᥇ ᤛᤠᤔᤢᤀᤧᤗ 18 - LIFOTNT

¹ ᤍᤠᤀᤢᤍᤖᤧ ᤛᤠᤘᤗᤧᤴᤏᤢ ᤋᤠ᤹ᤈᤧᤱᤔᤠ ᤛᤢᤖᤢᤀᤠᤱ. ᤛᤠᤘᤗᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏᤧᤴ ᤍᤠᤀᤢᤍᤧᤴᤏᤢ ᤏᤡᤱᤘᤠ᤹ᤀᤥ ᤌᤡᤰᤜᤢᤵ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤠᤒᤠᤅᤣ ᤜᤧᤰᤁᤣ ᤍᤠᤀᤢᤍᤧᤴ ᤗᤢᤱᤔᤠ᤹ ᤋᤢᤰᤔᤠ ᤜᤣ᤺ᤰᤋᤢ॥

² ᤂᤧᤴ ᤕᤧᤴᤏᤠᤱᤎᤥ ᤛᤠᤘᤗᤖᤧ ᤍᤠᤀᤢᤍᤧᤴ ᤂᤢᤏᤧ᤹ᤏᤢᤀᤣ ᤁᤵᤔᤠ ᤜᤣ᤺ᤰᤋᤢ. ᤜᤧᤰᤁᤩᤠᤱ ᤁᤢᤶᤒᤠᤖᤧ ᤁᤢᤜᤡᤶᤔᤥ ᤕᤠᤶᤔᤥ ᤏᤢ᤺ᤱᤔᤠ ᤐᤣ᤺ᤰᤔᤠ ᤔᤧᤒᤠᤱᤄᤢᤴ॥

³ ᤈᤥᤏᤠᤌᤠᤏᤖᤧ ᤍᤠᤀᤢᤍᤧᤴ ᤀᤠᤒᤠᤅᤣ ᤜᤧᤰᤁᤣ ᤗᤢᤱᤔᤠ᤹ ᤋᤢᤰᤋᤢᤒᤠᤸᤗᤧ ᤆᤥᤃᤢᤸᤗᤧ. ᤈᤥᤏᤠᤌᤠᤏᤖᤧ ᤂᤧᤴᤏᤢ ᤔᤠᤱᤜᤧᤰ ᤆᤥᤃᤢ॥

⁴ ᤂᤧᤒᤩᤠᤱ ᤈᤥᤏᤠᤌᤠᤏᤖᤧ ᤀᤠᤒᤠᤅᤣ ᤜᤧᤵᤛᤢᤒᤠ ᤋᤣᤳᤋᤧᤴ ᤑᤧᤴᤍᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤎᤰᤛᤢᤒᤠ ᤆᤠᤱᤅᤡᤴ ᤏᤢ ᤁᤢᤍᤠᤓᤣᤴ. ᤁᤢᤗᤡᤴ ᤜᤧᤰᤁᤩᤠᤱ ᤁᤢᤓ᤹ᤀᤡ᤺ᤴᤏᤠᤱ ᤍᤠᤀᤢᤍᤧᤴ ᤐᤡᤖᤢ॥

⁵ ᤛᤠᤘᤗᤖᤧ ᤕᤠ᤺ᤶᤒᤰ ᤆᤥ᤺ᤰᤛᤧ ᤐᤠᤱᤄᤢᤒᤠ ᤀᤠᤳᤋᤡᤴ ᤕᤠ᤺ᤶᤒᤰᤁᤥᤛᤠᤱ ᤍᤠᤀᤢᤍᤖᤧ ᤁᤢᤛ᤻ᤛᤠᤱᤗᤛ᤻ᤛᤢᤖ ᤕᤠ᤺ᤶᤒᤰ ᤆᤥᤃᤢ. ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤂᤧᤴᤏᤡᤴ ᤌᤥᤛᤢᤍᤡᤱ ᤌᤰᤔᤥᤒᤠ ᤕᤢᤰᤋᤡᤱ ᤆᤥᤃᤢ॥ ᤀᤰᤂᤣᤗ᤹ᤖᤡᤰ ᤌᤥᤛᤢᤍᤡᤱ ᤌᤰᤔᤥᤒᤠ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤛᤠᤘᤗᤖᤧ ᤁᤢᤎᤰᤛᤢᤒᤠ ᤗᤠᤶᤗᤥᤒᤠᤜᤠ᤹ᤖᤧᤀᤠᤱ ᤂᤢᤴᤇᤡ᤹ ᤛᤡᤖᤠ᤹ᤌᤠᤅᤧᤖᤥ॥

