᥇ ᤛᤠᤔᤢᤀᤧᤗ 8 - LIFOTNT

ᤀᤡᤛᤪᤠᤀᤡᤗᤡᤜᤠ᤹ᤖᤧ ᤜᤠᤱ ᤔᤧᤏᤠ᤺ᤰᤋᤢ

¹ ᤛᤠᤔᤢᤀᤧᤗᤧᤴ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤀᤡᤛᤪᤠᤀᤡᤗᤀᤥ ᤂᤠᤛᤧᤴ ᤁᤧᤗᤥ᤺ᤶᤒᤠ ᤐᤥᤱᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤆᤥᤃᤢᤛᤡ॥

² ᤂᤢᤏᤧ᤹ ᤁᤢᤛ᤻ᤛᤠ ᤋᤢᤶᤒᤠᤸᤗᤧ ᤁᤢᤔᤡᤱ ᤕᤥᤀᤣᤗ ᤘᤕᤧ ᤜᤧᤰᤁᤩᤠᤱ ᤁᤢᤛ᤻ᤛᤠ ᤛᤖᤢᤶᤒᤠᤸᤗᤧ ᤁᤢᤔᤡᤱ ᤀᤒᤡᤕᤠ ᤘᤕᤧ॥ ᤂᤧᤴ ᤏᤧᤵᤑᤢᤖᤧ ᤒᤣᤷᤛᤣᤒᤠᤀᤥ ᤂᤠᤛᤧᤴ ᤗᤥ᤺ᤶᤔᤠ ᤕᤠ᤺ᤶᤒᤰ ᤆᤥᤃᤧᤛᤢ॥

³ ᤁᤖ ᤂᤧᤴ ᤏᤧᤵᤑᤢ ᤁᤢᤛ᤻ᤛᤠᤜᤠ᤹ ᤁᤢᤶᤒᤠ ᤜᤧᤰᤁᤣ ᤏᤢᤒᤠ ᤔᤏᤠ ᤜᤥ᤺ᤵᤋᤧᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤠᤱᤅᤥ ᤛᤠ᤹ᤖᤡᤰ ᤂᤡ᤺ᤶᤒᤪᤠ᤺ᤰᤐᤠ ᤘᤕᤧᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤱ ᤆᤧᤛᤢᤀᤠᤱ ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴ ᤗᤥ᤺ᤶᤔᤠ ᤕᤠ᤺ᤶᤒᤰ ᤆᤥᤃᤧᤛᤢ॥

⁴ ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤖᤠᤔᤠᤒᤠ ᤛᤠᤔᤢᤀᤧᤗᤖᤣ᤹ᤀᤥ ᤔᤧᤍᤩᤧ॥

⁵ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤸᤗ ᤂᤧᤏᤧ᤹ ᤁᤠᤵᤐᤥᤒᤠ ᤁᤧᤍᤢᤶᤛᤧ. ᤜᤧᤰᤁᤩᤠᤱ ᤁᤧᤛ᤻ᤛᤠᤜᤠ᤹ ᤂᤧᤏᤧ᤹ ᤗᤠᤱᤁᤧᤄᤣ᤺ᤰᤐᤠ ᤗᤠᤶᤔᤥ ᤗᤠᤱᤔᤧᤄᤣ᤺ᤰᤛᤡᤴ॥ ᤀᤠᤸᤗ ᤘᤣ᤹ ᤗᤠᤈᤣ᤹ᤒᤠ ᤛᤢᤘᤠᤱᤜᤠ᤹ ᤜᤧᤰᤁᤣ ᤀᤠᤏᤡᤃᤣ ᤗᤠᤶᤃᤧᤗᤥᤒᤠ ᤜᤠᤱᤎᤡᤰ ᤕᤢᤰᤋᤡᤱ ᤆᤥᤃᤧ ᤀᤠᤒᤡᤖᤧ᤹ᤀᤥ॥”

⁶ ᤁᤖ ᤂᤧᤱᤜᤠ᤹ᤖᤧ “ᤀᤠᤏᤡᤃᤣ ᤗᤠᤶᤃᤧᤗᤥᤒᤠ ᤜᤠᤱᤎᤡᤰ ᤕᤠᤵᤔᤡ ᤀᤠᤒᤡᤖᤧ᤹ᤀᤥ” ᤔᤧᤔᤧᤳᤋᤢᤸᤗᤧ ᤂᤧᤴ ᤐᤠ᤺ᤴᤏᤡᤴ ᤛᤠᤔᤢᤀᤧᤗᤖᤧ ᤁᤢᤛᤡᤖᤠ᤹ ᤔᤧᤎᤠᤅᤧᤴ. ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ॥

⁷ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤔᤏᤠᤜᤠ᤹ᤖᤧ ᤁᤧᤶᤔᤧᤵᤐᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤧ᤹॥ ᤁᤱᤃ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤏᤠ᤹ᤖᤧᤒᤠ ᤔᤣ᤺ᤴ॥ ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤣ ᤂᤢᤏᤡ᤹ ᤜᤠᤱ ᤐᤥᤱᤔᤠ ᤔᤧᤏᤠ᤹ᤖᤠᤱᤒᤠᤖᤥ॥

⁸ ᤀᤠᤱᤃᤠ᤹ ᤔᤡᤛᤪᤗᤠᤶ ᤂᤧᤱᤜᤠ᤹ ᤗᤠᤶᤗᤥᤛᤢᤱ ᤗ᤺ᤳᤋᤢᤱᤛᤡᤱᤅᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤂᤧᤱᤜᤠ᤹ᤖᤧ ᤜᤠᤒᤠᤜᤧᤰᤁᤣ ᤔᤧᤔᤧᤳᤋᤠᤖ ᤔᤧᤘᤠ᤹. ᤀᤠᤸᤗ ᤂᤧᤱᤜᤠ᤹ᤖᤧ ᤂᤧᤏᤧ᤹ᤀᤠᤱ ᤜᤧᤰᤁᤣᤀᤣ ᤁᤧᤶᤔᤧᤳᤗ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤏᤠ᤹ᤖᤠᤱᤅᤠᤱ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤖ ᤔᤧᤘᤠ᤹॥

⁹ ᤀᤠᤸᤗ ᤂᤧᤱᤜᤠ᤹ᤖᤧ ᤌᤣ ᤔᤧᤒᤠ᤺ᤳᤋᤢᤖ ᤔᤧᤘᤠ᤹ ᤂᤧᤵᤛᤧ᤹. ᤁᤖ ᤂᤧᤱᤜᤠ᤹ ᤗᤠᤶᤃᤧᤗᤥᤒᤠ ᤜᤠᤱᤅᤡᤸᤗᤧ ᤀᤠᤰᤋᤱᤒᤠ ᤐᤖᤡᤰᤗᤧ ᤕᤢᤰ ᤆᤥᤃᤢᤛᤡ᤹ ᤂᤧᤴ ᤏᤢᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤧᤛᤧ᤹ᤀᤥ॥”

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤠᤔᤢᤀᤧᤗᤖᤧ ᤜᤠᤱ ᤁᤧᤏᤠ᤺ᤰᤐᤠ ᤔᤏᤠᤜᤠ᤹ ᤔᤧᤳᤋᤢᤛᤡ॥

¹¹ ᤂᤢᤏᤧ᤹ ᤔᤧᤳᤋᤢᤛᤡ. “ᤂᤧᤏᤡ᤹ ᤛᤶᤎᤠᤱ ᤜᤠᤱ ᤁᤧᤈᤥ᤺ᤰᤐᤠ ᤜᤠᤱᤅᤡᤴ ᤀᤰᤋᤱᤒᤠ ᤆᤥᤰ—ᤂᤢᤏᤧ᤹ ᤂᤧᤏᤡ᤹ ᤛᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤁᤢᤀᤴᤗᤠᤎᤠᤜᤠ᤹ ᤜᤧᤰᤁᤩᤠᤱ ᤁᤢᤀᤴ ᤁᤧᤗᤥᤱᤒᤠᤜᤠ᤹ᤏᤢ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤠᤱᤄᤢᤛᤡ᤹. ᤂᤧᤒᤩᤠᤱ ᤂᤧᤱᤜᤠ᤹ ᤁᤢᤀᤴᤗᤠᤎᤠᤜᤠ᤹ ᤋᤃᤡᤍᤃᤡ ᤗᤥ᤺ᤰᤔᤠ ᤐᤠᤱᤄᤢᤛᤡ᤹॥

¹² ᤁᤢᤓᤠᤃ ᤜᤧᤴᤇᤡᤱ ᤜᤧᤴᤇᤡᤱ ᤏᤢ ᤅᤠᤒᤥᤱ ᤅᤠᤒᤥᤱ ᤔᤏᤠᤗᤢᤵᤐᤥ ᤛᤢᤜᤠᤱᤔᤡᤒᤠ ᤐᤥᤱᤛᤧ ᤕᤢᤰᤋᤡᤱ ᤆᤥᤃᤢᤛᤡ᤹॥ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤆᤠᤜᤡ᤺ᤴ ᤁᤢᤒᤩᤠᤱᤛᤡ ᤁᤧᤎᤥ᤺ᤱᤒᤠ ᤏᤢ ᤁᤢᤈᤠ ᤁᤧᤛᤢᤶᤒᤠ ᤆᤥᤃᤢᤛᤡ᤹॥ ᤀᤠᤸᤛᤠᤱ ᤕᤠᤶᤔᤥ ᤘᤣ᤹ᤜᤠ᤹ ᤌᤱ ᤆᤥ᤺ᤰᤔᤠ ᤑᤧᤈᤢᤶ ᤑᤧᤕᤠ ᤏᤢ ᤁᤢᤀᤴᤗᤠᤎᤠᤜᤠ᤹ᤀᤥ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤂᤈᤢᤶ ᤂᤕᤠᤜᤠ᤹ ᤆᤥ᤺ᤰᤔᤠ ᤐᤠᤱᤄᤢᤛᤡ᤹॥

¹³ ᤂᤧᤸᤗᤧ ᤂᤧᤏᤡ᤹ ᤔᤧᤴᤇᤢᤔᤠ ᤛᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤋ᤺ᤰ ᤁᤧᤎᤥ᤺ᤰᤔᤠ. ᤂᤖᤧ᤺ᤱ ᤁᤧᤗᤧ᤺ᤱᤔᤠ ᤏᤢ ᤑᤢᤱᤏᤠᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤑᤳᤇᤢᤛᤡ᤹॥

¹⁴ ᤂᤧᤸᤗᤧ ᤂᤧᤏᤡ᤹ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤐᤩᤠᤱᤛᤡᤜᤠ᤹. ᤆᤧᤸᤗᤧᤰᤛᤣ᤹ ᤀᤡᤰᤜᤠ᤹ ᤏᤢ ᤐᤧ᤺ᤱᤘᤠᤗᤡ᤺ᤳᤇᤣ᤹ ᤀᤡᤰᤜᤠ᤹ ᤋᤣ᤹ᤖᤢᤀᤠᤱ ᤁᤢᤛᤧᤘᤠᤖᤥᤒᤠᤜᤠ᤹ ᤐᤡᤖᤢᤛᤡ᤹॥

¹⁵ ᤂᤢᤏᤧ᤹ ᤀᤠᤒᤠᤅᤣ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤢᤛᤧᤘᤠᤖᤥᤒᤠᤜᤠ᤹ ᤐᤡᤔᤠᤛᤡᤖᤧ ᤗᤠᤃᤡ ᤂᤧᤸᤗᤧ ᤂᤧᤏᤡ᤹ ᤁᤢᤈᤠᤜᤠ᤹ ᤏᤢ ᤆᤧᤸᤗᤧᤰᤛᤣᤸᤗᤧ ᤌᤡᤒᤥᤱᤗᤰ ᤋᤣ᤹ᤖᤢ ᤁᤧᤒᤡᤖᤡ᤹॥

¹⁶ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤏᤡ᤹ ᤕᤥᤰ ᤁᤧᤃᤳᤋᤢᤶᤛᤡᤶᤒᤠ ᤌᤠᤱᤒᤧᤴ ᤔᤧᤴᤇ᤻ᤕᤠᤜᤠ᤹ ᤏᤢ ᤂᤧᤏᤡ᤹ ᤘᤖᤡᤰᤗᤡᤰᤐᤠ ᤐᤡᤳ ᤛᤠ᤺ᤱᤘᤠᤜᤠ᤹ ᤂᤧᤒᤩᤠᤱ ᤀᤍᤱᤜᤠ᤹ ᤋᤣ᤹ᤖᤢᤛᤡᤀᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤥ ᤑᤳᤇᤢᤛᤡ᤹॥

