᥇ ᤛᤠᤔᤢᤀᤧᤗ 4 - LIFOTNT

ᤐᤗᤡᤛ᤻ᤋᤡᤜᤠ᤹ᤖᤧ ᤛᤴᤍᤥᤰᤁᤡᤴ ᤜᤢᤰᤁᤠᤵ ᤔᤧᤔᤧᤳᤇᤡᤱᤒᤠ

¹ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤢᤒᤠ᤺ᤴᤈᤠᤰᤁᤡᤴ ᤀᤡᤛᤪᤠᤀᤡᤗ ᤗᤠᤈᤣ᤹ ᤁᤧᤖᤧᤰ ᤐᤡᤛᤠᤱ ᤛᤧᤖᤧ॥ ᤀᤠᤸᤗ ᤂᤧᤴ ᤕᤧᤶᤔᤥ ᤀᤡᤛᤪᤠᤀᤡᤗᤡᤜᤠ᤹ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤋᤃᤡ ᤔᤧᤒᤥᤖᤧ॥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤧᤒᤣᤏ-ᤀᤣᤈᤖ ᤔᤧᤵᤔᤏᤠᤒᤠᤍᤧᤴᤏᤥ ᤛᤠ᤺ᤱᤃᤠᤜᤡᤶ ᤔᤧᤄᤡᤱᤄᤢᤀᤠᤱ ᤔᤧᤕᤢᤱᤛᤡᤱ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤀᤐᤣᤁ ᤔᤧᤵᤔᤏᤠᤒᤠᤍᤧᤴᤏᤥ ᤋᤢᤖᤠᤕᤰ ᤔᤧᤄᤡᤱᤄᤢᤀᤠᤱ ᤔᤧᤕᤢᤱᤛᤡᤱ॥

² ᤐᤗᤡᤛ᤻ᤋᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤆᤡᤓᤳ ᤔᤧᤓᤳᤋᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤠ᤺ᤴᤍᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤔᤏᤠᤜᤠ᤹ ᤜᤧᤴᤇᤡᤱ ᤗᤡᤛᤡ ᤕᤠᤖᤡᤰ ᤌᤱᤅᤥ ᤜᤍ᤹ ᤔᤧᤛᤧᤖᤢᤛᤡ॥

³ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ ᤕᤰᤁᤥ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤀᤡᤛᤪᤠᤀᤡᤗᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤀᤡᤴ ᤀᤠᤏᤡ᤹ ᤌᤣᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤗᤡᤛ᤻ᤋᤡᤜᤠ᤹ᤗᤠᤶ ᤜᤠᤖᤡᤀᤠᤍᤩᤧᤖ ᤀᤠᤕᤠ᤺ᤴᤍᤧᤒᤠᤒᤣ᥅ ᤀᤠᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤛᤡᤗᤥᤀᤥᤗᤠᤶ ᤌᤠᤰᤋᤢᤶ. ᤂᤧᤴ ᤀᤠᤏᤡ᤹ᤗᤢᤶᤔᤥᤀᤣ ᤘᤠ᤹ᤖ ᤜᤧᤰᤁᤩᤠᤱ ᤀᤠᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤛᤧ᤺ᤵᤗ॥”

⁴ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤡᤗᤥᤀᤥ ᤔᤏᤠᤜᤠ᤹ ᤔᤧᤒᤠᤱᤄᤢᤛᤡ. ᤜᤧᤰᤁᤩᤠᤱ ᤁᤖᤢᤒ ᤔᤧᤵᤔᤏᤠᤒᤠ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤎᤠᤰᤋᤢ॥ ᤂᤧ᤹ᤕᤥ ᤀᤣᤗᤡᤖᤧ ᤁᤢᤛ᤻ᤛᤠ ᤏᤧᤵᤑᤢ. ᤜᤥᤵᤏᤡᤴ ᤏᤢ ᤐᤡᤏᤜᤠᤛᤧᤴ ᤔᤠᤱᤜᤢᤵ ᤛᤴᤍᤥᤰᤁᤡᤸᤗᤧ ᤁᤢᤒᤣᤛᤠᤱ ᤘᤕᤧᤛᤡ॥

⁵ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤜᤢᤵ ᤛᤴᤍᤥᤰᤁᤡᤴ ᤋᤢᤖᤠᤕᤰᤁᤥ ᤔᤧᤍᤠᤖᤢ. ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤂᤠᤶᤒᤣ᤺ᤰᤔᤧᤴᤏᤣ ᤕᤰᤂᤧᤖ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ॥

