᥇ ᤛᤠᤔᤢᤀᤧᤗ 7 - LIFOTNT

¹ ᤂᤧᤸᤗᤧᤆᤥᤃᤢᤸᤗᤧ ᤁᤡᤷᤕᤋ-ᤕᤠᤖᤡᤔᤒᤠ ᤔᤏᤠᤜᤠ᤹ ᤔᤧᤕᤧᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤍᤣ᤹ᤖᤢ॥ ᤂᤧᤱᤜᤠ᤹ᤖᤧ ᤔᤧᤍᤣ᤹ᤖᤢᤀᤠᤱ ᤁᤡᤷᤕᤋ-ᤕᤠᤖᤡᤔᤒᤠ ᤁᤥ᤺ᤰᤔᤠᤀᤥ ᤀᤒᤡᤏᤠᤍᤠᤒᤖᤧ ᤁᤢᤜᤡᤶᤔᤥ ᤔᤧᤕᤢᤰᤂᤢ. ᤜᤧᤰᤁᤩᤠᤱ ᤁᤢᤛ᤻ᤛᤠ ᤀᤣᤗᤠᤈᤠᤖᤧᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤁᤶᤒᤪᤠᤱ ᤔᤧᤵᤔᤠ ᤕᤠ᤺ᤶᤒᤰᤀᤥ ᤔᤧᤍᤥᤴᤍᤢᤖᤥ॥

ᤛᤠᤔᤢᤀᤧᤗᤖᤧ ᤀᤡᤛᤪᤠᤀᤡᤗᤀᤥ ᤕᤢᤰ ᤆᤥᤃᤢᤒᤠ

² ᤁᤶᤓᤗ᤹ᤖᤡᤰ ᤛᤴᤍᤥᤰᤁᤡᤴ ᤁᤡᤷᤕᤋ-ᤕᤠᤖᤡᤶᤔᤥ ᤕᤖᤡᤰ ᤕᤧᤶ. ᤋᤱᤒᤣ᤹ ᤏᤡᤒᤥᤱ ᤌᤠᤖᤡᤰ ᤕᤢᤅᤧ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤖᤡᤱ ᤔᤧᤎᤰᤋᤧᤀᤠᤱ ᤕᤜᤘᤣ ᤍᤠᤱᤒᤧᤴ ᤔᤧᤃᤥ᤺ᤳᤋᤢ॥

³ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤂᤧᤏᤡ᤹ ᤁᤧᤜᤡᤴᤍᤡᤀᤠᤱ ᤁᤠᤰ ᤏᤡᤱᤘᤠᤴ ᤁᤧᤜᤡᤛᤢᤶ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤁᤧᤏᤢ᤺ᤰᤂᤡᤒᤠᤏᤧᤑᤃᤪ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤔᤠᤱᤜᤠ᤹ ᤏᤢ ᤀᤛ᤻ᤋᤥᤖᤣᤋ ᤏᤠᤘᤠᤀᤡᤳᤗᤠᤜᤠ᤹ ᤂᤧᤏᤡ᤹ᤗᤠᤶ ᤂᤧᤳᤋᤠᤶ ᤋᤣᤛᤠᤶᤛᤧ᤹॥ ᤂᤧᤏᤡ᤹ ᤀᤠᤒᤠᤅᤣ ᤁᤧᤖᤧᤰ ᤏᤡᤱᤘᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤏᤠᤛᤡᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ᤖᤰ ᤔᤠᤱᤛᤧᤘᤠ ᤔᤧᤳᤋᤠᤶᤔᤧ᤹. ᤜᤧᤰᤁᤣ ᤁᤧᤈᤥᤃᤢᤶᤏᤧᤑᤃᤪ ᤂᤢᤏᤧ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤗᤠᤶᤒᤠ ᤁᤧᤛᤧ᤺ᤵᤋᤡ॥”

⁴ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤒᤠᤗ ᤏᤢ ᤀᤛ᤻ᤋᤥᤖᤣᤋ ᤔᤠᤱᤜᤠ᤹ ᤔᤧᤄᤧᤳᤋᤢ ᤔᤧᤍᤣᤛᤢᤛᤡ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤀᤥᤖᤰ ᤔᤠᤱᤛᤧᤘᤠ ᤔᤧᤈᤥᤃᤧ॥

⁵ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤔᤧᤳᤋᤢᤛᤡ. “ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤡᤛ᤻ᤐᤠᤀᤥ ᤛᤢᤵᤛᤧᤶᤛᤧ᤹. ᤜᤧᤰᤁᤩᤠᤱ ᤂᤧᤏᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢᤱ᤹॥”

⁶ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤔᤡᤛ᤻ᤐᤠᤀᤥ ᤔᤧᤈᤢᤵᤛᤧ. ᤂᤧᤱᤜᤠ᤹ᤖᤧ ᤆᤫᤠ᤺ᤳᤋᤡᤴ ᤔᤧᤒᤠᤃᤢᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤔᤧᤜᤢᤰᤂᤢ॥ ᤂᤧᤴ ᤕᤧᤴᤏᤥ ᤂᤧᤱᤜᤠ᤹ ᤗᤧᤴᤍᤡᤰ ᤏᤠᤶᤎᤠᤎᤠ ᤋ᤺ᤰᤏᤧᤳᤋᤥ ᤔᤧᤕᤢᤅᤧ ᤜᤧᤰᤁᤩᤠᤱ ᤂᤧᤵᤔᤥ “ᤀᤠᤏᤡᤃᤣ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤶᤒᤧ” ᤗ᤹ᤖᤡᤰ ᤂᤧᤱᤜᤠ᤹ ᤐᤠ᤺ᤵᤔᤠ ᤔᤧᤍᤧᤴᤍᤧ॥ ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤔᤡᤛ᤻ᤐᤠᤀᤥ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠ ᤐᤥ᤺ᤰᤂᤧ॥

⁷ ᤀᤠᤸᤗ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤡᤛ᤻ᤐᤠᤀᤥ ᤔᤧᤈᤢᤵᤛᤧᤀᤠᤱ ᤔᤧᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤐᤗᤡᤛ᤻ᤋᤡᤜᤠ᤹ᤖᤧ ᤔᤧᤄᤧᤵᤛᤢ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤛᤠᤒᤠᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤔᤧᤗ᤺ᤴᤍᤧ॥ ᤐᤗᤡᤛ᤻ᤋᤡᤜᤠ᤹ ᤋᤃᤡ ᤌᤱ ᤆᤥ᤺ᤰᤛᤧ ᤔᤧᤓᤧᤴᤗ ᤔᤧᤒᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ॥

⁸ ᤂᤧᤱᤜᤠ᤹ᤖᤧ ᤛᤠᤔᤢᤀᤧᤗᤧᤴ ᤔᤧᤔᤧᤳᤋᤢ. “ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤗᤠᤶᤒᤠ ᤛᤧ᤺ᤵᤛᤡᤱᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡᤃᤣ ᤗᤠᤃᤡ ᤆᤰᤔᤧᤴᤗ᤹ᤀᤣ ᤐᤣᤗᤡ ᤑᤠᤰᤋᤧ ᤀᤠᤒᤡᤖᤧ᤹ᤀᤥ॥”

⁹ ᤂᤧᤒᤩᤠᤱ ᤛᤠᤔᤢᤀᤧᤗᤖᤧ ᤏᤢᤃᤧᤎᤢᤱᤒᤠᤖ ᤁᤧᤘᤠ᤹ᤒᤠ ᤗᤳᤇᤠ ᤔᤧᤸᤗᤢᤰᤛᤠᤳ ᤋᤠᤖᤢᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤁᤢᤓᤢᤶᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤂᤢᤏᤧ᤹ ᤏᤥᤃᤵ ᤐᤡᤖᤢᤖᤥ॥

¹⁰ ᤛᤠᤔᤢᤀᤧᤗᤖᤧ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ ᤕᤠᤃᤧᤸᤗᤧ. ᤐᤗᤡᤛ᤻ᤋᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤔᤧᤃᤧᤖᤧ ᤔᤧᤓᤧᤖᤧ॥ ᤁᤖ ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤠᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤶᤒᤠ ᤀᤡᤰᤗᤠᤀᤥ ᤂᤠᤶᤒᤣ᤺ᤰᤔᤧᤴ ᤗᤥ᤺ᤰᤂᤢᤖ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤀ᤺ᤰᤋᤧ ᤜᤧᤰᤁᤣ᤺ᤸᤗᤧ ᤐᤗᤡᤛ᤻ᤋᤡᤜᤠ᤹ ᤌᤣ ᤆᤥ᤺ᤰᤔᤠ. ᤌᤣ ᤏᤠ᤹ᤔᤠ ᤗ᤹ᤖᤡᤰ ᤔᤧᤏᤠᤰᤋᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤴᤍᤢᤛᤡ॥

¹¹ ᤔᤡᤛ᤻ᤐᤠᤗᤠᤶ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤐᤗᤡᤛ᤻ᤋᤡᤜᤠ᤹ ᤔᤧᤏᤠ᤺ᤳᤋᤢᤛᤡᤖ ᤒᤣᤌ-ᤁᤖ ᤁᤢᤛᤡ᤺ᤰᤋᤥ ᤌᤠᤖᤡᤰ ᤗᤠᤶ ᤁᤢᤗᤧ᤺ᤶ ᤔᤧᤈᤩᤧᤵᤋᤢ ᤔᤧᤛᤩᤧᤖᤢᤛᤡ॥

¹² ᤂᤧᤒᤩᤠᤱ ᤀᤠᤶᤓᤠ ᤂᤧᤵᤔᤥ ᤛᤠᤔᤢᤀᤧᤗᤖᤧ ᤕᤶᤒᤠ ᤗᤢᤱᤎᤡᤰ ᤋᤣ᤹ᤖᤢᤀᤠᤱ ᤔᤡᤛ᤻ᤐᤠ ᤏᤢ ᤛᤣᤏᤖᤧ ᤁᤢᤗᤢᤶᤔᤥ ᤗᤣ᤺ᤳᤋᤢ॥ ᤂᤢᤏᤧ᤹ ᤂᤧᤸᤗᤧ ᤁᤢᤔᤡᤱ ᤀᤧᤒᤣᤏ-ᤀᤣᤈᤖ (“ᤁᤢᤓᤠ᤹ ᤁᤧᤒᤡᤒᤠ ᤗᤢᤱ”) ᤘᤠ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤁ᤹ᤕᤥ ᤌᤠᤖᤡᤰ ᤀᤠᤏᤡ᤹ ᤀᤠᤓᤠ᤹ᤖᤧᤖᤥ॥”

¹³ ᤜᤧᤰᤁᤣᤗ᤹ᤖᤡᤰ ᤐᤗᤡᤛ᤻ᤋᤡᤜᤠ᤹ ᤜᤠᤖᤡᤔᤧᤍᤩᤧᤀᤠᤱ ᤔᤧᤘᤕᤧ. ᤜᤧᤰᤁᤩᤠᤱ ᤕᤖᤡᤰ ᤕᤧᤴ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤕᤢᤰᤐᤢᤱᤍᤧᤴᤏᤥ ᤂᤧᤱᤜᤠ᤹ ᤕᤠᤶᤔᤥ ᤔᤧᤸᤗᤠᤛᤧᤴ॥ ᤛᤠᤔᤢᤀᤧᤗᤖᤧ ᤁᤢᤜᤡᤱᤜᤡᤱ ᤌᤠᤖᤡᤰᤁᤣ ᤕᤜᤘᤣ ᤍᤠᤱᤒᤧᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤘᤕᤧ॥

¹⁴ ᤐᤗᤡᤛ᤻ᤋᤡᤜᤠ᤹ᤖᤧ ᤜᤢᤰᤁᤠᤵ ᤔᤧᤈᤥᤃᤢ ᤔᤧᤍᤣ᤹ᤖᤢᤒᤠ ᤀᤣᤁᤪᤥᤏᤠᤱ ᤁᤳᤏᤠ ᤏᤢ ᤃᤠᤌ ᤁᤢᤒᤣᤛᤠᤱᤒᤠ ᤀᤡᤛᤪᤠᤀᤡᤗᤡ ᤕᤧᤰᤕᤰ ᤐᤠᤱᤈᤢᤶᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤠᤶᤔᤥ ᤔᤧᤏᤢ᤺ᤰᤋᤢ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤐᤣᤛᤠᤱᤒᤠ ᤕᤢᤰᤐᤢᤱᤍᤧᤴᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥᤗᤠᤶ ᤔᤧᤏᤢ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗ ᤏᤢ ᤀᤣᤔᤥᤖᤡ ᤗᤢᤶᤔᤥᤀᤠᤱ ᤐᤠ᤺ᤴᤍᤱ ᤐᤥ᤺ᤰᤂᤧ॥

¹⁵ ᤜᤧᤰᤁᤣᤗ᤹ᤖᤡᤰ ᤛᤠᤔᤢᤀᤧᤗᤖᤧ ᤁᤢᤜᤡᤱᤜᤡᤱ ᤌᤠᤖᤡᤰᤁᤣ ᤀᤡᤛᤪᤠᤀᤡᤗᤀᤥ ᤂᤠᤛᤧᤴ ᤆᤥᤃᤢ॥

¹⁶ ᤋᤱᤒᤣ᤹ ᤌᤰᤔᤠ ᤂᤢᤏᤧ᤹ ᤋᤃᤡ ᤒᤣᤌᤣᤗ ᤜᤧᤰᤁᤩᤠᤱ ᤃᤡᤗᤃᤠᤗ ᤏᤢ ᤔᤡᤛ᤻ᤐᤠ ᤐᤠᤱᤈᤢᤶᤜᤠᤳᤋᤡ ᤐᤣᤀᤠᤱ ᤂᤢᤏᤧ᤹ ᤔᤏᤠᤜᤠ᤹ ᤂᤠᤛᤧᤴ ᤆᤥᤃᤢ ᤐᤡᤖᤢᤛᤡ॥

¹⁷ ᤁᤖ ᤂᤢᤏᤧ᤹ ᤖᤠᤔᤠᤒᤠ ᤁᤢᤜᤡᤶᤔᤥᤀᤣ ᤏᤢ᤺ᤰᤂᤧ॥ ᤜᤧᤰᤁᤩᤠᤱ ᤂᤧᤵᤔᤥᤀᤠᤱ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤀᤡᤛᤪᤠᤀᤡᤗᤡᤜᤠ᤹ ᤂᤠᤛᤧᤴ ᤆᤥᤃᤢ ᤐᤡᤖᤢᤛᤡ॥ ᤂᤢᤏᤧ᤹ ᤂᤧᤵᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤆᤥᤃᤢᤖᤥ॥