᥇ ᤛᤠᤔᤢᤀᤧᤗ 16 - LIFOTNT

ᤍᤠᤀᤢᤍᤧᤴ ᤜᤠᤱ ᤕᤢᤰᤋᤡᤱ ᤐᤥ᤺ᤰᤂᤧᤒᤠ

¹ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤛᤠᤘᤗᤧᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤐᤥᤱᤔᤠ ᤏᤠ᤹ᤖᤢᤱᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤀᤠᤓᤧᤸᤗᤧ ᤌᤠᤖᤡᤰ ᤂᤧᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤁᤧᤎᤰᤐᤠᤒᤣ᥅ ᤂᤧᤏᤧ᤹ ᤁᤧᤃᤳᤋᤢᤒᤠ ᤛᤠᤍᤠᤱᤅᤡᤴ ᤏᤡ᤺ᤱᤃᤣ᤹ᤀᤡᤸᤗᤧ ᤌᤡᤶᤛᤧ᤹ ᤜᤧᤰᤁᤩᤠᤱ ᤌᤠᤛᤡᤅᤧ᤹॥ ᤀᤠᤱᤃᤠ᤹ ᤒᤣᤌᤗᤧᤜᤧᤔᤒᤠ ᤕᤡᤛᤤᤖᤧᤀᤥ ᤂᤧᤏᤧ᤹ ᤐᤠᤱᤏᤧᤖ ᤐᤳᤋᤠ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤢᤛ᤻ᤛᤠᤎᤡᤰ ᤜᤠᤱ ᤐᤥᤱᤔᤠᤖᤧ ᤗᤠᤃᤡ ᤛᤣᤃᤢᤱᤅᤠᤱ ᤘᤠ᤹॥”

² ᤁᤖ ᤛᤠᤔᤢᤀᤧᤗᤖᤧ ᤔᤧᤳᤋᤢ. “ᤀᤠᤰᤂᤣᤗ᤹ᤖᤡᤰ ᤐᤣ᤺ᤰᤔᤠ ᤛᤢᤰᤁᤠᤒᤣ᥅ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤠᤘᤗᤖᤧ ᤂᤧᤵᤛᤢᤀᤠᤱ ᤀᤠᤱᤃᤠ᤹ ᤛᤧᤳᤋᤠᤃᤏᤢ॥” ᤕᤜᤘᤣ ᤍᤠᤱᤒᤠᤸᤗᤧ ᤔᤧᤳᤋᤢ. “ᤐᤡᤵᤔᤠᤎᤡᤰ ᤋᤣ᤹ᤖᤧᤀᤠᤱ ᤀᤰᤂᤣ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤋᤩᤠᤱᤒᤠᤖᤥ॥’

³ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤕᤡᤛᤤᤴᤏᤠᤱ ᤀᤢᤳᤋᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤐᤥᤱ ᤁᤧᤖᤧᤰ ᤔᤧᤳᤏᤧ॥ ᤂᤧᤵᤔᤥ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤰᤏᤧᤒᤠ ᤔᤏᤠᤴ ᤜᤠᤱ ᤁᤧᤛᤣ᤺ᤴᤍᤢᤖ ᤐᤥᤱᤗᤥ॥”

⁴ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤛᤠᤔᤢᤀᤧᤗᤖᤧ ᤆᤥᤃᤢ॥ ᤂᤢᤏᤧ᤹ ᤒᤣᤌᤗᤧᤜᤧᤔ ᤁᤧᤖᤧ ᤜᤧᤰᤁᤩᤠᤱ ᤂᤧᤴ ᤐᤠᤱᤈᤢᤶᤒᤠ ᤛᤠᤶᤕᤥᤛᤡᤰᤛᤠᤶᤒᤠᤜᤠ᤹ᤖᤧ ᤔᤧᤍᤢᤔᤢᤀᤠᤱ ᤂᤧᤱᤜᤠ᤹ ᤁᤡᤔᤧᤸᤗᤧ ᤔᤧᤕᤰᤂᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤣ᤺ᤴᤔᤧᤍᤥᤛᤢ. “ᤀᤠᤍᤠᤱᤒᤣ ᤏᤢᤖᤡᤰ ᤋᤠᤖᤡᤰᤁᤠᤱ ᤁᤧᤎᤠᤅᤧᤒᤡ᥅”

