᥇ ᤛᤠᤔᤢᤀᤧᤗ 28 - LIFOTNT

¹ ᤂᤧᤴ ᤕᤧᤶᤔᤥ ᤐᤗᤡᤛ᤻ᤋᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤂᤢᤴᤇᤡ᤹ ᤌᤰᤛᤢᤒᤠᤜᤠ᤹ ᤔᤧᤓᤢᤰᤂᤢᤛᤡ॥ ᤀᤠᤁᤡᤛᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤂᤧᤏᤧ᤹ ᤏᤢ ᤁᤧᤔᤏᤠᤜᤠ᤹ ᤀᤠᤱᤃᤠ᤹ᤏᤢ ᤌᤱᤅᤥ ᤐᤣ᤺ᤰᤔᤠᤒᤥᤱ ᤁᤧᤗ᤹ᤒᤠᤴ ᤁᤧᤏᤡᤛᤢᤒᤡᤗᤠ॥”

² ᤍᤠᤀᤢᤍᤖᤧ ᤀᤠᤁᤡᤛᤧᤴ ᤔᤧᤳᤋᤢ. “ᤛᤠ᤹ᤖᤡᤰ ᤏᤢᤒᤠᤖᤥ. ᤁᤧᤛᤧᤘᤠᤖᤥᤒᤠᤸᤗᤧ ᤀᤠᤰᤂᤣ ᤆᤥᤃᤢ ᤂᤧᤱᤃ ᤁᤧᤏᤡᤛᤢᤀᤣᤖᤥ॥” ᤜᤧᤰᤁᤣ᤺ᤸᤗᤧ ᤀᤠᤁᤡᤛᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤁᤧᤜᤡᤱᤜᤡᤱ ᤌᤠᤖᤡᤰᤁᤣ ᤀᤠᤱᤃᤠ᤹ ᤀᤠᤃᤶᤒᤪᤠᤱ ᤆᤥ᤺ᤰᤏᤧᤖᤥ॥”

ᤛᤠᤘᤗᤖᤧ ᤁᤡᤳᤆᤠᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠᤴ ᤛᤢᤈᤠ ᤏᤠ᤺ᤰᤋᤢ

³ ᤀᤠᤸᤗ ᤛᤠᤔᤢᤀᤧᤗᤧᤴ ᤛᤩᤧᤀᤠᤱ ᤜᤥ᤺ᤵᤋᤧ. ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤧ᤹ ᤁᤢᤗᤠᤃᤡ ᤔᤧᤖᤡᤱ ᤔᤧᤎᤰᤋᤧᤀᤠᤱ ᤂᤧᤴ ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤧᤰᤕᤰ ᤖᤠᤔᤠᤀᤥ ᤔᤧᤗᤢᤵᤋᤢ॥ ᤛᤠᤘᤗᤖᤧ ᤛᤠᤶᤔᤠᤱᤆᤩᤠᤱ ᤔᤢᤖᤠ ᤁᤧᤔᤧᤵᤐᤠ ᤏᤢ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤗᤠᤈᤣ᤹ᤗᤠᤶᤒᤠ ᤗ᤺ᤳᤋᤢᤍᤣᤛᤢᤛᤡᤀᤠᤱ ᤘᤕᤧ॥

⁴ ᤐᤗᤡᤛ᤻ᤋᤡᤜᤠ᤹ ᤔᤧᤓᤢᤱᤛᤡᤱᤅᤠᤱ ᤛᤢᤏᤣᤶᤔᤥ ᤔᤧᤍᤩᤧ. ᤜᤧᤰᤁᤩᤠᤱ ᤂᤧᤵᤔᤥ ᤋᤢᤖᤠᤕᤰ ᤔᤧᤗᤣ᤺ᤳᤋᤢ॥ ᤛᤠᤘᤗᤖᤧᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤑᤢᤰᤂᤢᤛᤡᤀᤠᤱ ᤃᤡᤸᤒᤥ ᤔᤧᤵᤔᤏᤠᤍᤧᤴᤏᤥ ᤋᤢᤖᤠᤕᤰ ᤔᤧᤗᤣ᤺ᤳᤋᤢ॥

