᥇ ᤛᤠᤔᤢᤀᤧᤗ 19 - LIFOTNT

ᤍᤠᤀᤢᤍᤧᤴ ᤛᤠᤘᤗᤖᤧ ᤋᤢᤰᤂᤣ ᤆᤠ᤺ᤳᤋᤢᤒᤠ

¹ ᤛᤠᤘᤗᤖᤧ ᤍᤠᤀᤢᤍᤧᤴ ᤛᤧᤖᤧᤶᤔᤧ᤹ ᤑᤠ᤹ᤀᤠᤱ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴ ᤏᤢ ᤁᤧᤖᤧᤰ ᤁᤢᤔᤏᤠᤜᤠ᤹ ᤔᤧᤳᤋᤢᤛᤡ॥ ᤁᤖ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤌᤠᤅᤧ॥

² ᤂᤧᤸᤗᤧᤆᤥᤃᤢᤸᤗᤧ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤶᤒᤠ ᤛᤠᤘᤗᤖᤧ ᤂᤧᤏᤧ᤹ ᤛᤧᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤢᤕᤧᤶ ᤀᤥᤔᤧᤳᤋᤢᤖ ᤘᤠ᤹॥ ᤋᤠ᤺ᤴᤍᤡᤰ ᤋᤠᤏᤠᤶ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤘᤕᤧ᤹. ᤐᤩᤠᤱᤛᤡ ᤗᤧᤵᤔᤠᤱ ᤐᤣᤃᤧ᤹ᤀᤠᤱ ᤆᤡᤱᤛᤡᤱᤅᤧ᤹ᤀᤠᤱ ᤕᤢᤅᤧ᤹॥

³ ᤀᤠᤱᤃᤠ᤹ ᤗᤠ᤺ᤰᤁᤠᤳ ᤐᤣ᤺ᤰᤁᤠᤀᤠᤱ ᤂᤧᤏᤧ᤹ ᤁᤧᤈᤡᤱᤛᤡᤱᤒᤠ ᤐᤩᤠᤱᤛᤡ ᤐᤣᤛᤠᤱ ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤒᤣᤛᤠᤱ ᤕᤧᤵᤐᤠ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤂᤢᤏᤧ᤹ᤏᤢ ᤋᤠ᤹ᤈᤧᤱᤅᤠ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤓᤠ ᤐᤠᤴ ᤏᤡᤱᤘᤠ᤹ ᤂᤥᤛᤢᤱᤏᤧᤓᤃᤪ ᤂᤧᤴ ᤆᤧᤰᤏᤧ॥”

⁴ ᤈᤥᤏᤠᤌᤠᤏᤖᤧ ᤍᤠᤀᤢᤍᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤶᤒᤠ ᤏᤢᤖᤡᤰ ᤋᤠ᤹ᤈᤧᤰᤋᤢ. “ᤀᤠᤍᤠᤱᤒᤣ ᤜᤠᤱᤅᤡᤸᤗᤧ ᤁᤧᤕᤥᤰ ᤍᤠᤀᤢᤍᤧᤴ ᤌᤣᤀᤠᤱ ᤔᤧᤔᤧᤳᤋᤧᤴᤏᤧ᤹॥ ᤂᤢᤏᤧ᤹ ᤁᤧᤍᤰᤗᤧᤱᤘᤠᤀᤥ ᤌᤣᤀᤠᤱ ᤑᤧᤴᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤘᤠ᤹॥ ᤂᤢᤏᤧ᤹ ᤌᤣ ᤆᤥᤃᤢᤀᤠᤱ ᤘᤠ᤹. ᤂᤧᤴ ᤀᤠᤍᤠᤱᤒᤠᤖᤧ ᤗᤠᤃᤡ ᤏᤢᤒᤠᤀᤣ ᤆᤥᤃᤢᤀᤠᤱ ᤘᤠ᤹॥

