᥇ ᤛᤠᤔᤢᤀᤧᤗ 29 - LIFOTNT

ᤀᤠᤁᤡᤛᤖᤧ ᤍᤠᤀᤢᤍᤧᤴ ᤛᤡᤰᤗᤃ ᤐᤠᤱᤄᤢᤒᤠ

¹ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤛᤧ ᤀᤐᤣᤁᤀᤥ ᤔᤧᤛᤢᤵᤛᤢᤛᤡ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤕᤡᤈᤖᤣᤗᤒᤠ ᤘᤒᤢᤴᤍᤠᤰ ᤁᤢᤒᤣᤛᤠᤱ ᤋᤢᤖᤠᤕᤰ ᤔᤧᤗᤣ᤺ᤳᤋᤢ॥

² ᤐᤗᤡᤛ᤻ᤋᤡ ᤕᤢᤰᤛᤠᤒᤠᤜᤠ᤹ᤖᤧ ᤁᤡᤵᤌᤡᤰ ᤁᤡᤵᤌᤡᤰ ᤏᤢ ᤜᤧᤴᤇᤡᤱ ᤜᤧᤴᤇᤡᤱᤅᤥ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤋᤃᤡ ᤔᤧᤓᤥᤛᤢᤛᤡᤖ ᤔᤧᤒᤳᤇᤧ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤀᤠᤁᤡᤛᤧᤴᤏᤢ ᤀᤣᤃᤠᤱᤛᤔᤠ ᤋᤡ᤺ᤰᤗᤠᤀᤥ ᤔᤧᤘᤕᤧ॥

³ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢᤛᤡ. “ᤁᤴ ᤜᤡᤒᤪᤢᤜᤠ᤹ ᤁᤵᤔᤥ ᤌᤣ᤺ᤴ ᤆᤥ᤺ᤰᤏᤢ ᤔᤧᤘᤠ᤹ᤒᤣ᥅” ᤀᤠᤁᤡᤛᤧᤸᤗᤧ ᤔᤧᤳᤋᤢᤛᤡ. “ᤁᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤠ ᤍᤠᤀᤢᤍᤧᤴᤗᤥ. ᤁᤴ ᤀᤠᤱᤃᤠ᤹ᤏᤢ ᤘᤠ᤹ᤒᤠ ᤋᤱᤒᤣᤎᤡᤰᤏᤢ᤺ᤸᤗᤧ ᤕᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹॥ ᤀᤠᤱᤃᤠ᤹ᤏᤢ ᤘᤕᤧᤀᤠᤱᤎᤥ ᤀᤠᤱᤃᤠ᤹ ᤁᤴ ᤔᤏᤠᤀᤥ ᤋᤠᤵᤑᤧ᤺ᤶᤒᤠ ᤀᤠᤵᤋᤡᤰ ᤌᤣᤀᤠᤱ ᤔᤧᤱᤄᤥᤀᤣ ᤘᤠ᤹ᤀᤠᤖᤥ॥”

⁴ ᤁᤖ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹ᤖᤧ ᤛᤠ᤹ᤖᤡᤰ ᤛᤡᤰᤐᤥᤃᤧ. ᤜᤧᤰᤁᤩᤠᤱ ᤀᤠᤁᤡᤛᤧᤴ ᤔᤧᤔᤧᤳᤋᤢ. “ᤂᤧᤴ ᤔᤏᤠᤴ ᤂᤧᤏᤧ᤹ ᤁᤧᤒᤡᤖᤢᤒᤠ ᤋᤧᤴᤏᤥ ᤐᤠᤱᤄᤧᤍᤣᤛᤧ᤹॥ ᤂᤧᤴ ᤀᤠᤏᤡ᤹ᤏᤢ ᤌᤱ ᤆᤥ᤺ᤰᤛᤧ ᤔᤧᤒᤣ᤺ᤰᤏᤧᤸᤗ. ᤔᤣ᤺ᤴᤏᤣ ᤑᤃᤪ ᤂᤧᤸᤗᤧ ᤌᤱᤅᤥ ᤀᤠᤏᤡ᤹ ᤀᤡᤱᤀᤠᤗᤧᤰ॥ ᤀᤠᤏᤡ᤹ ᤔᤏᤠᤜᤠ᤹ ᤛᤧᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣᤰᤐᤠᤜᤠ᤹ ᤁᤢᤴᤍᤠᤱᤒᤧᤴ ᤐᤡᤖᤢ᤹ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤋᤱᤔᤠ ᤁᤴ ᤔᤏᤠ᤺ᤸᤗᤧ ᤁᤢᤗᤠᤃᤡ ᤁᤴᤏᤢ᤺ᤸᤗᤧ ᤏᤢᤒᤠ ᤛᤢᤕᤧᤶ ᤘᤣ᤹ ᤌᤣ ᤐᤥᤱᤔᤠ ᤛᤢᤰᤐᤣ᥅

⁵ ᤁᤱᤃ ᤜᤠᤒᤠ ᤂᤧᤴ ᤍᤠᤀᤢᤍᤧᤴ ᤔᤣ᤺ᤶᤒᤡ᥅ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤧᤴᤇᤢᤔᤠᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤖ ᤔᤧᤗᤠ᤺ᤰᤂᤧᤀᤠᤱ ᤔᤧᤘᤕᤧ. ‘ᤛᤠᤘᤗᤖᤧ ᤜᤧᤴᤇᤡᤱ ᤜᤧᤴᤇᤡᤱ ᤛᤧᤖᤢᤛᤡ. ᤜᤧᤰᤁᤩᤠᤱ ᤍᤠᤀᤢᤍᤖᤧᤃ ᤗᤠᤅᤧᤴ ᤗᤠᤅᤧᤴ ᤛᤧᤖᤢᤛᤡ॥’”