⁶ ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤴ ᤀᤡᤰᤗᤠᤴ ᤔᤧᤄᤧᤵᤛᤢᤀᤠᤱ ᤛᤣ᤺ᤴᤔᤧᤍᤥᤛᤡᤱ. “ᤜᤡᤒᤪᤢᤜᤠ᤹ᤖᤧ ᤂᤢᤴᤇᤡ᤹ ᤋᤢᤖᤠᤕᤰᤁᤥ ᤂᤧᤴ ᤕᤶᤒᤠ ᤀᤡᤰᤗᤠᤴ ᤌᤣᤒᤣ᥅” ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤕᤰᤁᤥ ᤁᤧᤖᤧᤀᤠᤱ ᤕᤢᤱ ᤁᤧᤗ᤹ᤒᤠ ᤐᤗᤡᤛ᤻ᤋᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ॥

⁷ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤔᤧᤃᤡᤛᤧᤖ ᤔᤧᤒᤠ᤺ᤳᤋᤢ. “ᤔᤠᤱᤅᤡᤴ ᤋᤢᤖᤠᤕᤰᤁᤥ ᤋᤩᤧᤖᤳᤇ॥ ᤆᤡ᤺ᤳᤋᤠᤱᤗᤰ ᤛᤩᤧᤖᤥ᥄ ᤀᤠᤏᤡ᤹ᤃ ᤀᤠᤔᤧᤰᤐᤠ ᤐᤥ᤺ᤰᤂᤧᤖᤥ. ᤀᤰᤋᤱᤒᤠᤃ ᤋᤃᤡ ᤀᤠᤵᤑᤠᤸᤗᤧᤀᤠᤱ ᤔᤧᤶᤒᤥᤱᤅᤣ ᤘᤕᤧ॥

⁸ ᤁᤴ ᤔᤢᤰᤛᤠᤶᤍᤠᤱᤒᤠ ᤔᤠᤱᤜᤠ᤹ᤖᤧ ᤂᤢᤏᤡ᤹ ᤔᤢᤰᤛᤠᤶᤗᤠᤶ ᤀᤠᤏᤡ᤹ ᤜᤠ᤺ᤳᤗᤧ ᤋᤠᤱᤛᤧ᤺ᤵᤔᤠ ᤀᤠᤛᤢᤰᤐᤠᤒᤣ᥅ ᤜᤠᤒᤠ ᤁᤴ ᤔᤠᤱᤜᤠ᤹ᤖᤧᤀᤣ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤔᤡᤛᤪᤡᤜᤠ᤹ ᤐᤖᤡᤰ ᤐᤖᤡᤰᤐᤠ ᤋᤢᤰᤔᤠ ᤗᤠ᤺ᤰᤔᤠᤗᤠᤶ ᤔᤧᤔᤧᤰᤂᤢᤛᤡᤀᤠᤱ ᤘᤕᤧ॥

⁹ ᤐᤗᤡᤛ᤻ᤋᤡᤛᤣ. ᤜᤠᤱᤜᤠᤱ ᤗ᤹ᤖᤧᤶᤔᤧ᤹. ᤕᤧᤶᤒᤡᤳᤇᤠ ᤜᤧᤰᤁᤣ ᤕᤠ᤺ᤶᤒᤰ ᤆᤥᤃᤧᤶᤔᤧ᤹. ᤔᤣ᤺ᤴᤏᤧᤓᤠᤃᤪ ᤂᤧᤱᤜᤠ᤹ ᤂᤡᤏᤡ᤹ ᤕᤥ᤺ᤰᤐᤠ ᤔᤧᤘᤕᤧᤒᤠ ᤁᤢᤀᤡᤛᤡᤰ ᤂᤧᤴ ᤜᤡᤒᤪᤢᤜᤠ᤹ᤖᤧ ᤂᤢᤴᤇᤡ᤹ ᤕᤥᤰ ᤁᤧᤒᤥᤰᤂᤡᤖᤥ॥ ᤁᤧᤎᤢᤶᤒᤠ ᤕᤧᤶᤒᤡᤳᤇᤠ ᤜᤧᤰᤁᤣ ᤌᤱ ᤆᤥᤃᤧᤶᤔᤧ᤹॥”

