᥇ ᤛᤠᤔᤢᤀᤧᤗ 17 - LIFOTNT

ᤃᤥᤗᤩᤋᤖᤧ ᤀᤡᤛᤪᤠᤀᤡᤗᤡᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤛᤡ

¹ ᤀᤠᤸᤗ ᤐᤗᤡᤛ᤻ᤋᤡᤜᤠ᤹ᤖᤧ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤂᤢᤏᤡ᤹ ᤌᤰᤛᤢᤒᤠᤜᤠ᤹ ᤔᤧᤛᤢᤵᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤢᤍᤠᤒᤠ ᤛᤥᤁᤥᤀᤥ ᤔᤧᤈᤢᤵᤛᤧ॥ ᤂᤧᤱᤜᤠ᤹ᤖᤧ ᤛᤥᤁᤥ ᤏᤢ ᤀᤠᤈᤣᤁᤠ ᤗᤢᤶᤔᤥᤒᤠ ᤀᤣᤐᤣᤛ-ᤍᤶᤔᤡᤔ ᤋᤧᤴᤏᤥ ᤋᤢᤖᤠᤕᤰ ᤔᤧᤈᤥᤃᤢᤀᤠᤱ ᤔᤧᤕᤢᤱᤛᤡᤱ॥

² ᤛᤠᤘᤗᤧᤴ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤀᤠᤱ ᤔᤧᤈᤢᤵᤛᤧᤀᤠᤱ ᤀᤣᤗᤠᤜ ᤋᤧᤶᤒᤣ᤹ᤀᤥ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤛᤧ ᤋᤢᤖᤠᤕᤰ ᤔᤧᤈᤥᤃᤢᤀᤠᤱ ᤔᤧᤕᤢᤱᤛᤡᤱ॥

³ ᤐᤗᤡᤛ᤻ᤋᤡᤜᤠ᤹ ᤌᤡᤰ ᤁᤥ᤺ᤰᤔᤠᤀᤥ ᤔᤧᤕᤢᤱᤛᤡᤱ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤘᤣ᤹ ᤁᤥ᤺ᤰᤔᤠᤀᤥ ᤔᤧᤕᤢᤱᤛᤡᤱ॥ ᤂᤧᤴ ᤁᤥ᤺ᤰᤔᤠᤜᤠ᤹ ᤗᤢᤶᤔᤥ ᤏᤧᤏᤧᤒᤠ ᤋᤧᤶᤒᤣᤎᤡᤁ ᤏᤧᤛ᤻ᤛᤧ॥

⁴ ᤜᤧᤰᤁᤩᤠᤱ ᤃᤠᤋᤒᤠ ᤃᤥᤗᤩᤋ ᤔᤡᤱ ᤁᤧᤘᤠ᤺ᤵᤐᤠ ᤁᤧᤎᤢᤶᤒᤠ ᤌᤰᤛᤢᤒᤠᤎᤡᤰ ᤐᤗᤡᤛ᤻ᤋᤡ ᤋᤢᤖᤠᤜᤡᤶᤗᤠᤶ ᤗ᤺ᤴᤍᤧ ᤑᤧᤖᤧ॥ ᤂᤧᤴ ᤜᤢᤰᤛᤡᤰ ᤋᤢᤰᤛᤡᤀᤠᤱ ᤁᤢᤓᤪᤧ᤺ᤱ ᤕᤠᤖᤡᤰ ᤁᤣ᤺ᤶᤒᤠ ᤆᤥᤃᤧ॥

⁵ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤥ ᤁᤠᤛᤠ ᤋᤥᤐᤡ ᤂᤢ᤺ᤰᤂᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤋᤢᤰᤐᤥᤱ ᤁᤡᤗᤥ ᤕᤠᤖᤡᤰ ᤁᤧᤗᤡ᤺ᤵᤐᤠ ᤁᤠᤛᤠ ᤛᤧ᤺ᤵᤆᤠᤱ ᤋᤣᤳ ᤆᤠᤰᤂᤢᤀᤠᤱ ᤘᤕᤧ॥

⁶ ᤂᤢᤏᤧ᤹ ᤁᤢᤗᤠᤱᤜᤠ᤹ᤀᤥ ᤁᤠᤛᤠ ᤛᤧ᤺ᤵᤆᤠᤱ ᤆᤠᤰᤂᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ᤀᤥ ᤁᤢᤓᤰᤋᤠᤱᤅᤥᤗᤠᤶ ᤁᤢᤀᤣ᤺ᤰᤌᤠ᤺ᤰᤔᤥ ᤁᤠᤛᤠ ᤗᤠ᤺ᤰᤌᤡᤰ ᤋᤧᤸᤗᤧᤶ ᤜᤣᤛᤢᤀᤠᤱ ᤐᤳᤇᤧ॥

⁷ ᤂᤢᤏᤧ᤹ ᤁᤳᤋᤢᤒᤠ ᤗᤠ᤺ᤰᤁᤡᤸᤗᤧ ᤁᤢᤗᤠ᤺ᤴ ᤌᤠᤰ ᤆᤡᤖᤡᤰ ᤁᤡᤵᤔᤠ ᤛᤡᤱᤃᤩᤠ᤺ᤵᤐᤠ ᤘᤕᤧ. ᤜᤧᤰᤁᤩᤠᤱ ᤑᤧᤴᤈᤣ᤹ ᤗᤠ᤺ᤰᤁᤡᤸᤗᤧ ᤁᤢᤛᤶᤔᤡᤴ ᤁᤡᤗᤥ ᤏᤢᤛᤡ ᤕᤠᤖᤡᤰ ᤕᤥᤖᤧ. ᤂᤧᤶᤒᤩᤠᤱ ᤁᤢᤄᤥ ᤁᤧᤒᤱᤒᤧᤴ ᤂᤢᤏᤧ᤹ ᤁᤢᤍᤃᤡ ᤁᤢᤍᤃᤡ ᤗᤠᤱᤄᤣᤃᤧᤖ ᤘᤕᤧ॥

⁸ ᤃᤥᤗᤩᤋᤧᤴ ᤕᤧᤶᤛᤡᤱᤅᤠᤱ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢᤛᤡ. “ᤂᤧᤵᤔᤥ ᤂᤧᤏᤡ᤹ ᤌᤣ ᤁᤧᤈᤥᤃᤡᤒᤠᤒᤣ᥅ ᤌᤱ ᤁᤧᤈᤥᤃᤡᤒᤠᤒᤡ᥅ ᤀᤠᤱᤃᤠ᤹ ᤐᤗᤡᤛ᤻ᤋᤡᤀᤠ॥ ᤛᤠᤘᤗᤖᤧ ᤁᤢᤕᤥ᤺ᤰᤐᤠᤛᤣ᥄ ᤀᤠᤱᤃᤠ᤹ᤏᤢ ᤌᤱ ᤆᤥ᤺ᤰᤛᤧ ᤂᤧᤏᤡ᤹ ᤗᤳᤇᤠ ᤔᤏᤠᤎᤡᤰ ᤛᤣᤃᤠᤶᤔᤧ᤹॥

