᥈ ᤛᤠᤵᤔᤢ᤺ᤴᤎᤢᤶ 15 - LIFOTNT

ᤀᤠᤛᤠ᤺ᤸᤗᤧ ᤋᤥ᤺ᤴᤍᤢ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹

¹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤥᤍᤣᤍᤖᤧ ᤁᤢᤛ᤻ᤛᤠ ᤀᤈᤷᤕᤠᤜᤀᤥ ᤌᤠᤛᤡᤱ ᤕᤧ॥

² ᤂᤧᤴ ᤀᤠᤛᤠ᤺ᤸᤗᤧ ᤁᤢᤍᤢᤶᤛᤧ ᤕᤧᤀᤠᤱ ᤔᤧᤳᤋᤢ. “ᤀᤠᤛᤠᤀᤣ. ᤁᤧᤖᤧᤰ ᤕᤜᤢᤍᤠᤒᤠ ᤏᤢ ᤒᤣᤏᤩᤠᤔᤡᤏ ᤔᤏᤠᤛᤣ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥ ᤀᤠᤸᤗ ᤕᤜᤘᤣ ᤍᤠᤱᤒᤧᤴᤏᤢ ᤂᤡᤏᤡ᤹ ᤁᤧᤘᤕᤡᤸᤗᤧ ᤂᤢᤏᤧ᤹ᤀᤠᤱ ᤂᤡᤏᤡ᤹ᤏᤢ ᤘᤠ᤹ᤖᤥ॥ ᤂᤢᤏᤧ᤹ ᤁᤧᤃᤥ᤺ᤳᤋᤢᤶ ᤁᤧᤜᤰᤛᤢᤶᤔᤡᤸᤗᤧ ᤂᤢᤏᤧ᤹ ᤁᤧᤄᤥᤛᤢᤶ᤹॥ ᤂᤢᤏᤧ᤹ ᤁᤧᤏᤠ᤹ᤖᤢᤶᤏᤧᤓᤃᤪ ᤂᤢᤏᤧ᤹ᤀᤠᤱ ᤂᤡᤏᤡ᤹ ᤁᤧᤏᤠ᤹ᤖᤡ᤹॥

³ ᤕᤖᤡᤰ ᤋᤱᤒᤣ ᤌᤠᤖᤡᤰᤁ ᤀᤡᤛᤪᤠᤀᤡᤗᤧᤴ ᤛᤧᤰᤂᤠᤒᤠ ᤏᤡᤱᤘᤠ᤹ᤑᤢᤔᤠᤱ ᤔᤣ᤺ᤴᤏᤣ. ᤁᤧᤜᤢ᤹ᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤣ᤺ᤴᤏᤣ ᤏᤢ ᤛᤠᤶᤕᤥᤌᤡᤶ ᤔᤣ᤺ᤴᤏᤣ ᤘᤕᤧ॥

⁴ ᤁᤖ ᤂᤢᤴᤇᤡ᤹ ᤋᤢᤰᤂᤣᤗᤠᤰᤂᤣᤀᤥ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤗᤧᤵᤔᤠᤱ ᤔᤧᤏᤢ᤺ᤰᤂᤢᤀᤠᤱ ᤔᤧᤃᤥ᤺ᤳᤋᤢ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤄᤥᤛᤢ॥

⁵ ᤂᤧᤴ ᤕᤧᤴᤜᤠ᤹ᤀᤥ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤕᤠ᤺ᤶᤒᤰᤁᤥ ᤗᤠᤱᤔᤧᤄᤣᤀᤠᤱ ᤔᤧᤍᤩᤧ ᤔᤧᤒᤣ᤺ᤸᤗᤧ ᤂᤧᤱᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰ ᤔᤧᤶᤒᤥ᤺ᤰᤂᤧᤴ॥ ᤁᤧᤖᤧᤰ ᤗᤠᤈᤣ᤹ᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤔᤧᤴᤍᤢᤶᤔᤠ ᤋᤢᤰᤂᤣ ᤗᤠᤰᤂᤣ ᤔᤧᤍᤢᤔᤢ॥

⁶ ᤌᤡᤰ ᤗᤠᤈᤣ᤺ᤸᤗᤧ ᤘᤣ᤹ ᤗᤠᤈᤣᤴ ᤕᤢ᤺ᤳᤋᤢᤖ ᤘᤕᤧ. ᤌᤡᤰ ᤕᤧᤰᤕᤰᤁᤡᤸᤗᤧ ᤘᤣ᤹ ᤕᤧᤰᤕᤰᤁᤡᤴ ᤕᤢ᤺ᤳᤋᤢᤖ ᤘᤕᤧ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤐᤖᤡᤰᤐᤠ ᤋᤢᤰᤂᤣᤀᤥ ᤌᤠᤛᤢᤛᤡᤀᤠᤱ ᤂᤢᤶᤛᤢᤛᤡᤀᤠᤱ ᤘᤕᤧ॥

⁷ ᤁᤖ ᤀᤠᤸᤗ ᤂᤡᤏᤡ᤹ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤛᤠᤱ ᤔᤧᤒᤢᤃᤧᤶᤔᤡᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤕᤠ᤺ᤰᤒᤰᤁᤡᤸᤗᤧ ᤁᤢᤗᤧᤰᤘᤠ ᤁᤧᤄᤥᤛᤢᤶ᤹॥”

⁸ ᤀᤠᤸᤗ ᤁᤴ ᤐᤠ᤺ᤴᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤥᤍᤣᤍᤖᤧ ᤁᤢᤛ᤻ᤛᤠ ᤀᤈᤷᤕᤠᤜᤖᤧ ᤐᤠ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤀᤠᤛᤠ᤺ᤸᤗᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤜᤠᤱᤜᤠᤱ ᤗ᤹ᤖᤧ॥ ᤂᤢᤏᤧ᤹ ᤁᤧᤖᤧᤰ ᤕᤜᤢᤍᤠ ᤏᤢ ᤒᤣᤏᤩᤠᤔᤡᤏ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤛᤡᤰᤁᤧᤗᤧ᤺ᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤜᤢᤰᤁᤠᤵ ᤆᤥᤃᤢᤒᤠ ᤀᤣᤑᤪᤠᤀᤡᤔᤒᤠ ᤁᤥ᤺ᤰᤔᤠ ᤗᤠᤈᤣ᤹ᤀᤥᤒᤠ ᤕᤧᤰᤕᤰᤜᤠ᤹ᤗᤠᤶ ᤛᤡᤰᤁᤧᤗᤧ᤺ᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤂᤰᤐᤧᤳ ᤂᤧᤳᤋᤢᤍᤣᤛᤢᤛᤡ॥ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤀᤠ᤺ᤶᤓᤥ᤹ ᤋᤃᤠᤱ ᤁᤧᤕᤢᤱᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴᤏᤠᤱ ᤆᤠ᤺ᤱᤘᤠ ᤔᤧᤳᤋᤢ॥

⁹ ᤂᤧᤴ ᤀᤣᤃᤠᤱ ᤁᤧᤖᤧᤰ ᤕᤜᤢᤍᤠ. ᤒᤣᤏᤩᤠᤔᤡᤏ ᤜᤧᤰᤁᤩᤠᤱ ᤀᤣᤑᤪᤠᤀᤡᤔ ᤔᤏᤛ᤻ᤛᤣ ᤏᤢ ᤛᤡᤔᤡᤕᤥᤏᤗᤠᤶ ᤁᤧᤍᤠᤒᤠ ᤔᤏᤠᤜᤠ᤹ ᤂᤢᤴᤇᤡ᤹ᤏᤢ ᤕᤢᤱᤛᤧ ᤛᤢᤵᤛᤢᤛᤡ॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤘᤕᤧᤒᤠ ᤔᤧᤏᤡᤛᤢᤀᤠᤱ ᤀᤡᤛᤪᤠᤀᤡᤗᤗᤠᤶ ᤕᤖᤡᤰ ᤔᤏᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤔᤧᤍᤩᤧᤀᤠᤱ ᤔᤧᤘᤕᤧ॥

¹⁰ ᤀᤠᤛᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤕᤧᤶ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤋᤱᤒᤣᤒᤠ ᤛᤢᤶᤛᤡᤃᤣᤰᤐᤠ ᤗᤠᤀᤥ ᤂᤧᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤈᤢᤵᤛᤧ॥

¹¹ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ᤖᤧ ᤔᤧᤏᤠᤵᤋᤢ ᤔᤧᤍᤠᤖᤢᤛᤡᤒᤠ ᤛᤠᤔᤠ ᤆᤡᤃᤰᤘᤠᤜᤠ᤹ᤗᤠᤶ ᤁᤡᤵ ᤏᤢᤛᤡ ᤛᤧᤃᤶᤒᤠ ᤐᤡᤳᤜᤠ᤹ ᤏᤢ ᤜᤧᤴᤇᤡᤱ ᤏᤢᤛᤡ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡ॥

¹² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤏᤧᤖᤧᤳ ᤏᤢ ᤛᤡᤰᤗᤢᤱᤔᤠᤖᤧ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤥ᤺ᤵᤔᤠᤖᤧ ᤗᤠᤃᤡ ᤔᤠᤱᤜᤢᤵ ᤔᤧᤈᤥᤃᤢ॥

¹³ ᤜᤶᤓᤩᤠᤱ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤥ᤺ᤵᤔᤏᤠ ᤔᤧᤴᤜᤱᤔᤏᤠᤒᤠ ᤁᤧᤖᤧᤰ ᤆᤢᤰᤐᤠ ᤕᤶᤒᤠ. ᤔᤧᤴᤇᤢᤔᤠ ᤏᤢ ᤕᤧᤶᤒᤡᤳᤇᤠᤜᤠ᤹ ᤛᤧᤵᤔᤠᤛᤡ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤏᤡ᤺ᤴᤎᤥ ᤔᤧᤈᤥᤃᤢ॥

