᥇ ᤛᤠᤔᤢᤀᤧᤗ 6 - LIFOTNT

ᤐᤗᤡᤛ᤻ᤋᤡᤜᤠ᤹ᤖᤧ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤏᤢ᤺ᤰᤋᤢᤒᤠ

¹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤢᤵ ᤁᤢᤛᤴᤍᤥ᤺ᤰᤁᤡᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤋᤧᤱᤃᤵᤐᤥ ᤕᤢᤅᤧᤒᤠ ᤏᤢᤛᤡ ᤗᤠ ᤌᤠᤖᤡᤰ ᤁᤧᤖᤧᤀᤠᤱ ᤘᤕᤧ॥

² ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤂᤠᤃᤧᤀᤡᤰᤐᤠᤜᤠ᤹ ᤔᤧᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ ᤛᤧ᤺ᤴᤔᤧᤗᤠᤵᤋᤢᤛᤡ. “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤀᤠᤸᤗ ᤀᤠᤏᤡᤃᤣ ᤌᤣ ᤆᤥᤃᤢᤶᤒᤧᤒᤠᤒᤣ᥅ ᤂᤧᤴ ᤋᤃᤡ ᤕᤢᤅᤧᤒᤠ ᤁᤢᤕᤢᤰᤏᤠᤍᤧᤴᤏᤥ ᤀᤠᤏᤡᤃᤣ ᤀᤠᤰᤂᤣᤀᤠᤱ ᤏᤢ᤺ᤰᤔᤠᤍᤣᤔᤠᤒᤣ᥅ ᤀᤠᤔᤧᤳᤋᤧ᤹ᤀᤥ॥”

³ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤂᤧᤏᤡ᤹ ᤁᤧᤏᤢ᤺ᤰᤋᤢᤶ ᤁᤧᤍᤣᤛᤢᤶᤒᤠᤏᤧ ᤑᤃᤪ ᤂᤧᤴᤏᤡᤴ ᤜᤠᤒᤠ ᤔᤧᤏᤢ᤺ᤰᤋᤠᤶᤔᤡᤴᤏᤧ᤹॥ ᤁᤖ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤏᤢ ᤏᤢ᤺ᤰᤋᤠᤶᤔᤧ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤘᤣ᤺ᤳᤋᤡᤀᤠᤱ ᤌᤣᤀᤠᤱᤏᤡ ᤂᤢᤏᤧ᤹ ᤋᤢᤰᤂᤣ ᤆᤠ᤺ᤳᤋᤡᤃᤧᤒᤣ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥”

⁴ ᤐᤗᤡᤛ᤻ᤋᤡᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢᤛᤡ. “ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤀᤠᤰᤋᤱᤒᤠ ᤛᤡᤍᤢᤱᤈᤓᤠ ᤜᤠᤱᤔᤠᤍᤣᤔᤠᤒᤣ᥅” ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤏᤥᤃᤵ ᤔᤧᤒᤡᤖᤢᤛᤡ. “ᤅᤠᤛᤡ ᤛᤠᤶᤔᤩᤠᤱ ᤗ᤺ᤵᤗᤠ ᤏᤢ ᤅᤠᤛᤡ ᤛᤠᤶᤔᤩᤠᤱ ᤛᤢᤒᤠᤜᤠ᤹ ᤐᤗᤡᤛ᤻ᤋᤡ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤂᤠᤏᤡ᤺ᤳ ᤁᤢᤀᤡᤛᤡᤰ ᤜᤠᤅᤧᤶᤍᤣᤛᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤶᤓᤠ ᤂᤧᤴ ᤋᤢᤰᤔᤠᤸᤗᤧ ᤂᤧᤏᤡ᤹ ᤏᤢ ᤂᤧᤏᤡ᤹ ᤕᤢᤰᤛᤠᤒᤠᤜᤠ᤹ ᤁᤧᤕᤠᤱᤄᤡᤀᤠᤱ ᤁᤧᤘᤕᤡ॥

