᥇ ᤛᤠᤔᤢᤀᤧᤗ 30 - LIFOTNTᤀᤔᤠᤗᤧᤁᤡᤜᤠ᤹ᤏᤢ ᤋᤧᤴᤎᤱ ᤐᤥ᤺ᤰᤂᤧᤒᤠ 1 ᤛᤢᤶᤕᤠᤴ ᤀᤣᤃᤠᤱ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤛᤡᤰᤗᤃ ᤔᤧᤃᤧᤖᤧ॥ ᤜᤠᤒᤠ ᤂᤧᤴ ᤕᤧᤶᤔᤥ ᤀᤔᤠᤗᤧᤁᤡᤜᤠ᤹ᤖᤧ ᤕᤜᤢᤍᤠᤗᤠᤶ ᤕᤥ ᤗᤧᤵᤛᤠᤱᤒᤠ ᤏᤣᤃᤣᤒ ᤏᤢ ᤛᤡᤰᤗᤃᤒᤠ ᤔᤏᤠᤜᤠ᤹ ᤔᤧᤏᤠᤵᤋᤢᤛᤡᤀᤠᤱ ᤘᤕᤧ॥ ᤛᤡᤰᤗᤃᤀᤥ ᤂᤧᤱᤜᤠ᤹ ᤌᤱ ᤔᤧᤈᤥᤃᤧᤀᤠᤱ ᤂᤧᤵᤔᤥ ᤔᤡ ᤔᤧᤕᤠᤰᤋᤢᤀᤠᤱ ᤘᤕᤧ॥ 2 ᤂᤧᤱᤜᤠ᤹ᤖᤧ ᤔᤧᤴᤇᤢᤔᤠᤜᤠ᤹ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤆᤢᤰᤛᤠ-ᤕᤶᤒᤠ ᤁᤧᤖᤧᤰ ᤔᤧᤳᤇᤧᤳᤇᤡᤱᤅᤣ ᤔᤧᤍᤣ᤹ᤖᤢᤛᤡᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤁᤴᤜᤠ᤹ ᤋᤃᤡ ᤋᤃᤡ ᤗᤠᤶᤔᤧᤗᤥᤛᤢ ᤔᤧᤍᤣ᤹ᤖᤢᤛᤡᤖ ᤔᤧᤒᤳᤇᤧ॥ 3 ᤂᤧᤒᤩᤠᤱ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤛᤡᤰᤗᤃ ᤔᤧᤃᤧᤖᤧᤸᤗᤧ. ᤂᤧᤴ ᤀᤔᤠᤗᤧᤁᤡᤜᤠ᤹ᤖᤧ ᤕᤧᤰᤕᤰᤁᤡᤴ ᤔᤡ ᤔᤧᤕᤠᤰᤋᤢᤀᤠᤱ ᤂᤢᤴᤇᤡ᤹ ᤔᤣ᤺ᤳᤜᤠ᤹. ᤕᤧᤶᤒᤡᤳᤇᤠ. ᤔᤧᤴᤇᤢᤔᤠ ᤛᤠᤜᤠ᤹ ᤁᤧᤖᤧᤰ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤒᤣ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤄᤥᤛᤢ॥ 4 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤜᤠ᤺ᤵᤔᤠ ᤔᤧᤜᤣ᤺ᤰᤋᤧ. ᤜᤧᤰᤁᤩᤠᤱ ᤜᤠ᤺ᤵᤔᤠᤀᤣ ᤔᤧᤴᤇᤢᤰᤁᤣ ᤌᤠᤖᤡᤰ ᤔᤧᤜᤠᤒᤧ॥ 5 ᤍᤠᤀᤢᤍᤖᤧ ᤏᤧᤵᤔᤠᤱ ᤁᤢᤔᤣᤳ ᤕᤡᤈᤖᤣᤗᤒᤠ ᤀᤜᤡᤏᤥᤔ ᤏᤢ ᤁᤠᤷᤔᤣᤗᤒᤠ ᤏᤠᤒᤠᤗᤖᤧ ᤁᤢᤔᤣᤔᤣᤍᤢᤔᤠ ᤀᤒᤡᤃᤣᤗᤧᤴᤏᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤘᤕᤧ॥ 6 ᤍᤠᤀᤢᤍᤧᤴ ᤁᤧᤛᤠᤰᤐᤥ ᤌᤩᤧ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤢᤃᤧᤀᤠᤱ ᤍᤠᤀᤢᤍᤧᤴ ᤗᤢᤱᤅᤡᤸᤗᤧ ᤗᤧᤵᤐᤠᤛᤡᤃᤧ ᤔᤧᤵᤔᤠ ᤔᤧᤜᤣ᤺ᤰᤋᤢ॥ ᤜᤧᤰᤁᤣ᤺ᤸᤗᤧ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤢᤰᤛᤠᤶ ᤂᤥᤛᤢ॥ 7 ᤂᤧᤒᤩᤠᤱ ᤍᤠᤀᤢᤍᤖᤧ ᤀᤜᤡᤔᤧᤗᤧᤰᤁᤧᤸᤗᤧ ᤁᤢᤛ᤻ᤛᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤒᤡᤕᤠᤌᤠᤖᤧᤴ ᤔᤧᤳᤋᤢ. “ᤀᤠᤱᤃᤠ᤹ᤀᤥ ᤀᤣᤐᤥᤍᤧᤴ ᤋᤠᤖᤧ᤹॥” ᤜᤧᤰᤁᤩᤠᤱ ᤀᤒᤡᤕᤠᤌᤠᤖᤧᤸᤗᤧ ᤂᤧᤴ ᤋᤠᤖᤢ॥ 8 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤛᤢ. “ᤀᤠᤱᤃᤠ᤹ ᤁᤴ ᤆᤡᤃᤰᤘᤠ ᤁᤢᤈᤠ ᤁᤧᤏᤠᤵᤐᤠ ᤔᤏᤠᤗᤢᤵᤜᤠ᤹ ᤏᤠ᤺ᤳᤋᤢᤱᤛᤡᤱᤒᤡ᥅ ᤀᤠᤱᤃᤠ᤹ ᤂᤧᤱᤜᤠ᤹ ᤛᤡ᤹ᤔᤠ ᤛᤢᤰᤋᤢᤱᤒᤡ᥅” ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤂᤧᤱᤜᤠ᤹ ᤏᤠ᤺ᤳᤋᤧᤛᤧ᤹॥ ᤂᤧᤱᤜᤠ᤹ ᤁᤧᤛᤡ᤹ᤖᤢᤛᤡ ᤜᤧᤰᤁᤩᤠᤱ ᤁᤧᤖᤧᤰ ᤁᤧᤛᤧ᤺ᤵᤋᤢᤛᤡ᤹॥” 9 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍ ᤏᤢ ᤁᤡᤵ ᤋᤢᤰᤛᤡ ᤁᤢᤔᤏᤠᤜᤠ᤹ ᤔᤧᤎᤠᤛᤡᤱ. ᤜᤧᤰᤁᤩᤠᤱ ᤒᤛᤥᤖᤒᤠ ᤘᤜ᤺ᤱ ᤌᤠᤖᤡᤰ ᤔᤧᤃᤧᤖᤧ॥ 10 ᤘᤜ᤺ᤱ ᤏᤠ᤺ᤱᤔᤠᤀᤠᤱ ᤐᤣ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤛᤠ᤹ᤖᤡᤰ ᤁᤧᤏᤠᤒᤠ ᤁᤡᤵ ᤏᤧᤳᤇᤡ ᤔᤏᤠᤜᤠ᤹ ᤀᤣᤃᤠᤱ ᤔᤧᤕᤢᤅᤧ ᤔᤧᤗᤠᤖᤧ॥ ᤁᤖ ᤍᤠᤀᤢᤍᤧᤴ ᤏᤢ ᤁᤡᤵ ᤗᤡᤛᤡᤖᤧ ᤂᤧᤱᤜᤠ᤹ ᤔᤧᤏᤠ᤺ᤳᤋᤢᤛᤡᤖ ᤔᤧᤒᤣ॥ 11 ᤋᤧᤶᤒᤣ᤹ᤀᤥ ᤂᤧᤱᤜᤠ᤹ᤖᤧ ᤗᤳᤇᤠ ᤔᤡᤛᤪᤒᤠ ᤔᤏᤠᤎᤡᤰ ᤔᤧᤍᤢᤔᤢ. ᤜᤧᤰᤁᤩᤠᤱ ᤍᤠᤀᤢᤍᤖᤧ᤹ᤀᤥ ᤔᤧᤍᤠᤖᤢ॥ ᤂᤧᤱᤜᤠ᤹ᤖᤧ ᤂᤧᤴ ᤆᤠᤔᤠ ᤏᤢ ᤌᤢᤱᤔᤠ ᤔᤧᤒᤡᤖᤢ. 12 ᤁᤢᤓᤠ ᤂᤧᤱᤔᤏᤠᤒᤠ ᤐ᤺ᤳᤇᤣᤛᤣ᤹ ᤏᤢ ᤂᤧᤱᤔᤏᤠᤒᤠ ᤜᤢᤰᤐᤰ ᤏᤧᤳᤇᤡ ᤆᤧᤸᤗᤧᤰᤛᤣ᤹ ᤔᤧᤒᤡᤖᤢ॥ ᤂᤧᤴ ᤆᤛᤢᤖᤢᤀᤠᤱ ᤂᤧᤸᤗᤧ ᤁᤢᤛᤰᤔᤠ ᤗᤠᤛᤧ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤛᤢᤶᤕᤧᤴ ᤏᤢ ᤛᤢᤶᤛᤧᤴ ᤌᤠᤖᤡᤰ ᤌᤣᤀᤠᤱ ᤔᤧᤴᤈᤠᤀᤣ ᤔᤧᤴᤎᤢᤱᤅᤣ ᤘᤕᤧ॥ 13 ᤍᤠᤀᤢᤍᤧᤸᤗᤧ ᤂᤧᤴ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤜᤠ᤺ᤳᤗᤧ ᤁᤢᤔᤏᤠᤏᤧᤒᤣ᥅ ᤂᤧᤏᤧ᤹ ᤀᤠᤳᤋᤥᤗᤠᤶ ᤁᤧᤍᤩᤧᤒᤠ᥅” ᤂᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤗᤳᤇᤠ ᤔᤡᤛᤪᤡᤀᤠᤖᤥ. ᤗᤳᤇᤠ ᤀᤔᤠᤗᤧᤁᤡ᤺ᤸᤗᤧ ᤁᤢᤛᤧᤘᤠᤖᤥᤒᤠᤀᤠ॥ ᤁᤖ ᤛᤢᤶᤕᤧᤴ ᤋᤃᤡ ᤋᤢᤃᤠᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤴᤍᤠᤱᤒᤠᤸᤗᤧ ᤗᤧᤖᤠᤱ ᤌᤩᤠᤱᤅᤠᤱ ᤐᤣ॥ 14 ᤀᤠᤏᤡᤃᤣ ᤕᤜᤢᤍᤠᤗᤠᤶ ᤕᤥ ᤗᤧᤵᤔᤠᤱᤒᤠ ᤁᤖᤣᤋᤡᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ ᤏᤣᤃᤣᤘᤀᤥ. ᤜᤧᤰᤁᤩᤠᤱ ᤁᤠᤗᤣᤒᤖᤧ ᤁᤢᤍᤧ᤺ᤱᤃᤵ ᤏᤣᤃᤣᤒᤀᤥ ᤏᤠᤵᤔᤏᤠᤛᤡᤀᤠᤱ ᤘᤕᤧ ᤜᤧᤰᤁᤩᤠᤱ ᤛᤡᤰᤗᤃᤀᤥ ᤔᤡ ᤕᤠᤰᤔᤏᤠᤀᤠᤱ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤏᤠ॥” 15 ᤍᤠᤀᤢᤍᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤂᤧᤴ ᤁᤧᤏᤠᤵᤐᤠ ᤔᤏᤠᤗᤢᤵᤜᤠ᤹ᤀᤥ ᤐᤣ᤺ᤰᤔᤠ ᤗᤠᤶ ᤀᤥᤛᤣ᤺ᤴᤎᤠᤰᤔᤠ ᤁᤧᤛᤢᤰᤁᤠ᤹ᤒᤡ᥅” ᤂᤧᤸᤗᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤠᤱᤜᤧᤰᤛᤡᤱᤅᤧ᤹ᤀᤠᤱ ᤔᤧᤳᤋᤠᤱᤅᤧ᤹. ‘ᤀᤠᤱᤃᤠ᤹ ᤂᤧᤏᤧ᤹ ᤔᤧᤛᤧᤳᤏᤧᤴ ᤀᤡᤃᤪ ᤁᤧᤴᤍᤠᤱᤒᤠᤸᤗᤧ ᤁᤢᤜᤢᤰᤁᤥ ᤜᤢᤰᤔᤧᤛᤢᤵᤏᤧᤴ’. ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤠᤶ ᤀᤥ᤺ᤴᤎᤠᤰᤏᤧᤀᤠᤱ ᤂᤧᤱᤜᤠ᤹ᤖᤥ ᤁᤧᤳᤏᤧ॥” 16 ᤜᤧᤰᤁᤩᤠᤱ ᤂᤧᤸᤗᤧ ᤗᤠᤶ ᤀᤥ᤺ᤴᤎᤠᤰᤋᤢᤖ ᤕᤥ ᤋᤣ᤹ᤖᤢ॥ ᤂᤧᤵᤔᤥ ᤀᤔᤠᤗᤧᤁᤡᤜᤠ᤹ ᤁᤧᤖᤧᤰ ᤐᤡᤛᤠᤱ ᤔᤧᤛᤧᤖᤧᤀᤠᤱ ᤔᤧᤈᤖ. ᤔᤧᤎᤢᤅᤢᤖ ᤜᤧᤰᤁᤩᤠᤱ ᤐᤗᤡᤛ᤻ᤋᤡ ᤏᤢ ᤕᤜᤢᤍᤠ ᤗᤠᤈᤣ᤹ᤜᤠ᤹ᤗᤠᤶ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠᤜᤠ᤹ ᤗᤢᤶᤛᤡᤱᤒᤠ ᤋᤧᤴᤏᤥ ᤛᤥᤛᤥ᤺ᤳᤗᤖᤠ᤺ᤱ ᤆᤥ᤺ᤰᤏᤢ ᤔᤧᤕᤠᤃᤧ॥ 17 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤂᤧᤱᤜᤠ᤹ᤏᤢ ᤕᤢ᤺ᤴᤇᤡᤰᤁᤠᤱᤎᤥ ᤁᤢᤍᤠ᤺ᤴᤍᤡᤰᤔᤠ ᤕᤢ᤺ᤴᤇᤡᤰ ᤌᤠᤖᤡᤰ ᤌᤰᤋᤧ॥ ᤜᤧᤰᤁᤩᤠᤱ ᤁᤡᤵ ᤗᤡᤛᤡ ᤌᤠᤱᤒᤧᤴᤜᤠ᤹ᤖᤰ ᤀᤢᤔᤣᤜᤠ᤹ᤀᤥ ᤔᤧᤗᤠᤛᤧᤀᤠᤱ ᤔᤧᤄᤧᤳᤇᤡᤱ. ᤘᤣ᤹ ᤔᤏᤠ ᤗᤳᤇᤠᤀᤠᤱ ᤁᤢᤜᤡᤱᤘᤧᤳ ᤔᤧᤴᤕᤠ᤺ᤰᤋᤧᤴ॥ 18 ᤀᤔᤠᤗᤧᤁᤡᤜᤠ᤹ᤖᤧ ᤔᤧᤍᤣ᤹ᤖᤢᤛᤡᤒᤠ ᤁᤧᤖᤧᤰ ᤔᤏᤠᤜᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤣᤳ ᤏᤧᤵᤔᤠᤱ ᤍᤠᤀᤢᤍᤖᤧ ᤏᤢ᤺ᤰᤋᤢ ᤋᤠᤖᤢᤛᤡ॥ 19 ᤆᤢᤰᤐᤠ ᤕᤶᤒᤠ. ᤕᤧᤶᤒᤡᤳᤇᤠ ᤔᤧᤴᤇᤢᤔᤠ᤹ ᤛᤠᤜᤠ᤹. ᤔᤧᤏᤠᤵᤋᤢ ᤔᤧᤍᤣ᤹ᤖᤢᤛᤡᤒᤠ ᤜᤠ᤺ᤳᤋᤠᤱ ᤜᤧᤰᤁᤩᤠᤱ ᤌᤣᤕᤠᤱ ᤔᤧᤕᤠ᤺ᤰᤋᤧᤴ॥ ᤍᤠᤀᤢᤍᤖᤧ ᤁᤧᤖᤧᤰ ᤏᤢ᤺ᤰᤋᤢ ᤋᤠᤖᤢᤛᤡ॥ 