᥈ ᤛᤠᤵᤔᤢ᤺ᤴᤎᤢᤶ 10 - LIFOTNT

ᤖᤜᤒᤠᤔᤖᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ

¹ ᤖᤜᤒᤠᤔᤧᤴ ᤛᤁᤣᤔᤀᤥ ᤐᤣ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤜᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤧᤵᤔᤥ ᤔᤧᤒᤣᤀᤠᤱ ᤔᤧᤘᤕᤧ॥

² ᤀᤠᤸᤗ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤖᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤔᤡᤛᤪᤗᤠᤶ ᤏᤢ᤺ᤰᤂᤧ ᤌᤠᤅᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤥᤗᤥᤔᤏ ᤜᤠᤱᤅᤡᤴᤗᤠᤶ ᤂᤧᤳᤇᤡᤱᤅᤠᤱ ᤔᤡᤛᤪ ᤗᤠᤈᤣ᤹ᤀᤥ ᤐᤣᤀᤠᤱ ᤘᤕᤧ॥

³ ᤁᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤕᤠᤖᤥᤒᤠᤔᤧᤴ ᤀᤢ᤺ᤵᤔᤠ ᤋᤠ᤺ᤵᤔᤠ ᤔᤧᤒᤠᤱᤄᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤖᤜᤒᤠᤔᤀᤥ ᤔᤧᤒᤣᤀᤠᤱ ᤔᤧᤔᤧᤳᤋᤢ.

⁴ “ᤀᤠᤍᤠᤱᤒᤠᤖᤧ ᤁᤧᤶᤒᤠᤖᤧ ᤀᤠᤏᤡᤃᤣ ᤁᤧᤗᤡ᤺ᤵᤐᤠ ᤂᤧ᤺ᤵᤛᤡᤱ ᤁᤢ᤺ᤳᤋᤡᤃᤧᤀᤠᤱ ᤘᤠ᤹. ᤁᤖ ᤂᤢᤏᤧ᤹ ᤀᤠᤏᤡᤃᤣ ᤁᤢ᤺ᤳᤋᤡᤃᤧᤒᤠ ᤁᤴ ᤁᤧᤛᤠᤰᤐᤠ ᤏᤢ ᤁᤧᤗᤡ᤺ᤵᤐᤠ ᤂᤧ᤺ᤵᤛᤡᤱᤅᤡᤴ ᤀᤠᤍᤠᤱᤒᤠᤖᤧ ᤕᤠᤱᤕᤠᤱᤒᤠ ᤆᤥᤃᤧ ᤀᤠᤒᤡᤖᤧ᤹ᤀᤥ. ᤂᤶᤓᤩᤠᤱ ᤀᤠᤏᤡᤃᤣ ᤀᤠᤍᤠᤱᤒᤠ ᤁᤧᤛᤧᤘᤠ ᤕᤠ᤺ᤶᤒᤰ ᤆᤥᤃᤢᤶ ᤐᤡᤀᤠᤛᤡᤃᤧᤖᤥ॥”

⁵ ᤖᤜᤒᤠᤔᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤢᤶᤕᤧᤴ ᤌᤠᤖᤡᤰ ᤕᤧᤶ ᤀᤠᤒᤡᤖᤧ᤹ ᤜᤧᤰᤁᤩᤠᤱ ᤕᤠᤶᤔᤥ ᤋᤩᤧᤶᤔᤧ᤹॥ ᤁᤸᤗᤧᤆᤥᤃᤢᤸᤗᤧ ᤂᤧᤴ ᤔᤏᤠᤛᤢᤶᤜᤠ᤹ ᤂᤡᤔᤥ ᤔᤧᤏᤢ᤺ᤰᤂᤧ ᤔᤧᤒᤣ॥”

