᥇ ᤛᤠᤔᤢᤀᤧᤗ 24 - LIFOTNTᤍᤠᤀᤢᤍᤖᤧ ᤛᤠᤘᤗᤧᤴ ᤔᤧᤛᤧᤖᤢᤴ 1 ᤛᤠᤘᤗᤖᤧ ᤐᤗᤡᤛ᤻ᤋᤡᤜᤠ᤹ ᤏᤠ᤺ᤳᤋᤢᤛᤡᤀᤠᤱ ᤏᤢ᤺ᤰᤂᤧ. ᤜᤧᤰᤁᤣ᤺ᤸᤗᤧ ᤍᤠᤀᤢᤍᤧᤴ ᤀᤣᤏ-ᤃᤍᤡᤒᤠ ᤔᤢᤖᤧᤰ ᤂᤠᤖᤧᤰ ᤕᤧ᤺ᤱᤄᤠᤍᤧᤴᤏᤥ ᤘᤠ᤹ ᤁᤧᤗ᤹ᤒᤠ ᤂᤢᤏᤧ᤹ ᤂᤧᤵᤛᤢ॥ 2 ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤗᤠᤶᤒᤠ ᤜᤧᤴᤇᤡᤱ ᤛᤢᤶᤛᤡ ᤔᤏᤠ ᤛᤣᤃᤢᤛᤡᤀᤠᤱ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤍᤠᤀᤢᤍ ᤏᤢ ᤂᤧᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤁᤥ᤺ᤳᤇᤧ ᤛᤩᤠ᤺ᤰᤐᤠ ᤕᤠᤰᤁᤣ᤺ᤰᤁᤡᤸᤗᤧ ᤁᤢᤒᤣᤛᤠᤱ ᤌᤠᤛᤡᤱ॥ 3 ᤜᤧᤰᤁᤩᤠᤱ ᤂᤢᤏᤧ᤹ ᤗᤠᤶᤒᤣᤛᤠᤱ ᤁᤧᤏᤧᤒᤠ ᤔᤧᤸᤗᤢᤰᤂᤖᤀᤥ ᤋᤩᤧ॥ ᤂᤧᤸᤗᤧ ᤁᤢᤒᤣᤛᤠᤱ ᤗᤳᤇᤠ ᤗᤢᤱᤑᤢᤰᤁᤢᤎᤡᤰ ᤏᤧᤛ᤻ᤛᤧ॥ ᤛᤠᤘᤗᤧᤴ ᤂᤧᤴ ᤗᤢᤱᤑᤢᤰᤁᤥᤀᤥ ᤗᤠᤛᤧᤀᤠᤱ ᤐᤠᤜᤠᤖᤠ ᤕᤢᤱᤛᤡᤱ॥ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤂᤧᤴ ᤗᤢᤱᤑᤢᤰᤁᤢᤀᤥ ᤔᤧᤈᤡᤱᤛᤡᤱᤅᤠᤱ ᤔᤧᤕᤢᤅᤧ॥ 4 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤸᤗᤥ ᤂᤧᤏᤧ᤹ ᤛᤢᤕᤧᤶ ᤁᤧᤄᤥᤛᤢᤀᤠᤱ ᤘᤠ᤹᥄ ᤀᤠᤀᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤔᤧᤳᤋᤧ. ‘ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤴ ᤁᤧᤜᤢᤰᤁᤥ ᤌᤠᤛᤢᤱ ᤐᤡᤏᤧ. ᤜᤧᤰᤁᤩᤠᤱ ᤂᤧᤴᤏᤢ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢ᤹ ᤜᤠᤒᤠ ᤜᤧᤰᤁᤣᤀᤣ ᤆᤥᤃᤧ᤹॥’” ᤍᤠᤀᤢᤍᤧᤴ ᤀᤅᤣ᤺ᤰᤁᤠᤱ ᤐᤣᤀᤠᤱ ᤛᤠᤘᤗᤖᤧ ᤁᤢᤈᤠᤱᤍᤣ᤺ᤳᤋᤡᤸᤗᤧ ᤁᤢᤛᤢᤰᤐᤧᤴ ᤂᤰᤋᤢ ᤐᤡᤖᤢ॥ 5 ᤁᤖ ᤛᤠᤘᤗᤖᤧ ᤁᤢᤈᤠᤱᤍᤣ᤺ᤳᤋᤡᤸᤗᤧ ᤁᤢᤛᤢᤰᤐᤧᤴ ᤂᤰᤋᤢ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤍᤠᤀᤢᤍᤖᤧ ᤁᤢᤏᤡᤱᤘᤠ᤹ ᤋᤠ᤹ᤈᤧᤰᤂᤧ॥ 6 ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤀᤠᤴᤍᤠᤱᤒᤧᤴ. ᤜᤧᤰᤁᤣ ᤔᤧᤵᤔᤠ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤒᤠᤱᤅᤠᤴ. ᤂᤢᤏᤧ᤹ᤃ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤜᤠᤱ ᤐᤥᤱᤛᤧ ᤛᤣᤃᤢᤒᤠᤖᤥ᥄ ᤀᤠᤱᤃᤠ᤹ ᤂᤢᤏᤧ᤹ ᤜᤢᤰ ᤕᤠᤰᤔᤠ ᤔᤧᤏᤢ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤜᤠᤱᤗᤥ᥄” 7 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ ᤑᤧ᤺ᤰᤋᤢᤛᤡ. ᤜᤧᤰᤁᤩᤠᤱ ᤛᤠᤘᤗᤧᤴ ᤑᤵᤔᤠᤀᤠᤱ ᤛᤧᤵᤔᤠ ᤔᤧᤒᤠᤱᤄᤢᤛᤡᤴ॥ ᤛᤠᤘᤗᤧᤴ ᤐᤥᤃᤧᤀᤠᤱ ᤂᤧᤴ ᤗᤢᤱᤓᤢᤰᤁᤢᤴ ᤗᤧᤖᤢ ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤗᤠᤶᤔᤥ ᤌᤠᤛᤡᤱ॥ 8 ᤜᤧᤰᤁᤩᤠᤱ ᤍᤠᤀᤢᤍᤧᤴᤏᤠᤱ ᤗᤢᤱᤓᤢᤰᤁᤢᤛᤡᤃᤠᤱᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧ. ᤜᤧᤰᤁᤩᤠᤱ ᤛᤠᤘᤗᤧᤴ ᤔᤧᤳᤋᤢ. “ᤀᤠᤍᤠᤱᤒᤠ ᤜᤠᤱᤅᤣ᥄” ᤛᤠᤘᤗᤖᤧ ᤜᤡᤛᤡᤱᤅᤠᤱ ᤀᤥᤔᤧᤳᤋᤢ. ᤜᤧᤰᤁᤣ᤺ᤸᤗᤧ ᤍᤠᤀᤢᤍᤧᤴ ᤂᤠᤶᤒᤠᤱᤅᤥ ᤜᤒᤳ ᤑᤴᤇᤡᤱᤅᤠᤱ ᤛᤧᤘᤠ ᤔᤧᤳᤋᤢᤖ 9 ᤍᤠᤀᤢᤍᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢᤖ ᤘᤠ᤹ ᤗ᤹ᤖᤡᤰ ᤘᤣ᤹ ᤔᤏᤠᤖᤧ ᤁᤧᤶᤔᤧᤵᤐᤠ ᤐᤠ᤺ᤴᤏᤡᤴ ᤌᤣᤀᤠᤱ ᤁᤧᤄᤧᤵᤛᤢᤒᤠᤒᤣ᥅ 10 ᤀᤠᤸᤗᤥ ᤂᤠ ᤗᤢᤱᤓᤢᤰᤁᤢᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤀᤠᤜᤢᤰᤁᤥ ᤁᤧᤎᤠᤛᤧᤀᤠᤱ ᤘᤕᤧᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤀᤠᤒᤠᤅᤣ ᤁᤧᤏᤡᤛᤢᤖᤥ॥ ᤁᤢᤓᤠ ᤀᤠᤔᤏᤠᤜᤠ᤹ᤖᤧ ᤛᤧᤖᤧ᤹ ᤔᤧᤔᤧᤳᤋᤠᤱ ᤁᤖ ᤂᤧᤏᤧ᤹ ᤗᤧᤳᤏᤧᤍᤣᤏᤧ. ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱᤛᤡᤱ. ‘ᤀᤠᤱᤃᤠ᤹ ᤀᤠᤴᤍᤠᤱᤒᤠᤸᤗᤧ ᤁᤢᤛᤶᤍᤠᤱ ᤜᤢᤰᤑᤥ᤺ᤱᤔᤠ ᤔᤧᤛᤢᤰᤁᤠᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤛᤣᤃᤢᤒᤠ ᤔᤏᤠᤖᤥ॥’ 11 ᤀᤠᤶᤒᤦ. ᤀᤠᤱᤃᤠ᤹ ᤀᤠᤜᤢᤰᤁᤥ ᤁᤳᤋᤢᤱᤒᤠ ᤁᤧᤍᤣ᤺ᤵᤑᤧᤖᤠ᤺ᤴ ᤀᤥᤔᤧᤳᤋᤧ᤹ᤀᤥ᥄ ᤀᤠᤱᤃᤠ᤹ ᤛᤧᤵᤔᤠ ᤛᤢᤰᤏᤧᤔᤧᤴ ᤁᤖ ᤁᤧᤍᤣ᤺ᤵᤑᤧᤖᤠ᤺ᤴᤗᤰ ᤂᤰᤋᤢᤱ॥ ᤁᤴᤗᤠᤶᤒᤠᤀᤣ ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ ᤔᤧᤀᤡ᤺ᤳᤋᤠᤴ ᤀᤡᤃᤪ ᤛᤧᤵᤔᤠ ᤔᤧᤃᤥ᤺ᤳᤏᤧᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤁᤧᤄᤥᤛᤢᤖᤥ॥ ᤀᤠᤱᤃᤠ᤹ ᤌᤣᤀᤠᤱ ᤋᤠᤵᤑᤧ᤺ᤶᤒᤠ ᤔᤧᤔᤧᤳᤏᤧᤴᤇᤠᤱ ᤂᤧᤏᤧ᤹ᤃ ᤀᤠᤱᤃᤠ᤹ ᤛᤧᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤁᤧᤏᤠ᤺ᤳᤋᤠᤖ ᤁᤧᤘᤠ᤹॥ 12 ᤀᤠᤴᤇᤡ᤹ ᤗᤢᤶᤔᤥ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤠᤛᤧᤴ ᤆᤥᤃᤢᤖᤖᤥ. ᤀᤠᤱᤃᤠ᤹ ᤋᤢᤰᤂᤣ ᤁᤧᤈᤠ᤺ᤳᤋᤠᤱᤒᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤛᤶᤍᤠᤱ ᤂᤠᤛᤧᤴ ᤆᤥᤃᤢᤖ. ᤁᤖ ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤂᤧᤏᤧ᤹ ᤁᤧᤛᤶᤎᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤓᤥ᤺ᤱᤅᤠᤴᤗᤥ॥ 13 ᤀᤢᤴᤇᤥ᤺ᤴᤒᤠ ᤂᤧᤍᤠ᤹ ᤀᤰᤋᤱᤒᤠ ᤘᤠ᤹. ‘ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤋᤠᤵᤑᤧ᤺ᤶᤒᤠ ᤔᤏᤠ᤺ᤸᤗᤧᤖᤰ ᤆᤥᤃᤢ᤹॥’ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤔᤧᤓᤥ᤺ᤱᤅᤠᤴᤗᤥ॥ 14 ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤜᤠ᤺ᤳᤗᤧ ᤁᤢᤍᤰᤗᤧᤱᤘᤠᤀᤥ ᤗ᤺ᤴᤍᤧᤀᤠᤱ ᤘᤠ᤹ᤒᤣ᥅ ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤜᤠᤳ ᤁᤧᤏᤠ᤺ᤳᤋᤢᤖ ᤁᤧᤘᤠ᤹ᤒᤣ᥅ ᤗᤳᤇᤠ ᤁᤢᤛᤡᤘᤧᤳ ᤁᤥ᤺ᤳᤆᤥ᤹ ᤀᤡᤃᤪ ᤗᤳᤇᤠ ᤛᤡᤔᤧᤴᤍᤰ ᤜᤧᤰᤋᤱᤒᤠ ᤌᤣᤏᤠᤎᤣᤒᤠ ᤀᤠᤱᤃᤠ᤹ ᤁᤢᤛᤡᤱᤒᤠ ᤔᤏᤠᤴ ᤔᤣ᤺ᤶᤒᤡ᥅ 15 ᤕᤜᤘᤣ ᤍᤠᤱᤒᤧᤴᤏᤣ ᤂᤠᤛᤧᤴ ᤁᤧᤗᤥ᤺ᤶᤒᤠᤖᤥ. ᤂᤢᤏᤧ᤹ᤀᤣ ᤀᤠᤴᤇᤡ᤹ ᤗᤢᤶᤔᤥ ᤂᤠᤛᤧᤴ ᤆᤥᤃᤢᤖ. ᤜᤧᤰᤁᤩᤠᤱ ᤂᤢᤏᤧ᤹ ᤂᤠᤛᤧᤴ ᤗᤥ᤺ᤴᤍᤢᤖ॥ ᤂᤢᤏᤧ᤹ᤀᤣ ᤌᤣ᤺ᤰᤁᤠᤖ ᤂᤧᤒᤩᤠᤱ ᤁᤧᤜᤢᤰᤗᤠᤶ ᤋᤠᤱᤛᤧ᤺ᤵᤐᤠᤖ॥” 16 ᤍᤠᤀᤢᤍᤖᤧ ᤁᤴ ᤐᤠ᤺ᤴᤜᤠ᤹ ᤛᤠᤘᤗᤧᤴᤏᤢ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤡᤍᤥ. ᤛᤠᤘᤗᤖᤧ ᤐᤠ᤺ᤳᤋᤢ. “ᤁᤴ ᤁᤧᤒᤠ᤺ᤵᤐᤧᤴ ᤂᤧᤏᤧ᤹ᤀᤣᤒᤡ. ᤀᤠᤛ᤻ᤛᤠ ᤍᤠᤀᤢᤍᤣ᥅” ᤜᤧᤰᤁᤩᤠᤱ ᤛᤠᤘᤗᤧᤴ ᤜᤠ᤺ᤵᤔᤠ ᤜᤣ᤺ᤰᤋᤧ॥ 