᥈ ᤛᤠᤵᤔᤢ᤺ᤴᤎᤢᤶ 21 - LIFOTNT

¹ ᤂᤧᤴ ᤀᤣᤃᤠᤱ ᤕᤜᤥᤛᤠᤐᤠᤋᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤕᤜᤥᤖᤠᤔᤧᤴ ᤜᤠᤱ ᤐᤥ᤺ᤰᤂᤧ॥

² ᤕᤜᤥᤖᤠᤔᤖᤧ ᤁᤢᤴᤛᤠ᤹ᤜᤠ᤹ ᤀᤈᤷᤕᤠᤜ. ᤕᤜᤡᤀᤣᤗ. ᤈᤁᤖᤡᤕᤠ. ᤀᤈᤷᤕᤠᤜ. ᤔᤡᤂᤠᤀᤣᤗ ᤏᤢ ᤛᤐᤋᤩᤠᤜ ᤔᤧᤘᤕᤧ॥ ᤁᤴᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤜᤠᤱ ᤕᤜᤥᤛᤠᤐᤠᤋᤖᤧ ᤁᤢᤛ᤻ᤛᤠ ᤔᤧᤘᤕᤧ॥

³ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤂᤧᤱᤜᤠ᤹ ᤛᤠᤶᤔᤩᤠᤱ. ᤕᤢᤵᤐᤠ ᤜᤧᤰᤁᤩᤠᤱ ᤁᤢᤔᤧᤴ ᤁᤧᤄᤡ᤺ᤰᤐᤠ ᤛᤠᤔᤠᤜᤠ᤹ ᤏᤢ ᤕᤜᤢᤍᤠᤀᤥ ᤋᤠᤵᤌᤣᤰ ᤕᤠᤶᤎᤣᤰᤐᤠ ᤕᤧᤰᤕᤰᤜᤠ᤹ᤀᤠᤱ ᤐᤡᤖᤢᤛᤡ॥ ᤁᤖ ᤜᤠᤱᤈᤢᤶᤔᤡᤴ ᤂᤢᤏᤧ᤹ ᤕᤜᤥᤖᤠᤔᤧᤴ ᤐᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤢᤶᤒᤠ ᤘᤕᤧᤖᤥ॥

ᤕᤜᤢᤍᤠᤒᤠ ᤜᤠᤱ ᤕᤜᤥᤖᤠᤔ

⁴ ᤕᤜᤥᤖᤠᤔᤧᤴ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤜᤠᤱᤕᤢᤰᤏᤠᤀᤥ ᤕᤢᤅᤧᤸᤗᤧ ᤂᤢᤏᤧ᤹ ᤁᤧᤖᤧᤰ ᤁᤢᤴᤛᤠ᤹ᤛᤡ ᤏᤢ ᤀᤡᤛᤪᤠᤀᤡᤗᤒᤠ ᤁᤢᤓᤠ ᤛᤢᤜᤠᤱᤕᤢᤰᤐᤠᤜᤠ᤹ᤀᤠᤱ ᤋᤠᤓᤣ᤺ᤸᤗᤧ ᤆᤩᤧᤵᤋᤢ ᤛᤩᤧᤖᤢᤛᤡ॥

⁵ ᤂᤢᤏᤧ᤹ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤕᤧᤳᤇᤡ ᤜᤠᤱᤕᤢᤰ ᤆᤥᤃᤢ॥

⁶ ᤀᤠᤜᤠᤒᤖᤧ ᤁᤢᤜᤡᤶᤛᤕᤱ ᤜᤧᤰᤁᤣ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤥ ᤗᤠᤱᤄᤣᤃᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤜᤠᤒᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤋᤧᤴᤎᤠᤶ ᤔᤣ᤺ᤰᤂᤡᤶ ᤗᤡ᤺ᤰᤂᤢᤀᤠᤱ ᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤂᤧᤸᤗᤧ ᤜᤠᤒᤠ ᤂᤧᤴ ᤆᤥᤃᤢ॥

