᥇ ᤛᤠᤔᤢᤀᤧᤗ 2 - LIFOTNTᤜᤴᤏᤠ᤺ᤸᤗᤧ ᤁᤢᤒᤣᤗᤡᤃᤧᤴ ᤋᤢᤘᤠ 1 ᤜᤧᤰᤁᤩᤠᤱ ᤂᤧᤵᤔᤥ ᤜᤴᤏᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢ. “ᤀᤠᤱᤃᤠ᤹ ᤀᤠᤏᤡᤱᤘᤠᤴ ᤕᤜᤘᤣ ᤍᤠᤱᤒᤠᤀᤥ ᤛ᤺ᤳᤋᤧᤀᤠᤱ ᤘᤠ᤹ᤖᤥ. ᤕᤜᤘᤣ ᤍᤠᤱᤒᤠᤀᤥ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ॥ ᤀᤠᤏᤡᤱᤔᤡᤜᤠ᤹ ᤕᤣ᤺ᤵᤔᤠᤛᤡ ᤐᤠᤴ ᤀᤠᤱᤃᤠ᤹ ᤀᤠᤶᤒᤪᤠᤀᤥ ᤋᤩᤧᤀᤠᤱ ᤘᤠ᤹ᤖᤥ. ᤀᤠᤍᤠᤱᤒᤠᤖᤧ ᤀᤠᤱᤃᤠ᤹ ᤛᤧᤴᤗᤵ ᤁᤧᤒᤡᤖᤠᤱᤒᤠᤀᤥ ᤀᤠᤛᤡᤰ ᤐᤛᤶᤛᤔᤧᤀᤠᤱ ᤘᤠ᤹ᤀᤠᤖᤥ॥ 2 ᤕᤜᤘᤣ ᤍᤠᤱᤒᤠᤴ ᤜᤧᤰᤋᤱᤒᤠ ᤛᤣᤛᤣᤒᤠ ᤜᤠ᤺ᤳᤋᤠᤱ ᤜᤥᤵ. ᤂᤧᤏᤧ᤹ ᤁᤢᤛᤡᤱᤋᤠᤱᤒᤠ ᤘᤣ᤹ ᤀᤠᤳᤋᤡᤴᤏᤠᤱ ᤜᤥᤵ. ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤋᤱᤒᤠ ᤕᤠᤰᤐᤣ᤹ ᤘᤣ᤹ ᤀᤣ᤺ᤴᤏᤠᤱ ᤜᤥᤵ॥ 3 ᤀᤠᤱᤍᤡᤱ ᤗ᤹ᤔᤠ ᤐᤠᤴ ᤔᤧᤒᤠᤖᤧᤴᤏᤧ᤹. ᤕᤶᤒᤠ ᤗᤧᤱᤛᤡᤱᤔᤠ ᤐᤠ᤺ᤴᤇᤣ᤺ᤰᤘᤠ ᤁᤧᤶᤒᤪᤠᤀᤥᤗᤠᤶ ᤔᤧᤗ᤺ᤳᤋᤧᤴᤏᤧ᤹॥ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤱᤃ ᤁᤧᤖᤧᤰ ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤖᤧ ᤔᤧᤈᤥᤃᤢᤒᤠ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤛᤧᤴᤍᤢᤖᤥ॥ 4 ᤁᤧᤎᤢᤶᤒᤠ ᤌᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤡᤴ ᤀᤧᤃᤧᤀᤠᤱ ᤘᤠ᤹ᤖᤥ. ᤁᤖ ᤜᤷᤈᤢ᤹ ᤁᤧᤈᤥ᤺ᤶᤒᤠᤜᤠ᤹ ᤁᤧᤎᤢᤶᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ 5 ᤂᤠᤄᤠ ᤁᤧᤈᤠᤒᤠᤜᤠ᤹ ᤀᤠᤸᤗᤥ ᤆᤠᤔᤠᤖᤧ ᤗᤠᤃᤡ ᤀᤠᤒᤠᤅᤣ ᤔᤧᤛᤱᤛᤡᤱ ᤔᤧᤍᤣᤛᤡᤱᤅᤠᤱ ᤔᤧᤘᤠ᤹ᤖᤥ. ᤁᤖ ᤁᤢᤛᤧᤳᤁᤧᤗᤠ᤺ᤰᤐᤠᤜᤠ᤹ᤖᤧ ᤀᤸᤗᤥ ᤂᤢᤏᤡ᤹ ᤂᤠᤄᤠ ᤆᤠᤔᤠ ᤔᤧᤄᤥᤛᤢᤀᤠᤱ ᤔᤧᤘᤠ᤹ᤖᤥ॥ ᤛᤠᤔᤧᤱᤃᤵᤔᤏᤠᤔᤠ ᤔᤧᤴᤇᤢᤔᤠ᤺ᤸᤗᤧ ᤏᤢᤛᤡ ᤜᤡᤴᤈᤠ᤹ᤒᤡᤳᤇᤠ᤹ ᤁᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ. ᤁᤖ ᤕᤖᤡᤰ ᤛᤠᤃᤧᤃᤵᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤛ᤻ᤛᤠ ᤌᤡᤰᤁᤠᤱ ᤔᤧᤴᤜᤡᤅᤧᤸᤗᤥ॥ 