¹⁷ ᤂᤧᤏᤡ᤹ ᤁᤧᤃᤳᤋᤢᤶᤛᤡᤶᤒᤠ ᤔᤧᤸᤗᤢᤰ ᤔᤧ᤺ᤴᤍᤠᤗᤠᤶ ᤂᤢᤏᤧ᤹ ᤌᤡᤒᤥᤱᤗᤰ ᤋᤣ᤹ᤖᤢ ᤁᤧᤒᤡᤖᤡ᤹. ᤜᤧᤰᤁᤩᤠᤱ ᤂᤧᤏᤡ᤹ ᤀᤠᤵᤑᤣᤰᤁᤠᤱ ᤂᤢᤏᤧ᤹ ᤁᤢᤕᤥᤰ ᤁᤧᤒᤥ᤺ᤰᤂᤡ᤹॥

¹⁸ ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤂᤧᤏᤡ᤹ ᤁᤧᤛᤣᤃᤢᤶᤒᤠ ᤜᤠᤱᤅᤡᤴᤗᤠᤶ ᤆᤥ᤺ᤰᤕᤢᤶᤓᤥ ᤂᤥᤔᤠᤖᤧ ᤗᤠᤃᤡ ᤁᤧᤀ᤺ᤰᤋᤡ᤹ ᤁᤧᤜᤠᤒᤡ᤹. ᤁᤖ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤡ᤹ ᤐᤣᤗᤡᤃᤧᤴ ᤋᤢᤘᤠᤴ ᤔᤧᤄᤧᤵᤛᤢᤴ᤹॥”

¹⁹ ᤁᤖ ᤂᤧᤴ ᤔᤏᤠᤜᤠ᤹ᤖᤧ ᤛᤠᤔᤢᤀᤧᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤱᤄᤧᤵᤛᤢᤴ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤔᤣ᤺ᤴ. ᤀᤠᤏᤡᤃᤣ ᤜᤠᤱᤅᤣ ᤆᤠᤜᤠᤒ᤻ ᤆᤥᤃᤡᤃᤧ॥

²⁰ ᤂᤧᤒᤩᤠᤱ ᤀᤠᤏᤡᤃᤣ ᤛᤶᤎᤠᤱ ᤕᤢᤰ ᤁᤧᤈᤥ᤺ᤰᤐᤠ ᤏᤢ ᤌᤱᤅᤥ ᤁᤧᤍᤣ᤹ᤒᤠ ᤜᤠᤱ ᤂᤥᤛᤢᤶᤒᤧᤸᤗᤧ ᤀᤠᤏᤡᤃᤣ ᤘᤣ᤹ ᤗᤠᤈᤣ᤹ᤒᤠ ᤛᤢᤘᤠᤱᤜᤠ᤹ ᤜᤧᤰᤋᤱᤒᤠ ᤐᤥ᤺ᤰᤂᤡᤃᤧᤖᤥ॥”

²¹ ᤂᤧᤴ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤠᤔᤢᤀᤧᤗᤖᤧ ᤂᤧᤵᤛᤢᤀᤠᤱ ᤁᤴ ᤐᤠ᤺ᤴᤏᤡᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤕᤠᤶᤔᤥ ᤏᤢ᤺ᤰᤋᤢᤖ ᤐᤠ᤺ᤳᤋᤢ॥

²² ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧ᤹. ᤜᤧᤰᤁᤩᤠᤱ ᤜᤠᤱᤎᤡᤰ ᤛᤣᤃᤧ ᤐᤡᤖᤧᤛᤧ᤹॥” ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤧᤖᤧᤰ ᤔᤏᤠᤜᤠ᤹ ᤀᤠᤒᤠᤅᤣ ᤂᤧᤏᤡ᤹ ᤐᤠᤱᤈᤢᤶᤔᤥ ᤏᤢ᤺ᤰᤂᤧᤶ ᤐᤣᤃᤧᤶᤔᤧ᤹ᤀᤥ॥”