⁶ ᤂᤧᤒᤩᤠᤱ ᤖᤜᤒᤠᤔ ᤜᤠᤱᤅᤡᤸᤗᤧ ᤁᤢᤶᤒᤠ ᤛᤥᤗᤥᤔᤏᤧᤴ ᤜᤡᤅᤧᤀᤠᤱ ᤘᤕᤧᤸᤗᤧᤒᤠ ᤁᤢᤶᤒᤠᤖᤧ ᤁᤢᤛᤧᤘᤠᤖᤥᤒᤠ ᤗᤠᤶᤗᤥᤒᤠᤜᤠ᤹ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤛᤢᤈᤠ ᤏᤠ᤺ᤰᤋᤢᤛᤡ. “ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ ᤀᤠᤰᤋᤱᤒᤠ ᤏᤢᤃᤵ ᤐᤡᤖᤢᤱᤛᤡᤱᤒᤠᤒᤣ ᤀᤠᤍᤠᤱᤒᤠᤛᤡᤖᤧ ᤀᤠᤱᤃᤠ᤹ ᤌᤧᤔᤠ ᤛᤢᤈᤠ ᤀᤠᤃ᤻ᤒᤡᤒᤣ᥅”

⁷ ᤂᤧᤱᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢ. “ᤀᤠᤍᤠᤱᤒᤠᤖᤧ ᤁᤴ ᤔᤏᤠᤜᤠ᤹ ᤀᤠᤸᤗᤥ ᤏᤢᤖᤡᤰ ᤁᤧᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤐᤠᤴ ᤁᤧᤒᤠ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤍᤠᤛᤢᤏᤧᤓᤃᤪ. ᤋᤠ᤺ᤴᤍᤡ ᤂᤧᤱᤜᤠ᤹ ᤛᤍᤠᤍᤡᤱᤗᤧ ᤗᤠᤃᤡ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠ ᤔᤧᤒᤥᤱᤗᤥ॥”

⁸ ᤁᤖ ᤂᤧᤴ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤔᤧᤳᤋᤢᤒᤠ ᤛᤢᤈᤠᤴ ᤂᤢᤏᤧ᤹ ᤂᤧᤶᤔᤠ ᤔᤧᤍᤧᤴᤍᤧᤴ. ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤒᤥᤒᤠ ᤁᤢᤒᤧᤖᤧ ᤁᤢᤍᤠᤱᤗᤠ ᤏᤢ ᤂᤢᤏᤧ᤹ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤌᤠᤱᤒᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤢᤈᤠᤴ ᤂᤧᤵᤛᤢᤀᤠᤱ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ.

⁹ “ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤱᤜᤠ᤹ ᤁᤢ᤺ᤳᤋᤢᤛᤡᤒᤠ ᤂᤧ᤺ᤵᤛᤡᤱᤅᤡᤴ ᤕᤠᤱᤕᤠᤱᤒᤠ ᤆᤥ᤺ᤰᤔᤠ ᤐᤡᤔᤠᤛᤡᤖᤧ ᤗᤠᤃᤡ ᤁᤴ ᤔᤏᤠᤜᤠ᤹ᤖᤧ ᤐᤣᤗᤡ ᤔᤧᤓᤠᤰᤋᤠᤱᤒᤠ ᤐᤠ᤺ᤴᤏᤥ ᤏᤢᤃᤵ ᤐᤡᤔᤠᤛᤡᤖᤧ ᤗᤠᤃᤡ ᤂᤡᤏᤡ᤹ ᤀᤠᤱᤃᤠ᤹ ᤌᤣ ᤛᤢᤈᤠ ᤀᤠᤃ᤻ᤒᤡᤒᤣ᥅”

¹⁰ ᤂᤢᤏᤧ᤹ᤏᤢ ᤛᤥᤖᤡᤰ ᤁᤧᤒᤥᤒᤠ ᤂᤧᤴ ᤁᤢᤒᤧᤖᤧ ᤁᤢᤍᤠᤱᤗᤠ ᤌᤠᤱᤒᤧᤴ ᤔᤏᤠᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤢ. “ᤀᤠᤍᤠᤱᤒᤠᤖᤧ ᤁᤧᤶᤒᤠᤖᤧ ᤀᤠᤏᤡᤃᤣ ᤁᤧᤗᤡ᤺ᤵᤐᤠ ᤂᤧ᤺ᤵᤛᤡᤱ ᤁᤢ᤺ᤳᤋᤡᤃᤧᤀᤠᤱ ᤘᤕᤧ. ᤂᤧᤴ ᤕᤠᤱᤕᤠᤱᤒᤠ ᤆᤥᤃᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤀᤠᤍᤠᤱᤒᤠ ᤁᤧᤔᤧᤵᤐᤠ ᤁᤴ ᤔᤏᤠᤜᤠ᤹ ᤁᤴ ᤏᤢᤃᤵᤐᤡᤴ ᤐᤡᤖᤧᤛᤧ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤁᤧᤖᤧᤰᤏᤢ᤺ᤸᤗᤧ ᤆᤢ᤺ᤰᤛᤠ ᤀᤠᤜᤢᤰᤆᤥᤴ ᤀᤠᤶᤒᤠᤖᤧ ᤁᤢᤃᤧᤱᤅᤡᤴᤏᤢ᤺ᤸᤗᤧ ᤁᤧᤎᤢᤱᤒᤠ ᤆᤥᤰ॥

