᥈ ᤛᤠᤵᤔᤢ᤺ᤴᤎᤢᤶ 14 - LIFOTNT

¹ ᤀᤒᤡᤕᤠᤴ ᤂᤢᤏᤧ᤹ ᤁᤢᤶᤒᤠ ᤁᤢᤴᤎᤧᤒᤠᤛᤡᤏᤢ ᤛᤥᤖᤡᤰ ᤋᤱᤛᤡᤱᤛᤧ ᤐᤣ ᤜᤧᤰᤁᤩᤠᤱ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤠᤛᤠᤴ ᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱ॥ ᤂᤢᤏᤧ᤹ ᤁᤢᤕᤧᤶᤔᤥ ᤋᤱᤒᤣ ᤌᤡᤒᤥᤱ ᤌᤠᤖᤡᤰ ᤕᤜᤢᤍᤠ ᤗᤠᤈᤣ᤹ᤀᤥ ᤛᤏᤠᤖᤢᤱ ᤐᤥ᤺ᤰᤂᤧᤖᤥ॥

ᤀᤠᤛᤠᤴ ᤕᤜᤢᤍᤠᤒᤠ ᤜᤠᤱ ᤐᤥ᤺ᤰᤂᤧ

² ᤀᤠᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤥ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤆᤥᤃᤧ ᤂᤢᤏᤧ᤹ ᤜᤠᤒᤠ ᤂᤧᤴᤏᤣ ᤆᤥᤃᤢ॥

³ ᤂᤢᤏᤧ᤹ ᤘᤣ᤹ ᤗᤠᤈᤣ᤹ᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤏᤢ ᤁᤥ᤺ᤰᤔᤠ ᤑᤠᤱᤈᤱ ᤏᤢ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ ᤀᤡ᤺ᤰᤂᤢᤍᤣᤛᤢ. ᤛᤣᤛᤣ ᤗᤢᤱᤜᤠ᤹ ᤗᤢ᤺ᤴᤍᤢᤍᤣᤛᤢ. ᤜᤧᤰᤁᤩᤠᤱ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤛᤥ᤺ᤴᤍᤢᤍᤣᤛᤢ॥

⁴ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤥ᤺ᤵᤔᤠ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤡᤶᤜᤠ᤹ ᤏᤢ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤕᤜᤢᤍᤠᤒᤠ ᤔᤏᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ॥

⁵ ᤂᤢᤏᤧ᤹ ᤕᤜᤢᤍᤠᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠ ᤔᤠᤱᤎᤠ᤺ᤴᤜᤠ᤹ ᤏᤢ ᤛᤢᤰᤐᤠ ᤜᤠ᤺ᤶᤔᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ᤀᤠᤱ ᤂᤧᤳᤋᤢᤍᤣᤛᤢ॥ ᤂᤢᤏᤧ᤹ ᤁᤢᤜᤠᤱᤕᤢᤰ ᤕᤧᤶᤔᤥ ᤗᤠᤈᤣ᤹ᤀᤥ ᤛᤏᤠᤖᤢᤱ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧ॥

⁶ ᤗᤠᤈᤣ᤹ᤀᤥ ᤛᤏᤠᤖᤢᤱ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤕᤜᤢᤍᤠᤀᤥ ᤜᤠᤱᤕᤰ ᤁᤧᤏᤧᤒᤠ ᤕᤧᤰᤕᤰᤜᤠ᤹ᤀᤠᤱ ᤀᤠᤎᤣ᤺ᤰᤌᤣ᤺ᤰᤐᤠ ᤆᤥᤃᤢ॥ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤀᤠᤳᤋᤡᤴ ᤌᤱᤅᤠᤱ ᤌᤰᤔᤠ ᤔᤧᤒᤥ᤺ᤰᤂᤧᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤏᤠ᤺ᤶᤛᤡᤱᤔᤠ ᤐᤡᤖᤢᤀᤠᤱ ᤘᤕᤧ॥

