᥇ ᤛᤠᤔᤢᤀᤧᤗ 5 - LIFOTNT

ᤔᤠᤱᤜᤢᤵ ᤛᤴᤍᤥᤰᤁᤡᤴ ᤐᤗᤡᤛ᤻ᤋᤡᤜᤠ᤹ᤖᤧ ᤔᤧᤃᤳᤋᤢ

¹ ᤐᤗᤡᤛ᤻ᤋᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤜᤢᤰᤁᤠᤵ ᤔᤧᤔᤧᤳᤇᤡᤱᤅᤠᤱ ᤀᤧᤒᤣᤴ-ᤀᤣᤈᤖᤗᤠᤶᤒᤠ ᤂᤧᤱᤜᤠ᤹ᤖᤧ ᤀᤛ᤻ᤍᤥᤍ ᤐᤠᤱᤈᤢᤶᤔᤥ ᤔᤧᤍᤣ᤹ᤖᤢ॥

² ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤴᤍᤥᤰᤁᤡᤴ ᤔᤧᤒᤰᤂᤢ ᤔᤧᤍᤣ᤹ᤖᤢᤀᤠᤱ ᤍᤠᤃᤥᤏ ᤔᤠᤱ ᤁᤧᤕᤢᤱᤒᤠ ᤔᤠᤱᤜᤡᤶᤔᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤍᤠᤃᤥᤏᤧᤸᤗᤧᤀᤣ ᤁᤢᤒᤣᤛᤠᤱ ᤔᤧᤕᤢᤰᤂᤢ॥

³ ᤁᤢᤍᤠ᤺ᤴᤍᤡᤰᤛᤔᤠ ᤋᤠᤏᤠᤶ ᤀᤛ᤻ᤍᤥᤍᤒᤠ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ ᤀᤥᤔᤧᤔᤧᤳᤋᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥ᤺ᤰᤁᤡᤸᤗᤧ ᤁᤢᤍᤃᤡ ᤍᤠᤃᤥᤏᤧᤴ ᤆᤥ᤺ᤴᤍᤧᤀᤠᤱ ᤛᤠᤶᤒᤥᤴ ᤜᤒᤳᤇᤠ ᤑᤴᤇᤡᤱᤅᤠᤱ ᤐᤳᤇᤧᤒᤠ ᤔᤧᤏᤡᤛᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤍᤠᤃᤥᤏᤧᤴ ᤔᤧᤒᤰᤂᤢᤀᤠᤱ ᤕᤠᤶᤔᤥ ᤁᤢᤕᤢᤱᤔᤠᤍᤧᤴᤏᤥᤀᤣ ᤔᤧᤕᤢᤰᤂᤢ॥

⁴ ᤁᤖ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤂᤧᤱᤜᤠ᤹ ᤔᤧᤒᤥᤃᤧᤀᤠᤱ ᤀᤥᤔᤧᤔᤧᤳᤋᤢᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤴᤍᤥᤰ ᤋᤃᤡᤒᤠ ᤁᤢᤗᤠᤱᤈᤰᤐᤥ ᤛᤠᤶᤒᤥᤴ ᤜᤒᤳ ᤆᤥ᤺ᤴᤍᤧᤀᤠᤱ ᤏᤧᤛ᤻ᤛᤧᤒᤠ ᤔᤧᤏᤡᤛᤢ. ᤜᤧᤰᤁᤩᤠᤱ ᤂᤧᤴ ᤍᤠᤃᤥᤏᤧᤸᤗᤧ ᤁᤢᤎᤧᤃᤣ᤺ᤰᤁᤡᤴ ᤏᤢ ᤁᤢᤜᤢᤰᤜᤠ᤹ ᤑᤢᤳᤆᤡᤰ ᤘᤈᤡᤰ ᤐᤢᤴᤍᤧ ᤛᤩᤠᤰ ᤘᤕᤠᤰ ᤐᤢ᤹ᤖᤧᤀᤠᤱ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤕᤠᤀᤥ ᤏᤧᤛ᤻ᤛᤧᤃᤖᤧ. ᤍᤠᤃᤥᤏᤧᤸᤗᤧ ᤁᤢᤎᤰᤁᤡᤴᤗᤰ ᤜᤠᤒᤠ ᤕᤢᤅᤧᤈᤩᤧ॥

