᥇ ᤛᤠᤔᤢᤀᤧᤗ 27 - LIFOTNT

ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤍᤠᤀᤢᤍᤧᤴ ᤘᤕᤧᤒᤠ

¹ ᤍᤠᤀᤢᤍᤖᤧ ᤁᤢᤏᤡᤱᤘᤠ᤹ᤀᤥ ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ. “ᤀᤠᤸᤗ ᤌᤡᤰᤕᤠ᤺ᤱᤃ ᤛᤠᤘᤗᤖᤧ ᤁᤢᤜᤢᤰᤗᤠᤶᤒᤠ ᤛᤡᤔᤠᤀᤣ ᤐᤥᤱ॥ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤂᤧᤳᤇᤡᤱᤔᤠ ᤐᤣ᤺ᤰᤔᤠᤀᤣ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤒᤠ ᤐᤥᤱ॥ ᤂᤧᤒᤩᤠᤱ ᤀᤡᤛᤪᤠᤀᤡᤗ ᤗᤠᤈᤣ᤹ ᤁᤧᤖᤧᤰ ᤛᤠᤘᤗᤖᤧ ᤀᤠᤱᤃᤠ᤹ ᤁᤥ᤺ᤵᤔᤠ ᤗᤧᤳᤋᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤁᤢᤜᤢᤰᤁᤥ ᤌᤠᤔᤠᤗᤠᤶ ᤜᤡᤱᤅᤠᤖᤥ॥”

² ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤡᤵ ᤋᤢᤰᤛᤡ ᤁᤢᤔᤏᤠᤜᤠ᤹ ᤀᤡ᤺ᤴᤍᤥᤴ ᤔᤧᤃᤠ᤺ᤰᤋᤢᤀᤠᤱ ᤃᤠᤋ ᤗᤠᤈᤣ᤹ᤒᤠ ᤔᤠᤀᤥᤁᤖᤧ ᤁᤢᤛ᤻ᤛᤠ ᤜᤠᤱ ᤀᤠᤁᤡᤛᤖᤧ᤹ᤀᤥ ᤔᤧᤒᤣ॥

³ ᤜᤧᤰᤁᤩᤠᤱ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ᤏᤢ ᤛᤥᤖᤡᤰ ᤍᤠᤀᤢᤍᤖᤧ ᤁᤢᤔᤣᤳ ᤕᤡᤈᤖᤣᤗᤡ ᤀᤜᤡᤏᤥᤔ ᤏᤢ ᤏᤠᤒᤠᤗᤖᤧ ᤁᤢᤔᤣᤔᤣᤍᤢᤔᤠ ᤁᤢᤔᤣᤳ ᤀᤒᤡᤃᤣᤗᤧᤴ ᤋᤣ᤹ᤖᤢᤛᤡᤀᤠᤱ ᤀᤠᤁᤡᤛᤧᤴᤏᤢ ᤃᤠᤋᤀᤥ ᤕᤢᤱᤔᤠ ᤔᤧᤜᤣ᤺ᤰᤋᤧ॥

⁴ ᤍᤠᤀᤢᤍᤧᤴ ᤃᤠᤋᤀᤥ ᤂᤧᤳᤇᤡᤱ ᤐᤣᤀᤠᤱ ᤘᤠ᤹ ᤁᤧᤗ᤹ᤒᤠ ᤛᤠᤘᤗᤧᤴ ᤔᤧᤔᤧᤳᤋᤢ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤍᤠᤀᤢᤍᤧᤴ ᤁᤥ᤺ᤵᤔᤠ ᤗᤧᤖᤢ॥

⁵ ᤍᤠᤀᤢᤍᤖᤧ ᤀᤠᤁᤡᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤁᤠ᤹ᤏᤧᤑᤃᤪ ᤂᤧᤏᤧ᤹ ᤁᤧᤗᤠᤈᤣ᤹ᤒᤠ ᤗᤳᤇᤠ ᤆᤢᤰᤛᤠ ᤕᤧᤰᤕᤰᤁᤥ ᤕᤢᤱᤔᤠᤍᤧᤴ ᤐᤡᤖᤠᤱᤅᤧ᤹॥ ᤀᤠᤱᤃᤠ᤹ ᤌᤣᤀᤠᤱ ᤜᤠᤱᤅᤡᤴᤏᤢ ᤁᤴ ᤜᤠᤱ ᤕᤢᤱᤒᤠ ᤕᤧᤰᤕᤰᤁᤥ ᤕᤢᤱᤅᤠᤒᤠᤒᤣ᥅”

⁶ ᤂᤧᤸᤗᤧᤆᤥᤃᤢᤸᤗᤧ ᤀᤠᤁᤡᤛᤖᤧ ᤂᤧᤴ ᤕᤧᤴᤏᤥ ᤂᤢᤏᤧ᤹ ᤛᤡᤰᤗᤃ ᤕᤧᤰᤕᤰᤁᤡᤴ ᤐᤡᤖᤢ. ᤂᤧᤴ ᤀᤠᤸᤗᤛᤠᤱ ᤕᤜᤢᤍᤠᤒᤠ ᤜᤠᤱᤜᤠ᤹ᤖᤧᤴ ᤐᤥ᤺ᤰᤂᤧᤀᤠᤱ ᤏᤧᤖᤥ॥

⁷ ᤍᤠᤀᤢᤍᤧᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤋᤱᤒᤣᤎᤡᤰᤁᤠᤱ ᤗᤡᤛᤡ ᤗᤠᤎᤠᤖᤡᤰ ᤕᤢᤅᤧ॥

⁸ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ᤖᤧ ᤃᤛ᤻ᤛᤢᤖᤡᤜᤠ᤹. ᤃᤡᤈᤪᤡᤜᤠ᤹ ᤜᤧᤰᤁᤩᤠᤱ ᤀᤔᤠᤗᤧᤁᤡᤜᤠ᤹ ᤔᤧᤓᤳᤋᤢᤛᤡᤀᤠᤱ ᤂᤢᤏᤡ᤹ ᤆᤡᤃᤰᤘᤠᤜᤠ᤹ ᤔᤧᤏᤠᤵᤋᤢᤛᤡ॥ ᤂᤧᤱᤜᤠ᤹ ᤀᤢᤴᤇᤥ᤺ᤴᤏᤠᤱᤎᤥᤀᤣ ᤛᤢᤖ ᤏᤢ ᤔᤡᤛᤪᤗᤠᤈᤣ᤹ ᤌᤠᤖᤡᤰᤁᤣ ᤔᤧᤕᤢᤱᤛᤡᤱᤅᤠᤱ ᤔᤧᤕᤢᤅᤧ॥

⁹ ᤀᤰᤂᤣᤗ᤹ᤖᤡᤰ ᤍᤠᤀᤢᤍᤧᤸᤗᤧ ᤗᤠᤈᤣ᤹ᤜᤠ᤹ᤀᤥ ᤌᤱ ᤆᤥ᤺ᤰᤛᤧ ᤐᤣ᤺ᤸᤗᤧ ᤕᤧᤶᤒᤡᤇᤠ᤹ ᤀᤡᤃᤪ ᤔᤧᤴᤇᤢᤔᤠ᤹ ᤀᤠᤳᤋᤡᤴᤏᤠᤱ ᤁᤢᤜᤡᤱᤘᤧᤳ ᤔᤧᤗᤧᤖᤢᤛᤡᤴ॥ ᤂᤢᤏᤧ᤹ ᤔᤧᤸᤗᤢᤰ ᤔᤧ᤺ᤴᤍᤠᤰ ᤏᤢ ᤐᤡᤳ. ᤀᤍᤱ ᤏᤢ ᤀᤢᤔᤣᤜᤠ᤹ ᤜᤧᤰᤁᤩᤠᤱ ᤋᤣ᤺ᤵᤑᤢᤱᤜᤠ᤹ ᤋᤣ᤹ᤖᤢᤛᤡᤀᤠᤱ ᤀᤠᤁᤡᤛᤖᤧ᤹ᤀᤥ ᤏᤢ᤺ᤰᤂᤧᤀᤠᤱ ᤐᤣ॥

