᥈ ᤛᤠᤵᤔᤢ᤺ᤴᤎᤢᤶ 12 - LIFOTNT

ᤔᤡᤛᤪᤡᤜᤠ᤹ᤖᤧ ᤕᤜᤢᤍᤡᤜᤠ᤹ ᤔᤧᤓᤳᤋᤢᤛᤡ᤹

¹ ᤖᤜᤒᤠᤔᤖᤧ ᤁᤢᤜᤠᤱᤈᤢᤶᤔᤡᤴ ᤌᤎᤵ ᤔᤧᤸᤗ᤹ᤔᤏᤠᤒᤠ ᤐᤥ᤺ᤰᤂᤧ ᤜᤧᤰᤁᤩᤠᤱ ᤂᤢᤏᤧ᤹ ᤔᤢᤰᤁᤧᤃᤢᤒᤠ ᤐᤥ᤺ᤰᤂᤧᤀᤠᤱ ᤀᤣᤃᤠᤱ ᤂᤢᤏᤧ᤹ᤏᤢ ᤂᤢᤏᤧ᤹ ᤁᤢᤕᤢᤰᤁᤥ ᤁᤧᤘᤠ᤹ᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤏᤠ᤹ᤖᤢ॥

² ᤖᤜᤒᤠᤔᤖᤧ ᤕᤢᤰ ᤆᤥᤃᤢᤒᤠ ᤅᤠᤛᤡᤃᤣᤰᤐᤠ ᤋᤱᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ ᤏᤛᤠᤴ ᤁᤧᤗᤧᤱᤒᤠ ᤔᤧᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤔᤡᤛᤪᤒᤠ ᤛᤡᤛᤁ ᤜᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤌᤱᤅᤥ ᤑᤳᤋᤢ॥

³ ᤔᤡᤛᤪ ᤗᤠᤈᤣ᤹ᤒᤠ ᤜᤠᤱ ᤛᤡᤛᤰᤁᤧᤸᤗᤧ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤡᤵ ᤀᤴᤗᤠᤎᤠᤜᤠ᤹ ᤏᤢ ᤋᤢᤰᤐᤥᤱ ᤜᤧᤴᤇᤡᤱ ᤀᤴᤃᤧᤗᤥᤱᤒᤠᤜᤠ᤹ ᤌᤠᤰᤋᤢᤛᤡ॥ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤡᤛᤪᤗᤠᤶ ᤁᤧᤎᤠᤱᤒᤠ ᤗᤡᤒᤡᤕᤠᤒᤠ. ᤛᤢᤰᤁᤡᤕᤠ ᤏᤢ ᤁᤢᤛᤡᤜᤠ᤹ ᤔᤧᤘᤕᤧ॥

⁴ ᤕᤜᤢᤍᤠᤀᤥ ᤁᤧᤏᤧᤒᤠ ᤁᤶᤒᤪᤠᤱᤒᤠ ᤕᤧᤰᤕᤰᤜᤠ᤹ ᤏᤠ᤺ᤴᤍᤢᤛᤡᤖ ᤂᤢᤏᤧ᤹ ᤕᤖᤢᤛᤗᤧᤔ ᤌᤧᤶᤒᤠ ᤁᤧᤖᤧ ᤌᤠᤅᤧ॥

⁵ ᤂᤧᤒᤩᤠᤱ ᤖᤜᤒᤠᤔ ᤏᤢ ᤛᤡᤛᤁᤖᤧ ᤂᤢᤴᤇᤡ᤹ ᤋᤧᤴᤎᤱᤗᤠᤶ ᤜᤡᤱᤔᤠᤖᤧ ᤗᤠᤃᤡ ᤕᤖᤢᤛᤗᤧ᤺ᤶᤔᤥ ᤁᤧᤈᤢᤶᤒᤠ ᤕᤜᤢᤍᤠᤒᤠ ᤌᤠ᤺ᤰᤗᤠᤶᤗᤥᤒᤠᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤔᤠᤕᤠᤜ᤺ᤸᤗᤧ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤂᤡᤏᤡ᤹ ᤀᤠᤱᤃᤠ᤹ ᤀᤠᤃ᤻ᤏᤠ᤹ᤖᤧᤀᤠᤱ ᤘᤠ᤹. ᤁᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤛᤡᤛᤁᤖᤧ ᤁᤢᤜᤢᤰᤁᤥ ᤂᤡᤏᤡ᤹ ᤜᤢᤰᤛᤢ᤺ᤵᤏᤡᤱ᤹॥’”

⁶ ᤂᤶᤓᤩᤠᤱ ᤌᤠ᤺ᤰᤗᤠᤶᤗᤥᤒᤠᤜᤠ᤹ ᤏᤢ ᤜᤠᤱᤅᤡᤴ ᤏ᤺ᤶᤏᤠ᤺ᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤢ᤹॥”

