᥇ ᤛᤠᤔᤢᤀᤧᤗ 20 - LIFOTNTᤈᤥᤏᤠᤌᤠᤏᤧᤸᤗᤧ ᤍᤠᤀᤢᤍᤧᤴ ᤑᤠ᤹ᤖᤢ 1 ᤂᤧᤒᤩᤠᤱ ᤍᤠᤀᤢᤍᤧᤴ ᤖᤠᤔᤠᤒᤠ ᤏᤤᤕᤥᤋᤗᤠᤶ ᤂᤧᤳᤇᤡᤱᤅᤠᤱ ᤈᤥᤏᤠᤌᤠᤏᤖᤥ ᤐᤣ॥ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤱᤃᤠ᤹ ᤌᤣ ᤆᤥᤃᤢᤱᤅᤠᤱ ᤘᤠ᤹ᤒᤣ᥅ ᤀᤠᤱᤃᤠ᤹ᤏᤢ ᤌᤣ ᤀᤠᤵᤋᤡᤰ ᤘᤠ᤹ᤒᤣ᥅ ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤌᤣ ᤑᤧᤴᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤀᤠᤱ ᤂᤢᤏᤧ᤹ ᤛᤧᤵᤔᤠ ᤁᤥ᤺ᤳᤋᤠ᤹ᤒᤠᤒᤣ᥅” 2 ᤈᤥᤏᤠᤌᤠᤏᤖᤧ ᤔᤧᤳᤋᤢ. “ᤀᤰᤋᤱᤒᤠ ᤔᤧᤒᤥᤱᤏᤧᤴᤗ॥ ᤂᤧᤏᤧ᤹ ᤁᤧᤴᤇᤡᤏᤧᤴ॥ ᤆᤢᤰᤐᤠ ᤕᤠ᤺ᤶᤒᤰᤛᤠᤱ ᤕᤶᤒᤠ ᤕᤠ᤺ᤶᤒᤰᤛᤠᤱ ᤀᤠᤶᤒᤠᤖᤧ ᤀᤠᤱᤃᤠ᤹ ᤛᤣ᤺ᤴᤔᤧᤴᤍᤥᤀᤣ ᤕᤠ᤺ᤶᤒᤰ ᤔᤧᤈᤥᤃᤢᤴ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤏᤡ᤺ᤴᤎᤥ ᤘᤠ᤹॥ ᤀᤠᤱᤃᤠ᤹ ᤀᤠᤶᤒᤠᤖᤧ ᤀᤰᤋᤱᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ᤗᤠᤶ ᤀᤠᤰᤂᤣᤗ᤹ᤖᤡᤰ ᤆᤡᤰᤂᤢᤒᤣ᥅ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠ ᤔᤣ᤺ᤴ॥” 3 ᤁᤖ ᤍᤠᤀᤢᤍᤖᤧ ᤔᤠᤱᤜᤧᤰᤛᤡᤱᤗ ᤐᤠ᤺ᤳᤋᤢ. “ᤂᤧᤏᤧ᤹ ᤁᤧᤶᤒᤠᤖᤧ ᤁᤢᤏᤡᤱᤘᤠ᤹ᤀᤥ ᤏᤡᤱᤘᤠ᤹ ᤀᤡ᤺ᤳᤇᤡᤱᤅᤠᤱ ᤘᤠ᤹. ‘ᤈᤥᤏᤠᤌᤠᤏᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴᤗ ᤂᤧᤴ ᤐᤠ᤺ᤴᤏᤡᤴ ᤂᤧᤵᤛᤢᤸᤗᤧ ᤁᤢᤏᤡᤱᤘᤠ᤹ ᤋᤢᤰ॥’ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤠᤱᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤠ᤹॥ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤏᤢ ᤂᤧᤏᤧ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤜᤧᤰᤁᤣ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹ ᤀᤠᤱᤃᤠ᤹ ᤀᤠᤛᤡᤔᤧᤴ ᤏᤡ᤺ᤳᤋᤠᤱ ᤘᤠ᤹॥” 