⁵ ᤛᤠᤔᤢᤀᤧᤗᤖᤧ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤏᤢᤖᤡᤰ ᤋᤠᤖᤡᤰ ᤛᤏᤠᤖᤢᤱᤅᤠᤱ ᤋᤩᤠᤱ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤥ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤋᤩᤠᤱᤒᤠ॥ ᤂᤧᤏᤡ᤹ ᤛᤢᤳᤌᤥ ᤐᤥ᤺ᤰᤂᤠᤶᤔᤧ᤹ᤀᤠᤱ ᤀᤠᤱᤃᤠ᤹ᤏᤢ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤋᤩᤧᤶᤔᤧ᤹॥” ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤕᤡᤛᤤ᤺ᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤛᤢᤳᤌᤥ ᤆᤥᤃᤢᤛᤡᤀᤠᤱ ᤂᤧᤱᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤀᤢ᤺ᤳᤋᤢᤛᤡ॥

⁶ ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤀᤣᤗᤡᤀᤠᤒᤧᤴ ᤏᤡᤛᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤢ. “ᤛᤧᤰᤂᤠᤛᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤛᤣ᤺ᤴᤍᤢᤒᤠ ᤜᤠᤱᤅᤡᤴ ᤁᤵᤔᤥ ᤂᤢᤏᤧ᤹ ᤁᤢᤍᤃᤡ ᤕᤧᤵᤗᤇ॥”

⁷ ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤏᤢᤒᤠᤍᤠᤒᤠ ᤏᤢ ᤁᤣ᤺ᤶᤒᤠ ᤆᤥ᤺ᤰᤛᤠᤱ ᤂᤧᤴ ᤀᤥᤔᤧᤔᤧᤳᤋᤧᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤴ ᤏᤠ᤹ᤖᤢᤱᤅᤠᤱ ᤘᤠ᤹॥ ᤕᤜᤘᤣ ᤍᤠᤱᤒᤠᤸᤗᤧ ᤔᤏᤠ ᤜᤧᤰᤁᤣ ᤀᤥᤔᤧᤔᤧᤳᤋᤢᤛᤡᤴ॥ ᤔᤏᤠᤜᤠ᤹ᤖᤧ ᤏᤠᤖᤠ ᤀᤥᤔᤧᤔᤧᤳᤋᤢᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ. ᤁᤖ ᤕᤜᤘᤣ ᤍᤠᤱᤒᤠᤸᤗᤧ ᤛᤡᤰᤗᤢᤱᤔᤧᤴ ᤀᤥᤔᤧᤳᤋᤢᤀᤠᤱ ᤕᤠ᤺ᤶᤒᤰ ᤆᤥᤃᤢ॥”

⁸ ᤜᤧᤰᤁᤣ᤺ᤸᤗᤧ ᤕᤡᤛᤤᤖᤧ ᤀᤒᤡᤏᤠᤍᤠᤒᤧᤴ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤁᤢᤍᤃᤡ ᤗᤠᤱᤄᤣᤰ ᤐᤠᤱᤄᤢ॥ ᤁᤖ ᤛᤠᤔᤢᤀᤧᤗᤖᤧ ᤐᤠ᤺ᤳᤋᤢ. “ᤔᤣ᤺ᤴ. ᤁᤴᤏᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤛᤣᤃᤢᤒᤠ ᤔᤏᤠᤴ ᤔᤣ᤺ᤴ॥”

⁹ ᤂᤧᤴ ᤀᤣᤃᤠᤱ ᤕᤡᤛᤤᤖᤧ ᤛᤶᤔᤠ᤺ᤴ ᤛᤠᤔᤢᤀᤧᤗᤖᤧ ᤁᤢᤒᤣᤛᤠᤱ ᤋᤠᤖᤢ॥ ᤁᤖ ᤛᤠᤔᤢᤀᤧᤗᤖᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤛᤣᤃᤢᤒᤠ ᤔᤏᤠᤴ ᤁᤴᤏᤠᤱ ᤔᤣ᤺ᤴ॥”

¹⁰ ᤀᤰᤂᤣᤗ᤹ᤖᤡᤰᤁᤣ ᤕᤡᤛᤤᤖᤧ ᤏᤢᤛᤡ ᤁᤢᤛ᤻ᤛᤠᤜᤠ᤹ ᤛᤠᤔᤢᤀᤧᤗᤖᤧ ᤁᤢᤍᤃᤡ ᤋᤠᤖᤢᤛᤡ. ᤁᤖ ᤂᤢᤏᤧ᤹ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤁᤴᤜᤠ᤹ᤀᤥ ᤀᤠᤳᤋᤡᤴᤏᤠᤱ ᤛᤣᤃᤢᤛᤡᤒᤠ ᤜᤥᤵ॥”