⁵ ᤂᤡᤏᤡ᤹ ᤌᤰᤁᤥ ᤁᤧᤗ᤺ᤶᤒᤠ ᤑᤰᤘᤠᤗᤧ᤺ᤱᤘᤠ ᤕᤠᤱᤄᤣ᤺ᤰ ᤜᤧᤰᤋᤱᤒᤠ ᤅᤠᤛᤡ ᤛᤠᤶᤔᤩᤠᤱ ᤀᤡ᤺ᤳᤜᤠ᤹ ᤏᤢ ᤐᤗᤡᤛ᤻ᤋᤡ ᤗᤠᤈᤣᤴ ᤌᤩ᤺ᤱ ᤁᤧᤈᤥ᤺ᤰᤐᤠ ᤛᤢᤒᤠ ᤆᤀᤡ᤺ᤳᤜᤠ᤹ ᤆᤥᤃᤧᤶᤛᤧ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤠᤶᤔᤧ᤹॥ ᤜᤧᤰᤁᤣ ᤁᤧᤈᤥᤃᤢᤶᤏᤧᤑᤃᤪ ᤂᤢᤏᤧ᤹ ᤂᤧᤏᤡ᤹. ᤂᤧᤏᤡ᤹ ᤔᤠᤱᤜᤠ᤹ ᤏᤢ ᤂᤧᤏᤡ᤹ ᤗᤠᤈᤣᤴ ᤂᤢᤶᤍᤡᤱ ᤐᤡᤔᤠ ᤗᤧᤖᤢ॥

⁶ ᤂᤧᤏᤡ᤹ ᤌᤣᤀᤠᤱ ᤔᤡᤛᤪᤒᤠ ᤜᤠᤱ ᤑᤠᤖᤥᤴ ᤏᤢ ᤂᤧᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤜᤧᤰᤁᤣ ᤂᤧᤏᤡ᤹ ᤏᤡᤱᤘᤠᤴ ᤆᤡ᤺ᤵᤐᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤋᤢᤰᤂᤣ ᤆᤠ᤺ᤳᤋᤢᤛᤡᤀᤠᤱᤗᤰ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤶᤔᤠ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤒᤠ ᤔᤣ᤺ᤶᤒᤡ᥅”

⁷ “ᤀᤠᤸᤗ. ᤀᤠᤵᤑᤠᤸᤗᤧᤀᤠᤱ ᤔᤧᤱᤄᤧ᤺ᤵᤐᤣ ᤁᤧᤘᤠ᤹ᤔᤠ ᤏᤢ ᤂᤠᤖᤰ ᤁᤧᤎᤠᤵᤔᤠ ᤐᤡᤵᤔᤠ ᤏᤧᤳᤇᤡ ᤜᤧᤰᤁᤩᤠᤱ ᤁᤢᤛᤱ ᤐᤡᤳᤗᤠᤎᤠ ᤌᤡᤰ ᤕᤠᤖᤡᤵ ᤆᤥᤃᤠᤶᤔᤧ᤹॥ ᤜᤧᤰᤁᤩᤠᤱ ᤂᤧᤴ ᤐᤡᤵᤔᤠᤜᤠ᤹ ᤐᤡᤳᤗᤠᤎᤠᤀᤥ ᤂᤧ᤺ᤵᤋᤠᤶᤛᤡᤶᤔᤧ᤹ ᤁᤖ ᤐᤡᤳᤛᤠ᤺ᤳᤜᤠ᤹ᤃ ᤛᤧᤴᤍᤠᤶᤛᤡᤶᤔᤧ᤹ᤀᤠᤱ ᤐᤡᤳᤌᤠ᤺ᤱᤅᤥ ᤋᤣ᤹ᤖᤠᤶᤛᤡᤶᤔᤧ᤹॥

⁸ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤋᤣ᤹ᤖᤧᤶᤔᤧ᤹ᤀᤠᤱ ᤐᤡᤳᤗᤠᤎᤠ ᤛᤶᤎᤠᤱ ᤕᤢᤰᤂᤠᤶᤔᤧ᤹. ᤜᤧᤰᤁᤩᤠᤱ ᤌᤰᤁᤥ ᤁᤧᤗ᤺ᤶᤒᤠ ᤑᤰᤘᤠᤗᤧ᤺ᤱᤘᤠ ᤕᤠᤱᤄᤣ᤺ᤰ ᤜᤧᤰᤋᤱᤒᤠ ᤅᤠᤛᤡ ᤛᤠᤶᤔᤩᤠᤱ ᤀᤡ᤺ᤳᤜᤠ᤹ ᤏᤢ ᤛᤠᤶᤔᤩᤠᤱ ᤛᤢᤒᤠᤜᤠ᤹ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤒᤣᤛᤠᤱᤒᤠ ᤛᤴᤍᤥᤰᤁᤥ ᤕᤢᤰᤂᤠᤶᤔᤧ᤹॥ ᤜᤧᤰᤁᤩᤠᤱ ᤂᤧᤴ ᤐᤡᤵᤔᤠᤜᤠ᤹ ᤀᤠᤳᤋᤠᤴ ᤐᤣ᤺ᤰᤔᤠ ᤂᤢᤴᤇᤡ᤹ ᤛᤡᤖᤠ᤹ᤌᤠᤱ ᤂᤧᤵᤔᤥᤀᤣ ᤐᤡᤳᤇᤡᤖᤖᤥ॥

⁹ ᤁᤖ ᤂᤧᤱᤜᤠ᤹ ᤜᤠᤒᤠ ᤀᤥᤔᤧᤳᤋᤧᤶ ᤑᤳᤇᤧᤶᤛᤡᤶᤔᤧ᤹॥ ᤂᤧᤱᤜᤠ᤹ᤖᤧ ᤀᤠᤏᤡ᤹ ᤗᤠᤈᤣ᤹ᤒᤠ ᤀᤡ᤺ᤴᤍᤥᤴ ᤁᤠ᤺ᤰᤛᤢᤀᤠᤱ ᤒᤣᤌ-ᤛᤣᤔᤣᤛ ᤗᤧᤵᤔᤠᤱ ᤐᤡᤳᤇᤡᤏᤧᤑᤃᤪ ᤀᤠᤏᤡ᤹ᤀᤥ ᤕᤧᤳᤋᤢᤰᤂᤣ ᤁᤧᤍᤠ᤺ᤵᤐᤧᤴ ᤕᤜᤘᤣ ᤍᤠᤱᤒᤠᤴᤏᤣᤖᤇ ᤑᤠ᤹ᤀᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤧᤴ ᤗᤧᤵᤔᤠᤱ ᤔᤧᤒᤡᤳᤇᤡᤴᤏᤧᤑᤃᤪ ᤂᤧᤴ ᤕᤧᤳᤋᤢᤰᤂᤣ᤺ᤴ ᤕᤜᤘᤣ ᤍᤠᤱᤒᤠᤗᤠᤶ ᤋᤩᤧᤒᤠ ᤔᤧ᤺ᤴᤗᤇ. ᤁᤖ ᤀᤠᤒᤠᤅᤣ ᤐᤥ᤺ᤰᤂᤧᤒᤠᤖᤇ ᤑᤠ᤹ᤀᤠᤱ ᤀᤠᤏᤡ᤹ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥”

¹⁰ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤜᤠᤒᤠ ᤜᤧᤰᤁᤣᤀᤣ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤐᤡᤵᤔᤠ ᤏᤧᤳᤇᤡ ᤔᤧᤍᤠᤖᤢᤛᤡᤀᤠᤱ ᤐᤡᤳᤗᤠᤎᤠᤀᤥ ᤔᤧᤄᤧ᤺ᤵᤋᤢᤛᤡ ᤜᤧᤰᤁᤩᤠᤱ ᤐᤡᤳᤛᤠᤳᤜᤠ᤹ᤃ ᤐᤡᤳᤌᤠ᤺ᤱᤅᤥ ᤔᤧᤍᤣ᤹ᤖᤢᤛᤡ॥

