᥇ ᤋᤡᤔᤥᤌᤡ 3 - LIFOTNT

ᤛᤣᤛᤣᤜᤢᤵᤗᤰᤁᤥᤒᤠ ᤗᤠᤶᤗᤥᤒᤠ

¹ ᤀᤠᤳᤋᤡᤴ ᤔᤏᤠ᤺ᤸᤗᤧ ᤗᤠᤶᤗᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤛᤧᤰᤂᤠᤀᤣ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤥᤏᤡᤱᤘᤠ᤹ ᤆᤥᤃᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤱᤃ ᤛᤧᤰᤂᤠᤀᤣᤖᤥ॥

² ᤂᤧᤸᤗᤧᤆᤥᤃᤢᤸᤗᤧ ᤗᤠᤶᤗᤥᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤱᤃ ᤀᤠᤵᤋᤡᤰ ᤔᤣ᤺ᤴᤏᤣᤒᤠ. ᤌᤡᤰᤗᤰ ᤔᤣ᤺ᤳ ᤁᤧᤃᤵᤐᤠ. ᤏᤡᤱᤘᤠ᤹ ᤜᤠᤱᤃᤧᤃᤧᤶᤛᤡᤱᤒᤠ. ᤏᤢ᤺ᤖᤡᤰᤁᤠᤱ ᤂᤠᤛᤡᤱ ᤁᤧᤏᤡ᤺ᤵᤐᤠ. ᤔᤡᤱᤛᤥ ᤀᤡᤱᤎᤠᤱᤛᤠᤒᤠ. ᤋᤖᤣ ᤁᤧᤍᤥᤒᤠ ᤏᤢ ᤔᤏᤠᤜᤠ᤹ ᤜᤢ᤹ᤔᤠ ᤁᤧᤛᤢᤰᤐᤠ ᤐᤥᤱᤔᤠ ᤐᤥᤱᤗᤥ॥

³ ᤂᤢᤏᤧ᤹ᤃ ᤀᤠᤔᤔᤒᤠ ᤌᤡ ᤁᤧᤎᤢᤱᤒᤠ ᤏᤢ ᤁᤢᤛᤡᤰ ᤁᤧᤈᤶᤒᤠ ᤐᤥᤱᤔᤠ ᤔᤧᤏᤢ᤹ᤏᤧᤴ. ᤁᤖ ᤗᤢᤶᤗᤢᤶ ᤁᤧᤗ᤹ᤒᤠ ᤏᤢ ᤛᤏᤠᤖᤢᤱᤛᤠᤒᤠ ᤐᤥᤱᤔᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣᤀᤥ ᤏᤡᤱᤘᤠ᤹ ᤁᤧᤒᤡᤒᤠᤀᤠᤱ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥

⁴ ᤂᤢᤏᤧ᤹ᤃ ᤀᤠᤵᤑᤣᤰ ᤁᤢᤜᤡᤶᤛᤕᤱ ᤏᤢ᤺ᤖᤡᤰᤁᤠᤱ ᤁᤶᤒᤪᤠᤱ ᤔᤧᤵᤔᤠ ᤁᤧᤛᤢᤰᤐᤠ ᤜᤧᤰᤁᤩᤠᤱ ᤁᤢᤛ᤻ᤛᤠᤜᤠ᤹ᤖᤧ ᤀᤡᤱᤎᤠᤱ ᤔᤧᤒᤡᤖᤢᤒᤠ ᤏᤢ ᤁᤢᤀᤡᤱᤈᤠᤱ ᤔᤧᤄᤧᤵᤛᤢᤒᤠ ᤐᤥᤱᤔᤠ ᤐᤥᤱᤗᤥ॥

⁵ ᤌᤣᤀᤠᤱᤓᤧᤸᤗᤧ ᤀᤠᤵᤑᤣᤰ ᤁᤢᤜᤡᤶᤛᤕᤱ ᤁᤶᤒᤪᤠᤱ ᤔᤧᤵᤔᤠ ᤔᤧᤴᤇᤢᤰᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴ ᤛᤣᤛᤣᤜᤢᤵᤗᤰᤁᤡᤴ ᤁᤶᤒᤪᤠᤱ ᤔᤧᤵᤔᤠ ᤛᤢᤰᤋᤢᤒᤣ᥅