⁹ ᤂᤧᤸᤗᤧ ᤀᤠᤱᤃᤠ᤹ ᤏᤠ᤺ᤴᤏᤠᤏᤧᤑᤃᤪ ᤀᤠᤏᤡᤃᤣ ᤐᤗᤡᤛ᤻ᤋᤡᤜᤠ᤹ ᤂᤧᤏᤡ᤹ ᤕᤥ᤺ᤰᤐᤠ ᤐᤥ᤺ᤰᤂᤡᤃᤧᤀᤠᤱ ᤂᤧᤏᤡ᤹ ᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰ ᤆᤥᤃᤢᤶᤒᤧ. ᤁᤖ ᤀᤠᤱᤃᤠ᤹ ᤂᤧᤴ ᤏᤠ᤺ᤴᤍᤢᤱᤏᤧᤑᤃᤪ ᤂᤧᤏᤡ᤹ ᤀᤠᤏᤡᤃᤣ ᤕᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤀᤠᤏᤡᤃᤧᤴ ᤛᤧᤘᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤗ ᤐᤥᤱ॥”

¹⁰ ᤜᤧᤰᤁᤩᤠᤱ ᤂᤧᤴ ᤐᤗᤡᤛ᤻ᤋᤡ᤺ᤸᤗᤧ ᤐᤠ᤺ᤳᤋᤢ. “ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ ᤀᤠᤱᤃᤠ᤹ ᤀᤠᤗᤠᤃᤡ ᤌᤣᤛᤡᤀᤠᤱ ᤔᤣ᤺ᤴ. ᤀᤠᤱᤃᤠ᤹ᤏᤢ ᤌᤱ ᤆᤥ᤺ᤰᤛᤧ ᤔᤏᤠᤎᤡᤰ ᤐᤠᤱᤄᤠᤶᤔᤧ᤹᥄”

¹¹ ᤛᤠᤘᤗ ᤏᤢ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧ ᤔᤧᤕᤰᤂᤧ॥

ᤕᤡᤛᤤᤖᤧ ᤍᤠᤀᤢᤍᤧᤴ ᤛᤠᤘᤗᤖᤧ ᤁᤢᤍᤢᤖᤠᤕᤰᤁᤥ ᤐᤠᤱᤄᤢᤒᤠ

¹² ᤀᤠᤸᤗ ᤍᤠᤀᤢᤍᤧᤴ ᤀᤡᤐᤪᤠᤋᤡ ᤕᤡᤛᤤ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤛ᤻ᤛᤠ ᤘᤕᤧ॥ ᤂᤢᤏᤧ᤹ᤃ ᤕᤜᤢᤍᤠ ᤗᤠᤈᤣ᤹ᤒᤠ ᤒᤣᤌᤗᤧᤜᤧᤔ ᤁᤧᤕᤢᤱᤒᤠ ᤘᤕᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤧᤳᤇᤡ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤧᤘᤕᤧ॥ ᤂᤧᤴ ᤕᤧᤶᤔᤥ ᤕᤡᤛᤤ᤺ᤴ ᤁᤠᤵᤐᤥᤒᤠ ᤏᤢ ᤁᤢᤛᤠᤘᤣ᤺ᤳ ᤔᤧᤴᤕᤠᤰᤔᤏᤠᤒᤠ ᤐᤥ᤺ᤰᤂᤧᤀᤠᤱ ᤘᤕᤧ॥

¹³ ᤕᤡᤛᤤᤖᤧ ᤁᤢᤛ᤻ᤛᤠ ᤋᤢᤶᤒᤧᤴ. ᤛᤖᤢᤶᤒᤧᤴ ᤏᤢ ᤜᤠᤱᤛᤖᤢᤶᤒᤧᤴ ᤌᤱᤅᤥ ᤛᤠᤘᤗᤧᤴᤏᤢ ᤔᤧᤘᤕᤧ॥ ᤋᤢᤶᤒᤧᤴ ᤀᤣᤗᤡᤀᤠᤒ. ᤛᤖᤢᤶᤒᤧᤴ ᤀᤒᤡᤏᤠᤍᤠᤒ ᤏᤢ ᤜᤠᤱᤛᤶᤛᤖᤢᤶᤒᤧᤴ ᤛᤶᤔᤠ ᤔᤧᤘᤕᤧ॥

¹⁴ ᤍᤠᤀᤢᤍᤧᤴ ᤁᤧᤖᤧᤰᤏᤢ᤺ᤸᤗᤧ ᤐᤠ᤺ᤰᤐᤠ ᤘᤕᤧ॥ ᤂᤢᤏᤧ᤹ᤏᤢ᤺ᤸᤗᤧ ᤋᤢᤶᤒᤠ ᤛᤢᤶᤛᤡ ᤁᤢᤶᤓᤢ᤹ᤜᤠ᤹ ᤛᤠᤘᤗᤧᤴᤏᤢᤀᤣ ᤔᤧᤘᤕᤧ॥

¹⁵ ᤁᤖ ᤂᤧᤴ ᤕᤧᤶᤔᤥ ᤍᤠᤀᤢᤍᤖᤧ ᤛᤠᤘᤗᤧᤴ ᤗᤧᤖᤢᤀᤠᤱ ᤁᤢᤶᤒᤠᤖᤧ ᤁᤢᤔᤧᤸᤗᤢᤰ ᤁᤶᤛᤧ ᤒᤣᤌᤗᤧᤜᤧᤔ ᤏᤢ᤺ᤰᤂᤧ ᤐᤣ. ᤑᤧᤖᤧᤖ ᤘᤕᤧ॥

¹⁶ ᤂᤧᤴ ᤐᤗᤡᤛ᤻ᤋᤡ ᤃᤥᤗᤩᤋᤖᤧ ᤌᤡᤰᤕᤠ᤺ᤴᤎᤰ ᤋᤠᤏᤠᤶ ᤏᤢ ᤕᤢ᤺ᤴᤇᤡᤰ ᤗᤡᤒᤥᤱ ᤕᤧᤴ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤌᤱ ᤌᤰᤔᤠ ᤛᤠ᤺ᤳᤋᤢᤛᤡ॥

¹⁷ ᤌᤡᤰᤕᤧᤴ ᤕᤡᤛᤤᤖᤧ ᤂᤢᤏᤧ᤹ ᤁᤢᤛ᤻ᤛᤠ ᤍᤠᤀᤢᤍᤧᤴ ᤔᤧᤳᤋᤢ. “ᤁᤴ ᤑᤢᤗᤰ ᤅᤠᤛᤡ ᤛᤠᤶᤒᤣ᤺ᤳᤋᤧᤴ ᤏᤢ ᤌᤡᤒᤥᤱ ᤁᤢᤗᤧᤵ ᤂᤖᤧ᤺ᤱᤜᤠ᤹ ᤋᤣ᤹ᤖᤧᤀᤠᤱ ᤁᤧᤶᤓᤢ᤹ᤛᤡᤖᤧ ᤂᤢᤏᤡ᤹ ᤋᤢᤖᤠᤕᤰᤁᤥ ᤜᤠᤖᤠ ᤐᤣᤃᤧ᤹॥

¹⁸ ᤁᤴ ᤂᤖᤧ᤺ᤱᤜᤠ᤹ᤏᤢ ᤛᤥᤖᤡᤰ ᤐᤡᤳᤏᤢᤂᤥ᤺ᤴᤍᤡ᤺ᤴ ᤜᤧᤴᤇᤡᤱ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤌᤰᤐᤣᤒᤠᤴ ᤋᤣ᤹ᤖᤧ ᤐᤡᤖᤧ᤹॥ ᤜᤧᤰᤁᤩᤠᤱ ᤁᤧᤶᤓᤢ᤹ᤛᤡ ᤔᤧᤏᤢ᤹ᤔᤧᤍᤠᤖ ᤔᤧᤘᤠ᤹ᤒᤡ ᤔᤣ᤺ᤶᤒᤡ ᤀᤥᤔᤳᤋᤧᤛᤧ᤹. ᤂᤧᤒᤩᤠᤱ ᤂᤧᤱᤜᤠ᤹ᤗᤠᤶ ᤀᤡᤱᤄᤱ ᤏᤡ᤺ᤴᤎᤥ ᤑᤧᤳᤋᤧ᤹ᤀᤠᤱ ᤑᤧᤖᤧ᤹॥

¹⁹ ᤂᤧᤱᤜᤠ᤹ ᤛᤠᤘᤗ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤔᤏᤠᤜᤠ᤹ᤏᤢ ᤛᤥᤖᤡᤰ ᤀᤣᤗᤠᤜᤒᤠ ᤋᤧᤶᤒᤣ᤹ᤀᤥ ᤐᤗᤡᤛ᤻ᤋᤡᤜᤠ᤹ᤏᤢ ᤌᤱ ᤆᤥ᤺ᤰᤏᤢ ᤔᤧᤕᤠᤰ॥”

²⁰ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤍᤠᤀᤢᤍᤖᤧ ᤗᤳᤇᤠ ᤔᤧᤸᤗᤢᤰ ᤁᤧᤃᤶᤒᤠᤸᤗᤧ ᤁᤢᤜᤢᤰᤁᤥ ᤔᤧᤸᤗᤢᤰᤜᤠ᤹ ᤗᤧᤖᤢᤎᤛᤡ ᤜᤧᤰᤁᤩᤠᤱ ᤁᤢᤈᤠᤜᤠ᤹ ᤕᤠᤱᤛᤡᤱᤅᤠᤱ ᤁᤢᤶᤒᤠ ᤕᤡᤛᤤᤖᤧ ᤔᤢᤖᤠᤔᤧᤳᤋᤢᤒᤠ ᤕᤠ᤺ᤶᤒᤰᤁᤥ ᤌᤠᤛᤡᤱ॥ ᤌᤰᤛᤢᤒᤠᤜᤠ᤹ ᤋᤧᤱᤎᤱᤃᤧᤴ ᤀᤢᤘᤠ ᤆᤥ᤺ᤰᤏᤢ ᤋᤧᤶᤒᤣ᤹ᤀᤥ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤋᤢᤖᤠᤕᤰᤁᤥ ᤂᤧᤴ ᤁᤧᤖᤧ॥

²¹ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤐᤗᤡᤛ᤻ᤋᤡᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤌᤧ᤺ᤰᤐᤧᤳ ᤔᤧᤕᤧᤶᤛᤡᤱᤅᤠᤱ ᤕᤠᤖᤡᤵ ᤔᤧᤒᤥ᤺ᤰᤂᤧᤖ ᤔᤧᤒᤳᤇᤧ॥

²² ᤍᤠᤀᤢᤍᤖᤧ ᤂᤢᤏᤧ᤹ ᤋᤣ᤹ᤖᤢᤀᤠᤱ ᤐᤣᤒᤠ ᤁᤢᤈᤠᤜᤠ᤹ ᤆᤡᤃᤰᤘᤠ ᤁᤧᤕᤢᤱᤒᤠᤸᤗᤥ ᤕᤢᤰᤂᤢᤎᤀᤠᤱ ᤌᤧ᤺ᤰᤐᤧᤳ ᤔᤧᤕᤧᤒᤧᤒᤠ ᤋᤧᤴᤏᤥ ᤗᤥ᤺ᤰᤋᤧᤖ ᤐᤣ ᤜᤧᤰᤁᤩᤠᤱ ᤁᤢᤶᤓᤢ᤹ᤛᤡ ᤛᤧᤘᤠ ᤔᤧᤳᤋᤢᤛᤡ॥

²³ ᤍᤠᤀᤢᤍᤧᤴ ᤁᤢᤶᤓᤢ᤹ᤛᤡᤏᤢ ᤋᤠ᤹ᤈᤧᤱᤏᤢ ᤕᤧᤒᤧᤸᤗᤧ. ᤃᤠᤋᤒᤠ ᤐᤗᤡᤛ᤻ᤋᤡ ᤃᤥᤗᤩᤋᤧᤴ ᤋᤢᤖᤠᤜᤡᤶᤗᤠᤶ ᤗ᤺ᤴᤍᤧᤀᤠᤱ ᤋᤃᤡᤒᤠ ᤜᤧᤰᤁᤣ ᤀ᤺ᤰᤋᤧ॥ ᤂᤧᤸᤗᤧ ᤐᤠ᤺ᤳᤋᤢᤒᤠᤴ ᤂᤧᤴ ᤍᤠᤀᤢᤍᤖᤧ ᤂᤧᤵᤛᤢ॥

²⁴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤴ ᤔᤏᤠᤴ ᤔᤧᤏᤡᤛᤢᤏᤢᤔᤧ᤺ᤴᤏᤣ ᤛᤠ᤹ᤖᤡᤰ ᤔᤧᤃᤡᤛᤧ ᤜᤧᤰᤁᤩᤠᤱ ᤔᤧᤄᤧᤳᤇᤡᤱ ᤔᤧᤒᤣ॥