20 ᤂᤢᤏᤧ᤹ ᤔᤧᤸᤗᤢᤰ ᤔᤧ᤺ᤴᤍᤠ. ᤁᤢᤶᤒᤠᤒᤠ ᤐᤡᤳ ᤐᤡᤵᤔᤠ ᤁᤧᤖᤧᤰ ᤜᤢᤰᤁᤠᤵ ᤔᤧᤳᤇᤡᤱ. ᤜᤧᤰᤁᤩᤠᤱ ᤁᤢᤔᤏᤠᤜᤠ᤹ᤖᤧ ᤘᤣ᤹ ᤗᤢᤵᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤂᤧᤱᤜᤠ᤹ ᤔᤧᤏᤠ᤺ᤳᤋᤢ ᤔᤧᤍᤣ᤹ᤖᤢᤛᤡᤖ ᤔᤧᤒᤠ᤺ᤳᤋᤢ. “ᤁᤴᤜᤠ᤹ ᤍᤠᤀᤢᤍᤖᤧ ᤏᤠᤵᤋᤢᤛᤡᤒᤠᤖᤥ॥” 21 ᤂᤧᤒᤩᤠᤱ ᤍᤠᤀᤢᤍᤧᤴ ᤒᤛᤥᤖ ᤘᤜ᤺ᤱᤅᤥ ᤁᤧᤏᤠ᤺ᤶᤛᤡᤱᤒᤠᤀᤠᤱ ᤁᤧᤕᤢᤱᤒᤠ ᤂᤧᤴ ᤁᤡᤵ ᤏᤧᤳᤇᤡ ᤔᤏᤠᤜᤠ᤹ᤀᤥ ᤐᤣ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤍᤠᤀᤢᤍᤧᤴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤋᤢᤶᤛᤧ ᤔᤧᤗ᤺ᤴᤍᤧ॥ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤁᤧᤖᤧᤸᤗᤧ ᤂᤧᤱᤜᤠ᤹ “ᤛᤧᤘᤠᤖᤥ” ᤔᤧᤳᤋᤢᤛᤡ॥ 22 ᤁᤖ ᤍᤠᤀᤢᤍᤧᤴᤏᤢ ᤁᤧᤘᤠ᤹ᤒᤠ ᤋᤠᤵᤑᤧ᤺ᤶᤒᤠ ᤏᤢ ᤁᤢ᤹ᤀᤡᤁᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤍᤠᤀᤢᤍᤖᤧ ᤁᤢᤒᤠ᤺ᤴᤏᤡᤴ ᤁᤢᤗᤢᤶᤔᤥ ᤔᤧᤄᤰᤋᤢᤀᤠᤱ ᤔᤧᤒᤠ᤺ᤳᤋᤢ. “ᤁᤴ ᤔᤏᤠᤜᤠ᤹ ᤀᤠᤏᤡ᤹ᤏᤢ ᤔᤧᤶᤒᤣᤏᤧᤴ॥ ᤀᤠᤏᤡ᤹ ᤀᤠᤏᤢ᤺ᤰᤋᤢᤶ ᤀᤠᤍᤠᤖᤢᤶᤒᤠ ᤀᤠᤏᤠᤵᤋᤢᤶᤛᤡᤶᤒᤠ ᤆᤡᤃᤰᤘᤠᤗᤠᤶ ᤂᤢᤴᤇᤡ᤹ ᤗᤠᤃᤡ ᤌᤣᤀᤠᤱ ᤗᤰ ᤀᤠᤴᤕᤠᤰᤋᤢᤶᤔᤡᤴ. ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤏᤢ ᤛᤠᤜᤠ᤹ᤖᤰ ᤔᤧᤍᤣ᤹ᤖᤢᤛᤡᤖ॥” 23 ᤍᤠᤀᤢᤍᤖᤧ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤀᤠᤛᤧ᤺ᤵᤋᤧ. ᤁᤴ ᤁᤧᤖᤧᤰ ᤀᤠᤏᤡ᤹ ᤀᤠᤒᤡᤖᤧ. ᤜᤧᤰᤁᤩᤠᤱ ᤏᤡᤱᤔᤡᤜᤠ᤹ ᤀᤠᤏᤡ᤹ ᤜᤢᤰᤁᤥ ᤌᤠᤛᤢᤛᤡ ᤀᤠᤒᤡᤖᤧ॥ ᤀᤠᤸᤗ ᤂᤢᤏᤧ᤹ ᤀᤠᤒᤡᤖᤧᤒᤠ ᤆᤡᤃᤰᤘᤠᤜᤠ᤹ ᤜᤧᤰᤁᤣ ᤀᤠᤴᤈᤥᤃᤢᤶᤔᤡᤴ॥ 24 ᤂᤧᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤜᤧᤰᤁᤣᤃ ᤜᤠᤳ ᤋᤧᤶᤒᤠᤒᤣ᥅ ᤆᤡᤃᤰᤘᤠ ᤁᤥᤛᤧ ᤁᤧᤕᤢᤱᤒᤠᤜᤠ᤹ᤖᤧ ᤌᤱᤅᤥ ᤁᤧᤒᤣ᤺ᤰᤐᤠᤜᤠ᤹ᤏᤢ ᤁᤢᤍᤱᤒᤠ ᤗᤰ ᤔᤧᤄᤥᤛᤢ᤹॥ ᤁᤧᤖᤧᤰᤗᤧ ᤁᤢᤍᤱᤒᤠ ᤗᤰ ᤔᤧᤄᤥᤛᤢ᤹॥” 25 ᤂᤧᤴ ᤕᤧᤶᤔᤠᤱᤎᤥ ᤍᤠᤀᤢᤍᤖᤧ ᤐᤡᤖᤢᤛᤡᤒᤠ ᤌᤡᤶᤜᤠ᤹ ᤀᤡᤛᤪᤠᤀᤡᤗᤀᤥ ᤀᤠᤸᤗᤥ ᤌᤠᤖᤡᤰᤁᤠᤱ ᤘᤠ᤹॥ 26 ᤍᤠᤀᤢᤍᤧᤴ ᤛᤡᤰᤗᤃᤀᤥ ᤋᤩᤧ. ᤜᤧᤰᤁᤩᤠᤱ ᤔᤧᤏᤠᤵᤋᤢᤛᤡᤒᤠ ᤁᤢᤓᤠ ᤆᤡᤃᤰᤘᤠᤜᤠ᤹ ᤂᤢᤏᤧ᤹ ᤁᤢᤴᤈᤢᤶᤜᤠ᤹. ᤕᤜᤢᤍᤠᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤜᤠᤰᤋᤢᤍᤣᤛᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤔᤡᤜᤠ᤹ᤗᤠᤶᤒᤠ ᤏᤠᤵᤔᤏᤠᤛᤡᤒᤠ ᤆᤡᤃᤰᤘᤠᤗᤠᤶᤒᤠ ᤁᤴ ᤂᤡᤏᤡ᤹ ᤛᤢᤱᤗᤥ॥” 27 ᤂᤢᤏᤧ᤹ ᤒᤣᤌᤣᤗᤀᤥ. ᤖᤠᤔᤥᤋ-ᤏᤣᤃᤣᤘᤀᤥ. ᤕᤳᤋᤡᤖᤀᤥ. 28 ᤀᤖᤥᤀᤣᤖᤀᤥ. ᤛᤡᤐᤔᤥᤋᤀᤥ. ᤀᤣᤛ᤻ᤋᤔᤥᤀᤥ. 29 ᤖᤠᤁᤠᤗᤀᤥ. ᤕᤖᤜᤔᤣᤗᤡᤜᤠ᤹ ᤏᤢ ᤁᤏᤠᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ. 30 ᤜᤥᤖᤔᤠᤀᤥ. ᤒᤥᤖ ᤀᤠᤛᤠᤏᤀᤥ. ᤀᤳᤋᤠᤰᤁᤥ. 31 ᤜᤧᤒᤪᤥᤴᤏᤥ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤀᤠᤳᤋᤠ ᤀᤠᤳᤋᤠ ᤗᤠᤶᤍᤡᤰ ᤔᤧᤈᤥᤃᤧᤀᤠᤱ ᤔᤧᤘᤕᤧ ᤂᤧᤴ ᤁᤧᤖᤧᤰ ᤋᤧᤴᤜᤠ᤹ᤀᤥᤒᤠ ᤔᤏᤠᤜᤠ᤹ ᤂᤧᤴ ᤛᤢᤱᤜᤠ᤹ ᤜᤠᤰᤋᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.