⁶ ᤂᤢᤏᤧ᤹ᤃ ᤁᤢᤛᤱ ᤏᤛᤠᤏᤡᤒᤠ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ. ᤔᤣ᤺ᤴᤏᤣ ᤑᤠ᤹ᤃᤪ ᤀᤠᤱᤍᤡᤱ ᤗ᤹ᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤂᤢᤶᤍᤡᤱ ᤂᤥᤛᤢᤒᤠ ᤁᤢᤀᤡᤛᤡᤰ ᤂᤧᤸᤗᤧᤀᤠᤱ ᤂᤢᤶᤍᤡᤱ ᤂᤥᤛᤢ᤹ᤖᤥ॥

⁷ ᤂᤢᤏᤧ᤹ᤃ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ᤖᤧᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢᤒᤠ ᤐᤥᤱᤔᤠ ᤐᤥᤱᤗᤥ. ᤔᤣ᤺ᤴᤏᤣ ᤑᤠ᤹ᤃᤪ ᤂᤢᤏᤧ᤹ ᤁᤢᤏᤠᤎᤠᤀᤠᤱ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤀᤡᤈᤥᤀᤥ ᤌᤠᤖᤥ॥

⁸ ᤒᤠ ᤜᤧᤰᤁᤣᤗ᤹ᤖᤡᤰ ᤛᤣᤛᤣᤜᤢᤵᤗᤰᤐᤠ ᤔᤠᤱᤛᤣᤘᤠᤖᤥᤒᤠᤜᤠ᤹ᤃ ᤏᤥ ᤕᤧᤵᤗᤧᤰᤛᤠᤒᤠ ᤏᤢ ᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤛᤡᤒᤠ ᤐᤥᤱᤔᤠ ᤐᤥᤱᤗᤥ॥ ᤂᤧᤱᤜᤠ᤹ ᤕᤖᤡᤰ ᤌᤡ ᤁᤧᤎᤢᤱᤒᤠ ᤏᤢ ᤑᤧᤴ ᤗᤠᤶᤔᤥᤗᤠᤶ ᤕᤠᤱ ᤁᤧᤎᤰᤐᤠ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥

⁹ ᤂᤧᤱᤜᤠ᤹ᤃ ᤛᤣᤛᤣ ᤂᤠᤛᤡᤱᤅᤡᤸᤗᤧ ᤀᤠᤏᤡ᤹ ᤏᤛᤠᤴ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤁᤧᤃᤵᤐᤠ ᤐᤥᤱᤔᤠ ᤐᤥᤱᤗᤥ॥

¹⁰ ᤂᤧᤱᤜᤠ᤹ ᤛᤣ᤺ᤰᤕᤢᤰ ᤆᤥ᤺ᤰᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤡ᤹ ᤕᤧᤵᤗᤧᤰ ᤏᤢ ᤛᤢᤶᤒᤥᤎᤠ᤺ᤴ ᤛᤠ᤹ᤔᤠ ᤐᤥᤱᤗᤥ॥ ᤜᤧᤰᤁᤩᤠᤱ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤏᤢᤒᤠ ᤆᤥ᤺ᤰᤏᤧ ᤑᤠ᤹ᤃᤪ ᤜᤠᤖᤠ᤹ ᤂᤧᤱᤜᤠ᤹ᤖᤧ ᤔᤠᤱᤛᤣᤘᤠᤖᤥᤒᤠᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤖᤖᤥ॥

¹¹ ᤔᤠᤱᤛᤣᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤔᤣ᤺ᤳᤜᤠ᤹ᤀᤠᤱ ᤀᤡᤱᤎᤠᤱᤛᤠᤔᤠ ᤔᤧᤒᤥᤱᤗ ᤐᤥᤱ. ᤁᤖ ᤆᤧ᤹ᤕᤠ ᤁᤧᤒᤱᤔᤠ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤧᤱᤜᤠ᤹ᤃ ᤛᤡᤰ ᤀᤣ᤺ᤵᤔᤠ ᤁᤧᤛᤢᤰᤔᤠ ᤏᤢ ᤁᤠᤰ ᤐᤠ᤺ᤴᤏᤥ ᤏᤛᤠ᤺ᤴᤛᤠᤔᤠ ᤐᤥᤱᤔᤠ ᤐᤥᤱᤗᤥ॥

¹² ᤔᤠᤱᤛᤣᤘᤠᤖᤥᤒᤠᤱᤃ ᤌᤡᤰᤗᤰ ᤔᤣ᤺ᤳ ᤁᤧᤃᤵᤐᤠ. ᤏᤢᤖᤡᤰᤁᤠᤱ ᤜᤡᤴᤈᤠ᤹ᤒᤡᤳᤇᤠ ᤏᤢ ᤜᤡᤶᤛᤕᤱ ᤁᤶᤒᤪᤠᤱ ᤔᤧᤵᤔᤠ ᤁᤧᤛᤢᤰᤐᤠ ᤐᤥᤱᤔᤠ ᤐᤥᤱᤗᤥ॥

¹³ ᤌᤣᤀᤠᤱᤓᤧᤸᤗᤧ ᤔᤠᤱᤛᤣᤘᤠᤖᤥᤒᤠᤜᤠ᤹ᤖᤧ ᤏᤢᤖᤡᤰᤁᤠᤱ ᤕᤠ᤺ᤶᤒᤰ ᤔᤧᤈᤥᤃᤢᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤄᤥᤛᤢ᤹. ᤜᤧᤰᤁᤩᤠᤱ ᤂᤪᤡᤛ᤻ᤋ ᤕᤧᤛᤢᤀᤥ ᤁᤧᤘᤠ᤹ᤒᤠ ᤂᤢᤏᤡ᤹ ᤏᤛᤠ᤺ᤴᤏᤥ ᤜᤠᤱᤜᤠᤱᤅᤠᤱ ᤘᤠ᤹ᤔᤠ ᤔᤧᤛᤢᤰᤗᤥ॥

¹⁴ ᤀᤡᤱᤃᤠ᤹ ᤂᤧᤏᤧ᤹ᤀᤥ ᤜᤠᤖᤠᤀᤣ ᤋᤠᤔᤠ ᤏᤡᤱᤛᤠᤱ ᤆᤥᤃᤢᤱᤅᤠᤱ ᤘᤠ᤹ᤀᤠᤛᤠᤱ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤒᤠᤖᤥ॥

¹⁵ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤛᤢᤛᤠᤱᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤀᤠᤰᤂᤣᤗ᤹ᤖᤡᤰ ᤘᤠ᤹ᤔᤠ ᤐᤣ᤺ᤰᤔᤠ ᤐᤥᤱ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤀᤣᤖᤥ॥ ᤁᤢᤔᤏᤠᤜᤠ᤹ᤃ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤜᤢᤵᤗᤰᤗᤥ॥ ᤂᤧᤱᤃ ᤛᤧᤰᤂᤠ᤺ᤸᤗᤧᤴ ᤜᤠᤱᤛᤡᤳᤗᤠᤱ ᤏᤢ ᤏᤧ᤺ᤶᤓᤥᤖᤥ॥

¹⁶ ᤀᤠᤏᤡ᤹ ᤛᤠᤶᤕᤥᤖᤧ ᤛᤡᤃᤠᤱ ᤐᤠ᤺ᤴᤏᤡᤱᤃ ᤐᤕᤶ ᤕᤶᤒᤠ ᤆᤥᤰ ᤑᤠ᤹ᤀᤠᤱ ᤀᤠᤏᤡ᤹ ᤋᤧᤴᤍᤡᤱ ᤀᤠᤈᤥᤃᤢᤶᤗᤥ— ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤵᤑᤣᤰ ᤏᤠᤛᤡᤱᤃᤧᤴ ᤌᤰᤁᤥ ᤌᤠ᤺ᤶᤛᤡᤱᤗᤥ. ᤛᤣᤛᤣᤔᤠᤱᤗᤠᤶ ᤂᤢᤏᤧ᤹ ᤛᤠᤶᤕᤥᤒᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤖᤥ. ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡᤛᤢᤖᤥ. ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤢᤏᤧ᤹ ᤀᤡᤱᤓᤥᤛᤧᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤢᤏᤧ᤹ ᤏᤛᤠᤴ ᤔᤧᤈᤥᤃᤢᤖᤥ. ᤔᤡᤔᤡᤍᤡᤱᤅᤥ ᤂᤢᤏᤧ᤹ ᤌᤠ᤺ᤱ ᤐᤱᤛᤡᤱ ᤐᤣᤖᤥ᥄