᥇ ᤛᤠᤔᤢᤀᤧᤗ 25 - LIFOTNTᤛᤠᤔᤢᤀᤧᤗᤧᤴ ᤔᤠᤛᤡᤱ 1 ᤛᤠᤔᤢᤀᤧᤗᤧᤴ ᤔᤠᤛᤡᤱ॥ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤔᤧᤈᤢᤵᤛᤧᤀᤠᤱ ᤂᤢᤏᤧ᤹ ᤁᤢᤗᤠᤃᤡ ᤔᤧᤖᤡᤱ ᤔᤧᤎᤰᤋᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤖᤠᤔᤠᤒᤠ ᤁᤢᤜᤡᤶᤔᤥ ᤔᤧᤍᤣ᤹ᤖᤢᤀᤠᤱ ᤔᤧᤗᤢᤵᤋᤢ॥ ᤜᤴᤏᤠᤱ ᤍᤠᤀᤢᤍᤧᤴ ᤐᤠᤖᤠᤏᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴ ᤕᤥ ᤌᤩᤧ॥ ᤍᤠᤀᤢᤍᤧᤴ ᤏᤢ ᤀᤒᤡᤃᤣᤗ 2 ᤔᤠᤀᤥᤏ ᤐᤠᤱᤈᤢᤶᤔᤥ ᤗᤳᤇᤠ ᤔᤏᤠ ᤘᤕᤧ. ᤁᤷᤔᤣᤗ ᤐᤠᤱᤈᤢᤶᤔᤥ ᤂᤢᤏᤧ᤹ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤳᤋᤢ॥ ᤂᤧᤴ ᤔᤠᤱᤓᤠ ᤁᤧᤃᤵᤐᤠ ᤔᤏᤠ ᤘᤕᤧ. ᤜᤧᤴᤇᤡᤱ ᤛᤢᤶᤛᤡ ᤔᤧᤸᤗᤢᤰ ᤏᤢ ᤜᤧᤴᤇᤡᤱᤎᤡᤰ ᤔᤧ᤺ᤴᤍᤠᤰ ᤁᤳᤋᤢᤛᤡ॥ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤁᤠᤖᤔᤣᤗᤀᤥ ᤁᤢᤔᤧᤸᤗᤢᤰ ᤔᤢᤖᤡᤰ ᤏ᤺ᤱᤏᤢ ᤕᤠᤃᤧ॥ 3 ᤂᤢᤏᤧ᤹ ᤁᤢᤔᤡᤱᤃ ᤏᤠᤒᤠᤗ ᤘᤕᤧ. ᤜᤧᤰᤁᤩᤠᤱ ᤁᤢᤔᤣ᤺ᤳᤋᤡᤸᤗᤧ ᤁᤢᤔᤡᤱ ᤀᤒᤡᤃᤣᤗ ᤘᤕᤧ॥ ᤀᤒᤡᤃᤣᤗᤧᤴ ᤛᤠ᤹ᤖᤡᤰ ᤏᤢᤔᤠ ᤏᤢ ᤆᤠ᤺ᤵᤔᤠ ᤘᤕᤧ. ᤁᤖ ᤂᤧᤴ ᤔᤏᤠᤴ ᤛᤠ᤹ᤖᤡᤰ ᤁᤢᤛᤡᤰ ᤁᤧᤒᤥ᤺ᤰᤐᤠ ᤏᤢ ᤔᤏᤠ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤔᤠ ᤘᤕᤧ. ᤂᤢᤏᤧ᤹ᤃ ᤁᤠᤗᤣᤒᤖᤧ ᤁᤢᤜᤡᤶᤛᤕᤱᤒᤠ ᤔᤏᤠ ᤘᤕᤧ॥ 4 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤘᤕᤧᤸᤗᤧ ᤏᤠᤒᤠᤗᤧᤴ ᤁᤢᤔᤧᤸᤗᤢᤰ ᤔᤢᤖᤡᤰ ᤏ᤺ᤱᤏᤢ ᤕᤠᤰ ᤁᤧᤗ᤹ᤒᤠ ᤐᤠᤴ ᤍᤠᤀᤢᤍᤖᤧ ᤂᤧᤵᤛᤢ॥ 5 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤌᤡᤒᤥᤱ ᤌᤠᤱᤒᤧᤴ ᤁᤢᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤐᤠᤱᤄᤢᤛᤡ. “ᤁᤠᤷᤔᤣᤗ ᤐᤠᤱᤈᤢᤶ ᤐᤣᤃᤧᤶᤔᤧ᤹ᤀᤠᤱ ᤏᤠᤒᤠᤗᤧᤴ ᤀᤠᤱᤃᤠ᤹ ᤀᤠᤛᤧᤘᤠᤔᤢ ᤔᤧᤳᤋᤠᤶᤔᤧ᤹॥ 6 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤶᤔᤧ᤹. ‘ᤂᤧᤏᤧ᤹ ᤏᤢ ᤁᤧᤜᤡᤶᤛᤕᤱᤜᤠ᤹ ᤜᤧᤰᤁᤩᤠᤱ ᤁᤧᤜᤡᤶᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤁᤧᤏᤢᤖᤡ ᤁᤧᤍᤠᤛᤡᤖ॥ 