᥇ ᤛᤠᤔᤢᤀᤧᤗ 23 - LIFOTNTᤍᤠᤀᤢᤍᤖᤧ ᤁᤡᤗᤠᤜ ᤕᤧᤰᤕᤰᤁᤧᤴ ᤛᤧ᤺ᤵᤋᤢᤒᤠ 1 “ᤐᤗᤡᤛ᤻ᤋᤡᤜᤠ᤹ ᤁᤡᤗᤠᤜ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤏᤢ ᤌᤱ ᤔᤧᤈᤥᤃᤧ. ᤜᤧᤰᤁᤩᤠᤱ ᤁᤡᤗᤠᤜᤒᤠ ᤔᤏᤠᤜᤠ᤹ᤖᤧ ᤂᤠᤖᤰ ᤕᤠ᤹ᤂᤠᤗᤠᤀᤥ ᤔᤧᤓᤢᤰᤂᤢᤀᤠᤱ ᤁᤧᤕᤢᤱᤒᤠ ᤆᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤠᤵᤋᤢ ᤔᤧᤍᤣ᤹ᤖᤢᤛᤡ” ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤍᤠᤀᤢᤍᤖᤧ ᤂᤧᤵᤛᤢ॥ 2 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤕᤜᤘᤣ ᤍᤠᤱᤒᤧᤴ ᤛᤣ᤺ᤴᤍᤥᤛᤢ. “ᤀᤠᤱᤃᤠ᤹ ᤐᤣ᤺ᤰᤁᤠᤀᤠᤱ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤁᤠᤒᤡ᤹” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤏᤥᤃᤵ ᤐᤡᤖᤢ. “ᤀᤥ᤺ᤰ. ᤐᤣᤃᤧ᤹ᤀᤠᤱ ᤌᤰᤋᤧ᤹. ᤜᤧᤰᤁᤩᤠᤱ ᤁᤡᤗᤠᤜ ᤕᤧᤰᤕᤰᤁᤡᤴ ᤛᤧ᤺ᤵᤋᤧ᤹॥” 3 ᤁᤖ ᤍᤠᤀᤢᤍᤖᤧ ᤁᤢᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤕᤜᤢᤍᤠᤀᤥᤀᤣ ᤀᤠᤏᤡ᤹ ᤀᤠᤃᤡᤀᤠᤱ ᤀᤠᤘᤠ᤹. ᤁᤡᤗᤠᤜᤀᤥ ᤀᤠᤏᤡ᤹ ᤀᤠᤒᤣ᤺ᤰᤁᤠᤱ ᤐᤗᤡᤛ᤻ᤋᤡ ᤌᤰᤛᤢᤒᤠᤜᤠ᤹ᤏᤢ ᤌᤱ ᤀᤠᤈᤥ᤺ᤰᤁᤡᤸᤗᤧ ᤁᤴᤏᤢ᤺ᤸᤗᤧ ᤁᤧᤛᤠᤰᤐᤠ ᤀᤠᤍᤢᤔᤢᤶ᥄” 4 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤕᤠᤶᤔᤥᤀᤠᤱ ᤕᤜᤘᤣ ᤍᤠᤱᤒᤧᤴ ᤛᤢᤈᤠ ᤏᤠ᤺ᤰᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤁᤡᤗᤠᤜ ᤕᤧᤰᤕᤰᤁᤥ ᤌᤱ ᤆᤥ᤺ᤰᤛᤧ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤐᤗᤡᤛ᤻ᤋᤡᤜᤠ᤹ ᤂᤧᤏᤧ᤹ ᤁᤧᤜᤢᤰᤁᤥ ᤌᤠᤛᤢᤱᤛᤡᤱ ᤐᤡᤏᤧ॥” 