²⁵ ᤀᤠᤸᤗ ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤒᤠᤖᤧ. “ᤀᤥᤔᤧᤳᤋᤠᤶᤔᤧ᤹. ᤂᤧᤴ ᤔᤏᤠᤴ ᤌᤡᤰᤕᤠ᤺ᤴᤎᤰ ᤗ᤺ᤴᤏᤠᤱ ᤀᤡᤛᤪᤠᤀᤡᤗᤡᤜᤠ᤹ ᤌᤱ ᤌᤰᤔᤠ ᤛᤠ᤺ᤳᤋᤢᤛᤡ᤹॥ ᤂᤧᤴ ᤁᤧᤛᤧᤵᤐᤠ ᤔᤏᤠᤴ ᤜᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤌᤢᤶᤄᤥ ᤐᤡᤖᤢ᤹. ᤜᤧᤰᤁᤩᤠᤱ ᤁᤢᤛ᤻ᤛᤠ ᤔᤧᤴᤇ᤻ᤕᤠ᤺ᤴᤏᤢ ᤔᤣ᤺ᤰᤂᤡᤶ ᤔᤧᤳᤋᤢ᤹. ᤂᤧᤶᤒᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤜᤡᤶᤛᤕᤱᤜᤠ᤹ᤖᤧ ᤀᤡᤛᤪᤠᤀᤡᤗᤀᤥ ᤀᤣ᤺ᤱᤕᤠᤱᤅᤠᤱ ᤜᤢᤱᤔᤠ ᤔᤧᤒᤥᤱᤏᤧᤴ॥”

²⁶ ᤍᤠᤀᤢᤍᤖᤧ ᤂᤢᤏᤧ᤹ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤔᤏᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤐᤗᤡᤛ᤻ᤋᤡ᤺ᤴ ᤁᤧᤛᤧᤵᤐᤠ ᤏᤢ ᤀᤰᤋᤱᤒᤠ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤀᤡᤛᤪᤠᤀᤡᤗᤗᤠᤶᤒᤠ ᤁᤧᤄᤧᤵᤐᤠ ᤁᤧᤍᤣᤒᤠ ᤔᤏᤠ᤺ᤸᤗᤧ ᤀᤠᤰᤋᤱᤒᤠ ᤌᤢᤶᤄᤥ ᤂᤥᤛᤢᤒᤣ᥅ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤵᤐᤠ ᤁᤴ ᤜᤷᤍᤥ ᤔᤧᤱᤜᤧᤰᤔᤏᤠᤒᤠ ᤐᤗᤡᤛ᤻ᤋᤡ᤺ᤴ ᤜᤠ᤺ᤵᤐᤣ᥅”

²⁷ ᤂᤧᤴ ᤃᤥᤗᤩᤋᤧᤴ ᤁᤧᤛᤧᤵᤐᤠ ᤔᤏᤠ᤺ᤸᤗᤧ ᤀᤠᤰᤋᤱᤒᤠ ᤌᤢᤶᤄᤥ ᤂᤥᤛᤢᤒᤣ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤴ ᤔᤏᤠᤜᤠ᤹ᤖᤧ ᤍᤠᤀᤢᤍᤧᤴ ᤕᤠᤶᤔᤥᤀᤠᤱ ᤔᤧᤔᤧᤳᤋᤢ॥

²⁸ ᤜᤧᤰᤁᤣᤗ᤹ᤖᤡᤰ ᤍᤠᤀᤢᤍᤧᤴ ᤔᤏᤠᤜᤠ᤹ᤏᤢ ᤋᤠ᤹ᤈᤧᤱᤏᤢ ᤕᤧᤒᤧᤒᤠ ᤂᤢᤏᤧ᤹ ᤁᤢᤶᤓᤢ᤹ ᤋᤢᤶᤒᤠ ᤀᤣᤗᤡᤀᤠᤒᤧᤸᤗᤧ ᤂᤧᤵᤛᤢᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ॥ ᤂᤧᤸᤗᤧ ᤍᤠᤀᤢᤍᤧᤴ ᤀᤰᤂᤣ ᤔᤧᤳᤋᤢᤖ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤵᤔᤥ ᤌᤣ ᤆᤥ᤺ᤰᤏᤢ ᤁᤧᤘᤠ᤹᥅ ᤋᤠᤶᤓᤢᤱᤅᤥ ᤁᤧᤘᤠ᤹ᤒᤠ ᤆᤒᤧ᤺ᤳᤇᤡᤰ ᤔᤧᤸᤗᤢᤰᤜᤠ᤹ ᤀᤠᤳᤋᤡᤴᤜᤠ᤹ ᤀᤥᤔᤧᤳ ᤁᤧᤒᤠᤱᤄᤢᤛᤡᤀᤠᤱ ᤁᤵᤔᤥ ᤁᤧᤕᤧ᥅ ᤂᤧᤏᤧ᤹ ᤀᤠᤱᤍᤡᤱ ᤁᤧᤗ᤹ᤒᤠ ᤏᤢ ᤑᤧᤴᤏᤡᤱᤘᤠ᤹ ᤁᤧᤀᤡ᤺ᤵᤐᤠᤏᤧ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤏᤧ॥ ᤂᤧᤏᤧ᤹ᤃ ᤁᤵᤔᤥ ᤌᤱ ᤀᤥᤔᤳᤇᤧᤖᤰ ᤁᤧᤍᤩᤧ᥄”

²⁹ ᤍᤠᤀᤢᤍᤖᤧ ᤔᤧᤳᤋᤢ. “ᤀᤠᤸᤗᤥ ᤀᤠᤱᤃᤠ᤹ ᤌᤣ ᤆᤥᤃᤢᤱᤅᤠᤱ ᤘᤠ᤹ᤒᤣ᥅ ᤀᤠᤱᤃᤠ᤹ ᤐᤠ᤺ᤵᤔᤠᤱ ᤔᤧᤏᤢ᤹ᤏᤧᤴᤒᤠᤒᤡ᥅”

³⁰ ᤁᤢᤶᤓᤢ᤹ᤗᤠᤶ ᤌᤡᤰᤏᤠᤜᤠᤱ ᤐᤣᤀᤠᤱ ᤂᤢᤏᤧ᤹ ᤕᤠᤶᤔᤥ ᤘᤣ᤹ ᤔᤏᤠᤜᤠ᤹ᤖᤥ ᤐᤣ. ᤜᤧᤰᤁᤩᤠᤱ ᤀᤠᤶᤓᤠ ᤂᤧᤴ ᤐᤠ᤺ᤴᤏᤡᤴ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤒᤠᤂᤧᤴ ᤀᤠᤴᤍᤣ᤺ᤶᤒᤠ ᤐᤠ᤺ᤴᤏᤡᤴ ᤏᤥᤃᤵ ᤔᤧᤒᤡᤖᤢ॥

³¹ ᤍᤠᤀᤢᤍᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤏᤧᤓᤠᤰᤁᤥ ᤆᤢᤰᤋᤧ. ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤴ ᤛᤠᤘᤗᤖᤧᤀᤥ ᤔᤧᤃᤧᤳᤋᤢ. ᤂᤧᤒᤩᤠᤱ ᤂᤢᤏᤧ᤹ ᤍᤠᤀᤢᤍᤧᤴ ᤀᤢ᤺ᤳᤋᤢ॥