6 ᤕᤜᤘᤣ ᤍᤠᤱᤒᤠᤸᤗᤧᤀᤣ ᤛᤡᤔᤧᤴ ᤋᤠᤖᤢ ᤜᤧᤰᤁᤩᤠᤱ ᤏᤧᤳᤋᤡᤃᤧᤴ ᤜᤡᤱᤔᤴ ᤀᤠᤒᤡᤖᤥ. ᤂᤢᤏᤧ᤹ᤀᤣ ᤔᤏᤠᤜᤠ᤹ ᤀᤡᤐᤢᤱᤅᤥ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤁᤧᤛᤡᤒᤠᤜᤠ᤹ ᤕᤠᤶᤔᤥ ᤜᤡᤱᤔᤴ ᤐᤡᤖᤢᤛᤡᤖᤥ॥ 7 ᤕᤜᤘᤣ ᤍᤠᤱᤒᤠᤸᤗᤧᤀᤣ ᤔᤏᤠᤜᤠ᤹ ᤕᤠᤱᤃᤧᤛᤠ᤹ᤒᤠ ᤏᤢ ᤕᤠᤱᤛᤠᤁᤢᤴᤎᤣᤛᤠᤒᤠ ᤆᤥᤃᤢᤛᤡᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤁᤢᤓᤠ ᤕᤥᤕᤥᤰ ᤆᤥᤃᤢᤛᤡ ᤜᤧᤰᤁᤩᤠᤱ ᤁᤢᤓᤠ ᤌᤥ ᤑᤥ᤺ᤰᤂᤢᤛᤡᤖᤥ॥ 8 ᤂᤢᤏᤧ᤹ᤃ ᤕᤠᤱᤃᤧᤛᤠ᤹ᤒᤠᤜᤠ᤹ ᤂᤠᤶᤜᤡ᤺ᤰᤁᤥᤏᤢ ᤌᤥ ᤑᤥ᤺ᤰᤂᤢᤛᤡᤖᤥ ᤌᤣᤎᤡᤰᤁᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤂᤢᤴᤇᤡ᤹ ᤋᤢᤰᤂᤣ ᤗᤠᤰᤂᤣᤗᤠᤶᤒᤠ ᤌᤠ᤺ᤱ ᤑᤥ᤺ᤰᤂᤢᤛᤡᤖᤥ॥ ᤂᤢᤏᤧ᤹ ᤂᤧᤱᤜᤠ᤹ ᤜᤠᤱᤛᤠᤜᤠ᤹ᤏᤢ ᤁᤢᤍᤱᤒᤠ ᤆᤥᤃᤢᤛᤡᤖᤥ ᤜᤧᤰᤁᤩᤠᤱ ᤔᤡᤱᤛᤥ ᤀᤡᤱᤎᤠᤱᤒᤠ ᤕᤢᤰᤏᤠᤀᤥ ᤕᤢᤰᤂᤢᤛᤡᤖᤥ॥ ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤢᤰᤏᤠᤜᤠ᤹ᤃ ᤕᤜᤘᤣ ᤍᤠᤱᤒᤠᤸᤗᤧᤴᤏᤣᤖᤥ. ᤂᤢᤏᤧ᤹ ᤕᤥ᤹ᤒᤠ ᤗᤠᤈᤣᤴ ᤂᤧᤸᤗᤧ ᤁᤢᤛᤶᤎᤠᤱ ᤕᤢᤰᤂᤢᤀᤠᤱ ᤕᤢᤱᤗᤥ॥ 9 ᤂᤢᤏᤧ᤹ ᤏᤛᤠ᤺ᤴᤛᤠᤒᤠ ᤁᤢᤔᤏᤠᤜᤠ᤹ ᤛᤧ᤺ᤵᤋᤢᤛᤡᤖᤥ. ᤁᤖ ᤗᤠᤕᤥᤒᤠ ᤔᤏᤠᤜᤠ᤹ ᤂᤠᤔᤠᤰᤔᤥ ᤔᤧᤔᤧᤰᤗᤥ॥ ᤜᤠ᤺ᤳᤋᤠᤱ ᤀᤠᤒᤠᤅᤣ ᤌᤢᤶᤗᤧ ᤁᤧᤏᤠ᤺ᤶᤒᤠ ᤐᤥᤱᤔᤠ ᤔᤧᤛᤢᤰᤏᤧᤸᤗᤥ॥ 10 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤥᤰᤐᤠᤜᤠ᤹ ᤁᤧᤖᤧᤰ ᤔᤧᤔᤧᤰᤗᤥ॥ ᤂᤢᤏᤧ᤹ ᤌᤥ ᤛᤠᤱᤃᤪᤠᤶᤐᤣᤍᤠᤱ ᤗᤠᤶᤒᤠᤏᤢ ᤜᤢ᤺ᤰᤗ ᤂᤧᤱᤜᤠ᤹ ᤑᤧ᤺ᤰᤋᤢᤛᤡᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤖᤧᤰ ᤐᤡᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤠᤛᤧᤴ ᤆᤥᤃᤢᤖᤥ॥ ᤂᤢᤏᤧ᤹ ᤛᤣᤃᤢᤒᤠ ᤜᤠᤱᤅᤡᤴ ᤔᤢᤰᤛᤠᤶ ᤐᤡᤖᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤛᤣ᤺ᤴᤍᤢᤒᤠ ᤜᤠᤱᤅᤡᤴ ᤌᤱ ᤁᤧᤏᤠ᤺ᤶᤒᤠ ᤆᤥᤃᤢᤖᤥ॥” 11 ᤂᤧᤴ ᤀᤣᤃᤠᤱ ᤀᤣᤸᤁᤠᤏᤠᤴ ᤖᤠᤔᤠᤒᤠ ᤁᤢᤜᤡᤶᤔᤥ ᤏᤢ᤺ᤰᤂᤧ॥ ᤁᤖ ᤀᤅᤧ᤺ᤰᤘᤠ ᤛᤠᤔᤢᤀᤧᤗᤧᤴ ᤕᤜᤘᤣ ᤍᤠᤱᤒᤠᤀᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤡᤖᤧ ᤁᤢᤃᤶᤒᤪᤠᤱᤅᤥ ᤛᤡᤗᤥᤀᤥ ᤕᤠ᤺ᤰᤋᤧᤖᤥ॥ ᤀᤣᤗᤡᤖᤧ ᤁᤢᤛ᤻ᤛᤠᤜᤠ᤹ 12 ᤀᤣᤗᤡᤖᤧ ᤁᤢᤛ᤻ᤛᤠ ᤏᤧᤳᤇᤡ ᤁᤢᤀᤡᤃᤧᤓᤧᤶᤒᤠ ᤘᤕᤧᤛᤡ. ᤂᤧᤴ ᤏᤧᤵᤔᤠᤱᤗᤧ ᤕᤜᤘᤣ ᤍᤠᤱᤒᤧᤴ ᤀᤠᤵᤑᤠᤸᤗᤧᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤧᤇᤢᤴ॥ 13 ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰᤁᤡᤴ ᤁᤢᤏᤠ ᤔᤧᤛᤠ᤹ᤖᤧᤛᤢᤴ-ᤁᤢᤓᤠ ᤔᤏᤠᤜᤠ᤹ᤖᤧ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤸᤗᤧ ᤀᤣᤗᤡᤖᤧ ᤏᤧᤵᤑᤢ ᤁᤢᤛ᤻ᤛᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤛᤧᤘᤠᤖᤥᤒᤧᤴ ᤜᤢᤰᤁᤥ ᤛᤢᤶᤈᤢᤗᤡᤴ ᤐᤡᤖᤧᤳᤇᤢᤀᤠᤱ ᤐᤠᤱᤄᤧᤛᤢ॥ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤛᤠᤴ ᤗᤠᤰᤋᤢᤖ ᤕᤢᤱᤅᤡᤸᤗᤧ. 14 ᤂᤧᤴ ᤛᤧᤘᤠᤖᤥᤒᤧᤸᤗᤧ ᤛᤠ ᤌᤥ᤺ᤰᤔᤏᤠᤒᤠ ᤂᤵᤐᤩᤠᤀᤥ ᤛᤢᤶᤈᤢᤗᤡᤴ ᤁᤣ᤺ᤳᤋᤢ ᤜᤧᤰᤁᤩᤠᤱ ᤂᤧᤴ ᤛᤢᤶᤈᤢᤗᤡ᤺ᤸᤗᤧ ᤋᤡ᤺ᤰᤛᤢᤀᤠᤱ ᤁᤧᤎᤠᤱᤒᤠ ᤛᤠᤴ ᤀᤣᤗᤡᤖᤧ ᤁᤢᤛ᤻ᤛᤠᤜᤠ᤹ ᤔᤧᤒᤡᤖᤢᤛᤡᤖ ᤕᤠ᤺ᤴᤍᤢᤛᤡ॥ ᤛᤡᤗᤥᤀᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤁᤧᤍᤠᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤜᤠᤒᤠ ᤜᤧᤰᤋᤱᤒᤠ ᤔᤧᤈᤥᤃᤢ॥ 15 ᤁᤢᤓᤠ ᤕᤧᤶᤔᤥ ᤛᤠ᤺ᤸᤗᤧ ᤁᤢᤛᤥ᤺ᤳᤋᤧᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤡᤎᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤧᤘᤠᤖᤥᤒᤧᤴ ᤋᤩᤧᤀᤠᤱ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤠᤃᤡ ᤀᤥ᤹ᤔᤠ ᤆᤠᤔᤠᤖᤧ ᤗᤠᤃᤡ ᤛᤠᤔᤠᤱᤘᤠ ᤀᤠᤒᤡᤖᤧ᤹ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤏᤡ᤹ᤗᤠᤶᤒᤠ ᤌᤥ᤺ᤰᤔᤏᤠᤒᤠ ᤛᤠ ᤔᤣ᤺ᤴ ᤁᤢᤔᤠᤱᤘᤠᤖᤰ ᤋᤠ᤺ᤰᤋᤢᤖᤥ॥” 