5 ᤜᤧᤰᤁᤣ᤺ᤸᤗᤧ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤁᤡᤗᤠᤜ ᤕᤧᤰᤕᤰᤁᤥ ᤔᤧᤒᤣ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤔᤧᤎᤰᤋᤧ॥ ᤂᤧᤱᤜᤠ᤹ᤖᤧ ᤐᤗᤡᤛ᤻ᤋᤡᤜᤠ᤹ ᤕᤖᤡᤰ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤡᤳᤜᤠ᤹ ᤔᤧᤍᤣ᤹ᤖᤢ ᤔᤧᤒᤡᤖᤢᤛᤡ. ᤜᤧᤰᤁᤣᤗ᤹ᤖᤡᤰ ᤍᤠᤀᤢᤍᤖᤧ ᤁᤡᤗᤠᤜ ᤕᤧᤰᤕᤰᤁᤧᤴ ᤏᤢ ᤂᤧᤵᤔᤥᤒᤠ ᤔᤏᤠᤜᤠ᤹ ᤛᤧ᤺ᤵᤋᤢᤛᤡᤖᤥ॥ 6 ᤀᤜᤡᤔᤣᤗᤣᤁᤖᤧ ᤁᤢᤛ᤻ᤛᤠ ᤀᤒᤡᤕᤠᤌᤠᤖᤧᤴ ᤍᤠᤀᤢᤍ ᤘᤕᤧᤒᤠ ᤁᤡᤗᤠᤜ ᤕᤧᤰᤕᤰᤁᤥ ᤂᤧᤳᤇᤡᤱ ᤋᤩᤧ᤺ᤸᤗᤧ ᤀᤣᤐᤥᤍᤏᤢ ᤋᤩᤧᤀᤠᤱ ᤘᤕᤧ॥ 7 ᤍᤠᤀᤢᤍᤧᤴ ᤁᤡᤗᤠᤜ ᤕᤧᤰᤕᤰᤁᤥ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠᤴ ᤁᤢᤓᤠ ᤔᤏᤠᤖᤧ ᤛᤠᤘᤗᤧᤴ ᤔᤧᤔᤧᤳᤋᤢ. ᤜᤧᤰᤁᤩᤠᤱ ᤛᤠᤘᤗᤖᤧ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤍᤠᤀᤢᤍᤧᤴ ᤀᤠᤱᤃᤠ᤹ ᤀᤠᤜᤢᤰᤁᤥ ᤐᤡᤖᤠᤱᤅᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤡᤖᤡ ᤑᤠᤱᤔᤏᤠᤒᤠ ᤕᤧᤰᤕᤰ ᤛᤡᤃᤠᤱ ᤂᤧᤴ ᤀᤠᤒᤠᤅᤣ ᤗᤠᤛᤧᤀᤠᤱ ᤛᤠᤰᤛᤡᤱᤅᤠᤱ ᤕᤠᤰ॥” 8 ᤜᤧᤰᤁᤩᤠᤱ ᤛᤠᤘᤗᤖᤧ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ ᤁᤡᤗᤠᤜ ᤕᤧᤰᤕᤰᤁᤥ ᤐᤣ᤺ᤰᤔᤠᤀᤠᤱ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤁᤡᤷᤃᤵ ᤁᤵᤔᤠᤛᤡ ᤑᤠ᤹ᤀᤠᤱ ᤐᤠᤱᤄᤢᤛᤡ॥ 9 ᤛᤠᤘᤗᤖᤧ ᤆᤥᤃᤢᤒᤠ ᤆᤧᤶᤓᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤍᤠᤀᤢᤍᤖᤧ ᤏᤡᤱᤘᤠ᤹ ᤂᤥᤛᤢ॥ ᤜᤧᤰᤁᤩᤠᤱ ᤀᤒᤡᤕᤠᤌᤠᤖ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤀᤣᤐᤥᤍ ᤋᤣ᤺ᤳᤋᤡᤴ ᤑᤧᤵᤔᤠ ᤐᤠᤱᤄᤢ॥ 10 ᤂᤧᤒᤩᤠᤱ ᤍᤠᤀᤢᤍᤧᤸᤗᤧ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤆᤥᤃᤢᤱᤅᤡᤸᤗᤧ ᤛᤠᤘᤗᤧᤴ ᤁᤡᤗᤠᤜ ᤕᤧᤰᤕᤰᤁᤥ ᤋᤠᤀᤠᤱ ᤂᤧᤴ ᤔᤧᤱᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤠ᤹ᤔᤢ ᤁᤧᤗ᤹ᤒᤠ ᤂᤧᤵᤛᤢᤱᤅᤠᤱ ᤘᤠ᤹॥ 