᥇ ᤋᤡᤔᤥᤌᤡ 5 - LIFOTNTᤘᤣ᤹ᤜᤠ᤹ᤏᤢ ᤘᤠ᤹ᤔᤠ ᤆᤥ᤺ᤰᤌᤡᤶ 1 ᤂᤍᤠᤰᤔᤡ ᤔᤏᤠᤴ ᤔᤧᤓᤧ᤺ᤰᤋᤧᤴᤏᤧ᤹. ᤁᤖ ᤀᤠᤵᤑᤣᤰ ᤐᤠᤏᤢᤍᤡᤱ ᤁᤧᤶᤒᤠ ᤁᤢᤀᤡᤛᤡᤰ ᤀᤡ᤺ᤳᤋᤧ᤹ᤀᤠᤱ ᤂᤠᤜᤢᤴ ᤐᤡᤖᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤏᤧ᤹ᤏᤢ᤺ᤸᤗᤧ ᤐᤠ᤺ᤰᤐᤠᤜᤠ᤹ ᤀᤠᤵᤑᤣᤰ ᤁᤧᤴᤛᤠ᤹ᤛᤡ ᤁᤢᤀᤡᤛᤡᤰ ᤀᤡ᤺ᤳᤋᤧᤛᤧ᤹ᤀᤥ॥ 2 ᤂᤍᤠᤰᤔᤡ ᤔᤧᤴᤇᤢᤔᤠᤜᤠ᤹ ᤀᤠᤵᤑᤣᤰ ᤔᤠᤏᤢᤍᤡᤱ ᤁᤧᤶᤔᤠ ᤁᤢᤀᤡᤛᤡᤰ ᤀᤡ᤺ᤳᤋᤧᤛᤧ᤹. ᤜᤧᤰᤁᤩᤠᤱ ᤛᤡᤛᤠᤍᤡᤱ ᤔᤧᤴᤇᤡᤕᤠ᤹ᤜᤠ᤹ ᤛᤣᤛᤣ ᤏᤡᤱᤘᤠ᤹ᤀᤥ ᤀᤠᤵᤑᤣᤰ ᤔᤠᤱᤃᤧᤴᤏᤠ ᤏᤧ᤹ᤏᤢᤛᤠ᤹ ᤁᤢᤀᤡᤛᤡᤰ ᤀᤡ᤺ᤳᤋᤧᤛᤧ᤹ᤀᤥ॥ ᤔᤣᤔᤣᤍᤢᤔᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ 3 ᤁᤶᤒᤪᤠᤱ ᤁᤧᤔᤧᤵᤐᤠ ᤁᤧᤜᤥᤵᤐᤠ ᤛᤧᤰᤂᤠᤛᤔᤠ ᤔᤣᤔᤣᤍᤢᤔᤠᤜᤠ᤹ ᤁᤢᤓᤠ᤹ ᤐᤡᤖᤧᤛᤧ᤹ᤀᤥ॥ 4 ᤁᤖ ᤂᤧᤴ ᤔᤣᤔᤣᤍᤢᤔᤠᤜᤠ᤹ᤖᤧ ᤛᤠᤔᤧᤴᤇᤠ᤹ᤜᤠ᤹ ᤔᤧᤃᤳᤋᤢᤛᤡᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ᤖᤧ ᤂᤧᤴ ᤔᤣᤔᤣᤍᤢᤔᤠᤜᤠ᤹ ᤁᤶᤒᤪᤠᤱ ᤔᤧᤔᤧᤳᤋᤢᤛᤡᤖᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤆᤠᤜᤠᤒᤠᤀᤥ ᤁᤧᤖᤧᤰᤗᤧ ᤋᤱᤃᤠᤶ ᤔᤧᤈᤥᤃᤢ ᤔᤧᤒᤡᤖᤢᤛᤡᤖᤖᤥ॥ ᤌᤣᤀᤠᤱᤓᤧᤸᤗᤧ ᤁᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤛᤢ᤹ᤖᤥ॥ 5 ᤁᤖ ᤂᤢᤏᤧ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤜᤠ᤺ᤳᤋᤠᤱ ᤁᤧᤜᤥ᤺ᤵᤔᤠ ᤔᤣᤔᤣᤍᤢᤔᤠᤸᤗᤧ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤡᤱᤛᤠᤱ ᤆᤥᤃᤢᤏᤡ. ᤜᤧᤰᤁᤩᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤆᤰᤔᤧᤸᤗ᤹ᤀᤣ ᤂᤢᤏᤧ᤹ᤗᤠᤶ ᤁᤢᤓᤠ᤹ ᤂᤥᤛᤢᤱᤏᤡ ᤑᤠ᤹ᤀᤠᤱ ᤋᤢᤘᤠ ᤆᤥᤃᤢᤖᤖᤥ॥ 