7 ᤂᤧᤏᤧ᤹ ᤁᤧᤔᤧᤸᤗᤢᤰ ᤔᤢᤖᤡᤰ ᤏ᤺ᤱᤏᤢ ᤁᤧᤕᤠᤰ ᤁᤧᤗ᤹ᤒᤠᤴ ᤂᤢᤏᤧ᤹ ᤂᤧᤵᤛᤢ॥ ᤂᤧᤏᤧ᤹ ᤁᤧᤔᤧᤸᤗᤢᤰ ᤁᤧᤃᤶᤒᤠᤜᤠ᤹ ᤀᤠᤏᤡᤃᤧᤏᤢ ᤔᤧᤘᤕᤧᤸᤗᤧ ᤀᤠᤏᤡᤃᤣ ᤂᤧᤱᤜᤠ᤹ ᤌᤣᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤶᤛᤡᤶᤒᤧᤴ॥ ᤂᤧᤱᤜᤠ᤹ ᤁᤠᤖᤔᤣᤗᤀᤥ ᤔᤧᤘᤕᤧᤸᤗᤧ ᤂᤢᤴᤇᤡ᤹ ᤌᤣᤀᤠᤱ ᤔᤧᤶᤔᤠᤀᤣ ᤘᤕᤧ॥ 8 ᤂᤧᤏᤧ᤹ ᤁᤧᤔᤏᤠᤜᤠ᤹ ᤛᤧ᤺ᤴᤗᤠᤵᤋᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤐᤠ᤺ᤴᤜᤠ᤹ ᤁᤧᤶᤔᤧᤳ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤌᤠᤱᤒᤧᤴ ᤀᤠᤔᤏᤠᤜᤠ᤹ ᤗᤠᤱ ᤋᤠ᤺ᤰᤋᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤋᤱᤏᤠᤶ ᤋᤥᤔᤠ ᤕᤧᤶᤔᤥ ᤀᤠᤍᤧᤀᤠᤱ ᤀᤠᤘᤠ᤹॥ ᤂᤧᤏᤧ᤹ ᤌᤣ ᤁᤧᤃᤳᤋᤢ ᤜᤠᤒᤠ ᤂᤧᤴᤏᤣ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ ᤏᤢ ᤁᤧᤛ᤻ᤛᤠ ᤍᤠᤀᤢᤍᤧᤴ ᤐᤡᤖᤧ᤹ᤀᤥ॥’” 9 ᤍᤠᤀᤢᤍᤖᤧ ᤌᤠᤱᤒᤧᤴ ᤁᤢᤔᤏᤠᤜᤠ᤹ ᤔᤧᤃᤧᤖᤧ ᤔᤧᤍᤧ. ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤍᤠᤀᤢᤍᤖᤧ ᤁᤢᤔᤡᤱᤅᤥ ᤏᤠᤒᤠᤗᤧᤴ ᤔᤧᤔᤧᤳᤋᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤜᤠᤱᤄᤢ॥ 10 ᤜᤧᤰᤁᤩᤠᤱ ᤏᤠᤒᤠᤗᤖᤧ ᤍᤠᤀᤢᤍᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤍᤠᤀᤢᤍᤧᤴ ᤜᤠ᤺ᤳ᥅ ᤁᤴ ᤕᤡᤛᤤᤖᤧ ᤁᤢᤛ᤻ᤛᤠ ᤔᤧᤵᤔᤏᤠᤒᤧᤴ ᤜᤠ᤺ᤳ᥅ ᤁᤴ ᤕᤧᤶᤔᤥ ᤕᤖᤡᤰ ᤛᤧᤘᤠᤖᤥᤒᤠᤜᤠ᤹ ᤂᤢᤴᤇᤡ᤹ ᤍᤠᤱᤒᤠᤗᤠᤶ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ ᤔᤧᤘᤠ᤹॥ 11 ᤀᤠᤱᤃᤠ᤹ ᤀᤠᤈᤠᤔᤠ ᤀᤠᤎᤢᤱᤔᤠ ᤏᤢ ᤀᤠᤱᤃᤠ᤹ ᤀᤠᤔᤧᤸᤗᤢᤰ ᤔᤢᤖᤡᤰ ᤁᤧᤏ᤺ᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤛᤠᤴ ᤀᤠᤱᤃᤠ᤹ ᤁᤢᤛᤡᤱᤅᤣ ᤔᤧᤏᤡ᤺ᤳᤋᤠᤛᤡᤅᤡᤴᤒᤠ ᤔᤏᤠᤜᤠ᤹ ᤌᤣᤀᤠᤱ ᤐᤡᤖᤢᤱᤛᤡᤱᤒᤠᤒᤣ᥅” 12 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤔᤧᤏᤢ᤺ᤰᤂᤧ ᤔᤧᤒᤣ. ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤐᤠ᤺ᤴᤏᤡᤴ ᤍᤠᤀᤢᤍᤧᤴ ᤔᤧᤈᤧᤰᤋᤢ॥ 13 ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤧᤖᤧᤰᤗᤧ ᤀᤠᤒᤠᤅᤣ ᤂᤡᤏᤡ᤹ ᤋᤠᤓᤣᤴ ᤜᤣ᤹ᤀᤠᤛᤡᤶᤔᤧ᤹॥” ᤂᤧᤱᤜᤠ᤹ ᤁᤧᤖᤧᤰᤗᤧ ᤀᤠᤒᤠᤅᤣ ᤂᤢᤴᤇᤡ᤹ ᤋᤠᤓᤣᤴ ᤔᤧᤜᤣ᤹ᤛᤡᤱ. ᤜᤧᤰᤁᤩᤠᤱ ᤍᤠᤀᤢᤍᤖᤧᤀᤠᤱ ᤀᤠᤒᤠᤅᤣ ᤁᤢᤍᤠᤓᤣᤴ ᤜᤣ᤹ᤛᤡᤱ॥ ᤜᤧᤰᤁᤩᤠᤱ ᤜᤵᤔᤧᤴ ᤁᤡᤵ ᤗᤡᤛᤡ ᤁᤢᤔᤏᤠᤜᤠ᤹ ᤍᤠᤀᤢᤍᤖᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤔᤧᤎᤠᤛᤡᤱ॥ ᤂᤧᤒᤩᤠᤱ ᤁᤡᤵ ᤏᤧᤳᤇᤡ ᤁᤢᤔᤏᤠᤜᤠ᤹ ᤆᤡᤃᤰᤘᤠ ᤁᤥᤛᤧ ᤔᤧᤕᤠ᤺ᤰᤋᤧ॥ 14 ᤁᤖ ᤗᤳᤇᤠ ᤌᤠᤱᤒᤧᤴ ᤛᤧᤘᤠᤖᤥᤒᤠᤎᤡᤰᤗᤧ ᤏᤠᤒᤠᤗᤖᤧ ᤁᤢᤔᤣᤳ ᤀᤒᤡᤃᤣᤗᤧᤴ ᤔᤧᤳᤋᤢ. “ᤍᤠᤀᤢᤍᤖᤧ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤗᤠᤶ ᤀᤠᤏᤡ᤹ ᤍᤠᤱᤒᤧᤴ ᤏ᤺ᤶᤏ᤺ᤶᤒᤠ ᤛᤧᤘᤠ ᤋᤥ᤺ᤴᤇᤧ ᤁᤢᤀᤡᤱᤄᤱ ᤁᤧᤛᤠᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤘᤕᤧ. ᤁᤖ ᤂᤢᤏᤧ᤹ᤃ ᤂᤧᤴ ᤔᤏᤠᤜᤠ᤹ ᤋᤠᤵᤑᤧ᤺ᤶᤒᤠ ᤐᤠᤴ ᤔᤧᤳᤋᤢᤛᤡ॥ 15 ᤁᤖ ᤂᤧᤴ ᤔᤏᤠᤜᤠ᤹ᤖᤧᤃ ᤀᤠᤏᤡᤃᤣ ᤛᤠ᤹ᤖᤡᤰ ᤏᤢᤖᤡᤰ ᤔᤧᤔᤧᤳᤋᤡᤃᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤀᤠᤏᤡᤃᤣ ᤀᤠᤵᤑᤠᤸᤗᤧᤀᤠᤱ ᤋᤢᤰᤂᤣ ᤔᤧᤴᤈᤠ᤺ᤳᤋᤡᤃᤧᤴ. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤱᤜᤠ᤹ᤏᤢ ᤆᤠᤖᤠᤶᤍᤧᤴᤜᤠ᤹ᤀᤥ ᤘᤕᤡᤃᤧᤸᤗᤧ ᤌᤣᤀᤠᤱ ᤔᤧᤔᤠᤛᤢᤶᤒᤧᤴ॥ 16 ᤀᤠᤏᤡᤃᤣ ᤔᤧᤸᤗᤢᤰ ᤆᤠᤖᤠᤶᤛᤧ ᤐᤣ᤺ᤰᤔᤏᤠ᤺ᤸᤗᤧ ᤂᤧᤱᤜᤠ᤹ᤃ ᤀᤠᤏᤡᤃᤣ ᤁᤧᤖᤧᤰ ᤐᤡᤛᤠᤱ ᤗᤢᤱᤎᤠᤰ ᤜᤧᤰᤁᤣ ᤁᤶᤒᤪᤠᤱ ᤁᤧᤈᤥ᤺ᤰᤐᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ॥ 17 ᤀᤠᤸᤗ ᤂᤧᤏᤧ᤹ ᤌᤣ ᤆᤥ᤺ᤰᤔᤠᤒᤥᤱ ᤏᤢᤖᤡᤰᤁᤠᤱ ᤀᤡ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤍᤠᤱᤒᤧᤴ ᤏᤢ ᤁᤢᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤋᤢᤰᤂᤣ ᤗᤠᤰᤂᤣ ᤋᤠᤖ ᤐᤳ॥ ᤂᤢᤏᤧ᤹ᤃ ᤛᤠ᤹ᤖᤡᤰ ᤋᤠᤰᤁᤧᤓᤧ᤹ᤒᤠ ᤆᤥᤰ. ᤂᤢᤏᤧ᤹ᤏᤢ ᤜᤠ᤺ᤳᤋᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤏᤧᤴ॥” 18 ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤀᤒᤡᤃᤣᤗᤖᤧ ᤜᤠᤖᤠᤘᤖᤠ ᤁᤡᤵ ᤏᤧᤳᤇᤡ ᤁᤢᤗᤧᤵ ᤂᤖᤧ᤺ᤱ. ᤛᤧᤜᤥᤒᤠ ᤛᤢᤰᤘᤠ ᤏᤧᤳᤇᤡ ᤆᤧᤸᤗᤧᤰᤛᤣ᤹ ᤌᤡ. ᤜᤧᤰᤁᤩᤠᤱ ᤔᤧᤛᤧᤖᤢᤛᤡᤀᤠᤱ ᤔᤧᤄᤰᤋᤢ ᤔᤧᤎᤥ᤺ᤰᤋᤢᤀᤠᤱ ᤕᤠᤖᤡᤵ ᤔᤧᤈᤥᤃᤢᤒᤠ ᤅᤠᤛᤡ ᤔᤧᤸᤗᤢᤰᤛᤠ. ᤑᤢᤗᤰ ᤕᤧᤳᤇᤡ ᤛᤠᤶᤒᤣ᤺ᤳ. ᤏᤠᤶᤔᤧᤓᤧᤳᤋᤢᤀᤠᤱ ᤔᤧᤄᤧᤰᤛᤢᤒᤠ ᤁᤡᤵᤌᤡᤰ ᤆᤧᤸᤗᤧᤰᤛᤣ᤹ ᤁᤢᤒᤈᤠ. ᤜᤧᤰᤁᤩᤠᤱ ᤏᤠᤶᤔᤧᤓᤧᤳᤋᤢᤀᤠᤱ ᤔᤧᤄᤧᤰᤛᤢᤒᤠ ᤁᤡᤵ ᤏᤧᤳᤇᤡ ᤁᤢᤃᤠᤰᤔᤠ ᤐ᤺ᤳᤇᤣᤛᤣ᤹ ᤀᤍᤱᤜᤠ᤹ ᤁᤢ᤺ᤳᤋᤢᤛᤡ॥ 19 ᤜᤧᤰᤁᤩᤠᤱ ᤛᤧᤘᤠᤖᤥᤒᤠᤜᤠ᤹ ᤂᤢᤏᤧ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤍᤃᤡ ᤌᤠᤛᤡᤱᤅᤠᤶᤔᤧ᤹. ᤀᤠᤱᤃᤠ᤹ ᤀᤣᤃᤠᤱ ᤀᤣᤃᤠᤱ ᤑᤧᤴᤏᤠ॥” ᤁᤖ ᤁᤢᤕᤧᤶᤒᤠ ᤏᤠᤒᤠᤗᤧᤴ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤔᤧᤳᤋᤢᤴ॥ 20 ᤀᤒᤡᤃᤣᤗᤖᤧ ᤀᤍᤱᤅᤡᤴ ᤕᤢᤰᤋᤢ ᤜᤧᤰᤁᤩᤠᤱ ᤁᤥ᤺ᤰᤔᤠᤀᤥᤒᤠ ᤀᤡᤗᤠᤶᤔᤥ ᤐᤣᤖ ᤐᤳᤇᤧᤸᤗᤧ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤕᤥ ᤔᤧᤎᤩᤧᤖ ᤔᤧᤒᤳᤇᤧᤒᤠ ᤏᤡᤛᤢᤛᤡ॥ 21 ᤍᤠᤀᤢᤍᤖᤧ ᤂᤠᤖᤰ ᤐᤠ᤺ᤳᤋᤢᤀᤠᤱ ᤘᤕᤧ. “ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤌᤣᤀᤠᤱ ᤔᤧᤶᤔᤠᤀᤣ ᤛᤠ᤹ᤖᤡᤰ ᤏᤢᤖᤡᤰ ᤀᤠᤏᤡᤃᤣ ᤁᤸᤗᤧ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤛᤧ᤺ᤵᤔᤏᤠᤒᤧᤱᤃ ᤜᤏᤧᤖᤰ ᤐᤥ᤺ᤰᤂᤧᤖᤧᤇ॥ ᤂᤧᤸᤗᤧᤃ ᤏᤢᤒᤠᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ᤏᤢ ᤋᤠᤵᤑᤧ᤺ᤶᤒᤠ ᤆᤥᤃᤢ॥ 22 ᤋᤠ᤺ᤴᤍᤡᤰ ᤋᤠᤏᤠᤶ ᤌᤠᤖᤡᤰᤗᤧ ᤂᤧᤴᤏᤢ ᤁᤧᤘᤠ᤹ᤒᤠ ᤕᤧᤶᤒᤡᤳᤇᤠᤜᤠ᤹ᤀᤥ ᤗᤳᤇᤠᤖᤰ ᤁᤢᤔᤏᤠ ᤁᤢᤜᤡᤱᤘᤧᤳ ᤕᤠ᤺ᤰᤋᤧᤏᤧᤓᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ᤀᤠᤱ ᤛᤧᤳᤋᤠ᤹ᤖ॥” 