᥈ ᤛᤠᤵᤔᤢ᤺ᤴᤎᤢᤶ 16 - LIFOTNT

ᤀᤡᤛᤪᤠᤀᤡᤗᤀᤥ ᤋᤢᤰᤂᤣ ᤗᤠᤰᤂᤣ

¹ ᤀᤠᤛᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤒᤥᤱᤅᤠᤱ ᤋᤢᤰᤛᤡᤃᤣᤰᤐᤠ ᤋᤱᤒᤣᤀᤥ ᤀᤡᤛᤪᤠᤀᤡᤗᤒᤠ ᤜᤠᤱ ᤒᤠᤛᤠ᤺ᤸᤗᤧ ᤕᤜᤢᤍᤠᤴ ᤌᤱᤅᤥ ᤑᤳᤋᤢ॥ ᤕᤜᤢᤍᤠᤒᤠ ᤜᤠᤱ ᤀᤠᤛᤠ᤺ᤸᤗᤧ ᤁᤢᤗᤠᤈᤣ᤹ᤀᤥ ᤗᤠ᤺ᤵᤔᤠᤍᤧᤴᤜᤠ᤹ ᤁᤧᤖᤧᤰ ᤌᤣ᤺ᤰᤔᤠᤖᤧ ᤗᤠᤃᤡ ᤒᤠᤛᤠ ᤜᤠᤱᤅᤡᤸᤗᤧ ᤖᤠᤔᤠ ᤕᤧᤰᤕᤰᤁᤡᤴ ᤁᤒᤪᤡᤱ ᤗᤢᤱᤎᤠᤰ ᤛᤧᤳᤋᤢ॥

² ᤀᤠᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤜᤡᤶᤔᤥᤒᤠ ᤌᤠ᤺ᤱᤅᤥ ᤁᤧᤕᤢᤱᤒᤠ ᤛᤠᤶᤔᤩᤠᤱ ᤜᤧᤰᤁᤩᤠᤱ ᤕᤢᤵᤐᤠᤜᤠ᤹ ᤗ᤺ᤳᤋᤢᤀᤠᤱ ᤍᤔᤛ᤻ᤁᤛᤀᤥ ᤜᤠᤱᤕᤢᤰ ᤁᤧᤈᤥ᤺ᤰᤐᤠ ᤀᤠᤖᤠᤔᤒᤠ ᤜᤠᤱ ᤒᤣᤏ-ᤜᤍᤍᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤀᤡᤱᤄᤱ ᤜᤠᤰᤋᤢᤍᤣᤛᤢ.

³ “ᤀᤠᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤘᤕᤧᤒᤠ ᤁᤢᤀᤡᤛᤡ᤺ᤰᤁᤣ ᤀᤠᤴᤇᤡ᤹ ᤗᤢᤶᤔᤥ ᤗᤳᤇᤠ ᤏᤠᤍᤱ ᤐᤥᤱᤗ॥ ᤀᤠᤸᤗ ᤀᤠᤱᤃᤠ᤹ ᤁᤴ ᤛᤠᤶᤔᤩᤠᤱᤅᤡᤴ ᤏᤢ ᤕᤢᤵᤐᤠ ᤌᤥ᤺ᤰᤗᤠ᤺ᤴ ᤜᤠᤅᤢᤱᤗ ᤐᤳᤋᤠ॥ ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱ ᤒᤠᤛᤠ᤺ᤴᤏᤢ ᤁᤧᤘᤠ᤹ᤒᤠ ᤏᤠᤍᤱᤅᤡᤴ ᤀᤠᤍᤠᤱᤒᤠᤖᤧ ᤗᤧᤖᤧᤍᤣᤛᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤧᤸᤗᤧ ᤆᤥᤃᤢᤒᤠ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤗᤧᤖᤢᤍᤣᤛᤢᤖ॥”

⁴ ᤒᤣᤏ-ᤜᤍᤍᤧᤴ ᤀᤠᤛᤠ ᤜᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤧᤶᤔᤠ ᤋᤧᤴᤍᤧ॥ ᤀᤡᤛᤪᤠᤀᤡᤗᤒᤠ ᤕᤧᤰᤕᤰᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤌᤰᤔᤠᤖᤧ ᤗᤠᤃᤡ ᤂᤢᤏᤧ᤹ ᤁᤢᤎᤰᤔᤥᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤕᤥᤏ. ᤍᤠᤏ. ᤜᤠᤒᤡᤗ-ᤔᤤᤔ ᤏᤢ ᤏᤵᤋᤠᤗᤡᤒᤠ ᤆᤠᤕᤢᤱᤔᤠ ᤌᤠ᤺ᤱᤜᤠ᤹ ᤁᤧᤖᤧᤰ ᤕᤧᤰᤕᤰᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢ॥

⁵ ᤀᤠᤸᤗ ᤒᤠᤛᤠ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤖᤠᤔᤠᤀᤥ ᤗᤢᤱᤎᤠᤰ ᤛᤧᤵᤔᤠ ᤏᤠ᤹ᤖᤢ. ᤂᤶᤓᤩᤠᤱ ᤂᤧᤵᤔᤥ ᤆᤥᤃᤢᤖ ᤕᤠᤃᤧᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤗᤧᤖᤢ॥

⁶ ᤂᤧᤴ ᤀᤣᤃᤠᤱ ᤀᤠᤛᤠ ᤜᤠᤱᤅᤡᤸᤗᤧ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤛᤥᤖᤡᤰ ᤋᤣ᤹ᤖᤢᤛᤡᤀᤠᤱ ᤒᤠᤛᤠ᤺ᤸᤗᤧ ᤛᤧᤳᤋᤢ ᤆᤥᤃᤢᤖ ᤕᤠᤃᤧᤒᤠ ᤖᤠᤔᤠ ᤕᤧᤰᤕᤰᤁᤥᤒᤠ ᤗᤢᤱ ᤛᤡᤱᤜᤠ᤹ ᤑᤥ᤺ᤰᤂᤢᤀᤠᤱ ᤋᤣ᤹ᤖᤢ॥ ᤜᤧᤰᤁᤩᤠᤱ ᤃᤣᤒᤠ ᤏᤢ ᤔᤡᤛ᤻ᤐᤠᤀᤥ ᤁᤒᤪᤡᤱ ᤗᤢᤱᤎᤠᤰ ᤛᤧᤵᤔᤠᤖᤧ ᤗᤠᤃᤡ ᤂᤧᤴ ᤗᤢᤱ ᤛᤡᤱᤜᤠ᤹ ᤂᤧᤵᤔᤥ ᤌᤧᤰᤋᤢᤖᤥ॥

ᤂᤠᤃᤧᤀᤡᤰᤐᤠ ᤜᤏᤠᤏᤡ

⁷ ᤂᤧᤴ ᤕᤧᤶᤔᤥ ᤂᤠᤃᤧᤀᤡᤰᤐᤠ ᤜᤏᤠᤏᤡᤴ ᤕᤜᤢᤍᤠᤒᤠ ᤜᤠᤱ ᤀᤠᤛᤠᤀᤥ ᤋᤩᤧᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤣ᤺ᤴ ᤁᤖ ᤀᤠᤖᤠᤔᤒᤠ ᤜᤠᤱᤅᤡᤴ ᤏᤠᤃᤧᤛᤠ᤹ᤖᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤖᤠᤔᤒᤠ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥᤗᤠᤶ ᤔᤧᤒᤡᤴᤍᤧ ᤔᤧᤒᤣᤀᤠᤱ ᤔᤧᤘᤠ᤹॥

⁸ ᤌᤣ ᤏᤡ᤺ᤳᤔᤧᤴᤍᤧᤳ ᤀᤴᤗᤠᤎᤠᤜᤠ᤹ ᤏᤢ ᤀᤴᤜᤠ᤹ ᤁᤧᤃᤵᤐᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤢᤛᤡ ᤏᤢ ᤗᤡᤒᤡᤕᤠᤗᤡ ᤌᤰᤛᤢᤒᤠᤜᤠ᤹ ᤔᤧᤜᤥ᤺ᤵᤋᤧᤀᤠᤱᤒᤡ᥅ ᤜᤧᤰᤁᤣᤛᤠᤱ ᤀᤠᤸᤗ ᤀᤠᤍᤠᤱᤒᤠᤖᤧ ᤕᤜᤘᤣ ᤍᤠᤱᤒᤧᤴ ᤏᤠᤃᤧᤛᤠ᤹ᤖᤢᤀᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤠᤍᤠᤱᤒᤠᤖᤧ ᤁᤧᤜᤢᤰᤁᤥ ᤌᤠᤛᤢᤛᤡ ᤁᤧᤒᤡᤖᤧ॥

⁹ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴᤜᤠ᤹ᤖᤧ ᤂᤢᤴᤇᤡ ᤏᤡᤱᤘᤠᤴ ᤂᤢᤏᤧ᤹ ᤗᤧᤵᤔᤠᤱ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤆᤥᤰ. ᤂᤧᤱᤜᤠ᤹ ᤑᤠ᤹ᤔᤠᤛᤡᤖᤧ ᤗᤠᤃᤡ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤀᤥᤔᤧᤳᤋᤢᤛᤡᤀᤠᤱ ᤘᤠ᤹॥ ᤁᤴ ᤐᤠ᤺ᤴᤏᤥ ᤀᤠᤍᤠᤱᤒᤠᤖᤧ ᤔᤧᤴᤘᤠ᤹ᤔᤏᤠ ᤕᤠ᤺ᤶᤒᤰ ᤁᤧᤈᤥᤃᤢ॥ ᤀᤠᤸᤗᤀᤠᤱᤎᤥ ᤀᤠᤍᤠᤱᤒᤠᤖᤧ ᤌᤱ ᤆᤥ᤺ᤰᤔᤠᤀᤠᤱ ᤐᤵᤔᤠ ᤁᤧᤒᤥᤱᤒᤠ ᤐᤥᤱ᤹॥”

¹⁰ ᤁᤴ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤐᤢᤱᤗᤠᤜᤡᤶᤔᤥ ᤂᤧᤴ ᤛᤠᤰᤋᤢ ᤕᤢᤰᤂᤢᤖ ᤕᤠᤖᤡᤰ ᤀᤠᤛᤠᤴ ᤂᤧᤴ ᤂᤠᤃᤧᤀᤡᤰᤐᤧᤴᤏᤢ ᤁᤢᤕᤠ᤺ᤰᤗᤧ᤹ᤖᤧ॥ ᤂᤧᤴ ᤕᤧᤶᤔᤥ ᤀᤠᤛᤠ᤺ᤸᤗᤧ ᤁᤢᤓᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤔᤧᤳᤋᤢᤛᤡᤀᤠᤱ ᤕᤢ᤺ᤳᤋᤢᤛᤡᤖᤥ॥

ᤀᤠᤛᤠ ᤜᤠᤱᤅᤡᤸᤗᤧ ᤁᤢᤕᤢᤰᤁᤡᤴ ᤏᤢᤵ

¹¹ ᤀᤠᤛᤠ᤺ᤸᤗᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤘᤣ᤹ ᤜᤡᤴᤍᤥᤰ ᤐᤠ᤺ᤴᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤧᤶᤒᤠᤀᤣ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤐᤳ॥

¹² ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤒᤥᤱᤅᤠᤱ ᤑᤠᤱᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤗᤠᤱ ᤁᤧᤃᤡᤒᤠ ᤋᤢᤰᤔᤧᤸᤗᤧ ᤋᤖᤢ॥ ᤂᤧᤴ ᤋᤢᤰᤔᤧᤴ ᤛᤠ᤹ᤖᤡᤰ ᤛᤠᤰᤋᤧᤛᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤴ ᤁᤢᤓᤠ᤹ ᤔᤧᤏᤠ᤺ᤰᤋᤢᤴ. ᤁᤖ ᤛᤡᤍᤠ᤹ᤐᤠᤱᤍᤠ᤹ ᤁᤧᤈᤥ᤺ᤰᤐᤠᤜᤠ᤹ᤖᤰ ᤛᤢᤈᤠ ᤏᤠ᤺ᤰᤋᤢᤛᤡ॥

¹³ ᤂᤧᤒᤩᤠᤱ ᤂᤢᤏᤧ᤹ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶ ᤗᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤋᤱᤒᤣᤀᤥ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤎᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ॥

¹⁴ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤃᤡ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤆᤥᤃᤢᤀᤠᤱ ᤏᤧᤛ᤻ᤛᤧᤒᤠ ᤀᤡᤐᤢᤱᤅᤥ ᤔᤧᤏᤧᤛ᤻ᤛᤢ॥ ᤂᤧᤵᤔᤥ ᤛᤠ᤹ᤖᤡᤰ ᤜᤢᤰᤘᤠ ᤏᤢᤖᤧᤖ ᤔᤧᤓ᤺ᤴᤍᤢᤀᤠᤱ ᤔᤧᤈᤥᤃᤢᤒᤠ ᤁᤧᤖᤧᤰ ᤐᤖᤡᤰᤐᤠ ᤁᤢᤏᤠᤶ ᤁᤧᤏᤢ᤹ᤒᤠ ᤔᤠᤖᤢᤰᤜᤠ᤹ ᤀᤡᤐᤢᤱᤅᤥ ᤔᤧᤍᤱᤄᤢᤀᤠᤱ ᤕᤠᤃᤧ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤔᤡᤱᤛᤥᤀᤥ ᤗᤳᤇᤠ ᤔᤡ ᤔᤧᤍᤢᤵᤋᤢᤖᤥ॥