¹¹ ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤡᤏᤡ᤹ ᤁᤧᤗᤡ᤺ᤵᤐᤠ ᤂᤧ᤺ᤵᤛᤡᤱ ᤁᤧᤃᤢ᤺ᤳᤋᤡᤀᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤂᤧᤴᤏᤢ᤺ᤸᤗᤧ ᤀᤠᤸᤗᤛᤠᤱ ᤐᤗᤡ᤺ᤵ ᤁᤧᤗᤡ᤺ᤵᤐᤠ᤹ ᤆᤥᤃᤢᤱ ᤐᤡᤏᤡᤱ᤹॥ ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤋᤡ᤺ᤸᤗᤧ ᤂᤡᤏᤡ᤹ ᤁᤧᤶᤜᤡᤵᤋᤡᤖ ᤁᤧᤕᤠ᤺ᤴᤍᤡᤀᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤋᤠᤱᤛᤠᤱ ᤂᤧᤒᤰᤐᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤛᤡᤰᤋᤡᤖ ᤕᤠ᤺ᤴᤏᤡᤱ᤹॥’”

¹² ᤖᤜᤒᤠᤔ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤁᤢᤀᤡᤛᤡᤰ ᤕᤠᤖᤥᤒᤠᤔ ᤏᤢ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ ᤛᤢᤶᤕᤧᤴ ᤀᤣᤃᤠᤱ ᤂᤢᤏᤧ᤹ᤀᤥ ᤔᤧᤏᤢ᤺ᤰᤂᤧ ᤔᤧᤕᤧ॥

¹³ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤂᤧᤱᤜᤠ᤹ ᤁᤢᤈᤠᤃᤧᤓᤧᤶᤒᤠ ᤏᤢᤃᤵ ᤐᤡᤖᤢᤛᤡ॥ ᤂᤧᤴ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤔᤧᤳᤋᤢᤒᤠ ᤛᤢᤈᤠᤴ ᤂᤢᤏᤧ᤹ ᤂᤧᤶᤔᤠ ᤔᤧᤍᤧᤴᤍᤧᤴ॥

¹⁴ ᤂᤧᤴ ᤌᤠᤱᤒᤧᤴ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢᤒᤠ ᤛᤢᤈᤠ ᤐᤠ᤺ᤴᤏᤡᤴ ᤁᤢᤀᤡᤛᤡᤰ ᤂᤢᤏᤧ᤹ ᤂᤧᤴ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧᤃ ᤂᤡᤏᤡ᤹ ᤁᤧᤗᤡ᤺ᤵᤐᤠ ᤂᤧ᤺ᤵᤛᤡᤱ ᤁᤧᤃᤢ᤺ᤳᤋᤡᤀᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤂᤧᤴᤏᤢ᤺ᤸᤗᤧ ᤀᤠᤸᤗᤛᤠᤱ ᤐᤗᤡ᤺ᤵ ᤁᤧᤗᤡ᤺ᤵᤐᤠ᤹ ᤆᤥᤃᤢᤱ ᤐᤡᤏᤡᤱ᤹॥ ᤀᤠᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤋᤡ᤺ᤸᤗᤧ ᤂᤡᤏᤡ᤹ ᤁᤧᤶᤜᤡᤵᤋᤡᤖ ᤁᤧᤕᤠ᤺ᤴᤍᤡᤀᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤋᤠᤱᤛᤠᤱ ᤂᤧᤒᤰᤐᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤛᤡᤰᤋᤡᤖ ᤕᤠ᤺ᤴᤏᤡᤱ᤹॥”

¹⁵ ᤁᤶᤓᤗ᤹ᤖᤡᤰ ᤜᤠᤱᤅᤡᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴ. ᤌᤣᤀᤠᤱᤓᤧᤸᤗᤧ ᤛᤡᤗᤥᤒᤠ ᤀᤜᤡᤕᤠᤜᤴ ᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤏᤠᤒᤠᤋᤖᤧ ᤁᤢᤛ᤻ᤛᤠ ᤕᤠᤖᤥᤒᤠᤔᤧᤴ ᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤵᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤕᤠᤰᤏᤠᤶ ᤋᤠᤖᤢᤀᤠᤱ ᤘᤕᤧ॥

¹⁶ ᤀᤠᤸᤗ ᤜᤠᤱᤅᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧᤶᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ. ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤰᤋᤱᤒᤠ ᤏᤢᤃᤵ ᤔᤧᤒᤡᤖᤢᤖᤥ— “ᤍᤠᤀᤢᤍᤧᤴᤏᤢ ᤀᤠᤏᤡᤃᤣ ᤗᤰᤂᤥᤔᤠ ᤌᤧᤔᤠ ᤘᤠ᤹ᤀᤠᤱᤒᤣ᥅ ᤕᤡᤛᤤ᤺ᤸᤗᤧ ᤁᤢᤛ᤻ᤛᤠᤀᤥ ᤀᤠᤏᤡᤃᤣ ᤗᤰ ᤌᤧᤔᤠ ᤘᤠ᤹ᤀᤠᤱᤒᤣ᥅ ᤀᤡᤛᤪᤠᤀᤡᤗᤡᤛᤣ. ᤂᤡᤏᤡ᤹ ᤀᤠᤵᤑᤣᤰ ᤛᤠ᤺ᤱᤃᤠᤜᤡᤶᤔᤥ ᤐᤣᤃᤧᤶᤔᤧ᤹ᤀᤥ᥄ ᤍᤠᤀᤢᤍᤀᤣ. ᤂᤧᤏᤧ᤹ ᤀᤠᤵᤑᤣᤰ ᤁᤧᤜᤡᤶ ᤁᤧᤎᤠ᤺ᤱ ᤋᤰᤋᤧ᤹ᤀᤥ᥄” ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤜᤡᤶᤜᤡᤶ ᤔᤧᤒᤣᤖᤥ॥

¹⁷ ᤁᤖ ᤖᤜᤒᤠᤔᤖᤧᤃ ᤕᤜᤢᤍᤠᤒᤠ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠ ᤀᤡᤛᤪᤠᤀᤡᤗᤡᤜᤠ᤹ ᤛᤶᤎᤠᤱ ᤀᤠᤸᤗᤛᤠᤱ ᤕᤢᤰ ᤆᤥᤃᤢ॥

¹⁸ ᤂᤧᤒᤩᤠᤱ ᤖᤜᤒᤠᤔ ᤜᤠᤱᤅᤡᤸᤗᤧ ᤏᤠᤶᤕᤠᤰ ᤔᤣ᤺ᤴᤏᤣ ᤕᤠ᤺ᤶᤒᤰᤁᤥ ᤁᤧᤒᤵᤐᤠ ᤔᤏᤠᤜᤠ᤹ ᤀᤥᤃᤧᤔᤧᤵᤐᤠ ᤀᤍᤥᤏᤡᤖᤠᤔᤧᤴ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤐᤠᤱᤄᤢᤍᤣᤛᤢ॥ ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ ᤔᤧᤛᤧᤖᤢ॥ ᤜᤧᤰᤁᤣᤛᤠᤱ ᤖᤜᤒᤠᤔ ᤜᤠᤱᤅᤡᤴ ᤁᤢᤀᤴᤗᤠᤎᤠᤴ ᤕᤢᤰᤔᤠᤀᤠᤱ ᤕᤖᤢᤛᤗᤧᤔ ᤂᤧᤳᤇᤡᤱᤔᤠ ᤐᤣ᤺ᤰᤔᤠ ᤂᤥᤛᤧ॥

¹⁹ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤠᤱᤎᤥ ᤀᤠᤀᤡᤴ ᤌᤠᤖᤡᤰᤁᤣ ᤌᤠᤱᤃᤧᤳ ᤐᤡᤛᤠᤱᤒᤠ ᤌᤠ᤺ᤰ. ᤀᤡᤛᤪᤠᤀᤡᤗᤧᤴ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