¹¹ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤛᤠᤶᤔᤩᤠᤱ ᤛᤢᤒᤠ ᤏᤢ ᤂᤢᤏᤡ᤹ ᤌᤰᤁᤥ ᤁᤧᤗ᤺ᤶᤒᤠ ᤑᤰᤘᤠᤗᤧ᤺ᤱᤘᤠ ᤕᤠᤱᤄᤣ᤺ᤰ ᤜᤧᤰᤋᤱᤒᤠ ᤅᤠᤛᤡ ᤛᤠᤶᤔᤩᤠᤱ ᤀᤡ᤺ᤳᤜᤠ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤐᤡᤳᤗᤠᤎᤠ ᤛᤶᤎᤠᤱ ᤔᤧᤕᤢᤰᤂᤢ॥

¹² ᤜᤧᤰᤁᤩᤠᤱ ᤂᤧᤴ ᤐᤡᤵᤔᤠᤜᤠ᤹ ᤒᤣᤌ-ᤛᤣᤔᤣᤛᤒᤠ ᤗᤠᤶᤔᤣᤗᤠᤶ ᤔᤠ᤺ᤱᤅᤠᤱ ᤔᤠ᤺ᤱ ᤀ᤺ᤰᤋᤧᤇᤡᤖ ᤔᤠ᤺ᤰᤂᤧᤇᤡᤖ ᤗᤠᤶᤔᤡᤴ ᤔᤧᤴᤗᤧᤳᤋᤣ ᤋᤥ᤺ᤴᤍᤥᤴ ᤌᤠᤏᤧᤛᤡ॥ ᤂᤧᤶᤒᤩᤠᤱ ᤐᤗᤡᤛ᤻ᤋᤡ ᤕᤢᤰᤛᤠᤒᤠᤜᤠ᤹ᤖᤧ ᤒᤣᤌ-ᤛᤣᤔᤣᤛᤒᤠ ᤀᤡ᤺ᤴᤍᤥ ᤌᤠᤖᤡᤰ ᤔᤧᤍᤡᤶᤍᤢ ᤔᤧᤍᤣ᤹ᤖᤢᤛᤡᤖᤥ॥

¹³ ᤀᤠᤸᤗ ᤂᤧᤴ ᤕᤧᤶᤔᤥ ᤒᤣᤌ-ᤛᤣᤔᤣᤛᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤡᤜᤠ᤹ ᤛᤣ᤺ᤱᤄᤠ ᤏᤧᤏᤧᤒᤠᤍᤧᤴᤏᤥ ᤔᤧᤜᤧᤃᤢᤖ ᤔᤧᤕᤠᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤌᤥ ᤀᤥᤔᤧᤔᤕᤧᤸᤗᤧ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤏᤡᤛᤢᤀᤠᤱ ᤐᤛ᤺ᤳ ᤔᤧᤛ᤺ᤳᤋᤧ॥

¹⁴ ᤜᤧᤰᤁᤩᤠᤱ ᤂᤧᤴ ᤐᤡᤳᤗᤠᤎᤠᤴ ᤒᤣᤌ-ᤛᤣᤔᤣᤛᤒᤠ ᤕᤜᤥᤛᤢᤖᤧ ᤁᤢᤒᤩᤠᤱᤛᤡᤀᤥ ᤁᤧᤖᤧᤀᤠᤱ ᤕᤶᤒᤠ ᤗᤢᤱᤎᤡᤰᤗᤧ ᤁᤢᤒᤣᤛᤠᤱ ᤕᤧᤶᤛᤡᤱ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤐᤡᤳᤗᤠᤎᤠ ᤛᤡᤱᤅᤡᤴ ᤔᤧᤄᤧᤖᤢ ᤜᤧᤰᤁᤩᤠᤱ ᤐᤡᤵᤔᤠᤜᤠ᤹ ᤔᤧᤛᤧᤖᤢᤛᤡᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥

¹⁵ ᤂᤧᤒᤩᤠᤱ ᤗᤧᤒᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤜᤧᤰᤁᤩᤠᤱ ᤌᤰᤁᤥ ᤁᤧᤗ᤺ᤶᤒᤠ ᤑᤰᤘᤠᤗᤧ᤺ᤱᤘᤠ ᤕᤠᤱᤄᤣ᤺ᤰ ᤜᤧᤰᤋᤱᤒᤠ ᤅᤠᤛᤡ ᤛᤠᤶᤔᤩᤠᤱ ᤀᤡ᤺ᤳᤜᤠ᤹ ᤏᤢ ᤛᤠᤶᤔᤩᤠᤱ ᤛᤢᤒᤠ ᤁᤧᤕᤠᤰᤐᤠ ᤆᤢᤰᤐᤠ ᤛᤴᤍᤥᤰᤁᤡᤴ ᤔᤧᤗ᤺ᤳᤋᤢᤀᤠᤱ ᤕᤶᤒᤠ ᤗᤢᤱ ᤛᤶᤎᤠᤱ ᤔᤧᤕᤢᤰᤂᤢ॥ ᤜᤧᤰᤁᤩᤠᤱ ᤒᤣᤌ-ᤛᤣᤔᤣᤛᤒᤠ ᤔᤏᤠᤜᤠ᤹ᤖᤧ ᤜᤠᤒᤠ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤘᤣ᤹ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢ॥

¹⁶ ᤐᤗᤡᤛ᤻ᤋᤡᤒᤠ ᤂᤧᤴ ᤅᤠᤛᤡ ᤕᤢᤰᤛᤠᤒᤠᤜᤠ᤹ᤖᤧ ᤂᤧᤴ ᤁᤧᤖᤧᤰ ᤔᤧᤏᤡᤛᤢ. ᤜᤧᤰᤁᤩᤠᤱ ᤀᤠᤶᤓᤠ ᤂᤧᤴ ᤕᤧᤴᤏᤥᤀᤣ ᤂᤧᤱᤜᤠ᤹ ᤀᤣᤁᤪᤥᤏ ᤔᤧᤏᤢ᤺ᤰᤂᤧ ᤔᤧᤒᤣ॥

¹⁷ ᤐᤗᤡᤛ᤻ᤋᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤀᤥ ᤔᤧᤜᤠᤅᤢᤒᤠ ᤌᤰᤁᤥ ᤁᤧᤗ᤺ᤶᤒᤠ ᤑᤰᤘᤠᤗᤧ᤺ᤱᤘᤠ ᤕᤠᤱᤄᤣ᤺ᤰ ᤜᤧᤰᤋᤱᤒᤠ ᤅᤠᤛᤡ ᤛᤠᤶᤔᤩᤠᤱ ᤀᤡ᤺ᤳᤜᤠ᤹ ᤀᤛ᤻ᤍᤥᤍ. ᤃᤠᤈᤠ. ᤀᤛ᤻ᤁᤗᤥᤏ. ᤃᤠᤋ ᤏᤢ ᤀᤣᤰᤁᤪᤥᤏ ᤁᤴ ᤁᤧᤖᤧᤰᤗᤧ ᤗᤠᤃᤡ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤗᤳᤇᤠ ᤗᤳᤇᤠ ᤛᤡᤍᤢᤱᤈᤓᤠ ᤘᤕᤧ॥