⁷ ᤂᤢᤏᤧ᤹ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤕᤧᤰᤕᤰᤜᤠ᤹ ᤀᤠᤏᤡ᤹ ᤛᤧᤳᤋᤢᤶ ᤆᤥᤃᤢᤶ॥ ᤂᤧᤱᤜᤠ᤹ ᤁᤒᤪᤡᤱ ᤗᤢᤱᤎᤠᤰ ᤛᤧᤳᤋᤢᤶ. ᤆᤱᤜᤡᤶᤜᤠ᤹ ᤆᤥᤃᤢᤶ. ᤜᤧᤰᤁᤩᤠᤱ ᤗᤠᤶᤎᤣ᤺ᤳᤜᤠ᤹ᤀᤥ ᤁᤢᤀᤧᤵᤔᤠᤜᤠ᤹ ᤕᤠᤰᤋᤢᤶ॥ ᤗᤠᤈᤣᤴ ᤀᤠᤸᤗᤛᤠᤱ ᤀᤠᤏᤡ᤹ᤀᤡᤴᤏᤣ ᤐᤥ᤺ᤰᤂᤧᤀᤠᤱ ᤏᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤃᤥ᤺ᤳᤋᤢᤶᤔᤠᤱ ᤘᤠ᤹॥ ᤂᤢᤏᤧ᤹ ᤀᤠᤛᤣᤃᤢᤶ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤖᤧᤰ ᤐᤡᤛᤠᤱ ᤁᤶᤒᤪᤠᤱ ᤀᤠᤔᤧᤳᤋᤧᤀᤠᤱ ᤘᤠ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕᤰᤜᤠ᤹ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ ᤔᤧᤏᤢᤖᤧ ᤔᤧᤍᤠᤛᤧ॥

⁸ ᤕᤜᤢᤍᤠᤗᤠᤶ ᤕᤶᤒᤠ ᤂᤥᤜᤠ᤹ ᤏᤢ ᤗᤠ᤺ᤰᤜᤠ᤹ᤖᤧ ᤁᤠᤵᤋᤢᤛᤡᤒᤠ ᥉.᥆᥆.᥆᥆᥆ ᤔᤏᤠᤜᤠ᤹ ᤜᤧᤰᤁᤩᤠᤱ ᤒᤣᤏᤩᤠᤔᤡᤏᤗᤠᤶ ᥈.᥎᥆.᥆᥆᥆ ᤆᤢᤰᤐᤠ ᤂᤥᤜᤠ᤹ ᤁᤧᤒᤱᤒᤠ ᤏᤢ ᤋᤥᤱ ᤗᤡ ᤁᤧᤀᤠᤵᤐᤠ ᤌᤰᤛᤢᤒᤠᤜᤠ᤹ ᤀᤠᤛᤠ᤺ᤸᤗᤧ ᤁᤳᤋᤢᤛᤡ॥ ᤂᤧᤱᤜᤠ᤹ ᤁᤧᤖᤧᤰ ᤔᤢᤰᤁᤧᤃᤢᤒᤠ ᤌᤱᤃᤧᤈᤥ᤺ᤰᤐᤠ ᤔᤧᤘᤕᤧ॥

⁹ ᤁᤢᤛᤡ ᤈᤣᤖᤜᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᥇᥆.᥆᥆.᥆᥆᥆ ᤔᤏᤠᤜᤠ᤹ᤖᤧᤴ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠ ᤛᤢᤶ ᤏᤢ ᥉᥆᥆ ᤀᤴᤗᤠᤎᤠᤜᤠ᤹ ᤑᤧᤳᤋᤢᤛᤡᤀᤠᤱ ᤔᤠᤖᤣᤛᤠ ᤌᤠᤖᤡᤰᤁᤣ ᤑᤧᤖᤧ॥

¹⁰ ᤂᤢᤏᤧ᤹ ᤑᤧᤖᤧᤸᤗᤧ ᤂᤢᤏᤧ᤹ᤏᤢ ᤌᤰᤔᤠᤖᤧ ᤗᤠᤃᤡ ᤀᤠᤛᤠᤴ ᤗ᤺ᤴᤍᤧᤓᤧᤖᤧ. ᤜᤧᤰᤁᤩᤠᤱ ᤔᤠᤖᤣᤛᤠ ᤁᤢᤒᤣᤛᤠᤱᤒᤠ ᤛᤐᤋᤠ ᤏᤧᤏᤧᤒᤠᤍᤧᤴᤏᤥ ᤂᤧᤱᤜᤠ᤹ ᤌᤰᤔᤠᤖᤧ ᤗᤠᤃᤡ ᤏᤠ ᤏᤢ ᤁᤳᤏᤠ ᤔᤧᤛᤥ᤺ᤰᤛᤡᤱ॥