⁷ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤏ᤺ᤶᤏ᤺ᤶᤒᤠ ᤔᤧᤒᤥ᤺ᤰᤂᤧᤒᤠ ᤏᤡᤛᤢᤛᤡᤀᤠᤱ ᤂᤢᤏᤧ᤹ᤗᤠᤶ ᤁᤴ ᤀᤡᤱᤄᤱᤅᤡᤴ ᤛᤔᤠᤕᤠᤜᤀᤥ ᤁᤧᤖᤧ—“ᤂᤧᤱᤜᤠ᤹ ᤀᤠᤵᤑᤣᤰ ᤏ᤺ᤶᤏ᤺ᤶᤒᤠ ᤔᤧᤈᤥ᤺ᤰᤛᤡᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤔᤧᤰᤂᤢᤱᤛᤡᤱᤅᤡᤴ. ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ ᤂᤧᤳᤇᤡᤱᤔᤠ ᤑᤠ᤺ᤰᤋᤢᤱᤛᤡᤱ᤹॥ ᤛᤡᤛᤣᤰᤁᤧᤴ ᤗᤠᤶᤒᤠ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤕᤖᤢᤛᤗᤧ᤺ᤶᤔᤥ ᤔᤧᤎᤠᤀᤠᤴ॥

⁸ ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤢᤰᤁᤥ ᤔᤧᤎᤠᤀᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤵᤔᤠ ᤏᤢ ᤘᤣ᤹ ᤗᤠᤈᤣ᤹ᤒᤠ ᤜᤠᤱᤜᤠ᤹ ᤛᤧᤘᤠ ᤔᤧᤵᤔᤠᤛᤡᤀᤥ ᤌᤧᤔᤠ ᤐᤠ᤺ᤴᤏᤡᤴ ᤘᤣ᤹ ᤐᤖᤡᤰᤐᤠ ᤆᤥᤰ ᤂᤧᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥”

⁹ ᤔᤡᤛᤪ ᤗᤠᤈᤣ᤹ᤒᤠ ᤛᤡᤛᤁ ᤜᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤌᤱᤅᤥ ᤑᤳᤋᤢᤀᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤏᤢ ᤜᤠᤱᤜᤡᤶᤔᤥᤒᤠ ᤌᤠ᤺ᤱᤜᤠ᤹ᤀᤥᤒᤠ ᤀᤡᤔᤧᤸᤗᤢᤱᤒᤠ ᤛᤠᤔᤠᤜᤠ᤹ ᤂᤰᤐᤧᤳ ᤏᤠᤵᤋᤢᤛᤡ. ᤜᤧᤰᤁᤩᤠᤱ ᤛᤥᤗᤥᤔᤏᤖᤧ ᤆᤥᤃᤢᤒᤠ ᤛᤠᤶᤔᤩᤠᤱ ᤂᤥᤜᤠ᤹ᤀᤠᤱ ᤂᤢᤏᤧ᤹ ᤜᤢᤰᤁᤠᤵ ᤆᤥᤃᤢ॥

¹⁰ ᤁᤸᤗᤧᤆᤥᤃᤢᤸᤗᤧ ᤖᤜᤒᤠᤔ ᤜᤠᤱᤅᤡᤸᤗᤧ ᤂᤧᤴ ᤛᤠᤶᤔᤩᤠᤱ ᤂᤥᤜᤠ᤹ᤖᤧ ᤁᤢᤗᤧᤰᤘᤠᤀᤥ ᤁᤠᤛᤠ ᤂᤥᤜᤠ᤹ ᤆᤥᤃᤢ ᤜᤧᤰᤁᤩᤠᤱ ᤜᤠᤱᤜᤡᤶᤔᤥ ᤗᤠ᤺ᤵᤔᤠ ᤗᤠᤶᤎᤣᤳ ᤁᤶᤒᤪᤠᤱ ᤁᤧᤔᤧᤵᤐᤠ ᤁᤶᤒᤪᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤐᤧᤴᤏᤥ ᤐᤡᤖᤢᤛᤡ॥

¹¹ ᤀᤠᤓᤧᤸᤗᤧᤛᤠᤱ ᤜᤠᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤐᤣ᤺ᤸᤗᤧ ᤁᤶᤒᤪᤠᤱᤒᤠᤜᤠ᤹ᤖᤧ ᤂᤧᤴ ᤂᤥᤜᤠ᤹ ᤔᤧᤒᤰᤂᤢᤀᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤔᤧᤒᤣ॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤁᤶᤒᤪᤠᤱᤒᤠ ᤕᤢᤱᤔᤠ ᤕᤠᤰᤑᤠᤱᤅᤥ ᤂᤧᤱᤜᤠ᤹ ᤕᤠᤶᤔᤥ ᤔᤧᤏᤧᤛ᤻ᤛᤢ॥

¹² ᤖᤜᤒᤠᤔᤧᤴ ᤂᤢᤏᤧ᤹ ᤀᤠᤵᤑᤣᤰ ᤏ᤺ᤶᤏ᤺ᤶᤒᤠ ᤆᤥ᤺ᤰᤛᤡᤱᤒᤧᤸᤗᤧ ᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴᤏᤡᤴ ᤂᤢᤏᤧ᤹ᤗᤠᤶ ᤀᤡ᤺ᤱᤛᤡᤱ. ᤜᤧᤰᤁᤩᤠᤱ ᤂᤢᤏᤧ᤹ ᤂᤠᤵᤐᤢᤌᤩ᤺ᤱ ᤔᤧᤔᤧᤃᤧᤴ॥ ᤜᤧᤰᤁᤩᤠᤱ ᤕᤜᤢᤍᤠᤀᤥ ᤏᤢ᤹ᤔᤠᤍᤠᤔᤠᤀᤠᤱ ᤐᤥ᤺ᤰᤂᤧᤀᤠᤱ ᤐᤳᤇᤧᤖᤥ॥

ᤖᤜᤒᤠᤔᤖᤧ ᤁᤢᤕᤢᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠᤱᤒᤛᤠ ᤐᤥᤎᤰ

¹³ ᤖᤜᤒᤠᤔ ᤜᤠᤱᤅᤡᤴ ᤕᤖᤢᤛᤗᤧ᤺ᤶᤔᤥ ᤕᤢᤱᤛᤡᤱᤅᤠᤱ ᤆᤰᤔᤧᤸᤗ᤹ᤀᤣ ᤂᤢᤏᤧ᤹ ᤔᤢᤰᤛᤠᤶᤛᤠᤒᤠ ᤐᤥ᤺ᤰᤂᤧᤖ ᤐᤣ॥ ᤂᤢᤏᤧ᤹ ᤜᤠᤱᤕᤢᤰᤏᤠᤀᤥ ᤕᤢᤱᤛᤡᤱᤅᤡᤸᤗᤧ ᤗᤡᤒᤥᤱᤅᤠᤱ ᤌᤡᤰ ᤋᤱᤒᤣ ᤕᤥᤖᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤌᤠ᤺ᤰᤜᤠ᤹ᤀᤥᤗᤠᤶ ᤂᤢᤏᤧ᤹ ᤁᤢᤔᤡᤱ ᤕᤢᤱᤔᤠᤖᤧ ᤗᤠᤃᤡ ᤛᤣᤃᤢᤒᤠ ᤕᤧᤰᤕᤰ ᤕᤖᤢᤛᤗᤧ᤺ᤶᤔᤥ ᤖᤜᤒᤠᤔᤖᤧ ᤌᤡᤒᤥᤱᤅᤠᤱ ᤏᤢᤛᤡ ᤋᤱᤒᤣ ᤜᤠᤱᤕᤢᤰ ᤆᤥᤃᤢ॥ ᤂᤢᤏᤧ᤹ ᤁᤢᤶᤔᤠᤖᤧ ᤁᤢᤔᤡᤱ ᤏᤠᤔᤠ ᤘᤕᤧ. ᤂᤢᤏᤧ᤹ ᤀᤶᤔᤥᤏ ᤁᤧᤕᤢᤱᤔᤠ ᤘᤕᤧ॥

¹⁴ ᤖᤜᤒᤠᤔᤖᤧ ᤀᤠᤳᤋᤡᤴ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤃᤧ ᤜᤠᤒᤠ ᤂᤧᤴᤏᤣ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤗᤥᤔᤠ ᤗᤠᤶᤔᤡᤴ ᤁᤥ᤺ᤵᤔᤠ ᤋᤠᤶᤛᤡᤱ ᤔᤧᤈᤥᤃᤢᤴ॥

¹⁵ ᤖᤜᤒᤠᤔᤖᤧ ᤁᤢᤜᤠᤱᤕᤢᤰ ᤕᤧᤶᤔᤥᤒᤠ ᤜᤡᤴᤍᤥᤰᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰ ᤔᤡᤱᤛᤪᤠ ᤁᤢᤀᤡᤛᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤔᤠᤕᤠᤜ ᤏᤢ ᤌᤢᤶᤕᤠ ᤁᤧᤀᤡᤒᤠ ᤀᤡᤍ᤻ᤍᤥᤖᤧ ᤂᤢᤴᤇᤡ᤹ ᤛᤠᤵᤔᤢ᤺ᤴᤎᤢᤶ ᤛᤠᤵᤐᤴᤏᤥ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤏᤠᤱᤒᤡ᥅ ᤖᤜᤒᤠᤔ ᤏᤢ ᤕᤠᤖᤥᤒᤠᤔᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤓᤧᤸᤗᤧᤛᤠᤱ ᤆᤰᤔᤧᤸᤗ᤹ᤀᤣ ᤌᤱ ᤐᤥ᤺ᤰᤂᤧᤀᤠᤱ ᤐᤳᤇᤧ॥

¹⁶ ᤖᤜᤒᤠᤔᤧᤴ ᤂᤢᤏᤧ᤹ ᤁᤢᤛᤢᤎᤧᤒᤠ ᤁᤢᤍᤠᤰᤌᤧᤒᤠᤜᤠ᤹ᤏᤢ ᤋᤱᤛᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤕᤧᤰᤕᤰᤁᤥ ᤔᤧᤈᤡᤰᤂᤢ॥ ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤛ᤻ᤛᤠ ᤀᤒᤡᤕᤠᤴ ᤜᤠᤱ ᤐᤠ᤺ᤰᤂᤧᤖᤥ॥