᥇ ᤋᤡᤔᤥᤌᤡ 4 - LIFOTNT

ᤀᤡᤱᤗᤧᤰᤐᤠ ᤛᤡᤰᤛᤠᤶᤒᤠᤜᤠ᤹

¹ ᤀᤠᤸᤗ ᤛᤣᤛᤣᤔᤠᤱᤅᤡᤸᤗᤧ ᤏᤢᤖᤡᤰᤁᤠᤱ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤋᤧᤀᤠᤱ ᤀᤠᤘᤠ᤹ᤖᤥ. ᤋᤠ᤺ᤴᤍᤡ ᤁᤧᤍᤠᤒᤠ ᤕᤧᤶᤔᤥ ᤁᤢᤓᤠ ᤔᤏᤠᤜᤠ᤹ᤖᤧ ᤏᤛᤠ᤺ᤴᤏᤡᤴ ᤔᤧᤗᤧᤖᤢᤀᤠᤱ ᤀᤡᤱᤗᤧᤰᤁᤣᤒᤠ ᤑᤧᤴᤛᤠᤶᤜᤠ᤹ᤖᤧ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤒᤢᤱᤅᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹ᤖᤥ॥

² ᤁᤴ ᤏᤡᤛᤠᤶᤜᤠ᤹ᤃ ᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤋᤠ᤺ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤱᤃ ᤁᤧᤃᤥᤒᤠ ᤑᤧᤴᤈᤣ᤹ᤀᤡᤸᤗᤧ ᤕᤧᤶᤔᤠᤀᤠᤱ ᤁᤧᤎ᤺ᤵᤐᤠ ᤁᤧᤒᤥᤱᤒᤠ ᤁᤢᤀᤡᤛᤡᤰ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤄᤥᤶᤏᤠᤒᤠ ᤐᤥᤱᤗᤥ॥

³ ᤂᤧᤱᤜᤠ᤹ᤖᤧᤃ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤏᤢ ᤁᤢᤓᤠ ᤁᤢᤈᤠ ᤁᤢᤎᤡ ᤆᤠᤔᤠ ᤌᤢᤱᤔᤠᤀᤠᤱ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤔᤏᤠᤜᤠ᤹ ᤔᤧᤜᤢ᤹ᤖᤢᤛᤡᤖᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤠᤔᤠ ᤑᤠ᤹ᤀᤠᤱ ᤆᤥᤃᤢᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤏᤛᤠ᤺ᤴᤛᤠᤒᤠ ᤏᤢ ᤛᤧᤰᤂᤠ ᤐᤠᤴ ᤁᤧᤏᤡᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤔᤠᤀᤠᤱ ᤆᤠᤔᤠ ᤏᤢ᤹ᤖᤥ॥

⁴ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤢᤒᤠ ᤆᤥᤰᤗᤥ॥ ᤜᤧᤰᤁᤩᤠᤱ ᤀᤵᤔᤠ ᤔᤧᤏᤢ᤹ᤏᤧᤴᤗᤥ. ᤁᤖ ᤏᤥᤃᤧᤴ ᤐᤡᤔᤠᤀᤠᤱ ᤋᤧᤴᤍᤡᤱᤃᤧᤴ ᤛᤢᤍᤠ᤺ᤰᤔᤠ ᤏᤢ᤹ᤖᤥ॥

⁵ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤐᤣᤗᤡᤃᤧᤴ ᤋᤢᤘᤠ᤺ᤸᤗᤧ ᤁᤠᤰ ᤛᤣᤛᤣ ᤆᤥᤃᤢ᤹ᤖᤥ॥

