᥇ ᤛᤠᤔᤢᤀᤧᤗ 22 - LIFOTNTᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤛᤧᤖᤢᤛᤡᤒᤠ 1 ᤍᤠᤀᤢᤍᤖᤧ ᤃᤠᤋ ᤐᤠᤱᤈᤢᤶᤔᤡᤴ ᤗᤧᤖᤢᤀᤠᤱ ᤀᤍᤢᤸᤗᤠᤔᤒᤠ ᤑᤢᤰᤁᤢᤀᤥ ᤐᤣᤀᤠᤱ ᤆᤡᤱᤛᤡᤱ॥ ᤂᤧᤸᤗᤧ ᤁᤢᤶᤓᤢ᤹ᤛᤡ ᤏᤢ ᤂᤧᤸᤗᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤂᤢᤏᤧ᤹ ᤁᤢᤍᤢᤶᤛᤧ ᤔᤧᤒᤣ॥ 2 ᤋᤢᤰᤂᤣᤀᤥ ᤁᤧᤎᤠᤒᤠ. ᤛᤡᤱᤏᤠᤳᤋᤥ ᤁᤧᤎᤠᤒᤠ ᤏᤢ ᤗᤢᤱᤜᤠᤴ ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ ᤔᤧᤴᤍᤠᤔᤏᤠᤒᤠ ᤔᤏᤠᤜᤠ᤹ ᤜᤵᤔᤧᤴ ᤁᤡᤵ ᤗᤡᤛᤡ ᤕᤠᤖᤡᤰ ᤂᤢᤏᤧ᤹ᤀᤥ ᤔᤧᤈᤢᤵᤛᤧ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤐᤥ᤺ᤰᤂᤧ॥ 3 ᤂᤧᤵᤔᤥᤗᤠᤶ ᤍᤠᤀᤢᤍᤧᤴ ᤔᤥᤀᤠᤒᤒᤠ ᤔᤡᤛ᤻ᤐᤠᤀᤥ ᤐᤣ ᤜᤧᤰᤁᤩᤠᤱ ᤂᤧᤶᤔᤥᤒᤠ ᤜᤠᤱᤅᤡᤴ ᤔᤧᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤗᤠᤃᤡ ᤌᤣ ᤆᤥᤃᤢ ᤂᤧᤴ ᤏᤡ᤺ᤴᤎᤥ ᤔᤧᤶᤒᤥᤱᤅᤣ ᤌᤠᤖᤡᤰ ᤀᤠᤱᤃᤠ᤹ ᤀᤠᤶᤒᤠ ᤏᤢ ᤀᤠᤶᤔᤠ ᤂᤧᤏᤧ᤹ᤀᤥ ᤕᤢᤱᤛᤡᤖᤖᤥ॥” 4 ᤂᤧᤒᤩᤠᤱ ᤍᤠᤀᤢᤍᤖᤧ ᤁᤢᤶᤒᤠ ᤏᤢ ᤁᤢᤶᤔᤠ ᤔᤥᤀᤠᤒᤒᤠ ᤜᤠᤱᤜᤡᤶᤔᤥ ᤕᤢᤰᤂᤢᤎᤛᤡ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤁᤢᤕᤰᤁᤥ ᤕᤢᤅᤧ ᤌᤠᤖᤡᤰ ᤂᤧᤱᤜᤠ᤹ ᤜᤠᤱᤜᤡᤶᤔᤥᤀᤣ ᤕᤢᤅᤧᤛᤡ॥ 5 ᤁᤖ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤃᤠᤍᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤂᤧᤏᤧ᤹ ᤕᤰᤁᤥ ᤔᤧᤕᤢᤅᤧᤴᤏᤧ᤹॥ ᤜᤠᤖᤠ ᤕᤜᤢᤍᤠ ᤗᤠᤈᤣ᤹ ᤐᤣᤃᤧ᤹॥” ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤧᤴ ᤜᤠᤖᤣᤋᤒᤠ ᤋᤠᤶᤓᤢᤱᤅᤥ ᤐᤣ॥ 6 ᤀᤠᤸᤗ ᤛᤠᤘᤗᤖᤧ ᤍᤠᤀᤢᤍ ᤏᤢ ᤂᤢᤏᤧ᤹ ᤁᤢᤔᤏᤠᤜᤠ᤹ ᤏᤡᤔᤧᤎᤠᤒᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤵᤛᤢ॥ ᤛᤠᤘᤗᤧᤴ ᤃᤡᤒᤠᤒᤠ ᤁᤥ᤺ᤰᤔᤠᤸᤗᤧ ᤁᤢᤈᤱᤅᤥᤒᤠ ᤜᤢᤶᤒᤧᤵᤐᤠ ᤛᤡᤱᤒᤢᤱᤅᤡᤸᤗᤧ ᤁᤢᤛᤡ᤺ᤰᤋᤥ ᤁᤢᤜᤢᤰᤁᤥ ᤗᤠ᤺ᤰᤁᤡᤴ ᤕᤠᤱᤛᤡᤱᤅᤠᤱ ᤕᤢᤅᤧ॥ ᤂᤧᤸᤗᤧ ᤁᤧᤖᤧᤰ ᤛᤢᤜᤠᤱᤕᤢᤰᤐᤠᤜᤠ᤹ ᤁᤢᤄᤡᤖᤡ ᤔᤧᤕᤧᤒᤧ॥ 7 ᤛᤠᤘᤗᤖᤧ ᤂᤧᤴ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ. “ᤒᤡᤏᤩᤠᤔᤡᤏᤡᤛᤣ. ᤀᤠᤒᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤠᤶᤔᤧ᤹॥ ᤕᤡᤛᤤᤖᤧ ᤁᤢᤛ᤻ᤛᤠ᤺ᤸᤗᤧ ᤂᤧᤏᤡ᤹ ᤁᤧᤖᤧᤰ ᤐᤩᤠᤱᤛᤡᤜᤠ᤹ ᤏᤢ ᤆᤧᤸᤗᤧᤰᤛᤣ᤹ ᤀᤡᤰᤌᤡᤰ ᤁᤧᤒᤡᤖᤡᤒᤡ᥅ ᤀᤡ ᤜᤧᤴᤇᤡᤱ ᤏᤢ ᤁᤡᤵ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤔᤥᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤏᤡᤱᤛᤠᤱ ᤁᤧᤈᤥᤃᤢᤶᤒᤡ᥅ 8 ᤂᤧᤸᤗᤧᤆᤥᤃᤢᤸᤗᤧᤀᤣ ᤂᤧᤏᤡ᤹ ᤁᤧᤖᤧᤰᤗᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤆᤧᤶᤓᤴ ᤁᤧᤈᤥᤃᤢᤶᤒᤠ ᤔᤣ᤺ᤶᤒᤡ᥅ ᤀᤠᤱᤃᤠ᤹ ᤀᤠᤛ᤻ᤛᤠ᤺ᤸᤗᤧ ᤕᤡᤛᤤᤖᤧ ᤁᤢᤛ᤻ᤛᤠ ᤍᤠᤀᤢᤍᤧᤴᤏᤢ ᤋᤅᤧᤒᤠᤀᤠᤱ ᤂᤧᤏᤡ᤹ ᤁᤧᤖᤧᤰᤗᤧ ᤕᤠᤵᤔᤡ ᤁᤧᤶᤔᤧᤳᤋᤡᤴ᥄ ᤂᤧᤏᤡ᤹ᤗᤢᤶᤔᤥ ᤀᤠᤋᤡᤸᤗᤧᤀᤠᤱ ᤀᤠᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤌᤣᤀᤠᤱ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴ॥ ᤀᤠᤱᤃᤠ᤹ ᤀᤠᤛ᤻ᤛᤠ᤺ᤸᤗᤧᤀᤣ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤧᤴ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤑᤥ᤺ᤰᤂᤢᤀᤠᤱ ᤀᤠᤱᤃᤠ᤹ ᤛᤧᤵᤔᤠ ᤑᤠ᤹ᤀᤠᤱ ᤜᤢᤛᤢ ᤂᤧᤴᤏᤠᤱ ᤕᤠᤵᤔᤡ ᤁᤧᤶᤔᤧᤳᤋᤡᤴ॥” 9 ᤁᤖ ᤛᤠᤘᤗᤖᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤏᤢ ᤁᤧᤕᤧᤵᤐᤠ ᤀᤣᤍᤥᤔᤡ ᤍᤥᤀᤣᤃᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤕᤡᤛᤤᤖᤧ ᤁᤢᤛ᤻ᤛᤠᤴ ᤀᤜᤡᤋᤢᤒᤖᤧ ᤁᤢᤛ᤻ᤛᤠ ᤀᤜᤡᤔᤣᤗᤣᤰᤁᤧᤴ ᤘᤠ᤹ᤒᤠ ᤏᤥᤒ ᤐᤠᤱᤓᤣ᤹ᤀᤥ ᤑᤧᤖᤧᤖ ᤐᤳᤇᤧᤒᤠ ᤏᤡᤛᤢᤱ॥ 