¹¹ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤁᤶᤓᤖᤰᤐᤡ᥅” ᤕᤡᤛᤤᤖᤧ ᤔᤧᤳᤋᤢ. “ᤀᤠᤸᤗᤛᤠᤱ ᤑᤥ᤺ᤰᤘᤠᤒᤠᤎᤡᤰ ᤘᤠ᤹. ᤁᤖ ᤂᤧᤱᤃ ᤔᤧᤸᤗᤢᤰ ᤁᤳᤇᤧ ᤐᤣᤀᤠᤱ ᤘᤠ᤹॥” ᤛᤠᤔᤢᤀᤧᤗᤖᤧ ᤕᤡᤛᤤᤴ ᤔᤧᤳᤋᤢ. “ᤂᤧᤴ ᤀᤢ᤺ᤳᤋᤧ᤹॥ ᤂᤢᤏᤧ᤹ ᤔᤧᤴᤍᤠᤀᤣ ᤌᤠᤖᤡᤰ ᤀᤠᤏᤡ᤹ ᤀᤠᤴᤕᤢᤱᤏᤧᤴ॥”

¹² ᤂᤧᤸᤗᤧᤆᤥᤃᤢᤸᤗᤧ ᤕᤡᤛᤤᤖᤧ ᤂᤧᤴ ᤑᤥ᤺ᤰᤘᤠᤒᤧᤴ ᤁᤢᤗᤠᤛᤧ ᤐᤠᤱᤄᤢᤛᤡ॥ ᤂᤧᤴ ᤁᤢᤏᤠᤖᤠ ᤔᤖᤠ᤺ᤁᤩᤠ᤺ᤵᤐᤠ. ᤁᤢᤔᤡᤰ ᤆᤠ᤺ᤳᤆᤠ᤺ᤳ ᤁᤧᤗ᤹ᤒᤠ ᤜᤧᤰᤁᤩᤠᤱ ᤛᤠ᤹ᤖᤡᤰ ᤏᤢ᤺ᤒ᤻ᤛᤢᤰᤐᤠ ᤘᤕᤧ॥ ᤕᤜᤘᤣ ᤍᤠᤱᤒᤠᤸᤗᤧ ᤛᤠᤔᤢᤀᤧᤗᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤛᤣ᤺ᤴᤍᤢᤱᤒᤠ ᤔᤏᤠᤴ ᤁᤴᤏᤣᤖᤥ. ᤜᤠᤱ ᤛᤣ᤺ᤴᤍᤧ᤹॥”

¹³ ᤜᤧᤰᤁᤩᤠᤱ ᤛᤠᤔᤢᤀᤧᤗᤖᤧ ᤏᤡ᤺ᤱᤃᤣ᤹ ᤁᤧᤕᤠᤰᤐᤠ ᤛᤠᤍᤠᤱᤅᤡᤴ ᤐᤰᤂᤢᤀᤠᤱ ᤁᤢᤶᤓᤢ᤹ᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤜᤠᤱ ᤛᤣ᤺ᤴᤍᤢ. ᤂᤧᤴ ᤕᤧᤴᤏᤠᤱᤎᤥ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤕᤠᤶᤛᤠᤶᤔᤡᤴ ᤔᤢᤰᤛᤠᤶᤏᤢ ᤍᤠᤀᤢᤍᤖᤧᤀᤥ ᤋᤩᤧ॥ ᤜᤧᤰᤁᤩᤠᤱ ᤛᤠᤔᤢᤀᤧᤗᤧᤴ ᤖᤠᤔᤠ ᤗᤧᤵᤔᤠᤱ ᤐᤣ॥

ᤍᤠᤀᤢᤍᤧᤴ ᤛᤠᤘᤗᤖᤧ ᤁᤢᤜᤠᤱᤜᤡᤶᤔᤥ

¹⁴ ᤀᤠᤸᤗ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤛᤠᤘᤗᤧᤴ ᤗᤧᤖᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤐᤠᤱᤄᤢ ᤕᤢᤛᤢᤒᤠ ᤑᤧᤴᤛᤠᤶᤔᤡᤸᤗᤧ ᤛᤠᤘᤗᤧᤴ ᤋᤧᤶᤛᤢᤀᤠᤱ ᤋᤢᤰᤂᤣ ᤆᤠ᤺ᤳᤋᤢ॥