ᤕᤧᤛᤢ ᤂᤪᤡᤛ᤻ᤋᤖᤧ ᤏᤢᤒᤠ ᤁᤢᤛᤧᤘᤠᤖᤥᤒᤠ

⁶ ᤁᤴ ᤐᤠ᤺ᤴᤜᤠ᤹ ᤂᤧᤏᤧ᤹ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤁᤧᤜᤢ᤹ᤖᤢᤛᤡ ᤜᤧᤰᤁᤩᤠᤱ ᤁᤧᤏᤠ᤺ᤳᤋᤢ ᤁᤧᤀᤡ᤺ᤳᤋᤢᤒᤠ ᤛᤧᤰᤂᤠ ᤏᤡᤛᤠᤶ ᤏᤢ ᤏᤛᤠ᤺ᤴᤃᤧᤴ ᤐᤠ᤺ᤴᤈᤠᤰᤁᤥ ᤁᤧᤜᤢ᤹ᤛᤡᤱᤗ ᤁᤧᤎᤠᤱᤏᤧ ᤑᤠ᤹ᤃᤪ ᤂᤧᤏᤧ᤹ᤃ ᤂᤪᤡᤛ᤻ᤋ ᤕᤧᤛᤢᤖᤧ ᤏᤢᤒᤠ ᤁᤢᤛᤧᤘᤠᤖᤥᤒᤠ ᤁᤧᤒᤥᤱᤗᤥ॥

⁷ ᤁᤖ ᤂᤧᤏᤧ᤹ ᤁᤢᤒᤢᤱᤏᤠ ᤁᤢᤛᤶᤒᤠ ᤜᤏᤧᤒᤠ ᤂᤧᤍᤠ᤹ᤜᤠ᤹ᤗᤠᤶ ᤔᤠ᤺ᤱᤄᤠᤀᤣ ᤘᤕᤧ᤹ᤀᤥ॥ ᤂᤧᤴᤏᤢ᤺ᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤆᤥ᤺ᤰᤔᤠ ᤛᤎᤠᤛᤡᤱᤅᤧ᤹ᤀᤥ॥

⁸ ᤏᤠᤛᤡᤱᤃᤧᤴ ᤌᤰ ᤛᤎᤠᤛᤡᤱᤔᤠᤸᤗᤧ ᤁᤢᤓᤠᤖᤰ ᤀᤡᤴᤎᤠ᤺ᤱ ᤀᤠᤒᤡ᤹. ᤁᤖ ᤕᤠᤶᤛᤠᤶᤃᤧᤴ ᤛᤎᤠᤛᤡᤱᤔᤠᤗᤠᤶ ᤁᤠᤰ ᤐᤖᤡᤰᤗᤧᤴ ᤀᤡᤴᤎᤠ᤺ᤱ ᤀᤠᤄᤥᤛᤢᤶ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥ ᤜᤡᤱᤔᤴᤗᤧᤴ ᤔᤠᤱᤜᤧᤰᤁᤡᤴ ᤁᤴ ᤕᤧᤶᤔᤥᤒᤠ ᤏᤢ ᤋᤠᤕᤧᤶᤔᤥᤒᤠ ᤜᤡᤱᤔᤴᤏᤥ ᤀᤠᤄᤥᤛᤢᤶᤗᤥ॥

⁹ ᤁᤱᤃ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤁᤧᤖᤧᤰᤗᤧ ᤋᤧᤶᤔᤠ ᤁᤧᤒᤥᤱᤒᤠ ᤐᤠ᤺ᤴᤗᤥ॥

¹⁰ ᤒᤠ ᤁᤴ ᤏᤡᤱᤘᤠ᤹ᤛᤥᤰᤁᤥ ᤕᤠᤶᤒᤢᤎᤡᤰ ᤏᤢ ᤋᤶᤛᤡᤱ ᤀᤠᤈᤥᤃᤢᤶ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤏᤡᤱᤛᤠᤱᤅᤡᤴ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤥ ᤀᤠᤏᤧᤛ᤻ᤛᤢᤶᤔᤠᤱ ᤀᤠᤘᤠ᤹ᤖᤥ॥ ᤂᤢᤏᤧ᤹ᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤛᤧᤴᤗᤵᤍᤠᤱᤒᤠ. ᤜᤧᤰᤁᤩᤠᤱ ᤁᤢᤏᤥ-ᤁᤢᤒᤡ᤹ᤀᤥᤃ ᤂᤢᤏᤧ᤹ᤀᤥ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧᤴᤗᤥ॥

¹¹ ᤁᤴ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤈᤠᤱ ᤐᤡᤖᤧᤛᤧ᤹ᤀᤠᤱ ᤜᤢ᤹ᤖᤧᤛᤧ᤹ᤀᤥ॥