10 ᤀᤜᤡᤔᤧᤗᤧᤰᤁᤡᤸᤗᤧ ᤍᤠᤀᤢᤍᤖᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤠᤴ ᤛᤢᤈᤠ ᤏᤠ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤸᤗᤧ ᤆᤠᤔᤠ ᤁᤢᤈᤠ ᤏᤢ ᤐᤗᤡᤛ᤻ᤋᤡ ᤃᤥᤗᤩᤋᤖᤧ ᤁᤢᤍᤠᤓᤣ᤺ᤴᤏᤠᤱ ᤍᤠᤀᤢᤍᤧᤴ ᤐᤡᤖᤢ॥” 11 ᤂᤧᤶᤒᤩᤠᤱ ᤛᤠᤘᤗᤖᤧ ᤏᤥᤒᤀᤥ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤜᤡᤔᤣᤗᤣᤰᤁᤧᤴ ᤏᤢ ᤏᤥᤒᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤜᤡᤶᤛᤕᤱᤜᤠ᤹ ᤀᤢ᤺ᤵᤐᤠᤱᤄᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤛᤠᤘᤗ ᤜᤠᤱᤅᤡᤸᤗᤧ ᤁᤢᤍᤃᤡ ᤔᤧᤈᤢᤵᤛᤧ॥ 12 ᤛᤠᤘᤗᤖᤧ ᤀᤜᤡᤔᤣᤗᤣᤰᤁᤧᤴ ᤔᤧᤳᤋᤢ. “ᤀᤜᤡᤋᤢᤒᤖᤧ ᤁᤢᤛ᤻ᤛᤠᤀᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧ᤹॥” “ᤀᤥᤃᤏᤢ ᤀᤠᤍᤠᤱᤒᤣ” ᤗ᤹ᤖᤡᤰ ᤀᤜᤡᤔᤣᤗᤣᤁᤖᤧ ᤏᤥᤃᤵ ᤐᤡᤖᤢ॥ 13 ᤛᤠᤘᤗᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤏᤢ ᤕᤡᤛᤤᤖᤧ ᤁᤢᤛ᤻ᤛᤠ᤺ᤸᤗᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤌᤣᤀᤠᤱ ᤆᤧᤶᤓᤴ ᤁᤧᤈᤥᤃᤢᤛᤡ᥅ ᤂᤧᤏᤧ᤹ ᤂᤧᤴ ᤌᤣᤀᤠᤱ ᤆᤠᤔᤠ ᤁᤢᤈᤠ ᤏᤢ ᤋᤠᤓᤣᤴ ᤁᤧᤒᤡᤖᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤢᤈᤠ ᤁᤧᤏᤠ᤺ᤰᤋᤢᤒᤠᤒᤣ᥅ ᤀᤠᤸᤗᤥ ᤂᤧᤴ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤴ ᤕᤧᤶᤔᤥ ᤀᤠᤱᤃᤠ᤹ ᤛᤧᤵᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤛᤢᤰᤁᤠᤖ ᤕᤢᤱ॥” 14 ᤀᤜᤡᤔᤧᤗᤧᤰᤁᤡᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤠᤖᤧ ᤁᤧᤖᤧᤰ ᤁᤧᤛᤣᤘᤥᤖᤥᤒᤠᤜᤠ᤹ᤀᤥ ᤍᤠᤀᤢᤍ ᤜᤧᤰᤋᤱᤒᤠ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤛᤢᤶᤒᤥᤎᤠᤛᤠᤒᤠ ᤔᤏᤠ. ᤜᤠᤱᤅᤡᤸᤗᤧᤀᤣ ᤁᤢᤶᤒᤠᤱᤗᤢᤔᤡ᤹. ᤀᤠᤍᤠᤱᤒᤠ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤌᤰᤐᤣᤒᤠ. ᤀᤠᤍᤠᤱᤒᤠᤖᤧ ᤁᤧᤜᤡᤶᤛᤕᤱᤅᤥ ᤔᤡᤱᤛᤥ ᤀᤡᤱᤎᤠᤱ ᤁᤧᤄᤥᤒᤠ ᤍᤠᤀᤢᤍ ᤜᤧᤰᤋᤱᤒᤠ ᤔᤏᤠ ᤘᤣ᤹ ᤜᤠᤳ ᤘᤠ᤹ᤒᤣ᥅ 15 ᤀᤰᤋᤱᤒᤠ ᤕᤧᤶᤔᤥ ᤂᤧᤸᤗᤧ ᤁᤢᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤛᤢᤈᤠ ᤏᤠ᤺ᤰᤋᤢᤱᤒᤠᤴ ᤌᤡᤰᤛᤡᤃᤣᤰᤐᤠᤒᤡ᥅ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤏᤢ ᤀᤠᤜᤡᤶᤛᤕᤱᤜᤠ᤹ ᤑᤥᤋᤩᤠ ᤀᤠᤱᤃᤢ᤺ᤳᤋᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤍᤠᤱᤒᤠᤖᤧ ᤁᤧᤍᤰᤗᤧᤱᤘᤠᤀᤥ ᤁᤧᤘᤠ᤹ᤒᤠ ᤆᤧᤶᤓᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤠ᤹ᤀᤠᤖᤥ॥” 16 ᤁᤖ ᤜᤠᤱᤅᤡᤸᤗᤧ ᤔᤧᤳᤋᤢ᤹. “ᤀᤜᤡᤔᤧᤗᤧᤰᤁᤣ᥄ ᤂᤧᤏᤧ᤹ ᤏᤢ ᤁᤧᤜᤡᤶᤛᤕᤱᤜᤠ᤹ ᤁᤧᤖᤧᤰ ᤛᤡᤔᤠᤀᤣ ᤐᤥᤱᤗᤥ॥” 17 ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤒᤣᤛᤠᤱ ᤁᤢᤄᤡᤖᤡ ᤁᤧᤕᤧᤵᤐᤠ ᤁᤢᤃᤶᤒᤪᤠᤱᤜᤠ᤹ ᤔᤧᤳᤋᤢᤛᤡ. “ᤐᤣᤃᤧᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤧᤖᤧᤶᤛᤡᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤀᤠᤱ ᤍᤠᤀᤢᤍ ᤗᤧᤵᤔᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤍᤠᤀᤢᤍᤧᤴ ᤂᤧᤳᤇᤡᤱᤅᤧᤖ ᤐᤳᤇᤧᤒᤠ ᤔᤧᤏᤡᤛᤢᤛᤠᤱ ᤀᤠᤱᤃᤠ᤹ ᤔᤧᤶᤔᤧᤳᤋᤠᤱᤅᤡᤴ॥” ᤁᤖ ᤜᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤧᤵᤔᤠᤛᤡ ᤔᤧᤴᤍᤧᤴᤍᤧᤴ॥ 18 ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤀᤣᤍᤥᤔᤡ ᤍᤥᤀᤣᤃᤧᤴ ᤔᤧᤳᤋᤢ. “ᤍᤥᤀᤣᤃᤣ. ᤐᤣᤃᤧ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤧᤖᤧᤛᤧ᤹॥” ᤂᤧᤒᤩᤠᤱ ᤀᤣᤍᤥᤔᤡ ᤍᤥᤀᤣᤃᤧᤴ ᤐᤣᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤴ ᤕᤧᤴ ᤂᤧᤸᤗᤧ ᤕᤧᤵᤐᤥᤱᤅᤠᤱ ᤅᤠᤛᤡ ᤏᤠᤀᤡᤏᤠᤛᤢ᤺ᤳ ᤀᤣᤐᤥᤍ ᤋᤣᤳ ᤁᤧᤈᤠᤱᤒᤠ ᤔᤏᤠᤜᤠ᤹ ᤛᤧᤖᤢᤛᤡ॥ 19 ᤜᤧᤰᤁᤩᤠᤱ ᤂᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤏᤥᤒᤒᤠ ᤁᤧᤖᤧᤰ ᤁᤢᤛᤰᤔᤠ ᤁᤧᤕᤠᤰᤐᤠ ᤌᤰᤛᤠᤜᤠ᤹ ᤋᤠᤓᤣ᤺ᤸᤗᤧ ᤆᤩᤧᤵᤋᤢ ᤛᤧᤖᤢᤛᤡ—ᤕᤧᤶᤒᤡᤳᤇᤠ. ᤔᤧᤴᤇᤢᤔᤠ. ᤜᤡᤴᤈᤠ᤹ᤒᤡᤳᤇᤠ᤹. ᤏᤢᤃᤧᤎᤢᤱᤒᤠ ᤀᤅᤧ᤺ᤰᤘᤠ. ᤁᤢᤶᤒᤠᤒᤠ ᤁᤢᤶᤔᤠᤔᤠ ᤐᤡᤳ. ᤀᤍᤱ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠ ᤁᤧᤖᤧᤰ ᤛᤧᤖᤢᤛᤡ॥ 20 ᤀᤜᤡᤔᤧᤗᤧᤰᤁᤧᤸᤗᤧ ᤁᤢᤛ᤻ᤛᤠ. ᤀᤜᤡᤋᤢᤒᤖᤧ ᤁᤢᤶᤔᤧᤴᤇᤠ᤹ ᤀᤒᤡᤕᤠᤌᤠᤖᤧᤴ ᤂᤧᤳᤇᤡᤱᤅᤠᤱ ᤍᤠᤀᤢᤍᤖᤧᤀᤥ ᤐᤣ॥ 21 ᤛᤠᤘᤗᤖᤧ ᤀᤠᤰᤂᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤧᤖᤢᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤸᤗᤧ ᤍᤠᤀᤢᤍᤧᤴ ᤆᤧᤰᤋᤢ॥ 22 ᤜᤶᤓᤩᤠᤱ ᤍᤠᤀᤢᤍᤖᤧ ᤂᤧᤴ ᤔᤧᤳᤋᤢ. “ᤂᤧᤴ ᤕᤧᤴᤏᤥ ᤀᤣᤍᤥᤔᤡ ᤍᤥᤀᤣᤃᤧᤴ ᤂᤧᤵᤔᤥᤀᤣ ᤘᤕᤧ. ᤜᤧᤰᤁᤩᤠᤱ ᤂᤧᤸᤗᤧ ᤛᤠᤘᤗᤧᤴ ᤔᤧᤳᤋᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱᤅᤠᤱ ᤘᤕᤧ॥ ᤂᤧᤏᤧ᤹ ᤁᤧᤶᤒᤠ ᤏᤢ ᤁᤢᤜᤡᤶᤛᤕᤱ ᤁᤧᤖᤧᤰᤗᤧ ᤂᤢᤏᤡ᤹ ᤛᤡᤔᤧᤴ ᤀᤠᤱᤃᤠ᤹ ᤆᤥᤃᤢᤱᤅᤡᤸᤗᤧᤀᤣ ᤐᤥ᤺ᤰᤂᤧᤒᤠᤖᤥ॥ 23 ᤂᤧᤏᤧ᤹ ᤀᤠᤱᤃᤠ᤹ᤏᤢᤀᤣ ᤁᤵᤔᤥ ᤕᤢᤅᤧ᤹. ᤔᤧᤃᤡᤛᤧᤴᤏᤧ᤹॥ ᤂᤧᤏᤧ᤹ ᤛᤧᤵᤔᤠ ᤁᤧᤃᤥ᤺ᤵᤐᤧᤸᤗᤧ ᤀᤠᤱᤃᤠ᤹ᤀᤠᤱ ᤛᤧᤵᤔᤠᤀᤣ ᤁᤥ᤺ᤳᤋᤠᤱᤅᤠᤱ ᤘᤠ᤹॥ ᤂᤧᤏᤧ᤹ ᤀᤠᤱᤃᤠ᤹ᤏᤢᤀᤣ ᤁᤧᤕᤢᤱᤅᤡᤸᤗᤧ ᤁᤧᤜᤡᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.