23 ᤀᤒᤡᤃᤣᤗᤖᤧ ᤍᤠᤀᤢᤍᤧᤴ ᤏᤡᤛᤢᤸᤗᤧ ᤂᤢᤏᤧ᤹ ᤜᤠᤖᤠᤜᤠᤖᤠ ᤁᤢᤀᤍᤱ ᤛᤶᤎᤠᤱᤗᤠᤶ ᤌᤠᤛᤡᤱ. ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤍᤃᤠᤱ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ 24 ᤂᤧᤸᤗᤧ ᤁᤢᤗᤠᤱᤅᤥ ᤛᤧᤘᤠ ᤔᤧᤳᤋᤢᤖ ᤐᤠ᤺ᤳᤋᤢ. “ᤀᤠᤴᤍᤠᤱᤒᤣ. ᤀᤠᤱᤃᤠ᤹ᤀᤥᤀᤣ ᤀᤠᤵᤋᤡᤰ ᤌᤠᤖ॥ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤔᤧᤴ ᤐᤠ᤺ᤵᤔᤠ ᤀᤡᤱᤈᤠᤱ ᤐᤡᤖᤠᤱᤅᤧ᤹ᤀᤥ॥ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹ᤀᤥ॥ 25 ᤀᤠᤍᤠᤱᤒᤠᤖᤧ ᤂᤧᤴ ᤏᤠᤒᤠᤗᤖᤧ ᤁᤢᤒᤠ᤺ᤴᤏᤥ ᤏᤡᤱᤘᤠ᤹ ᤔᤧᤒᤡᤖᤧᤴᤏᤧ᤹ᤀᤥ॥ ᤂᤧᤸᤗᤧ ᤁᤢᤔᤡᤱ ᤏᤠᤒᤠᤗᤖᤥ॥ ᤂᤧᤴ ᤜᤠᤒᤠ ᤜᤧᤰᤋᤱᤒᤠ ᤆᤥᤰ॥ ᤂᤧᤸᤗᤧ ᤁᤢᤔᤡᤱᤅᤣ ‘ᤛᤎ᤺ᤰᤐᤠ ᤀᤍᤱᤗᤥ’ ᤂᤧᤸᤗᤧ ᤁᤢᤕᤧᤵᤗᤧᤰᤁᤡᤴᤏᤠᤱ ᤀᤍᤱ ᤜᤧᤰᤋᤱᤒᤠᤀᤣ ᤆᤥᤰ॥ ᤀᤠᤍᤠᤱᤒᤠᤖᤧ ᤁᤧᤒᤠᤱᤄᤢᤛᤡᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤔᤧᤏᤡᤛᤢᤱᤛᤡᤱᤅᤡᤴ ᤀᤠᤍᤠᤱᤒᤣ॥ 26 “ᤀᤠᤸᤗ ᤔᤠᤰᤂᤡ᤹ᤛᤡᤘᤠ ᤛᤧᤔᤠ ᤏᤢ ᤁᤢᤗᤧᤰᤘᤠ ᤜᤢᤱᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤍᤠᤱᤒᤠ ᤁᤧᤛᤠᤰᤗᤖᤥ॥ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤜᤧᤰᤁᤩᤠᤱ ᤀᤠᤍᤠᤱᤒᤠᤖᤧ ᤁᤧᤜᤡᤱᤔᤴᤏᤥ ᤔᤠᤱᤜᤧᤰᤛᤡᤅᤠᤀᤠᤱ ᤐᤠ᤺ᤳᤋᤢᤱ᤹. ᤀᤠᤍᤠᤱᤒᤠᤖᤧ ᤁᤧᤏᤡᤱᤔᤡᤜᤠ᤹ ᤏᤢ ᤀᤠᤍᤠᤱᤒᤠᤴ ᤔᤧᤱᤔᤠ ᤁᤧᤃᤥ᤺ᤵᤐᤠ ᤁᤧᤖᤧᤰᤗᤧ ᤏᤠᤒᤠᤗᤖᤧ ᤋᤢᤔᤢᤒᤠ ᤜᤧᤰᤋᤱᤒᤠᤀᤣ ᤐᤥᤱᤗ॥ 27 ᤀᤠᤸᤗ ᤀᤠᤱᤃᤠ᤹ ᤁᤧᤛᤧᤘᤠᤖᤥᤔᤠᤸᤗᤧ ᤋᤠᤖᤢᤱᤒᤠ ᤛᤢᤱᤅᤡᤴ ᤁᤵᤔᤥ ᤘᤠ᤹॥ ᤀᤠᤍᤠᤱᤒᤠᤏᤢ ᤁᤧᤘᤠ᤹ᤒᤠ ᤌᤠᤱᤒᤧᤴᤜᤠ᤹ ᤐᤡᤖᤧᤛᤧ᤹ᤀᤥ॥ 28 “ᤀᤠᤴᤍᤠᤱᤒᤣ. ᤂᤧᤏᤧ᤹ ᤁᤧᤛᤧᤘᤠᤖᤥᤔᤠᤸᤗᤧ ᤑᤣ᤺ᤴᤍᤢᤒᤠ ᤐᤠ᤺ᤴᤏᤡᤴ ᤗᤧᤵᤔᤡ ᤐᤡᤖᤧ᤹ᤀᤥ॥ ᤀᤠᤍᤠᤱᤒᤠᤖᤧ ᤁᤧᤎᤠ᤺ᤰᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤛᤍᤠᤍᤡᤱ ᤁᤧᤘᤠ᤹ᤒᤠ ᤆᤥᤃᤢᤛᤡᤖ. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧᤃ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤎᤱᤜᤠ᤹ᤀᤥ ᤌᤱ ᤁᤧᤈᤥ᤺ᤰᤗ ᤁᤧᤒᤳᤗᤥ॥ ᤀᤠᤍᤠᤱᤒᤠ ᤁᤧᤘᤠ᤹ᤖ ᤌᤠᤖᤡᤰ ᤂᤧᤏᤧ᤹ᤀᤥ ᤋᤠᤵᤑᤧ᤺ᤶᤒᤠ ᤌᤣᤀᤠᤱ ᤂᤥᤔᤧᤍᤧᤳᤏᤧᤴᤗᤖᤥ॥ 29 ᤁᤢᤓᤠ ᤔᤏᤠᤎᤡᤰᤗᤧ ᤀᤠᤍᤠᤱᤒᤠ ᤁᤧᤏᤠ᤺ᤳᤋᤠᤱ ᤛᤧᤵᤔᤠ ᤁᤧᤃᤥ᤺ᤳᤏᤧᤑᤃᤪ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤃᤶᤒᤪᤠᤱᤅᤥ ᤁᤧᤕᤢᤱ॥ ᤁᤖ ᤁᤧᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤔᤴᤏᤡᤴ ᤂᤢᤏᤧ᤹ ᤀᤷᤍᤥᤀᤥ ᤕᤠᤰᤔᤠᤀᤠᤱ ᤗᤠᤵᤑᤣ᤺ᤶᤏᤠᤒᤠ ᤗᤢᤱ ᤁᤢᤀᤡᤛᤡᤰ ᤗᤠᤵᤑᤢᤛᤢᤖᤥ॥ 30 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤴᤍᤠᤱᤒᤧᤴ ᤁᤧᤒᤡᤖᤧᤒᤠ ᤁᤧᤖᤧᤰ ᤔᤠᤱᤜᤢᤵᤐᤡᤴ ᤁᤧᤳᤋᤢᤀᤠᤱ ᤀᤡᤛᤪᤠᤀᤡᤗᤒᤠ ᤕᤢᤰᤛᤠᤒᤠ ᤁᤧᤈᤥ᤺ᤰᤁᤡᤸᤗᤧ 31 ᤀᤠᤍᤠᤱᤒᤠᤖᤧ ᤔᤠᤰᤂᤡ᤹ᤛᤡᤘᤠ ᤁᤧᤛᤧᤛᤢᤒᤠ ᤏᤢ ᤁᤢᤗᤧᤰᤘᤠ ᤁᤧᤜᤢᤱᤒᤠᤸᤗᤧ ᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤗᤠᤃᤡ ᤏᤡᤱᤘᤠ᤹ᤗᤥᤔᤠ ᤀᤡᤃᤪ ᤁᤧᤗᤡ᤺ᤵᤐᤠ ᤁᤰ ᤁᤧᤒᤥᤱᤒᤠ ᤌᤣᤀᤠᤱ ᤜᤥᤵᤗᤥ॥ ᤂᤧᤴ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤍᤠᤱᤒᤧᤴ ᤁᤧᤏᤢ᤹ ᤁᤧᤍᤠᤖ ᤆᤥᤃᤢᤖᤥ. ᤜᤧᤰᤁᤣ᤺ᤸᤗᤧ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤔᤠᤴ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤥ॥” 32 ᤂᤧᤒᤩᤠᤱ ᤍᤠᤀᤢᤍᤖᤧ ᤀᤒᤡᤃᤣᤗᤧᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱ ᤐᤥᤱᤗ. ᤂᤢᤏᤧ᤹ᤀᤣ ᤀᤠᤱᤃᤠ᤹ ᤀᤠᤍᤢᤶᤛᤧ ᤀᤠᤀᤡᤴ ᤂᤧᤏᤧ᤹ ᤁᤧᤒᤠᤱᤄᤧ॥ 33 ᤂᤧᤏᤧ᤹ ᤏᤢᤒᤠ ᤁᤧᤛᤡᤰᤁᤢᤶ ᤏᤡᤱᤘᤠ᤹ᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤁᤧᤒᤡᤖ. ᤌᤣᤀᤠᤱᤓᤧᤸᤗᤧ ᤀᤠᤀᤡᤴ ᤀᤠᤱᤃᤠ᤹ ᤔᤏᤠᤛᤧᤵᤔᤠ ᤏᤢ ᤁᤢᤗᤧᤰᤘᤠ ᤜᤢᤱᤔᤠ ᤐᤠ᤺ᤴᤗᤠᤶ ᤂᤧᤏᤧ᤹ ᤁᤧᤛᤧ᤺ᤵᤋᤠᤱ॥ 34 ᤂᤧᤏᤧ᤹ ᤁᤧᤜᤡᤶᤛᤕᤱᤒᤠ ᤕᤧᤶᤒᤡᤳᤇᤠᤜᤠ᤹ ᤛᤧᤵᤔᤠᤗᤠᤶ ᤁᤧᤛᤧ᤺ᤵᤐᤠ ᤀᤡᤛᤪᤠᤀᤡᤗᤒᤠ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤂᤧᤏᤧ᤹ ᤀᤠᤱᤃᤠ᤹ ᤀᤠᤍᤢᤶᤛᤧ ᤜᤠᤖᤠ ᤁᤧᤴᤍᤩᤧᤏᤧᤶᤒᤠ ᤜᤧᤰᤁᤣᤗᤧᤃ ᤏᤠᤒᤠᤗᤖᤧ ᤁᤢᤜᤡᤶᤛᤕᤱᤒᤠ ᤕᤧᤶᤒᤡᤳᤇᤠᤛᤠᤜᤠ᤹ ᤗᤳᤇᤠᤀᤠᤱ ᤋᤠᤏᤠᤶ ᤌᤠᤖᤡᤰ ᤔᤧᤴᤜᤡᤅᤧᤶᤒᤠᤖᤥ॥” 35 ᤂᤧᤒᤩᤠᤱ ᤀᤒᤡᤃᤣᤗᤖᤧ ᤋᤣ᤹ᤖᤢᤒᤠ ᤛᤢᤱᤅᤡᤴ ᤂᤢᤏᤧ᤹ ᤋᤠ᤺ᤰᤋᤢ. ᤜᤧᤰᤁᤩᤠᤱ ᤔᤧᤳᤋᤢ. “ᤏᤢᤖᤡᤰᤁᤠᤱ ᤁᤧᤜᤡᤶᤔᤥ ᤏᤢ᤺ᤰᤂᤧ᤹ᤀᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ ᤂᤧᤏᤧ᤹ ᤁᤧᤀᤡ᤺ᤳᤋᤢᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤆᤥᤃᤢᤱ॥” 36 ᤀᤒᤡᤃᤣᤗᤧᤴ ᤜᤡᤶᤔᤥ ᤏᤢ᤺ᤰᤂᤧᤀᤠᤱ ᤋᤩᤧ᤺ᤸᤗᤧ ᤏᤠᤒᤠᤗᤖᤧ ᤜᤡᤶᤔᤥ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤜᤧᤰᤁᤣᤀᤣ ᤕᤶᤒᤠ ᤛᤠᤓ᤺ᤱᤈᤠ ᤔᤧᤈᤖ ᤔᤧᤕᤠᤃᤧᤒᤠ ᤏᤡᤛᤢ॥ ᤏᤠᤒᤠᤗᤧᤴ ᤌᤡ᤺ᤸᤗᤧ ᤔᤕᤢᤀᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤘᤕᤧ॥ ᤂᤧᤴ ᤛᤠ᤹ᤖᤡᤰ ᤔᤕᤢᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤁᤢᤔᤣᤳ ᤀᤒᤡᤃᤣᤗᤖᤧ ᤂᤢᤏᤧ᤹ ᤋᤠᤏᤠᤶ ᤌᤠᤖᤡᤰ ᤌᤣᤀᤠᤱ ᤔᤧᤈᤧᤰᤋᤢᤴ॥ 37 ᤋᤠᤏᤠᤶᤛᤠ ᤌᤡ᤺ᤸᤗᤧ ᤗᤧᤖᤢᤀᤠᤱ ᤂᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤧᤰᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤧᤷᤘᤧᤳᤋᤡᤸᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠᤀᤣ ᤗᤧᤖᤢ. ᤂᤧᤶᤒᤩᤠᤱ ᤂᤧᤴ ᤗᤢᤱ ᤁᤢᤀᤡᤛᤡᤰ ᤐᤥ᤺ᤰᤂᤧᤀᤠᤱ ᤗᤱᤗᤧ᤺ᤱᤘᤠ ᤐᤥ᤺ᤰᤂᤧ॥ 38 ᤌᤡᤒᤥᤱ ᤕᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤌᤃᤢ ᤜᤧᤰᤁᤩᤠᤱ ᤂᤧᤴ ᤛᤩᤧ॥ 39 ᤍᤠᤀᤢᤍᤖᤧ ᤏᤠᤒᤠᤗᤧᤴ ᤛᤩᤧ ᤁᤧᤗ᤹ᤒᤠ ᤂᤧᤵᤛᤢ. ᤂᤧᤸᤗᤧ ᤐᤠ᤺ᤳᤋᤢ. “ᤂᤧᤸᤗᤧ ᤆᤥᤃᤢᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤠᤃᤡ ᤂᤠᤛᤧᤴ ᤁᤧᤈᤥ᤺ᤰᤐᤠ ᤏᤢ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤴ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤁᤧᤛᤧ᤺ᤵᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ॥ ᤏᤠᤒᤠᤗᤖᤧ ᤆᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤀᤠᤒᤠᤅᤣ ᤁᤢᤎᤧᤃᤣ᤺ᤰᤐᤥ ᤌᤠᤛᤢ ᤐᤡᤖᤢᤀᤠᤱ ᤘᤠ᤹॥” ᤂᤧᤒᤩᤠᤱ ᤍᤠᤀᤢᤍᤖᤧ ᤀᤒᤡᤃᤣᤗᤧᤴ ᤂᤢᤏᤧ᤹ ᤁᤢᤔᤣᤳ ᤐᤥᤱᤔᤠ ᤛᤢᤰᤐᤡ ᤔᤧᤛᤢᤰᤏᤧᤶᤒᤡ ᤑᤠ᤹ᤀᤠᤱ ᤀᤡᤱᤄᤱ ᤜᤠᤅᤢᤍᤣᤛᤢ॥ 40 ᤍᤠᤀᤢᤍᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤁᤷᤔᤣᤗ ᤔᤧᤒᤣᤀᤠᤱ ᤀᤒᤡᤃᤣᤗᤧᤴ ᤔᤧᤔᤧᤳᤋᤢ. “ᤍᤠᤀᤢᤍᤖᤧ ᤁᤢᤔᤣᤳ ᤐᤥᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤗᤠᤛᤧ ᤕᤠᤵᤔᤡ ᤐᤠᤱᤄᤧᤀᤠᤱ ᤘᤠ᤹॥” 41 ᤂᤧᤴ ᤔᤢᤳᤆᤵ ᤐᤥᤃᤧ. ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤀ᤺ᤰᤂᤢᤶ ᤑᤴᤇᤡᤱᤗ ᤛᤧᤘᤠ ᤔᤧᤳᤋᤢᤛᤡᤀᤠᤱ ᤐᤠ᤺ᤳᤋᤢ. “ᤀᤠᤱᤃᤠ᤹ᤃ ᤀᤠᤴᤍᤠᤱᤒᤠᤸᤗᤧ ᤁᤢᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤕᤠᤖᤡᤵ ᤘᤠ᤹ᤀᤠ. ᤀᤠᤱᤃᤠ᤹ᤃ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱ ᤘᤠᤃᤧᤜᤵᤔᤠ ᤁᤢᤛᤧᤘᤠᤖᤥᤔᤠᤖᤥ॥” 42 ᤜᤧᤰᤁᤩᤠᤱ ᤀᤒᤡᤃᤣᤗᤧᤴ ᤜᤠᤖᤠᤜᤠᤖᤠ ᤕᤠᤖᤡᤵ ᤐᤥ᤺ᤰᤂᤧ. ᤂᤢᤏᤧ᤹ ᤅᤠᤛᤡ ᤁᤢᤴᤍᤣ᤺ᤱᤔᤠᤜᤠ᤹ᤏᤢ ᤀᤍᤱ ᤔᤧᤕᤢᤰᤋᤢᤀᤠᤱ ᤀᤡᤱᤄᤱ ᤁᤧᤍᤠ᤺ᤵᤐᤠ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ᤏᤢ ᤔᤧᤒᤣ. ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤔᤣᤳ ᤐᤠ᤺ᤰᤂᤧᤖᤥ॥ 43 ᤍᤠᤀᤢᤍᤖᤧ ᤕᤡᤈᤖᤣᤗᤒᤠ ᤀᤜᤡᤏᤥᤶᤔᤧᤴᤏᤠᤱ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ॥ ᤂᤧᤱᤜᤠ᤹ ᤏᤧᤵᤔᤠᤱ ᤂᤢᤏᤧ᤹ ᤁᤢᤔᤣᤳ ᤐᤥ᤺ᤰᤂᤧᤛᤡ॥ 44 ᤀᤠᤶᤓᤠ ᤁᤴ ᤕᤧᤶᤔᤥ ᤛᤠᤘᤗᤖᤧ ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤢᤔᤠ ᤍᤠᤀᤢᤍᤖᤧ ᤁᤢᤔᤣᤳ ᤔᤡᤁᤗᤧᤴ ᤃᤸᤗᤡᤔᤒᤠ ᤗᤣᤛᤖᤧ ᤁᤢᤛ᤻ᤛᤠ ᤐᤸᤋᤡᤀᤣᤗᤧᤴ ᤁᤢᤔᤣᤳ ᤐᤥᤱᤛᤧ ᤐᤡᤖᤢᤍᤣᤛᤢᤀᤠᤱ ᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.