⁵ ᤂᤧᤴ ᤐᤗᤡᤛ᤻ᤋᤡ᤺ᤴ ᤛᤧᤖᤢᤸᤗᤧ ᤂᤢᤏᤧ᤹ ᤁᤢᤎᤰᤁᤡᤴ ᤗᤧᤖᤢᤀᤠᤱ ᤔᤧᤱᤃᤡᤀᤣ ᤌᤱ ᤆᤥᤃᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤕᤶᤒᤠ ᤌᤱ ᤏᤠ᤺ᤴᤍᤢ॥ ᤜᤧᤰᤁᤩᤠᤱ ᤂᤧᤴ ᤁᤧᤏᤡᤛᤢᤀᤠᤱ ᤛᤠ᤹ᤖᤡᤰ ᤁᤧᤏᤡᤱᤘᤠ᤹ ᤋᤩᤧ॥ ᤜᤧᤰᤁᤣ᤺ᤸᤗᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤌᤣᤀᤠᤱ ᤔᤧᤴᤈᤥ᤺ᤰᤔᤏᤠᤒᤠ ᤔᤏᤠᤴ ᤌᤧᤔᤠᤀᤠᤱ ᤛᤧᤵᤔᤠ ᤁᤧᤃᤥ᤺ᤳᤋᤢᤒᤠᤒᤣ᥅”

⁶ ᤈᤥᤏᤠᤌᤠᤏᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤛᤠᤘᤗᤧᤴ ᤁᤢᤏᤡᤱᤘᤠ᤹ ᤋᤩᤧ. ᤜᤧᤰᤁᤩᤠᤱ ᤛᤧᤰᤂᤠᤀᤣ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤍᤠᤀᤢᤍᤧᤴ ᤔᤧᤛᤧᤳᤋᤠᤴ ᤗ᤹ᤖᤡᤰ ᤔᤠᤱᤜᤧᤰᤛᤡᤱ॥

⁷ ᤂᤧᤸᤗᤧᤆᤥᤃᤢᤸᤗᤧ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤳᤋᤢ॥ ᤂᤶᤒᤩᤠᤱ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤛᤠᤘᤗᤖᤧᤀᤥ ᤋᤣ᤹ᤖᤢ. ᤜᤧᤰᤁᤩᤠᤱ ᤋᤃᤡᤒᤠ ᤜᤧᤰᤁᤣ ᤜᤠᤱᤅᤡᤸᤗᤧ ᤁᤢᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤜᤣ᤺ᤰᤋᤢ॥

⁸ ᤕᤠᤶᤔᤥ ᤌᤱ ᤐᤥᤱᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥᤃᤧ॥ ᤂᤧᤵᤔᤥ ᤂᤢᤏᤧ᤹ ᤛᤠ᤹ᤖᤡᤰ ᤌᤃᤢᤛᤡ. ᤂᤧᤴ ᤐᤗᤡᤛ᤻ᤋᤡᤜᤠ᤹ ᤂᤧᤵᤔᤥᤏᤢ ᤔᤧᤄᤧᤳᤇᤡᤱ ᤔᤧᤄᤧᤖᤧ॥

⁹ ᤌᤡᤰᤕᤠᤴ ᤛᤠᤘᤗᤖᤧ ᤁᤢᤜᤢᤰᤁᤥ ᤗᤠ᤺ᤰᤁᤡᤴ ᤕᤠᤱᤛᤡᤱᤅᤠᤱ ᤁᤢᤜᤡᤶᤔᤥ ᤕᤢᤅᤧᤈᤩᤧ. ᤂᤧᤶᤓᤧᤸᤗᤧ ᤕᤜᤘᤣ ᤍᤠᤱᤒᤠᤗᤠᤶᤒᤠ ᤁᤧᤍᤠᤒᤠ ᤑᤧᤴᤛᤠᤶᤔᤡᤸᤗᤧ ᤛᤠᤘᤗᤧᤴ ᤋᤧᤶᤛᤢ. ᤂᤧᤴ ᤕᤧᤶᤔᤥ ᤍᤠᤀᤢᤍᤧᤴᤏᤠᤱ ᤔᤢᤰᤗᤠ ᤔᤢᤰᤂᤢᤖ ᤀᤠᤶᤓᤠ ᤂᤧᤵᤔᤥ ᤕᤢᤅᤧ॥

