᥇ ᤛᤠᤔᤢᤀᤧᤗ 21 - LIFOTNT

ᤍᤠᤀᤢᤍᤧᤴ ᤛᤠᤘᤗᤗᤠᤶ ᤂᤧᤳᤇᤡᤱ

¹ ᤍᤠᤀᤢᤍᤧᤴ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤜᤡᤔᤣᤗᤣᤁ ᤘᤕᤧᤒᤠ ᤏᤥᤒ ᤕᤧᤰᤕᤰᤁᤥ ᤂᤧᤳᤇᤡᤱᤅᤠᤱ ᤐᤣ॥ ᤜᤧᤰᤁᤩᤠᤱ ᤀᤜᤡᤔᤧᤗᤧᤰᤁᤧᤸᤗᤧ ᤍᤠᤀᤢᤍᤧᤴ ᤏᤡᤛᤢᤸᤗᤧ ᤁᤢᤃᤡᤔᤠᤸᤗᤧ ᤆᤡᤖᤡᤶᤗᤡᤶᤏᤠ ᤕᤰᤂᤧᤖ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤀᤧᤰᤗᤣ᤺ᤰ ᤁᤧᤍᤩᤧᤒᤠᤒᤣ᥅ ᤌᤣᤀᤠᤱ ᤂᤧᤏᤧ᤹ᤏᤢ ᤘᤣ᤹ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤜᤥ᤺ᤵᤐᤠᤒᤣ᥅”

² ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤜᤡᤔᤣᤗᤣᤰᤁᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤣ᤺ᤰᤛᤠ ᤋᤩᤠᤱ. ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤕᤠ᤺ᤶᤒᤰ ᤆᤥ᤺ᤰᤛᤧ ᤐᤠᤱᤄᤠᤱᤅᤠᤱ ᤘᤠ᤹॥ ᤂᤢᤏᤧ᤹ ᤆᤥᤃᤧ᤹ ᤔᤧᤳᤋᤠᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤌᤣᤀᤠᤱ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤗᤠᤶ ᤌᤠᤛᤡᤱᤅᤠᤱᤅᤡᤸᤗᤧ ᤀᤠᤶᤓᤠ ᤁᤴ ᤋᤧᤴᤏᤥ ᤋᤢᤔᤡᤖᤥ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹॥

³ ᤀᤠᤸᤗ ᤂᤧᤏᤧ᤹ ᤁᤧᤜᤢᤰᤁᤥ ᤌᤣ ᤘᤠ᤹᥅ ᤅᤠᤛᤡ ᤂᤖᤧ᤺ᤱ ᤐᤡᤖᤠᤱᤅᤧ᤹ ᤀᤡᤃᤪ ᤂᤧᤏᤧ᤹ᤏᤢ ᤌᤣ ᤘᤠ᤹ ᤜᤠᤒᤠ ᤂᤧᤴ ᤐᤡᤖᤠᤱᤅᤧ᤹॥”

⁴ ᤁᤖ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤆᤠᤔᤠ ᤑᤠ᤹ᤀᤠᤱ ᤗᤧ᤺ᤱᤔᤏᤠᤒᤠ ᤂᤖᤧ᤺ᤱ ᤔᤧᤃᤳᤋᤠᤴ॥ ᤁᤖ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤗᤰ ᤘᤠ᤹॥ ᤂᤧᤏᤧ᤹ ᤁᤧᤔᤏᤠᤜᤠ᤹ ᤔᤧᤴᤇᤢᤔᤠᤜᤠ᤹ᤏᤢ ᤔᤧᤴᤀᤡᤶᤔᤣ ᤔᤧᤘᤠ᤹ᤏᤧᤓᤃᤪ ᤂᤧᤴ ᤂᤖᤧ᤺ᤱᤅᤡᤴ ᤋᤣ᤹ᤔᤠ ᤁᤧᤛᤢᤰᤋᤢ᤹॥”

⁵ ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤴ ᤔᤧᤳᤋᤢ. “ᤂᤧᤱᤜᤠ᤹ ᤔᤧᤴᤇᤢᤔᤠᤜᤠ᤹ᤏᤢ ᤔᤧᤴᤀᤡᤶᤔᤣ ᤔᤧᤘᤠ᤹॥ ᤆᤢᤰᤐᤠ ᤕᤠ᤺ᤶᤒᤰᤁᤥ ᤔᤧᤒᤣ᤺ᤰᤁᤡᤸᤗᤧᤀᤣ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤌᤡᤶ ᤁᤢᤀᤡᤛᤡᤰ ᤀᤠᤒᤠᤅᤣ ᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤡᤸᤗᤧ ᤀᤰᤋᤱᤒᤠ ᤕᤶᤒᤠ ᤕᤠ᤺ᤶᤒᤰᤁᤥ ᤔᤧᤒᤣ᤺ᤰᤁᤡᤸᤗᤧ ᤂᤧᤴᤏᤢ᤺ᤸᤗᤧ ᤛᤠ᤹ᤖᤡᤰ ᤛᤢᤳᤌᤥ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤠ᤹॥”