³² ᤜᤧᤰᤁᤩᤠᤱ ᤍᤠᤀᤢᤍᤖᤧ ᤛᤠᤘᤗᤧᤴ ᤔᤧᤳᤋᤢ. “ᤂᤧᤴ ᤐᤗᤡᤛ᤻ᤋᤡ᤺ᤴ ᤁᤡᤵᤔᤠ ᤁᤧᤄᤢᤒᤠ ᤘᤠ᤹ ᤑᤠ᤹ᤀᤠᤱ ᤂᤧᤴᤏᤢ ᤜᤠ᤺ᤳᤋᤠᤱ ᤔᤧᤱᤃᤡᤏᤧᤸᤗ॥ ᤀᤠᤱᤃᤠ᤹ ᤐᤣ᤺ᤰᤁᤠᤀᤠᤱ ᤂᤧᤴ ᤐᤗᤡᤛ᤻ᤋᤡ᤺ᤴᤏᤢ ᤌᤱ ᤆᤥ᤺ᤰᤁᤠ॥”

³³ ᤛᤠᤘᤗᤖᤧ ᤂᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤣ᤺ᤰᤁᤠᤱ ᤂᤧᤴᤏᤢ ᤌᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤴ॥ ᤂᤧᤏᤧ᤹ ᤜᤡᤴᤈᤠ᤹ ᤁᤧᤘᤠ᤹. ᤁᤖ ᤂᤧᤱᤃ ᤁᤢᤜᤡᤱᤜᤡᤱ ᤌᤱ ᤆᤥ᤺ᤰᤗ ᤘᤠ᤹॥”

³⁴ ᤁᤖ ᤍᤠᤀᤢᤍᤖᤧ ᤛᤠᤘᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤶᤒᤠᤖᤧ ᤁᤢᤔᤧᤸᤗᤢᤰᤜᤠ᤹ ᤀᤥᤔᤧᤳᤋᤢᤱᤛᤡᤱ᤹॥ ᤁᤣᤒᤠ ᤀᤡᤃᤪ ᤔᤠ᤺ᤰᤕᤢ᤺ᤴ ᤋᤠᤀᤠᤱ ᤔᤧᤸᤗᤢᤰᤗᤢᤵᤗᤠᤶᤒᤠ ᤔᤧᤸᤗᤢᤰᤛᤠ᤺ᤳᤌᤡᤰ ᤋᤣ᤹ᤖᤢᤸᤗᤧ.

³⁵ ᤀᤠᤱᤃᤠ᤹ ᤂᤧᤴ ᤏᤠ᤺ᤳᤋᤢᤱ ᤜᤧᤰᤁᤩᤠᤱ ᤜᤡᤵᤋᤢᤱᤅᤠᤱ ᤂᤧᤸᤗᤧ ᤁᤢᤶᤒᤪᤠᤀᤥᤗᤠᤶ ᤔᤧᤸᤗᤢᤰᤁᤡᤴ ᤏᤠᤵᤋᤢᤱ॥ ᤀᤠᤱᤃᤠ᤹ ᤗᤧᤵᤔᤠᤱ ᤀᤠᤜᤠ᤹ᤛᤧ ᤜᤡᤛᤡᤱᤅᤡᤸᤗᤧ ᤛᤡᤱᤍᤠᤱᤒᤥ ᤋᤧᤶᤛᤢᤱᤅᤠᤱ ᤆᤡᤎᤰ ᤆᤡᤎᤰ ᤌᤃᤢᤱ ᤛᤧᤖᤢᤱ॥

³⁶ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤸᤗᤧ ᤁᤣᤒᤠ ᤏᤢ ᤔᤠ᤺ᤰᤕᤢ ᤏᤧᤵᤔᤠᤱ ᤛᤧᤖᤢᤱᤛᤡᤱᤅᤠᤱ ᤘᤠ᤹॥ ᤁᤴ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤐᤗᤡᤛ᤻ᤋᤡ᤺ᤴᤏᤠᤱ ᤜᤠᤒᤠ ᤂᤧᤴ ᤛᤡᤃᤣᤒᤠ ᤔᤠ᤺ᤰᤕᤢᤜᤠ᤹ ᤜᤧᤰᤁᤣᤀᤣ ᤛᤧᤖᤢᤱ. ᤌᤣᤀᤠᤱᤓᤧᤸᤗᤧ ᤁᤢᤜᤡᤱᤘᤧᤳ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ ᤂᤧᤸᤗᤧ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤛᤡᤀᤠᤱ ᤘᤠ᤹॥

³⁷ ᤛᤡᤃᤣᤒᤠ ᤏᤢ ᤔᤠ᤺ᤰᤕᤢ ᤜᤢᤰᤗᤠᤶᤒᤠ ᤁᤧᤍᤠᤱᤒᤠ ᤁᤧᤛᤧ᤺ᤵᤐᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤴ ᤐᤗᤡᤛ᤻ᤋᤡ᤺ᤸᤗᤧ ᤁᤢᤜᤢᤰᤗᤠᤶᤒᤠᤀᤠᤱ ᤀᤠᤱᤃᤠ᤹ ᤛᤧ᤺ᤵᤐᤠ॥” ᤜᤧᤰᤁᤩᤠᤱ ᤛᤠᤘᤗᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤜᤧᤰᤁᤣᤏᤧᤑᤃᤪ ᤐᤣᤃᤧ᤹. ᤕᤜᤘᤣ ᤍᤠᤱᤒᤧᤴ ᤂᤧᤏᤧ᤹ᤏᤢ ᤘᤠ᤹ᤖ॥”

³⁸ ᤂᤧᤒᤩᤠᤱ ᤛᤠᤘᤗᤖᤧ ᤁᤢᤗᤃᤣ᤺ᤳᤋᤡᤴ ᤍᤠᤀᤢᤍᤧᤴ ᤆᤠ᤺ᤰᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤌᤱᤅᤥ ᤌᤰᤛᤧ᤺ᤵᤔᤠ ᤛᤧ᤺ᤵᤆᤠᤱᤅᤡᤴ ᤆᤠᤰᤋᤢ. ᤁᤢᤎᤧᤃᤣ᤺ᤰᤐᤥ ᤁᤠᤱᤛᤠ ᤋᤠᤱᤂᤢ᤺ᤰᤁᤧᤴ ᤂᤢ᤺ᤰᤋᤢ॥

³⁹ ᤂᤧᤒᤩᤠᤱ ᤁᤢᤍᤠᤓᤣᤴ ᤍᤠᤀᤢᤍᤖᤧ ᤁᤢᤛᤧ᤺ᤵᤆᤠᤱ ᤛᤶᤍᤠᤱ ᤀᤡᤓᤢᤳᤋᤢ ᤐᤡᤖᤢ॥ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤏᤠ ᤏᤢ ᤁᤳᤏᤠ ᤗᤠᤱᤄᤣᤃᤧ ᤛᤠ᤹ᤖᤢᤸᤗᤧ ᤂᤢᤏᤧ᤹ ᤁᤢᤈᤢᤵ ᤔᤧᤍᤩᤧᤏᤧᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤵᤑᤠᤸᤗᤧᤀᤠᤱ ᤀᤰᤋᤱᤒᤠ ᤔᤧᤴᤈᤠᤱᤅᤣ ᤘᤕᤧ॥ ᤜᤧᤰᤁᤩᤠᤱ ᤍᤠᤀᤢᤍᤖᤧ ᤛᤠᤘᤗᤧᤴ ᤔᤧᤳᤋᤢ. “ᤁᤴᤜᤠ᤹ ᤆᤠᤱᤔᤠᤀᤠᤱ ᤀᤠᤱᤃᤠ᤹ ᤗᤠᤱᤄᤣ᤺ᤰᤔᤠ ᤔᤧᤛᤢᤰᤁᤠᤴ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤈᤠᤱᤅᤣ ᤘᤠ᤹ᤀᤠ॥” ᤂᤧᤸᤗᤧᤆᤥᤃᤢᤸᤗᤧ ᤍᤠᤀᤢᤍᤖᤧ ᤂᤧᤱᤜᤠ᤹ ᤐᤧᤸᤗᤧᤰ ᤘᤖᤧᤰ ᤑᤧᤴᤍᤢᤍᤣᤛᤢ॥

⁴⁰ ᤂᤧᤴ ᤀᤣᤃᤠᤱ ᤍᤠᤀᤢᤍᤖᤧ ᤀᤠᤒᤠᤅᤣ ᤁᤢᤍᤰᤁᤠ᤺ᤳᤋᤡᤴ ᤕᤠᤱᤛᤡᤱ. ᤜᤧᤰᤁᤩᤠᤱ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥᤗᤠᤶ ᤘᤖᤧᤱᤗᤧᤱᤒᤠ ᤗᤢᤱ ᤅᤠᤛᤡ ᤛᤣᤃᤢᤀᤠᤱ ᤔᤧᤸᤗᤢᤰᤁᤶᤛᤧ ᤐᤣ᤺ᤰᤁᤡᤸᤗᤧ ᤜᤣᤛᤢᤒᤠ ᤕᤠ᤺ᤱᤄᤠᤀᤥ ᤕᤠᤰᤋᤢ॥ ᤜᤧᤰᤁᤩᤠᤱ ᤗᤢᤱᤗᤧᤵᤔᤠ ᤁᤢᤀᤷᤍᤥᤴ ᤕᤠᤱᤛᤡᤱᤅᤠᤱ ᤂᤧᤴ ᤐᤗᤡᤛ᤻ᤋᤡ᤺ᤴᤏᤢ ᤌᤱ ᤆᤥ᤺ᤰᤛᤧ ᤌᤠᤛᤡᤱ॥

⁴¹ ᤂᤧᤶᤓᤧᤸᤗᤧ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠᤴ ᤋᤃᤡ ᤗᤠᤶᤗᤥᤛᤢᤀᤠᤱ ᤂᤧᤴ ᤃᤥᤗᤩᤋᤧᤴ ᤍᤠᤀᤢᤍ ᤗᤧᤵᤔᤠᤱ ᤑᤧᤖᤧ॥

⁴² ᤂᤧᤸᤗᤧ ᤍᤠᤀᤢᤍᤧᤴ ᤏᤢᤖᤡᤰ ᤕᤠᤒᤥ᤹ᤖᤢᤖ ᤀᤥᤔᤳᤋᤢ. ᤜᤧᤰᤁᤩᤠᤱ ᤁᤢᤏᤠᤖᤠ ᤔᤖᤠ᤺ᤰᤁᤩᤠ᤺ᤵᤐᤠ ᤏᤢ ᤏᤢᤒᤠᤍᤠᤒᤠ ᤜᤡᤴᤈᤠ᤹ᤀᤡᤴ ᤏᤡᤛᤢᤀᤠᤱ ᤂᤧᤴ ᤆᤡ᤺ᤵᤔᤠ ᤜᤣ᤺ᤰᤋᤢ॥

⁴³ ᤂᤧᤸᤗᤧ ᤍᤠᤀᤢᤍᤧᤴ ᤀᤰᤂᤣ ᤔᤧᤳᤋᤢ. “ᤀᤠᤱᤃᤠ᤹ ᤌᤣ ᤂᤩᤠᤒᤠ-ᤁᤥ᤺ᤳᤆᤥ ᤀᤠᤒᤡ᥅ ᤜᤧᤰᤁᤩᤠᤱ ᤀᤠᤜᤡᤵᤛᤧ ᤋᤰᤁᤠᤳ ᤁᤧᤓᤧᤳᤋᤢᤀᤠᤱ ᤁᤧᤓᤧᤖᤧᤒᤠᤒᤡ᥅” ᤂᤧᤸᤗᤧ ᤁᤢᤔᤠᤱᤅᤡᤸᤗᤧ ᤁᤢᤔᤡᤱ ᤗᤥ᤺ᤰᤂᤢᤖ ᤍᤠᤀᤢᤍᤧᤴ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤵᤔᤠ ᤜᤣ᤺ᤰᤋᤢ॥

⁴⁴ ᤐᤗᤡᤛ᤻ᤋᤡ ᤃᤥᤗᤩᤋᤖᤧ ᤍᤠᤀᤢᤍᤧᤴ ᤔᤧᤳᤋᤢ. “ᤑᤧᤖᤧ᤹. ᤀᤠᤱᤃᤠ᤹ ᤛᤧᤳᤏᤧᤀᤠᤱ ᤁᤧᤏᤧᤰᤛᤠᤴ ᤋᤠᤱᤛᤠᤰᤐᤥᤒᤠ ᤐᤢᤜᤠ᤹ ᤏᤢ ᤂᤠᤶᤒᤣ᤺ᤰᤔᤥᤒᤠ ᤌᤰᤛᤠᤜᤠ᤹ ᤆᤠᤒᤠᤱᤄᤢᤱᤛᤡᤱ॥”

