᥇ ᤛᤠᤔᤢᤀᤧᤗ 9 - LIFOTNTᤛᤠᤔᤢᤀᤧᤖᤧ ᤛᤠᤘᤗᤗᤧᤴ ᤋᤢᤔᤢ᤹ 1 ᤒᤢᤏᤩᤠᤔᤡᤏ ᤌᤠ᤺ᤰᤁᤥᤒᤠ ᤗᤳᤇᤠ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤔᤏᤠᤎᤡᤰ ᤘᤕᤧ. ᤂᤧᤸᤗᤧ ᤁᤢᤔᤡᤱ ᤁᤡᤛ ᤘᤕᤧ॥ ᤂᤢᤏᤧ᤹ ᤀᤒᤡᤀᤧᤗᤖᤧ ᤁᤢᤛ᤻ᤛᤠ. ᤈᤖᤥᤖᤖᤧ ᤁᤢᤶᤔᤧᤴᤇᤠ᤹. ᤒᤁᤥᤖᤋᤖᤧ ᤁᤢᤈᤰᤔᤧᤴᤇᤠ᤹. ᤜᤧᤰᤁᤩᤠᤱ ᤀᤐᤡᤜᤖᤧ ᤁᤢᤒᤧᤴᤔᤧᤴᤇᤠ᤹ ᤘᤕᤧ॥ 2 ᤁᤡᤛᤖᤧ ᤛᤠᤘᤗ ᤔᤧᤵᤔᤏᤠᤒᤠ ᤁᤢᤛ᤻ᤛᤠ ᤌᤠᤱᤒᤧᤴᤎᤡᤰ ᤘᤕᤧ. ᤂᤢᤏᤧ᤹ ᤀᤡᤛᤪᤠᤀᤡᤗᤀᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤏᤢ ᤕᤶᤒᤠ ᤁᤣ᤺ᤶᤒᤠ ᤔᤏᤠ ᤘᤕᤧ॥ ᤘᤣ᤹ ᤔᤏᤠᤜᤠ᤹ ᤂᤢᤏᤧ᤹ ᤁᤢᤓᤰᤋᤠᤱᤅᤥ ᤌᤠᤖᤡᤰᤗᤰ ᤔᤧᤒᤳᤇᤧ॥ 3 ᤌᤡᤰᤕᤧᤴ ᤛᤠᤘᤗᤖᤧ ᤁᤢᤶᤒᤠ ᤁᤡᤛᤖᤧ ᤁᤢᤓᤠ ᤁᤢᤀᤍᤱᤜᤠ᤹ ᤔᤧᤔᤕᤧ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛ᤻ᤛᤠ ᤛᤠᤘᤗᤧᤴ ᤔᤧᤳᤋᤢ. “ᤛᤣᤘᤠᤖᤥᤒᤠᤎᤡᤰ ᤋᤣ᤹ᤖᤧᤀᤠᤱ ᤀᤍᤱ ᤁᤥ᤺ᤳᤇᤧ ᤐᤣᤃᤧ᤹॥” 4 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤎᤡᤰ ᤋᤣ᤹ᤖᤢᤀᤠᤱ ᤀᤡᤑᤪᤠᤀᤡᤔ ᤗᤠᤈᤣ᤹ᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤁᤠ᤺ᤰᤋᤢᤀᤠᤱ ᤛᤗᤡᤛᤠ ᤌᤢᤶ ᤐᤥ᤺ᤰᤂᤧᤖ ᤐᤣ. ᤁᤖ ᤂᤧᤵᤔᤥ ᤀᤍᤱᤜᤠ᤹ ᤔᤧᤄᤥᤛᤢᤴᤇᤡᤴ॥ ᤂᤢᤴᤇᤡ᤹ ᤛᤠᤗᤡᤶ ᤁᤢᤄᤡᤖᤡᤒᤠ ᤌᤢᤶᤔᤥ ᤐᤥ᤺ᤰᤂᤧᤛᤡᤖ ᤐᤣᤛᤡ. ᤂᤧᤵᤔᤥᤀᤠᤱ ᤀᤍᤱᤜᤠ᤹ ᤔᤧᤜᤥ᤺ᤵᤋᤧ॥ ᤜᤧᤰᤁᤩᤠᤱ ᤂᤢᤴᤇᤡ᤹ ᤒᤡᤏᤩᤠᤔᤡᤴᤗᤧ ᤁᤢᤍᤧ᤺ᤱᤃᤵ ᤁᤧᤖᤧᤰ ᤁᤥ᤺ᤳᤋᤧᤇᤢᤛᤡᤛᤠᤱ ᤂᤧᤱᤜᤠ᤹ᤖᤧ ᤀᤍᤱᤜᤠ᤹ ᤀᤠᤳᤋᤥᤀᤠᤱ ᤂᤥᤔᤠ ᤔᤧᤛᤢᤰᤋᤧᤛᤢᤴ॥ 