¹⁰ ᤂᤧᤸᤗᤧᤆᤥᤃᤢᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤌᤱ ᤔᤧᤈᤥᤃᤢ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤜᤠᤖᤡᤔᤧᤍᤩᤧᤀᤠᤱ ᤂᤢᤴᤇᤡ᤹ ᤋᤢᤖᤠᤕᤰ ᤗᤧᤵᤔᤠᤱ ᤔᤧᤄᤧᤳᤇᤡᤱ ᤔᤧᤒᤣ॥ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤹ᤖᤡᤰ ᤁᤢᤈᤠᤓᤧᤖᤧᤖ ᤜᤠᤖᤡᤔᤧᤍᤩᤧ. ᤜᤧᤰᤁᤩᤠᤱ ᤛᤢᤶᤒᤥᤱ ᤜᤧᤴᤇᤡᤱ ᤕᤠᤖᤡᤰ ᤂᤠᤶᤒᤠᤱᤅᤥ ᤁᤧᤎᤰᤐᤠ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤔᤧᤛᤩᤧ॥

¹¹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤜᤢᤵ ᤁᤢᤛᤴᤍᤥ᤺ᤰᤁᤡᤴ ᤜᤢᤰᤁᤠᤵ ᤔᤧᤔᤧᤳᤇᤡᤱ. ᤜᤧᤰᤁᤩᤠᤱ ᤀᤣᤗᤡᤖᤧ ᤁᤢᤛ᤻ᤛᤠ. ᤜᤥ᤺ᤵᤏᤡ᤺ᤴ ᤏᤢ ᤐᤡᤏᤜᤠᤛᤧᤴ ᤏᤧᤵᤔᤠᤱ ᤔᤧᤛᤩᤧᤖᤢᤛᤡᤖᤥ॥

ᤀᤣᤗᤡᤖᤧ ᤁᤢᤛᤡᤔᤧᤴ

¹² ᤜᤠᤒᤠ ᤂᤧᤴ ᤕᤧᤴᤏᤥ ᤒᤣᤏᤩᤠᤔᤡᤏ ᤌᤠ᤺ᤰᤁᤥᤒᤠ ᤔᤏᤠᤎᤡᤰ ᤌᤱᤗᤠᤶᤒᤠ ᤛᤡᤗᤥᤀᤥ ᤂᤧᤳᤇᤡᤱᤅᤠᤱ ᤋᤩᤧ. ᤂᤧᤸᤗᤧ ᤁᤢᤍᤣ᤺ᤳᤜᤠ᤹ ᤋᤧᤖᤧᤰ ᤋᤧᤖᤧᤰ ᤋᤧ᤺ᤰᤂᤧᤀᤠᤱ ᤁᤢᤎᤧᤃᤣ᤺ᤰᤐᤥ ᤂᤠᤶᤜᤡ᤺ᤰᤛᤥᤖᤡ ᤐᤳᤇᤧ॥

¹³ ᤂᤧᤴ ᤁᤧᤖᤧᤍᤩᤧ᤺ᤸᤗᤧ ᤀᤣᤗᤡᤴ ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤁᤢᤕᤢᤱᤔᤠᤍᤧᤴᤏᤥ ᤕᤢᤱᤛᤡᤱᤅᤠᤱ ᤀᤥᤔᤏᤢ ᤕᤢᤅᤧ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤁᤡᤛᤧᤀᤠᤱ ᤘᤕᤧ॥ ᤂᤧᤴ ᤔᤏᤠ᤺ᤸᤗᤧ ᤀᤡᤱᤄᤱᤅᤡᤴ ᤋᤠᤖᤢᤀᤠᤱ ᤕᤧᤰᤕᤰ ᤛᤡᤃᤠᤱ ᤗᤠᤛᤧ. ᤜᤧᤰᤁᤩᤠᤱ ᤐᤥ᤺ᤰᤂᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤏᤠᤜᤠ᤹ ᤆᤧᤰᤋᤢᤛᤡ ᤜᤧᤰᤁᤣ᤺ᤸᤗᤧ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤜᤠᤒᤧ ᤔᤧᤓᤡ᤺ᤰᤋᤧ॥