¹⁵ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ ᤀᤥᤔᤧᤳᤋᤧ᤹. ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠᤒᤠ ᤗᤳᤇᤠ ᤑᤧᤴᤛᤠᤶᤔᤡᤸᤗᤧ ᤋᤢᤰᤂᤣ ᤁᤧᤈᤠ᤺ᤳᤗ ᤘᤠ᤹॥

¹⁶ ᤂᤧᤸᤗᤧᤆᤥᤃᤢᤸᤗᤧ. ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤔᤢᤖᤠ ᤀᤥᤔᤧᤳᤋᤧ᤹. ᤜᤧᤰᤁᤩᤠᤱ ᤏᤢᤖᤡᤰ ᤔᤢᤰᤗᤠ ᤔᤢᤱᤔᤠ ᤁᤧᤗᤧᤒᤠ ᤔᤏᤠᤎᤡᤰ ᤁᤥ᤺ᤳᤋᤢᤶ ᤋᤠᤖᤢᤶᤒᤧ॥ ᤑᤧᤴᤛᤠᤶᤔᤡᤴ ᤂᤧᤏᤧ᤹ᤀᤥ ᤋᤠᤀᤡᤸᤗᤧ ᤂᤧᤸᤗᤧ ᤔᤢᤰᤗᤠ ᤔᤢᤰᤂᤢ ᤜᤧᤰᤁᤩᤠᤱ ᤀᤠᤍᤠᤱᤒᤣ ᤁᤧᤘᤣ᤺ᤳᤗᤥ॥”

¹⁷ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤳᤋᤢᤛᤡ. “ᤏᤢᤖᤡᤰ ᤔᤢᤰᤗᤠ ᤁᤧᤔᤢᤱᤒᤠ ᤔᤏᤠᤎᤡᤰ ᤁᤥ᤺ᤳᤋᤠᤶᤔᤧ᤹ᤀᤠᤱ ᤀᤠᤱᤃᤠ᤹ᤀᤥ ᤋᤠᤖᤠᤶᤔᤧ᤹॥”

¹⁸ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤎᤡᤰᤗᤧ ᤔᤧᤳᤋᤢ. “ᤒᤣᤌᤗᤧᤜᤧᤔ ᤁᤧᤕᤢᤱᤒᤠ ᤕᤡᤛᤤᤖᤧ ᤁᤢᤛ᤻ᤛᤠᤎᤡᤰᤗᤧ ᤏᤢᤖᤡᤰ ᤔᤢᤰᤗᤠ ᤔᤢᤰᤂᤢᤒᤠ ᤀᤠᤱᤃᤠ᤹ ᤏᤡᤛᤢᤱᤅᤠᤱ ᤘᤠ᤹॥ ᤂᤧᤴ ᤔᤧᤱᤃᤡᤀᤣ ᤌᤱ ᤌᤰᤔᤠ ᤁᤧᤎᤢᤶᤒᤠ ᤔᤏᤠ ᤆᤥᤰ॥ ᤂᤢᤏᤧ᤹ ᤐᤠᤴ ᤐᤠ᤺ᤵᤔᤠ ᤛᤡᤰᤁᤢᤶᤛᤠᤒᤠ ᤏᤢ ᤀᤥᤔᤧᤵᤔᤠᤸᤗᤧ ᤛᤠ᤹ᤖᤡᤰ ᤁᤢᤄᤧᤶᤛᤡᤱᤔᤠ ᤁᤧᤕᤠᤰᤐᤠ ᤏᤢᤒᤠ ᤔᤏᤠ ᤘᤠ᤹॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤴ ᤂᤧᤴᤏᤢ ᤘᤠ᤹॥”

¹⁹ ᤂᤧᤸᤗᤧᤆᤥᤃᤢᤸᤗᤧ ᤛᤠᤘᤗᤖᤧ ᤀᤡᤱᤄᤱ ᤁᤧᤛᤠᤒᤠ ᤔᤏᤠᤜᤠ᤹ ᤕᤡᤛᤤᤖᤧᤀᤥ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤐᤠᤱᤄᤢᤛᤡ. “ᤁᤧᤔᤧᤸᤗᤢᤰ ᤁᤧᤃᤶᤒᤠ ᤁᤧᤛ᤻ᤛᤠ ᤍᤠᤀᤢᤍᤧᤴ ᤀᤠᤱᤃᤠ᤹ᤀᤥ ᤐᤠᤱᤂᤧ᤹॥”