6 ᤁᤖ ᤕᤠᤶᤍᤠᤍᤠ ᤏᤡᤱᤘᤠ᤹ᤋᤠᤍᤠᤀᤥ ᤁᤧᤘᤠ᤹ᤔᤠ ᤔᤣᤔᤣᤍᤢᤔᤠᤱᤃ ᤁᤢᤜᤡᤱᤘᤧᤳ ᤘᤠ᤹ᤛᤠᤱ ᤁᤧᤛᤡᤔᤠ ᤁᤢᤀᤡᤛᤡ᤺ᤰᤗᤥ॥ 7 ᤁᤴ ᤐᤠ᤺ᤴᤜᤠ᤹ᤀᤠᤱ ᤏᤢᤖᤡᤰᤁᤠᤱ ᤏᤡᤛᤠᤶ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣ ᤔᤧᤜᤡᤱᤅᤠᤱ ᤔᤧᤘᤠ᤹ᤏᤡᤖᤥ॥ 8 ᤁᤖ ᤀᤠᤳᤋᤡᤸᤗᤧ ᤀᤠᤵᤑᤣᤰ ᤁᤠ᤹ᤀᤡ ᤛᤥ᤹ᤎᤥᤰ ᤏᤢ ᤁᤢᤏᤥ-ᤁᤢᤒᤡ᤹ᤀᤥ ᤀᤠᤵᤑᤣᤰ ᤜᤡᤶᤛᤕᤱᤅᤡᤴᤏᤠᤱ ᤁᤶᤒᤪᤠᤱ ᤔᤧᤔᤧᤳᤋᤢᤴ. ᤂᤧᤸᤗᤧᤃ ᤏᤛᤠ᤺ᤴᤏᤡᤴ ᤏᤠ᤹ᤖᤢ᤹. ᤜᤧᤰᤁᤩᤠᤱ ᤂᤧᤱᤃ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠᤖᤥ॥ 9 ᤋᤱᤒᤣ ᤋᤢᤰᤁᤡᤵᤐᤠᤱᤎᤥ ᤁᤧᤃᤧᤵᤔᤠ ᤔᤣᤔᤣᤍᤢᤔᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ᤖᤰ ᤔᤣᤔᤣᤍᤢᤔᤠ ᤔᤡᤱᤛᤪᤠᤀᤥ ᤛᤠᤵᤋᤧ᤹ᤀᤥ॥ ᤂᤧᤱᤜᤠ᤹ᤃ ᤌᤡᤰᤗᤧᤱᤖᤰ ᤔᤣ᤺ᤰᤂᤡᤶ ᤁᤧᤒᤥᤱᤔᤠ 10 ᤜᤧᤰᤁᤩᤠᤱ ᤏᤢᤒᤠ ᤕᤠ᤺ᤶᤒᤰᤁᤥ ᤔᤡᤱᤛᤥ ᤀᤡᤱᤎᤠᤱ ᤁᤧᤄᤥᤔᤠ ᤐᤥᤱᤔᤠ ᤐᤥᤱᤗᤥ॥ ᤂᤧᤱᤃ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤁᤧᤔᤧᤵᤔᤠ. ᤗᤠᤶᤍᤡ᤺ᤰᤐᤠᤜᤠ᤹ ᤋᤖᤣ ᤁᤧᤍᤥᤔᤠ. ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤱ ᤘᤠᤃᤧᤜᤵᤔᤠ. ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤘᤠ᤹ᤒᤠᤜᤠ᤹ ᤁᤢᤓᤠ᤹ ᤁᤧᤒᤡᤔᤠ. ᤜᤧᤰᤁᤩᤠᤱ ᤏᤢᤒ᤻ ᤏᤢᤒᤠ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤁᤧᤒᤡᤔᤠ ᤐᤥᤱᤔᤠ ᤐᤥᤱᤗᤥ॥ 