4 ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤔᤧᤳᤋᤢ᤹. “ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤁᤧᤏᤡᤱᤘᤠ᤹ ᤘᤠ᤹. ᤀᤠᤱᤃᤠ᤹ ᤜᤠᤒᤠ ᤂᤧᤴ ᤁᤧᤗᤠᤃᤡ ᤆᤥᤃᤢᤱ᤹॥” 5 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤔᤧᤳᤋᤢ. “ᤋᤠ᤺ᤴᤍᤡᤰᤁ ᤗᤠᤍᤢᤵ ᤋᤱᤏᤠᤶ. ᤜᤧᤰᤁᤩᤠᤱ ᤀᤠᤱᤃᤠ᤹ ᤜᤠᤱᤅᤡᤴᤏᤢ ᤛᤥᤖᤡᤰ ᤕᤢᤱᤔᤠᤀᤠᤱ ᤆᤠᤈᤠᤔᤠ ᤐᤥᤱ॥ ᤁᤖ ᤀᤠᤳᤇᤧᤴᤍᤠᤴ ᤕᤢ᤺ᤴᤇᤡᤰ ᤌᤠᤖᤡᤰ ᤐᤩᤠᤱᤛᤡᤀᤥ ᤐᤣ᤺ᤰᤁᤠᤀᤠᤱ ᤆᤡᤱᤛᤡᤱᤀᤧ॥ 6 ᤂᤧᤏᤧ᤹ ᤁᤧᤶᤒᤠᤖᤧ ᤀᤠᤱᤃᤠ᤹ ᤜᤥ᤺ᤵᤐᤠᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤛᤧ᤺ᤴᤗᤠᤵᤐᤠᤏᤧᤑᤃᤪ ᤀᤰᤂᤣ ᤔᤧᤳᤋᤧ᤹. ‘ᤒᤣᤌᤗᤧᤜᤧᤔ ᤁᤢᤜᤡᤶᤔᤥ ᤌᤠᤖᤡᤰ ᤆᤄᤵ ᤐᤣ᤺ᤰᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤍᤠᤀᤢᤍᤖᤧ ᤀᤠᤱᤃᤠ᤹ ᤏᤠᤛᤡᤱᤕᤧᤶ ᤏᤠ᤺ᤰᤋᤠᤱ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤁᤢᤜᤡᤶᤛᤕᤱᤒᤠ ᤁᤧᤖᤧᤰᤗᤧ ᤋᤱᤒᤣ᤹ ᤌᤰᤔᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤁᤧᤒᤥᤱᤒᤠ ᤘᤠ᤹ᤖᤇ॥’ 7 ᤂᤢᤏᤧ᤹ ‘ᤏᤢ᤹’ ᤐᤠ᤺ᤳᤋᤢᤏᤧᤓᤃᤪ ᤀᤠᤱᤃᤠ᤹ ᤀᤠᤗᤠᤃᤡ ᤏᤢᤒᤠᤀᤣ ᤐᤥᤱ. ᤁᤖ ᤁᤢᤛᤡᤰᤆᤠᤏᤧᤓᤃᤪ ᤂᤢᤏᤧ᤹ ᤀᤠᤱᤃᤠ᤹ ᤛᤧᤵᤔᤠᤀᤣ ᤁᤥ᤺ᤳᤋᤠᤒᤠᤖᤧᤇ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤖᤥ॥ 8 ᤀᤠᤱᤃᤠ᤹ᤃ ᤂᤧᤏᤧ᤹ ᤁᤧᤕᤥ᤺ᤰᤁᤠᤖᤥ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤏᤢ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤗᤳᤇᤠ ᤔᤠᤱᤜᤧᤰ ᤀᤠᤈᤥᤃᤧᤛᤢᤀᤠᤱ ᤘᤠ᤹॥ ᤀᤠᤱᤃᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤠᤱ ᤘᤠ᤹ᤏᤧᤑᤃᤪ ᤂᤧᤏᤧ᤹ᤀᤣ ᤛᤧᤖᤠᤱᤅᤧ᤹॥ ᤁᤖ ᤁᤧᤶᤒᤠᤖᤧ ᤁᤢᤜᤢᤰᤁᤥ ᤌᤠᤔᤠ ᤔᤧᤒᤠᤱᤄᤠᤱᤅᤡᤴᤏᤧ᤹ᤀᤥ॥” 9 ᤈᤥᤏᤠᤌᤠᤏᤖᤧ ᤔᤧᤳᤋᤢ. “ᤔᤣ᤺ᤴ. ᤔᤣ᤺ᤴ. ᤀᤰᤋᤱᤒᤠ ᤔᤧᤒᤥᤱᤏᤧᤸᤗ॥ ᤀᤠᤱᤃᤠ᤹ ᤀᤠᤶᤒᤠᤖᤧ ᤂᤧᤏᤧ᤹ ᤛᤧᤵᤔᤠᤀᤣ ᤁᤧᤃᤥ᤺ᤳᤋᤧᤒᤠ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤅᤡᤸᤗᤧ ᤂᤧᤴ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤔᤧᤔᤧᤳᤏᤧᤶᤒᤡ᥅” 10 ᤍᤠᤀᤢᤍᤖᤧ ᤈᤥᤏᤠᤌᤠᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤶᤒᤠ ᤁᤢᤛᤡᤰ ᤐᤥ᤺ᤰᤁᤠᤱ ᤁᤧᤍᤴᤏᤡᤸᤗᤧ. ᤂᤧᤴ ᤀᤠᤱᤃᤠ᤹ ᤜᤠ᤺ᤳᤗᤧ ᤔᤧᤳᤋᤠ᤹ᤒᤣ᥅” 11 ᤈᤥᤏᤠᤌᤠᤏᤖᤧ ᤔᤧᤳᤋᤢ. “ᤑᤧᤖᤧ᤹. ᤀᤠᤴᤇᤡ᤹ ᤐᤩᤠᤱᤛᤡᤀᤥ ᤐᤡᤳᤇᤡ॥” ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤥᤖᤡᤰ ᤐᤩᤠᤱᤛᤡᤀᤥ ᤐᤣᤛᤡ॥ 12 ᤜᤧᤰᤁᤩᤠᤱ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤕᤠᤶᤔᤥ ᤔᤧᤳᤋᤢ. “ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰᤛᤡᤱᤅᤠᤀᤠᤱ ᤐᤠ᤺ᤳᤋᤢᤱ᤹. ᤋᤠ᤺ᤴᤍᤡᤰ ᤀᤡᤃᤪ ᤀᤠᤳᤇᤡᤴᤍᤠᤴ ᤀᤠᤶᤓᤠ ᤁᤴ ᤕᤧᤶᤔᤥ ᤀᤠᤱᤃᤠ᤹ ᤀᤠᤶᤒᤠ ᤛᤣ᤺ᤴᤍᤥᤛᤢᤱ᤹॥ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤂᤢᤏᤧ᤹ ᤁᤢᤏᤡᤱᤘᤠ᤹ ᤏᤢᤒᤠ ᤘᤠ᤹ᤏᤧᤑᤃᤪ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧ॥ 13 ᤁᤖ ᤀᤠᤱᤃᤠ᤹ ᤀᤠᤶᤒᤠᤖᤧ ᤂᤧᤏᤧ᤹ ᤂᤠ᤺ᤶᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤠ᤹ᤏᤧᤑᤃᤪ. ᤜᤧᤰᤁᤩᤠᤱ ᤂᤧᤏᤧ᤹ ᤔᤧᤔᤧᤳᤏᤧᤴᤏᤠᤱ ᤔᤧᤛᤧ᤺ᤵᤏᤧᤴᤏᤧᤓᤃᤪ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤛᤧᤳᤋᤠᤖ॥ ᤕᤜᤘᤣ ᤍᤠᤱᤒᤧᤴ ᤀᤠᤶᤒᤠᤏᤢ ᤘᤠ᤹ᤒᤠ ᤜᤧᤰᤁᤣᤀᤣ ᤂᤧᤏᤧ᤹ᤏᤢᤀᤠᤱ ᤘᤠ᤹ᤖ॥ 14 ᤁᤖ ᤀᤠᤱᤃᤠ᤹ ᤜᤡᤱᤅᤠᤖ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤜᤧᤰᤁᤣ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹. ᤁᤖ ᤀᤠᤱᤃᤠ᤹ ᤀᤠᤴᤇᤧᤖᤧᤴᤏᤧ᤹॥ 15 ᤂᤧᤏᤧ᤹ ᤀᤠᤜᤡᤶᤛᤕᤱᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤖᤧᤛᤧᤴᤏᤧ᤹॥ ᤕᤜᤘᤣ ᤍᤠᤱᤒᤠᤸᤗᤧ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤍᤠᤀᤢᤍᤖᤧ ᤁᤧᤖᤧᤰ ᤁᤢᤏᤡᤱᤔᤡᤜᤠ᤹ ᤔᤧᤰᤂᤢᤛᤡᤛᤠᤱ ᤂᤧᤴ ᤗᤢᤱᤃᤢᤶᤔᤡᤴ ᤀᤠᤜᤡᤶᤛᤕᤱᤅᤥ ᤘᤠ᤹ᤖᤖᤥ॥” 16 ᤀᤰᤂᤣ ᤐᤠ᤺ᤳᤋᤢᤖ ᤈᤥᤏᤠᤌᤠᤏᤖᤧ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤜᤠ᤹ᤏᤢ ᤕᤠᤶᤔᤥ ᤔᤠᤱᤜᤢᤵ ᤆᤥᤃᤢ. “ᤕᤜᤘᤣ ᤍᤠᤱᤒᤠᤸᤗᤧ ᤍᤠᤀᤢᤍᤖᤧ ᤁᤧᤖᤧᤰ ᤁᤢᤏᤡᤱᤔᤡᤜᤠ᤹ ᤂᤢᤶᤍᤡᤱ ᤐᤡᤖᤢᤛᤡᤖ॥” 17 ᤜᤧᤰᤁᤩᤠᤱ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤕᤠᤶᤔᤥ ᤔᤠᤱᤜᤧᤰ ᤆᤥ᤺ᤰᤐᤠᤱᤄᤢ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤍᤠᤀᤢᤍᤧᤴ ᤀᤠᤒᤠᤅᤣ ᤁᤢᤀᤡᤛᤡᤰ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤘᤕᤧ॥ 18 ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤋᤠ᤺ᤴᤍᤡᤰᤁ ᤗᤠᤍᤢᤵ ᤋᤱᤏᤠᤶ ᤘᤠ᤹॥ ᤂᤧᤵᤔᤥ ᤁᤧᤕᤢᤰᤏᤠᤍᤧᤴᤏᤡᤸᤗᤰ ᤏᤧᤒᤠ ᤏᤡᤍᤧᤳ ᤜᤧᤰᤁᤩᤠᤱ ᤁᤧᤜᤥ᤺ᤵᤗᤇ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤍᤧᤳᤗᤥ॥ 19 ᤀᤠᤳᤇᤡᤴᤍᤠᤴ ᤕᤢ᤺ᤴᤇᤡᤰ ᤂᤧᤏᤧ᤹ ᤁᤧᤜᤥᤵᤐᤠ ᤐᤠᤴ ᤁ᤹ᤕᤥ ᤗ᤺ᤴᤏᤡᤸᤗᤧ. ᤀᤢᤴᤇᤥᤴ ᤁᤧᤈᤡᤱᤛᤡᤱᤒᤠᤍᤧᤴᤏᤥ ᤆᤡᤱᤛᤡᤱᤅᤧ᤹ ᤜᤧᤰᤁᤩᤠᤱ ᤀᤧᤈᤧᤗ ᤗᤢᤱᤅᤡᤸᤗᤧ ᤁᤢᤒᤣᤛᤠᤱ ᤀᤠᤜᤠᤱᤄᤧ᤹॥ 