᥇ ᤌᤡᤛ᤻ᤛᤗᤥᤏᤡᤁᤡ 3 - LIFOTNT

¹ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤃᤧᤃ ᤏᤠᤛᤡᤌ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤏᤠᤱ ᤀᤧᤌᤧᤴᤛ ᤕᤧᤰᤕᤰᤁᤥ ᤀᤠᤏᤡᤃᤧᤖᤰ ᤘᤠ᤹ᤔᤠ ᤗᤠ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤖᤥ॥

² ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤂᤪᤡᤛ᤻ᤋᤖᤧ ᤁᤢᤛᤢᤏᤠᤀᤡᤱᤅᤡᤴ ᤀᤠᤏᤡᤃᤧᤏᤢ ᤛᤥᤖᤡᤰ ᤀᤡᤱᤓᤴ ᤁᤧᤈᤥ᤺ᤰᤐᤠ ᤀᤠᤏᤡᤃᤣ ᤏᤢᤛᤠ᤹ ᤋᤡᤔᤥᤌᤡᤴ ᤂᤡᤏᤡ᤹ᤀᤥ ᤐᤠᤱᤄᤢᤶᤒᤧᤀᤠᤱ ᤘᤠ᤹ᤖᤥ॥ ᤜᤠᤖᤠ᤹ ᤂᤢᤏᤧ᤹ᤀᤣ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡᤖ. ᤜᤠᤱᤜᤠᤱ ᤁᤧᤔᤧᤳᤋᤡᤖᤖᤥ॥

³ ᤜᤧᤰᤁᤣᤗ᤹ᤖᤡᤰ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤴ ᤐᤛᤠᤰᤁᤧᤛᤠᤰᤐᤠ ᤏᤡᤱᤄᤢᤶᤔᤡᤸᤗᤧ ᤆᤥᤃᤢᤸᤗᤧ ᤏᤛᤠ᤺ᤴᤏᤡᤴ ᤔᤧᤸᤗᤧᤖᤢᤴᤗᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤀᤠᤈᤥᤃᤢᤶᤔᤡᤸᤗᤧ ᤀᤰᤋᤱᤒᤠ ᤏᤡᤱᤄᤢᤶᤜᤠ᤹ᤃ ᤋᤠᤀᤣ ᤁᤧᤗ᤹ᤒᤠᤴ ᤂᤡᤏᤡ᤹ ᤁᤧᤏᤡᤛᤢᤶᤔᤣᤖᤥ.

⁴ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤏᤢ ᤘᤕᤡᤃᤧᤸᤗᤧᤛᤠ ᤋᤃᤡᤀᤣ ᤀᤠᤰᤋᤱᤒᤠ ᤋᤢᤰᤂᤣᤴ ᤋᤠ ᤑᤠ᤹ᤀᤠᤱ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧᤀᤠᤱ ᤘᤕᤡᤃᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤄᤢᤶᤔᤡᤴ ᤋᤩᤧᤀᤠᤱ ᤘᤠ᤹ᤒᤠᤴ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥

⁵ ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤴᤏᤠᤱᤎᤥ ᤏᤠᤛᤡᤌ᤺ᤵᤔᤠ ᤔᤧᤴᤇᤢᤰᤐᤧᤴᤏᤠᤱ ᤂᤡᤏᤡ᤹ ᤏᤛᤠ᤺ᤴᤏᤥ ᤁᤧᤎᤢᤶᤒᤠ ᤁᤧᤈᤥᤃᤡᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤂᤡᤏᤡ᤹ ᤛᤠ᤹ᤛᤧ ᤋᤡᤔᤥᤌᤡᤴ ᤐᤠᤱᤄᤢᤱᤅᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤔᤠᤑᤧᤴᤛᤠᤶᤔᤡᤸᤗᤧ ᤂᤡᤏᤡ᤹ ᤜᤱᤃᤧᤛᤠ᤹ᤖᤡᤀᤠᤱ ᤀᤠᤏᤡᤃᤣ ᤆᤥ᤺ᤰᤔᤏᤠᤒᤠ ᤕᤠᤶᤒᤢᤎᤡᤰᤁᤡᤴ ᤜᤏᤧᤖᤰ ᤐᤥ᤺ᤰᤂᤧᤒᤡ ᤑᤠ᤹ᤀᤠᤱ ᤁᤡᤛᤠᤱᤅᤠᤱ ᤘᤕᤠᤱᤗᤥ॥