⁵ ᤛᤠᤘᤗᤖᤧ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ ᤏᤡᤛᤢᤛᤡᤀᤠᤱ ᤛᤠ᤹ᤖᤡᤰ ᤁᤡᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤗᤢᤱᤔᤠᤴ ᤕᤰᤂᤧ॥

⁶ ᤜᤧᤰᤁᤣ᤺ᤸᤗᤧ ᤛᤠᤘᤗᤖᤧ ᤕᤜᤘᤣ ᤍᤠᤱᤒᤠᤴ ᤛᤣ᤺ᤴᤍᤥᤛᤢ. ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤛᤧᤵᤔᤠᤱᤗᤠᤶᤔᤠᤱ ᤏᤥᤃᤵ ᤔᤧᤒᤡᤖᤢᤴ. ᤀᤢᤖᤡᤔ ᤗᤠᤶᤔᤠᤱ ᤏᤥᤃᤵ ᤔᤧᤒᤡᤖᤢᤴ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤗᤠᤶᤔᤠᤱ ᤏᤥᤃᤵ ᤔᤧᤒᤡᤖᤢᤴ॥

⁷ ᤜᤧᤰᤁᤣ᤺ᤸᤗᤧ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤛᤠᤶᤔᤠᤱᤆᤩᤠᤱ ᤁᤧᤕᤠᤱᤔᤠ ᤗᤳᤇᤠ ᤔᤧᤴᤇᤢᤔᤠᤎᤡᤰ ᤀᤠᤱᤃᤠ᤹ ᤀᤠᤗᤠᤃᤡ ᤁᤥ᤺ᤳᤋᤠᤶᤔᤧ᤹. ᤂᤧᤒᤩᤠᤱ ᤀᤠᤱᤃᤠ᤹ ᤐᤣ᤺ᤰᤁᤠ᤹ᤀᤠᤱ ᤂᤢᤏᤧ᤹ ᤛᤣ᤺ᤴᤍᤥᤛᤢᤱ॥” ᤜᤧᤰᤁᤩᤠᤱ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤀᤧᤴᤍᤥᤖᤀᤥ ᤗᤳᤇᤠ ᤔᤧᤴᤇᤢᤔᤠ᤹ ᤘᤠ᤹॥”

⁸ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤧᤴ ᤘᤣ᤹ ᤋᤣᤳ ᤆᤠᤰᤛᤡᤱ ᤜᤧᤰᤁᤩᤠᤱ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤗᤧᤱᤛᤡᤱᤅᤠᤱ ᤏᤧᤵᤑᤢ ᤁᤢᤔᤏᤠᤜᤠ᤹ᤏᤢ ᤛᤧᤴᤍᤡᤰ ᤂᤧᤴ ᤔᤧᤴᤇᤢᤔᤠᤀᤥ ᤐᤣ॥ ᤜᤧᤰᤁᤩᤠᤱ ᤂᤧᤴ ᤔᤧᤳᤋᤢ. “ᤀᤠᤳᤋᤡᤴ ᤔᤡᤱ ᤗᤥ᤺ᤰᤋᤢᤱ. ᤛᤠᤶᤔᤠᤱ ᤆᤩᤠᤱᤜᤠ᤹ ᤛᤣ᤺ᤴᤍᤥᤛᤧᤛᤧ᤹ᤀᤠᤱ ᤜᤠᤒᤠ ᤂᤧᤴ ᤔᤏᤠ᤺ᤸᤗᤧ ᤁᤢᤛᤠᤶᤔᤡᤴ ᤀᤠᤱᤃᤠ᤹ ᤀᤠᤗᤠᤃᤡ ᤀᤢ᤺ᤳᤋᤠᤱ ᤐᤡᤖᤠᤱᤅᤧ᤹॥”