20 ᤌᤣᤜᤠ᤹ᤀᤡ ᤛᤥ᤺ᤰᤋᤢᤱᤅᤠᤱ ᤁᤧᤀᤠᤵᤐᤠ ᤗᤧᤱᤛᤡᤅᤠᤖ ᤛᤢᤶᤛᤡ ᤋᤥᤱ ᤀᤠᤒᤢᤱᤍᤣᤛᤢᤱ॥ 21 ᤜᤧᤰᤁᤩᤠᤱ ᤀᤠᤛᤧᤘᤠᤖᤥᤒᤧᤴ ᤂᤧᤴ ᤋᤥ᤺ᤱᤜᤠ᤹ ᤁᤥ᤺ᤳᤇᤧ ᤐᤠᤱᤄᤢᤱ᤹॥ ᤀᤠᤱᤃᤠ᤹ ᤂᤧᤴ. ‘ᤀᤥᤔᤧᤳᤋᤧ᤹. ᤋᤥ᤺ᤱᤜᤠ᤹ ᤂᤧᤏᤧ᤹ ᤁᤧᤘᤠ᤹ᤒᤠᤸᤗᤧ ᤁᤳᤏᤠ ᤗᤧᤵᤛᤠᤱ ᤔᤧᤏᤧ᤹᤺. ᤂᤧᤱᤜᤠ᤹ ᤂᤵᤛᤧ᤹ᤀᤠᤱ ᤑᤧᤳᤋᤧ᤹’ ᤔᤧᤋᤢᤱᤏᤧᤓᤃᤪ ᤂᤧᤏᤧ᤹ ᤁᤧᤈᤡᤱᤛᤡᤱᤒᤠᤍᤧᤴᤗᤠᤶ ᤗ᤺ᤴᤔᤠᤀᤠᤱ ᤑᤧᤶᤔᤠ ᤁᤧᤛᤢᤰ॥ ᤀᤠᤱᤃᤠ᤹ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤐᤠ᤺ᤳᤋᤢᤱ᤹. ᤂᤧᤏᤧ᤹ ᤁᤧᤏᤢ᤹ᤒᤠ ᤁᤧᤈᤥᤰ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤴᤇᤡᤏᤧᤴ॥ 22 ᤁᤖ ᤀᤠᤱᤃᤠ᤹ ᤂᤧᤴ ᤀᤠᤛᤧᤘᤠᤖᤥᤒᤧᤴ ‘ᤀᤥᤔᤧᤳᤋᤧ᤹. ᤋᤥ᤺ᤱᤜᤠ᤹ ᤂᤧᤏᤧ᤹ ᤁᤧᤘᤠ᤹ᤒᤠᤸᤗᤧ ᤏᤠᤜᤠᤱ ᤗᤧᤵᤔᤠᤱ ᤔᤧᤏᤧ᤹᤺’ ᤔᤧᤳᤋᤢᤱᤏᤧᤓᤃᤪ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤂᤧᤳᤇᤡᤱᤔᤠᤀᤣ ᤐᤥᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤆᤥᤃᤢᤒᤠᤖᤧᤇ॥ 23 ᤀᤠᤴᤇᤡ᤹ ᤗᤢᤶᤔᤥ ᤐᤥ᤺ᤰᤂᤧᤒᤠ ᤔᤠᤱᤜᤧᤰᤁᤡᤴ ᤛᤍᤠᤍᤡᤱ ᤌᤠᤖᤡᤰᤁᤣ ᤁᤧᤳᤗ ᤁᤧᤗ᤹ᤒᤠ ᤐᤠ᤺ᤴᤏᤥ ᤕᤜᤘᤣ ᤍᤠᤱᤒᤧᤴ ᤁᤧᤏᤡᤒᤠ ᤋᤥ᤺ᤴᤍᤡ ᤐᤥᤱᤗᤥ॥” 24 ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤧᤴ ᤐᤩᤠᤱᤛᤡᤀᤥ ᤆᤡᤱᤛᤡᤱᤅᤠᤱ ᤕᤢᤅᤧ॥ ᤜᤧᤰᤁᤩᤠᤱ ᤗᤠᤍᤢᤵ ᤋᤱᤏᤠᤶ ᤋᤩᤧ ᤜᤧᤰᤁᤩᤠᤱ ᤜᤠᤱᤅᤡᤴ ᤆᤠᤈᤠᤛᤧ ᤕᤢᤱᤛᤡᤱ॥ 25 ᤜᤠᤱᤅᤡᤴ ᤗᤢᤱᤎᤠᤰ ᤐᤡᤛᤠᤱᤒᤠ ᤁᤢᤕᤢᤰᤏᤠᤍᤧᤴᤏᤥ ᤕᤢᤅᤧ. ᤜᤠᤱᤅᤡᤸᤗᤧ ᤁᤢᤍᤃᤠᤱ ᤗᤧᤵᤔᤠᤱ ᤈᤥᤏᤠᤌᤠᤏᤧᤴ ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤁᤢᤒᤣᤛᤠᤱ ᤀᤒᤏᤣᤖᤧᤴ ᤕᤢᤅᤧ ᤁᤖ ᤍᤠᤀᤢᤍᤧᤴ ᤁᤢᤕᤢᤱᤍᤧᤴᤏᤥ ᤜᤥ᤺ᤵᤋᤧ॥ 26 ᤂᤧᤴ ᤕᤧᤴᤏᤥ ᤛᤠᤘᤗᤖᤧ ᤌᤣᤀᤠᤱ ᤔᤧᤒᤠ᤺ᤳᤋᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤡ᤺ᤳᤋᤢ. “ᤕᤜᤢᤍᤡ ᤌᤡᤶ ᤀᤡᤛᤡ᤺ᤰ ᤀᤠᤛᤢᤳᤌᤥ ᤐᤥ᤺ᤰᤂᤧᤒᤡᤗᤠ॥” 27 ᤁᤖ ᤁᤢᤍᤠ᤺ᤴᤍᤡᤰᤔᤠ. ᤗᤠᤍᤢᤵ ᤋᤱᤏᤠᤶᤔᤡᤸᤗᤧ ᤏᤡᤛᤡᤃᤣᤰᤐᤠ ᤕᤧᤴᤏᤥᤀᤠᤱ ᤍᤠᤀᤢᤍᤧᤴ ᤁᤢᤕᤢᤱᤔᤠᤍᤧᤴᤏᤥ ᤜᤥ᤺ᤵᤋᤧ॥ ᤜᤧᤰᤁᤩᤠᤱ ᤛᤠᤘᤗᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴ ᤔᤧᤳᤋᤢ. “ᤌᤣᤀᤠᤱ ᤕᤡᤛᤤᤖᤧ ᤁᤢᤛ᤻ᤛᤠᤴ ᤔᤡ᤺ᤵᤔᤠᤀᤠᤱ ᤀᤠᤀᤡᤴᤏᤠᤱ ᤆᤠᤈᤠᤛᤧ ᤁᤵᤔᤥ ᤔᤧᤍᤩᤧᤏᤧᤶᤒᤠᤃ᥅” 28 ᤈᤥᤏᤠᤌᤠᤏᤖᤧ ᤁᤢᤶᤒᤠ ᤛᤠᤘᤗᤧᤴ ᤔᤧᤳᤋᤢ. “ᤍᤠᤀᤢᤍᤖᤧ ᤒᤣᤌᤗᤧᤜᤧᤔ ᤐᤣ᤺ᤰᤔᤠ ᤀᤠᤓᤠ᤺ᤰᤋᤧ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤕᤧ॥ 29 ᤂᤢᤏᤧ᤹ ᤐᤠ᤺ᤳᤋᤢ. ‘ᤀᤠᤱᤃᤠ᤹ ᤐᤣ᤺ᤰᤔᤠ ᤀᤠᤒᤠᤱᤄᤧ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤜᤡᤶᤛᤕᤱᤜᤠ᤹ᤖᤧ ᤐᤠᤱᤈᤢᤶᤔᤥ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤖ ᤔᤧᤕᤠᤰ. ᤜᤧᤰᤁᤩᤠᤱ ᤀᤠᤶᤓᤢ᤹ᤛᤡᤖᤧ ᤂᤧᤏᤧ᤹ ᤂᤧᤵᤔᤥ ᤁᤧᤘᤠ᤹ᤖᤒᤥᤱ ᤔᤧᤔᤧᤳᤋᤠᤱᤅᤠᤱ ᤘᤠ᤹॥ ᤂᤧᤏᤧ᤹ ᤐᤣ᤺ᤰᤔᤠ ᤁᤧᤒᤠᤱᤅᤠᤏᤧᤓᤃᤪ ᤀᤠᤶᤓᤢ᤹ᤛᤡ ᤋᤢᤶᤛᤧ ᤐᤣ᤺ᤰᤁᤠ॥’ ᤂᤧᤸᤗᤧᤆᤥᤃᤢᤸᤗᤧ ᤜᤠᤱᤅᤡᤸᤗᤧ ᤁᤢᤈᤠᤔᤠᤍᤧᤴᤏᤥ ᤂᤢᤏᤧ᤹ ᤋᤠᤔᤠ ᤔᤧᤛᤢᤰᤋᤧᤴ॥” 30 ᤜᤧᤰᤁᤣ᤺ᤸᤗᤧ ᤛᤠᤘᤗᤧᤴ ᤈᤥᤏᤠᤌᤠᤏᤧᤴᤏᤢ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤀᤠᤱ ᤀᤰᤂᤣ ᤔᤧᤳᤋᤢ. “ᤁᤢᤀᤡᤃᤧᤓᤧᤶᤒᤠ ᤏᤢ ᤀᤠᤱᤍᤡᤱ ᤁᤧᤗ᤹ᤒᤠᤀᤣ. ᤂᤧᤏᤧ᤹ᤃ ᤀᤠᤛ᤻ᤛᤠ ᤔᤣ᤺ᤴᤏᤣ᥄ ᤂᤧᤏᤧ᤹ ᤕᤡᤛᤤ᤺ᤸᤗᤧ ᤁᤢᤛ᤻ᤛᤠ ᤍᤠᤀᤢᤍᤧᤴ ᤜᤠᤱ ᤐᤥᤱᤔᤠ ᤁᤧᤛᤣᤃᤢᤀᤠᤱ ᤀᤠᤒᤠᤅᤣ ᤁᤧᤈᤠ᤺ᤳᤌᤡ ᤏᤢ ᤁᤧᤶᤔᤠᤖᤧ ᤁᤢᤈᤠ᤺ᤳᤌᤡ ᤁᤧᤍᤣᤛᤢᤒᤠᤴ ᤀᤠᤱᤃᤠ᤹ ᤔᤧᤏᤡᤀᤠᤴᤒᤡ᥅ 31 ᤕᤡᤛᤤᤖᤧ ᤁᤢᤛ᤻ᤛᤠ ᤍᤠᤀᤢᤍᤧᤴ ᤜᤡᤱᤗ ᤌᤠᤖᤡᤰ ᤂᤧᤏᤧ᤹ ᤜᤠᤱ ᤐᤥᤱᤔᤠ ᤁᤧᤴᤇᤢᤰᤏᤧᤴ॥ ᤀᤠᤸᤗ ᤂᤧᤴ ᤀᤠᤱᤃᤠ᤹ᤀᤥ ᤁᤢᤍᤠ᤺ᤳᤇᤧ ᤁᤢᤓᤠ ᤐᤠᤱᤄᤧᤛᤧ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤧᤵᤔᤠᤀᤣ ᤐᤥᤱ॥” 32 ᤈᤥᤏᤠᤌᤠᤏᤖᤧ ᤁᤢᤶᤒᤠ ᤔᤧᤳᤋᤢ. “ᤌᤣᤀᤠᤱ ᤂᤢᤏᤧ᤹ ᤛᤡᤔᤠ ᤐᤥᤱᤒᤠᤒᤣ᥅ ᤂᤢᤏᤧ᤹ ᤌᤣ ᤆᤥᤃᤢᤀᤠᤱ ᤘᤠ᤹ᤒᤣ᥅” 33 ᤜᤧᤰᤁᤣ᤺ᤸᤗᤧ ᤁᤢᤶᤒᤠ ᤛᤠᤘᤗᤖᤧ ᤁᤢᤗᤠ᤺ᤰᤁᤡᤴ ᤐᤰᤂᤢᤀᤠᤱ ᤈᤥᤏᤠᤌᤠᤏᤧᤴ ᤑᤧᤱ ᤗᤧᤵᤋᤢᤓᤧᤴᤇᤢ॥ ᤜᤧᤰᤁᤩᤠᤱᤃ ᤈᤥᤏᤠᤌᤠᤏᤖᤧ ᤛᤧᤰᤂᤠᤀᤣ ᤀᤠᤶᤒᤠᤖᤧ ᤍᤠᤀᤢᤍᤧᤴ ᤛᤧᤵᤔᤠᤀᤣ ᤏᤡᤱᤘᤠ᤹ ᤆᤥᤃᤢᤒᤠᤖᤧᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤂᤥᤛᤢ॥ 34 ᤈᤥᤏᤠᤌᤠᤏᤧᤴ ᤁᤢᤛᤡᤰ ᤐᤥᤃᤧᤀᤠᤱ ᤆᤠᤈᤠᤔᤠᤍᤧᤴᤏᤥᤗᤠᤶ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤐᤣ॥ ᤜᤧᤰᤁᤩᤠᤱ ᤂᤧᤴ ᤗᤠ᤺ᤸᤗᤧ ᤏᤡᤕᤧᤴᤒᤠ ᤕᤧᤴᤏᤥ ᤂᤢᤏᤧ᤹ ᤌᤧᤔᤠᤀᤠᤱ ᤔᤧᤈᤏᤧᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤶᤒᤠᤖᤧ ᤍᤠᤀᤢᤍᤖᤧᤴ ᤁᤢᤏᤠᤔᤧᤛᤠ᤹ᤖᤢᤴᤏᤠᤱ ᤁᤢᤏᤠᤎᤠᤛᤢ ᤐᤡᤖᤢᤒᤠᤸᤗᤧ ᤆᤥᤃᤢᤸᤗᤧ ᤆᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤢᤃᤧ॥ 35 ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶᤛᤠ ᤈᤥᤏᤠᤌᤠᤏᤧᤴ ᤍᤠᤀᤢᤍᤖᤧ ᤁᤢᤍᤢᤶᤛᤧ ᤆᤢᤰᤛᤠ ᤜᤡᤴᤈᤠ᤹ᤎᤡᤰ ᤋᤣ᤹ᤖᤢᤀᤠᤱ ᤐᤩᤠᤱᤛᤡᤀᤥ ᤐᤣ॥ 36 ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤴ ᤜᤡᤴᤈᤠ᤹ᤀᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤋᤥᤱ ᤀᤠᤒᤢᤱ. ᤂᤧᤏᤧ᤹ ᤗᤥ᤺ᤰᤋᤧ ᤐᤣᤃᤧ᤹ᤀᤠᤱ ᤁᤥ᤺ᤳᤋᤧ᤹॥” ᤜᤧᤰᤁᤩᤠᤱ ᤂᤧᤴ ᤜᤡᤴᤈᤠ᤹ᤀᤡᤴ ᤐᤣᤖ ᤐᤳᤇᤧᤸᤗᤧ ᤂᤢᤏᤧ᤹ᤀᤠᤱ ᤏᤠᤜᤠᤱᤏᤠ ᤋᤥ᤺ᤱᤎᤡᤰ ᤀᤠᤒᤢᤍᤣᤛᤢ॥ 