11 ᤁᤡᤗᤠᤜ ᤕᤧᤰᤕᤰᤐᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤂᤢᤏᤧ᤹ ᤁᤢᤜᤢᤰᤁᤥ ᤜᤢᤰᤔᤧᤛᤢᤵᤐᤠᤒᤡ᥅ ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠᤸᤗᤧ ᤂᤧᤵᤛᤢᤱᤒᤠ ᤁᤢᤀᤡᤛᤡᤰ ᤛᤠᤘᤗᤧᤴ ᤁᤡᤗᤠᤜ ᤕᤧᤰᤕᤰᤁᤥ ᤋᤠᤒᤡ᥅ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤧᤴ ᤔᤧᤳᤋᤠᤱᤅᤧ᤹ᤀᤥ॥” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤛᤧᤰᤂᤠᤛᤠᤱ ᤛᤠᤘᤗᤧᤴ ᤋᤠᤖᤥ॥” 12 ᤜᤧᤰᤁᤩᤠᤱ ᤍᤠᤀᤢᤍᤖᤧ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤁᤡᤗᤠᤜᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤏᤢ ᤀᤠᤔᤏᤠᤜᤠ᤹ ᤛᤠᤘᤗᤖᤧ ᤁᤢᤜᤢᤰᤁᤥ ᤜᤢᤰᤔᤧᤛᤢᤵᤋᤡᤃᤧᤒᤡ᥅” ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤢ. “ᤂᤧᤱᤜᤠ᤹ᤖᤧ ᤜᤠᤒᤠ ᤜᤧᤰᤁᤣᤀᤣ ᤔᤧᤈᤥᤃᤢ᤹॥” 13 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤧᤴ ᤜᤧᤰᤁᤩᤠᤱ ᤁᤡᤵ ᤋᤢᤰᤛᤡ ᤕᤠᤖᤡᤰ ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤂᤧᤵᤔᤥᤗᤠᤶ ᤂᤧᤳᤇᤡᤱ ᤜᤧᤰᤁᤩᤠᤱ ᤘᤣ᤹ ᤋᤧᤴ ᤗᤧᤵᤔᤠᤱ ᤔᤧᤒᤣᤀᤠᤱ ᤔᤧᤈᤳᤇᤡᤱᤗ ᤔᤧᤒᤣ॥ ᤍᤠᤀᤢᤍᤧᤴ ᤁᤡᤗᤠᤜ ᤕᤧᤰᤕᤰᤗᤠᤶ ᤂᤧᤳᤇᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤓᤠᤖᤧ ᤛᤠᤘᤗᤧᤴ ᤔᤧᤔᤧᤳᤋᤢ ᤜᤧᤰᤁᤣ᤺ᤸᤗᤧᤃ ᤂᤢᤏᤧ᤹ ᤂᤧᤵᤔᤥ ᤔᤧᤒᤣᤏᤧᤴ॥ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤁᤥ᤺ᤰᤔᤠᤀᤥ ᤔᤧᤈᤡᤱᤛᤡᤱ 14 ᤜᤧᤰᤁᤩᤠᤱ ᤍᤠᤀᤢᤍᤧᤴ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤰᤜᤠ᤹ᤀᤥ ᤏᤢ ᤈᤡᤐ ᤔᤧᤵᤔᤏᤠᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤁᤥ᤺ᤰᤔᤠᤜᤠ᤹ᤀᤥ ᤆᤡᤱᤛᤡᤱᤗ ᤘᤠ᤹ᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤛᤠᤘᤗᤖᤧ ᤌᤡᤰᤕᤠ᤺ᤴᤎᤰ ᤁᤥ᤺ᤵᤔᤠ ᤜᤱᤔᤠ ᤜᤣ᤺ᤰᤋᤢ॥ ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤍᤠᤀᤢᤍᤧᤴ ᤂᤢᤏᤧ᤹ ᤁᤢᤜᤢᤰᤁᤥ ᤔᤧᤒᤡᤖᤢᤴ॥ 15 ᤍᤠᤀᤢᤍᤧᤴ ᤈᤡᤐ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥᤒᤠ ᤜᤥᤖᤣᤛ ᤋᤧᤴᤏᤥ ᤘᤕᤧᤸᤗᤧ. ᤛᤠᤘᤗᤧᤴ ᤁᤢᤛᤧᤳᤇᤧ ᤗ᤺ᤴᤍᤧᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤂᤢᤏᤧ᤹ ᤂᤧᤵᤛᤢ॥ 16 ᤂᤧᤒᤩᤠᤱ ᤛᤠᤘᤗᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴ ᤜᤥᤖᤣᤛ ᤔᤧᤵᤏᤠᤒᤠ ᤋᤧᤴᤏᤥ ᤍᤠᤀᤢᤍᤖᤧ ᤁᤢᤍᤢᤶᤛᤧ ᤐᤣ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤥ ᤜᤠᤱᤜᤠᤱ ᤗ᤹ᤔᤠᤖᤧ ᤗᤠᤃᤡ ᤛᤠ᤺ᤱᤃᤢ ᤛᤰᤔᤠ ᤗᤠ᤹ᤛᤡᤱᤔᤠ ᤑᤠ᤹ᤖᤢ॥ 17 ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤔᤧᤃᤡᤛᤧᤴᤏᤧ᤹. ᤀᤠᤱᤃᤠ᤹ ᤀᤠᤶᤒᤠ ᤛᤠᤘᤗᤖᤧ ᤛᤢᤔᤠᤀᤠᤱ ᤁᤧᤱᤄᤥᤏᤧᤴ॥ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤜᤠᤱ ᤁᤧᤒᤥᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤓᤥᤛᤠᤱᤒᤠ ᤐᤥᤱᤅᤠ॥ ᤀᤠᤱᤃᤠ᤹ ᤀᤠᤶᤒᤠ ᤛᤠᤘᤗᤖᤧᤀᤠᤱ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤂᤥᤛᤢᤀᤠᤱ ᤘᤠ᤹॥” 18 ᤂᤧᤴ ᤏᤧᤵᤔᤠᤱᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤔᤠᤱᤜᤢᤰ ᤆᤥᤃᤧᤛᤢ॥ ᤜᤧᤰᤁᤩᤠᤱ ᤈᤥᤏᤠᤌᤠᤏᤧᤴ ᤁᤢᤜᤡᤶᤔᤥ ᤏᤢ᤺ᤰᤂᤧ. ᤁᤖ ᤍᤠᤀᤢᤍᤧᤴ ᤜᤥᤖᤣᤛᤀᤥᤀᤣ ᤕᤠ᤺ᤰᤋᤧ॥ 19 ᤛᤠᤘᤗᤧᤴ ᤃᤡᤒᤠ ᤔᤧᤵᤔᤏᤠᤒᤠ ᤋᤧᤴᤏᤥ ᤘᤕᤧᤸᤗᤧ ᤈᤡᤐᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ᤀᤥ ᤀᤡᤱᤄᤱ ᤔᤧᤍᤠᤖᤢ. “ᤍᤠᤀᤢᤍᤧᤱᤃ ᤕᤧᤛᤡᤔᤥᤏᤗᤠᤶ ᤗᤠᤱᤃᤧᤳ ᤕᤥ ᤗᤧᤵᤛᤠᤱᤒᤠ ᤜᤁᤡᤗᤠ ᤁᤥ᤺ᤰᤔᤠᤒᤠ ᤜᤥᤖᤣᤛᤒᤠ ᤕᤰᤜᤠ᤹ᤀᤥ ᤆᤡᤱᤛᤡᤱᤗ ᤘᤠ᤹॥ 20 ᤀᤠᤸᤗ ᤀᤠᤍᤠᤱᤒᤠ ᤜᤠᤱᤅᤣ. ᤀᤠᤵᤑᤠᤸᤗᤧ ᤕᤢᤔᤠ ᤁᤧᤛᤡᤖᤠ᤹ᤎᤠᤱ ᤕᤧ᤹ᤀᤥ. ᤜᤧᤰᤁᤩᤠᤱ ᤂᤧᤴ ᤁᤧᤜᤢᤰᤁᤥ ᤜᤢᤰᤛᤢᤵᤔᤠ ᤕᤠ᤺ᤶᤒᤰᤁᤡᤴ ᤀᤠᤏᤡᤃᤧᤴᤗᤥ॥” 21 ᤜᤧᤰᤁᤩᤠᤱ ᤛᤠᤘᤗᤖᤧ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤸᤗᤧ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤋᤡ॥ 22 ᤀᤠᤸᤗ ᤐᤣᤃᤧᤶᤔᤧ᤹ᤀᤠᤱ ᤕᤠᤖᤡᤵ ᤐᤥ᤺ᤰᤂᤠᤶᤔᤧ᤹. ᤜᤧᤰᤁᤩᤠᤱ ᤂᤧᤴ ᤀᤠᤳᤋᤠᤴ ᤘᤠ᤹ ᤂᤧᤒᤩᤠᤱ ᤜᤠ᤺ᤳᤗᤧ ᤂᤢᤏᤧ᤹ ᤏᤡᤛᤢ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹॥ ᤂᤧᤴ ᤛᤠ᤹ᤖᤡᤰ ᤆᤠ᤺ᤵᤐᤠ ᤆᤥ᤺ᤰᤔᤢ ᤁᤧᤗ᤹ᤒᤠ ᤂᤧᤵᤛᤢᤱᤅᤠᤱ ᤘᤠ᤹॥ 23 ᤂᤢᤏᤧ᤹ ᤀᤠᤳᤋᤠᤴ ᤆᤡᤱᤛᤡᤱ. ᤁᤧᤖᤧᤰ ᤁᤢᤈᤡᤱᤛᤡᤱᤔᤠ ᤋᤧᤴᤏᤡᤴ ᤔᤡᤰᤆᤥ ᤔᤧᤳᤋᤧᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤥ ᤀᤡᤱᤄᤱ ᤋᤠᤖᤠᤶᤔᤧ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ᤀᤠᤱ ᤂᤡᤏᤡ᤹ᤏᤢ ᤐᤣ᤺ᤰᤁᤠ॥ ᤂᤧᤴ ᤁᤴ ᤗᤠᤈᤣ᤹ᤀᤥ ᤘᤠ᤹ᤏᤧᤑᤃᤪ ᤕᤜᤢᤍᤠᤒᤠ ᤁᤧᤖᤧᤰ ᤜᤡᤶᤛᤕᤱᤗᤢᤶᤔᤥᤏᤢᤛᤠᤱ ᤁᤥ᤺ᤳᤋᤢᤱ ᤗ᤺ᤳᤋᤢᤱ᤹॥” 24 ᤂᤧᤱᤜᤠ᤹ ᤜᤠᤖᤠᤜᤠᤖᤠ ᤛᤠᤘᤗᤧᤴᤏᤢ᤺ᤸᤗᤧᤀᤠᤱ ᤋᤃᤡ ᤈᤡᤐ ᤗᤧᤵᤔᤠᤱ ᤔᤧᤎᤠᤛᤡᤱ॥ ᤂᤧᤶᤓᤧᤶᤗᤧ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤕᤧᤛᤡᤔᤥᤏᤗᤠᤶ ᤕᤥ ᤗᤠᤱᤃᤧᤴ ᤗᤧᤵᤛᤠᤱᤒᤠ ᤀᤖᤠᤒᤠᤒᤠ ᤔᤠᤀᤥᤏ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤔᤧᤘᤕᤧ॥ 25 ᤜᤧᤰᤁᤩᤠᤱ ᤛᤠᤘᤗᤧᤴ ᤏᤢ ᤁᤢᤔᤏᤠᤜᤠ᤹ᤖᤧ ᤁᤥ᤺ᤵᤔᤠ ᤔᤧᤜᤣ᤺ᤰᤋᤢ॥ ᤍᤠᤀᤢᤍᤧᤸᤗᤧ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤂᤢᤏᤧ᤹ ᤕᤠᤰᤁᤣ᤺ᤰ ᤗᤧᤵᤔᤠᤱ ᤌᤠᤛᤡᤱ. ᤜᤧᤰᤁᤩᤠᤱ ᤕᤧᤛᤡᤔᤥᤏᤗᤠᤶ ᤗᤠᤱᤃᤧᤴ ᤗᤧᤵᤛᤠᤱᤒᤠ ᤔᤠᤀᤥᤏ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤘᤠ᤹ᤔᤠ ᤜᤣ᤺ᤰᤋᤧ॥ ᤛᤠᤘᤗᤖᤧ ᤂᤧᤵᤔᤥ ᤘᤠ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤍᤠᤀᤢᤍᤖᤧ ᤁᤢᤃᤥ᤺ᤳᤇᤧ ᤔᤠᤀᤥᤴᤒᤠ ᤔᤢᤖᤧᤰ ᤂᤠᤖᤧᤰ ᤕᤧ᤺ᤱᤄᤠᤍᤧᤴ ᤗᤧᤵᤛᤠᤱ ᤌᤠᤛᤡᤱ॥ 26 ᤛᤠᤘᤗᤧᤴ ᤁᤥ᤺ᤰᤔᤠᤸᤗᤧ ᤏᤠᤜᤠᤱ ᤗᤧᤵᤔᤠᤱ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤁᤥ᤺ᤰᤔᤠᤸᤗᤧ ᤁᤳᤏᤠᤜᤠᤱ ᤗᤧᤵᤔᤠᤱ ᤐᤥ᤺ᤰᤂᤧᤛᤡ॥ ᤍᤠᤀᤢᤍ ᤏᤢ ᤁᤢᤔᤏᤠᤜᤠ᤹ ᤂᤧᤳᤇᤡᤱᤔᤠ ᤑᤠ᤹ᤀᤠᤱ ᤗᤠᤶᤃᤥ᤺ᤳᤏᤢ ᤔᤧᤒᤳᤇᤧ॥ ᤛᤠᤘᤗᤧᤴ ᤏᤢ ᤁᤢᤔᤏᤠᤜᤠ᤹ ᤂᤢᤴᤇᤡ᤹ ᤋᤧᤶᤛᤧ ᤏᤡ᤺ᤳᤋᤠᤱ ᤏᤡ᤺ᤳᤋᤠᤱ ᤔᤧᤃᤧᤖᤧ॥ 27 ᤂᤧᤒᤩᤠᤱ ᤗᤳᤇᤠ ᤀᤡᤱᤄᤱᤛᤠᤒᤠᤎᤡᤰ ᤛᤠᤘᤗᤖᤧ᤹ᤀᤥ ᤋᤩᤧᤀᤠᤱ ᤔᤧᤳᤋᤢ. “ᤜᤠᤖᤠ ᤑᤧᤖᤧ᤹. ᤌᤣᤀᤠᤱᤓᤧᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤀᤠᤏᤡ᤹ ᤗᤠᤈᤣ᤹ᤀᤥ ᤋᤧᤴᤎᤱ ᤔᤧᤈᤥᤃᤢᤖ ᤔᤧᤕᤠᤰ॥” 28 ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤍᤠᤀᤢᤍᤧᤴ ᤏᤠ᤺ᤵᤔᤠ ᤏᤠ᤹ᤖᤢᤀᤠᤱ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤏᤢ᤺ᤰᤂᤧ॥ ᤜᤧᤰᤁᤣ᤺ᤸᤗᤧ ᤂᤧᤴ ᤋᤧᤴᤏᤡᤴ “ᤛᤣᤗᤠᤜᤠᤔᤠᤗᤣᤁᤥᤌ” ᤔᤧᤔᤧᤳᤋᤢ॥ 29 ᤂᤧᤒᤩᤠᤱ ᤂᤧᤵᤔᤥᤏᤢ ᤍᤠᤀᤢᤍᤧᤴ ᤐᤣ. ᤜᤧᤰᤁᤩᤠᤱ ᤀᤣᤏ-ᤃᤍᤡᤒᤠ ᤕᤰᤜᤠ᤹ᤀᤥ ᤘᤠ᤹ᤔᤠ ᤜᤣ᤺ᤰᤋᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.