¹⁴ ᤀᤣᤗᤡᤖᤧ ᤂᤧᤴ ᤜᤠ᤺ᤶᤗᤠᤰᤘᤠ ᤐᤥᤃᤧᤒᤠᤴ ᤂᤧᤵᤛᤢᤀᤠᤱ ᤐᤠ᤺ᤳᤋᤢ. “ᤁᤴ ᤜᤕᤱ ᤁᤡᤸᤗᤡᤱᤅᤡᤴ ᤌᤣᤒᤣ᥅” ᤂᤧᤴ ᤔᤏᤠᤴ ᤜᤠᤖᤠᤜᤠᤖᤠ ᤀᤣᤗᤡᤖᤧ᤹ᤀᤥ ᤐᤣ॥

¹⁵ ᤂᤧᤴ ᤕᤧᤶᤔᤥ ᤀᤣᤗᤡᤴ ᤑᤠᤱᤒᤥᤱᤅᤠᤱ ᤕᤧᤳᤇᤡ ᤋᤱᤒᤣ᤹ ᤁᤧᤖᤧᤀᤠᤱ ᤘᤕᤧ. ᤔᤡᤰ ᤏᤡᤔᤠᤀᤠᤱ ᤔᤧᤴᤇᤢᤰᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤘᤕᤧ॥

¹⁶ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤣᤗᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤌᤱᤗᤠᤶᤒᤠ ᤂᤠᤖᤰ ᤁᤧᤖᤠᤱ ᤋᤩᤠᤱᤒᤠᤖᤥ॥ ᤀᤠᤀᤡᤴᤇᤠ ᤀᤠᤱᤃᤠ᤹ ᤌᤱᤗᤠᤶᤒᤠ ᤂᤧᤳᤇᤡᤱᤅᤠᤱᤅᤠᤱ ᤋᤩᤠᤱᤒᤠᤖᤥ॥” ᤀᤣᤗᤡᤖᤧ ᤛᤣ᤺ᤴᤍᤥᤛᤢ. “ᤀᤠᤛ᤻ᤛᤠᤀᤣ. ᤌᤣ ᤐᤥ᤺ᤰᤂᤧᤒᤣ᥅”

¹⁷ ᤂᤧᤴ ᤀᤡᤱᤄᤱ ᤁᤧᤍᤠ᤺ᤵᤐᤠ ᤔᤏᤠ᤺ᤸᤗᤧ ᤔᤧᤳᤋᤢ. “ᤀᤡᤛᤪᤠᤀᤡᤗᤡᤜᤠ᤹ ᤐᤗᤡᤛ᤻ᤋᤡᤜᤠ᤹ᤗᤠᤶ ᤐᤢᤒᤣᤗᤠᤵᤛᤠ ᤔᤧᤄᤧᤳᤇᤡᤱ ᤔᤧᤒᤣ॥ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤕᤖᤡᤰ ᤔᤧᤔᤧᤃᤧ॥ ᤀᤠᤍᤠᤱᤒᤠᤖᤧ ᤁᤧᤛ᤻ᤛᤠ. ᤜᤥᤵᤏᤡᤴ ᤏᤢ ᤐᤡᤏᤜᤠᤛᤧᤴ ᤏᤧᤵᤑᤠᤱ ᤔᤧᤛᤩᤧᤖᤢᤛᤡ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴᤏᤠᤱ ᤕᤠᤵᤔᤡ ᤔᤧᤏᤠᤵᤋᤧ ᤔᤧᤍᤣ᤹ᤖᤧ॥”

¹⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤸᤗᤧ ᤁᤢᤕᤠ᤺ᤶᤒᤣ᤹ᤀᤥ ᤂᤧᤵᤛᤢᤏᤠᤔᤧ᤺ᤴᤏᤣ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤒᤣᤛᤠᤱᤒᤠ ᤁᤢᤕᤢᤱᤔᤠᤍᤧᤴᤏᤥᤗᤠᤶ ᤀᤣᤗᤡᤴ ᤀᤣᤃᤠᤱ ᤗᤧᤵᤔᤠᤱ ᤆᤡᤸᤗᤧᤰ ᤗᤧᤰᤂᤧᤎᤩᤧ. ᤜᤧᤰᤁᤩᤠᤱ ᤁᤢᤏᤡ᤺ᤱᤔᤧᤴ ᤆᤧᤃᤧᤀᤠᤱ ᤛᤩᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤠᤵᤐᤥᤒᤠ ᤏᤢ ᤁᤢᤎᤰ ᤁᤧᤗᤡ᤺ᤵᤐᤠ ᤔᤏᤠ ᤘᤕᤧ॥ ᤂᤢᤏᤧ᤹ ᤋᤱᤒᤣ᤹ ᤗᤡᤒᤥᤱ ᤌᤠᤖᤡᤰ ᤀᤡᤛᤪᤠᤀᤡᤗᤒᤠ ᤂᤠᤛᤧᤴᤍᤠᤱᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤕᤧ॥

