᥇ ᤛᤠᤔᤢᤀᤧᤗ 26 - LIFOTNTᤍᤠᤀᤢᤍᤖᤧ ᤕᤠᤶᤔᤥᤀᤠᤱ ᤛᤠᤘᤗᤧᤴ ᤗᤧᤖᤢᤒᤠ 1 ᤈᤡᤐᤡᤜᤠ᤹ ᤃᤡᤒᤠᤀᤥ ᤁᤧᤘᤠ᤹ᤒᤠ ᤛᤠᤘᤗᤖᤧ᤹ᤀᤥ ᤔᤧᤒᤣᤀᤠᤱ ᤕᤛᤡᤔᤥᤏ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤜᤁᤡᤗᤠᤒᤠ ᤁᤥ᤺ᤰᤔᤠ ᤑᤠᤱᤈᤱᤅᤥ ᤍᤠᤀᤢᤍᤧᤴ ᤆᤡᤱᤛᤡᤱᤅᤠᤱ ᤕᤢᤱ ᤗ᤹ᤖᤡᤰ ᤔᤧᤈᤧᤰᤋᤢ॥ 2 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤁᤢᤃᤥ᤺ᤳᤇᤧ ᤛᤠᤘᤗᤖᤧ ᤜᤧᤴᤇᤡᤱ ᤛᤢᤶᤛᤡ ᤛᤣ᤺ᤰᤔᤏᤠᤒᤠ ᤔᤏᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤜᤠᤖᤠᤜᤠᤖᤠ ᤈᤡᤐ ᤔᤧᤵᤏᤠᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤗᤧᤵᤔᤠᤱ ᤕᤥ ᤌᤩᤧ॥ 3 ᤕᤛᤡᤔᤥᤏ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤜᤁᤡᤗᤠ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱᤒᤠ ᤗᤠᤶᤔᤥ ᤂᤢᤏᤧ᤹ ᤋᤢᤖᤠᤕᤰ ᤗᤣ᤺ᤳᤋᤢ॥ ᤁᤖ ᤍᤠᤀᤢᤍᤧᤱᤃ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥᤀᤣ ᤕᤢᤅᤧ॥ ᤛᤠᤘᤗᤧᤴ ᤂᤢᤏᤧ᤹ ᤁᤢᤏᤠ᤺ᤳᤇᤧ ᤕᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤏᤠᤔᤧ᤺ᤴᤏᤣ. 4 ᤍᤠᤀᤢᤍᤖᤧ ᤔᤏᤠ ᤁᤧᤛᤢᤰᤐᤠᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤛᤠᤘᤗᤧᤴ ᤛᤧᤰᤂᤠᤀᤣ ᤕᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤄᤥᤛᤢ॥ 5 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤐᤥᤃᤧᤀᤠᤱ ᤜᤠᤖᤠᤘᤖᤠ ᤛᤠᤘᤗᤖᤧ ᤋᤢᤖᤠᤕᤰ ᤗᤣ᤺ᤳᤋᤢᤀᤠᤱ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤒᤠ ᤋᤧᤴᤏᤥ ᤐᤣ. ᤜᤧᤰᤁᤩᤠᤱ ᤛᤠᤘᤗ ᤏᤢ ᤂᤢᤏᤧ᤹ ᤁᤢᤎᤰᤋᤢᤶᤒᤠ ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖᤧᤴ ᤀᤡᤵᤛᤧᤛᤡᤀᤠᤱ ᤏᤧᤛ᤻ᤛᤧᤛᤡᤒᤠ ᤋᤧᤴᤏᤡᤴ ᤏᤡᤛᤢ॥ ᤛᤠᤘᤗᤧᤴ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ 6 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤜᤡᤳᤋᤡ ᤀᤜᤡᤔᤣᤗᤣᤰᤁᤧᤴ ᤏᤢ ᤕᤥᤀᤠᤒᤖᤧ ᤁᤢᤴᤛᤠ᤹ ᤛᤖᤢᤕᤠᤜᤖᤧ ᤁᤢᤛ᤻ᤛᤠ ᤀᤒᤡᤛᤤᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤐᤠ᤺ᤳᤋᤢ. “ᤛᤠᤘᤗ ᤏᤧᤒᤠ ᤋᤢᤖᤠᤕᤰᤁᤥ ᤀᤠᤱᤃᤠ᤹ᤏᤢ ᤜᤠᤳ ᤐᤣ᤺ᤰᤐᤣ᥅” ᤀᤒᤡᤛᤤᤖᤧ ᤔᤧᤳᤋᤢ. “ᤂᤧᤏᤧ᤹ᤏᤢ ᤀᤠᤱᤃᤠ᤹ ᤐᤣ᤺ᤰᤁᤠ॥” 7 ᤍᤠᤀᤢᤍᤧᤴ ᤏᤢ ᤀᤒᤡᤛᤤᤴ ᤛᤧᤴᤍᤡᤰ ᤋᤢᤖᤠᤕᤰᤁᤥ ᤗᤠᤛᤧᤛᤡ. ᤜᤧᤰᤁᤩᤠᤱ ᤛᤠᤘᤗᤖᤧ ᤋᤠᤰᤂᤥ᤺ᤱ ᤗᤧᤵᤔᤠᤱ ᤁᤢᤗᤠ᤺ᤰᤁᤡᤴ ᤂᤠᤶᤔᤥ ᤗᤣ᤺ᤳᤋᤢᤀᤠᤱ ᤔᤏᤠᤗᤢᤶᤔᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤒᤠ ᤏᤡᤛᤢ॥ ᤀᤒᤏᤣᤖᤧᤴ ᤏᤢ ᤁᤢᤎᤰᤛᤢᤒᤠᤜᤠ᤹ ᤛᤠᤘᤗᤖᤧ ᤁᤢᤄᤡᤖᤡ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧ॥ 8 ᤜᤧᤰᤁᤩᤠᤱ ᤀᤒᤡᤛᤤ᤺ᤸᤗᤧ ᤍᤠᤀᤢᤍᤧᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤏᤡᤱᤔᤡᤴ ᤀᤠᤀᤡᤴ ᤁᤧᤜᤢᤰᤁᤥ ᤜᤢᤰᤁᤧᤛᤢᤵᤋᤧᤀᤠᤱ ᤘᤠ᤹ᤖᤧᤇ॥ ᤗᤠ᤺ᤰᤁᤡᤸᤗᤧ ᤌᤡᤰᤗᤧᤱᤔᤠᤸᤗᤧ ᤂᤠᤶᤒᤠᤱᤅᤥ ᤂᤷᤍᤡ᤺ᤱ ᤋᤡ᤺ᤰᤂᤢᤖ ᤌᤢᤵᤔᤠ ᤀᤡᤱᤈᤠᤱ ᤐᤡᤖᤠᤱᤅᤧ᤹॥ ᤀᤠᤱᤃᤠ᤹ ᤏᤡᤗᤧᤱ ᤌᤢᤵᤔᤠᤀᤣ ᤔᤧᤒᤥᤱᤏᤧᤴ॥” 9 ᤁᤖ ᤍᤠᤀᤢᤍᤧᤸᤗᤧ ᤂᤧᤴ ᤔᤧᤳᤋᤢ. “ᤜᤠᤱᤅᤡᤴ ᤔᤧᤛᤧᤖᤧᤴᤏᤧ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤁᤢᤔᤏᤠ ᤛᤶᤎᤠᤱ ᤜᤢᤰ ᤁᤧᤕᤠᤰᤐᤠ ᤀᤠᤳᤋᤡᤴ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤐᤥᤱᤒᤣ᥅” 10 ᤍᤠᤀᤢᤍᤖᤧ ᤕᤠᤶᤔᤥᤀᤠᤱ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤐᤠ᤺ᤳᤋᤢᤱ᤹. ᤂᤧᤴᤏᤡᤴ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤛᤧᤖᤢ᤹॥ ᤀᤡᤃᤪ ᤁᤢᤎᤠ᤺ᤰ ᤐᤢᤴᤏᤠᤱ ᤛᤡ᤹᤺ ᤔᤣ᤺ᤴᤏᤧᤑᤃᤪ ᤌᤱᤅᤥ ᤐᤣ᤺ᤰᤁᤠᤱ ᤛᤡ᤹᤺॥ 11 ᤁᤖ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤔᤏᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤜᤢᤰᤑᤥ᤺ᤱᤔᤠ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤔᤧᤒᤡᤀᤠᤸᤗ॥ ᤀᤠᤸᤗ ᤂᤢᤏᤧ᤹ ᤁᤢᤍᤠᤰᤂᤥ᤺ᤱᤅᤡᤸᤗᤧ ᤁᤢᤒᤣᤛᤠᤱ ᤁᤧᤏᤧᤒᤠ ᤗᤠ᤺ᤰᤁᤡᤴ ᤏᤢ ᤁᤢᤈᤫᤠ᤺ᤳ ᤕᤠᤱᤔᤠ ᤑᤱᤏᤠ᤺ᤴ ᤋᤣ᤹ᤛᤢᤀᤠᤱ ᤐᤡᤳᤇᤡ॥” 12 ᤂᤧᤒᤩᤠᤱ ᤍᤠᤀᤢᤍᤖᤧ ᤛᤠᤘᤗᤖᤧ ᤁᤢᤍᤠᤰᤂᤥ᤺ᤱᤅᤡᤸᤗᤧ ᤁᤢᤒᤣᤛᤠᤱ ᤁᤧᤏᤧᤒᤠ ᤗᤠ᤺ᤰᤁᤡᤴ ᤏᤢ ᤆᤫᤠ᤺ᤳ ᤕᤠᤱᤔᤠ ᤑᤱᤏᤠ᤺ᤴ ᤋᤣ᤹ᤖᤢ. ᤜᤧᤰᤁᤩᤠᤱ ᤂᤧᤵᤔᤥᤏᤢ ᤐᤣᤛᤡ॥ ᤋᤢᤖᤠᤕᤰᤁᤥ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧ॥ ᤀᤠᤳᤋᤡᤸᤗᤧᤀᤠᤱ ᤂᤧᤱᤜᤠ᤹ ᤔᤧᤴᤏᤡᤛᤢᤛᤡᤴ. ᤀᤠᤳᤋᤡᤸᤗᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥᤛᤢᤴ. ᤀᤠᤳᤋᤡᤴᤏᤠᤱ ᤔᤧᤶᤒᤥᤃᤧᤴ॥ ᤕᤜᤘᤣ ᤍᤠᤱᤒᤠᤸᤗᤧ ᤐᤠᤱᤄᤢᤒᤠ ᤔᤡᤰ ᤕᤢᤔᤠᤀᤥ ᤂᤧᤱᤜᤠ᤹ ᤔᤢᤖᤢᤰ ᤂᤠᤖᤢᤰ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧ॥ 13 ᤂᤶᤒᤩᤠᤱ ᤍᤠᤀᤢᤍᤧᤴ ᤘᤣ᤹ ᤗᤧᤵᤔᤠᤱ ᤐᤣᤀᤠᤱ ᤔᤠ᤺ᤱᤄᤠᤒᤠ ᤁᤥ᤺ᤰᤔᤠᤸᤗᤧ ᤁᤢᤈᤱᤅᤥ ᤕᤧᤶᤛᤡᤱ॥ ᤂᤢᤴᤇᤡ᤹ᤗᤢᤶᤔᤥᤒᤠ ᤑᤧᤖᤧ᤺ᤴ ᤔᤠᤱᤓᤠ ᤔᤠ᤺ᤱᤄᤠ ᤏᤧᤛ᤻ᤛᤧ॥ 