᤇ᤻ᤕᤠ. ᤁᤠᤵᤐᤥᤒᤠ ᤀᤡᤃᤪ ᤋᤢᤶᤓᤠᤰᤛᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤍᤠᤱᤄᤢᤛᤡᤴ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤂᤰᤐᤧᤳ ᤏᤒᤢᤁᤍᤏᤣᤛᤖᤧᤸᤗᤧ ᤁᤢᤜᤢᤰᤁᤥ ᤌᤠᤛᤢᤛᤡ॥

¹⁸ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤕᤶᤒᤠ ᤆᤢᤰᤐᤠ ᤁᤧᤖᤧᤰ ᤂᤵᤐᤩᤠ ᤛᤠᤔᤠᤜᤠ᤹ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤕᤠᤱᤓᤢᤜᤠ᤹ ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤕᤠᤱᤓᤢᤀᤥᤒᤠ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤓᤢᤀᤥᤒᤠ ᤁᤢᤔᤧᤸᤗᤢᤱ ᤁᤧᤄᤡ᤺ᤰᤐᤠ ᤛᤠᤔᤠᤑᤢᤔᤠᤜᤠ᤹ ᤁᤧᤖᤧᤰ ᤋᤣ᤹ᤖᤢᤀᤠᤱ ᤐᤣ॥

¹⁹ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤧᤴ ᤑᤢᤳᤗᤢᤶ ᤔᤡᤔᤧᤎᤡᤰᤂᤢ ᤔᤧᤍᤣᤛᤢ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤴ ᤔᤧᤗᤢ᤺ᤴᤍᤢ ᤔᤧᤍᤣᤛᤢ॥ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤥᤒᤠ ᤕᤶᤒᤕᤶᤒᤠ ᤜᤡᤶᤜᤠ᤹ ᤁᤧᤖᤧᤰ ᤔᤡᤔᤧᤎᤡᤰᤂᤢ ᤔᤧᤍᤣᤛᤢ ᤂᤶᤓᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤁᤢᤔᤧᤴ ᤁᤧᤄᤡ᤺ᤰᤐᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ॥

²⁰ ᤋᤠᤓᤣ᤺ᤸᤗᤧ ᤆᤩᤧᤵᤔᤠ ᤛᤧᤵᤔᤠᤛᤡᤗᤠᤶ ᤁᤧᤒᤡᤶᤒᤠᤜᤠ᤹ ᤂᤢᤏᤧ᤹ ᤋᤧᤶᤛᤢᤛᤡᤀᤠᤱ ᤒᤣᤒᤡᤗᤥᤏ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤑᤠᤖᤛᤒᤠ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥ᤺ᤰᤔᤠ ᤕᤧᤶ ᤔᤧᤴᤍᤠᤀᤣ ᤌᤠᤖᤡᤰ ᤂᤧᤱᤜᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤏᤢ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤔᤧᤒᤥ᤺ᤰᤂᤧ॥

²¹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤧᤴ ᤁᤧᤵᤔᤠᤖᤧ ᤗᤠᤃᤡ ᤏᤢᤒᤥᤱ ᤋᤱᤒᤣ ᤔᤧᤱᤃᤧᤳᤋᤣ ᤌᤠᤖᤡᤰ ᤀᤡᤛᤪᤠᤀᤡᤗ ᤗᤠᤈᤣ᤺ᤸᤗᤧ ᤁᤢᤏᤠ᤺ᤶᤛᤡᤱᤔᤠ ᤕᤧᤶᤔᤡᤴ ᤔᤧᤱᤃᤠ᤺ᤰᤁᤣ ᤌᤠᤖᤡᤰ ᤔᤧᤃᤧᤒᤠ ᤁᤧᤖᤧᤰ ᤕᤧᤶ ᤂᤠᤖᤠᤰᤁᤣ ᤏᤠ᤺ᤶᤛᤡᤱᤔᤠ ᤛᤒᤠᤌᤧᤴ ᤗᤠᤈᤣ᤺ᤸᤗᤧ ᤏᤧᤳᤋᤢᤀᤠᤱ ᤏᤧᤛ᤻ᤛᤧ॥

²² ᤑᤠᤖᤛᤒᤠ ᤜᤠᤱ ᤁᤥᤖᤣᤛᤧᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤕᤷᤔᤡᤕᤠ᤺ᤸᤗᤧ ᤐᤠ᤺ᤳᤋᤢᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤧᤴ ᤁᤧᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤑᤠᤖᤛᤒᤠ ᤜᤠᤱ ᤁᤥᤖᤣᤛᤧᤴ ᤁᤢᤛᤡᤰ ᤁᤧᤛᤶᤒᤠ ᤆᤥᤃᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤈᤢᤶᤔᤥ ᤁᤧᤖᤧᤰ ᤁᤢᤶᤒᤪᤠ᤺ᤸᤗᤧᤀᤣ ᤐᤠ᤺ᤳᤋᤢᤀᤠᤱ ᤜᤧᤰᤁᤩᤠᤱ ᤛᤠᤵᤋᤢᤀᤠᤱ ᤀᤰᤋᤱᤒᤠ ᤀᤢᤘᤠ ᤆᤥᤃᤢᤖᤥ—

²³ “ᤑᤠᤖᤛᤒᤠ ᤜᤠᤱ ᤁᤥᤖᤣᤛᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “‘ᤕᤜᤘᤣ ᤍᤠᤱᤒᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤀᤠᤱᤃᤠ᤹ ᤐᤡᤖᤠᤱᤅᤠᤱ ᤏᤧᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤠᤱᤃᤠ᤹ ᤕᤜᤢᤍᤠᤀᤥᤒᤠ ᤕᤖᤢᤛᤗᤧ᤺ᤶᤔᤥ ᤂᤢᤏᤧ᤹ ᤁᤢᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤔᤠ ᤀᤡᤱᤈᤠᤱ ᤐᤡᤖᤠᤱᤅᤠᤱ ᤘᤠ᤹॥ ᤀᤠᤸᤗᤥ ᤂᤡᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ. ᤂᤢᤏᤧ᤹ ᤁᤢᤔᤏᤠᤜᤠ᤹ᤀᤥᤒᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤔᤧᤳᤋᤢᤱᤛᤡᤱ᤹. ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤴᤇᤡ᤹ᤏᤢ ᤛᤥᤖᤡᤰ ᤘᤠ᤹ᤖ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤎᤥ᤺ᤰᤛᤡᤱ ᤔᤧᤒᤣ᤺ᤰᤗᤖᤥ॥’”