ᤛᤠᤘᤗᤖᤧ ᤍᤠᤀᤢᤍᤧᤴ ᤏᤠᤜᤧᤳᤋᤢᤒᤠ

⁶ ᤍᤠᤀᤢᤍᤖᤧ ᤐᤗᤡᤛ᤻ᤋᤡ ᤃᤥᤗᤩᤠᤋᤧᤴ ᤛᤧᤖᤢᤀᤠᤱ ᤏᤢ᤺ᤰᤂᤧᤖ ᤐᤳᤇᤧ. ᤜᤧᤰᤁᤣ᤺ᤸᤗᤧ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤐᤠᤱᤈᤢᤶᤗᤠᤶ ᤔᤧᤴᤇᤢᤔᤠᤜᤠ᤹ ᤔᤧᤗ᤺ᤴᤍᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤢ᤺ᤱᤃᤣ ᤏᤢ ᤂᤡᤳᤆᤡᤱ ᤂᤡᤳᤆᤡᤱ ᤁᤧᤗ᤹ᤒᤠ ᤔᤢᤰᤗᤠᤜᤠ᤹ ᤔᤧᤔᤢᤰᤂᤢᤖ ᤛᤠᤶᤗᤥᤏᤢ ᤜᤧᤰᤁᤩᤠᤱ ᤗᤠ᤺ᤱᤏᤢ ᤛᤠᤘᤗ ᤜᤠᤱᤅᤡᤴ ᤁᤢᤍᤢᤶᤛᤧ ᤔᤧᤍᤩᤧ॥

⁷ ᤔᤧᤴᤇᤢᤔᤠᤜᤠ᤹ ᤔᤧᤛ᤺ᤳᤋᤧᤀᤠᤱ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧ. “ᤛᤠᤘᤗᤖᤧ ᤜᤧᤴᤇᤡᤱ ᤜᤧᤴᤇᤡᤱ ᤛᤧᤖᤢᤛᤡ. ᤜᤧᤰᤁᤩᤠᤱ ᤍᤠᤀᤢᤍᤖᤧᤃ ᤗᤠᤅᤧᤴᤇᤡᤱ ᤗᤠᤅᤧᤴᤇᤡᤱ ᤛᤧᤖᤢᤛᤡ॥”

⁸ ᤁᤴ ᤐᤠ᤺ᤴᤏᤡᤸᤗᤧ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤛᤠᤘᤗᤧᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ ᤂᤢᤏᤧ᤹ ᤐᤠ᤺ᤳᤋᤢ. “ᤍᤠᤀᤢᤍᤖᤧ ᤁᤢᤗᤠᤃᤡ ᤂᤧᤱᤜᤠ᤹ᤖᤧ ᤗᤠᤅᤧᤴᤇᤡᤱ ᤗᤠᤅᤧᤴᤇᤡᤱ ᤔᤧᤏᤡᤖᤢᤛᤡ॥ ᤀᤠᤱᤃᤠ᤹ ᤀᤠᤗᤠᤃᤡᤃ ᤜᤧᤴᤇᤡᤱ ᤜᤧᤴᤇᤡᤱᤗᤰ ᤔᤧᤏᤡᤖᤢᤛᤡ॥ ᤀᤠᤸᤗ ᤂᤢᤏᤧ᤹ ᤜᤠᤱ ᤆᤥ᤺ᤰᤔᤠᤖᤰ ᤔᤧᤃᤳᤋᤢ᤹॥”