⁴⁵ ᤍᤠᤀᤢᤍᤖᤧ ᤃᤥᤗᤩᤋᤧᤴ ᤔᤧᤳᤋᤢ. “ᤂᤧᤏᤧ᤹ᤃ ᤀᤠᤱᤃᤠ᤹ᤏᤢ ᤌᤱ ᤆᤥ᤺ᤰᤛᤧ ᤋᤠᤓᤣ. ᤗᤠ᤺ᤰ ᤜᤧᤰᤁᤩᤠᤱ ᤕᤧᤴ ᤁᤧᤓᤧᤳᤋᤢᤀᤠᤱ ᤁᤧᤓᤧᤖᤧ. ᤁᤖ ᤀᤠᤱᤃᤠ᤹ᤃ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢᤛᤡᤒᤠ ᤀᤡᤛᤪᤠᤀᤡᤗᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤂᤧᤏᤧ᤹ᤏᤢ ᤌᤱ ᤆᤥ᤺ᤰᤛᤧ ᤋᤩᤠᤱᤅᤠᤱ ᤘᤠ᤹ᤀᤠ॥

⁴⁶ ᤀᤠᤀᤡᤴᤒᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤏᤧ᤹ ᤀᤠᤜᤢᤰᤁᤥ ᤁᤧᤎᤠᤛᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤧᤳᤏᤧᤀᤠᤱ ᤁᤧᤎᤣᤃᤣ᤺ᤰᤁᤡᤴ ᤂᤰᤋᤢᤱ᤹॥ ᤀᤠᤀᤡᤴᤒᤠ ᤁᤴ ᤕᤧᤴᤏᤥ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤁᤢᤛᤡᤘᤧᤳ ᤌᤰᤜᤠ᤹ ᤋᤠᤱᤛᤠᤱᤒᤥᤒᤠ ᤐᤢᤜᤠ᤹ ᤏᤢ ᤂᤠᤶᤒᤣ᤺ᤰᤁᤥᤒᤠ ᤌᤰᤛᤠᤜᤠ᤹ ᤆᤠᤔᤠ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤀᤥ ᤏᤡᤱᤘᤠ᤹ᤑᤢᤔᤠᤱ ᤘᤠ᤹ᤖᤧᤇ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱᤒᤠ ᤔᤏᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥

⁴⁷ ᤁᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤏᤠᤜᤠ᤹ ᤛᤧ᤺ᤵᤔᤠᤛᤡ ᤋᤠᤓᤣ. ᤗᤠ᤺ᤰ. ᤋᤥᤱ ᤗᤡ ᤆᤠᤜᤠᤒ᤻ ᤔᤧᤈᤥ᤺ᤰᤏᤧᤴᤗᤇ ᤁᤧᤗ᤹ᤒᤠ ᤁᤢᤛᤡᤱ ᤔᤧᤏᤡ᤺ᤳᤋᤢ᤹. ᤌᤣᤀᤠᤱᤓᤧᤸᤗᤧ ᤌᤱᤅᤡᤱᤃ ᤕᤜᤘᤣ ᤍᤠᤱᤒᤠᤸᤗᤧᤴᤏᤣᤖᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤂᤧᤏᤡ᤹ ᤁᤧᤖᤧᤰ ᤐᤗᤡᤛ᤻ᤋᤡᤜᤠ᤹ ᤀᤠᤏᤡᤃᤣ ᤜᤢᤰᤁᤥ ᤌᤠᤛᤢ ᤐᤡᤖᤡᤃᤧ॥”

⁴⁸ ᤂᤧᤴ ᤀᤣᤃᤠᤱ ᤃᤥᤗᤩᤋᤧᤴ ᤍᤠᤀᤢᤍ ᤘᤕᤧᤒᤠ ᤗᤧᤵᤔᤠᤱ ᤌᤠᤛᤡᤱ ᤑᤧᤖᤧ. ᤜᤧᤰᤁᤩᤠᤱ ᤍᤠᤀᤢᤍᤧᤴᤏᤠᤱ ᤂᤡᤔᤥ ᤂᤧᤴᤏᤢ ᤌᤰᤛᤧ ᤗᤥ᤺ᤰᤋᤧᤒᤣ॥

⁴⁹ ᤂᤢᤏᤧ᤹ ᤁᤢᤛᤢᤰᤘᤠᤀᤥ ᤁᤢᤜᤢᤰᤁᤧᤴ ᤁᤣ᤺ᤳᤋᤢᤀᤠᤱ ᤗᤢᤱᤎᤡᤰ ᤗ᤺ᤳᤋᤢ. ᤜᤧᤰᤁᤩᤠᤱ ᤗᤢᤱᤗᤧᤵᤔᤠ ᤀᤷᤍᤥᤀᤥ ᤕᤠᤰᤋᤢᤀᤠᤱ ᤂᤧᤴ ᤃᤥᤗᤩᤋᤖᤧ ᤁᤢᤍᤫᤠᤒᤥ ᤗᤧᤵᤋᤢ॥ ᤜᤧᤰᤁᤩᤠᤱ ᤗᤢᤱᤅᤡᤸᤗᤧ ᤂᤧᤸᤗᤧ ᤁᤢᤍᤫᤠᤒᤧᤴ ᤐᤷᤜᤱ ᤜᤅᤧ ᤂᤧᤒᤩᤠᤱ ᤂᤠᤶᤒᤠᤱᤅᤥ ᤂᤧᤴ ᤛᤠᤶᤒᤥᤴ ᤜᤷᤃᤢᤵ ᤆᤥ᤺ᤴᤍᤧ॥

⁵⁰ ᤀᤰᤂᤣᤗ᤹ᤖᤡᤰ ᤍᤠᤀᤢᤍᤧᤸᤗᤧ ᤀᤷᤍᤥ ᤏᤢ ᤗᤢᤱᤅᤡᤸᤗᤧ ᤌᤱ ᤌᤰᤔᤠ ᤏᤠ᤺ᤴᤍᤢ॥ ᤂᤢᤏᤧ᤹ᤏᤢ ᤋᤠᤓᤣ ᤜᤥ᤺ᤵᤋᤧᤛᤠᤱ ᤂᤧᤸᤗᤧ ᤃᤥᤗᤩᤋᤧᤴ ᤀᤷᤍᤥ᤺ᤸᤗᤧ ᤗᤧᤵᤋᤢᤀᤠᤱ ᤛᤥ᤺ᤴᤍᤢ. ᤜᤧᤰᤁᤩᤠᤱ ᤛᤧᤖᤢᤖᤥ॥

⁵¹ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤗᤥ᤺ᤰᤋᤧᤖ ᤐᤣᤀᤠᤱ ᤃᤥᤗᤩᤋᤧᤴ ᤆᤥ᤺ᤴᤍᤧᤒᤠ ᤋᤧᤴᤏᤥ ᤕᤧᤶᤛᤡᤱ॥ ᤜᤧᤰᤁᤩᤠᤱ ᤃᤥᤗᤩᤋᤖᤧ ᤁᤢᤍᤠᤓᤣᤴ ᤁᤢᤛᤢ᤺ᤵᤐᤥᤗᤠᤶ ᤋᤖᤵ ᤑᤡ᤺ᤰᤂᤢᤀᤠᤱ ᤁᤢᤎᤧᤃᤣ᤺ᤰᤁᤧᤴ ᤑᤢᤳᤆᤡᤰ ᤐᤢ᤹ᤖᤧᤖ ᤆᤩᤧᤵᤋᤢ॥ ᤜᤧᤰᤁᤣᤖᤡᤰ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤁᤧᤎᤢᤶᤒᤠ ᤔᤏᤠᤴ ᤛᤩᤧᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤔᤧᤄᤧᤳᤇᤡᤱ॥

⁵² ᤀᤡᤛᤪᤠᤀᤡᤗ ᤜᤧᤰᤁᤩᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤌᤱ ᤌᤰᤔᤠ ᤔᤧᤏᤠ᤺ᤴᤍᤢᤒᤠ ᤀᤡᤰᤗᤠᤏᤢ ᤃᤠᤋ ᤜᤧᤰᤁᤩᤠᤱ ᤀᤣᤁᤪᤥᤏ ᤗᤠ᤺ᤵᤔᤠ ᤗᤠᤶ ᤌᤠᤖᤡᤰᤁᤣ ᤂᤧᤱᤜᤠ᤹ ᤐᤢᤒᤣᤗᤠᤵᤛᤠ ᤔᤧᤏᤠ᤺ᤳᤋᤢ ᤔᤧᤍᤣ᤹ᤖᤢᤛᤡ॥ ᤛᤠᤖᤤᤶᤔᤠᤱᤎᤥ ᤃᤠᤋ ᤏᤢ ᤀᤣᤁᤪᤥᤏ ᤐᤣ᤺ᤰᤔᤠᤗᤠᤶ ᤁᤢᤗᤧ᤺ᤶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤢᤛᤡᤘᤧᤳ ᤌᤰᤜᤠ᤹ ᤛᤧᤖᤧᤀᤠᤱ ᤏᤧᤛ᤻ᤛᤧ॥

⁵³ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤳᤋᤢᤛᤡᤀᤠᤱ ᤔᤧᤏᤢ᤺ᤰᤂᤧᤸᤗᤧ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤏᤡ᤹ ᤋᤢᤖᤠᤜᤡᤶᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤔᤧᤏᤠᤵᤋᤢ ᤔᤧᤍᤣ᤹ᤖᤢ ᤔᤧᤒᤡᤖᤢᤛᤡ॥

⁵⁴ ᤍᤠᤀᤢᤍᤖᤧ ᤃᤥᤗᤩᤋᤖᤧ ᤁᤢᤎᤧᤃᤣᤰᤐᤠᤴ ᤐᤰᤂᤢᤀᤠᤱ ᤕᤖᤢᤛᤗᤧᤔ ᤋᤠᤖᤢ. ᤁᤖ ᤂᤧᤸᤗᤧ ᤁᤢᤓᤧᤈᤢᤶ ᤁᤢᤓᤧᤕᤠᤜᤠ᤹ ᤀᤠᤒᤠᤅᤣ ᤁᤢᤛ᤻ᤛᤠ᤺ᤱᤃᤠ ᤜᤡᤶᤔᤥ ᤏᤧᤛ᤻ᤛᤢ॥

ᤍᤠᤀᤢᤍᤧᤴ ᤛᤠᤘᤗᤖᤧ ᤁᤢᤍᤃᤡ ᤔᤧᤍᤠᤖᤢᤒᤠ

⁵⁵ ᤛᤠᤘᤗᤖᤧ ᤍᤠᤀᤢᤍᤧᤴ ᤂᤧᤴ ᤐᤗᤡᤛ᤻ᤋᤡ᤺ᤴᤏᤢ ᤌᤰᤛᤧ ᤐᤣᤖ ᤐᤳᤇᤧᤒᤠ ᤏᤡᤛᤢᤀᤠᤱ ᤌᤰᤔᤥᤒᤠ ᤀᤒᤏᤣᤖᤧᤴ ᤛᤠᤘᤗᤖᤧ ᤛᤣ᤺ᤴᤍᤥᤛᤢ. “ᤀᤒᤏᤣᤖᤣ. ᤂᤧᤴ ᤆᤢᤰᤐᤧᤴ ᤜᤠ᤺ᤳᤗᤧ ᤁᤢᤛ᤻ᤛᤠᤒᤣ᥅” ᤀᤒᤏᤣᤖᤖᤧ ᤔᤧᤳᤋᤢ᤹. “ᤀᤠᤍᤠᤱᤒᤣ ᤜᤠᤱᤅᤣ. ᤛᤧᤰᤂᤠ ᤐᤠ᤺ᤳᤋᤢᤱ ᤁᤴ ᤔᤏᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤠᤴ॥”

⁵⁶ ᤜᤠᤱᤅᤡᤸᤗᤧ ᤀᤒᤏᤣᤖ ᤌᤰᤔᤥᤒᤠᤴ ᤔᤧᤳᤋᤢ. “ᤂᤧᤴ ᤆᤢᤰᤐᤧᤴ ᤜᤠ᤺ᤳᤗᤧ ᤁᤢᤛ᤻ᤛᤠᤒᤣ ᤑᤠ᤹ᤀᤠᤱ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤧᤍᤠᤖᤧ᤹॥”

⁵⁷ ᤍᤠᤀᤢᤍᤧᤸᤗᤧ ᤂᤧᤴ ᤐᤗᤡᤛ᤻ᤋᤡ᤺ᤴ ᤛᤧᤖᤢᤀᤠᤱ ᤏᤢ᤺ᤰᤂᤧᤍᤩᤧ. ᤜᤧᤰᤁᤩᤠᤱ ᤀᤒᤏᤣᤖᤖᤧ ᤂᤧᤴ ᤆᤢᤰᤐᤧᤴ ᤋᤣ᤹ᤖᤢᤀᤠᤱ ᤛᤠᤘᤗᤖᤧ ᤁᤢᤍᤃᤠᤱ ᤋᤥ᤺ᤴᤍᤢ॥ ᤂᤧᤴ ᤐᤗᤡᤛ᤻ᤋᤡ᤺ᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤍᤠᤀᤢᤍᤖᤧ ᤐᤰᤂᤢᤀᤠᤱ ᤐᤳᤇᤧ॥

⁵⁸ ᤛᤠᤘᤗᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤆᤢᤰᤐᤣ ᤂᤧᤏᤧ᤹ ᤜᤠ᤺ᤳᤗᤧ ᤁᤢᤛ᤻ᤛᤠᤏᤧᤒᤣ᥅” ᤍᤠᤀᤢᤍᤖᤧ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤍᤠᤱᤒᤠᤖᤧ ᤁᤧᤕᤥᤰ ᤒᤣᤌᤗᤧᤜᤧᤔᤒᤠ ᤕᤡᤛᤤᤖᤧ ᤁᤢᤛ᤻ᤛᤠᤀᤠᤖᤥ॥”