⁷ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤍᤠᤀᤢᤍᤧᤴᤏᤢ ᤆᤥᤃᤢᤒᤠ ᤔᤠᤱᤜᤢᤵᤐᤡᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤜᤠ᤹ ᤔᤧᤱᤔᤠᤛᤡ ᤏᤡᤱᤘᤠ᤹ ᤔᤧᤈᤥᤃᤢᤴ. ᤂᤢᤏᤧ᤹ ᤍᤠᤀᤢᤍᤧᤴ ᤏᤢ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤗᤠᤃᤡ ᤀᤠᤓᤧᤸᤗᤧᤛᤠᤱ ᤛᤍᤠᤍᤡᤱ ᤁᤧᤍᤡ᤺ᤵᤐᤠᤀᤠᤱ ᤁᤧᤕᤢᤱᤒᤠ ᤛᤣᤔᤡ ᤜᤠ᤺ᤶᤔᤠ ᤔᤠᤱᤜᤢᤵ ᤆᤥᤃᤢᤀᤠᤱ ᤘᤕᤧ॥

⁸ ᤕᤜᤥᤖᤠᤔᤖᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶᤔᤥ ᤀᤣᤍᤥᤔᤡᤜᤠ᤹ ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤜᤠᤱᤎᤡᤰ ᤔᤧᤓᤥ᤺ᤰᤂᤢ॥

⁹ ᤁᤸᤗᤧᤆᤥᤃᤢᤸᤗᤧ ᤕᤜᤥᤖᤠᤔᤧᤴ ᤂᤢᤏᤧ᤹ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤁᤢᤀᤴᤗᤠᤎᤠᤜᤠ᤹ᤏᤢ ᤛᤥᤖᤡᤰ ᤀᤧᤍᤥᤔ ᤗᤧᤵᤔᤠᤱ ᤌᤠᤛᤡᤱ॥ ᤀᤣᤍᤥᤔᤡᤜᤠ᤹ᤖᤧ ᤂᤢᤏᤧ᤹ ᤏᤢ ᤁᤢᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤁᤡᤷᤃᤵ ᤔᤧᤃᤒᤢᤛᤡ. ᤁᤖ ᤂᤢᤏᤧ᤹ ᤐᤥᤃᤧᤀᤠᤱ ᤛᤧᤴᤍᤡᤰᤛᤠ ᤐᤡᤴᤍᤧᤄᤧᤖᤧ॥

¹⁰ ᤀᤣᤍᤥᤔᤧᤴ ᤀᤠᤀᤡᤴᤒᤠ ᤕᤧᤴ ᤌᤠᤖᤡᤰᤁᤣ ᤕᤜᤢᤍᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤀᤠᤶᤓᤠ ᤂᤧᤴ ᤕᤧᤶᤔᤥ ᤗᤡᤒ᤻ᤏᤠ᤺ᤸᤗᤧᤀᤠᤱ ᤐᤡᤑᤩᤢᤱ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤕᤜᤥᤖᤠᤔᤧᤸᤗᤧ ᤁᤢᤶᤒᤠ ᤁᤢᤴᤎᤧᤒᤠᤛᤡᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤧᤖᤢᤍᤣᤛᤢᤀᤠᤱ ᤘᤕᤧ॥

¹¹ ᤂᤢᤏᤧ᤹ ᤕᤜᤢᤍᤠᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥ ᤔᤠᤱᤎᤠ᤺ᤴᤜᤠ᤹ ᤆᤥᤃᤢ ᤂᤶᤓᤩᤠᤱ ᤂᤢᤏᤧ᤹ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤐᤠᤱᤄᤢᤛᤡᤀᤠᤱ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠᤏᤢ ᤁᤢᤍᤱᤒᤠ ᤆᤥᤃᤢᤛᤡᤀᤠᤱ ᤕᤜᤢᤍᤠᤴ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤜᤡᤛᤢ॥

¹² ᤕᤜᤥᤖᤠᤔᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤗᤠᤶᤒᤠ ᤛᤠᤵᤐᤣ᤺ᤳᤋᤠ ᤌᤡᤰ ᤂᤥᤛᤢ॥ ᤂᤧᤵᤔᤥ ᤀᤰᤋᤱᤒᤠ ᤛᤠᤵᤋᤧᤀᤠᤱ ᤐᤳᤇᤧᤖᤥ— “ᤀᤠᤍᤠᤱᤒᤠᤖᤧ ᤁᤧᤛᤢᤎᤧᤒᤠ ᤍᤠᤀᤢᤍᤖᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤁᤧᤶᤒᤠ ᤕᤜᤥᤛᤠᤐᤠᤋ ᤏᤢ ᤕᤜᤢᤍᤠᤒᤠ ᤜᤠᤱ ᤀᤠᤛᤠ᤺ᤸᤗᤧ ᤏᤠ᤺ᤳᤋᤢᤒᤠ ᤗᤠᤶᤔᤡᤴ ᤂᤧᤏᤧ᤹ ᤁᤧᤴᤏᤠ᤺ᤳᤋᤢᤴ॥