14 ᤍᤠᤀᤢᤍᤖᤧ ᤌᤰᤛᤢᤒᤠᤜᤠ᤹ ᤏᤢ ᤏᤣᤖᤖᤧ ᤁᤢᤛ᤻ᤛᤠ ᤀᤒᤏᤣᤖᤧᤴ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤔᤧᤳᤋᤢᤛᤡ. “ᤀᤒᤏᤣᤖᤣ. ᤁᤧᤄᤧᤵᤛᤢᤒᤡ᥅” ᤀᤒᤏᤣᤖᤖᤧ ᤔᤧᤳᤋᤢ. “ᤜᤠᤱᤅᤡᤴ ᤁᤧᤓᤧ᤺ᤰᤐᤠ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅” 15 ᤍᤠᤀᤢᤍᤖᤧ ᤀᤒᤏᤣᤖᤧᤴ ᤔᤧᤳᤋᤢ. “ᤂᤧᤏᤧ᤹ᤃ ᤕᤧᤶᤒᤡᤳᤇᤠ ᤔᤏᤠᤏᤧ ᤔᤣ᤺ᤶᤒᤡ᥅ ᤀᤡᤛᤪᤠᤀᤡᤗᤀᤥ ᤂᤧᤏᤧ᤹ ᤜᤧᤰᤋᤱᤒᤠ ᤁᤢᤓᤠ ᤘᤣ᤹ᤀᤠᤱ ᤔᤧᤘᤠ᤹ᤒᤡ᥅ ᤂᤧᤏᤧ᤹ ᤌᤣᤀᤠᤱ ᤁᤧᤜᤠᤱᤅᤡᤴ ᤏᤢᤖᤡᤰ ᤁᤶᤒᤪᤠᤱ ᤁᤧᤶᤔᤧᤳᤋᤢᤶᤒᤠᤒᤣ᥅ ᤂᤧᤏᤧ᤹ ᤁᤧᤴᤍᤠᤱᤒᤠ ᤜᤠᤱᤅᤡᤴ ᤛᤧᤳᤇᤧ ᤗᤳᤇᤠ ᤔᤏᤠ ᤋᤩᤧᤀᤠᤱ ᤘᤕᤧ॥ 16 ᤂᤧᤏᤧ᤹ ᤁᤴ ᤏᤢᤒᤠ ᤁᤧᤴᤈᤥᤃᤢᤴ॥ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤐᤠ᤺ᤳᤋᤢᤱ᤹. ᤂᤧᤏᤧ᤹ᤃ ᤛᤧᤵᤔᤠᤀᤣ ᤁᤧᤒᤥᤱᤒᤠ ᤁᤧᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤁᤢᤔᤏᤠ. ᤂᤧᤏᤡ᤹ ᤍᤠᤱᤒᤠᤴ ᤁᤶᤒᤪᤠᤱ ᤁᤧᤶᤔᤧᤳᤋᤢᤶᤔᤡᤴ॥ ᤀᤥᤔᤧᤳᤋᤧᤶᤔᤧ᤹᥄ ᤂᤢᤏᤧ᤹ ᤁᤢᤍᤠᤰᤂᤥ᤺ᤱᤅᤥ ᤁᤧᤏᤧᤒᤠ ᤁᤢᤗᤠ᤺ᤰᤁᤡᤴ ᤏᤢ ᤁᤢᤈᤫᤠ᤺ᤳ ᤕᤠᤱᤔᤠ ᤑᤱᤏᤠ᤺ᤴ ᤀᤠᤳᤋᤠᤴ ᤘᤠ᤹᥅” 17 ᤛᤠᤘᤗᤖᤧ ᤍᤠᤀᤢᤍᤖᤧ ᤁᤢᤀᤡᤰᤗᤠᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤐᤠ᤺ᤳᤋᤢ. “ᤂᤧᤏᤧ᤹ᤀᤣᤒᤡ᥅ ᤀᤠᤛ᤻ᤛᤠ ᤍᤠᤀᤢᤍᤣ᥅” ᤍᤠᤀᤢᤍᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ᤀᤣᤖᤥ. ᤀᤠᤍᤠᤱᤒᤠ ᤜᤠᤱᤅᤣ॥” 18 ᤜᤧᤰᤁᤩᤠᤱ ᤔᤧᤳᤋᤢ. “ᤀᤠᤴᤍᤠᤱᤒᤣ. ᤌᤣᤀᤠᤱ ᤁᤶᤓᤩᤠᤖᤡᤰ ᤛᤠ᤹ᤖᤡᤰ ᤁᤧᤛᤧᤘᤠᤖᤥᤒᤠᤴ ᤁᤧᤏᤠ᤺ᤳᤋᤢᤒᤠᤒᤣ᥅ ᤀᤠᤱᤃᤠ᤹ ᤌᤣ ᤆᤥᤃᤢᤱᤅᤠᤱ ᤘᤠ᤹ᤒᤣ᥅ ᤀᤠᤱᤃᤠ᤹ ᤀᤠᤜᤢᤰᤗᤠᤶ ᤌᤧᤔᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤐᤥ᤺ᤰᤂᤧᤀᤠᤱ ᤘᤠ᤹ᤒᤣ᥅ 19 ᤀᤠᤍᤠᤱᤒᤠ ᤜᤠᤱᤅᤣ. ᤀᤠᤱᤃᤠ᤹ ᤌᤣ ᤐᤠ᤺ᤳᤋᤢᤱ ᤏᤢᤖᤡᤰ ᤂᤧᤵᤛᤧ᤹ᤀᤥ॥ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤧᤏᤧ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤁᤧᤓᤥ᤺ᤰᤂᤧᤒᤠᤏᤧᤑᤃᤪ ᤁᤴ ᤛᤡᤍᤢᤱᤈᤓᤠᤴ ᤂᤢᤏᤧ᤹ ᤋᤠ᤺ᤰᤋᤢᤖ॥ ᤁᤖ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠᤏᤧᤓᤃᤪ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤧᤱᤜᤠ᤹ ᤛᤶᤎᤠᤱ ᤔᤠᤱᤍᤣ ᤛᤠᤰᤔᤢᤖᤠ ᤌᤠᤖᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤘᤣ᤹ ᤔᤠᤱᤜᤠ᤹ ᤛᤧᤘᤠ ᤔᤧᤳᤋᤢᤛᤡᤖ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤰᤗᤠᤶ ᤀᤠᤱᤃᤠ᤹ ᤔᤧᤗ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ 20 ᤂᤧᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠ ᤜᤠᤱᤅᤣ. ᤕᤜᤘᤣ ᤍᤠᤱᤒᤠᤗᤠᤶ ᤔᤠ᤺ᤱᤄᤠ ᤐᤥᤱᤅᤠᤀᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤛᤡᤔᤠ ᤔᤧᤓᤠ᤺ᤰᤋᤠᤱᤅᤡᤴᤏᤧ᤹॥ ᤁᤥ᤺ᤰᤔᤠᤀᤥᤒᤠ ᤛᤡᤱᤗᤠᤜᤠ᤹ᤀᤥ ᤂᤧᤖᤧᤁᤘᤠ ᤐᤢ᤺ᤴ ᤏᤠ᤺ᤵᤔᤏᤠᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤛᤡᤵᤋᤰᤐᤠ ᤜᤧᤰᤋᤱᤒᤠ ᤔᤏᤠᤴ ᤑᤢ᤺ᤳᤇᤧ ᤌᤣᤀᤠᤱ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤁᤧᤗ᤺ᤴᤍᤧᤀᤠᤱ ᤁᤧᤘᤠ᤹ᤒᤠᤒᤣ᥅” 21 ᤂᤧᤒᤩᤠᤱ ᤛᤠᤘᤗᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱ॥ ᤍᤠᤀᤢᤍ ᤀᤠᤛ᤻ᤛᤠᤀᤣ ᤏᤢ᤺ᤰᤂᤧᤀᤠᤱ ᤋᤩᤧ᤹॥ ᤀᤠᤀᤡᤴᤒᤠ ᤕᤧᤴᤏᤥ ᤂᤧᤏᤧ᤹ ᤀᤠᤱᤃᤠ᤹ ᤛᤠ᤺ᤱᤃᤢᤃᤧᤴ ᤀᤠᤛᤰᤔᤠᤴ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ. ᤀᤠᤸᤗ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤂᤧᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤔᤧᤈᤥᤰᤁᤠᤴ॥ ᤀᤠᤱᤃᤠ᤹ᤃ ᤛᤧᤰᤂᤠᤛᤠᤱ ᤀᤍᤱ ᤐᤥ᤺ᤰᤂᤠᤱ. ᤀᤠᤱᤃᤠ᤹ ᤆᤠ᤹ᤖᤡᤰ ᤕᤶᤒᤠ ᤕᤠ᤺ᤶᤒᤰ ᤑᤣ᤺ᤴᤍᤢᤱ॥” 22 ᤍᤠᤀᤢᤍᤖᤧ ᤔᤧᤳᤋᤢ. “ᤜᤠᤱᤅᤡᤸᤗᤧ ᤁᤢᤗᤠ᤺ᤰᤁᤡᤴ ᤁᤵᤔᤥ ᤏᤧ᤹᤺॥ ᤀᤠᤍᤠᤱᤒᤠᤖᤧ ᤗᤳᤇᤠ ᤁᤧᤔᤏᤠᤎᤡᤰ ᤁᤢᤗᤠᤛᤧ ᤐᤠᤱᤄᤧ᤹॥ 23 ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥ ᤏᤢ ᤏᤛᤠ᤺ᤴᤛᤠᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤠᤃᤡ ᤌᤢᤶᤄᤥ ᤐᤡᤖᤢᤛᤡ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤀᤡᤴ ᤀᤠᤱᤃᤠ᤹ ᤀᤠᤜᤢᤰᤁᤥ ᤀᤠᤴᤍᤠᤱᤒᤧᤴ ᤜᤢᤰᤛᤢᤵᤋᤠᤱᤅᤠᤱ ᤘᤕᤧ. ᤁᤖ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤁᤢᤔᤏᤠ᤺ᤸᤗᤧ ᤁᤢᤛᤶᤎᤠᤱ ᤀᤠᤱᤃᤠ᤹ ᤀᤠᤜᤢᤰ ᤑᤥᤱᤔᤠ ᤔᤧᤍᤧᤴᤍᤠᤱᤅᤡᤴ॥ 24 ᤀᤥᤔᤧᤳᤋᤧ᤹᥄ ᤀᤠᤀᤡᤴ ᤁᤧᤛᤰᤔᤠᤴ ᤀᤡᤔᤧᤸᤗᤢᤱᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱ. ᤜᤧᤰᤁᤣᤗ᤹ᤖᤡᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤱᤃᤠ᤹ ᤀᤠᤛᤰᤔᤠᤴ ᤀᤡᤔᤧᤸᤗᤢᤱᤒᤠ ᤐᤥᤱᤗ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤁᤧᤖᤧᤰ ᤐᤖᤡᤰᤐᤠ ᤋᤢᤰᤂᤣ ᤗᤠᤰᤂᤣᤜᤠ᤹ᤀᤥ ᤛᤧ᤺ᤵᤐᤠᤖᤖᤥ॥” 25 ᤜᤧᤰᤁᤩᤠᤱ ᤛᤠᤘᤗᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤛ᤻ᤛᤠ ᤍᤠᤀᤢᤍᤣ. ᤂᤧᤏᤧ᤹ᤀᤣ ᤔᤢ᤹ᤀᤡᤛᤠᤒᤠ ᤁᤧᤒᤥᤱᤗᤖᤥ॥ ᤂᤧᤏᤧ᤹ ᤕᤶᤒᤕᤶᤒᤠ ᤕᤠ᤺ᤶᤒᤰ ᤁᤧᤈᤥᤃᤢ᤹. ᤂᤧᤶᤒᤩᤠᤱ ᤂᤧᤏᤧ᤹ ᤌᤱ ᤁᤧᤏᤠ᤺ᤶᤒᤠ ᤁᤧᤒᤥᤱ॥” ᤜᤧᤰᤁᤩᤠᤱ ᤍᤠᤀᤢᤍ ᤀᤠᤒᤠᤅᤣ ᤁᤢᤗᤠᤶ ᤏᤠ᤺ᤳᤋᤢᤀᤠᤱ ᤌᤠᤛᤡᤱ. ᤂᤧᤒᤩᤠᤱ ᤛᤠᤘᤗᤧᤴ ᤁᤢᤜᤠᤱᤜᤡᤶᤔᤥ ᤏᤢ᤺ᤰᤂᤧ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.