᥇ ᤛᤠᤔᤢᤀᤧᤗ 3 - LIFOTNT

ᤕᤜᤘᤣ ᤍᤠᤱᤒᤠᤴ ᤛᤠᤔᤢᤀᤧᤗᤖᤥ ᤀᤥᤛᤣ᤺ᤴᤎᤠᤰᤛᤡᤱᤒᤠ

¹ ᤀᤠᤸᤗ ᤀᤣᤗᤡ᤺ᤸᤗᤧ ᤁᤢᤕᤢᤰᤁᤥ ᤛᤠᤔᤢᤀᤧᤗᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤔᤠᤱᤛᤧᤘᤠ ᤆᤥᤃᤢᤖ ᤘᤕᤧ॥ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠ᤺ᤰᤁᤡᤴ ᤆᤠ᤹ᤖᤡᤰ ᤂᤧᤶᤔᤧᤍᤧᤳᤋᤧᤴ. ᤜᤧᤰᤁᤩᤠᤱ ᤂᤢᤏᤧ᤹ ᤋᤠ᤹ᤍᤡᤃᤧᤴ ᤛᤢᤑᤥᤜᤠ᤹ᤀᤠᤱ ᤔᤏᤠᤜᤠ᤹ ᤕᤖᤡᤰ ᤀᤥᤛᤣ᤺ᤴᤔᤧᤎᤠᤰᤋᤢᤛᤡᤴ॥

² ᤌᤡᤰᤗᤧᤱ ᤛᤧᤴᤍᤡᤰ ᤀᤣᤗᤡᤴ ᤀᤠᤒᤠᤅᤣ ᤁᤢᤕᤢᤰᤏᤠᤀᤥ ᤏᤧᤛᤡᤱᤅᤠᤱ ᤏᤧᤛ᤻ᤛᤧ॥ ᤂᤢᤏᤧ᤹ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤁᤢᤔᤡᤰᤜᤠ᤹ ᤌ᤺ᤶᤎ᤺ᤶᤒᤠ ᤐᤥ᤺ᤰᤂᤧ ᤐᤣᤀᤠᤱ ᤘᤕᤧ. ᤜᤧᤰᤁᤩᤠᤱ ᤏᤢᤖᤡᤰ ᤂᤠᤏᤡᤔᤠ ᤔᤧᤛᤢᤰᤋᤢᤴᤏᤠᤱ ᤘᤕᤧ॥

³ ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤴᤍᤥᤰ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤡᤶᤔᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ ᤂᤧ᤹ᤕᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤔᤡᤴ ᤔᤧᤴᤇᤧᤳᤋᤣ ᤕᤢᤅᤧ॥

⁴ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ “ᤛᤠᤔᤢᤀᤧᤗᤀᤣ. ᤛᤠᤔᤢᤀᤧᤗᤀᤣ” ᤔᤧᤳᤋᤢᤖ ᤀᤢ᤺ᤳᤋᤢ॥ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ “ᤜᤤ. ᤀᤠᤱᤃᤠ᤹ ᤁᤵᤔᤥ ᤘᤠ᤹ᤀᤠᤖᤥ” ᤔᤧᤳᤋᤢ॥

⁵ ᤜᤧᤰᤁᤩᤠᤱ ᤂᤢᤏᤧ᤹ ᤐᤥᤃᤧᤀᤠᤱ ᤗᤥ᤺ᤰᤋᤧᤖ ᤐᤣᤀᤠᤱ ᤀᤣᤗᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤀᤢ᤺ᤳᤋᤠᤱᤒᤠᤒᤡ᥅ ᤀᤠᤱᤃᤠ᤹ ᤁᤵᤔᤥᤀᤣ ᤘᤠ᤹ᤀᤠᤖᤥ॥” ᤁᤖ ᤀᤣᤗᤡ᤺ᤸᤗᤧ ᤏᤥᤃᤵ ᤐᤡᤖᤢ. “ᤀᤠᤲᤜᤠ᤹. ᤀᤠᤱᤃᤠ᤹ᤃ ᤂᤧᤏᤧ᤹ ᤔᤧᤀᤢ᤺ᤳᤏᤧᤸᤗᤥ॥ ᤐᤣᤃᤧ᤹ᤀᤠᤱ ᤀᤡᤵᤛᤧ᤹॥” ᤂᤧᤒᤩᤠᤱ ᤛᤠᤔᤢᤀᤧᤗᤧᤴ ᤏᤢ᤺ᤰᤂᤧ ᤐᤣᤀᤠᤱ ᤀᤡᤵᤛᤧ॥

⁶ ᤕᤜᤘᤣ ᤍᤠᤱᤒᤠᤸᤗᤧ ᤕᤠᤶᤔᤥ ᤛᤠᤔᤢᤀᤧᤗᤧᤴ “ᤛᤠᤔᤢᤀᤧᤗᤀᤣ” ᤔᤧᤳᤋᤢᤖ ᤀᤢ᤺ᤳᤋᤢ॥ ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤔᤢᤳᤌᤪᤡᤰ ᤐᤥᤃᤧᤒᤣᤀᤠᤱ ᤀᤣᤗᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤀᤢ᤺ᤳᤋᤠᤱᤒᤠᤒᤡ᥅ ᤀᤠᤱᤃᤠ᤹ ᤁᤵᤔᤥᤀᤣ ᤘᤠ᤹ᤀᤠᤖᤥ॥” ᤁᤖ ᤀᤣᤗᤡ᤺ᤸᤗᤧ ᤔᤧᤳᤋᤢ. “ᤀᤠᤛ᤻ᤛᤠᤀᤣ. ᤀᤠᤱᤃᤠ᤹ ᤀᤢ᤺ᤳᤏᤧᤒᤠ ᤔᤣ᤺ᤴᤗᤥ॥ ᤐᤣᤃᤧ᤹ᤀᤠᤱ ᤀᤡᤵᤛᤧ᤹ᤀᤥ॥”

⁷ ᤀᤠᤸᤗ ᤛᤠᤔᤢᤀᤧᤗᤖᤧ ᤕᤜᤘᤣ ᤍᤠᤱᤒᤧᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤶᤓ ᤌᤠᤖᤡᤰ ᤛᤠᤔᤢᤀᤧᤗᤖᤥ ᤀᤥᤛᤣ᤺ᤴᤎᤠᤱ ᤔᤧᤶᤒᤥᤱᤅᤣ ᤘᤕᤧ॥

⁸ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤛᤢᤶᤗᤧᤱ ᤀᤢ᤺ᤳᤋᤢ. ᤛᤠᤔᤢᤀᤧᤗᤧᤴ ᤐᤥᤃᤧᤀᤠᤱ ᤀᤣᤗᤡᤖᤧ᤹ᤀᤥ ᤐᤣ ᤜᤧᤰᤁᤩᤠᤱ ᤔᤧᤳᤋᤢ. “ᤂᤧᤏᤧ᤹ ᤁᤧᤀᤢ᤺ᤳᤋᤠᤱᤒᤠᤒᤡ᥅ ᤀᤠᤱᤃᤠ᤹ ᤁᤵᤔᤥᤀᤣ ᤘᤠ᤹ᤀᤠᤖᤥ॥” ᤜᤧᤰᤁᤣ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧᤏᤡ ᤁᤴ ᤜᤡᤴᤈᤠ᤹ᤀᤡᤴ ᤀᤢ᤺ᤳᤋᤢᤒᤠᤖᤧᤇ ᤑᤠᤀᤠᤱ ᤀᤣᤗᤡᤖᤧ ᤁᤢᤛᤡᤱᤏᤡ᤺ᤳᤋᤢ॥

⁹ ᤂᤧᤸᤗᤧᤆᤥᤃᤢᤸᤗᤧ ᤀᤣᤗᤡᤖᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤐᤣᤃᤧ᤹ᤀᤠᤱ ᤏᤧᤛ᤻ᤛᤧ᤹. ᤜᤧᤰᤁᤩᤠᤱ ᤂᤢᤏᤧ᤹ ᤕᤠᤶᤔᤥ ᤁᤧᤀᤢ᤺ᤳᤏᤧᤓᤃᤪ ᤀᤰᤁᤣ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤠᤀᤣ. ᤐᤠᤖᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤸᤗᤧ ᤂᤧᤵᤛᤢᤱᤗ ᤐᤳᤋᤠᤖᤥ॥’” ᤂᤧᤸᤗᤧᤆᤥᤃᤢᤸᤗᤧ ᤛᤠᤔᤢᤀᤧᤗᤧᤴ ᤁᤢᤕᤢᤰᤏᤠᤀᤥ ᤏᤢ᤺ᤰᤂᤧ ᤐᤣᤀᤠᤱ ᤏᤧᤛᤡᤱᤅᤠᤱ ᤏᤧᤛ᤻ᤛᤧ॥

