᥇ ᤛᤠᤔᤢᤀᤧᤗ 31 - LIFOTNT

ᤛᤠᤘᤗ ᤏᤢ ᤁᤢᤛ᤻ᤛᤠᤜᤠ᤹ ᤔᤧᤛᤩᤧᤒᤠ

¹ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤌᤱ ᤔᤧᤈᤥᤃᤧ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤜᤠᤖᤡᤔᤧᤍᤩᤧᤀᤠᤱ ᤔᤧᤄᤧᤳᤇᤡᤱ. ᤜᤧᤰᤁᤩᤠᤱ ᤃᤡᤸᤒᤥ ᤁᤥ᤺ᤰᤔᤠᤀᤥ ᤕᤖᤡᤰ ᤔᤧᤛᤧᤖᤢᤛᤡ॥

² ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤛᤠᤀᤢᤗᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤐᤢᤒᤣᤗᤠᤵᤛᤠ ᤔᤧᤏᤠ᤺ᤳᤋᤢᤛᤡ. ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤛᤠᤘᤗᤖᤧ ᤁᤢᤛ᤻ᤛᤠ ᤛᤢᤶᤛᤡ ᤈᤥᤏᤠᤌᤠᤏᤧᤴ. ᤀᤒᤡᤏᤠᤍᤠᤒᤧᤴ ᤏᤢ ᤔᤸᤁᤡᤛᤢᤀ᤺ᤴ ᤔᤧᤛᤧᤖᤢᤛᤡ॥

³ ᤛᤠᤘᤗᤖᤧ ᤁᤢᤍᤰᤗᤧᤱᤘᤠᤀᤥ ᤁᤧᤖᤧᤰ ᤐᤡᤛᤠᤱ ᤕᤶᤒᤠ ᤌᤱ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤗᤡ ᤏᤢ ᤋᤥᤱ ᤁᤧᤃᤵᤐᤠᤜᤠ᤹ᤖᤧ ᤂᤢᤏᤧ᤹ ᤔᤧᤕᤠᤱᤄᤢ. ᤂᤧᤶᤒᤩᤠᤱ ᤂᤧᤱᤜᤠ᤹ᤖᤧ ᤛᤠᤘᤗᤧᤴ ᤛᤠ᤹ᤖᤡᤰ ᤔᤧᤄᤠ᤺ᤴᤍᤢ॥

⁴ ᤜᤧᤰᤁᤣ᤺ᤸᤗᤧ ᤛᤠᤘᤗᤖᤧ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤔᤏᤠᤴ ᤔᤧᤳᤋᤢ. “ᤁᤧᤍᤠᤓᤣ᤺ᤴ ᤋᤖᤵ ᤑᤡ᤺ᤰᤂᤧ᤹ᤀᤠᤱ ᤀᤠᤱᤃᤠ᤹ ᤌᤢᤒᤠᤱᤅᤧ᤹ᤀᤠᤱ ᤛᤧᤖᤠᤱᤅᤧ᤹. ᤔᤣ᤺ᤴᤏᤣ ᤑᤃᤪ ᤂᤧᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤔᤧᤍᤠᤀᤠᤱ ᤀᤠᤱᤃᤠ᤹ ᤔᤧᤎᤢᤵᤐᤠ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤠᤀᤠᤱ ᤔᤧᤛᤧᤳᤋᤠ᤹॥” ᤁᤖ ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠᤸᤗᤧ ᤔᤧᤛᤧᤖᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤡᤛᤧ॥ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤀᤠᤒᤠᤅᤣ ᤁᤢᤍᤠᤓᤣᤴ ᤗ᤺ᤳᤋᤢ. ᤂᤧᤒᤩᤠᤱ ᤂᤧᤴ ᤛᤶᤎᤠᤱ ᤜᤠᤷᤓᤳ ᤑᤴᤇᤡᤱᤅᤠᤱ ᤛᤧᤳᤇᤡᤱ॥

⁵ ᤜᤧᤰᤁᤩᤠᤱ ᤂᤧᤴ ᤑᤧᤈᤢᤶᤓᤧᤕᤠ ᤁᤧᤒᤱᤒᤧᤸᤗᤧ ᤛᤠᤀᤢᤗᤧᤴ ᤛᤩᤧᤒᤠ ᤏᤡᤛᤢ. ᤂᤧᤶᤒᤩᤠᤱ ᤂᤢᤏᤧ᤹ᤀᤠᤱ ᤀᤠᤵᤑᤣᤰ ᤁᤢᤍᤠᤓᤣᤀᤥ ᤋᤡ᤺ᤱᤛᤡᤱ ᤛᤧᤳᤇᤡᤱᤅᤠᤱ ᤂᤢᤏᤧ᤹ᤏᤢᤀᤣ ᤛᤩᤧ॥

⁶ ᤛᤠᤘᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤛᤢᤶᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤧᤈᤠ ᤁᤢᤓᤧᤕᤢᤶ ᤁᤧᤃᤢᤒᤠᤴ ᤂᤧᤒᤩᤠᤱ ᤂᤢᤏᤧ᤹ ᤁᤧᤖᤧᤰ ᤁᤢᤔᤏᤠᤜᤠ᤹ ᤀᤠᤶᤓᤠ ᤂᤧᤴ ᤕᤧᤴᤏᤥ ᤛᤥᤖᤡᤰ ᤔᤧᤛᤩᤧ॥

⁷ ᤜᤧᤰᤁᤩᤠᤱ ᤏᤧᤏᤧᤒᤠᤍᤧᤴᤏᤡᤸᤗᤧ ᤏᤠᤎᤠ᤺ᤶᤒᤡ ᤏᤢ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡ ᤁᤧᤘᤠ᤹ᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ ᤔᤧᤄᤧᤳᤇᤡᤱᤒᤠ ᤜᤧᤰᤁᤩᤠᤱ ᤛᤠᤘᤗᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤀᤠᤱ ᤔᤧᤛᤩᤧᤖᤢᤛᤡᤒᤠ ᤔᤧᤏᤡᤛᤢᤛᤡ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤔᤧᤗᤧᤖᤢᤀᤠᤱ ᤔᤧᤄᤧᤳᤇᤡᤱ ᤔᤧᤒᤣ॥ ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ ᤂᤧᤵᤔᤥ ᤔᤧᤒᤣᤀᤠᤱ ᤂᤧᤴ ᤕᤧᤰᤕᤰᤜᤠ᤹ ᤜᤢᤰᤁᤠᤵ ᤔᤧᤔᤧᤳᤇᤡᤱ॥

⁸ ᤁᤢᤍᤠ᤺ᤴᤍᤡᤰᤔᤠ. ᤐᤗᤡᤛ᤻ᤋᤡᤜᤠ᤹ ᤁᤧᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤡᤃᤰᤘᤠ ᤛᤠᤔᤠ ᤋᤣ᤹ᤛᤧ ᤔᤧᤍᤩᤧ᤺ᤸᤗᤧ ᤂᤧᤱᤜᤠ᤹ᤖᤧ ᤛᤠᤘᤗᤧᤴ ᤏᤢ ᤁᤢᤛ᤻ᤛᤠᤜᤠ᤹ ᤃᤡᤸᤒᤥ ᤁᤥ᤺ᤰᤔᤠᤀᤥ ᤔᤧᤛᤩᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤔᤧᤏᤡᤛᤢᤛᤡ॥

⁹ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤠᤘᤗᤖᤧ ᤁᤢᤎᤣᤃᤣ᤺ᤰᤐᤧᤴ ᤔᤧᤄᤰᤋᤢ ᤜᤧᤰᤁᤩᤠᤱ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ ᤔᤧᤓᤧᤴᤍᤢᤀᤠᤱ ᤔᤧᤍᤣ᤹ᤖᤢ॥ ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ᤀᤥ ᤀᤡᤱᤄᤱ ᤁᤧᤛᤠᤒᤠᤜᤠ᤹ ᤔᤧᤒᤠᤱᤄᤢᤛᤡ. ᤂᤢᤴᤇᤡ᤹ ᤔᤏᤠᤜᤠ᤹ ᤏᤢ ᤏᤠᤘᤠᤀᤡᤳᤗᤠ ᤁᤧᤕᤢᤱᤒᤠ ᤔᤠᤱᤜᤡᤶᤜᤠ᤹ᤀᤥ ᤌᤠᤖᤡᤰ ᤁᤴ ᤀᤡᤱᤄᤱᤅᤡᤴ ᤔᤧᤃᤧᤳᤋᤢ॥

¹⁰ ᤂᤧᤱᤜᤠ᤹ᤖᤧ ᤛᤠᤘᤗᤖᤧ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ ᤀᤛ᤻ᤋᤥᤖᤣᤋ ᤔᤠᤱᤜᤡᤶᤔᤥ ᤔᤧᤏᤧᤛ᤻ᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤒᤣᤌ-ᤛᤠᤴᤒᤠ ᤗᤢᤱᤎᤠᤰᤁᤥ ᤁᤢᤎᤰᤁᤡᤴ ᤔᤧᤍᤡ᤺ᤰᤛᤢᤀᤠᤱ ᤋᤧᤸᤗᤧᤶ ᤔᤧᤓᤥᤴᤍᤢ॥

¹¹ ᤐᤗᤡᤛ᤻ᤋᤡᤜᤠ᤹ᤖᤧ ᤛᤠᤀᤢᤗᤧᤴ ᤂᤢᤴᤇᤡ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤃᤡᤗᤠᤍ-ᤕᤠᤒᤣᤛᤀᤥ ᤁᤧᤕᤢᤱᤒᤠᤜᤠ᤹ᤖᤧ ᤔᤧᤄᤧᤵᤛᤢ॥

¹² ᤁᤧᤖᤧᤰ ᤌᤱ ᤆᤥ᤺ᤰᤔᤠ ᤁᤧᤎᤢᤶᤒᤠ ᤔᤏᤠᤜᤠ᤹ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤔᤧᤒᤣᤀᤠᤱ ᤛᤠᤘᤗᤧᤴ ᤏᤢ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤡᤴ ᤒᤣᤌ-ᤛᤠᤴᤒᤠ ᤗᤢᤱᤎᤠᤰᤗᤠᤶ ᤔᤧᤗ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ ᤕᤠᤒᤣᤛ ᤔᤧᤕᤢᤖᤢᤛᤡ. ᤂᤧᤒᤩᤠᤱ ᤂᤧᤴ ᤌᤰᤜᤠ᤹ ᤔᤧᤀᤥ᤹ᤖᤢ ᤔᤧᤍᤣᤛᤢ॥

¹³ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤳᤜᤠ᤹ ᤔᤧᤍᤣ᤹ᤖᤢᤀᤠᤱ ᤕᤠᤒᤣᤛᤀᤥ ᤁᤢᤓᤧᤰᤘᤠ ᤛᤩᤥ᤺ᤱᤛᤩᤥ᤺ᤱ ᤁᤧᤒᤵᤐᤠ ᤛᤡᤱᤒᤢᤱᤅᤡᤸᤗᤧ ᤁᤢᤛᤡᤃᤠᤱ ᤔᤧᤗᤢᤵᤋᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤢᤛᤡ ᤕᤧᤴ ᤌᤠᤖᤡᤰ ᤔᤧᤖᤡᤱᤅᤥ ᤏᤧᤳ ᤔᤧᤕᤢᤅᤧ॥