⁹ ᤁᤖ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤔᤧᤳᤋᤢ. “ᤛᤠᤘᤗᤖᤧ ᤌᤣ ᤆᤥᤃᤢᤀᤠᤱ ᤘᤠ᤹ ᤂᤧᤱᤃ ᤂᤧᤏᤧ᤹ ᤁᤧᤏᤡᤛᤢᤀᤣᤖᤥ॥ ᤛᤠᤶᤔᤠᤱᤆᤩᤠᤱ ᤁᤧᤕᤠᤱᤒᤠ ᤏᤢ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤏᤧ᤹ ᤗᤠᤈᤣ᤹ᤗᤠᤶᤒᤠ ᤗ᤺ᤳᤋᤢᤍᤣᤛᤢᤛᤡᤀᤠᤱ ᤘᤠ᤹॥ ᤜᤠᤒᤠ ᤁᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤱᤏᤧᤑᤃᤪ ᤀᤠᤱᤃᤠ᤹ ᤛᤡᤀᤠ. ᤜᤧᤰᤁᤣ᤺ᤸᤗᤧ ᤌᤣᤀᤠᤱ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤁᤧᤒᤠᤱᤅᤠᤒᤠᤒᤣ᥅”

¹⁰ ᤛᤠᤘᤗᤖᤧ ᤔᤠᤱᤜᤧᤰᤛᤡᤱᤅᤠᤱ ᤂᤧᤴᤏᤡᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤧᤳᤏᤧ. ᤁᤴ ᤕᤠ᤺ᤶᤒᤰᤁᤡᤴ ᤁᤧᤈᤥᤃᤢᤸᤗᤧ ᤂᤧᤏᤧ᤹ ᤁᤧᤛᤶᤍᤠᤱ ᤀᤰᤋᤱᤒᤠ ᤔᤧᤰᤔᤠᤛᤡᤔᤠ ᤕᤠ᤺ᤶᤒᤰ ᤔᤧᤍᤠᤏᤧᤴᤗᤥ॥”

¹¹ ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤃᤡ ᤜᤠᤳ ᤀᤢ᤺ᤳᤋᤢᤱᤒᤠᤒᤣ᥅” ᤛᤠᤘᤗᤖᤧ ᤔᤧᤳᤋᤢ. “ᤛᤠᤔᤢᤀᤧᤗᤧᤴ ᤀᤢ᤺ᤳᤋᤧ᤹॥”

¹² ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤠᤔᤢᤀᤧᤗᤧᤴ ᤗ᤺ᤴᤍᤧ ᤋᤩᤧᤒᤠ ᤏᤡᤛᤢᤸᤗᤧ ᤛᤠ᤹ᤖᤡᤰ ᤕᤱᤔᤠ ᤛᤩᤧ. ᤜᤧᤰᤁᤩᤠᤱ ᤀ᤺ᤰᤋᤧᤖ ᤛᤠᤘᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤀᤡᤱᤗᤧᤰ ᤁᤧᤔᤧᤳᤋᤠᤱᤒᤠᤒᤣ᥅ ᤂᤧᤏᤧ᤹ᤃ ᤛᤠᤘᤗᤧᤴᤏᤧᤏᤡᤖᤧᤇ॥”

¹³ ᤜᤠᤱᤅᤡᤸᤗᤧ ᤂᤧᤴ ᤔᤧᤳᤋᤢ. “ᤔᤧᤃᤡᤛᤧᤴᤏᤧ᤹॥ ᤂᤧᤏᤧ᤹ ᤌᤣ᤺ᤴ ᤁᤧᤏᤡᤛᤢᤖ ᤁᤧᤒᤳ᥅” ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤔᤧᤳᤋᤢ. “ᤂᤠᤶᤒᤠᤱ ᤛᤡᤃᤠᤱᤗᤠᤶ ᤁᤧᤗ᤺ᤶᤒᤠᤖ ᤁᤧᤒᤵᤐᤠ ᤗᤳᤇᤠ ᤛᤠᤶᤎᤡᤰ ᤏᤡᤛᤢᤱᤗ ᤐᤳᤋᤠ॥”

¹⁴ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤴ ᤀᤠᤰᤋᤱᤒᤠ ᤆᤥᤰ᥅” ᤂᤧᤸᤗᤧ ᤔᤧᤳᤋᤢ. “ᤂᤠᤶᤍᤣ᤺ᤳ ᤁᤧᤜᤧᤶᤒᤠ ᤗᤳᤇᤠ ᤁᤠᤵᤐᤥᤒᤠ ᤔᤏᤠᤎᤡᤰ ᤌᤥ ᤗ᤺ᤴᤎᤠᤱᤗ ᤐᤳ॥” ᤜᤧᤰᤁᤣ᤺ᤸᤗᤧ ᤂᤧᤴ ᤛᤠᤔᤢᤀᤧᤗᤧᤴᤏᤣ ᤑᤠ᤹ᤀᤠᤱ ᤛᤠᤘᤗᤖᤧ ᤏᤡᤱᤘᤠ᤹ ᤂᤥᤛᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢ॥

¹⁵ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤛᤠᤘᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤌᤥ ᤁᤧᤗ᤺ᤳᤋᤠᤱᤅᤠᤱ ᤌᤣᤀᤠᤱ ᤋᤢᤰᤂᤣ ᤁᤧᤈᤠ᤺ᤳᤋᤠᤒᤠᤒᤣ᥅” ᤛᤠᤘᤗᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤛᤠ᤹ᤖᤡᤰ ᤁᤧᤛᤠᤰᤐᤥ ᤌᤩᤠᤱᤅᤠᤱ ᤘᤠ᤹ᤀᤠ॥ ᤐᤗᤡᤛ᤻ᤋᤡᤜᤠ᤹ᤖᤧ ᤌᤱᤅᤥ ᤀᤠᤱᤃᤠ᤹ ᤔᤧᤀᤣ᤺ᤵᤋᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤗᤧᤖᤠᤱᤅᤠᤱ ᤘᤠ᤹॥ ᤂᤢᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤗᤠᤶ ᤜᤧᤰᤁᤩᤠᤱ ᤛᤧᤵᤔᤠᤱᤗᤠᤶᤔᤠᤱ ᤏᤥᤃᤵ ᤔᤧᤒᤡᤖᤠᤱᤅᤡᤴ॥ ᤀᤠᤱᤃᤠ᤹ ᤌᤣ ᤆᤥᤃᤢᤱᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤍᤥᤛᤧ ᤂᤧᤏᤧ᤹ ᤀᤢ᤺ᤳᤏᤧᤒᤠ॥”

¹⁶ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤗᤧᤖᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤍᤰᤗᤧᤱᤘᤠᤀᤥ ᤐᤥ᤺ᤰᤂᤧᤀᤠᤱ ᤘᤠ᤹ᤏᤧᤑᤃᤪ ᤌᤣᤀᤠᤱ ᤀᤠᤱᤃᤠ᤹ ᤛᤣ᤺ᤴᤃᤧᤍᤥᤀᤠᤒᤠᤒᤣ᥅

¹⁷ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤗᤠᤶᤒᤠ ᤋᤃᤡᤛᤠ ᤁᤧᤔᤧᤳᤋᤧᤀᤠᤱ ᤘᤠ᤹॥ ᤂᤢᤏᤧ᤹ ᤁᤧᤜᤢᤰᤗᤠᤶᤒᤠ ᤁᤧᤜᤠᤱᤈᤢᤶᤔᤡᤴ ᤁᤧᤏᤠᤵᤋᤧᤀᤠᤱ ᤍᤠᤀᤢᤍᤧᤴ ᤐᤡᤖᤢᤀᤠᤱ ᤘᤠ᤹॥

¹⁸ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤏᤡᤴ ᤁᤧᤱᤄᤧᤵᤛᤢᤴ. ᤜᤧᤰᤁᤩᤠᤱ ᤂᤧᤏᤧ᤹ ᤀᤔᤠᤗᤧᤁᤡᤜᤠ᤹ ᤁᤧᤖᤧᤰ ᤁᤧᤴᤇᤧᤖᤢᤛᤡᤴ॥ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤁᤧᤛᤶᤍᤠᤱ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤒᤠᤖᤥ॥

¹⁹ ᤂᤧᤏᤧ᤹ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ॥ ᤋᤠ᤺ᤴᤍᤡ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤀᤠᤱᤃᤠ᤹ᤏᤢ ᤔᤧᤘᤠ᤹॥ ᤀᤥᤖᤥ. ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤛᤢᤛᤡ᤹॥”