¹¹ ᤂᤧᤒᤩᤠᤱ ᤀᤠᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤂᤢᤏᤧ᤹ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤀᤣ. ᤁᤧᤎᤢᤶᤒᤧᤴᤏᤢ ᤌᤰᤔᤠᤖᤧ ᤗᤠᤃᤡ ᤔᤧᤴᤎᤢᤶᤔᤏᤠᤒᤠ ᤀᤠᤰᤋᤱᤒᤠ ᤔᤏᤠᤜᤠ᤹ᤛᤠᤱ ᤁᤧᤓᤠ᤹ᤒᤠᤃ ᤀᤠᤍᤠᤱᤒᤠ ᤜᤧᤰᤋᤱᤒᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵ॥ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤃᤣ ᤀᤠᤓᤠ᤹ᤖᤧ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤀᤠᤍᤠᤱᤒᤠᤖᤧ ᤁᤧᤗᤠᤶ ᤀᤥᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧ᤹॥ ᤀᤠᤏᤡᤃᤣ ᤀᤠᤍᤠᤱᤒᤠᤖᤧᤀᤣ ᤁᤧᤔᤡᤱᤅᤥ ᤁᤴ ᤕᤖᤡᤰ ᤌᤰᤛᤢᤒᤠᤜᤠ᤹ᤏᤢ ᤌᤰᤛᤧ ᤑᤧᤖᤡᤃᤧᤀᤠᤱ ᤘᤕᤡᤃᤧ॥ ᤕᤜᤘᤣ ᤍᤠᤱᤒᤠᤀᤣ. ᤀᤠᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤁᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴ ᤔᤏᤠ᤺ᤴᤏᤠᤱ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤔᤧᤕᤧᤵᤏᤧᤴᤗᤖᤥ॥”

¹² ᤕᤜᤘᤣ ᤍᤠᤱᤒᤧᤸᤗᤧ ᤀᤠᤛᤠᤴ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ ᤁᤢᤛᤡᤜᤠ᤹ ᤁᤧᤏᤠ᤺ᤶᤒᤠ ᤆᤥᤃᤢᤛᤡ ᤜᤧᤰᤁᤩᤠᤱ ᤁᤢᤛᤡᤜᤠ᤹ ᤔᤧᤄᤧᤳᤇᤡᤱ ᤔᤧᤄᤧᤖᤧ॥

¹³ ᤀᤠᤛᤠᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤧᤱᤜᤠ᤹ ᤃᤖᤠᤖ ᤌᤠᤖᤡᤰ ᤔᤧᤏᤠ᤺ᤳᤋᤢᤛᤡ॥ ᤕᤜᤘᤣ ᤍᤠᤱᤒᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤁᤢᤛᤡᤜᤠ᤹ ᤜᤠᤖᤡᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤖᤡᤰ ᤔᤏᤠᤜᤠ᤹ ᤔᤧᤛᤩᤧ॥ ᤂᤶᤓᤩᤠᤱ ᤕᤜᤢᤍᤠᤒᤠᤜᤠ᤹ᤖᤧ ᤔᤧᤏᤠᤵᤋᤢᤛᤡᤒᤠ ᤕᤖᤡᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤧᤍᤣ᤹ᤖᤢ

¹⁴ ᤂᤧᤱᤜᤠ᤹ᤖᤧ ᤃᤖᤠᤖᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤂᤰᤐᤧᤳ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤁᤡᤔᤠ ᤕᤱᤔᤠᤀᤥ ᤌᤠᤛᤢᤛᤡᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤂᤧᤴ ᤕᤧᤰᤕᤰᤜᤠ᤹ᤀᤥ ᤔᤧᤏᤠᤵᤋᤢᤛᤡᤀᤠᤱ ᤂᤧᤱᤜᤠ᤹ ᤁᤧᤖᤧᤰᤗᤠᤶᤒᤠ ᤁᤢᤔᤧᤴ ᤁᤧᤄᤡ᤺ᤰᤐᤠ ᤁᤧᤄᤡ᤺ᤰᤐᤠ ᤛᤠᤔᤠᤜᤠ᤹ ᤔᤧᤄᤥᤛᤢ॥

¹⁵ ᤂᤧᤱᤜᤠ᤹ᤖᤧ ᤕᤖᤡᤰ ᤔᤧᤸᤗᤢᤰᤁᤶᤒᤠᤜᤠ᤹ᤀᤠᤱ ᤔᤧᤓᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤖᤡᤰ ᤔᤧᤸᤗᤢᤰᤜᤠ᤹. ᤔᤧ᤺ᤴᤍᤠᤜᤠ᤹ ᤏᤢ ᤀᤢᤔᤣᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤕᤖᤢᤛᤗᤧᤔ ᤔᤧᤏᤢ᤺ᤰᤂᤧ ᤔᤧᤓᤧᤖᤧᤖᤥ॥