ᤋᤡᤔᤥᤌᤡ᤺ᤸᤗᤧ ᤋᤠᤖᤢᤒᤠ ᤀᤡᤱᤄᤱ

⁶ ᤁᤖ ᤋᤡᤔᤥᤌᤡᤴ ᤂᤡᤏᤡ᤹ᤀᤥᤗᤠᤶ ᤀᤠᤏᤡᤃᤧᤀᤥ ᤋᤩᤧᤀᤠᤱ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤏᤢ ᤔᤡ᤺ᤶᤈᤡ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢᤒᤠ ᤀᤡᤱᤄᤱ ᤋᤠᤖᤢ. ᤜᤧᤰᤁᤩᤠᤱ ᤂᤡᤏᤡ᤹ ᤀᤥᤔᤢ ᤁᤧᤗ᤹ᤖᤡᤖ ᤕᤠᤵᤔᤡ ᤏᤡᤱᤘᤠ᤹ ᤁᤧᤀᤡ᤺ᤳᤋᤡᤒᤠ. ᤛᤠ᤹ᤖᤡᤰ ᤋᤢᤶᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠ ᤐᤠ᤺ᤴᤏᤡᤴ ᤕᤠᤵᤔᤡ ᤆᤧᤰᤋᤡᤃᤧᤖᤥ॥ ᤂᤧᤴ ᤁᤢᤀᤡᤛᤡ᤺ᤰᤁᤣ ᤀᤠᤏᤡᤃᤧᤀᤠᤱ ᤂᤡᤏᤡ᤹ ᤋᤢᤶᤔᤠ ᤛᤠ᤹ᤖᤡᤰᤁᤣ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤕᤡᤃᤧᤖᤥ॥

⁷ ᤂᤧᤸᤗᤧᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤠᤏᤡᤃᤣ ᤁᤠᤰ ᤁᤧᤛᤠᤰᤐᤠ ᤐᤠᤴ ᤏᤢ ᤋᤢᤰᤂᤣ ᤗᤠᤰᤂᤣᤜᤠ᤹ᤀᤥᤀᤠᤱ ᤂᤡᤏᤡ᤹ ᤏᤛᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤶᤒᤧᤸᤗᤧ ᤀᤠᤏᤡᤃᤣ ᤜᤠᤱᤜᤠᤱ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥

⁸ ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤀᤥ ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤒᤥ᤺ᤰᤂᤡᤸᤗᤧᤃ ᤛᤧᤰᤂᤠᤀᤣ ᤀᤠᤏᤡᤃᤣ ᤛᤰᤔᤠ ᤋᤠᤖᤥ॥

⁹ ᤂᤡᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠ᤹ᤖᤡᤰ ᤏᤥᤃᤧᤴ ᤐᤡᤖᤢᤶᤒᤠᤖᤥ॥ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤏᤡᤃᤣ ᤛᤠ᤹ᤖᤡᤰ ᤛ᤺ᤳᤋᤡᤃᤧᤀᤠᤱ ᤘᤕᤡᤃᤧᤖᤥ॥

¹⁰ ᤀᤠᤏᤡᤃᤧᤃ ᤂᤡᤏᤡ᤹ᤏᤢ ᤋᤢᤶᤔᤠᤀᤠᤱ ᤂᤡᤏᤡ᤹ ᤏᤛᤠᤴ ᤁᤧᤛᤢ᤺ᤶᤒᤠ ᤐᤠ᤺ᤴᤜᤠ᤹ᤀᤥ ᤁᤧᤎᤢᤶᤒᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤁᤠᤰ ᤏᤡᤱᤘᤠ᤹ᤗᤠᤶᤒᤠ ᤋᤢᤘᤠ ᤆᤥᤃᤡᤃᤧᤖᤥ॥

¹¹ ᤀᤠᤸᤗ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤠᤅᤣ ᤏᤢ ᤀᤠᤏᤡ᤹ ᤍᤠᤱᤒᤠ ᤕᤧᤛᤢᤖᤧ ᤂᤡᤏᤡ᤹ᤀᤥ ᤋᤠᤔᤠ ᤗᤠᤶ ᤜᤴᤍᤢ ᤐᤡᤖᤡᤃᤧᤖᤖᤥ॥

¹² ᤜᤧᤰᤁᤩᤠᤱ ᤀᤠᤏᤡᤃᤣ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤁᤠᤛᤡᤃᤧᤒᤠ ᤜᤧᤰᤁᤣᤀᤣ ᤜᤠᤖᤠ᤹ ᤍᤠᤱᤒᤠᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤁᤧᤒᤥᤱᤒᤠᤖ ᤁᤧᤒᤣ᤺ᤰᤐᤠ ᤁᤧᤈᤥᤃᤡᤖᤖᤥ॥

¹³ ᤂᤡᤏᤡ᤹ ᤏᤡᤱᤘᤠ᤹ᤒᤠᤴ ᤜᤠᤱᤜᤠᤱ ᤔᤧᤳᤋᤢᤏᤡᤖᤥ. ᤀᤰᤂᤣᤗ᤹ᤖᤡᤰ ᤀᤠᤏᤡ᤹ ᤍᤠᤱᤒᤠ ᤕᤧᤛᤢᤴ ᤁᤠᤰ ᤛᤣᤛᤣ ᤁᤢᤔᤏᤠᤜᤠ᤹ᤏᤢ ᤕᤠᤶᤔᤥ ᤕᤢ᤺ᤸᤗᤧ ᤀᤠᤏᤡ᤹ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤛᤣᤛᤣ ᤏᤢ ᤑᤥᤋᤩᤠ ᤔᤣ᤺ᤴᤏᤣ ᤁᤧᤈᤥᤃᤡᤖᤖᤥ॥