⁶ ᤜᤧᤰᤁᤩᤠᤱ ᤀᤠᤁᤡᤛᤖᤧ ᤍᤠᤀᤢᤍᤧᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤐᤠ᤺ᤳᤋᤢᤱ᤹. ᤂᤧᤏᤧ᤹ ᤛᤠ᤹ᤖᤡᤰ ᤁᤧᤏᤢ᤹ᤒᤠ ᤁᤧᤈᤥᤰ. ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤁᤧᤘᤠ᤹ᤀᤠᤱ ᤁᤴ ᤌᤱᤅᤥ ᤁᤧᤎᤰᤐᤠ ᤐᤠ᤺ᤴᤏᤥ ᤀᤠᤱᤃᤠ᤹ ᤋᤧᤴᤏᤠ॥ ᤂᤧᤏᤧ᤹ ᤀᤠᤱᤃᤠ᤹ᤀᤥ ᤁᤧᤍᤩᤣᤀᤠᤱᤎᤥ ᤂᤧᤏᤧ᤹ᤀᤥ ᤋᤠᤵᤑᤧ᤺ᤶᤒᤠ ᤌᤣᤀᤠᤱ ᤔᤧᤱᤄᤥᤀᤣ ᤘᤠ᤹ᤀᤠ. ᤁᤖ ᤂᤧᤏᤧ᤹ ᤌᤱ ᤌᤰᤛᤧ ᤐᤣ᤺ᤰᤔᤠ ᤐᤠ᤺ᤴᤏᤥ ᤘᤣ᤹ ᤕᤢᤰᤛᤠᤒᤠᤜᤠ᤹ ᤂᤧᤏᤧ᤹ᤏᤢ ᤔᤧᤴᤍᤧᤴᤏᤧᤴ॥

⁷ ᤂᤧᤸᤗᤧᤆᤥᤃᤢᤸᤗᤧ ᤏᤢᤖᤡᤰᤁᤠᤱ ᤜᤡᤶᤔᤥ ᤐᤣᤃᤧ᤹ᤀᤥ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤖᤠ᤹ᤔᤧᤴᤎᤠᤱᤔᤏᤠᤒᤠ ᤐᤠᤴ ᤌᤣᤀᤠᤱ ᤔᤧᤈᤥᤃᤧᤴᤏᤧ᤹॥”

⁸ ᤍᤠᤀᤢᤍᤧᤸᤗᤧ ᤀᤠᤁᤡᤛᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤌᤣ ᤆᤥᤃᤢᤱᤅᤠᤱ ᤘᤠ᤹ᤀᤠᤒᤣ᥅ ᤀᤠᤱᤃᤠ᤹ ᤁᤧᤛᤧᤘᤠ ᤆᤥ᤺ᤰᤛᤧ ᤗᤠᤛᤠᤱᤅᤠᤱᤎᤥ ᤀᤠᤸᤗ ᤌᤠᤖᤡᤰ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤸᤗᤥ ᤌᤧᤔᤠ ᤋᤠᤵᤑᤧ᤺ᤶᤒᤠ ᤐᤠᤴ ᤁᤧᤄᤥᤛᤢᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤴᤍᤠᤱᤒᤠ ᤜᤠᤱᤅᤡᤸᤗᤧ ᤁᤧᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤣᤀᤠᤱ ᤌᤱ ᤆᤥ᤺ᤰᤔᤠ ᤔᤧᤄᤥᤀᤠᤶᤒᤠᤒᤣ᥅”

⁹ ᤜᤧᤰᤁᤣ᤺ᤸᤗᤧ ᤀᤠᤁᤡᤛᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤏᤡᤔᤠᤀᤥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡᤰ ᤁᤢᤍᤥ᤺ᤵᤔᤠ ᤁᤧᤈᤥᤰ. ᤁᤖ ᤐᤗᤡᤛ᤻ᤋᤡ ᤕᤢᤰᤛᤠᤒᤠᤜᤠ᤹ᤖᤧ ᤂᤧᤏᤧ᤹ ᤂᤢᤴᤇᤡ᤹ᤏᤢ ᤛᤥᤖᤡᤰ ᤌᤱ ᤆᤥ᤺ᤰᤛᤧ ᤐᤣ᤺ᤰᤔᤠ ᤁᤧᤴᤇᤢᤰᤏᤧᤴ ᤔᤧᤒᤠ᤺ᤳᤋᤢᤀᤠᤱ ᤘᤠ᤹॥

¹⁰ ᤂᤧᤸᤗᤧᤆᤥᤃᤢᤸᤗᤧ ᤋᤠ᤺ᤴᤍᤡᤰ ᤋᤠᤏᤠᤶ ᤂᤠᤀᤥ᤺ᤳᤏᤢ ᤔᤣ᤺ᤴᤏᤣ ᤐᤥᤃᤧ᤹ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤁᤧᤍᤠᤒᤠ ᤁᤧᤴᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤋᤣ᤹ᤖᤧᤛᤧ᤹ᤀᤠᤱ ᤐᤣᤃᤧ᤹ᤀᤥ॥”

¹¹ ᤜᤧᤰᤁᤣ᤺ᤸᤗᤧ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤏᤢ᤺ᤱᤔᤠ ᤐᤣ᤺ᤰᤔᤠ ᤑᤠ᤹ᤀᤠᤱ ᤋᤠᤏᤠᤶ ᤔᤧᤒᤥᤃᤧ॥ ᤐᤗᤡᤛ᤻ᤋᤡᤜᤠ᤹ᤃ ᤕᤡᤈᤖᤣᤗ ᤗᤧᤵᤔᤠᤱ ᤔᤧᤎᤠᤛᤡᤱᤗᤥ॥