⁹ ᤂᤧᤴ ᤕᤧᤴᤏᤠᤱᤎᤥ ᤛᤠᤘᤗᤖᤧ ᤍᤠᤀᤢᤍᤧᤴ ᤛᤠ᤹ᤖᤡᤰ ᤏᤠᤜᤧᤵᤔᤠ ᤜᤣ᤺ᤰᤋᤢ॥

¹⁰ ᤁᤢᤍᤠ᤺ᤴᤍᤡᤰᤔᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢ ᤋᤠᤛᤢᤒᤠ ᤑᤧᤴᤛᤠᤶᤔᤡᤸᤗᤧ ᤛᤠᤘᤗᤧᤴ ᤋᤧᤶᤛᤢ॥ ᤂᤢᤏᤧ᤹ ᤜᤡᤶᤔᤥᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧᤖ ᤕᤢᤅᤧ. ᤁᤖ ᤍᤠᤀᤢᤍᤧᤴ ᤋᤃᤡᤒᤠ ᤜᤧᤰᤁᤣᤀᤣ ᤛᤠᤘᤗᤖᤧ ᤁᤢᤗᤠᤃᤡ ᤔᤢᤰᤗᤠ ᤔᤢᤱᤏᤢ ᤕᤢᤅᤧ॥ ᤛᤠᤘᤗᤖᤧ ᤁᤢᤜᤢᤰᤁᤥ ᤗᤳᤇᤠ ᤗᤠ᤺ᤰᤌᤡᤰ ᤁᤳᤋᤢᤀᤠᤱ ᤕᤢᤅᤧ॥

¹¹ “ᤍᤠᤀᤢᤍᤧᤴ ᤗᤢᤱᤎᤠᤰᤁᤥ ᤂᤷᤍᤡ᤺ᤱ ᤋᤡ᤺ᤰᤂᤢ ᤑᤳᤇᤢᤖ ᤗᤧᤵᤋᤢᤱ” ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤗᤠ᤺ᤰᤁᤡᤸᤗᤧ ᤏᤡᤗᤧᤱ ᤗᤧᤵᤋᤢ. ᤁᤖ ᤍᤠᤀᤢᤍᤧᤴ ᤏᤡᤗᤧᤱᤅᤣ ᤀᤡ᤺ᤶᤛᤡᤱ॥

¹² ᤛᤠᤘᤗᤧᤴ ᤍᤠᤀᤢᤍᤧᤴᤏᤢ ᤁᤡᤔᤠ ᤜᤣ᤺ᤰᤋᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤴ ᤍᤠᤀᤢᤍᤧᤴᤏᤢ ᤘᤕᤧ. ᤁᤖ ᤛᤠᤘᤗᤧᤴ ᤕᤜᤘᤣ ᤍᤠᤱᤒᤧᤸᤗᤧ ᤗᤧᤖᤢᤛᤢᤖᤢᤀᤠᤱ ᤘᤕᤧ॥

¹³ ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤧᤴ ᤜᤧᤴᤇᤡᤱ ᤌᤰᤛᤢᤒᤠ ᤋᤢᤖᤠᤖᤧᤴ ᤌᤰᤔᤥᤒᤠ ᤕᤢᤰᤋᤡᤱ ᤆᤥᤃᤢᤀᤠᤱ ᤂᤢᤏᤧ᤹ᤗᤠᤶ ᤔᤠ᤺ᤱᤄᤠ ᤐᤠᤱᤄᤢᤍᤣᤛᤢ॥ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤜᤧᤴᤇᤡᤱ ᤌᤰᤛᤢᤒᤠ ᤋᤢᤖᤠᤜᤠ᤹ ᤏᤢᤖᤡᤰᤁᤠᤱ ᤗᤠᤶᤗᤥᤛᤢᤛᤡ॥

¹⁴ ᤂᤢᤏᤧ᤹ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤁᤢᤗᤡᤱᤍᤥ ᤁᤧᤖᤧ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ᤏᤢ ᤘᤕᤧ॥

¹⁵ ᤍᤠᤀᤢᤍᤖᤧ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤁᤢᤗᤡᤱᤍᤥ ᤁᤧᤖᤧᤒᤠ ᤛᤠᤘᤗᤖᤧ ᤏᤡᤛᤢᤀᤠᤱ ᤂᤢᤏᤧ᤹ ᤍᤠᤀᤢᤍᤧᤴᤏᤢ ᤛᤠ᤹ᤖᤡᤰ ᤁᤡᤔᤠ ᤜᤣ᤺ᤰᤋᤧ॥

¹⁶ ᤁᤖ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤕᤜᤢᤍᤠᤒᤠᤜᤠ᤹ᤖᤧ ᤍᤠᤀᤢᤍᤧᤴ ᤗᤢᤱᤔᤠ᤹ ᤔᤧᤍᤢᤰᤋᤢ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤌᤱᤅᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠ ᤐᤥ᤺ᤰᤂᤧᤀᤠᤱ ᤏᤢᤖᤡᤰᤁᤠᤱ ᤗᤠᤶᤗᤥᤛᤢᤛᤡᤖ ᤘᤕᤧ॥