⁶ ᤂᤧᤵᤔᤥ ᤘᤣ᤹ ᤂᤖᤧ᤺ᤱ ᤜᤥ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤍᤠᤀᤢᤍᤧᤴ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤂᤖᤧ᤺ᤱᤅᤡᤴ ᤐᤡᤖᤢ. ᤂᤧᤴ ᤛᤣᤛᤣ ᤂᤖᤧ᤺ᤱᤅᤡᤴ ᤆᤵᤋᤧᤴᤏᤥᤗᤠᤶ ᤔᤧᤗ᤺ᤳᤋᤢᤀᤠᤱ ᤁᤧᤃᤥᤒᤠ ᤂᤖᤧ᤺ᤱᤅᤡᤸᤗᤧ ᤔᤧᤗᤧᤰᤋᤢᤀᤠᤱ ᤏᤧᤛ᤻ᤛᤧ॥

⁷ ᤀᤠᤸᤗ ᤂᤧᤸᤗᤧ ᤕᤠ᤺ᤴᤍᤡᤰ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤠᤎᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤍᤃᤡ ᤂᤧᤵᤔᤥ ᤕᤠ᤺ᤰᤋᤧᤀᤠᤱ ᤘᤕᤧ॥ ᤂᤧᤸᤗᤧ ᤁᤢᤔᤡᤱ ᤀᤣᤍᤥᤔᤡ ᤍᤥᤀᤣᤃ ᤘᤕᤧ. ᤜᤧᤰᤁᤩᤠᤱ ᤂᤧᤴ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤀᤥ ᤁᤢᤎᤧᤃᤣᤰ ᤘᤕᤧ॥

⁸ ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤜᤡᤔᤣᤗᤣᤰᤁᤧᤴ ᤔᤧᤳᤋᤢ. “ᤂᤧᤏᤧ᤹ ᤗᤠ᤺ᤰ ᤀᤡᤃᤪ ᤋᤠᤓᤣ ᤁᤧᤃᤳᤋᤢᤒᤡ᥅ ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤛᤧ ᤔᤡᤸᤗᤡᤰ ᤗᤥ᤺ᤰᤋᤧ᤹ ᤔᤧᤳᤋᤠᤱᤒᤠᤸᤗᤧ ᤀᤠᤱᤃᤠ᤹ ᤗᤠ᤺ᤰ ᤀᤡᤃᤪ ᤋᤠᤓᤣ ᤐᤱᤔᤠ ᤔᤧᤄᤥᤛᤢᤱᤅᤡᤴ॥”

⁹ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤧᤳᤋᤢ. “ᤀᤣᤗᤠᤜᤒᤠ ᤋᤧᤶᤒᤣ᤹ᤀᤥ ᤂᤧᤏᤧ᤹ ᤁᤧᤛᤧᤖᤢᤒᤠ ᤐᤗᤡᤛ᤻ᤋᤡ ᤃᤥᤗᤩᤋᤖᤧ ᤁᤢᤍᤠᤓᤣᤴ ᤁᤵᤔᤥ ᤘᤠ᤹॥ ᤂᤧᤴ ᤀᤣᤐᤥᤍ ᤋᤣ᤺ᤳᤋᤡᤸᤗᤧ ᤁᤢᤀᤣᤃᤠᤱ ᤆᤡᤖᤡᤰᤁᤡᤸᤗᤧ ᤁᤡᤵᤔᤏᤠᤀᤠᤱ ᤏᤧ᤹᤺॥ ᤂᤧᤴ ᤁᤧᤍᤣ᤹ᤖᤢᤏᤧᤓᤃᤪ ᤋᤣ᤹ᤖᤧ॥ ᤁᤵᤔᤥ ᤘᤣ᤹ ᤋᤠᤓᤣ ᤜᤥᤵ॥” ᤍᤠᤀᤢᤍᤖᤧ ᤔᤧᤳᤋᤢ. “ᤂᤧᤴ ᤜᤧᤰᤋᤱᤒᤠ ᤘᤣ᤹ ᤋᤠᤓᤣᤀᤣ ᤜᤥᤵ॥ ᤀᤠᤱᤃᤠ᤹ ᤜᤠᤒᤠ ᤂᤧᤴ ᤐᤡᤖᤠᤱᤅᤧ᤹॥”