11 ᤁᤖ ᤔᤧᤴᤇᤡᤕᤠ᤹ ᤔᤣᤔᤣᤍᤢᤔᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤡᤴ ᤔᤣᤔᤣᤍᤢᤔᤠ ᤔᤡᤱᤛᤪᤠᤀᤥ ᤔᤧᤛᤠᤵᤋᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤅᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤏᤡᤱᤘᤠ᤹ ᤐᤡᤔᤠ ᤔᤧᤗᤧᤖᤢ ᤔᤧᤍᤣᤛᤢᤖᤥ॥ 12 ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤌᤡᤰᤛᤡᤃᤣᤰᤐᤠ ᤔᤠᤱᤜᤧᤰᤁᤡᤴ ᤔᤧᤗᤧᤖᤢ ᤔᤧᤍᤣᤛᤢᤀᤠᤱ ᤂᤢᤶᤍᤡᤱᤅᤥ ᤔᤧᤎᤠᤖᤥ॥ 13 ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤡᤶᤜᤡᤶ ᤋᤠᤰᤁᤶᤔᤠᤖ ᤀᤓᤥᤛᤡᤱᤔᤠ. ᤗᤧᤶᤛᤫᤠᤔᤠ ᤐᤥᤱᤔᤠ ᤔᤧᤜᤢ᤹ᤛᤡᤱᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤠ᤹ᤈᤧᤱᤔᤠ. ᤆᤧ᤹ᤕᤠ ᤐᤱᤔᤠ. ᤔᤏᤠ ᤕᤠ᤺ᤶᤒᤰᤁᤥ ᤜᤢᤰ ᤁᤧᤕᤠᤰᤔᤠ ᤜᤧᤰᤁᤣᤗ᤹ᤖᤡᤰ ᤔᤧᤶᤒᤠ᤺ᤳ ᤐᤠ᤺ᤴᤜᤠ᤹ ᤁᤧᤒᤠ᤺ᤵᤔᤠ ᤔᤧᤒᤥᤱᤗᤥ॥ 14 ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ᤃ ᤔᤧᤴᤇᤡᤕᤠ᤹ ᤔᤣᤔᤣᤍᤢᤔᤠᤜᤠ᤹ᤖᤧᤃ ᤜᤠᤖᤠ᤹ ᤔᤣ᤺ᤰᤂᤡᤶ ᤔᤧᤈᤥᤃᤢᤖ. ᤛᤠ ᤔᤧᤃᤳᤋᤢᤛᤡᤖ. ᤜᤡᤶᤎᤠ᤺ᤱ ᤀᤥᤔᤧᤔᤧᤳᤋᤢᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤏᤡᤱᤔᤡᤜᤠ᤹ᤖᤧ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤌᤣᤀᤠᤱ ᤐᤠ᤺ᤵᤔᤠ ᤔᤧᤱᤄᤥᤛᤢᤴᤏᤡᤖᤥ॥ 