ᤍᤠᤀᤢᤍᤖᤧ ᤛᤠᤘᤗᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤔᤣ᤺ᤰᤂᤡᤶ ᤔᤧᤳᤋᤢ

¹⁷ ᤛᤠᤘᤗᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤛ᤻ᤛᤠ ᤋᤢᤶᤔᤠ ᤔᤣᤖᤠᤒᤧᤴᤏᤢ ᤂᤧᤏᤧ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤏᤧ. ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤌᤢᤶᤍᤧ᤹ᤖ ᤀᤠᤛᤧᤘᤠ ᤕᤠ᤺ᤶᤒᤰ ᤆᤥᤃᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤌᤱ ᤌᤰᤋᤧ᤹॥” ᤌᤣᤀᤠᤱᤓᤧᤸᤗᤧ ᤛᤠᤘᤗᤖᤧ ᤀᤠᤒᤠᤅᤣ ᤁᤢᤜᤢᤰᤗᤠᤶ ᤔᤣ᤺ᤴ. ᤁᤖ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤗᤠᤶᤒᤠ ᤍᤠᤀᤢᤍᤧᤴ ᤛᤧᤵᤔᤠ ᤏᤡᤱᤘᤠ᤹ ᤆᤥᤃᤢᤀᤠᤱ ᤘᤕᤧ॥

¹⁸ ᤁᤖ ᤍᤠᤀᤢᤍᤖᤧ ᤛᤠᤘᤗᤧᤴ ᤔᤧᤳᤋᤢ. “ᤀᤡᤛᤪᤠᤀᤡᤗ ᤛᤢᤘᤠᤱᤀᤥ ᤀᤠᤶᤒᤠ ᤆᤢ᤺ᤰᤛᤠ ᤘᤠ᤹. ᤀᤠᤱᤃᤠ᤹ ᤜᤠᤱᤅᤡᤸᤗᤧ ᤁᤢᤶᤒᤠᤱᤗᤢᤔᤡ᤹ ᤐᤥᤱᤔᤠ ᤔᤧᤗᤠ᤹ᤀᤠᤴ॥”

¹⁹ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤁᤢᤛ᤻ᤛᤠ ᤔᤣᤖᤠᤒᤧᤴ ᤍᤠᤀᤢᤍᤧᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤡᤔᤠ ᤕᤧᤴ ᤋᤩᤧ. ᤁᤖ ᤔᤣᤖᤠᤒᤧᤸᤗᤧ ᤁᤢᤔᤣ᤺ᤰᤂᤡᤶᤃ ᤔᤜᤥᤗᤠᤒᤠ ᤀᤍᤪᤡᤀᤣᤗᤧᤴᤏᤢᤏᤡ ᤐᤥ᤺ᤰᤂᤧ॥

²⁰ ᤁᤖ ᤛᤠᤘᤗᤖᤧ ᤘᤣ᤹ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤡᤁᤗᤧᤴ ᤏᤢ ᤍᤠᤀᤢᤍᤧᤴ ᤏᤠᤏᤢ᤹ᤏᤧᤛᤡ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤛᤠᤘᤗᤧᤴ ᤔᤧᤔᤧᤳᤋᤢ॥ ᤜᤧᤰᤁᤣ᤺ᤸᤗᤧ ᤛᤠᤘᤗᤧᤴ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤩᤧ॥

²¹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ᤀᤥ ᤀᤰᤂᤣ ᤐᤠ᤺ᤳᤋᤢ. “ᤂᤧᤴᤏᤣ ᤍᤠᤀᤢᤍᤧᤴᤏᤢ ᤔᤣ᤺ᤰᤂᤡᤶ ᤆᤥᤃᤢᤱ ᤐᤡᤖᤢᤱ᤹. ᤜᤧᤰᤁᤩᤠᤱ ᤍᤠᤀᤢᤍᤧᤴ ᤛᤡᤖ. ᤂᤧᤒᤩᤠᤱ ᤐᤗᤡᤛ᤻ᤋᤡᤜᤠ᤹ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤔᤧᤒᤥ᤺ᤰᤗ॥” ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤍᤠᤀᤢᤍᤧᤴ ᤁᤢᤶᤒᤠᤱᤗᤢᤔᤡ᤹ ᤐᤥᤱᤔᤠ ᤘᤣ᤹ ᤛᤢᤕᤧᤶ ᤐᤡᤖᤢ॥