¹⁰ ᤂᤧᤴ ᤕᤧᤴ ᤍᤠᤀᤢᤍᤧᤴ ᤂᤧᤳᤇᤡᤱᤅᤠᤱ ᤗᤠᤶᤎᤠᤛᤡᤱ. ᤜᤧᤰᤁᤩᤠᤱ ᤃᤠᤋᤒᤠ ᤜᤠᤱ ᤀᤠᤁᤡᤛᤖᤧᤔᤥ ᤐᤣ॥

¹¹ ᤁᤖ ᤀᤠᤁᤡᤛᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤍᤠᤀᤢᤍᤧᤴ ᤂᤧᤵᤔᤥ ᤂᤢᤏᤡ᤹ ᤛᤡᤖᤠ᤹ᤔᤧᤎᤠᤅᤧᤴ॥ ᤂᤧᤱᤜᤠ᤹ᤖᤧ ᤀᤠᤁᤡᤛ ᤜᤠᤱᤅᤡᤴ ᤔᤧᤔᤧᤳᤋᤢ. “ᤁᤴ ᤔᤏᤠ᤺ᤱᤃ ᤁᤴ ᤗᤠᤈᤣ᤹ᤒᤠ ᤜᤠᤱ ᤍᤠᤀᤢᤍᤧᤴ ᤔᤣ᤺ᤶᤒᤡ᥅ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤴᤇᤢᤔᤠᤜᤠ᤹ ᤔᤧᤗᤠ᤺ᤰᤂᤧᤖ ᤀᤰᤂᤣ ᤐᤠ᤺ᤳᤏᤢ ᤛᤠᤶᤔᤧᤗᤥᤖᤧᤀᤠᤱ ᤘᤕᤧ. ‘ᤛᤠᤘᤗᤖᤧ ᤜᤧᤴᤇᤡᤱ ᤜᤧᤴᤇᤡᤱ ᤛᤧᤖᤢᤛᤡ. ᤁᤖ ᤍᤠᤀᤢᤍᤖᤧ ᤗᤠᤅᤧᤴᤇᤡᤱ ᤗᤠᤅᤧᤴᤇᤡᤱ ᤛᤧᤖᤢᤛᤡ॥’”

¹² ᤁᤴ ᤐᤠ᤺ᤴᤏᤡᤴ ᤍᤠᤀᤢᤍᤖᤧ ᤁᤢᤏᤡᤱᤘᤠ᤹ᤀᤥ ᤕᤢᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤃᤠᤋᤒᤠ ᤜᤠᤱ ᤀᤠᤁᤡᤛᤧᤴᤏᤢ ᤛᤠ᤹ᤖᤡᤰ ᤁᤡᤛᤧ॥

¹³ ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤀᤣ ᤁᤧᤏᤠᤱᤒᤠ ᤜᤧᤰᤁᤣ ᤁᤧᤗ᤹ᤒᤠ ᤀᤡᤳᤗᤠ ᤆᤥᤃᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤗᤠᤶᤎᤣ᤺ᤳᤋᤡᤸᤗᤧ ᤏᤧᤵᤔᤠᤱ ᤗᤧᤵᤔᤠᤱ ᤀᤢᤃᤢᤖ ᤁᤢᤔᤢᤎᤥᤀᤥ ᤁᤢᤎᤩᤠ᤺ᤳᤋᤡᤴ ᤘᤠᤍᤣ᤺ᤴᤍᤢᤖ ᤂᤢᤏᤧ᤹ ᤁᤧᤏᤠᤱᤒᤠ ᤜᤧᤰᤋᤱᤒᤠᤀᤣ ᤐᤥ᤺ᤰᤂᤧ॥

¹⁴ ᤂᤧᤓᤧᤸᤗᤧ ᤀᤠᤁᤡᤛᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤱᤃ ᤁᤧᤏᤠᤱᤒᤠᤏᤡᤖᤧᤇ॥ ᤂᤧᤴ ᤌᤣᤀᤠᤱ ᤀᤠᤱᤃᤠ᤹ᤀᤥ ᤁᤧᤍᤠᤖᤢᤶᤒᤠ᥅

¹⁵ ᤀᤠᤱᤃᤠ᤹ᤀᤥ ᤌᤣ ᤁᤧᤏᤠᤱᤒᤠᤜᤠ᤹ ᤔᤧᤛᤢ᤺ᤶᤒᤡ᥅ ᤜᤧᤰᤁᤩᤠᤱ ᤂᤧᤏᤡ᤹ ᤁᤴᤏᤡᤴ ᤀᤠᤱᤃᤠ᤹ ᤋᤢᤰᤂᤣ ᤀᤠᤈᤠ᤺ᤳᤇᤧ ᤁᤧᤍᤠᤖᤢᤶᤒᤠᤒᤡ᥅ ᤁᤴᤜᤧᤰᤍᤱᤒᤠᤴ ᤀᤠᤜᤡᤶᤔᤥ ᤀᤠᤱᤃᤠ᤹ ᤕᤢᤰᤂᤢᤱᤒᤠᤒᤡ᥅”