⁵ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤕᤧᤶᤔᤠᤱᤎᤥ ᤀᤠᤸᤗᤥ ᤌᤠᤖᤡᤰᤛᤠᤱ ᤍᤠᤃᤥᤏᤧᤸᤗᤧ ᤁᤢᤕᤰᤕᤠᤒᤠᤜᤠ᤹ ᤏᤢ ᤘᤣ᤹ ᤐᤗᤡᤛ᤻ᤋᤡᤜᤠ᤹ ᤀᤛ᤻ᤍᤥᤍᤒᤠ ᤍᤠᤃᤥᤏ ᤔᤠᤱᤜᤡᤶ ᤛᤡᤃᤠᤱ ᤔᤧᤗᤠ᤺ᤳᤋᤡᤸᤗᤧ ᤂᤧᤴ ᤍᤠᤃᤥᤏᤧᤴ ᤔᤧᤏᤧᤛ᤻ᤛᤢᤒᤠ ᤋᤧᤴᤏᤡᤴ ᤔᤧᤴᤍᤥ᤹ᤀᤣ ᤔᤧᤗᤠᤳ॥

⁶ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤀᤛ᤻ᤍᤥᤍ ᤐᤠᤱᤈᤢᤶᤔᤥ ᤏᤢ ᤂᤧᤸᤗᤧ ᤁᤢᤒᤣᤛᤠᤱᤒᤠ ᤐᤠᤱᤓᤣ᤹ᤒᤠ ᤔᤏᤠᤜᤠ᤹ ᤛᤶᤎᤠᤱ ᤁᤡᤵᤔᤠ ᤁᤧᤄᤢᤒᤠ ᤑᤰᤘᤠᤗᤧ᤺ᤱᤘᤠ ᤁᤧᤗ᤺ᤶᤒᤠ ᤕᤠᤱᤄᤣ᤺ᤰ ᤆᤥᤃᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤶᤎᤠᤱ ᤔᤠᤱᤍᤢᤰᤔᤠ ᤋᤠᤖᤢ॥

⁷ ᤂᤧᤴ ᤔᤏᤠᤜᤠ᤹ᤖᤧ ᤌᤣ ᤐᤥ᤺ᤰᤂᤧ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ “ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤀᤠᤏᤡ᤹ ᤁᤵᤔᤥ ᤛᤵᤑᤠᤎᤡᤰᤁᤠᤱ ᤕᤢᤱᤔᤠ ᤔᤧᤏᤢ᤹ᤏᤧᤴ᥄ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤘᤠ᤹᥄ ᤍᤠᤃᤥᤏ ᤔᤠᤱᤅᤡᤴᤏᤢ ᤛᤥᤖᤡᤰ ᤀᤠᤏᤡ᤹ ᤁᤧᤖᤧᤰ ᤀᤠᤔᤧᤰᤗᤥ॥”

⁸ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤕᤢᤰᤛᤠᤒᤠᤜᤠ᤹ ᤔᤧᤀᤢ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤁᤴ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤀᤠᤏᤡᤃᤣ ᤌᤣ ᤆᤥᤃᤢᤶᤒᤧᤒᤠᤒᤣ᥅” ᤜᤧᤰᤁᤩᤠᤱ ᤕᤢᤰᤛᤠᤒᤠᤜᤠ᤹ᤖᤧ ᤔᤧᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤃᤠᤋᤒᤠ ᤐᤠᤱᤈᤢᤶᤔᤥ ᤔᤧᤛᤔᤧᤎᤖ॥” ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤔᤧᤈᤳᤋᤢ ᤔᤧᤍᤣ᤹ᤖᤢ॥

⁹ ᤁᤖ ᤛᤴᤍᤥᤰᤁᤡᤴ ᤃᤠᤋᤀᤥ ᤁᤧᤖᤧᤏᤢᤔᤧ᤺ᤴᤏᤣ ᤂᤧᤵᤔᤥᤒᤠ ᤆᤢᤰᤐᤠ ᤕᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤑᤰᤘᤠᤗᤧ᤺ᤱᤘᤠ ᤔᤧᤗ᤺ᤴᤍᤧᤖ ᤕᤠ᤺ᤴᤍᤢᤛᤡᤀᤠᤱ ᤋᤢᤰᤂᤣ ᤆᤠ᤺ᤵᤔᤠ ᤜᤣ᤺ᤰᤋᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤐᤠᤱᤈᤢᤶᤔᤥ ᤛᤠ᤹ᤖᤡᤰ ᤁᤡᤔᤠ ᤕᤱᤔᤠ ᤐᤥ᤺ᤰᤂᤧ॥

¹⁰ ᤂᤧᤸᤗᤧᤆᤥᤃᤢᤸᤗᤧ ᤂᤧᤵᤔᤥᤗᤠᤶ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤀᤣᤁᤪᤥᤏ ᤐᤠᤱᤈᤢᤶᤔᤥ ᤔᤧᤛᤔᤧᤎ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤂᤧ᤹ᤕᤥ ᤔᤧᤃᤧᤳᤋᤢᤒᤠ ᤔᤧᤏᤡᤛᤢᤏᤣᤔᤧ᤺ᤴᤏᤣ ᤀᤣᤁᤪᤥᤏᤒᤠ ᤔᤏᤠᤜᤠ᤹ ᤔᤧᤀ᤺ᤰᤋᤧᤖ ᤔᤧᤒᤠ᤺ᤳᤋᤢ. “ᤂᤧᤱᤜᤠ᤹ᤖᤧᤃ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤀᤠᤏᤡ᤹ ᤏᤢ ᤀᤠᤏᤡ᤹ ᤜᤡᤶᤛᤕᤱᤜᤠ᤹ ᤛᤧᤳᤇᤧ ᤁᤵᤔᤥ ᤔᤧᤓᤧᤳᤋᤢᤀᤠᤱ ᤘᤠ᤹ᤖᤥ॥”

¹¹ ᤂᤧᤸᤗᤧᤆᤥᤃᤢᤸᤗᤧ ᤀᤣᤁᤪᤥᤏᤒᤠ ᤔᤏᤠᤜᤠ᤹ᤖᤧ ᤐᤗᤡᤛ᤻ᤋᤡ ᤕᤢᤰᤛᤠᤒᤠᤜᤠ᤹ ᤔᤧᤀᤢ᤺ᤳᤋᤢᤛᤡᤀᤠᤱ ᤔᤧᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡ. “ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤕᤠᤱᤏᤠ ᤀᤠᤒᤠᤅᤣ ᤁᤢᤕᤢᤰᤏᤠᤀᤥ ᤏᤢ᤺ᤰᤋᤧᤶᤍᤣᤛᤧᤶᤔᤧ᤹ᤀᤥ॥ ᤔᤣ᤺ᤴᤏᤧᤑᤃᤪ ᤁᤸᤗᤧ ᤀᤠᤏᤡᤃᤣ ᤁᤧᤖᤧᤰ ᤛᤩᤧᤖᤡᤃᤧᤖᤥ॥” ᤛᤡᤔᤧᤴ ᤏᤢ ᤋᤢᤰᤔᤠ ᤗᤠ᤺ᤰᤔᤠᤴ ᤐᤠᤱᤈᤢᤶᤔᤥ ᤁᤧᤖᤧᤰ ᤐᤥᤃᤧᤀᤠᤱ ᤏᤧᤛ᤻ᤛᤧ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤢᤰᤁᤡᤴ ᤂᤧᤴ ᤐᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤘᤕᤧᤖᤥ॥

¹² ᤔᤧᤴᤇᤡᤀᤣ ᤁᤧᤘᤠ᤹ᤒᤠᤜᤠ᤹ ᤁᤡᤵᤔᤠ ᤁᤧᤄᤢᤒᤠ ᤑᤰᤘᤠᤗᤧ᤺ᤱᤘᤠ ᤗ᤺ᤶᤔᤠᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤜᤠ᤺ᤵᤔᤠ ᤑᤡ᤺ᤰᤔᤧᤴ ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤁᤧᤖᤧᤖᤥ॥