᥇ ᤌᤡᤛ᤻ᤛᤗᤥᤏᤡᤁᤡ 4 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠ

¹ ᤀᤠᤸᤗ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠᤖ ᤜᤡᤱᤔᤠ ᤐᤥᤱ ᤗ᤹ᤖᤡᤰ ᤀᤠᤏᤡᤃᤧᤗᤠᤶ ᤁᤧᤜᤢ᤹ᤀᤠᤛᤡᤒᤠ ᤜᤧᤰᤁᤣᤀᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹॥ ᤁᤖ ᤀᤠᤸᤗᤛᤠᤱ ᤕᤖᤡᤰ ᤏᤢ᤺ᤖᤡᤰᤁᤠᤱ ᤁᤴ ᤐᤠ᤺ᤴᤜᤠ᤹ ᤁᤧᤈᤥᤃᤢᤶᤗᤀᤣ ᤐᤥᤱ ᤑᤠ᤹ᤀᤠᤱ ᤍᤠᤱᤒᤠ ᤕᤧᤛᤢᤖᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥

² ᤌᤣᤀᤠᤱᤓᤧᤸᤗᤧ ᤁᤴ ᤂᤡᤏᤡ᤹ ᤐᤡᤀᤠᤛᤡᤃᤧᤒᤠ ᤀᤡᤱᤈᤠᤱᤜᤠ᤹ᤃ ᤍᤠᤱᤒᤠ ᤕᤧᤛᤢᤖᤧ ᤁᤢᤕᤢᤰᤁᤥᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥

³ ᤂᤡᤏᤡ᤹ ᤛᤣᤛᤣ ᤁᤧᤘᤕᤡᤏᤡ ᤁᤧᤗ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤁᤠᤰ ᤘᤣ᤹ ᤔᤧᤴᤇᤢᤔᤠ᤹ ᤕᤧᤶᤒᤡᤳᤇᤠ᤹ ᤆᤠᤖᤠᤶᤔᤥᤗᤠᤶ ᤁᤧᤒᤥᤱᤒᤠ ᤆᤡ᤺ᤴᤈᤡ᤺ᤶᤒᤠᤀᤥᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ॥

⁴ ᤘᤣ᤹ᤜᤠ᤹ᤖᤧ ᤀᤡᤱᤎᤠᤱ ᤁᤧᤶᤒᤡᤖᤡᤏᤡ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤏᤠᤛᤡᤱᤃᤧᤴ ᤌᤰᤁᤡᤴ ᤛᤣᤛᤣ ᤁᤵᤔᤠ ᤐᤥᤱ ᤁᤧᤗ᤹ᤒᤠᤱᤃ ᤂᤡᤏᤡ᤹ ᤗᤧᤔᤠ ᤐᤥᤱᤗᤥ॥

⁵ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤔᤏᤠ ᤛᤢᤘᤠᤱᤜᤠ᤹ ᤜᤧᤰᤁᤣ ᤗᤠᤶᤔᤠ ᤑᤧᤴᤏᤡᤱᤘᤠ᤹ ᤁᤵᤔᤠ ᤔᤧᤏᤢ᤹ᤏᤧᤴᤗᤥ॥

⁶ ᤀᤰᤂᤣᤗ᤹ᤖᤡᤰ ᤁᤴ ᤐᤠ᤺ᤴᤏᤥ ᤀᤠᤳᤋᤡᤸᤗᤧᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤏᤢ ᤗᤠᤶᤛᤡᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤁᤠᤰ ᤜᤧᤰᤋᤱᤒᤠ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢᤛᤡ ᤑᤠ᤹ᤀᤠᤱ ᤋᤃᤡᤛᤠ ᤀᤠᤏᤡᤃᤣ ᤛᤠᤶᤍᤡᤱ ᤐᤡᤀᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥

⁷ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤃ ᤆᤡ᤺ᤴᤈᤡ᤺ᤶᤒᤠ ᤜᤡᤱᤔᤴᤏᤥ ᤔᤣ᤺ᤴ. ᤁᤖ ᤛᤣᤛᤣ ᤛᤠᤱᤛᤠᤱᤅᤠᤱ ᤜᤡᤱᤔᤠ ᤗ᤹ᤖᤡᤰ ᤀᤠᤀᤢ᤺ᤳᤋᤧᤒᤠᤖᤥ॥

⁸ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤸᤗᤧ ᤁᤴ ᤏᤡᤛᤠᤶᤔᤡᤴ ᤏᤠ᤹ᤖᤢ. ᤂᤧᤸᤗᤧᤃ ᤔᤧᤴᤇᤠᤶᤃᤧᤴ ᤕᤠᤵᤔᤡᤴ ᤔᤣ᤺ᤴ. ᤁᤖ ᤂᤡᤏᤡ᤹ ᤛᤣᤛᤣᤔᤠᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤹ᤖᤢᤒᤠᤖᤥ॥

⁹ ᤀᤠᤸᤗ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤶᤔᤥ ᤀᤠᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥᤱ ᤁᤧᤗ᤹ᤒᤠᤴ ᤛᤠᤵᤔᤠᤖ ᤏᤧᤔᤠ ᤆᤠᤜᤠᤒᤠ ᤔᤧᤈᤥᤰᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤂᤡᤏᤡ᤹ ᤀᤰᤂᤣᤗ᤹ᤖᤡᤰ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤐᤥᤱ ᤑᤠ᤹ᤀᤠᤱ ᤁᤧᤜᤢ᤹ᤖᤡᤀᤠᤱ ᤁᤧᤘᤕᤡ᤹ᤖᤥ॥

¹⁰ ᤛᤧᤰᤂᤠ᤺ᤸᤗᤧ. ᤁᤠᤰ ᤔᤧᤛᤣᤍᤥᤏᤡᤕᤠ ᤌᤢᤶᤔᤥᤒᤠ ᤏᤛᤠᤏᤡᤒᤠᤜᤠ᤹ᤏᤢᤀᤠᤱ ᤒᤠᤜᤧᤰᤁᤣ ᤁᤧᤈᤥᤃᤢᤶᤗ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤸᤗᤛᤠᤱ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤁᤠᤛᤡᤃᤧᤖᤥ॥

¹¹ ᤛᤏᤠᤖᤢᤱᤅᤥ ᤜᤡᤱᤔᤴ ᤂᤡᤏᤡ᤹ ᤜᤡᤱᤔᤴᤗᤧ ᤋᤠᤖᤠᤵ ᤆᤥᤃᤧᤶᤔᤧ᤹ᤀᤥ॥ ᤀᤠᤏᤡᤃᤣ ᤋᤃᤡᤛᤠ ᤔᤧᤳᤋᤠᤛᤡᤃᤧᤒᤠ ᤁᤢᤀᤡᤛᤡᤰ ᤛᤫᤠ᤺ᤳ ᤘᤕᤧᤶᤔᤧ᤹ᤀᤠᤱ ᤀᤠᤒᤠᤅᤣ ᤕᤠ᤺ᤶᤒᤰᤁᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤖ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥

¹² ᤜᤧᤰᤁᤣ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤜᤠ᤹ᤖᤧ ᤀᤡᤱᤎᤠᤱ ᤁᤧᤶᤒᤡᤖᤡᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤆᤠᤕᤠ᤺ᤶᤒᤥᤀᤥ ᤁᤢᤓᤠᤖᤧ ᤗᤠᤃᤡ ᤘᤣ᤹ ᤔᤏᤠᤜᤠ᤹ᤀᤥ ᤋᤠ᤺ᤰᤐᤥ ᤆᤥ᤺ᤰᤔᤠ ᤔᤧᤒᤥᤱᤏᤧᤸᤗᤥ॥

ᤍᤠᤱᤒᤠᤸᤗᤧ ᤁᤢᤕᤢ᤺ᤔᤠᤴ

¹³ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤁᤧᤛᤡᤒᤠ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤸᤗᤧ ᤔᤧᤴᤏᤡᤀᤣ ᤔᤧᤘᤕᤧᤶᤔᤡᤴᤏᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤕᤧᤛᤢᤀᤥ ᤏᤡᤱᤛᤠᤱ ᤁᤧᤜᤥᤵᤐᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤔᤧᤖᤡᤱ ᤔᤧᤎᤰᤋᤧᤶᤔᤡᤴᤏᤧ᤹ᤀᤥ॥

¹⁴ ᤌᤣᤀᤠᤱᤓᤧᤸᤗᤧ ᤕᤧᤛᤢᤴ ᤛᤩᤧᤀᤠᤱ ᤕᤠᤶᤔᤥ ᤜᤡᤅᤧᤒᤠ ᤐᤠ᤺ᤴᤏᤥ ᤀᤠᤏᤡ᤹ ᤏᤛᤠᤴ ᤀᤠᤈᤥᤃᤢᤶ. ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤛᤠᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡᤒᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥᤃᤢᤛᤡᤀᤠᤱ ᤕᤧᤛᤢ᤺ᤴᤏᤢᤀᤣ ᤋᤠᤖᤢᤛᤡᤖᤥ॥

¹⁵ ᤍᤠᤱᤒᤠᤸᤗᤧ ᤀᤠᤒᤠᤅᤣ ᤁᤢᤒᤠ᤺ᤴᤈᤠᤴᤗᤠᤶᤒᤠ ᤀᤠᤏᤡᤃᤣ ᤀᤰᤂᤣ ᤐᤠ᤺ᤳᤋᤢᤶᤒᤧᤖᤥ. ᤍᤠᤱᤒᤠᤸᤗᤧ ᤁᤢᤕᤢᤔᤠ ᤕᤧᤶ ᤌᤠᤖᤡᤰ ᤀᤠᤏᤡ᤹ ᤔᤧᤴᤇᤡᤀᤣ ᤁᤧᤘᤠ᤹ᤒᤠᤜᤠ᤹ᤖᤧ ᤁᤧᤛᤡᤒᤠᤀᤠᤱ ᤁᤧᤒᤣ᤺ᤰᤐᤠᤜᤠ᤹ ᤀᤠᤰᤂᤣᤀᤠᤱᤛᤠᤱ ᤗᤠᤶᤀᤠᤶᤒᤠᤰᤋᤢᤶᤛᤡᤶᤔᤡᤴᤗᤥ॥

¹⁶ ᤌᤣᤀᤠᤱᤓᤧᤸᤗᤧ ᤋᤢᤶᤔᤠᤱᤗᤠᤀᤡᤱᤒᤠᤸᤗᤧ ᤁᤢᤀᤡᤰᤗᤠ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤢᤳᤋᤢᤖᤡ᤺ᤵᤐᤠᤸᤗᤧ ᤁᤢᤀᤡᤰᤗᤠᤏᤢ ᤍᤠᤱᤒᤠᤴᤏᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤗ ᤕᤢᤖᤥ॥ ᤜᤧᤰᤁᤩᤠᤱ ᤁᤠᤰ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠᤀᤠᤱ ᤁᤧᤛᤡᤒᤠᤜᤠ᤹ ᤛᤡᤔᤧᤴᤗᤠᤶ ᤜᤡᤱᤔᤴᤏᤥ ᤁᤠᤰᤏᤢ ᤋᤃᤡ ᤔᤧᤜᤡᤱᤅᤠᤱ ᤔᤧᤒᤥᤰᤗᤥ॥

¹⁷ ᤜᤧᤰᤁᤩᤠᤱ ᤀᤠᤏᤡ᤹ ᤀᤡᤰᤛᤠᤀᤥ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠᤜᤠ᤹ᤀᤠᤱ ᤍᤠᤱᤒᤠᤸᤗᤧ ᤁᤢᤍᤢᤶᤛᤧ ᤋᤠᤱᤛᤠᤰᤐᤠᤀᤥ ᤌᤠ᤺ᤱ ᤀᤠᤒᤱ ᤀᤠᤍᤣ᤹ᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤀᤠᤓᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤛᤍᤠᤍᤡᤱ ᤍᤠᤱᤒᤠᤴᤏᤢ ᤀᤠᤘᤠ᤹ᤖᤥ॥

¹⁸ ᤁᤴ ᤐᤠ᤺ᤴᤜᤠ᤹ᤗᤠᤶᤒᤠ ᤜᤠᤱᤜᤠᤱ ᤔᤧᤳᤋᤠᤛᤡᤶᤔᤧ᤹ᤀᤥ॥