¹⁰ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤵᤔᤥ ᤋᤩᤧᤀᤠᤱ ᤕᤧᤶᤛᤡᤱ. ᤜᤧᤰᤁᤩᤠᤱ ᤀᤠᤴᤍᤣᤴ ᤀᤢ᤺ᤳᤋᤢᤒᤠ ᤜᤧᤰᤁᤣᤀᤣ “ᤛᤠᤔᤢᤀᤧᤗᤀᤣ᥄ ᤛᤠᤔᤢᤀᤧᤗᤀᤣ᥄” ᤗ᤹ᤖᤡᤰ ᤀᤢ᤺ᤳᤋᤢ॥ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤐᤠᤖᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤸᤗᤧ ᤂᤧᤵᤛᤢᤱᤗ ᤐᤳᤋᤠᤖᤥ॥”

¹¹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤀᤡᤛᤪᤠᤀᤡᤗᤀᤥ ᤁᤢᤓᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤗ ᤐᤳᤋᤠᤖᤥ. ᤜᤧᤰᤁᤩᤠᤱ ᤂᤧᤴ ᤁᤧᤄᤧᤶᤒᤠ ᤁᤧᤖᤧᤰᤗᤧ ᤂᤢᤏᤡ᤹ ᤏᤧᤄᤥ᤹ ᤑᤡᤱᤗᤥ॥

¹² ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ ᤀᤣᤗᤡᤴ ᤏᤢ ᤁᤢᤜᤡᤶᤛᤕᤱᤅᤥᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥ ᤁᤢᤏᤢᤵᤔᤠ ᤌᤠᤖᤡᤰ ᤁᤧᤳᤋᤢᤱᤗᤥ॥

¹³ ᤀᤠᤱᤃᤠ᤹ ᤂᤧᤸᤗᤧ ᤁᤢᤜᤡᤶᤛᤕᤱᤜᤠ᤹ ᤛᤍᤠᤍᤡᤱ ᤂᤢᤶᤍᤡᤱ ᤐᤡᤖᤢᤱᤛᤡᤱ ᤑᤠ᤹ᤀᤠᤱ ᤂᤧᤴ ᤔᤧᤳᤋᤢᤱᤅᤠᤱ ᤘᤕᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤆᤥᤃᤢᤛᤡᤒᤠ ᤛᤡᤰᤁᤧᤗᤧ᤺ᤱᤒᤠ ᤗᤠᤕᤥ ᤗᤠᤛᤥ᤺ᤳᤜᤠ᤹ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥ ᤜᤧᤰᤁᤣᤛᤠᤱ ᤁᤢᤛ᤻ᤛᤠᤜᤠ᤹ ᤗᤠᤕᤥ ᤆᤥ᤺ᤰᤔᤠ ᤕᤠ᤺ᤶᤒᤰᤗᤠᤶ ᤔᤧᤎᤣ᤺ᤰᤋᤢᤛᤡᤴ॥

¹⁴ ᤂᤧᤸᤗᤧᤆᤥᤃᤢᤸᤗᤧ ᤀᤣᤗᤡᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤆᤥᤃᤧᤇᤢᤒᤠ ᤗᤠᤕᤥᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤔᤠᤱᤜᤧᤰᤛᤡᤱᤅᤠᤀᤠᤱ ᤘᤠ᤹ᤀᤠ. ‘ᤀᤣᤗᤡᤖᤧ ᤁᤢᤜᤡᤶᤛᤕᤱ ᤏᤢ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤛᤡᤍᤢᤱᤈᤓᤠ ᤀᤡᤃᤪ ᤗᤧᤳᤋᤡ᤺ᤸᤗᤧ ᤀᤠᤓᤧᤸᤗᤧᤀᤠᤱ ᤗᤧᤵᤔᤡ ᤔᤧᤒᤥᤱᤏᤧᤴ॥’”

¹⁵ ᤛᤠᤔᤢᤀᤧᤗᤧᤴ ᤋᤠᤏᤠᤶ ᤂᤠᤀᤥ᤺ᤳᤋᤧ ᤌᤠᤖᤡᤰᤁᤣ ᤜᤠᤒᤠ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤐᤥᤃᤧᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤜᤴᤍᤢ॥ ᤂᤢᤏᤧ᤹ ᤏᤡᤛᤢᤒᤠ ᤛᤢᤑᤥᤴ ᤀᤣᤗᤡᤴ ᤔᤧᤵᤔᤠ ᤁᤡᤛᤧ॥