²⁰ ᤛᤠᤔᤢᤀᤧᤗᤖᤧ ᤁᤢᤒᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤁᤡᤛᤧᤀᤠᤱ ᤛᤠᤘᤗᤧᤴ ᤂᤠᤶᤒᤠᤱᤔᤥ ᤆᤥ᤺ᤴᤍᤧᤀᤠᤱ ᤛᤸᤗᤡᤰ ᤛᤴᤇᤡᤱ॥ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤏᤢ ᤗᤧᤴᤍᤡᤰ ᤏᤠᤶᤎᤠᤎᤠ ᤌᤣᤀᤠᤱ ᤔᤧᤈᤏᤧᤶᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤰᤔᤠ ᤌᤣᤀᤠᤱ ᤔᤧᤴᤕᤠᤰᤔᤏᤠᤒᤠ ᤐᤥ᤺ᤰᤂᤧ॥

²¹ ᤂᤧᤒᤩᤠᤱ ᤔᤧᤴᤇᤢᤔᤠ᤹ᤀᤡᤴ ᤛᤠᤘᤗᤖᤧ᤹ᤀᤥ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤡᤛᤧᤒᤠ ᤏᤡᤛᤢᤀᤠᤱ ᤔᤧᤳᤋᤢ. “ᤂᤧᤏᤧ᤹ ᤁᤧᤔᤧᤳᤋᤠᤱᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤂᤧᤵᤛᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤜᤡᤱᤔᤴᤏᤡᤴ ᤂᤧᤏᤧ᤹ ᤁᤧᤗᤠᤃᤡ ᤁᤧᤛᤠᤰᤐᤠᤀᤥ ᤌᤠᤛᤢᤱ॥

²² ᤀᤠᤸᤗ ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ॥ ᤀᤠᤱᤃᤠ᤹ ᤁᤧᤗᤠᤃᤡ ᤁᤢᤓᤠ ᤆᤠ ᤋᤠᤖᤢᤱ᤹. ᤆᤩᤧ᤹ᤀᤠᤱ ᤗᤠᤱᤄᤣ᤺ᤰᤔᤠᤖᤧ ᤗᤠᤃᤡ ᤁᤧᤎᤢᤶᤒᤠ ᤐᤥ᤺ᤰᤂᤧ᤹ᤀᤥ॥”

²³ ᤁᤖ ᤛᤠᤘᤗᤧᤴ ᤆᤠᤔᤠ ᤔᤧᤍᤧᤴᤍᤧᤴ॥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤓᤠ᤹ᤖᤢᤸᤗᤧ ᤂᤢᤏᤧ᤹ ᤋᤧᤴᤍᤧ. ᤜᤧᤰᤁᤩᤠᤱ ᤂᤠᤶᤒᤠᤱᤅᤥᤗᤠᤶ ᤐᤥᤃᤧᤀᤠᤱ ᤏᤧᤳᤏᤠᤍᤧᤴᤏᤥ ᤕᤢᤱᤛᤡᤱ॥

²⁴ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤜᤡᤶᤔᤥ ᤔᤧᤜᤡᤱᤄᤢᤒᤠ ᤐᤡᤳᤛᤠᤳ ᤌᤡᤰ ᤘᤕᤧ॥ ᤂᤧᤴ ᤛᤧᤖᤢᤀᤠᤱ ᤌᤥ᤺ᤰᤋᤢ॥ ᤂᤧᤸᤗᤧ ᤁᤢᤓᤠ ᤑᤣ᤹ᤖᤢᤶ ᤋᤠᤖᤢᤀᤠᤱ ᤛ᤹ᤖᤢ. ᤜᤧᤰᤁᤩᤠᤱ ᤁᤧᤓᤰᤐᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤗᤧ᤺ᤰᤛᤢ॥

²⁵ ᤂᤧᤴ ᤂᤖᤧ᤺ᤱᤅᤡᤴ ᤛᤠᤘᤗ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤢᤰᤂᤢ ᤐᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤂᤧᤴ ᤆᤠᤔᤠ ᤌᤢᤱᤔᤠᤜᤠ᤹ ᤔᤧᤈ ᤔᤧᤎᤢᤅᤢᤀᤠᤱ ᤀᤠᤶᤓᤠ ᤂᤧᤴ ᤛᤧᤴᤍᤡᤰ ᤂᤧᤱᤜᤠ᤹ ᤔᤧᤎᤠᤛᤡᤱᤗᤥ॥