ᤐᤡᤏᤜᤠᤛᤖᤧ ᤁᤢᤔᤣ᤺ᤳᤋᤡᤴ ᤛᤩᤧᤒᤠ

¹⁹ ᤀᤣᤗᤡ᤺ᤸᤗᤧ ᤁᤢᤶᤒᤠᤱᤗᤡ. ᤐᤡᤏᤜᤠᤛᤖᤧ ᤁᤢᤔᤣ᤺ᤳᤋᤡᤴ ᤔᤧᤴᤇᤢᤰᤔᤠ ᤘᤕᤧ. ᤜᤧᤰᤁᤩᤠᤱ ᤀᤅᤧ᤺ᤰᤘᤠ ᤁᤵᤔᤠ ᤕᤧᤶ ᤋᤩᤧᤈᤢᤖᤧᤀᤠᤱ ᤘᤕᤧ॥ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤔᤏᤠᤜᤠ᤹ ᤜᤢᤰᤁᤠᤵ ᤔᤧᤔᤧᤳᤇᤡᤱ ᤁᤧᤗ᤹ᤒᤠ ᤏᤢ ᤁᤢᤴᤏᤥ᤺ᤵᤐᤠᤴ ᤜᤧᤰᤁᤩᤠᤱ ᤁᤢᤕᤧᤶᤒᤠ᤺ᤴ ᤛᤩᤧᤒᤠ ᤏᤡᤱᤘᤠ᤹ ᤂᤥᤛᤢ. ᤜᤠᤒᤠ ᤂᤧᤴ ᤕᤧᤶᤔᤥ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤀᤠᤱ ᤂᤧᤸᤗᤧ ᤛᤠᤃᤳᤋᤢ॥

²⁰ ᤂᤧᤴ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤂᤠ ᤛᤡᤔᤠ ᤀᤡ᤺ᤳᤋᤧᤸᤗᤧ ᤁᤢᤃᤶᤒᤪᤠᤱ ᤁᤧᤔᤧᤵᤔᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤜᤠᤱᤜᤠᤱ ᤗ᤹ᤖᤧ. ᤂᤧᤏᤧ᤹ ᤕᤧᤶᤒᤡᤳᤇᤠ᤹ᤛᤠᤎᤡᤰ ᤁᤧᤃᤳᤋᤢᤀᤠᤱ ᤘᤠ᤹॥” ᤁᤖ ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤏᤢ᤺ᤰᤋᤢᤴ. ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥᤀᤣ ᤔᤧᤕᤢᤰᤂᤢᤴ॥

²¹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤔᤡᤱ ᤀᤡᤁᤠᤒᤥᤍ ᤕᤢᤰᤂᤢ. ᤜᤧᤰᤁᤩᤠᤱ ᤐᤠ᤺ᤳᤋᤢ. “ᤀᤡᤛᤪᤠᤀᤡᤗᤗᤠᤶᤒᤠ ᤔᤡᤔᤡᤍᤡᤱᤅᤡᤴ ᤔᤕᤧ.” ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤘᤣ᤹ ᤔᤏᤠᤖᤧ ᤂᤢᤏᤡ᤹ ᤜᤢᤰᤁᤥ ᤌᤩᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤁᤢᤴᤏᤥ᤺ᤵᤐᤧᤴ ᤏᤢ ᤁᤢᤕᤧᤶᤒᤠ᤺ᤴ ᤛᤩᤧᤛᤡᤀᤠᤱ ᤜᤥ᤺ᤵᤋᤧᤇᤡ॥

²² ᤂᤢᤏᤧ᤹ ᤗ᤹ᤖᤧ “ᤀᤡᤛᤪᤠᤀᤡᤗᤗᤠᤶᤒᤠ ᤔᤡᤔᤡᤍᤡᤱ ᤔᤕᤧ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥ᤺ᤰᤁᤡᤴ ᤕᤠᤵᤔᤡ ᤔᤧᤏᤠᤵᤋᤧ ᤔᤧᤍᤣ᤹ᤖᤧᤀᤠᤱ ᤘᤠ᤹ᤖᤥ॥”