¹⁸ ᤜᤧᤰᤁᤩᤠᤱ ᤛᤠᤶᤔᤩᤠᤱ ᤛᤢᤒᤠᤜᤠ᤹ᤃ ᤗᤢᤱᤎᤠᤰᤗᤧ ᤁᤒᤪᤡᤱ ᤁᤒᤢᤒᤠ ᤅᤠᤛᤡ ᤐᤗᤡᤛ᤻ᤋᤡ ᤕᤧᤰᤕᤰ ᤏᤢ ᤂᤧᤸᤗᤧ ᤁᤢᤄᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤖᤧ ᤗᤠᤃᤡ ᤘᤕᤧ. ᤂᤧᤵᤔᤥᤃ ᤅᤠᤛᤡ ᤕᤢᤰᤛᤠᤒᤠᤜᤠ᤹ᤖᤧ ᤕᤢᤰ ᤔᤧᤈᤥᤃᤢᤀᤠᤱ ᤘᤕᤧ॥ ᤒᤣᤌ-ᤛᤣᤔᤣᤛᤒᤠ ᤕᤶᤒᤠ ᤗᤢᤱ ᤛᤶᤎᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤔᤧᤕᤢᤰᤂᤢ. ᤂᤧᤴ ᤒᤣᤌ-ᤛᤣᤔᤣᤛᤒᤠ ᤕᤜᤥᤛᤢᤖᤧ ᤁᤢᤒᤩᤠᤱᤛᤡᤀᤥ ᤋᤥ᤺ᤴᤍᤡᤖᤧ ᤗᤠᤃᤡ ᤀᤠᤸᤗᤥ ᤌᤠᤖᤡᤰᤛᤠᤱ ᤏᤧᤖᤥ॥

¹⁹ ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤒᤣᤌ-ᤛᤣᤔᤣᤛᤒᤠ ᤏᤢᤒᤥᤱ ᤔᤏᤠᤜᤠ᤹ ᤛᤧᤖᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤛᤡᤃᤠᤱ ᤀᤥᤔᤧᤔᤧᤳᤋᤢᤀᤠᤱ ᤘᤕᤧ॥ ᤕᤜᤘᤣ ᤍᤠᤱᤒᤠᤸᤗᤧ ᤁᤶᤓᤍᤠᤱᤒᤠ ᤕᤶᤒᤠ ᤔᤧᤰᤔᤠᤛᤡᤔᤠ ᤋᤠᤖᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤖᤡᤱ ᤔᤧᤎᤰᤋᤧ॥

ᤔᤠᤱᤜᤢᤵ ᤛᤴᤍᤥᤰᤁᤡᤴ ᤁᤡᤷᤕᤋ-ᤕᤠᤖᤡᤔ ᤔᤧᤃᤧᤳᤋᤢ

²⁰ ᤜᤧᤰᤁᤩᤠᤱ ᤒᤣᤌ-ᤛᤣᤔᤣᤛᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠ. ᤁᤴ ᤛᤣᤛᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤜᤠᤳ ᤕᤧᤵᤔᤠ ᤛᤢᤰᤐᤠᤒᤣ᥅ ᤁᤵᤔᤥᤗᤠᤶ ᤁᤴ ᤔᤠᤱᤜᤢᤵ ᤛᤴᤍᤥᤰᤁᤡᤴ ᤀᤠᤏᤡ᤹ ᤀᤠᤳᤋᤡ ᤔᤧᤍᤣ᤹ᤖᤢᤖ ᤕᤠ᤺ᤶᤔᤠᤛᤡᤒᤣ᥅”

²¹ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤡᤷᤕᤋ-ᤕᤠᤖᤡᤔ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤡᤱᤄᤱ ᤔᤧᤜᤠᤰᤋᤢᤛᤡᤀᤠᤱ ᤔᤧᤔᤧᤳᤋᤢᤛᤡ. “ᤐᤗᤡᤛ᤻ᤋᤡᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤔᤧᤏᤢ᤺ᤰᤋᤢ ᤔᤧᤓᤧᤴᤇᤢᤀᤠᤱ ᤘᤠ᤹॥ ᤕᤥ ᤕᤧ᤹ᤀᤠᤶᤔᤧ᤹ᤀᤠᤱ ᤂᤧᤴ ᤂᤧᤏᤡ᤹ᤀᤥ ᤌᤥ ᤋᤣ᤹ᤖᤠᤶᤔᤧ᤹ᤀᤥ॥”