²² ᤜᤧᤰᤁᤩᤠᤱ ᤛᤠᤘᤗᤖᤧ ᤁᤢᤔᤏᤠᤜᤠ᤹ ᤍᤠᤀᤢᤍᤖᤧᤀᤥ ᤐᤣ᤺ᤰᤔᤠᤀᤠᤱ ᤛᤫᤠ᤺ᤳ ᤀᤰᤋᤱᤒᤠ ᤐᤠᤴ ᤔᤧᤵᤔᤠ ᤀᤡᤱᤈᤠᤱ ᤐᤡᤖᤢᤛᤡ. “ᤜᤠᤱᤅᤡᤴ ᤂᤧᤏᤧ᤹ᤏᤢ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤘᤠ᤹. ᤂᤢᤏᤧ᤹ ᤁᤧᤖᤧᤰ ᤁᤢᤔᤏᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤛᤡᤖᤠ᤹ ᤁᤧᤶᤎᤠᤱ॥ ᤀᤠᤸᤗ ᤜᤠᤖᤠ ᤜᤠᤱᤅᤡᤸᤗᤧ ᤁᤢᤶᤒᤠᤱᤗᤢᤔᤡ᤹ ᤐᤥ᤺ᤰᤂᤧ᤹॥”

²³ ᤂᤧᤱᤜᤠ᤹ᤖᤧ ᤀᤠᤶᤓᤠ ᤁᤴ ᤐᤠ᤺ᤴᤏᤡᤴ ᤍᤠᤀᤢᤍᤧᤴ ᤔᤧᤔᤧᤳᤋᤢ॥ ᤁᤖ ᤍᤠᤀᤢᤍᤖᤧ ᤔᤧᤳᤋᤢᤛᤡ. “ᤜᤠᤱᤅᤡᤸᤗᤧ ᤁᤢᤶᤒᤠᤱᤗᤢᤔᤡ᤹ ᤐᤥᤱᤔᤠ ᤀᤢᤛᤢᤖᤢ ᤆᤥᤰ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡ᥅ ᤀᤠᤱᤃᤠ᤹ᤃ ᤌᤣᤀᤠᤱ ᤁᤧᤜᤥᤵᤐᤠ ᤔᤏᤠᤀᤠ. ᤜᤠ᤺ᤳᤗᤧᤀᤠᤱ ᤀᤠᤱᤃᤠ᤹ ᤁᤢᤛᤡᤱ ᤔᤧᤴᤏᤡ᤺ᤋᤠᤴ॥”

²⁴ ᤍᤠᤀᤢᤍᤖᤧ ᤐᤠ᤺ᤳᤋᤢᤒᤠ ᤁᤴ ᤐᤠ᤺ᤴᤜᤠ᤹ ᤛᤠᤘᤗᤧᤴ ᤁᤢᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ॥

²⁵ ᤜᤧᤰᤁᤩᤠᤱ ᤛᤠᤘᤗᤖᤧ ᤕᤠᤶᤔᤥ ᤀᤰᤂᤣ ᤔᤧᤵᤔᤠ ᤐᤠᤱᤄᤢᤛᤡ. “ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤗᤧᤰᤘᤠ ᤜᤢᤱᤔᤠᤖᤧ ᤗᤠᤃᤡ ᤜᤠᤱᤅᤡᤸᤗᤧ ᤔᤧᤴᤇ᤻ᤕᤠ᤺ᤸᤗᤧ ᤁᤢᤔᤧᤸᤗᤢᤱᤗᤧ ᤗᤠᤃᤡ ᤁᤡᤵᤌᤡᤰ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤆᤢᤳᤆᤢ᤹ᤈᤱᤜᤠ᤹ᤖᤰ ᤏᤠ᤺ᤰᤋᤢᤀᤠᤱ ᤘᤠ᤹॥” ᤛᤠᤘᤗᤖᤧ ᤍᤠᤀᤢᤍᤧᤴ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤜᤢᤰᤗᤠᤶ ᤛᤡᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤘᤕᤧ॥

²⁶ ᤛᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤔᤏᤠᤜᤠ᤹ᤖᤧ ᤍᤠᤀᤢᤍᤧᤴ ᤔᤧᤔᤧᤳᤋᤢ॥ ᤁᤴ ᤐᤠ᤺ᤴᤏᤡᤸᤗᤧ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤍᤠᤀᤢᤍᤧᤴ ᤋᤧᤴᤍᤧ॥ ᤜᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤕᤧᤶᤔᤡᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤁᤢᤔᤏᤠᤜᤠ᤹ ᤋᤣ᤹ᤖᤢᤛᤡᤀᤠᤱ ᤍᤠᤀᤢᤍᤧᤴ ᤐᤣ॥

²⁷ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤏᤢ ᤁᤢᤔᤏᤠᤜᤠ᤹ ᤔᤧᤒᤣᤀᤠᤱ ᤁᤡᤵ ᤏᤧᤳᤇᤡ ᤐᤗᤡᤛ᤻ᤋᤡᤜᤠ᤹ ᤛᤧᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤆᤢᤳᤆᤢ᤹ᤈᤱᤜᤠ᤹ ᤔᤧᤄᤰᤋᤢ. ᤂᤧᤒᤩᤠᤱ ᤜᤠᤱᤅᤡᤸᤗᤧ ᤁᤢᤶᤒᤠᤱᤗᤢᤔᤡ᤹ ᤐᤥᤱᤅᤠᤖ ᤑᤠ᤹ᤀᤠᤱ ᤋᤣ᤹ᤖᤢᤀᤠᤱ ᤜᤠᤱᤅᤡᤴ ᤐᤡᤖᤢ॥ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤁᤢᤛ᤻ᤛᤠ ᤔᤡᤁᤗᤧᤴ ᤍᤠᤀᤢᤍᤧᤴᤏᤢ ᤔᤣ᤺ᤰᤂᤡᤶ ᤆᤥᤃᤢᤒᤡᤖᤢ॥

²⁸ ᤕᤜᤘᤣ ᤍᤠᤱᤒᤠᤴ ᤍᤠᤀᤢᤍᤧᤴᤏᤢ ᤘᤠ᤹ᤖᤇ ᤁᤧᤗ᤹ᤒᤠ ᤛᤠᤘᤗᤖᤧ ᤏᤡᤱᤘᤠ᤹ ᤂᤥᤛᤢ. ᤜᤧᤰᤁᤩᤠᤱ ᤔᤡᤁᤗᤖᤧᤀᤠᤱ ᤍᤠᤀᤢᤍᤧᤴ ᤛᤠ᤹ᤖᤡᤰ ᤏᤠᤏᤢ᤹ᤖᤢᤖᤧᤳᤇ ᤑᤠ᤹ᤀᤠᤱ ᤁᤢᤛᤡᤱᤏᤡ᤺ᤳᤋᤢ॥

²⁹ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤧᤴ ᤍᤠᤀᤢᤍᤧᤴᤏᤢ ᤇᤧᤴᤏᤠ ᤛᤠ᤹ᤖᤡᤰ ᤁᤡᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤁᤢᤜᤡᤱᤜᤡᤱ ᤌᤠᤖᤡᤰᤁᤣ ᤂᤢᤏᤧ᤹ ᤍᤠᤀᤢᤍᤖᤧ ᤁᤢᤏᤡᤱᤔᤡ ᤐᤥ᤺ᤰᤂᤧ॥

³⁰ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤌᤰᤔᤥᤒᤠᤜᤠ᤹ ᤌᤱ ᤆᤥ᤺ᤰᤛᤧ ᤔᤧᤍᤩᤧᤖ ᤔᤧᤘᤕᤧ॥ ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤌᤱ ᤆᤥ᤺ᤰᤛᤧ ᤔᤧᤍᤩᤧ᤺ᤸᤗᤧ ᤛᤠᤘᤗᤖᤧ ᤘᤣ᤹ ᤁᤢᤎᤰᤔᤥᤒᤠᤜᤠ᤹ᤏᤢ᤺ᤸᤗᤧ ᤍᤠᤀᤢᤍᤖᤧ ᤕᤖᤡᤰ ᤏᤠ᤺ᤴᤍᤢᤛᤡ॥ ᤂᤧᤒᤩᤠᤱ ᤜᤧᤰᤁᤣ ᤐᤥ᤺ᤰᤂᤧᤸᤗᤧ ᤂᤢᤏᤧ᤹ ᤁᤢᤔᤡᤱ ᤀᤡᤅᤧᤖᤥ॥