17 ᤂᤢᤏᤧ᤹ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤱᤃᤠ᤹ᤏᤢ᤺ᤸᤗᤧ ᤂᤧᤏᤧ᤹ ᤕᤖᤡᤰ ᤛᤠᤶᤕᤥᤒᤠ ᤁᤧᤈᤥᤰ. ᤀᤠᤱᤃᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤳᤏᤧ. ᤁᤖ ᤂᤧᤏᤧ᤹ ᤀᤠᤱᤃᤠ᤹ ᤏᤢᤖᤡᤰ ᤁᤧᤔᤧᤳᤋᤠᤱ॥ 18 ᤀᤠᤀᤡᤴ ᤀᤠᤱᤃᤠ᤹ᤏᤢ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤢ. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤁᤧᤜᤢᤰᤁᤥ ᤌᤠᤛᤠᤱ. ᤁᤖ ᤂᤧᤏᤧ᤹ ᤁᤧᤴᤇᤧᤖᤠᤱᤅᤡᤴ॥ 19 ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤏᤡᤱᤔᤡᤴ ᤋᤧᤶᤛᤢᤀᤠᤱ ᤌᤣᤀᤠᤱ ᤔᤧᤶᤔᤧᤳᤋᤣ ᤐᤣ᤺ᤰᤔᤠ ᤐᤠᤱᤄᤢ᥅ ᤁᤸᤗᤧᤆᤥᤃᤢᤸᤗᤧ ᤀᤠᤀᤡᤴ ᤀᤠᤱᤃᤠ᤹ᤏᤢ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤜᤠᤱᤘᤠ ᤔᤠᤱᤘᤠ ᤁᤧᤒᤡᤖᤖᤥ॥ 20 ᤀᤠᤸᤗ ᤂᤧᤏᤧ᤹ᤀᤣ ᤀᤡᤛᤪᤠᤀᤡᤗᤒᤠ ᤜᤠᤱ ᤁᤧᤒᤥᤱ ᤁᤧᤗ᤹ᤒᤧᤴ ᤀᤠᤱᤃᤠ᤹ ᤏᤡᤛᤢᤱᤗᤥ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗ ᤗᤠᤈᤣ᤺ᤸᤗᤧ ᤂᤧᤏᤧ᤹ ᤁᤧᤜᤠᤱᤕᤢᤰ ᤆᤥ᤺ᤰᤔᤠ ᤕᤧᤶᤔᤥᤀᤣ ᤏᤢ᤹ᤔᤠᤍᤠᤔᤠ ᤕᤠ᤺ᤶᤒᤰ ᤆᤥᤃᤢᤖᤥ॥ 21 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛ᤻ᤛᤠ ᤀᤠᤶᤔᤧᤴᤇᤠ᤹ᤜᤠ᤹ ᤔᤧᤛᤧᤖᤢᤱᤛᤡᤅᤡᤴ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤀᤠᤶᤒᤠᤖᤧ ᤁᤢᤜᤡᤶᤛᤕᤱᤗᤠᤶᤒᤠ ᤔᤧᤍᤢ᤺ᤰᤁᤠᤴ ᤑᤠ᤹ᤀᤠᤱ ᤂᤧᤏᤧ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱᤅᤧ᤹॥” 22 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤛᤠᤘᤗᤧᤴᤏᤢ ᤔᤠᤱᤜᤧᤰᤛᤡᤱ॥ ᤜᤧᤰᤁᤩᤠᤱ ᤛᤠᤘᤗᤧᤴ ᤁᤢᤜᤡᤶᤔᤥ ᤏᤢ᤺ᤰᤂᤧ. ᤁᤖ ᤍᤠᤀᤢᤍᤧᤴ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤕᤰ ᤗᤧᤵᤔᤠᤱ ᤔᤧᤎᤠᤛᤡᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.