15 ᤌᤣᤀᤠᤱᤓᤧᤸᤗᤧ ᤁᤢᤓᤠ ᤔᤣᤔᤣᤍᤢᤔᤠᤜᤠ᤹ᤃ ᤋᤃᤡᤛᤠ ᤔᤠᤑᤧᤴᤛᤠᤶ ᤗᤧᤵᤔᤠᤱ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤔᤧᤘᤠ᤹ᤖᤥ॥ 16 ᤁᤖ ᤏᤛᤠᤏᤡᤔᤠ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤜᤡᤶᤛᤕᤱᤅᤥ ᤔᤣᤔᤣᤍᤢᤔᤠᤜᤠ᤹ ᤔᤧᤘᤠ᤹ᤏᤧ ᤑᤠ᤹ᤃᤪ ᤜᤠᤖᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤴ ᤋᤢᤰᤂᤣᤴ ᤛᤣᤛᤣᤜᤢᤵᤗᤰᤁᤥ ᤔᤧᤒᤥᤱᤏᤧᤴᤗᤖᤥ॥ ᤛᤣᤛᤣᤜᤢᤵᤗᤰᤁᤡᤸᤗᤧ ᤛᤧᤰᤂᤠᤀᤣ ᤁᤠ᤹ᤀᤡ ᤛᤥ᤹ᤎᤥᤰ ᤁᤧᤜᤥ᤺ᤵᤔᤠᤜᤠ᤹ᤖᤰ ᤁᤢᤓᤠ᤹ ᤐᤡᤔᤠᤛᤡ ᤐᤥᤱᤗᤥ॥ ᤛᤣᤛᤣᤜᤢᤵᤗᤰᤐᤠ ᤋᤢᤶᤗᤠᤶᤗᤥᤒᤠᤜᤠ᤹ 17 ᤜᤧᤰᤁᤩᤠᤱ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤁᤢᤏᤥ-ᤁᤢᤒᤡ᤹ᤀᤥ ᤛᤢᤏᤠᤀᤡᤱ ᤀᤡᤱᤓᤥᤔᤠ ᤏᤢ ᤐᤣᤗᤡᤃᤧᤴ ᤐᤠ᤺ᤴᤈᤠᤰ ᤜᤢ᤹ᤔᤠᤀᤥ ᤛᤠ᤹ᤖᤡᤰ ᤕᤠᤶᤒᤢᤎᤡᤰ ᤁᤧᤈᤥ᤺ᤰᤐᤠ ᤋᤢᤶᤗᤠᤶᤗᤥᤒᤠᤜᤠ᤹ ᤁᤢᤓᤠ᤹ ᤏᤢ ᤔᤡᤱᤛᤥ ᤀᤡᤱᤎᤠᤱ ᤂᤥᤔᤠ ᤗᤠ᤹ᤖᤢᤛᤡᤖᤥ॥ 18 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤆᤠ ᤁᤧᤏᤢᤰᤐᤠ ᤐᤡᤳᤋᤡᤸᤗᤧ ᤁᤢᤔᤢᤖᤠᤴ ᤆ᤺ᤵᤐᤡᤸᤗᤧ ᤔᤧᤛᤢ᤺ᤵᤋᤧᤴᤏᤧ᤹ᤀᤥ.” ᤜᤧᤰᤁᤩᤠᤱ “ᤕᤠᤗᤡᤰᤁᤡᤴ ᤏᤠᤶᤕᤠᤰ ᤂᤥᤔᤠ ᤗᤠ᤹ᤖᤢᤖᤥ॥” 19 ᤏᤧᤳᤇᤡ ᤀᤡᤃᤪ ᤛᤢᤶᤛᤡ ᤔᤏᤠᤜᤠ᤹ᤖᤧ ᤔᤧᤒᤡᤖᤢᤒᤠ ᤋᤥ᤺ᤴᤍᤡᤜᤠ᤹ ᤂᤧᤵᤛᤧᤀᤠᤱᤗᤰ ᤋᤢᤶᤗᤠᤶᤗᤥᤒᤠᤜᤠ᤹ ᤔᤧᤎᤡᤰᤋᤢᤛᤡᤒᤠ ᤀᤠᤵᤋᤡᤰᤁᤡᤴ ᤀᤥᤔᤧᤳᤋᤧ᤹ᤀᤥ॥ 20 ᤗᤠᤕᤥ ᤁᤧᤈᤥ᤺ᤰᤐᤠᤖ ᤁᤧᤘᤠ᤹ᤒᤠ ᤗᤠᤶᤗᤥᤒᤠᤜᤠ᤹ ᤁᤠᤰ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤑᤧ᤺ᤰᤋᤧᤛᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ ᤗᤠᤕᤥ ᤆᤥ᤺ᤰᤔᤠ ᤔᤧᤃᤡᤏᤡᤖᤥ॥ 