37 ᤈᤥᤏᤠᤌᤠᤏᤖᤧ ᤁᤢᤍᤥ᤺ᤱᤅᤡᤴ ᤔᤰᤌᤩᤧᤒᤠ ᤋᤧᤴᤏᤥ ᤜᤡᤴᤈᤠ᤹ᤀᤡᤴ ᤁᤧᤖᤧᤖ ᤐᤳᤇᤧᤸᤗᤧ ᤈᤥᤏᤠᤌᤠᤏᤖᤧ ᤔᤧᤳᤋᤢ. “ᤀᤥᤔᤳᤋᤧ᤹. ᤋᤥ᤺ᤱᤅᤡᤴ ᤂᤧᤏᤧ᤹ ᤁᤧᤘᤠ᤹ᤒᤠᤴᤏᤢ᤺ᤸᤗᤧ ᤏᤠᤜᤠᤱᤍᤠᤱ ᤔᤧᤏᤧᤏᤧᤶᤒᤡ᥅” 38 ᤜᤧᤰᤁᤩᤠᤱ ᤕᤠᤶᤔᤥ ᤔᤧᤳᤋᤢ. “ᤜᤠᤖᤠ ᤐᤣᤃᤧ᤹ ᤜᤠᤖᤠ. ᤔᤧᤜᤠᤱᤄᤧᤴᤏᤧ᤹” ᤂᤧᤴ ᤜᤡᤴᤈᤠ᤹ᤀᤡᤸᤗᤧ ᤋᤥ᤺ᤱᤅᤡᤴ ᤂᤵᤛᤢ ᤜᤧᤰᤁᤩᤠᤱ ᤁᤢᤴᤍᤠᤱᤒᤠᤸᤗᤥ ᤏᤢ᤺ᤰᤂᤧ॥ 39 ᤁᤖ ᤜᤡᤴᤈᤠ᤹ᤀᤡᤸᤗᤧ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤌᤣᤒᤣ᥅ ᤑᤠ᤹ᤀᤠᤱ ᤌᤣᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴ. ᤍᤠᤀᤢᤍ ᤏᤢ ᤈᤥᤏᤠᤌᤠᤏᤖᤧᤖᤰ ᤁᤢᤛᤡᤱ ᤏᤡ᤺ᤳᤋᤧᤛᤢᤀᤠᤱ ᤘᤕᤧ॥ 40 ᤜᤧᤰᤁᤩᤠᤱ ᤈᤥᤏᤠᤌᤠᤏᤖᤧ ᤂᤢᤏᤧ᤹ ᤁᤢᤗᤡ᤹ ᤏᤢ ᤁᤢᤍᤥ᤺ᤱᤜᤠ᤹ ᤂᤧᤴ ᤜᤡᤴᤈᤠ᤹ᤀᤡᤴ ᤐᤡᤖᤢᤀᤠᤱ ᤔᤧᤳᤋᤢ᤹. “ᤁᤴᤜᤠ᤹ ᤋᤣ᤹ᤖᤧᤀᤠᤱ ᤐᤠᤱᤈᤢᤶᤔᤥ ᤏᤢ᤺ᤰᤂᤧ ᤐᤣᤃᤧ᤹॥” 41 ᤂᤧᤴ ᤜᤡᤴᤈᤠ᤹ᤀᤡᤴ ᤐᤣᤀᤠᤱ ᤕᤶᤒᤠ ᤗᤢᤱᤅᤡᤸᤗᤧ ᤗᤠᤱᤃᤧᤴ ᤗᤧᤵᤛᤠᤱᤏᤢ ᤍᤠᤀᤢᤍᤧᤴ ᤗ᤺ᤴᤍᤧ. ᤜᤧᤰᤁᤩᤠᤱ ᤈᤥᤏᤠᤌᤠᤏᤖᤧ ᤁᤢᤍᤃᤡ ᤛᤢᤶᤗᤧᤱ ᤀ᤺ᤰᤂᤢᤶ ᤀ᤺ᤰᤂᤢᤶ ᤗ᤹ᤖᤡᤰ ᤌᤢ᤺ᤱᤛᤡᤱᤅᤠᤱ ᤛᤧᤘᤠ ᤔᤧᤳᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤆᤢᤵ ᤔᤧᤳᤏᤧᤛᤡᤀᤠᤱ ᤜᤧᤵᤏᤧᤛᤡᤖ ᤜᤠᤒᤧᤛᤡ. ᤈᤥᤏᤠᤌᤠᤏᤧᤴᤏᤢ᤺ᤸᤗᤧ ᤍᤠᤀᤢᤍᤧᤴ ᤛᤠ᤹ᤖᤡᤰ ᤜᤠᤒᤧ॥ 42 ᤂᤧᤒᤩᤠᤱ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤏᤢ᤺ᤖᤡᤰᤁᤠᤱ ᤐᤣᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤴᤇᤡ᤹ ᤗᤢᤶᤔᤥ ᤏᤢ ᤀᤠᤴᤇᤡ᤹ ᤛᤠᤔᤧᤴᤇᤠ᤹ ᤗᤢᤶᤔᤥ ᤛᤍᤠᤍᤡᤱ ᤛᤠ᤺ᤰᤂᤡ ᤁᤧᤘᤠ᤹ᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤀᤠᤴᤇᤡ᤹ ᤏᤧᤵᤔᤠᤱ ᤔᤠᤱᤀᤠᤜᤧᤰᤏᤧᤛᤡᤀᤠᤱ ᤘᤠ᤹॥” ᤂᤧᤶᤒᤩᤠᤱ ᤍᤠᤀᤢᤍᤧᤴ ᤂᤧᤵᤔᤥᤏᤢ ᤐᤣ. ᤜᤧᤰᤁᤩᤠᤱ ᤈᤥᤏᤠᤌᤠᤏᤧᤴ ᤐᤠᤱᤈᤢᤶᤔᤥ ᤏᤢ᤺ᤰᤂᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.