16 “ᤀᤥ᤺ᤰ. ᤋᤃᤡ ᤁᤢᤛᤥ᤺ᤳᤋᤧᤴ ᤔᤡᤎᤡᤰᤂᤢᤱ᤹. ᤜᤧᤰᤁᤩᤠᤱ ᤁᤧᤏᤠ᤺ᤰᤋᤢᤒᤠ ᤕᤠᤖᤡᤰᤁᤣ ᤋᤣ᤹ᤖᤧ᤹” ᤗ᤹ᤖᤡᤰ ᤂᤧᤴ ᤛᤡᤍᤢᤱᤈᤓᤠ ᤁᤧᤍᤥᤶᤒᤠ ᤔᤏᤠ᤺ᤸᤗᤧ ᤐᤠ᤺ᤳᤋᤢᤏᤧᤑᤃᤪ ᤂᤧᤴ ᤛᤧᤘᤠᤖᤥᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤔᤣ᤺ᤴ ᤂᤧᤴ ᤀᤠᤱᤃᤠ᤹ ᤀᤠᤸᤗᤥᤛᤠ ᤀᤠᤃ᤻ᤒᤡᤖ ᤐᤥᤱ. ᤔᤣ᤺ᤴᤏᤧᤑᤃᤪ ᤏᤠᤵᤏᤡᤱᤅᤠᤱᤛᤠᤱ ᤋᤣ᤹ᤖᤢᤱ᤹॥” 17 ᤀᤣᤗᤡᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤛᤠ᤹ᤖᤡᤰ ᤕᤶᤒᤠ ᤐᤥ᤺ᤰᤂᤧᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤏᤡᤛᤢ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤔᤧᤍᤥᤴᤍᤢᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤂᤧᤱᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤳᤋᤧᤇᤢ॥ ᤛᤠᤔᤢᤀᤧᤗᤧᤴ ᤛᤡᤗᤥᤒᤠ ᤏᤡᤱᤘᤠ᤹ᤑᤢ ᤜᤡᤶᤔᤥ 18 ᤂᤧᤴ ᤕᤧᤶᤔᤥ ᤀᤅᤧ᤺ᤰᤘᤠ ᤛᤠᤔᤢᤀᤧᤗᤧᤱᤃ ᤏᤠᤀᤡᤏᤠᤛᤢ᤺ᤳ ᤀᤣᤐᤥᤍ ᤆᤠᤱ ᤆᤠᤰᤂᤢᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤆᤰᤔᤧᤸᤗ᤹ᤀᤣ ᤛᤧᤘᤠ ᤆᤥ᤺ᤰᤔᤠ ᤜᤣ᤺ᤰᤋᤧ॥ 19 ᤋᤱᤒᤣᤎᤰᤔᤠ ᤁᤢᤶᤔᤠᤖᤧ ᤂᤧᤴ ᤗᤳᤇᤠ ᤆᤢᤰᤛᤠ ᤋᤣᤳ ᤋ᤹ᤖᤢ. ᤜᤧᤰᤁᤩᤠᤱ ᤋᤱᤒᤣᤎᤰᤔᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤁᤢᤕᤧᤶᤒᤠ᤺ᤴᤏᤢ ᤐᤣᤛᤡᤸᤗᤧ ᤂᤧᤴ ᤋᤣ᤺ᤳᤋᤡᤴ ᤁᤢᤶᤔᤠᤖᤧ ᤛᤠᤔᤢᤀᤧᤗᤧᤴ ᤋᤣ᤹ᤖᤢᤒᤡᤖᤢ॥ 20 ᤀᤣᤗᤡ᤺ᤸᤗᤧ ᤀᤣᤸᤁᤠᤏᤠᤴ ᤏᤢ ᤁᤢᤔᤣᤳ ᤜᤴᤏᤠ᤺ᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖ ᤔᤧᤳᤋᤢᤛᤡ. “ᤂᤧᤴᤇᤡ᤹ ᤁᤧᤏᤠ᤺ᤰᤋᤧᤛᤢᤒᤠ ᤁᤴ ᤂᤧᤴᤇᤡ᤹ ᤛᤠ᤺ᤸᤗᤧ ᤁᤢᤗᤧᤰᤘᤠᤀᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤴ ᤔᤧᤴᤇᤢᤔᤠᤴᤗᤠᤶᤒᤠᤀᤣ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ ᤁᤧᤒᤡᤛᤡᤖᤖᤥ॥” ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤜᤡᤶᤔᤥ ᤏᤢ᤺ᤰᤂᤧᤛᤡ॥ 21 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤜᤴᤏᤠ᤺ᤴ ᤗᤢᤱᤔᤠ᤹ ᤋᤢᤰᤋᤢ᤹. ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤕᤧᤶᤒᤡᤳᤇᤠ ᤛᤢᤶᤛᤡ ᤏᤢ ᤔᤧᤴᤇᤢᤔᤠ ᤏᤧᤳᤇᤡ ᤛᤠᤜᤠ᤹ ᤁᤳᤋᤢᤛᤡ॥ ᤏᤠ ᤀᤅᤧ᤺ᤰᤘᤠ ᤛᤠᤔᤢᤀᤧᤗᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤔᤥ ᤐᤥᤔᤠᤎᤠᤱᤔᤠ ᤜᤣ᤺ᤰᤋᤧ॥ ᤀᤣᤗᤡᤴ ᤏᤢ ᤁᤢᤛ᤻ᤛᤠᤜᤠ᤹ 22 ᤀᤣᤗᤡᤴ ᤀᤠᤸᤗ ᤛᤠ᤹ᤖᤡᤰ ᤁᤠᤵᤐᤥᤒᤠ ᤋᤢᤶᤛᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤆᤥᤃᤢᤛᤡᤒᤠ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤂᤧᤵᤛᤢ॥ ᤜᤧᤰᤁᤩᤠᤱ ᤛᤣᤛᤣ ᤛᤠ᤺ᤱᤃᤠᤜᤡᤶ ᤗᤠᤶᤎᤣ᤺ᤵᤐᤥ ᤛᤧᤘᤠ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤛᤥᤖᤡᤰ ᤀᤡᤵᤛᤧᤇᤡᤒᤠ ᤐᤠ᤺ᤴᤜᤠ᤹ᤀᤠᤱ ᤂᤢᤏᤧ᤹ ᤂᤧᤵᤛᤢ॥ 23 ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴᤇᤡ᤹ ᤌᤣᤀᤠᤱ ᤀᤰᤋᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤛᤢᤒᤠᤃ᥅ ᤂᤧᤴᤇᤡ᤹ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤛᤢ ᤁᤧᤗ᤹ᤒᤠ ᤐᤠᤴ ᤁᤧᤖᤧᤰ ᤔᤏᤠᤜᤠ᤹ᤗᤠᤶ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹॥ 24 ᤔᤣ᤺ᤴᤏᤠ. ᤀᤠᤛ᤻ᤛᤠᤛᤣ. ᤀᤠᤱᤃᤠ᤹ ᤆᤩᤠ ᤂᤧᤵᤛᤢᤱᤗ ᤘᤠ᤹ᤀᤠ. ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ᤗᤢᤶᤔᤥ ᤁᤧᤀᤡᤱᤒᤠ ᤁᤶᤓᤍᤠᤱᤒᤠ ᤐᤠ᤺ᤴᤜᤠ᤹ ᤏᤢᤒᤠ ᤔᤣ᤺ᤴ॥ 25 ᤔᤏᤠ᤺ᤸᤗᤧ ᤔᤏᤠ᤺ᤸᤗᤧᤀᤣ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤗᤠᤛᤥᤳ ᤆᤥᤃᤢᤏᤧᤑᤃᤪ ᤏᤡᤱᤘᤠ᤹ᤑᤢᤔᤠᤱᤗᤧ ᤁᤢᤜᤢᤰᤁᤡᤴ ᤗᤠᤕᤥ ᤁᤧᤈᤥ᤺ᤰᤐᤠᤸᤗᤧ ᤁᤢᤛᤶᤎᤠᤱ ᤆᤢᤰᤔᤠ ᤛᤢᤰᤗᤥ॥ ᤁᤖ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤗᤧ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤏᤧᤑᤃᤪ ᤂᤧᤸᤗᤧ ᤁᤢᤗᤠᤃᤡ ᤜᤠ᤺ᤳᤗᤧ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤒᤠᤒᤣ᥅” ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤵᤛᤧᤇᤢᤛᤠᤱ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤒᤠ᤺ᤴᤜᤠ᤹ ᤂᤧᤶᤄᤧᤶ ᤔᤧᤗᤠᤵᤋᤧᤛᤢᤴ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤛᤧᤵᤔᤠᤛᤡᤀᤣ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧᤖᤥ॥ 26 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤏᤢ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤢᤱᤃᤢᤶᤗᤠᤶ ᤛᤠᤔᤢᤀᤧᤗᤧᤴ ᤌᤰᤗᤠ ᤗᤡᤱᤃᤧᤴᤏᤥ ᤐᤥᤖᤧᤖ ᤐᤣ॥ ᤀᤣᤗᤡᤖᤧ ᤁᤢᤜᤡᤶᤛᤕᤱᤅᤥ ᤋᤠᤵᤑᤧ᤺ᤶᤒᤠ ᤔᤠᤱᤏᤡᤱᤘᤠ᤹ᤐᤠᤴ 27 ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤁᤢᤛᤧᤘᤠᤖᤥᤒᤠᤎᤡᤰ ᤋᤩᤧᤀᤠᤱ ᤀᤣᤗᤡᤴ ᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤁᤧᤶᤒᤠ ᤁᤧᤴᤎᤧᤒᤠᤛᤡᤖᤧ ᤂᤢᤏᤡ᤹ ᤜᤡᤶᤛᤕᤱᤜᤠ᤹ ᤔᤡᤛᤪ ᤗᤠᤈᤣ᤹ᤒᤠ ᤑᤠᤖᤥ ᤜᤠᤱᤅᤡᤸᤗᤧ ᤁᤢᤕᤥ᤺ᤃ᤻ᤒᤠ ᤔᤧᤘᤕᤧᤸᤗᤧ ᤀᤠᤱᤃᤠ᤹ ᤀᤠᤒᤠᤅᤣ ᤂᤧᤱᤜᤠ᤹ᤖᤥ ᤀᤥᤛᤣ᤺ᤴ ᤔᤧᤎᤠᤰᤛᤡᤱᤅᤠᤴᤒᤡ᥅ 28 ᤀᤠᤱᤃᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤌᤠ᤺ᤰᤜᤠ᤹ᤀᤥ ᤂᤧᤏᤧ᤹ ᤁᤧᤛᤢᤎᤧᤒᤠ ᤜᤠᤖᤢᤏᤧᤴ ᤀᤠᤱᤃᤠ᤹ᤀᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤐᤥᤱᤛᤧ. ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤀᤥ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤒᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤡᤍᤢᤱᤈᤓᤠ ᤋᤥ᤺ᤴᤇᤧ. ᤛᤢᤰᤐᤠ-ᤛᤠᤱᤛᤡᤱ ᤜᤠ᤺ᤴᤇᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤣᤛᤠᤱ ᤏᤠᤀᤡᤏᤠᤛᤢ᤺ᤳ ᤀᤣᤐᤥᤍ ᤆᤠᤱᤔᤠᤀᤠᤱ ᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤛᤣᤃᤢᤱ॥ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤧᤳᤋᤡ ᤔᤧᤍᤥ᤺ᤴᤍᤢᤒᤠᤀᤥᤗᤠᤶ ᤁᤢᤓᤠ ᤗᤰᤜᤠ᤹ ᤂᤧᤏᤧ᤹ ᤁᤧᤛᤢᤎᤧᤒᤠ ᤜᤡᤶᤛᤕᤱᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤁᤵᤔᤠ ᤕᤢᤰ ᤐᤡᤖᤢᤱᤛᤡᤱ॥ 29 ᤀᤠᤱᤃᤠ᤹ ᤀᤠᤕᤢᤰᤏᤠᤀᤥ ᤋᤥ᤺ᤴᤇᤧ ᤔᤧᤍᤠᤖᤢᤒᤠ ᤗᤧᤳᤋᤡᤜᤠ᤹ ᤏᤢ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤂᤡᤏᤡ᤹ ᤌᤣᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤢᤶᤔᤡᤴᤒᤠᤒᤣ᥅ ᤂᤧᤏᤧ᤹ ᤀᤡᤛᤪᤠᤀᤡᤗᤡ ᤀᤠᤔᤏᤠᤜᤠ᤹ᤖᤧ ᤗᤧᤳᤋᤡ ᤔᤧᤍᤥᤴᤍᤢᤒᤠ ᤏᤢᤒᤠ ᤆᤡᤃᤰᤘᤠᤜᤠ᤹ ᤂᤧᤏᤧ᤹ ᤁᤧᤗᤠᤃᤡ ᤁᤧᤕᤢᤰᤂᤢᤀᤠᤱ ᤀᤠᤱᤃᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤌᤣᤀᤠᤱ ᤁᤧᤛ᤻ᤛᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤖᤢᤛᤡᤒᤠᤒᤣ᥅’ 30 “ᤂᤧᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤂᤧᤏᤧ᤹ ᤁᤧᤜᤡᤶᤛᤕᤱ ᤏᤢ ᤁᤧᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤛᤍᤠᤍᤡᤱ ᤆᤰᤔᤧᤴᤗ᤹ᤀᤣ ᤀᤠᤱᤃᤠ᤹ ᤀᤠᤍᤃᤡ ᤔᤠᤱᤛᤧᤘᤠ ᤔᤧᤈᤥᤃᤢᤖ ᤑᤠ᤹ᤀᤠᤱ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤘᤕᤠᤱ॥’ ᤁᤖ ᤀᤠᤸᤗ ᤕᤜᤘᤣ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ. ‘ᤀᤠᤸᤗᤀᤠᤱᤎᤥ ᤀᤰᤂᤣ ᤐᤥᤱᤔᤠ ᤔᤧᤏᤢ᤹ᤏᤧᤴ॥ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤱᤛᤡᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠᤜᤠ᤹ ᤀᤠᤱᤃᤠ᤹ ᤆᤡ᤺ᤳᤋᤢᤱᤛᤡᤱ॥’ 31 ᤀᤥᤔᤧᤳᤋᤧ᤹. ᤀᤠᤸᤗ ᤀᤰᤋᤱᤒᤠ ᤕᤧᤶ ᤋᤠᤖᤒᤳ. ᤂᤧᤏᤧ᤹ ᤁᤧᤜᤡᤶᤛᤕᤱᤜᤠ᤹ ᤏᤢ ᤁᤧᤶᤒᤠᤖᤧ ᤁᤢᤜᤡᤶᤛᤕᤱᤜᤠ᤹ ᤁᤧᤖᤧᤰ ᤏᤢᤵᤛᤢᤱᤛᤡᤱ. ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤠ᤺ᤰᤛ᤹ᤖ ᤕᤠ᤺ᤴᤍᤢᤱᤛᤡᤱᤅᤠᤱ ᤁᤠᤵᤐᤥᤒᤠ ᤔᤧᤴᤍᤢᤶᤔᤣ ᤔᤧᤛᤡ᤹᤺॥ 32 ᤀᤠᤱᤃᤠ᤹ ᤀᤠᤕᤢᤱᤔᤠᤍᤧᤴᤏᤥ ᤂᤧᤏᤧ᤹ ᤐᤕᤶ ᤕᤶᤒᤠ ᤋᤢᤰᤂᤣ ᤋᤠᤒᤠ ᤁᤧᤏᤡᤛᤢ᤹॥ ᤜᤧᤰᤁᤣᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡᤃ ᤏᤢ᤹ᤔᤠ ᤋᤠᤔᤠᤀᤣ ᤐᤥᤱ. ᤁᤖ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤁᤧᤜᤡᤶᤛᤕᤱᤅᤥ ᤁᤧᤖᤧᤰ ᤌᤠᤱᤒᤧᤴ ᤔᤧᤘᤠ᤹ᤖᤀᤣ ᤔᤧᤛᤡᤔᤧᤄᤧᤳᤗᤥ॥ 33 ᤁᤖ ᤁᤢᤓᤠ ᤔᤏᤠᤜᤠ᤹ ᤀᤠᤱᤃᤠ᤹ ᤛᤧ᤺ᤵᤋᤢᤱ ᤁᤳᤋᤢᤱᤛᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤂᤧᤏᤧ᤹ ᤁᤧᤔᤡᤰᤘᤠ ᤏᤢ ᤔᤧᤖᤡᤱ ᤌᤰᤔᤠᤖᤧ ᤗᤠᤃᤡᤖᤰ ᤔᤧᤒᤥᤱ॥ ᤜᤧᤰᤁᤩᤠᤱ ᤕᤖᤡᤰᤋᤱᤒᤠ ᤁᤧᤔᤏᤠᤜᤠ᤹ ᤌᤠᤱᤒᤧᤴ ᤔᤧᤘᤧᤴᤏᤠᤱ ᤔᤧᤘᤠ᤹ᤀᤡᤸᤗᤧᤛᤠ ᤔᤧᤛᤡᤖᤥ॥ 34 “ᤁᤴ ᤁᤧᤖᤧᤰᤗᤧᤴ ᤔᤡᤰᤛᤣ᤺ᤱᤃ ᤂᤧᤏᤧ᤹ ᤏᤧᤵᤑᤢ ᤁᤧᤛ᤻ᤛᤠᤜᤠ᤹ᤀᤥ ᤋᤠᤵᤑᤧ᤺ᤶᤒᤠ ᤐᤥᤱᤒᤠ ᤁᤧᤏᤡᤛᤢ᤹॥ ᤂᤢᤴᤇᤡ᤹ ᤏᤧᤵᤔᤠᤱ ᤌᤡᤰᤕᤠ᤺ᤸᤗᤧ ᤛᤡᤛᤡᤖᤥ॥ 35 ᤀᤠᤱᤃᤠ᤹ ᤀᤠᤒᤠᤅᤣ ᤂᤧᤏᤧ᤹ ᤁᤧᤗᤠᤃᤡ ᤗᤳᤇᤠ ᤏᤛᤠᤏᤡᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤎᤡᤰ ᤑᤥ᤺ᤰᤂᤢᤱ. ᤂᤧᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤏᤢ ᤀᤠᤕᤠᤶᤛᤠᤶᤔᤥ ᤀᤡ᤺ᤳᤋᤢᤱᤒᤠ ᤜᤧᤰᤁᤣᤀᤣ ᤆᤥᤃᤢ᤹॥ ᤀᤠᤱᤃᤠ᤹ ᤂᤧᤸᤗᤧ ᤁᤢᤎᤠ᤺ᤰᤜᤠ᤹ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤆᤥᤃᤢᤱᤛᤡᤱ. ᤜᤧᤰᤁᤩᤠᤱ ᤂᤧᤸᤗᤧ ᤀᤠᤱᤃᤠ᤹ ᤛᤣᤃᤢᤱᤒᤠ ᤜᤠᤱᤅᤡᤸᤗᤧ ᤁᤢᤍᤃᤡ ᤛᤍᤠᤍᤡᤱ ᤔᤠᤱᤛᤧᤘᤠ ᤆᤥᤃᤢᤖᤥ॥ 36 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤡᤶᤛᤕᤱᤅᤥ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤁᤧᤖᤧᤰᤗᤧ ᤂᤢᤏᤧ᤹ ᤁᤢᤍᤃᤡ ᤔᤧᤒᤣ᤺ᤰᤁᤠᤱ ᤌᤢᤱᤒᤥᤜᤒᤳ ᤔᤧᤓᤴᤇᤡᤱ᤹ ᤂᤧᤒᤩᤠᤱ ᤕᤢᤵᤐᤠ ᤕᤠᤱᤀᤡᤳᤇᤣ᤹ ᤌᤡᤰ ᤏᤢ ᤆᤒᤧ᤺ᤳᤇᤡᤰ ᤁᤢᤈᤠᤈᤡ ᤐᤡᤖᤠᤱᤅᤧ᤹ᤏᤠ ᤗ᤹ᤖᤡᤰ ᤐᤣᤗᤡ ᤔᤧᤓᤠᤰᤋᤢ᤹. ‘ᤀᤠᤱᤃᤠ᤹ᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤰᤁᤥ ᤀᤠᤕᤠᤰᤋᤧ᤹ᤏᤠ. ᤜᤧᤰᤁᤣ᤺ᤸᤗ᤹ᤖᤡᤰ ᤀᤠᤱᤃᤠ᤹ ᤀᤠᤗᤠᤃᤡ ᤆᤠᤔᤠ ᤌᤢᤱᤔᤠ ᤁᤢᤈᤠ ᤁᤳᤋᤢᤱᤗ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.