21 ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤪᤡᤛ᤻ᤋ ᤕᤧᤛᤢᤖᤧ ᤂᤢᤴᤇᤡ᤹ ᤋᤃᤡ ᤜᤧᤰᤁᤩᤠᤱ ᤔᤧᤛᤣᤃᤧᤒᤠ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ. ᤔᤏᤠᤜᤠ᤹ ᤀᤣ᤺ᤰᤐᤀᤣ᤺ᤰ ᤆᤥ᤺ᤰᤔᤠᤛᤡ ᤏᤢ ᤔᤏᤠ ᤛᤧᤶᤔᤠᤛᤡ ᤔᤣ᤺ᤴ. ᤜᤧᤰᤁᤩᤠᤱ ᤁᤠᤰ ᤌᤡᤶᤜᤠ᤹ ᤀᤡ᤺ᤳᤋᤧ ᤏᤠ᤺ᤳᤋᤧ᤹ ᤗ᤹ᤖᤡᤰ ᤀᤡᤱᤈᤠᤱ ᤐᤡᤏᤧᤖᤥ॥ 22 ᤔᤠᤱᤛᤧᤘᤠ ᤕᤠ᤺ᤶᤒᤰᤁᤥ ᤗᤠᤶᤗᤥᤒᤠ ᤛᤣ᤺ᤰᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤛᤶᤍᤠᤱ ᤜᤢᤰ ᤏᤧᤔᤠ ᤕᤠ᤺ᤶᤒᤰᤁᤡᤴ ᤜᤠᤖᤠ ᤔᤧᤈᤥᤃᤧᤴᤏᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤀᤥ ᤔᤧᤴᤎᤠᤀᤣ ᤂᤧᤏᤧ᤹ᤃ ᤛᤣᤛᤣᤀᤣ ᤘᤕᤧ᤹ᤀᤥ॥ 23 ᤂᤧᤏᤧ᤹ ᤁᤧᤛᤠᤵᤐᤥ᤺ᤰᤐᤧᤴ ᤋᤢᤰᤁᤡᤸᤗᤧ ᤆᤫᤠ᤺ᤳᤗᤰ ᤔᤧᤎᤢᤅᤧᤴᤏᤧ᤹ᤀᤥ. ᤁᤖ ᤛᤡᤍᤠ᤹ ᤐᤥᤱᤗ ᤑᤠ᤹ᤀᤠᤱ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤅᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤀᤧᤳᤗᤧᤱ ᤁᤧᤍᤢᤰᤁᤠᤱ ᤁᤧᤘᤠ᤹ᤖᤥ॥ 24 ᤁᤢᤓᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤱᤃ ᤏᤢᤖᤡᤰ ᤌᤠ᤺ᤵᤐᤠᤱ ᤂᤠᤛᤧᤴᤏᤥ ᤔᤧᤎᤠᤖᤥ. ᤁᤖ ᤁᤢᤓᤠᤖᤧᤱᤃ ᤕᤠᤱᤛᤡᤖᤰ ᤌᤠ᤺ᤵᤗᤥ॥ 25 ᤒᤠ ᤜᤧᤰᤁᤣᤗ᤹ᤖᤡᤰ ᤏᤢᤒᤠ ᤕᤠ᤺ᤶᤒᤰᤜᤠ᤹ᤀᤠᤱ ᤏᤢᤖᤡᤰᤁᤠᤱ ᤌᤠ᤺ᤵ. ᤁᤖ ᤔᤧᤴᤎᤠ᤺ᤵᤔᤏᤠᤒᤧᤴᤏᤠᤱ ᤆᤡᤱᤛᤡᤱᤔᤠ ᤔᤧᤛᤢᤰᤏᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.