¹³ ᤁᤖ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ ᤏᤢ ᤀᤠᤜᤠᤒᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤛᤡᤱ ᤂᤢᤴᤇᤡ᤹ ᤕᤧᤵᤗᤧᤰᤁᤥ ᤗᤠᤱᤃᤧᤄᤣᤃᤧᤀᤠᤱ ᤕᤜᤢᤍᤠ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤁᤧᤒᤠᤱᤄᤢᤛᤡᤀᤠᤱ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠᤏᤢ ᤁᤢᤍᤱᤒᤠ ᤁᤧᤈᤥᤃᤢᤛᤡ॥ ᤂᤶᤓᤩᤠᤱ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤜᤡᤶᤛᤱᤅᤥᤒᤠ ᤐᤠᤛᤡᤱᤐᤠᤍᤠᤱ ᤂᤧᤏᤧ᤹ ᤀᤠᤵᤑᤣᤰ ᤁᤧᤴᤛᤠ᤹ᤛᤡ ᤁᤧᤛᤩᤧᤖᤢᤛᤡ॥ ᤂᤧᤱᤜᤠ᤹ ᤂᤧᤏᤧ᤹ᤏᤢ᤺ᤸᤗᤧ ᤁᤧᤏᤢ᤹ᤒᤠ ᤔᤧᤘᤕᤧ॥

¹⁴ ᤂᤧᤱᤜᤠ᤹ ᤁᤧᤖᤧᤰ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤔᤏᤠᤜᤠ᤹. ᤂᤧᤏᤧ᤹ ᤁᤧᤛ᤻ᤛᤠᤜᤠ᤹. ᤂᤧᤏᤧ᤹ ᤁᤧᤔᤣ᤺ᤳᤜᤠ᤹ ᤏᤢ ᤁᤧᤖᤧᤰ ᤁᤧᤕᤠᤱᤛᤠ ᤁᤢᤴᤎᤣᤜᤠ᤹ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤂᤢᤶᤍᤡᤱ ᤋᤠ᤺ᤵᤔᤠ ᤏᤡᤱᤘᤠ᤹ ᤀᤡ᤺ᤳᤋᤢ᤹॥

¹⁵ ᤂᤧᤏᤧ᤹ ᤀᤠᤒᤠᤅᤣᤃ ᤔᤧᤴᤘᤣ᤺ᤵᤔᤏᤠᤒᤠ ᤛᤠᤵᤐᤥᤰ ᤜᤡᤍᤢ᤺ᤳ ᤋᤢᤰᤔᤠᤖᤧ ᤁᤧᤕᤠᤱ᤹. ᤜᤧᤰᤁᤩᤠᤱ ᤂᤧᤴ ᤋᤢᤰᤔᤧᤸᤗᤧ ᤆᤥᤃᤢᤸᤗᤧ ᤁᤧᤛᤠᤵᤐᤥᤰ ᤁᤧᤜᤡᤍᤢ᤺ᤳᤜᤠ᤹ ᤏᤠ ᤆᤶᤒᤧᤳ ᤗ᤺ᤶᤓᤧᤴ॥’”

¹⁶ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤖᤠᤔᤖᤧ ᤁᤢᤍᤰᤗᤧᤱᤘᤠᤀᤥ ᤁᤢᤛᤡᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤁᤧᤕᤢᤱᤒᤠ ᤐᤗᤡᤛ᤻ᤋᤡᤜᤠ᤹ ᤏᤢ ᤀᤖᤒᤡᤜᤠ᤹ ᤜᤢᤛᤢᤛᤡ ᤐᤰᤂᤢᤛᤡ॥