¹² ᤂᤧᤏᤧ᤹ ᤏᤠᤗᤡᤱᤃᤧᤴ ᤌᤠᤱᤒᤧᤴ ᤁᤧᤘᤠ᤹ᤒᤠᤸᤗᤧ ᤀᤠᤳᤋᤡᤸᤗᤧᤀᤠᤱ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤏᤧᤴᤗᤖᤥ. ᤁᤖ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤒᤠᤴ ᤛᤢᤳᤗᤠᤀᤥ. ᤕᤧᤵᤗᤧᤰᤁᤥ. ᤔᤡ᤺ᤶᤈᤡᤀᤥ. ᤏᤛᤠ᤺ᤴᤏᤥ. ᤜᤧᤰᤁᤩᤠᤱ ᤛᤣᤛᤣᤒᤠ ᤜᤡᤱᤔᤴᤏᤥ ᤁᤢᤒᤡ ᤐᤥ᤺ᤰᤂᤧ᤹ᤀᤥ॥

¹³ ᤀᤡᤱᤃᤠ᤹ ᤔᤧᤴᤍᤠᤀᤣ ᤌᤠᤖᤡᤰ ᤛᤣᤛᤣᤜᤢᤵᤗᤰᤁᤥ ᤛᤠᤶᤕᤥᤛᤠᤵᤗᤠ ᤏᤡ᤺ᤵᤔᤥ. ᤛᤢᤏᤠᤀᤡᤱ ᤀᤡᤱᤓᤥᤔᤠᤀᤥ ᤏᤢ ᤏᤡᤛᤠᤶ ᤜᤢ᤹ᤔᤠ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥

¹⁴ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤁᤧᤛᤶᤍᤠᤱ ᤂᤢᤏᤡ᤹ ᤜᤢᤰ ᤔᤧᤏᤧᤛ᤻ᤛᤢᤸᤗᤧ ᤔᤠᤱᤏᤡᤱᤘᤠ᤹ᤐᤠᤴᤗᤠᤶ ᤁᤧᤄᤥᤛᤢᤒᤠ ᤕᤠᤶᤛᤠᤶᤃᤧᤴ ᤐᤷᤎᤠ᤺ᤶᤔᤡᤴ ᤜᤏᤧᤒᤠ ᤔᤧᤀᤡ᤺ᤳᤋᤧᤴᤏᤧ᤹ᤀᤥ॥

¹⁵ ᤂᤧᤏᤧ᤹ ᤁᤴ ᤔᤢᤖᤠ ᤔᤧᤳᤏᤧᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤀᤡ᤺ᤳᤋᤧ ᤏᤠ᤺ᤳᤋᤧ᤹ᤀᤠᤱ ᤆᤰᤔᤧᤸᤗ᤹ᤀᤣ ᤂᤧᤵᤔᤥ ᤐᤳᤇᤧ᤹ᤀᤥ॥ ᤜᤧᤰᤁᤣ ᤁᤧᤈᤥᤃᤢᤸᤗᤧ ᤘᤣ᤹ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤈᤥᤃᤢᤒᤠ ᤌᤥᤒᤥ᤺ᤴ ᤔᤧᤏᤡᤛᤢᤖᤖᤥ॥

¹⁶ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤣᤰ ᤏᤢ ᤁᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤥ ᤛᤡᤱᤛᤡᤱ ᤗ᤹ᤖᤧ᤹ᤀᤥ॥ ᤆᤰᤔᤧᤸᤗ᤹ᤀᤣ ᤂᤧᤵᤔᤥ ᤐᤳᤇᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤧᤰᤁᤣ ᤁᤧᤈᤥᤃᤢᤏᤧ ᤑᤠ᤹ᤃᤪ ᤂᤧᤏᤧ᤹ ᤀᤠᤵᤑᤣᤰ ᤏᤢ ᤂᤧᤏᤧ᤹ ᤁᤧᤒᤠᤴ ᤁᤧᤄᤧᤶᤒᤠᤜᤠ᤹ ᤋᤠᤱᤃᤧᤛᤧ᤺ᤵᤋᤢᤛᤡ᤹ᤖᤥ॥