¹⁶ ᤁᤖ ᤀᤣᤗᤡ᤺ᤸᤗᤧ ᤛᤠᤔᤢᤀᤧᤗᤧᤴ “ᤀᤠᤛ᤻ᤛᤠ ᤛᤠᤔᤢᤀᤧᤗᤀᤣ” ᤔᤧᤳᤋᤢᤀᤠᤱ ᤀᤢ᤺ᤳᤋᤢ॥ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤜᤤ. ᤀᤠᤱᤃᤠ᤹ ᤁᤵᤔᤥᤀᤣ ᤘᤠ᤹ᤀᤠᤖᤥ॥”

¹⁷ ᤜᤧᤰᤁᤩᤠᤱ ᤀᤣᤗᤡ᤺ᤸᤗᤧ ᤛᤣ᤺ᤴᤍᤥᤛᤢ. “ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤌᤣ ᤁᤧᤔᤧᤳᤋᤧ᥅ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤔᤠ᤹ᤀᤣ ᤔᤧᤳᤋᤠᤱᤅᤧ᤹॥ ᤂᤢᤏᤧ᤹ ᤁᤧᤔᤧᤳᤋᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤗᤳᤇᤠᤖᤰ ᤁᤧᤔᤠ᤹ᤖᤢᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤛᤠᤰᤐᤠ ᤁᤧᤈᤠ᤺ᤳᤗᤖᤥ॥”

¹⁸ ᤂᤧᤸᤗᤧᤆᤥᤃᤢᤸᤗᤧ ᤛᤠᤔᤢᤀᤧᤗᤖᤧ ᤏᤡᤛᤢᤒᤠ ᤁᤧᤖᤧᤰ ᤛᤢᤑᤥᤜᤠ᤹ ᤗᤳᤇᤠᤀᤠᤱ ᤔᤧᤶᤔᤠ᤹ᤀᤣ ᤀᤣᤗᤡᤴ ᤔᤧᤳᤋᤢ॥ ᤜᤧᤰᤁᤩᤠᤱ ᤀᤣᤗᤡ᤺ᤸᤗᤧ ᤐᤠ᤺ᤳᤋᤢ. “ᤂᤢᤏᤧ᤹ᤃ ᤕᤜᤘᤣ ᤍᤠᤱᤒᤠᤴᤗᤥ. ᤂᤢᤏᤧ᤹ ᤀᤥᤔᤧᤳᤋᤢᤸᤗᤧ ᤏᤢᤒᤠ ᤁᤧᤎᤠ᤺ᤵᤐᤠ ᤐᤠ᤺ᤴᤜᤠ᤹ ᤁᤢᤏᤡᤱᤘᤠ᤹ ᤜᤧᤰᤁᤣᤀᤣ ᤆᤥᤃᤢᤖᤖᤥ॥”

¹⁹ ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤐᤥᤖᤧᤖ ᤌᤠᤱᤒᤧᤴ ᤁᤧᤖᤧᤖ ᤐᤣ. ᤕᤜᤘᤣ ᤍᤠᤱᤒᤠᤴ ᤂᤢᤏᤧ᤹ᤏᤢ ᤘᤕᤧ. ᤂᤧᤒᤩᤠᤱ ᤛᤠᤔᤢᤀᤧᤗᤖᤧ ᤐᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤧᤰᤂᤠ ᤁᤧᤖᤧᤖᤥ॥

²⁰ ᤜᤧᤰᤁᤩᤠᤱ ᤍᤠᤏ ᤗᤠᤈᤣ᤹ᤀᤠᤱ ᤁᤳᤏᤠ ᤒᤣᤷᤛᤣᤒᤠ ᤌᤠᤖᤡᤰᤐᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤔᤢᤀᤧᤗᤧᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤖᤇ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢ॥

²¹ ᤕᤜᤘᤣ ᤍᤠᤱᤒᤧᤴ ᤛᤡᤗᤥᤀᤥ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤡᤱᤗ ᤘᤕᤧ. ᤜᤧᤰᤁᤩᤠᤱ ᤂᤧᤵᤔᤥ ᤂᤢᤏᤧ᤹ ᤁᤢᤒᤠ᤺ᤴᤈᤠ᤺ᤰᤗᤠᤶ ᤛᤠᤔᤢᤀᤧᤗᤖᤧᤀᤥᤀᤠᤱ ᤀᤠᤒᤠᤅᤣ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤡᤱᤗᤥ॥