5 ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤢᤐ ᤌᤢᤶᤔᤥ ᤁᤧᤖᤧᤇᤡ. ᤜᤴᤏᤠᤱ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤧᤴ ᤔᤧᤳᤋᤢ. “ᤑᤧᤖᤧ᤹. ᤀᤠᤸᤗ ᤜᤡᤶᤔᤥ ᤏᤢ᤺ᤱᤛᤡ ᤐᤡᤳᤇᤡ॥ ᤔᤣ᤺ᤴᤏᤧᤑᤃᤪ ᤀᤠᤶᤒᤠᤖᤧ ᤁᤢᤀᤍᤱᤜᤠ᤹ ᤏᤡᤱᤘᤠ᤹ ᤀᤡ᤺ᤵᤔᤠ ᤗᤧᤖᤢᤛᤡ᤹ ᤜᤧᤰᤁᤩᤠᤱ ᤀᤠᤴᤇᤡ᤹ ᤗᤠᤃᤡ ᤁᤢᤏᤡᤱᤘᤠ᤹ ᤋᤢᤰᤂᤣ ᤆᤠᤒᤡᤗᤠ॥” 6 ᤁᤖ ᤁᤢᤛᤧᤘᤠᤖᤥᤒᤧᤸᤗᤧ ᤔᤧᤳᤋᤢ. “ᤂᤠ. ᤀᤠᤏᤡᤱᤘᤠ᤹ ᤛᤢᤶᤗ᤹ᤖᤧ. ᤁᤴ ᤐᤠᤱᤈᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤁᤢᤔᤡᤱ ᤁᤧᤀᤡᤱᤒᤠ ᤁᤢᤔᤏᤠᤎᤡᤰ ᤘᤠ᤹॥ ᤂᤢᤏᤧ᤹ᤃ ᤁᤵᤔᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳ॥ ᤀᤠᤴᤇᤡ᤹ ᤐᤡᤳᤇᤡᤀᤠᤱ ᤂᤧᤴᤏᤡᤴ ᤁᤥ᤺ᤳᤇᤢ॥ ᤀᤠᤴᤇᤡ᤹ ᤀᤠᤳᤋᤡᤴ ᤗᤠᤶ ᤐᤥᤱᤔᤠᤀᤠᤱ ᤀᤍᤱ ᤁᤥ᤺ᤳᤇᤧ ᤐᤣ᤺ᤰᤔᤠᤒᤥᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤔᤧᤳᤇᤡ᤹॥” 7 ᤁᤖ ᤛᤠᤘᤗᤖᤧ ᤔᤧᤳᤋᤢ. “ᤀᤠᤴᤇᤡ᤹ ᤀᤠᤒᤡᤳᤇᤡᤸᤗᤧ ᤂᤢᤏᤧ᤹ ᤌᤣ ᤐᤡᤔᤠ ᤀᤠᤛᤢᤰᤛᤢᤒᤣ᥅ ᤀᤠᤴᤇᤡ᤹ ᤌᤣᤀᤠᤱ ᤀᤠᤱᤃᤳᤇᤢᤴ᤹॥ ᤀᤠᤴᤇᤡ᤹ ᤆᤠᤔᤠ ᤁᤢᤈᤠ᤺ᤴᤏᤣ ᤁᤧᤖᤧᤰ ᤔᤠᤖᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤴ ᤐᤡᤔᤠᤖᤧ ᤗᤠᤃᤡ ᤀᤠᤴᤇᤡ᤹ ᤛᤢᤱ ᤌᤣᤀᤠᤱ ᤀᤠᤱᤃᤳᤇᤢᤴ᤹॥ ᤀᤠᤴᤇᤡ᤹ᤏᤢ ᤌᤣ ᤘᤠ᤹ᤀᤠᤱᤒᤣ᥅” 8 ᤁᤢᤛᤧᤘᤠᤖᤥᤒᤧᤸᤗᤧ ᤕᤠᤶᤔᤥ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤗᤳᤇᤠ ᤕᤢᤵᤐᤠᤕᤠᤱ ᤁᤳᤋᤢᤱ᤹॥ ᤀᤠᤴᤇᤡ᤹ ᤀᤠᤳᤋᤠᤴ ᤐᤣ᤺ᤰᤔᤠ ᤐᤥᤱ ᤂᤧᤴ ᤀᤠᤔᤧᤳᤇᤡᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤴ ᤕᤢᤵᤐᤠᤴ ᤂᤢᤏᤧ᤹ ᤐᤡᤖᤢᤱ᤹॥” 9 (ᤂᤧᤴ ᤕᤧᤶᤔᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤢᤈᤠ ᤏᤠ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤰᤂᤣ ᤐᤠ᤺ᤵᤔᤠ ᤌᤡᤶ ᤘᤕᤧ. “ᤀᤠᤏᤡ᤹ ᤐᤣᤃᤡᤀᤠᤱ ᤛᤢᤑᤥ ᤁᤧᤏᤡᤒᤧᤴ ᤛᤣ᤺ᤴᤍᤥᤛᤢᤶ॥” ᤌᤣᤀᤠᤱᤓᤧᤸᤗᤧ ᤀᤠᤀᤡᤴ ᤋᤠ᤺ᤴᤍᤡᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤂᤧᤴ ᤕᤧᤶᤔᤥ ᤛᤢᤑᤥ ᤁᤧᤏᤡᤒᤠ ᤔᤧᤔᤧᤳᤋᤢ॥) 10 ᤛᤠᤘᤗᤧᤴ ᤋᤧᤴᤍᤧᤀᤠᤱ ᤐᤠ᤺ᤳᤋᤢ. “ᤏᤢᤒᤠ ᤐᤥ᤺ᤰᤂᤧ. ᤀᤠᤴᤇᤡ᤹ ᤜᤠᤒᤠᤜᤧᤰᤁᤣ ᤆᤥ᤺ᤰᤛᤢ॥” ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤁᤧᤘᤠ᤹ᤒᤠ ᤐᤠᤱᤈᤢᤶ ᤗᤧᤵᤛᤠᤱ ᤂᤢᤴᤇᤡ᤹ ᤌᤠᤏᤧᤛᤡ॥ 11 ᤂᤧᤱᤜᤠ᤹ ᤐᤠᤱᤈᤢᤶ ᤁᤧᤒᤣ᤺ᤰᤐᤠ ᤁᤥ᤺ᤰᤔᤠᤀᤥᤒᤠ ᤌᤠᤶᤔᤠᤱ ᤗᤠᤶᤔᤥ ᤐᤣᤛᤡᤖ ᤐᤳᤇᤧᤛᤡᤸᤗᤧ ᤂᤧᤱᤜᤠ᤹ᤖᤧ ᤆᤫᤠ᤺ᤳ ᤑᤠ᤺ᤳᤇᤧ ᤁᤧᤓᤧᤶᤔᤠᤖ ᤁᤧᤒᤵᤔᤠ ᤔᤧᤴᤇ᤻ᤕᤠᤜᤠ᤹ ᤋᤢᤔᤧᤛᤢᤛᤡ॥ ᤜᤧᤰᤁᤩᤠᤱ ᤂᤢᤴᤇᤡ᤹ ᤂᤧᤱᤜᤠ᤹ ᤛᤧ᤺ᤴᤗᤠᤵᤋᤧᤛᤢ. “ᤛᤢᤑᤥ ᤁᤧᤏᤡᤒᤠ ᤔᤏᤠᤴ ᤜᤡᤶᤔᤥ ᤘᤠ᤹ᤒᤡ᥅” 12 ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤘᤠ᤹ᤖᤥ. ᤂᤢᤏᤧ᤹ᤃ ᤂᤠᤖᤰ ᤂᤧᤴᤇᤡ᤹ ᤋᤃᤡ ᤐᤣ᤺ᤰᤗ ᤐᤳ॥ ᤜᤠᤖᤠ ᤐᤣᤛᤧᤇᤧ᤹. ᤂᤢᤏᤧ᤹ᤃ ᤀᤠᤏᤡᤃᤣ ᤐᤠᤱᤈᤢᤶᤔᤥ ᤀᤠᤀᤡᤴᤗᤰ ᤁᤧᤖᤧ ᤋᤩᤧᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤀᤡᤴ ᤁᤥ᤺ᤰᤔᤠᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤍᤧᤴᤏᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤁᤧᤒᤥᤱᤒᤠ ᤘᤠ᤹॥ 13 ᤁᤥ᤺ᤰᤔᤠᤀᤥᤒᤠ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤍᤧᤴᤏᤥ ᤂᤢᤏᤧ᤹ ᤆᤠᤈᤠᤛᤧ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡᤀᤣ ᤐᤠᤱᤈᤢᤶᤔᤥ ᤂᤧᤴᤇᤡ᤹ ᤁᤧᤃᤧᤳᤇᤡᤖ ᤁᤧᤒᤳᤇᤡᤸᤗᤧᤛᤠ ᤂᤢᤏᤧ᤹ ᤁᤧᤍᤢᤶᤛᤢ᤹॥ ᤂᤢᤏᤧ᤹ ᤔᤧᤱᤃᤧᤳᤋᤣ ᤌᤠᤖᤡᤰ ᤔᤏᤠᤜᤠ᤹ᤖᤧ ᤁᤢᤈᤠ ᤔᤧᤴᤈᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧ᤹ᤕᤥ ᤁᤧᤈᤢᤶᤒᤠ ᤔᤏᤠᤜᤠ᤹ᤖᤧ ᤆᤠᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤛᤡᤍᤢᤱᤈᤓᤠᤀᤥ ᤔᤢ᤹ᤀᤡᤛᤠᤶ ᤌᤠᤔᤠ ᤐᤥᤱ॥ ᤜᤧᤰᤁᤩᤠᤱ ᤂᤧᤴᤇᤡ᤹ ᤂᤢᤏᤧ᤹ ᤀᤠᤸᤗᤥᤛᤠ ᤁᤧᤍᤢᤶᤛᤢ᤹॥” 14 ᤂᤢᤴᤇᤡ᤹ ᤐᤠᤱᤈᤢᤶ ᤗᤧᤵᤔᤠᤱ ᤌᤠᤏᤧᤇᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤠᤱᤈᤢᤶᤔᤥ ᤁᤧᤖᤧᤛᤡᤖ ᤐᤳᤇᤧᤛᤡᤸᤗᤧᤛᤠ ᤛᤠᤔᤢᤀᤧᤗᤧᤴ ᤂᤢᤴᤇᤡ᤹ ᤋᤃᤡ ᤁᤥ᤺ᤰᤔᤠᤀᤥ ᤌᤥ ᤐᤣ᤺ᤰᤔᤠᤖᤧ ᤗᤠᤃᤡ ᤑᤧᤖᤧᤖ ᤐᤳᤇᤧ॥ 15 ᤀᤠᤸᤗ ᤛᤠᤘᤗᤧᤴ ᤂᤧᤴ ᤐᤠᤱᤈᤢᤶᤔᤥ ᤋᤠᤔᤠᤏᤢ᤺ᤸᤗᤧ ᤌᤡᤰᤕᤧᤴ ᤋᤃᤡ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧ— 16 “ᤋᤠ᤺ᤴᤍᤡᤰᤐᤠ ᤜᤠᤒᤠ ᤁᤴ ᤕᤧᤶᤔᤥ ᤒᤢᤏᤩᤠᤔᤡᤏ ᤌᤢᤶᤗᤠᤶᤒᤠ ᤔᤏᤠᤎᤡᤰ ᤂᤧᤏᤧ᤹ᤀᤥ ᤐᤠᤱᤄᤢᤱ॥ ᤂᤧᤴᤏᤡᤴ ᤀᤡᤛᤪᤠᤀᤡᤗᤒᤠ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤧ᤹॥ ᤂᤧᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤗᤠᤶᤒᤠ ᤀᤠᤔᤏᤠᤜᤠ᤹ ᤛᤧ᤺ᤵᤋᤢᤛᤡ᤹॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤢᤰᤂᤣᤴ ᤏᤡᤛᤢᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤃᤧᤴ ᤋᤢᤘᤠᤴ ᤀᤠᤱᤃᤠ᤹ ᤀᤠᤍᤃᤡ ᤁᤧᤖᤧᤀᤠᤱ ᤘᤠ᤹॥” 17 ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤏᤡᤛᤢᤀᤠᤱ ᤂᤡᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤔᤧᤳᤏᤧᤒᤠ ᤔᤏᤠᤴ ᤜᤠᤒᤠ ᤁᤴᤗᤥ॥ ᤀᤠᤶᤓᤠ ᤁᤴ ᤔᤏᤠ᤺ᤸᤗᤧ ᤀᤠᤔᤏᤠᤜᤠ᤹ ᤛᤶᤍᤠᤱ ᤕᤢᤰ ᤆᤥᤃᤢᤖᤥ॥” 18 ᤜᤧᤰᤁᤩᤠᤱ ᤕᤶᤒᤠ ᤗᤠᤶᤎᤣ᤺ᤳᤋᤥ ᤛᤠᤔᤢᤀᤧᤗᤖᤧ ᤁᤢᤒᤣᤛᤠᤱ ᤐᤣᤀᤠᤱ ᤛᤠᤘᤗᤖᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤛᤢᤑᤥ ᤁᤧᤏᤡᤒᤠ ᤔᤏᤠ᤺ᤸᤗᤧ ᤁᤢᤜᤡᤶ ᤀᤠᤋᤡᤴᤒᤣ᥅ ᤀᤥᤛᤣ᤺ᤴᤀᤠᤎᤠᤰᤋᤧ᤹ᤏᤠ॥” 19 ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ᤀᤣ ᤛᤢᤑᤥ ᤁᤧᤏᤡᤒᤠ ᤔᤏᤠᤀᤠᤖᤥ॥ ᤀᤠᤱᤃᤠ᤹ ᤀᤠᤍᤃᤡ ᤀᤠᤍᤃᤡ ᤁᤥ᤺ᤰᤔᤠᤀᤥᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤍᤧᤴᤏᤥ ᤌᤥ ᤐᤣᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤀᤡᤴ ᤂᤧᤴᤇᤡ᤹ ᤀᤠᤱᤃᤠ᤹ᤏᤢᤀᤣ ᤋ᤺ᤰ ᤁᤧᤈᤠᤛᤢᤖ ᤐᤥᤱᤗᤥ॥ ᤜᤧᤰᤁᤩᤠᤱ ᤋᤠ᤺ᤴᤍᤡᤰ ᤋᤠᤏᤠᤶᤗᤰ ᤁᤧᤏᤡᤱᤘᤠ᤹ᤀᤥ ᤁᤧᤕᤠᤰᤐᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤔᤧᤳᤏᤧᤀᤠᤱ ᤂᤧᤏᤧ᤹ ᤐᤠᤱᤏᤧᤖᤥ॥ 20 ᤛᤢᤶᤕᤧᤴ ᤋᤃᤡ ᤁᤧᤔᤠᤒᤠ ᤁᤧᤀᤍᤱᤜᤠ᤹ᤖᤧ ᤐᤠ᤺ᤴᤏᤥ ᤁᤧᤏᤡᤱᤘᤠ᤹ ᤔᤧᤗᤥᤖᤣᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤥᤔᤧᤍᤧᤳᤋᤧ ᤔᤧᤈᤢᤖᤧᤀᤠᤱ ᤔᤧᤘᤠ᤹॥ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤏᤠ᤺ᤰᤋᤢᤒᤠ ᤜᤠᤱᤅᤡᤸᤗᤧ ᤗᤠᤃᤡᤃ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤏᤢ ᤁᤧᤶᤒᤠᤖᤧ ᤁᤧᤜᤡᤶᤛᤕᤱ ᤗᤧᤵᤔᤠᤱ ᤗᤠᤶ ᤀᤥᤔᤧᤔᤧᤳᤋᤢᤖ ᤔᤧᤘᤠ᤹ᤖᤥ॥” 21 ᤛᤠᤘᤗᤖᤧ ᤔᤧᤳᤋᤢ. “ᤀᤠᤱᤃᤠ᤹ᤃ ᤀᤡᤛᤪᤠᤀᤡᤗᤒᤠ ᤁᤧᤖᤧᤰᤏᤢ᤺ᤸᤗᤧ ᤆᤢ᤺ᤰᤛᤠ ᤒᤢᤏᤩᤠᤔᤡᤏ ᤌᤠ᤺ᤰᤁᤥᤒᤠᤀᤠᤖᤥ॥ ᤒᤣᤏᤩᤠᤔᤡᤏ ᤛᤢᤘᤠᤱᤅᤡᤱᤃ ᤔᤡᤱᤛᤥ ᤀᤡᤱᤎᤠᤱ ᤔᤣ᤺ᤴᤏᤣᤒᤠ ᤆᤥᤰᤗᤥ॥ ᤂᤧᤏᤧ᤹ ᤌᤣᤀᤠᤱ ᤀᤰᤋᤱᤒᤠ ᤐᤠᤴ ᤀᤠᤱᤃᤠ᤹ᤏᤢ ᤁᤧᤒᤠ᤺ᤳᤋᤢᤒᤠᤒᤣ᥅” 22 ᤂᤧᤒᤩᤠᤱ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤏᤢ ᤁᤢᤛᤧᤘᤠᤖᤥᤒᤠᤴ ᤆᤠᤈᤠᤔᤠᤍᤧᤴᤏᤥᤒᤠ ᤗᤳᤇᤠ ᤕᤶᤒᤠ ᤗᤰᤛᤡᤱᤅᤥ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤔᤧᤀᤢ᤺ᤳᤋᤢᤛᤡᤒᤠ ᤛᤢᤶᤒᤥᤱ ᤋᤖᤧᤒᤠᤜᤠ᤹ᤏᤢ ᤛᤥᤖᤡᤰ ᤔᤡᤱᤛᤥ ᤀᤡᤱᤎᤠᤱᤒᤠ ᤕᤢᤰᤏᤠᤀᤥ ᤂᤢᤏᤧ᤹ ᤕᤢᤰᤂᤢᤛᤡ॥ 23 ᤂᤧᤒᤩᤠᤱ ᤛᤠᤔᤢᤀᤧᤗᤖᤧ ᤋ᤺ᤰ ᤁᤧᤎᤥ᤺ᤰᤐᤧᤴ ᤔᤧᤳᤋᤢ. “ᤛᤧᤴᤍᤧ ᤕᤢᤰᤂᤧ᤹ ᤔᤧᤳᤏᤧᤒᤠ ᤛᤠᤔᤢᤸᤗᤠ᤺ᤴ ᤁᤳᤏᤠ ᤑᤧᤳᤋᤧ᤹॥” 24 ᤋ᤺ᤰ ᤁᤧᤎᤥ᤺ᤰᤐᤧᤸᤗᤧ ᤛᤧᤴᤍᤢᤀᤠᤱ ᤁᤧᤕᤢᤱᤒᤠ ᤁᤢᤗᤠᤱᤓᤧᤸᤗᤧᤰᤔᤠᤏᤢᤒᤠ ᤛᤠᤔᤢᤸᤗᤠ᤺ᤴ ᤑᤧᤳᤋᤢᤀᤠᤱ ᤛᤠᤘᤗᤖᤧ ᤁᤢᤍᤃᤡ ᤏᤧᤛ᤻ᤛᤢ॥ ᤜᤧᤰᤁᤣ᤺ᤸᤗᤧ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧ ᤑᤠ᤹ᤀᤠᤱ ᤛᤧᤴᤍᤢᤱ ᤕᤢᤰᤂᤢᤱᤒᤠ ᤛᤠᤔᤢᤸᤗᤠ᤺ᤴ ᤜᤠᤒᤠ ᤁᤴ ᤁᤧᤏᤧᤒᤧᤸᤗᤥ॥ ᤀᤠᤸᤗ ᤆᤩᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤢ᤺ᤳᤋᤢᤱᤛᤡᤱᤒᤠ ᤋᤖᤧᤒᤠᤜᤠ᤹ᤏᤢ ᤂᤧᤏᤧ᤹ ᤁᤧᤈᤖ ᤑᤠ᤹ᤀᤠᤱ ᤛᤠᤔᤢᤸᤗᤠ᤺ᤴ ᤛᤧᤴᤍᤢᤱ ᤕᤢᤰᤂᤢᤱᤅᤠᤱ ᤘᤕᤧ॥” ᤜᤧᤰᤁᤩᤠᤱ ᤂᤧᤴ ᤕᤧᤴᤏᤥ ᤛᤠᤘᤗᤖᤧ ᤛᤠᤔᤢᤀᤧᤗᤧᤴᤏᤢ ᤛᤥᤖᤡᤰ ᤁᤢᤈᤠ ᤆᤖᤥ॥ 25 ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤁᤥ᤺ᤰᤔᤠᤀᤥᤒᤠ ᤛᤡᤍᤢᤱᤈᤓᤠ ᤆᤥ᤺ᤰᤔᤠᤍᤧᤴᤏᤥᤗᤠᤶ ᤕᤥ ᤐᤠᤱᤈᤢᤶᤔᤥ ᤔᤧᤕᤧ. ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤢᤜᤡᤶ ᤁᤦᤛᤡᤀᤥ ᤛᤠᤔᤢᤀᤧᤗᤗᤧᤴ ᤛᤠᤘᤗᤧᤴᤏᤢ ᤋᤠ᤹ᤈᤧᤰᤂᤧᤛᤡ॥ 26 ᤋᤠᤏᤠᤶ ᤆᤡᤄᤠ᤹ᤘᤄᤠ᤹ ᤂᤠᤀᤥ᤺ᤳᤋᤧᤸᤗᤧ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤁᤦᤛᤡᤀᤥ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤐᤥᤃᤧ᤹. ᤀᤠᤸᤗ ᤀᤠᤱᤃᤠ᤹ ᤐᤠᤱᤏᤧᤍᤣᤏᤧᤖᤥ॥” ᤜᤧᤰᤁᤩᤠᤱ ᤛᤠᤘᤗᤧᤴ ᤐᤥᤃᤧᤀᤠᤱ ᤏᤧᤵᤔᤠᤱ ᤗᤠ᤺ᤰᤁᤠᤳ ᤗ᤺ᤴᤍᤧᤒᤣᤛᤡ॥ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤕᤢᤰᤛᤠᤒᤠ ᤆᤥᤃᤢᤒᤠ 27 ᤂᤧᤱᤜᤠ᤹ ᤕᤥ ᤐᤠᤱᤈᤢᤶ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤔᤧᤳᤋᤢ. “ᤁᤧᤛᤧᤘᤠᤖᤥᤒᤧᤴ ᤀᤠᤴᤇᤡ᤹ᤏᤢ᤺ᤸᤗᤧ ᤋᤃᤡ ᤐᤣᤃᤧ᤹ ᤔᤧᤳᤋᤧ᤹॥” ᤜᤧᤰᤁᤩᤠᤱ ᤂᤧᤴ ᤋᤃᤡ ᤌᤠᤛᤡᤱ ᤐᤣ॥ ᤂᤧᤒᤩᤠᤱ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤵᤔᤥᤀᤣ ᤛᤵᤑᤠ ᤕᤧᤒᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤔᤧᤳᤏᤧᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.