᥇ ᤌᤡᤛ᤻ᤛᤗᤥᤏᤡᤁᤡ 5 - LIFOTNTᤍᤠᤱᤒᤠᤴ ᤕᤢ᤺ᤸᤗᤧ ᤕᤠᤖᤡᤵ ᤐᤥᤱᤔᤠᤴ 1 ᤀᤠᤸᤗ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤧᤴ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧ ᤐᤥᤱ ᤑᤠ᤹ᤀᤠᤱ ᤕᤧᤶ ᤏᤢ ᤕᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤧᤔᤠᤀᤠᤱ ᤂᤡᤏᤡ᤹ ᤗᤠᤃᤡ ᤀᤠᤏᤡᤃᤣ ᤛᤠᤵᤔᤠᤖ ᤏᤧᤔᤠ ᤔᤧᤒᤥᤱᤏᤧᤸᤗᤥ॥ 2 ᤌᤣᤀᤠᤱᤓᤧᤸᤗᤧ ᤔᤧᤴᤀᤡ᤺ᤳᤋᤣ ᤘᤠ᤹ᤔᤠᤸᤗᤧ ᤛᤧᤴᤍᤡᤰ ᤁᤧᤄᤢ᤺ᤶᤒᤠᤴ ᤂᤢ᤺ᤳᤇᤧ ᤋᤠᤒᤠ ᤁᤢᤀᤡᤛᤡᤰ ᤍᤠᤱᤒᤠᤴ ᤏᤢ᤺ᤱ ᤕᤢ᤺ᤒᤠ ᤕᤧᤴᤏᤡᤴ ᤜᤰᤆᤄᤳ ᤐᤥᤱ ᤑᤠ᤹ᤀᤠᤱ ᤂᤡᤏᤡ᤹ ᤀᤠᤒᤠᤅᤣ ᤏᤢᤖᤡᤰᤁᤠᤱ ᤁᤧᤏᤡᤛᤢᤶᤗᤥ॥ 3 ᤔᤏᤠᤜᤠ᤹ ᤛᤏᤠᤖᤢᤱ ᤏᤢ ᤋᤠᤱᤛᤧ᤺ᤵᤐᤡᤴ ᤘᤠ᤹ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤘᤠ᤹ᤀᤡᤸᤗᤧ ᤔᤧᤴᤇᤢᤔᤠ᤹ᤀᤡᤴ ᤜᤰᤆᤄᤳ ᤛᤠᤍᤢᤱᤅᤡᤸᤗᤧ ᤋᤖᤢᤒᤠ ᤁᤢᤀᤡᤛᤡᤰ ᤔᤧᤰᤔᤠᤴ ᤋᤠᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤐᤡᤶᤔᤠ ᤔᤧᤴᤇᤢᤰᤏᤧᤴᤗᤥ॥ 4 ᤁᤖ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ᤃ ᤗᤠᤕᤥᤀᤥ ᤁᤧᤘᤠ᤹ᤒᤠᤜᤠ᤹ ᤁᤢᤀᤡᤛᤡᤰ ᤔᤠᤰᤆᤡᤃᤧᤴ ᤂᤠᤍᤠᤶᤔᤥ ᤁᤧᤜᤥ᤺ᤵᤋᤡᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤍᤠᤱᤒᤠᤸᤗᤧ ᤁᤢᤕᤢᤔᤠ ᤕᤧᤴᤏᤡᤴ ᤁᤧᤄᤢ᤺ᤶᤒᤧᤴ ᤜᤰᤆᤄᤳ ᤋᤠᤒᤠ ᤁᤢᤀᤡᤛᤡᤰ ᤋᤠ᤺ᤸᤗᤧ ᤂᤡᤏᤡ᤹ ᤏᤡᤱᤘᤠ᤹ ᤔᤠ᤺ᤔᤠᤀᤥ ᤁᤧᤴᤎᤩᤧ᤹ᤀᤡᤴᤗᤥ॥ 5 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤠᤰ ᤂᤠᤀᤥ᤺ᤵᤔᤠᤴ ᤏᤢ ᤗᤧᤴᤍᤡᤰᤗᤧᤴ ᤁᤢᤔᤢ᤹ᤀᤡᤍᤠᤱᤛᤠᤏᤡᤱᤗᤥ॥ ᤀᤠᤏᤡ᤹ᤃ ᤛᤧᤴᤍᤡᤰ ᤏᤢ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧ ᤁᤢᤔᤏᤠᤛᤡ ᤔᤣ᤺ᤴᤗᤥ॥ 6 ᤂᤧᤸᤗᤧᤆᤥᤃᤢᤸᤗᤧ ᤘᤣ᤹ ᤔᤏᤠᤜᤠ᤹ ᤜᤧᤰᤁᤣ ᤀᤠᤏᤡ᤹ ᤀᤡᤵᤛᤡ ᤔᤣ᤺ᤴ. ᤁᤖ ᤛᤡᤱᤛᤡᤱ ᤕᤧᤰᤕᤧᤰ ᤏᤢ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤀᤥ ᤘᤠ᤹ᤔᤠ ᤐᤥᤱᤗᤥ॥ 7 ᤌᤣᤀᤠᤱᤓᤧᤸᤗᤧ ᤁᤧᤀᤡᤶᤒᤠᤜᤠ᤹ᤃ ᤛᤧᤴᤍᤡᤰ ᤔᤧᤀᤡᤶ. ᤁᤧᤔᤛᤡᤱᤒᤠᤜᤠ᤹ᤀᤠᤱ ᤛᤧᤴᤍᤡᤰᤁᤣ ᤔᤧᤔᤛᤡᤱᤗᤥ॥ 8 ᤁᤖ ᤀᤠᤏᤡ᤹ᤃ ᤗᤧᤴᤍᤡᤰᤗᤧ ᤁᤢᤔᤏᤠ ᤀᤠᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤅᤡᤀᤠᤱ ᤛᤠᤱᤒᤣ ᤛᤧ᤺ᤵᤆᤠᤱ ᤁᤢᤀᤡᤛᤡᤰ ᤏᤛᤠᤴ ᤏᤢ ᤔᤡ᤺ᤶᤈᤡᤴ ᤆᤠᤰᤂᤢᤶ. ᤜᤧᤰᤁᤩᤠᤱ ᤛᤧᤰᤂᤠᤀᤣ ᤛᤧᤴᤗᤵ ᤀᤠᤄᤥᤛᤢᤶ ᤁᤧᤗ᤹ᤒᤠ ᤏᤡᤱᤛᤠᤱᤅᤡᤴ ᤋᤠᤱᤂᤢ᤺ᤰ ᤁᤢᤀᤡᤛᤡᤰ ᤂᤢ᤺ᤰᤂᤢᤶ. 9 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤃ ᤂᤢᤶᤍᤡᤱ ᤂᤥᤔᤠ ᤑᤠ᤹ᤀᤠᤱ ᤔᤣ᤺ᤴ. ᤁᤖ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤛᤧᤴᤗᤵ ᤂᤥᤔᤠ ᤑᤠ᤹ᤀᤠᤱ ᤋᤃᤡᤏᤢᤀᤣ ᤛᤣ᤺ᤰᤕᤢᤰ ᤀᤠᤈᤥᤃᤧᤀᤠᤱ ᤀᤠᤘᤠ᤹ᤖᤥ॥ 10 ᤂᤢᤏᤧ᤹ ᤀᤠᤏᤡ᤹ ᤗᤧᤰᤘᤠ ᤛᤩᤧᤖᤥ. ᤂᤧᤸᤗᤧᤆᤥᤃᤢᤸᤗᤧ ᤍᤠᤱᤒᤠᤴ ᤕᤢ᤺ᤸᤗᤧ ᤀᤠᤏᤡ᤹ ᤆᤠᤱᤈᤠᤱᤅᤠᤱ ᤀᤠᤕᤢᤱᤛᤠᤱ ᤀᤠᤀᤡᤶᤔᤠᤱ ᤀᤠᤏᤧᤛᤠᤱ ᤀᤠᤏᤡ᤹ ᤁᤧᤖᤧᤰ ᤂᤢᤏᤧ᤹ᤏᤢᤀᤣ ᤜᤡᤱᤔᤠ ᤀᤠᤛᤢᤰᤗᤖᤥ॥ 11 ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤜᤠᤱᤜᤠᤱ ᤔᤧᤳᤋᤠᤛᤡ. ᤁᤧᤎᤢᤶᤒᤠ ᤆᤥ᤺ᤰᤁᤠᤛᤡᤖᤥ॥ ᤛᤧᤰᤂᤠ᤺ᤸᤗᤧ ᤒᤠ ᤜᤧᤰᤁᤣᤀᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥ ᤁᤢᤏᤢᤵᤔᤠ ᤏᤡᤛᤠᤶᤔᤡᤴ 12 ᤀᤠᤸᤗ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤗᤢᤶᤔᤥ ᤕᤠᤶᤒᤢᤎᤡᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤍᤠᤱᤒᤠᤀᤥ ᤂᤡᤏᤡ᤹ ᤏᤡᤛᤠᤶ ᤏᤢ ᤛᤠᤶᤍᤡᤱ ᤁᤧᤒᤡᤒᤠ ᤗᤠᤶᤗᤥᤒᤠᤜᤠ᤹ ᤀᤡᤱᤎᤠᤱ ᤐᤡᤖᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ 13 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤔᤡ᤺ᤶᤈᤡ ᤔᤧᤳᤋᤧᤶᤛᤡᤶᤔᤧ᤹ᤀᤠᤱ ᤛᤠ᤹ᤖᤡᤰᤁᤣ ᤀᤡᤱᤎᤠᤱ ᤐᤡᤖᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤛᤏᤠᤖᤢᤱᤏᤢ ᤘᤕᤧᤶᤔᤧ᤹ᤀᤥ॥ 14 ᤁᤖ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤗᤧᤶᤛᤫᤠᤒᤠᤜᤠ᤹ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤧᤶᤛᤡᤶᤔᤧ᤹. ᤁᤡᤛᤪᤢᤰᤐᤠᤜᤠ᤹ ᤜᤠᤱᤜᤠᤱ ᤔᤧᤳᤋᤧᤶᤛᤡᤶᤔᤧ᤹. ᤁᤢᤓᤠ᤹ ᤆᤠᤜᤠᤒᤠ ᤁᤧᤈᤥ᤺ᤰᤐᤠᤜᤠ᤹ ᤁᤢᤓᤠ᤹ ᤐᤡᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤁᤧᤖᤧᤰᤏᤢ ᤏᤡᤱᤘᤠ᤹ ᤜᤠᤱᤃᤧᤶᤛᤡᤱᤔᤠᤀᤥ ᤘᤕᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥ 15 ᤂᤡᤏᤡ᤹ ᤀᤠᤳᤋᤡᤸᤗᤧᤀᤠᤱ ᤋᤠᤵᤑᤧ᤺ᤶᤒᤠᤸᤗᤧ ᤁᤢᤗᤧᤰᤘᤠ ᤋᤠᤵᤑᤧ᤺ᤶᤒᤠ ᤔᤧᤈᤥᤃᤧᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤗᤢᤶᤔᤥ ᤜᤧᤰᤁᤩᤠᤱ ᤘᤣ᤹ᤜᤠ᤹ᤏᤢᤀᤠᤱ ᤏᤢᤒᤠ ᤔᤧᤳᤇᤡᤱᤔᤠ ᤛᤍᤠᤍᤡᤱ ᤋᤶᤛᤡᤱ ᤆᤥᤃᤧᤶᤔᤧ᤹ᤀᤥ॥ 16 ᤛᤍᤠᤍᤡᤱ ᤀᤥᤔᤢ ᤗ᤹ᤖᤧᤶᤔᤧ᤹. 17 ᤆᤰᤔᤧᤸᤗ᤹ᤀᤣ ᤋᤢᤘᤠ ᤆᤥᤃᤧᤶᤔᤧ᤹. 18 ᤜᤧᤰᤁᤩᤠᤱ ᤁᤠᤰ ᤘᤠᤏᤠᤶ ᤕᤠᤰᤏᤠᤶᤔᤥ ᤏᤥᤃᤧᤴᤛᤠᤒᤠ ᤐᤥ᤺ᤰᤂᤧᤶᤔᤧ᤹ ᤁᤧᤗ᤹ᤒᤠ ᤂᤪᤡᤛ᤻ᤋ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠ ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ 19 ᤛᤣᤛᤣᤔᤠᤱᤅᤡᤴ ᤔᤧᤀᤳᤋᤧᤶᤔᤡᤴᤏᤧ᤹ᤀᤥ॥ 20 ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤁᤢᤏᤠᤔᤧᤴᤇᤠ᤹ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥ 21 ᤁᤠᤰ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤛᤠ᤹ᤖᤧᤶᤔᤧ᤹ ᤜᤧᤰᤁᤩᤠᤱ ᤏᤢᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤋᤠ᤺ᤰᤋᤧᤶᤔᤧ᤹. 22 ᤁᤖ ᤁᤠᤰ ᤑᤧᤴᤐᤠ᤺ᤴᤗᤠᤶ ᤂᤡᤏᤡ᤹ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥ 23 ᤀᤠᤸᤗ ᤕᤠᤵᤔᤡ ᤛᤏᤠᤖᤢᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤣᤛᤣ ᤁᤧᤈᤥᤃᤡᤖᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤕᤢᤔᤠ ᤕᤧᤴ ᤌᤠᤖᤡᤰ ᤂᤡᤏᤡ᤹ ᤁᤧᤖᤧᤰ ᤜᤡᤱᤔᤴᤏᤡᤴ—ᤕᤠᤶᤛᤠᤶ. ᤛᤰᤔᤠᤛᤠᤶ. ᤜᤧᤰᤁᤩᤠᤱ ᤏᤠᤛᤡᤱᤃᤧᤴ ᤌᤰᤁᤡᤴ—ᤑᤥᤋᤩᤠ ᤔᤣ᤺ᤴᤏᤣ ᤛᤣᤛᤣ ᤁᤳᤋᤢᤏᤡᤖᤥ॥ 24 ᤂᤡᤏᤡ᤹ ᤁᤧᤀᤢ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥ᤺ᤰᤐᤠᤸᤗᤧ ᤁᤴ ᤐᤠ᤺ᤴᤜᤠ᤹ ᤆᤥᤃᤢᤀᤣᤖᤥ॥ 25 ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤣ ᤗᤠᤃᤡ ᤋᤢᤘᤠ ᤀᤠᤈᤥᤃᤧᤶ ᤀᤠᤒᤡᤖᤧᤶᤔᤧ᤹ᤀᤥ॥ 26 ᤜᤧᤰᤁᤩᤠᤱ ᤁᤧᤖᤧᤰ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧ ᤔᤡ᤺ᤶᤈᤡᤏᤢ ᤛᤧᤘᤠ ᤔᤕᤧᤶᤔᤧ᤹ᤀᤥ॥ 27 ᤍᤠᤱᤒᤠᤸᤗᤧ ᤁᤢᤕᤢᤰᤗᤠᤶᤒᤠ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤁᤴ ᤛᤰᤀᤡᤱᤄᤱᤅᤡᤴ ᤁᤠᤰ ᤏᤛᤠᤏᤡᤒᤠᤜᤠ᤹ ᤏᤡ᤺ᤵᤔᤠ ᤐᤠᤱᤄᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤏᤡᤱᤗᤥ॥ 28 ᤀᤠᤸᤗ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.