¹⁰ ᤀᤠᤁᤡᤛᤖᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤀᤠᤀᤡᤴ ᤂᤧᤏᤧ᤹ ᤀᤠᤳᤋᤠᤴ ᤗᤧᤵᤔᤠᤱ ᤆᤡᤃᤰᤘᤠ ᤏᤠᤵᤛᤧ ᤁᤧᤒᤣ᥅” ᤍᤠᤀᤢᤍᤖᤧ ᤔᤧᤳᤋᤢ. “ᤕᤜᤢᤍᤠᤒᤠ ᤏᤣᤃᤣᤒ ᤗᤠᤈᤣ᤹ᤀᤥ” ᤀᤡ “ᤕᤖᤜᤔᤣᤗᤡᤜᤠ᤹ᤖᤧ ᤀᤡᤃᤪ ᤁᤣᤏᤡᤜᤠ᤹ᤖᤧ ᤂᤢᤴᤇᤡ᤹ ᤏᤣᤃᤣᤘ ᤗᤠᤈᤣ᤹ᤀᤥ॥”

¹¹ ᤍᤠᤀᤢᤍᤖᤧ ᤀᤠᤳᤋᤡᤴᤏᤠᤱ ᤕᤧᤶᤒᤡᤳᤇᤠ ᤀᤡᤃᤪ ᤔᤧᤴᤇᤢᤔᤠᤴ ᤃᤠᤋᤀᤥ ᤁᤢᤜᤡᤱᤘᤧᤳ ᤔᤧᤍᤠᤖᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤰᤋᤱᤒᤠ ᤀᤡ᤺ᤳᤋᤢ ᤂᤧᤱᤜᤠ᤹ᤖᤧ. ᤍᤠᤀᤢᤍᤖᤧ ᤀᤰᤋᤱᤒᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤘᤠ᤹ ᤁᤧᤗ᤹ᤒᤠ ᤀᤡᤱᤄᤱ ᤃᤠᤋᤀᤥ ᤋᤠ᤺ᤵᤔᤠ ᤔᤧᤛᤢᤰᤋᤢ᤹॥ ᤍᤠᤀᤢᤍᤧᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤕᤢᤅᤧᤖ ᤌᤠᤖᤡᤰ ᤀᤰᤋᤱᤒᤠᤀᤣ ᤕᤠ᤺ᤶᤒᤰ ᤆᤥᤃᤢᤖ ᤘᤕᤧ॥

¹² “ᤀᤡᤛᤪᤠᤀᤡᤗᤡ ᤁᤢᤛᤢᤘᤠᤱᤜᤠ᤹ᤀᤥ ᤋᤠᤵᤑᤧ᤺ᤶᤒᤠ ᤔᤡᤱ ᤌᤃᤢᤒᤠᤸᤗᤧ ᤆᤥᤃᤢᤸᤗᤧ ᤍᤠᤀᤢᤍᤧᤴ ᤁᤢᤜᤡᤱᤜᤡᤱ ᤌᤠᤖᤡᤰ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤐᤥᤱᤅᤠᤱ ᤕᤢᤱ” ᤁᤧᤗ᤹ᤒᤠ ᤀᤡ᤺ᤳᤋᤢᤀᤠᤱ ᤀᤠᤁᤡᤛᤖᤧ ᤍᤠᤀᤢᤍᤧᤴ ᤏᤛᤠᤴ ᤆᤥᤃᤢᤖᤥ॥