²⁰ ᤂᤧᤸᤗᤧᤆᤥᤃᤢᤸᤗᤧ ᤕᤡᤛᤤᤖᤧ ᤛᤣᤜᤥ᤹ ᤛᤢᤰᤘᤠᤎᤡᤰ ᤁᤢᤎᤡᤶ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ. ᤔᤧ᤺ᤴᤍᤠᤈᤩᤠ᤺ᤰ ᤌᤡᤰ ᤜᤧᤰᤁᤩᤠᤱ ᤂᤖᤧ᤺ᤱ ᤁᤧᤃᤢᤒᤠ ᤀᤍᤱ ᤌᤡᤰᤏᤢ ᤁᤢᤛ᤻ᤛᤠ ᤍᤠᤀᤢᤍᤧᤴ ᤛᤠᤘᤗᤖᤧᤀᤥ ᤐᤠᤱᤄᤢᤍᤣᤛᤢ॥

²¹ ᤜᤧᤰᤁᤩᤠᤱ ᤍᤠᤀᤢᤍᤧᤴ ᤛᤠᤘᤗᤖᤧ᤹ᤀᤥ ᤁᤧᤖᤧᤀᤠᤱ ᤁᤢᤛᤧᤘᤠ ᤆᤥ᤺ᤰᤔᤠ ᤜᤣ᤺ᤰᤋᤢ॥ ᤛᤠᤘᤗᤖᤧ ᤂᤧᤴ ᤛᤠ᤹ᤖᤡᤰ ᤁᤢᤛᤡᤖᤠ᤹ ᤌᤠᤱᤔᤠ ᤜᤣ᤺ᤰᤋᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤓᤧᤈᤢᤶ ᤁᤢᤓᤧᤕᤠ ᤁᤧᤒᤱᤒᤠ ᤁᤢᤛᤧᤘᤠᤖᤥᤒᤠ ᤐᤥ᤺ᤰᤂᤧ॥

²² ᤜᤧᤰᤁᤩᤠᤱ ᤛᤠᤘᤗᤖᤧ ᤕᤡᤛᤤᤴ ᤀᤡᤱᤄᤱ ᤜᤠᤰᤋᤢ. “ᤍᤠᤀᤢᤍᤧᤴ ᤀᤠᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤛᤧ ᤕᤠ᤺ᤰᤗ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤢᤕᤠ᤺ᤶᤒᤰᤁᤡᤴ ᤛᤠ᤹ᤖᤡᤰ ᤏᤢᤒᤠ ᤏᤡᤛᤢᤱ॥”

²³ ᤀᤠᤓᤧᤸᤗᤧᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤢᤰᤂᤣ ᤆᤠ᤺ᤳᤇᤧ ᤐᤠᤱᤄᤢᤒᤠ ᤑᤧᤴᤛᤠᤶᤔᤡᤴ ᤛᤠᤘᤗᤖᤧᤀᤥ ᤋᤩᤧ᤺ᤸᤗᤧ. ᤍᤠᤀᤢᤍᤖᤧ ᤁᤢᤔᤢᤰᤗᤠ᤺ᤴ ᤕᤠᤱᤛᤡᤱᤅᤠᤱ ᤔᤢᤰᤂᤢ ᤐᤡᤖᤢ. ᤜᤧᤰᤁᤩᤠᤱ ᤂᤡᤍᤥᤀᤣ ᤛᤠᤘᤗᤧᤴ ᤘᤣ᤺ᤳᤋᤧ॥ ᤜᤧᤰᤁᤩᤠᤱ ᤂᤧᤴ ᤋᤢᤰᤂᤣ ᤁᤧᤈᤠ᤺ᤵᤐᤠ ᤑᤧᤴᤛᤠᤶᤔᤡᤸᤗᤧ ᤂᤢᤏᤧ᤹ ᤗᤧᤖᤢᤀᤠᤱ ᤐᤣ᤺ᤰᤂᤧᤵᤐᤠ ᤘᤕᤧᤖᤥ॥