¹⁰ ᤛᤠᤘᤗᤖᤧ ᤍᤠᤀᤢᤍᤧᤴ ᤗᤢᤱᤎᤠᤰᤁᤥ ᤗᤠ᤺ᤰᤁᤡᤸᤗᤧ ᤋᤡ᤺ᤰᤂᤢᤖ ᤑᤠ᤹ᤀᤠᤱ ᤑᤧᤱ ᤗᤧᤵᤋᤢ ᤁᤖ ᤍᤠᤀᤢᤍᤧᤴ ᤀᤡ᤺ᤶᤛᤡᤱ. ᤜᤧᤰᤁᤩᤠᤱ ᤂᤧᤴ ᤗᤠ᤺ᤰᤁᤡᤴ ᤗᤢᤱᤎᤠᤰᤁᤥ ᤗᤣ᤺ᤳᤇᤡᤱ॥ ᤍᤠᤀᤢᤍᤧᤴ ᤜᤠᤒᤠ ᤂᤧᤴ ᤛᤧᤴᤍᤡᤰ ᤂᤧᤳᤇᤡᤱ॥

¹¹ ᤜᤠᤒᤠ ᤂᤧᤴ ᤛᤧᤴᤍᤡᤰᤛᤠ ᤛᤠᤘᤗᤖᤧ ᤍᤠᤀᤢᤍᤖᤧ ᤁᤢᤜᤡᤶᤔᤥ ᤁᤢᤓᤠ ᤁᤢᤔᤏᤠᤜᤠ᤹ ᤁᤢᤎᤥ᤺ᤶᤛᤧ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤌᤠᤖᤡᤰᤗᤧ ᤛᤧᤵᤔᤠ ᤑᤠ᤹ᤀᤠᤱ ᤐᤠᤱᤄᤢᤛᤡ॥ ᤁᤖ ᤍᤠᤀᤢᤍᤖᤧ ᤁᤢᤔᤣᤳ ᤔᤡᤁᤗᤖᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤸᤗᤥ ᤛᤧᤴᤍᤡᤰᤛᤠ ᤁᤧᤱᤄᤧᤳᤇᤡᤱᤅᤡᤴ ᤁᤧᤶᤒᤣ᤺ᤰᤏᤧᤴᤏᤧᤓᤃᤪ ᤑᤃᤪ ᤋᤠ᤺ᤴᤍᤡᤰ ᤋᤠᤏᤠᤶᤛᤠ ᤁᤧᤶᤛᤧᤳ॥”

¹² ᤂᤧᤸᤗᤧᤆᤥᤃᤢᤸᤗᤧ ᤔᤡᤁᤗᤖᤧ ᤍᤠᤀᤢᤍᤧᤴ ᤐᤣᤎᤠ᤺ᤵᤐᤥᤗᤠᤶ ᤗᤠ᤺ᤰᤁᤠᤳ ᤕᤥ ᤌᤠᤛᤢᤀᤠᤱ ᤗ᤺ᤳᤋᤢᤍᤣᤛᤢ. ᤜᤧᤰᤁᤩᤠᤱ ᤛᤫᤠ᤺ᤳᤋᤠᤱ ᤂᤧᤳᤇᤡᤱ ᤐᤣ॥

¹³ ᤂᤧᤒᤩᤠᤱ ᤔᤡᤁᤗᤖᤧ ᤏᤠᤘᤠᤀᤡᤳᤗᤠᤎᤡᤰ ᤋᤠᤖᤢᤀᤠᤱ ᤁᤢᤕᤢᤰᤏᤠᤀᤥ ᤏᤧᤛ᤻ᤛᤢ. ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤐᤥ ᤔᤧ᤺ᤴᤍᤠ ᤔᤢᤖᤡᤰᤁᤡᤸᤗᤧ ᤁᤒᤢᤀᤠᤱ ᤋᤣᤳ ᤂᤠᤵᤋᤢ ᤏᤧᤛ᤻ᤛᤢ॥

¹⁴ ᤛᤠᤘᤗᤖᤧ ᤁᤢᤔᤏᤠᤜᤠ᤹ ᤍᤠᤀᤢᤍᤖᤧ ᤁᤢᤍᤧᤶᤛᤧ ᤐᤠᤱᤄᤢᤛᤡ. ᤁᤖ ᤔᤡᤁᤗᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤢᤏᤧ᤹ᤃ ᤋᤢᤰᤗ ᤏᤧ᤹᤺॥”