¹⁴ ᤕᤶᤒᤠ ᤀᤡᤰᤗᤠᤀᤥ ᤔᤧᤓᤡ᤺ᤰᤋᤧᤀᤠᤱ ᤛᤠᤍᤠᤱᤜᤠ᤹ ᤏᤢ ᤌᤢᤳᤌᤢᤖᤡ᤺ᤵᤐᤠᤜᤠ᤹ ᤔᤧᤔᤢᤰᤂᤢᤖ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤔᤠᤱᤜᤢᤵ ᤔᤧᤈᤥᤃᤢᤀᤠᤱ ᤔᤠᤱᤔᤧᤜᤧᤰᤛᤡᤱ॥

¹⁵ ᤁᤴ ᤔᤠᤱᤜᤧᤰᤁᤡᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤕᤜᤢᤍᤠᤒᤠᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤕᤜᤘᤣ ᤍᤠᤱᤒᤧᤴ ᤔᤧᤃᤥ᤺ᤳᤋᤢᤀᤠᤱ ᤘᤕᤧ॥ ᤂᤧᤒᤩᤠᤱ ᤂᤢᤏᤧ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤄᤥᤀᤠᤖ ᤑᤠ᤹ᤀᤠᤱ ᤀᤠᤒᤠᤅᤣ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤡᤱ॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤐᤡᤛᤠᤱᤗᤠᤶ ᤁᤶᤒᤪᤠᤱ ᤔᤧᤳᤋᤢᤛᤡᤀᤠᤱ ᤂᤧᤱᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰ ᤔᤧᤘᤕᤧ॥

¹⁶ ᤀᤠᤛᤠ ᤜᤠᤱᤅᤡᤸᤗᤧ ᤁᤢᤕᤢᤔᤠ ᤔᤠᤁᤠᤴᤏᤠᤱ ᤜᤠᤱᤔᤠ ᤔᤠ ᤋᤠ᤺ᤰᤑᤠᤀᤥᤗᤠᤶ ᤗ᤺ᤳᤋᤢᤍᤣᤛᤢ. ᤌᤣᤀᤠᤱᤓᤧᤸᤗᤧ ᤀᤛᤣᤖᤠ ᤔᤠᤱᤅᤡᤸᤗᤧᤴ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤴ ᤂᤧᤸᤗᤧ ᤕᤢᤰᤂᤢᤀᤠᤱ ᤕᤢᤅᤧ॥ ᤀᤠᤛᤠ᤺ᤸᤗᤧ ᤂᤧᤴ ᤏᤠᤘᤠᤀᤡᤳᤗᤠᤴ ᤆᤩᤧᤵᤋᤢᤀᤠᤱ ᤛᤥ᤺ᤴᤍᤢ. ᤜᤧᤰᤁᤩᤠᤱ ᤂᤧᤴ ᤁᤢᤶᤈᤡᤰᤔᤠ ᤆᤥᤃᤢᤀᤠᤱ ᤁᤡᤍᤪᤥᤏ ᤜ᤺ᤱᤃᤢᤀᤥ ᤔᤡᤎᤡᤰᤂᤢᤍᤣᤛᤢ॥

¹⁷ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢᤜᤠ᤹ᤀᤥ ᤁᤧᤕᤢᤱᤒᤠ ᤔᤠᤱᤎᤠ᤺ᤴᤜᤠ᤹ ᤀᤡᤛᤪᤠᤀᤡᤗᤀᤥ ᤏᤧᤔᤠ ᤑᤠ᤺ᤰᤋᤢᤛᤠᤱ ᤀᤠᤛᤠᤴ ᤂᤢᤏᤧ᤹ ᤁᤢᤜᤡᤱᤜᤡᤱᤅᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤏᤛᤠ᤺ᤴᤛᤠᤒᤠ ᤐᤥ᤺ᤰᤂᤧᤀᤠᤱ ᤘᤕᤧ॥

¹⁸ ᤂᤢᤏᤧ᤹ ᤁᤢᤶᤒᤠ ᤏᤢ ᤂᤢᤏᤧ᤹ ᤀᤠᤵᤑᤣᤰ ᤋᤥ᤺ᤴᤍᤢᤒᤠ ᤛᤠᤶᤔᤩᤠᤱ. ᤕᤢᤵᤐᤠ ᤏᤢ ᤛᤣᤛᤣ ᤂᤵᤐᤩᤠ ᤛᤠᤔᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤋᤠᤖᤢᤛᤡ॥

¹⁹ ᤀᤠᤛᤠ᤺ᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤛᤢᤶᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤋᤱᤒᤣ ᤌᤠᤖᤡᤰ ᤌᤧᤔᤠᤀᤠᤱ ᤋᤧᤴᤎᤱ ᤔᤧᤒᤥ᤺ᤰᤛᤧᤴᤗᤥ॥