¹⁷ ᤂᤧᤱᤜᤠ᤹ᤖᤧ ᤕᤜᤢᤍᤠᤴ ᤔᤧᤓᤳᤋᤢᤀᤠᤱ ᤂᤧᤴ ᤏᤠ ᤛᤡᤃᤠᤱ ᤌᤧᤶᤒᤠ ᤔᤧᤗᤡᤛᤢ ᤔᤧᤍᤣ᤹ᤖᤢ॥ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤱᤜᤠ᤹ᤖᤧ ᤜᤠᤱᤅᤡᤸᤗᤧ ᤁᤢᤜᤡᤶᤔᤥ ᤔᤧᤕᤠᤱᤄᤢ. ᤕᤜᤥᤖᤠᤔᤖᤧ ᤁᤢᤛ᤻ᤛᤠᤜᤠ᤹ ᤏᤢ ᤁᤢᤔᤣ᤺ᤳᤜᤠ᤹ᤀᤠᤱ ᤔᤧᤍᤧᤶᤛᤢᤛᤡᤀᤠᤱ ᤔᤧᤍᤣ᤹ᤖᤢᤛᤡ॥ ᤂᤢᤏᤧ᤹ ᤁᤢᤛ᤻ᤛᤠ ᤑᤥᤰᤘᤠ ᤀᤜᤈᤩᤠᤜᤴᤗᤰ ᤕᤠ᤺ᤰᤋᤧ ᤘᤣ᤹ ᤀᤠᤳᤋᤡᤴ ᤁᤢᤛ᤻ᤛᤠᤜᤠ᤹ᤀᤠᤱ ᤔᤧᤴᤕᤠ᤺ᤰᤋᤧᤴ॥

¹⁸ ᤁᤴᤜᤠ᤹ ᤁᤧᤖᤧᤰ ᤐᤥ᤺ᤰᤂᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤥᤖᤠᤔᤧᤴ ᤔᤧᤴᤘᤣ᤺ᤵᤔᤏᤠᤒᤠ ᤛᤠᤵᤐᤥᤰ ᤜᤡᤍᤢ᤺ᤳ ᤋᤢᤰᤔᤧᤸᤗᤧ ᤋᤖᤢᤖ ᤕᤠ᤺ᤴᤍᤢ॥

¹⁹ ᤂᤧᤴ ᤋᤢᤰᤔᤧᤸᤗᤧ ᤁᤢᤓᤠ ᤕᤧᤶ ᤌᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤏᤡᤛᤡᤃᤣᤰᤐᤠ ᤋᤱᤒᤣ᤺ᤸᤗᤧ ᤁᤢᤏᤢᤵᤔᤥ ᤀᤠᤶᤓᤠ ᤂᤠᤴ ᤋᤢᤰᤔᤧᤸᤗᤧ ᤂᤢᤏᤧ᤹ ᤁᤢᤛᤠᤵᤐᤥᤰ ᤁᤢᤜᤡᤍᤢ᤺ᤳᤜᤠ᤹ ᤆᤶᤒᤧᤳ ᤗ᤺ᤴᤍᤧᤓᤧᤖᤧ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤔᤧᤴ ᤌ᤺ᤳᤋᤢᤀᤠᤱ ᤂᤢᤏᤧ᤹ ᤛᤩᤧ॥ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤗᤠᤃᤡ ᤔᤧᤈᤥᤃᤢᤒᤠ ᤁᤢᤛᤡᤱ ᤂᤢᤏᤧ᤹ ᤁᤢᤔᤡᤱᤛᤥᤀᤥ ᤔᤡ ᤔᤧᤴᤜᤠ᤺ᤴᤍᤢᤴ॥

²⁰ ᤕᤜᤥᤖᤠᤔᤧᤴ ᤜᤠᤱᤕᤢᤰᤏᤠᤀᤥ ᤌᤥ᤺ᤰᤛᤡᤱᤅᤧᤸᤗᤧ ᤂᤢᤏᤧ᤹ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤕᤥᤖᤧ॥ ᤂᤢᤏᤧ᤹ ᤕᤖᤢᤛᤗᤧ᤺ᤶᤔᤥ ᤋᤱᤒᤣ ᤕᤧᤳᤇᤡ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤛᤩᤧ᤺ᤸᤗᤧ ᤜᤠ᤺ᤳᤋᤠᤱ ᤔᤧᤖᤡᤱ ᤔᤧᤎᤰᤋᤧᤴ॥ ᤜᤧᤰᤁᤩᤠᤱ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ. ᤁᤖ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤜᤠ᤹ᤀᤥ ᤔᤧᤴᤏᤧᤛ᤻ᤛᤢᤴᤗᤥ॥