¹⁵ ᤜᤧᤰᤁᤣ᤺ᤸᤗᤧ ᤛᤠᤘᤗᤖᤧ ᤍᤠᤀᤢᤍᤧᤴ ᤀᤠᤒᤠᤅᤣ ᤔᤡᤰᤁᤡᤸᤗᤧ ᤀᤥᤔᤧᤳᤋᤠᤶᤔᤧ᤹ ᤑᤠ᤹ᤀᤠᤱ ᤂᤧᤱᤜᤠ᤹ ᤐᤠᤱᤄᤢᤛᤡ॥ ᤂᤢᤏᤧ᤹ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤁᤢᤕᤢᤰᤏᤠᤏᤢ ᤀᤠᤱᤃᤠ᤹ᤀᤥ ᤋᤠᤖᤠᤶᤔᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤛᤧᤖᤢᤱ᤹॥”

¹⁶ ᤂᤧᤴ ᤁᤢᤔᤏᤠᤜᤠ᤹ ᤔᤧᤒᤣᤀᤠᤱ ᤜᤡᤶᤔᤥ ᤔᤧᤗᤠᤛᤧ ᤁᤖ ᤕᤢᤰᤏᤠᤀᤥ ᤏᤠᤘᤠᤀᤡᤳᤗᤠᤴ ᤏᤢ ᤂᤧᤸᤗᤧ ᤁᤢᤎᤧᤃᤣ᤺ᤰᤐᤥ ᤔᤧᤴᤍᤠᤰ ᤔᤢᤖᤡᤰᤁᤡᤸᤗᤰ ᤔᤧᤄᤥᤛᤢ॥

¹⁷ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤔᤡᤁᤗᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤀᤠᤱᤃᤠ᤹ ᤀᤠᤏᤡᤱᤔᤡ ᤍᤠᤀᤢᤍᤧᤴ ᤁᤧᤄᤧᤳᤋᤢ ᤁᤧᤍᤣᤛᤢᤀᤠᤱ ᤀᤡᤱᤃᤧᤗᤧᤰᤁᤠᤒᤠ᥅” ᤔᤡᤁᤗᤖᤧ ᤔᤧᤳᤋᤢ. “ᤂᤢᤏᤧ᤹. ‘ᤂᤧᤳᤇᤡᤱᤔᤠ ᤁᤧᤶᤓᤠ᤹ᤀᤠᤴᤏᤧᤓᤃᤪ ᤛᤧᤳᤏᤧ’ ᤔᤧᤳᤋᤠᤱ॥”

¹⁸ ᤍᤠᤀᤢᤍᤧᤴ ᤂᤧᤳᤇᤡᤱᤅᤠᤱ ᤖᤠᤔᤠ ᤐᤠᤱᤈᤢᤶ ᤛᤠᤔᤢᤀᤧᤗᤖᤥ ᤐᤣ. ᤜᤧᤰᤁᤩᤠᤱ ᤛᤠᤘᤗᤖᤧ ᤂᤢᤏᤧ᤹ᤏᤢ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤛᤠᤔᤢᤀᤧᤗᤧᤴ ᤆᤧᤰᤋᤢ॥ ᤂᤧᤶᤒᤩᤠᤱ ᤛᤠᤔᤢᤀᤧᤗᤧᤴ ᤏᤢ ᤂᤢᤏᤧ᤹ ᤏᤤᤕᤥᤋ ᤐᤣᤛᤡᤀᤠᤱ ᤕᤢᤱᤔᤠ ᤜᤣ᤺ᤰᤋᤧᤛᤡ॥

¹⁹ ᤍᤠᤀᤢᤍᤧᤴ ᤖᤠᤔᤠᤒᤠ ᤏᤤᤕᤥᤋᤀᤥ ᤘᤠ᤹ ᤑᤠ᤹ᤀᤠᤱ ᤁᤢᤓᤠ ᤔᤏᤠᤖᤧ ᤛᤠᤘᤗᤧᤴ ᤔᤧᤔᤧᤳᤋᤢ॥

²⁰ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤁᤢᤓᤠ ᤔᤏᤠᤜᤠ᤹ ᤍᤠᤀᤢᤍᤖᤧ ᤁᤢᤍᤧᤶᤛᤧ ᤐᤠᤱᤄᤢᤛᤡ॥ ᤂᤧᤶᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤠᤔᤢᤀᤧᤗᤖᤧ ᤗᤠᤶᤗᤥᤛᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤛᤠᤔᤢᤀᤧᤗᤧᤴᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤏᤢ ᤔᤧᤕᤠᤃᤧᤒᤠ ᤔᤧᤏᤡᤛᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤥᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤋᤩᤧᤀᤠᤱ ᤂᤧᤱᤜᤠ᤹ᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤔᤧᤜᤣ᤺ᤰᤋᤧ॥

²¹ ᤁᤴ ᤐᤠ᤺ᤴᤜᤠ᤹ ᤛᤠᤘᤗᤖᤧ ᤂᤧᤵᤛᤢᤀᤠᤱ ᤕᤠᤶᤔᤥᤀᤠᤱ ᤘᤣ᤹ ᤔᤏᤠᤜᤠ᤹ ᤐᤠᤱᤄᤢᤛᤡ॥ ᤂᤧᤱᤜᤠ᤹ᤀᤠᤱ ᤂᤢᤴᤇᤡ᤹ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠ ᤔᤧᤜᤣ᤺ᤰᤋᤧ॥ ᤛᤠᤘᤗᤖᤧ ᤕᤠᤶᤔᤥ ᤛᤢᤶᤛᤡᤃᤣ᤺ᤰᤐᤥ ᤔᤏᤠᤜᤠ᤹ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧᤀᤠᤱ ᤜᤠᤒᤠᤜᤧᤰᤁᤣ ᤔᤧᤈᤥᤃᤢ॥

²² ᤜᤧᤰᤁᤣ᤺ᤸᤗᤧ ᤛᤠᤘᤗᤧᤴ ᤀᤠᤒᤠᤅᤣ ᤖᤠᤔᤠ ᤌᤠᤛᤡᤱᤅᤠᤱ ᤐᤣ. ᤂᤧᤶᤒᤩᤠᤱ ᤛᤣᤁᤢᤀᤥ ᤁᤧᤏᤧᤒᤠ ᤕᤶᤒᤠ ᤘᤒᤠᤰᤁᤥ ᤁᤧᤖᤧ॥ ᤂᤧᤵᤔᤥ ᤂᤢᤏᤧ᤹ ᤁᤧᤖᤧᤀᤠᤱ ᤔᤏᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤛᤠᤔᤢᤀᤧᤗᤧᤴ ᤏᤢ ᤍᤠᤀᤢᤍᤧᤴ ᤀᤠᤳᤋᤠᤴ ᤘᤠ᤹ᤛᤡᤒᤣ॥” ᤂᤧᤒᤩᤠᤱ ᤂᤧᤵᤔᤥᤒᤠ ᤔᤏᤠᤜᤠ᤹ᤖᤧ “ᤂᤢᤴᤇᤡ᤹ᤃ ᤖᤠᤔᤠᤒᤠ ᤏᤤᤕᤥᤋᤀᤥ ᤘᤠ᤹ᤛᤡᤖᤥ” ᤔᤧᤔᤧᤳᤋᤢ॥

²³ ᤂᤢᤏᤧ᤹ ᤂᤧᤴ ᤗᤠᤶᤔᤥ ᤗᤠᤱᤄᤣᤃᤧᤖ ᤐᤳᤇᤧᤸᤗᤧᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤢᤏᤧ᤹ᤀᤥ ᤋᤩᤧᤀᤠᤱ ᤂᤢᤏᤧ᤹ᤀᤠᤱ ᤖᤠᤔᤠᤒᤠ ᤏᤤᤕᤥᤋ ᤌᤠᤖᤡᤰᤁᤣ ᤁᤢᤛᤡᤰᤛᤔᤧᤖ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤏᤢ ᤗᤠᤱᤄᤣᤃᤧ ᤁᤧᤖᤧ॥

²⁴ ᤂᤧᤵᤔᤥ ᤂᤢᤏᤧ᤹ ᤁᤢᤈᤠᤱ ᤁᤢᤍᤣ᤺ᤳᤜᤠ᤹ ᤑᤧᤴᤍᤢ. ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤢᤍᤃᤡ ᤁᤢᤛᤡᤰᤛᤔᤧᤖ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤏᤢ ᤗᤧᤴᤍᤡᤰ ᤏᤠᤶᤎᤠᤎᤠ ᤏᤢ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠ᤺ᤳᤋᤠᤱ ᤕᤢᤅᤧ ᤗᤧᤰᤆᤠᤒᤢᤎᤢ᤺ᤰ ᤕᤢᤅᤧᤃᤖᤧ॥ ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ ᤀᤰᤂᤣ ᤔᤧᤗ᤹ᤖᤧ. “ᤌᤣ ᤛᤠᤘᤗᤧᤴᤏᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤗᤳᤇᤠᤒᤡ᥅”